Wolo Ni Akɛmaje Filipibii Lɛ
3 Naagbee lɛ, minyɛmimɛi, nyɛyaa nɔ nyɛnáa miishɛɛ waa yɛ Nuŋtsɔ lɛ mli.+ Egbaaa minaa akɛ maŋma nyɛ nɛkɛ nibii nɛɛ nɔŋŋ, ejaakɛ ebaabu nyɛhe.
2 Nyɛkwɛa jogbaŋŋ yɛ gbei lɛ ahe; nyɛkwɛa jogbaŋŋ yɛ mɛi ni yeɔ awui lɛ ahe; nyɛkwɛa jogbaŋŋ yɛ mɛi ni folɔɔ heloo lɛ ahe.+ 3 Ejaakɛ wɔ moŋ ji mɛi ni afolɔ amɛ ketia lɛɛlɛŋ lɛ,+ wɔ mɛi ni wɔtsɔɔ Nyɔŋmɔ mumɔ lɛ nɔ wɔkɛ sɔɔmɔ krɔŋŋ hãa ni wɔshiɔ wɔtsitsi yɛ Kristo Yesu mli,+ ni wɔkɛ wɔhiɛ efɔ̃ɔɔ heloo lɛ nɔ lɛ, 4 anɔkwa, kɛ́ mɔ ko yɛ nɔ ko yɛ heloo gbɛfaŋ ni ekɛ ehiɛ baafɔ̃ nɔ lɛ, mi ni.
Kɛ́ mɔ kroko susuɔ akɛ eyɛ nɔ ko ni ekɛ ehiɛ fɔ̃ɔ nɔ yɛ heloo gbɛfaŋ lɛ, miyɛ nɔ ni fe no: 5 afo mi ketia yɛ gbi ni ji kpaanyɔ lɛ nɔ,+ Israelnyo ji mi, mijɛ Benyamin weku lɛ mli, Hebrinyo ni Hebribii fɔ lɛ ji mi;+ yɛ mla gbɛfaŋ lɛ, Farisifonyo ji mi;+ 6 miwa asafo lɛ yi kɛ hiɛdɔɔ;+ yɛ jalɛ ni damɔ mla nɔ gbɛfaŋ lɛ, mitsɔɔ akɛ shwamɔ ko bɛ mihe. 7 Shi nibii ni ji sɛɛnamɔ kɛhã mi tsutsu ko lɛ, mibu amɛ akɛ nibii ni eŋmɛɛ mi* yɛ Kristo lɛ hewɔ.+ 8 Agbɛnɛ hu, yɛ anɔkwale mli lɛ, mibuɔ nibii fɛɛ hu akɛ nibii ni eŋmɛɛ mi yɛ Kristo Yesu, mi-Nuŋtsɔ lɛ, he nilee ni jara wa fe fɛɛ lɛ hewɔ. Lɛ ehewɔ lɛ, mishɛrɛ nibii fɛɛ mishwie, ni mibuɔ amɛ akɛ bɔɔla* babaoo, koni minine ashɛ Kristo nɔ 9 koni ana mi akɛ mi kɛ lɛ efee ekome, jeee yɛ mi diɛŋtsɛ mijalɛ ni jɛ Mla lɛ nɔyeli mli lɛ hewɔ, shi moŋ yɛ jalɛ ni atsɔɔ hemɔkɛyeli+ yɛ Kristo+ mli lɛ nɔ anáa lɛ hewɔ, jalɛ ni jɛ Nyɔŋmɔ ŋɔɔ ni damɔ hemɔkɛyeli nɔ lɛ.+ 10 Oti ni ma mihiɛ ji ni male lɛ kɛ mɔ ni tee lɛ shi lɛ hewalɛ lɛ,+ ni mana amanehului ni ena lɛ eko,+ ni maŋmɛɛ mihe mahã gbele ni tamɔ enɔ lɛ,+ 11 ni makwɛ akɛ kɛ́ eeehi lɛ, minine baanyɛ ashɛ klɛŋklɛŋ shitee kɛmiijɛ gbohii ateŋ* lɛ nɔ lo.+
12 Jeee akɛ minine eshɛ nɔ momo aloo ahã miye emuu momo, shi moŋ miipele mihiɛ gbɛ+ bɔ ni afee ni minine anyɛ ashɛ nɔ ni Kristo Yesu hala mi* yɛ no hewɔ lɛ nɔ.+ 13 Nyɛmimɛi, mibuuu mihe akɛ minine eshɛ nɔ momo; shi miyɛ nɔmimaa yɛ nɔ kome he: Nibii ni yɔɔ sɛɛ lɛ, miijie mihiɛ yɛ nɔ,+ ni nibii ni yɔɔ hiɛgbɛ lɛ moŋ mikpãa mimli ni mashɛ he,+ 14 miipele mihiɛ gbɛ kɛyashɛ oti lɛ he koni minine ashɛ jweremɔnɔ+ ni ji ŋwɛi tsɛmɔ+ ni Nyɔŋmɔ tsɔɔ Kristo Yesu nɔ etsɛɔ wɔ lɛ nɔ. 15 No hewɔ lɛ, wɔ mɛi ni wɔhe wa yɛ hemɔkɛyeli lɛ mli lɛ,+ nyɛhãa wɔjwɛŋa nakai nɔŋŋ, ni kɛ́ nyɛhiɛ jwɛŋmɔ kroko yɛ gbɛ ko nɔ lɛ, Nyɔŋmɔ baajie jwɛŋmɔ ni ja lɛ kpo etsɔɔ nyɛ. 16 Bɔ fɛɛ bɔ ni ji lɛ, he ni wɔtee hiɛ kɛshɛ lɛ, nyɛhãa wɔyaa nɔ wɔnyiɛa jogbaŋŋ yɛ nɛkɛ gbɛ nɛɛ nɔŋŋ nɔ.
17 Nyɛmimɛi, nyɛ fɛɛ nyɛkasea mi,+ ni nyɛyaa nɔ nyɛkwɛa mɛi ni nyiɛɔ yɛ gbɛ ni kɛ nɔkwɛmɔnɔ ni wɔfee wɔhã nyɛ lɛ kpãa gbee lɛ naa lɛ. 18 Ejaakɛ mɛi pii yɛ—tsutsu ko lɛ, mifɔɔ amɛtã tsĩi, shi amrɔ nɛɛ miitsĩ amɛtã hu kɛ yaafo—mɛi ni miinyiɛ akɛ Kristo lɛ piŋmɔ tso* lɛ henyɛlɔi. 19 Amɛnaagbee ji hiɛkpatamɔ, ni amɛmusu ji amɛnyɔŋmɔ, ni yɛ anɔkwale mli lɛ, amɛhiɛgbejianii lɛ ji amɛnunyam, ni amɛkɛ amɛjwɛŋmɔ maa shikpɔŋ nɔ nibii anɔ.+ 20 Shi wɔ lɛ, wɔji ŋwɛi maŋbii,+ ni wɔkɛ miishɛɛ miimɛ yiwalaherelɔ ko ni jɛ jɛmɛ, ni ji Nuŋtsɔ Yesu Kristo lɛ,+ 21 mɔ ni baatsɔ ehewalɛ kpele ni hãa enyɛɔ eŋɔɔ nibii fɛɛ ewoɔ eshishi+ lɛ nɔ etsake wɔgbɔmɔtso ni he waaa lɛ koni etamɔ enunyam gbɔmɔtso+ lɛ.