Gbohiiashitee Lɛ Baaba Lɛɛlɛŋ!

1-2. Mɛɛ hiɛnɔkamɔ ni nɔ bɛ Nyɔŋmɔ tsuji yɔɔ?

HIƐNƆKAMƆ nɔ bɛ, ni etamɔ nɔ ni mɔ fɛɛ mɔ yɛ nɔ ko ni eeshwe ni ehiɛ kã nɔ akɛ ebaaba mli. Akɛ nɔkwɛmɔnɔ lɛ, mɛi ni bɛ hewalɛ lɛ miishwe ni amɛhe awa amɛ. Mɛi komɛi ni boteko gbalashihilɛ mli lɛ miishwe ni amɛbote gbalashihilɛ mli ni amɛná gbãla kpakpa, ni mɛi komɛi ni ebote gbalashihilɛ mli shi amɛfɔko lɛ hu miishwe ni amɛfɔ ni amɛfɔ bii ni yɔɔ gbɔmɔtsoŋ hewalɛ kpakpa. Shi yɛ enɛɛmɛi asɛɛ lɛ, wɔ, ni ji anɔkwa Kristofoi lɛ, yɛ nɔ kroko ni wɔmiishwe ni wɔhiɛ kã nɔ akɛ ebaaba mli, ni no lɛ, ekã wɔtsui nɔ waa. No ji akɛ, wɔmiishwe ni wɔhi shi kɛya naanɔ ni wɔna wɔwekumɛi kɛ wɔnanemɛi ni egboi lɛ ekoŋŋ, ni wɔhiɛ kã nɔ akɛ ebaaba mli.

² Bɔfo Paulo wie akɛ: “Miyɛ hiɛnɔkamɔ yɛ Nyɔŋmɔ mli . . . akɛ abaatee jalɔi kɛ mɛi ni ejaaa fɛɛ shi.” (Bɔf. 24:15) Paulo jeee klɛŋklɛŋ mɔ ni wie gbohiiashitee hiɛnɔkamɔ lɛ he. Nuu anɔkwafo Hiob ni hi shi yɛ blema lɛ hu wie he, ni ehe eye akɛ kɛ́ egbo lɛ, Nyɔŋmɔ baakai lɛ ni etee lɛ shi.​—Hiob 14:7-10, 12-15.

 3. Mɛɛ gbɛ nɔ wɔbaanyɛ wɔná 1 Korintobii yitso 15 lɛ he sɛɛ?

³ “Gbohiiashitee” lɛ ji “shishijee tsɔɔmɔi,” loo tsɔɔmɔi ni tamɔ “faneshi” kɛhã nibii fɛɛ ni Kristofoi heɔ amɛyeɔ lɛ ateŋ ekome. (Heb. 6:1, 2) Yɛ 1 Korintobii yitso 15 lɛ, Paulo wie gbohiiashitee lɛ he. Ŋwanejee ko bɛ he akɛ, nɔ ni ewie lɛ tswa blema Kristofoi lɛ ema shi, ni ebaanyɛ etswa bo hu ema shi ni ehã hemɔkɛyeli ni oyɔɔ akɛ abaatee gbohii lɛ ashi lɛ mli awa, ekɔɔɔ he eko afii abɔ ni okɛhe tsɔɔmɔ nɛɛ oye.

 4. Mɛni ji yiŋtoo titri hewɔ ni wɔheɔ wɔyeɔ akɛ abaatee wɔwekumɛi kɛ wɔnanemɛi ni egboi lɛ shi?

⁴ Le ni wɔle akɛ atee Yesu Kristo shi lɛ ji yiŋtoo titri hewɔ ni wɔheɔ wɔyeɔ akɛ, kɛ́ wɔwekumɛi loo wɔnanemɛi gboi lɛ, abaatee amɛ shi. Be ni Paulo shiɛɔ “sane kpakpa” lɛ ehãa Korintobii lɛ, Yesu shitee lɛ fata nibii ni etsɔɔ amɛ lɛ ahe. (1 Kor. 15:1, 2) Anɔkwa, ewie akɛ, kɛ́ Kristofonyo ko heee eyeee akɛ atee Yesu Kristo shi lɛ, belɛ, sɛɛnamɔ bɛ Kristofonyo ni eji lɛ he. (1 Kor. 15:17) Kɛ́ wɔheee wɔyeee akɛ atee Yesu shi lɛ, belɛ wɔbɛ nɔ ko kwraa ni wɔbaanyɛ wɔdamɔ nɔ wɔkɛɛ akɛ abaatee gbohii ashi.

5-6. Mɛni Paulo wie yɛ 1 Korintobii 15:3, 4 lɛ? Ni mɛɛ gbɛ nɔ wɔnáa he sɛɛ?

⁵ Yɛ 1 Korintobii yitso 15 lɛ shishijee gbɛ nɔŋŋ lɛ, Paulo tsĩ anɔkwa saji etɛ komɛi tã. Nomɛi ji: (1) “Kristo gbo yɛ wɔhe eshai ahewɔ.” (2) “Afu lɛ.” (3) “Atee lɛ shi yɛ gbi ni ji etɛ lɛ nɔ tamɔ bɔ ni Ŋmalɛ lɛ tsɔɔ lɛ.”​—Kanemɔ 1 Korintobii 15:3, 4.

⁶ Mɛɛ gbɛ nɔ wɔnáa Yesu gbele, efuu, kɛ eshitee lɛ he sɛɛ? Yesaia gba akɛ, ‘abaafo Mesia lɛ ashɛ afɔ̃ kɛje hiɛkãalɔi ashikpɔŋ lɛ nɔ,’ ni ‘abaahã lɛ fuuhe yɛ mɛi fɔji ateŋ.’ Shi ekɛwaaa jɛmɛ. Ewie kɛfata he akɛ, ‘Ebaatere mɛi pii ahe esha.’ Yesu fee enɛ be ni ekɛ ewala shã afɔle akɛ kpɔmɔnɔ lɛ. (Yes. 53:8, 9, 12; Mat. 20:28; Rom. 5:8) Enɛ hewɔ lɛ, wɔbaanyɛ wɔkɛɛ akɛ, Yesu gbele, efuu, kɛ eshitee lɛ hãa wɔnáa nɔmimaa diɛŋtsɛ akɛ, wɔbaaye wɔhe kɛje esha kɛ gbele he, ni wɔbaana wɔsuɔlɔi ni egboi lɛ ekoŋŋ.

7-8. Mɛni ji nɔ kome hewɔ ni Kristofoi heɔ amɛyeɔ akɛ atee Yesu shi lɛɛlɛŋ?

⁷ Kɛ́ ateee Yesu shi lɛ, belɛ wɔbɛ nɔ ko ni wɔbaanyɛ wɔdamɔ nɔ wɔkɛɛ akɛ abaatee mɛi ashi. No hewɔ lɛ, sanebimɔ lɛ ji, ‘Ani atee Yesu shi lɛɛlɛŋ?’ Hɛɛ! Ni wɔyɛ nibii pii ni maa enɛ nɔ mi.

⁸ Ekome ji akɛ, be ni atee Yesu shi lɛ, mɛi pii na lɛ kɛ amɛhiŋmɛi. (1 Kor. 15:5-7) Klɛŋklɛŋ mɔ ni Paulo tsĩ etã akɛ ena Yesu be ni atee lɛ shi lɛ ji, bɔfo Petro (Kefa). Yesu kaselɔi komɛi hu wie akɛ, be ni atee Yesu shi lɛ, Petro na lɛ. (Luka 24:33, 34) Mɛi ni ji enyɔ ni Paulo kɛɛ amɛna Yesu ji, “Mɛi Nyɔŋma Kɛ Enyɔ lɛ,” loo bɔfoi lɛ. Kɛkɛ ni ewie akɛ, Kristo “jie ehe kpo etsɔɔ nyɛmimɛi ni fa fe 500 yɛ be kome mli,” ni eeenyɛ efee akɛ, enɛ ji be ni Yesu kɛ amɛ kpe yɛ Galilea ni abɔ he amaniɛ yɛ Mateo 28:16-20 lɛ. Agbɛnɛ hu, Yesu jie ehe kpo etsɔɔ Yakobo. Ekã shi faŋŋ akɛ, Yakobo nɛɛ ji Yesu nyɛmi, ni be ni Yesu yɔɔ wala mli lɛ, eheee eyeee akɛ lɛ ji Mesia lɛ. (Yoh. 7:5) Shi be ni atee Yesu shi ni ejie ehe kpo etsɔɔ lɛ lɛ, ehe eye agbɛnɛ. Nɔ kome ni sa kadimɔ ji akɛ, Paulo ŋma wolo nɛɛ yɛ aaafee afi 55 Ŋ.B. No mli lɛ, mɛi ni na Yesu be ni atee lɛ shi lɛ ateŋ mɛi pii yɛ wala mli lolo. No hewɔ lɛ, kɛ́ mɔ ko heee eyeee akɛ atee lɛ shi lɛ, mɛi pii yɛ ni ebaanyɛ ebi amɛ.

 9. Yɛ nɔ ni awie yɛ Bɔfoi 9:3-5 lɛ naa lɛ, mɛni hewɔ Paulo baanyɛ aye odase akɛ atee Yesu shi lɛ?

⁹ Yesu shitee lɛ sɛɛ afii komɛi lɛ, ejie ehe kpo etsɔɔ Paulo diɛŋtsɛ hu. (1 Kor. 15:8) No mli lɛ Paulo, ni nakai beiaŋ lɛ atsɛɔ lɛ Saulo lɛ, nyiɛ gbɛ eeya Damasko. Kɛkɛ ni enu Yesu gbee ni ena lɛ yɛ ŋwɛi yɛ ninaa mli. (Kanemɔ Bɔfoi 9:3-5.) Paulo sane lɛ ji nɔ kroko ni yeɔ odase akɛ atee Yesu shi lɛɛlɛŋ.​—Bɔf. 26:12-15.

10. Be ni Paulo na faŋŋ akɛ atee Yesu shi lɛ, mɛni no tsirɛ lɛ ni efee?

¹⁰ Paulo wa Kristofoi lɛ ayi. Shi be ni ebana faŋŋ akɛ atee Yesu shi lɛ, efee bɔ fɛɛ bɔ ni ebaanyɛ koni eye ebua mɛi ni amɛhe anɔkwa sane nɛɛ amɛye, ni ekã shi faŋŋ akɛ, mɛi komɛi ni le bɔ ni eba ejeŋ ehã tsutsu ko lɛ bo lɛ toi waa. Paulo yiŋ efeee lɛ kɔshikɔshi bibioo po akɛ atee Yesu shi. No hewɔ lɛ, yɛ yi ni ayi lɛ, tsuŋ ni awo lɛ, kɛ lɛlɛ ni ekɛyasha shi lɛ fɛɛ sɛɛ lɛ, etswa efai shi akɛ, kɛ́ gbo ebaagbo po lɛ, ebaahã mɛi ale akɛ Yesu gbo ni atee lɛ shi. (1 Kor. 15:9-11; 2 Kor. 11:23-27) Ani nibii ni wɔsusu he yɛ kukuji nɛɛ amli lɛ hãaa ona faŋŋ akɛ atee Yesu shi lɛɛlɛŋ? Ni ani no hãaa hemɔkɛyeli ni oyɔɔ akɛ wɔsɛɛ lɛ abaatee gbohii lɛ ashi lɛ mli awa?

11. Mɛni eeenyɛ efee akɛ no hewɔ nyɛmimɛi komɛi ni yɔɔ Korinto lɛ ná susumɔi ni ejaaa yɛ gbohiiashitee lɛ he?

¹¹ No mli lɛ Kristofoi komɛi ni yɔɔ Korinto lɛ hiɛ susumɔi ni ejaaa yɛ gbohiiashitee lɛ he, ni amɛteŋ mɛi komɛi po kɛɛ “gbohiiashitee ko bɛ.” Mɛni hã eba lɛ nakai? (1 Kor. 15:12) Jeŋ nilelɔi ni yɔɔ maŋ ko ni bɛŋkɛ Korinto, ni ji Atene lɛ mli lɛ, heee amɛyeee akɛ atee Yesu shi. Kɛ́ obaakai lɛ, be ko be ni Paulo tee jɛmɛ ni ewie akɛ atee Yesu shi lɛ, amɛye ehe fɛo. Eeenyɛ efee akɛ, susumɔ ni jeŋ nilelɔi nɛɛ hiɛ loo susumɔi krokomɛi ni tamɔ nakai lɛ ná Kristofoi ni yɔɔ Korinto lɛ ateŋ mɛi komɛi anɔ hewalɛ. (Bɔf. 17:18, 31, 32) Etamɔ nɔ ni amɛteŋ mɛi komɛi hu yasusu akɛ gbohiiashitee lɛ ji mfonirifeemɔŋ wiemɔ ko kɛkɛ, ni akɛ, kɛ́ akɛɛ mɔ ko egbo lɛ, belɛ etsɔɔ akɛ mɔ lɛ feɔ esha, shi kɛ́ akɛɛ atee mɔ lɛ shi lɛ, belɛ etsɔɔ akɛ mɔ lɛ ekpa eshafeemɔ ni ebatsɔ Kristofonyo. Wɔleee nɔ pɔtɛɛ hewɔ ni Kristofoi nɛɛ heee gbohiiashitee lɛ amɛyeee lɛ. Shi wɔle akɛ, he ni amɛheee amɛyeee lɛ hewɔ lɛ, amɛhemɔkɛyeli lɛ fee efolo, ejaakɛ kɛ́ Nyɔŋmɔ eteee Yesu shi lɛ, belɛ awoko kpɔmɔnɔ lɛ. Ni kɛ́ awoko kpɔmɔnɔ lɛ, belɛ akɛ amɛhe eshai ekeko amɛ. Ni kɛ́ akɛ amɛhe eshai ekeko amɛ lɛ, belɛ amɛbɛ hiɛnɔkamɔ ko kwraa.​—1 Kor. 15:13-19; Heb. 9:12, 14.

12. Yɛ nɔ ni awie yɛ 1 Petro 3:18, 22 lɛ naa lɛ, mɛni hã esoro Yesu shitee lɛ kwraa yɛ gbohiiashitei ni tsɔ enɔ lɛ hiɛ lɛ ahe?

¹² Paulo le akɛ, “atee Kristo shi kɛjɛ gbohii ateŋ.” Kristo shitee lɛ hi kwraa fe mɛi ni tsɔ ehiɛ lɛ anɔ lɛ, ejaakɛ amɛ lɛ, amɛgboi ekoŋŋ, shi lɛ lɛ, egboŋ dɔŋŋ. Paulo wie akɛ, Kristo ji “mɛi ni egboi lɛ ateŋ klɛŋklɛŋ yibii.” Mɛni enɛ tsɔɔ? Etsɔɔ akɛ, lɛ ji klɛŋklɛŋ mɔ ni atee lɛ shi kɛ mumɔŋ gbɔmɔtso, ni agbɛnɛ hu, lɛ ji klɛŋklɛŋ mɔ ni be ni atee lɛ shi lɛ, etee ŋwɛi.​—1 Kor. 15:20; Bɔf. 26:23; kanemɔ 1 Petro 3:18, 22.

13. Mɛɛ gbɛ nɔ Paulo kɛ Adam to Yesu he?

¹³ Te feɔ tɛŋŋ ni gbɔmɔ kome gbele hãa mɛi akpekpei abɔ náa wala? Paulo hã sanebimɔ nɛɛ hetoo, ni hetoo ni ehã lɛ mli kã shi faŋŋ. Ekɛ Adam to Kristo he ni ewie yɛ Adam he akɛ: “Gbele tsɔ gbɔmɔ nɔ kɛba.” Be ni Adam fee esha lɛ, ekɛ gbele ba lɛ kɛ eseshibii fɛɛ anɔ. Kɛbashi ŋmɛnɛ lɛ, wɔmiina nibii gbohii ni ejɛ etoigbele lɛ mli kɛba lɛ. Shi Paulo wie yɛ Yesu he akɛ: “Gbohiiashitee hu baatsɔ gbɔmɔ nɔ kɛba.” Akɛni Nyɔŋmɔ tee e-Bi lɛ shi hewɔ lɛ, wɔná hiɛnɔkamɔ. Kɛkɛ ni Paulo kɛshi sɛɛ akɛ: “Ejaakɛ bɔ ni Adam mli ni mɛi fɛɛ gboiɔ yɛ lɛ, nakai nɔŋŋ hu Kristo lɛ mli abaahã mɛi fɛɛ ahiɛ akãmɔ yɛ.”​—1 Kor. 15:21, 22.

14. Ani abaatee Adam shi? Tsɔɔmɔ mli.

¹⁴ Be ni Paulo wie akɛ “Adam mli ni mɛi fɛɛ gboiɔ yɛ” lɛ, no mli lɛ te etsɔɔ tɛŋŋ? No mli lɛ, eetsɔɔ akɛ Adam seshibii fɛɛ ná esha kɛ emuu ni ayeee akɛ gboshinii kɛjɛ Adam dɛŋ, ni no hewɔ lɛ, amɛbaagboi. (Rom. 5:12) Adam fataaa mɛi ni ‘abaahã amɛhiɛ akãmɔ’ lɛ ahe, ejaakɛ efataaa mɛi ni Kristo bagbo ehã lɛ ahe. Mɛni hewɔ? Ejaakɛ be ni efee esha lɛ, no mli lɛ, eye emuu. No hewɔ lɛ, eje gbɛ waa ni efee esha lɛ. Esane lɛ tamɔ mɛi ni “gbɔmɔ Bi lɛ” baakojo amɛ akɛ abotiai lɛ; amɛ fɛɛ “amɛbaaya naanɔ hiɛkpatamɔ mli.”​—Mat. 25:31-33, 46; Heb. 5:9.

15. Namɛi fata “mɛi fɛɛ” lɛ ni Paulo kɛɛ ‘abaahã amɛhiɛ akãmɔ lɛ’ ahe?

¹⁵ Paulo wie hu akɛ, “Kristo lɛ mli abaahã mɛi fɛɛ ahiɛ akãmɔ yɛ.” (1 Kor. 15:22) Mɛni enɛ hu tsɔɔ? Mɛi ni afɔ amɛ mu lɛ fata “mɛi fɛɛ” lɛ ni abaatee amɛ shi lɛ ahe, ni akɛni Kristofoi ni yɔɔ Korinto lɛ, ni ji, mɛi ni Paulo ŋma wolo nɛɛ eyahã lɛ ji mɛi ni afɔ amɛ mu, ni amɛyɛ hiɛnɔkamɔ akɛ kɛ́ atee amɛ shi lɛ amɛbaaya ŋwɛi hewɔ lɛ, amɛ hu amɛfata he. Paulo wie yɛ amɛhe akɛ, ‘afee amɛ krɔŋkrɔŋ yɛ Kristo Yesu mli, ni atsɛ amɛ koni amɛbafee mɛi krɔŋkrɔŋi.’ No sɛɛ lɛ, ewie “mɛi ni egboi yɛ Kristo mli lɛ” hu ahe. (1 Kor. 1:2; 15:18; 2 Kor. 5:17) Yɛ wolo kroko ni Paulo ŋma lɛ mli lɛ, ewie akɛ, ‘Mɛi ni kɛ Yesu efee ekome yɛ gbele ni tamɔ enɔ lɛ mli lɛ kɛ lɛ baafee ekome yɛ shitee ni tamɔ enɔ lɛ mli hu.’ (Rom. 6:3-5) Atee Yesu shi kɛ mumɔŋ gbɔmɔtso, ni etee ŋwɛi. No hewɔ lɛ, nakai nɔŋŋ ebaaba lɛ yɛ mɛi fɛɛ “ni kɛ Kristo efee ekome,” ni ji mɛi fɛɛ ni afɔ amɛ mu lɛ agbɛfaŋ.

16. Mɛni tsɛ ni Paulo tsɛ Yesu akɛ “klɛŋklɛŋ yibii” lɛ tsɔɔ?

¹⁶ Paulo wie akɛ, atee Kristo shi “akɛ mɛi ni egboi lɛ ateŋ klɛŋklɛŋ yibii.” Shi wɔle akɛ, Yesu jeee klɛŋklɛŋ mɔ ni atee lɛ shi yɛ shikpɔŋ lɛ nɔ. Anɔkwa, be ni atee Yesu shi lɛ, no mli lɛ, atee Lazaro kɛ mɛi krokomɛi shi kɛba wala mli yɛ shikpɔŋ lɛ nɔ momo. Kɛ́ nakai ni lɛ, mɛni hewɔ Paulo tsɛ Yesu akɛ “mɛi ni egboi lɛ ateŋ klɛŋklɛŋ yibii” lɛ? Etsɛ lɛ nakai ejaakɛ, lɛ ji klɛŋklɛŋ mɔ ni atee lɛ shi kɛ mumɔŋ gbɔmɔtso, ni ahã lɛ naanɔ wala. Yɛ gbɛ ko nɔ lɛ, etamɔ klɛŋklɛŋ yibii ni Israelbii lɛ kpaa ni amɛkɛhãa Nyɔŋmɔ lɛ. Tsɛ ni Paulo tsɛ Yesu akɛ “klɛŋklɛŋ yibii” lɛ tsɔɔ hu akɛ, jeee lɛ pɛ abaatee lɛ shi kɛya ŋwɛi. Sɛɛ mli lɛ, abaatee bɔfoi lɛ kɛ mɛi krokomɛi “ni kɛ Kristo efee ekome lɛ” hu shi kɛya ŋwɛi.

17. Mɛɛ be “mɛi ni kɛ Kristo efee ekome lɛ” agbohiiashitee lɛ je shishi?

¹⁷ Be ni Paulo ŋma wolo lɛ eyahã Korintobii lɛ, no mli lɛ be ni abaatee “mɛi ni kɛ Kristo efee ekome lɛ” shi kɛya ŋwɛi lɛ shɛko. Nɔ ko ni Paulo wie lɛ hãa wɔnaa nakai. Ewie akɛ: “Mɔ fɛɛ mɔ yɛ lɛ diɛŋtsɛ egbɛhe ni sa: Kristo ji klɛŋklɛŋ yibii lɛ, no sɛɛ lɛ, mɛi ni ji Kristo lɛ nii lɛ, yɛ be ni eba lɛ mli.” (1 Kor. 15:23; 1 Tes. 4:15, 16) Nɔ ni Paulo wie nɛɛ hãa wɔnaa akɛ, ‘be ni Kristo eba lɛ’ mli abaatee bɔfoi lɛ kɛ mɛi krokomɛi ni akɛ mumɔ efɔ amɛ mu lɛ shi kɛya ŋwɛi ni amɛkɛ Yesu afee ekome yɛ shitee ni tamɔ enɔ lɛ mli, ni nakai be lɛ mli wɔyɔɔ ŋmɛnɛ lɛ.

18. (a) Mɛni hewɔ wɔbaanyɛ wɔkɛɛ akɛ yɛ mɛi ni abaatee amɛ shi kɛya ŋwɛi lɛ asɛɛ lɛ, abaatee mɛi krokomɛi hu shi? (b) Yɛ nɔ ni awie yɛ 1 Korintobii 15:24-26 lɛ naa lɛ, wɔsɛɛ lɛ, mɛni baaya nɔ yɛ ŋwɛi?

¹⁸ Ni Kristofoi anɔkwafoi pii ni bɛ ŋwɛi hiɛnɔkamɔ lɛ hu? Ani abaatee amɛ hu shi? Hɛɛ. Biblia lɛ kɛɔ akɛ, Paulo kɛ mɛi krokomɛi ni baaya ŋwɛi lɛ anine baashɛ “klɛŋklɛŋ shitee kɛmiijɛ gbohii ateŋ lɛ nɔ.” (Fip. 3:11) Enɛ tsɔɔ akɛ shitee kroko yɛ, aloo jeee nakai? Enɛ kaiɔ wɔ hiɛnɔkamɔ ni Hiob wie akɛ eyɔɔ lɛ. (Hiob 14:15) “Mɛi ni ji Kristo lɛ nii lɛ” kɛ lɛ baahi ŋwɛi be ni efoɔ nɔyelii fɛɛ kɛ hegbɛi fɛɛ kɛ hewalɛ fɛɛ sɛɛ lɛ. Nakai beiaŋ lɛ, abaafo “naagbee henyɛlɔ,” ni ji gbele lɛ sɛɛ. No hewɔ lɛ, ekã shi faŋŋ akɛ, mɛi ni abaatee amɛ shi kɛya ŋwɛi lɛ gboiŋ dɔŋŋ. Ni mɛi ni bɛ ŋwɛi hiɛnɔkamɔ lɛ hu?​—Kanemɔ 1 Korintobii 15:24-26.

19. Mɛɛ hiɛnɔkamɔ yɔɔ kɛhã mɛi ni bɛ ŋwɛi hiɛnɔkamɔ lɛ?

¹⁹ Mɛɛ hiɛnɔkamɔ yɔɔ kɛhã mɛi ni bɛ ŋwɛi hiɛnɔkamɔ lɛ? Nɔ ko ni Paulo wie lɛ hãa wɔnaa hiɛnɔkamɔ ni yɔɔ kɛhã amɛ. Ewie akɛ: “Miyɛ hiɛnɔkamɔ . . . akɛ abaatee jalɔi kɛ mɛi ni ejaaa fɛɛ shi.” (Bɔf. 24:15) Wɔle akɛ, mɛi ni ejaaa nyɛŋ aya ŋwɛi. No hewɔ lɛ, eyɛ faŋŋ akɛ, ŋmalɛ nɛɛ kɔɔ mɛi ni abaatee amɛ shi kɛba shikpɔŋ lɛ nɔ lɛ ahe.

20. Mɛɛ gbɛ nɔ nikasemɔ nɛɛ ehã hiɛnɔkamɔ ni oyɔɔ akɛ abaatee gbohii ashi lɛ mli ewa?

²⁰ Wɔyiŋ efeee wɔ kɔshikɔshi bibioo po akɛ ‘abaatee gbohii ashi’! Kɛ́ mɛi ni abaatee amɛ shi kɛba shikpɔŋ lɛ nɔ lɛ ye Yehowa anɔkwa lɛ, amɛbaahi shi kɛya naanɔ. Ani oheɔ enɛ oyeɔ? Ŋwanejee ko bɛ he akɛ, oheɔ oyeɔ. Le ni wɔle akɛ kɛ́ Kristo kɛ mɛi ni kɛ lɛ “baaye nɔ akɛ maŋtsɛmɛi afii 1,000 lɛ” bɔi nɔyeli lɛ abaatee gbohii ashi lɛ baanyɛ ashɛje wɔmii waa kɛ́ wɔwekunyo ko loo wɔnaanyo ko gbo. (Kpo. 20:6) Bo hu obaanyɛ ohe oye akɛ, kɛ́ aleenɔ ogbo dani Kristo Afii Akpe Nɔyeli lɛ je shishi lɛ, abaatee bo shi. Hiɛnɔkamɔ nɛɛ “hãaa mɔ nine anyɛ shi.” (Rom. 5:5) Ebaanyɛ ewaje bo amrɔ nɛɛ, ni ehã oya nɔ osɔmɔ Nyɔŋmɔ kɛ miishɛɛ. Shi yɛ nikasemɔ ni nyiɛ sɛɛ lɛ mli lɛ, wɔbaakwɛ nibii krokomɛi ni wɔbaanyɛ wɔkase yɛ 1 Korintobii yitso 15 lɛ mli.