Ester

2 Nibii nɛɛ asɛɛ be ni Maŋtsɛ Ahasweros+ mlila lɛ naa eba shi lɛ, ekai nɔ ni Vashti fee lɛ,+ kɛ yiŋ ni akpɛ yɛ Vashti he lɛ.+ 2 Kɛkɛ ni maŋtsɛ lɛ sɔɔlɔi lɛ kɛɛ lɛ akɛ: “Ayatao oblayei froi ni he yɔɔ fɛo abahã maŋtsɛ. 3 Maŋtsɛ ahole nɔkwɛlɔi yɛ emaŋtsɛyeli lɛ mli kpokpai lɛ fɛɛ anɔ+ koni amɛbua oblayei froi ni he yɔɔ fɛo lɛ anaa kɛba Shushan* mɔɔ* lɛ mli, ni amɛkɛ amɛ abato yei ashĩa lɛ. Akɛ amɛ awo Hegai+ ni ji maŋtsɛ lɛ piafonyo* lɛ kɛ mɔ ni kwɛɔ yei lɛ anɔ lɛ dɛŋ, koni akpa amɛ mui srɔtoi ni baahã amɛhe afee fɛo waa.* 4 Ni oblayoo ni maŋtsɛ lɛ baaná ehe miishɛɛ fe fɛɛ lɛ baatsɔ maŋnyɛ yɛ Vashti najiaŋ.”+ Ŋaawoo lɛ sa maŋtsɛ lɛ hiɛ, ni efee nakai.

5 No mli lɛ, Yudanyo ko yɛ Shushan*+ mɔɔ* lɛ mli, ni atsɛɔ lɛ Mordekai,+ epapa ji Yair, ni Yair hu papa ji Shimei, ni Shimei hu papa ji Kish, eji Benyaminnyo+ 6 ni aŋɔ lɛ* nom kɛjɛ Yerusalem afata Yuda maŋtsɛ Yekonia*+ kɛ maŋbii ni Babilon maŋtsɛ Nebukadnezar baŋɔ amɛ nom kɛtee lɛ ahe. 7 No mli lɛ, Mordekai ji mɔ ni kwɛɔ Hadasa,* ni ji Ester, epapa nyɛmi nuu biyoo lɛ,+ ejaakɛ Ester bɛ papa ni ebɛ mami hu. Oblayoo nɛɛ he yɛ fɛo waa, ni be ni epapa kɛ emami gboi lɛ, Mordekai ŋɔ lɛ akɛ ebiyoo. 8 Be ni ashiɛ maŋtsɛ lɛ wiemɔ lɛ kɛ emla lɛ, ni akɛ oblayei babaoo ba Shushan* mɔɔ* lɛ mli koni Hegai akwɛ amɛnɔ lɛ,+ akɛ Ester hu ba maŋtsɛ lɛ shĩa lɛ koni Hegai, mɔ ni kwɛɔ yei lɛ anɔ lɛ, akwɛ enɔ.

9 Hegai ná oblayoo nɛɛ he miishɛɛ, ni oblayoo lɛ hiɛ ba nyam yɛ ehiɛ,* ni ehã ato mui srɔtoi ni akɛbaakpa+ lɛ* koni ehe afee fɛo fe tsutsu lɛ, kɛ niyenii ni ebaaye lɛ he gbɛjianɔ oya nɔŋŋ, ni ehala oblayei sɔɔlɔi ni yɔɔ maŋtsɛ shĩa lɛ ateŋ kpawo koni amɛsɔmɔ lɛ. Agbɛnɛ hu, ejie lɛ kɛ oblayei ni sɔmɔɔ lɛ lɛ eyato yei ashĩa lɛ he ni hi fe fɛɛ lɛ. 10 Ester ewieee nɔ ko yɛ emaŋbii+ lɛ kɛ ewekumɛi lɛ ahe, ejaakɛ Mordekai+ ewo lɛ kitã akɛ ekakɛɛ mɔ ko mɔ ko.+ 11 Daa gbi lɛ, Mordekai yasharaa shi yɛ yei ashĩa lɛ kpo lɛ hiɛ koni ele bɔ ni Ester yɔɔ kɛ bɔ ni nibii yaa lɛ yɛ Ester gbɛfaŋ.

12 Kɛ́ eshɛ oblayoo fɛɛ oblayoo nɔ lɛ, eyaa Maŋtsɛ Ahasweros ŋɔɔ. Afeɔ enɛ be ni akpa lɛ mui srɔtoi nyɔji 12 tamɔ bɔ ni ato ni afee yei lɛ. Naa bɔ ni akpaa yei lɛ mui srɔtoi lɛ ahãa koni amɛhe afee fɛo waa*—akɛ mire mu+ kpaa amɛ nyɔji ekpaa, ni no sɛɛ lɛ, akɛ balsam mu+ kɛ mui krokomɛi kpaa amɛ nyɔji ekpaa* koni amɛhe afee fɛo waa. 13 No sɛɛ lɛ, oblayoo lɛ baanyɛ aya maŋtsɛ lɛ ŋɔɔ, ni kɛ́ eeshi yei ashĩa lɛ kɛya maŋtsɛ lɛ shĩa lɛ, nɔ fɛɛ nɔ ni ebiɔ lɛ, ahãa lɛ. 14 Eyaa maŋtsɛ lɛ ŋɔɔ gbɛkɛ, ni enɔ jetsɛremɔ lɛ ekuɔ esɛɛ kɛyaa yei ashĩa ni ji enyɔ ni Shahashgaz, maŋtsɛ lɛ piafonyo*+ ni kwɛɔ maŋtsɛ lɛ hemɛi* lɛ anɔ lɛ kwɛɔ nɔ lɛ mli. Oblayoo lɛ eyaŋ maŋtsɛ lɛ ŋɔɔ dɔŋŋ, ja maŋtsɛ lɛ ená ehe miishɛɛ waa ni ekɛ oblayoo lɛ gbɛ́i etsu ayatsɛ lɛ.+

15 Ni be ni eshɛ Ester, ni ji Mordekai tsɛkwɛ̃ Abihail biyoo lɛ, mɔ ni Mordekai eŋɔ lɛ akɛ ebiyoo+ lɛ nɔ koni eya maŋtsɛ lɛ ŋɔɔ lɛ, Ester biii nɔ ko nɔ ko, ja nɔ ni Hegai, maŋtsɛ lɛ piafonyo* ni kwɛɔ yei lɛ anɔ lɛ kɛɛ ahã lɛ lɛ pɛ. (Yɛ be nɛɛ mli fɛɛ lɛ, Ester hiɛ ba nyam yɛ mɔ fɛɛ mɔ ni naa lɛ lɛ hiɛ.) 16 Akɛ Ester tee Maŋtsɛ Ahasweros ŋɔɔ yɛ emaŋtsɛyeli shĩa lɛ, yɛ nyɔɔŋ ni ji nyɔŋma, ni ji Tebet* nyɔɔŋ lɛ nɔ, yɛ enɔyeli afi ni ji kpawo lɛ mli.+ 17 Ni maŋtsɛ lɛ basumɔ Ester fe yei krokomɛi lɛ fɛɛ, ni Ester hiɛ ba nyam yɛ maŋtsɛ lɛ hiɛ, ni ená Ester he miishɛɛ* fe oblayei froi krokomɛi lɛ fɛɛ. No hewɔ lɛ, maŋtsɛ lɛ kɛ maŋnyɛ akekere* lɛ fi Ester yitso, ni ewó lɛ maŋnyɛ+ yɛ Vashti najiaŋ.+ 18 Ni maŋtsɛ lɛ ŋmɛ okpɔlɔ wulu ehã elumɛi lɛ kɛ etsuji lɛ fɛɛ, eŋmɛ okpɔlɔ lɛ yɛ Ester hewɔ. Ni ehã kpokpai lɛ ye amɛhe, ni maŋtsɛ lɛ kekee nii yɛ nii ni eyɔɔ lɛ naa.

19 Agbɛnɛ, be ni abua oblayei froi*+ lɛ anaa nɔ ni ji shii enyɔ nɔ lɛ, no mli lɛ, Mordekai ta maŋtsɛ agbó lɛ naa. 20 Ester ewieee nɔ ko yɛ emaŋbii lɛ kɛ ewekumɛi lɛ ahe,+ tamɔ bɔ ni Mordekai ewo lɛ kitã lɛ; Ester tee nɔ efee nɔ ni Mordekai kɛɛ lɛ lɛ fɛɛ tamɔ bɔ ni efeɔ be ni Mordekai kwɛɔ lɛ lɛ.+

21 Yɛ nakai gbii lɛ amli, be ni Mordekai taa maŋtsɛ lɛ agbó lɛ naa lɛ, maŋtsɛ shĩa onukpai enyɔ ni atsɛɔ amɛ Bigtan, kɛ Teresh, ni ji agbonaakwɛlɔi lɛ, amli fu ni amɛtsɔ ŋaa koni amɛgbe Maŋtsɛ Ahasweros.* 22 Shi Mordekai ná ele, ni eyakɛɛ Maŋnyɛ Ester oya nɔŋŋ. Kɛkɛ ni Ester kɛɛ maŋtsɛ lɛ yɛ Mordekai gbɛ́i mli.* 23 No hewɔ lɛ, atao sane lɛ mli ni ana akɛ eyɛ mli, ni asɛŋ hii enyɔ lɛ fɛɛ yɛ tso nɔ; ni aŋma enɛɛmɛi fɛɛ yɛ yinɔsaji awolo lɛ mli yɛ maŋtsɛ lɛ hiɛ.+