Wolo Ni Akɛmaje Romabii Lɛ
5 No hewɔ lɛ, amrɔ nɛɛ ni atsɔ hemɔkɛyeli nɔ abu wɔ jalɔi lɛ,+ nyɛhãa wɔhãa toiŋjɔlɛ ayaa nɔ ahia wɔ kɛ Nyɔŋmɔ teŋ* kɛtsɔ wɔ-Nuŋtsɔ Yesu Kristo nɔ,+ 2 mɔ nɔ ni wɔtsɔ hemɔkɛyeli nɔ wɔná gbɛ hu kɛba dromɔ ni wɔdamɔ mli amrɔ nɛɛ mli lɛ;+ ni nyɛhãa wɔnyaa* yɛ Nyɔŋmɔ anunyam lɛ he hiɛnɔkamɔ lɛ hewɔ. 3 Jeee no kɛkɛ, shi moŋ nyɛhãa wɔnyaa* yɛ amanehului amli hu,+ ejaakɛ wɔle akɛ amanehulu lɛ tsɛɔ shifimɔ kɛbaa;+ 4 shifimɔ lɛ hu tsɛɔ shihilɛ ni Nyɔŋmɔ náa he miishɛɛ kɛbaa;+ shihilɛ ni Nyɔŋmɔ náa he miishɛɛ lɛ hu tsɛɔ hiɛnɔkamɔ kɛbaa,+ 5 ni hiɛnɔkamɔ lɛ hãaa mɔ nine anyɛ shi;*+ ejaakɛ atsɔ mumɔ krɔŋkrɔŋ ni akɛhã wɔ lɛ nɔ afɔse Nyɔŋmɔ suɔmɔ lɛ awo wɔtsuii amli.+
6 Anɔkwa, be ni wɔji eshafeelɔi beebe lɛ,*+ Kristo gbo ehã eshafeelɔi yɛ be ni ato lɛ mli. 7 Ekpakpa ko dani mɔ ko baagbo ehã jalɔ; shi ekolɛ, mɔ ko baasumɔ ni egbo ehã gbɔmɔ kpakpa. 8 Shi Nyɔŋmɔ jieɔ lɛ diɛŋtsɛ esuɔmɔ lɛ yi ehãa wɔ, akɛ be ni wɔkã he wɔji eshafeelɔi lɛ, Kristo gbo ehã wɔ.+ 9 No hewɔ lɛ, amrɔ nɛɛ akɛni atsɔ elá lɛ nɔ abu wɔ jalɔi hewɔ lɛ,+ wɔbaanyɛ wɔná nɔmimaa akɛ abaatsɔ enɔ ahere wɔyiwala kɛjɛ mlifu mli.+ 10 Ejaakɛ kɛ́ be ni wɔji henyɛlɔi lɛ, atsɔ e-Bi lɛ gbele lɛ nɔ asaa wɔ kɛ Nyɔŋmɔ teŋ lɛ,+ amrɔ nɛɛ ni asaa wɔ kɛ lɛ teŋ lɛ, wɔbaanyɛ wɔná nɔmimaa akɛ abaatsɔ Kristo wala nɔ ahere wɔyiwala. 11 Jeee no kɛkɛ, shi wɔmiinya yɛ Nyɔŋmɔ mli hu kɛtsɔ wɔ-Nuŋtsɔ Yesu Kristo nɔ, mɔ nɔ ni wɔtsɔ ni amrɔ nɛɛ asaa wɔ kɛ Nyɔŋmɔ teŋ lɛ.+
12 Enɛ hewɔ ni bɔ ni gbɔmɔ kome nɔ esha tsɔ kɛba je lɛ mli, ni gbele tsɔ esha nɔ kɛba,+ ni no hã gbele tsɛŋe gbɔmɛi fɛɛ, ejaakɛ amɛ fɛɛ amɛfee esha lɛ+—. 13 Ejaakɛ esha yɛ jeŋ dani akɛ Mla lɛ hã, shi kɛ́ mla bɛ lɛ, abuuu esha ashiii mɔ ko.+ 14 Shi gbele ye maŋtsɛ kɛjɛ Adam—mɔ ni je mɔ ni baaba lɛ—nɔ kɛbashi Mose nɔ, eye mɛi po ni efeko esha ni tamɔ Adam mlatɔmɔ lɛ anɔ.+
15 Shi nikeenii lɛ tamɔɔɔ tɔmɔ lɛ. Ejaakɛ kɛ́ gbɔmɔ kome tɔmɔ hewɔ ni mɛi pii gboi lɛ, belɛ Nyɔŋmɔ dromɔ lɛ kɛ enikeenii lɛ ni atsɔ gbɔmɔ kome+ ni ji Yesu Kristo dromɔ lɛ nɔ akɛhã lɛ hu baafa kɛteke nɔ* kɛhã mɛi pii!+ 16 Agbɛnɛ hu, nibii ni jɛ dromɔ nikeenii lɛ mli kɛba lɛ yɛ srɔto yɛ nibii ni jɛ esha ni gbɔmɔ kome lɛ fee lɛ mli kɛba lɛ ahe.+ Ejaakɛ nɔ ni jɛ tɔmɔ kome lɛ he kojomɔ lɛ mli kɛba ji fɔbuu,+ shi nikeenii ni nyiɛ tɔmɔi pii asɛɛ kɛba ji akɛ abu mɛi jalɔi.+ 17 Ejaakɛ kɛ́ mɔ kome tɔmɔ lɛ hewɔ jɛ ni gbele tsɔ nakai mɔ kome lɛ nɔ eye maŋtsɛ lɛ,+ wɔbaanyɛ wɔná nɔmimaa akɛ mɛi ni náa dromɔ kɛ jalɛ akɛ dromɔ nikeenii+ ni fa kɛteke nɔ lɛ baatsɔ mɔ kome ni ji Yesu Kristo lɛ nɔ aye nɔ akɛ maŋtsɛmɛi+ yɛ wala mli!+
18 No hewɔ lɛ, agbɛnɛ, bɔ ni atsɔ tɔmɔ kome nɔ abu gbɔmɛi srɔtoi fɛɛ fɔ lɛ,+ nakai nɔŋŋ hu aatsɔ jalɛ nifeemɔ kome lɛ nɔ aabu gbɔmɛi srɔtoi+ fɛɛ jalɔi kɛhã wala.+ 19 Ejaakɛ bɔ ni gbɔmɔ kome lɛ toigbele lɛ hã mɛi pii tsɔmɔ eshafeelɔi lɛ,+ nakai nɔŋŋ hu gbɔmɔ kome lɛ toiboo lɛ baahã mɛi pii atsɔmɔ jalɔi.+ 20 Agbɛnɛ, Mla lɛ ba koni tɔmɔ aya nɔ afa.+ Shi kɛ́ esha fa babaoo lɛ, dromɔ hu faa kɛtekeɔ nɔ babaoo. 21 Mɛɛ yiŋtoo hewɔ? Koni bɔ nɔŋŋ ni esha kɛ gbele ye maŋtsɛ lɛ,+ nakai nɔŋŋ dromɔ hu atsɔ jalɛ nɔ aye maŋtsɛ kɛya naanɔ wala mli kɛtsɔ wɔ-Nuŋtsɔ Yesu Kristo nɔ.+