Bɔfoi Lɛ Anitsumɔi
14 Agbɛnɛ, be ni amɛyɔɔ Ikonium lɛ, amɛyi enyɔ lɛ fɛɛ amɛbote Yudafoi lɛ akpeehe lɛ ni amɛwie jogbaŋŋ bɔ ni hã Yudafoi kɛ Greekbii lɛ ateŋ mɛi pii he amɛye. 2 Shi Yudafoi lɛ ateŋ mɛi ni heee yeee lɛ wo jeŋmajiaŋbii lɛ ayiŋ,* ni amɛfite amɛjwɛŋmɔ koni amɛte shi amɛwo nyɛmimɛi lɛ.+ 3 No hewɔ lɛ, amɛye be saŋŋ yɛ jɛmɛ ni amɛkɛ ekãa wie yɛ Yehowa* hewalɛ naa, ni lɛ hu etsɔ amɛnɔ efee okadii kɛ naakpɛɛ nii kɛye edromɔ lɛ he sane lɛ he odase.+ 4 Shi mɛi ni yɔɔ maŋ lɛ mli lɛ amli gba enyɔ; amɛteŋ mɛi komɛi fi Yudafoi lɛ asɛɛ, shi mɛi krokomɛi fi bɔfoi lɛ asɛɛ. 5 Be ni jeŋmajiaŋbii lɛ kɛ Yudafoi lɛ fɛɛ kɛ amɛnɔyelɔi lɛ ka akɛ amɛbaafee amɛ niseniianii ni amɛtswia amɛ tɛi lɛ,+ 6 ahã amɛle enɛ ni amɛjo foi kɛtee Likaonia maji ni ji Listra kɛ Derbe, kɛ akrowai ni yɔɔ jɛmɛ niiaŋ lɛ.+ 7 Amɛtee nɔ amɛjaje sane kpakpa lɛ amɛtsɔɔ yɛ jɛmɛ.
8 Agbɛnɛ, nuu ko yɛ Listra ni ta shi ni nyɛɛɛ enaji anɔ edamɔ. Eji obubuafo* kɛjɛ fɔmɔ mli ni enyiɛko dã. 9 Be ni Paulo wieɔ lɛ, nuu nɛɛ miibo lɛ toi. Be ni Paulo kwɛ lɛ gãa ni ena akɛ eyɛ hemɔkɛyeli, ni akɛ, abaanyɛ ahã ehe awa lɛ lɛ,+ 10 ekɛ gbee ni wa wie akɛ: “Tee shi odamɔ onaji anɔ.” No hewɔ lɛ, nuu lɛ huru edamɔ shi ni ebɔi nyiɛmɔ.+ 11 Be ni mɛi ni bua shi lɛ na nɔ ni Paulo efee lɛ, amɛbolɔ yɛ Likaonia wiemɔ lɛ mli amɛkɛɛ: “Nyɔŋmɔi lɛ etsɔmɔ amɛhe gbɔmɛi ni amɛkpeleke shi kɛba wɔŋɔɔ!”+ 12 Ni amɛbɔi Barnaba tsɛmɔ akɛ Zeu, shi Paulo lɛ, amɛtsɛ lɛ Herme, ejaakɛ lɛ titri ewieɔ. 13 Zeu sɔlemɔ shĩa lɛ yɛ he ni atsɔɔ kɛboteɔ maŋ lɛ mli lɛ, ni Zeu osɔfo lɛ kɛ tsinahii kɛ fɔfɔi akekerei ba agbói lɛ anaa koni lɛ kɛ mɛi lɛ kɛshã afɔlei.
14 Shi be ni bɔfoi lɛ, ni ji Barnaba kɛ Paulo nu he lɛ, amɛgbála amɛtadei lɛ ni amɛsha foi amɛyabote mɛi lɛ ateŋ ni amɛbolɔ amɛkɛɛ: 15 “Ataamɛi, mɛni hewɔ nyɛfeɔ nibii nɛɛ? Wɔ hu gbɔmɛi ji wɔ ni wɔyɛ gbɔjɔmɔi tamɔ nyɛ nɔŋŋ.+ Ni wɔmiijaje sane kpakpa lɛ wɔmiitsɔɔ nyɛ, koni nyɛje nibii ni sɛɛnamɔ bɛ he nɛɛ ahe kɛba Nyɔŋmɔ hiɛkãalɔ lɛ ŋɔɔ, mɔ ni bɔ ŋwɛi kɛ shikpɔŋ lɛ kɛ ŋshɔ lɛ, kɛ nibii fɛɛ ni yɔɔ amɛmli lɛ.+ 16 Yɛ yinɔi ni eho lɛ amli lɛ, eŋmɛ jeŋmaji lɛ fɛɛ gbɛ koni amɛya nɔ amɛnyiɛ amɛ diɛŋtsɛ amɛgbɛi anɔ,+ 17 shi kɛ̃lɛ, ekpaaa lɛ diɛŋtsɛ ehe odaseyeli+ ejaakɛ efeɔ ekpakpa, ehãa nugbɔ nɛɔ kɛjɛɔ ŋwɛi ehãa nyɛ kɛ bei ni nii baa pii hu,+ ni no hãa nyɛnáa niyenii babaoo, ni miishɛɛ yiɔ nyɛtsuiiaŋ obɔbɔ.”+ 18 Ni kɛ̃lɛ, enɛɛmɛi ni amɛwie lɛ fɛɛ sɛɛ lɛ, ekpakpa ko dani amɛnyɛ amɛtsĩ maŋbii lɛ anaa koni amɛkashã afɔle amɛhã amɛ.
19 Shi Yudafoi komɛi jɛ Antiokia kɛ Ikonium amɛba ni amɛbatsɔ maŋbii lɛ ayiŋ,+ ni amɛtswia Paulo tɛi ni amɛgbala lɛ kɛtee maŋ lɛ sɛɛ, ejaakɛ amɛsusu akɛ egbo.+ 20 Shi be ni kaselɔi lɛ babɔle ehe kɛkpe lɛ, ete shi ni etee maŋ lɛ mli. Enɔ jetsɛremɔ lɛ, ekɛ Barnaba shi kɛtee Derbe.+ 21 Be ni amɛjaje sane kpakpa lɛ amɛtsɔɔ nakai maŋ lɛ ni amɛfee mɛi saŋŋ kaselɔi lɛ, amɛku amɛsɛɛ kɛtee Listra, kɛ Ikonium, kɛ Antiokia. 22 Ni yɛ jɛmɛ lɛ, amɛwaje kaselɔi lɛ;*+ amɛwo amɛ hewalɛ koni amɛhi hemɔkɛyeli lɛ mli, ni amɛkɛɛ: “Esa akɛ wɔtsɔmɔ amanehului pii amli kɛbote Nyɔŋmɔ Maŋtsɛyeli lɛ mli.”+ 23 Agbɛnɛ hu, amɛhole onukpai amɛhã amɛ yɛ asafo fɛɛ asafo mli,+ ni amɛsɔle ni amɛhi ŋmaa,+ ni amɛtu amɛ amɛwo Yehowa,* mɔ ni amɛhe enɔ amɛye lɛ dɛŋ.
24 Kɛkɛ ni amɛyatsɔ Pisidia kɛba Pamfilia,+ 25 ni be ni amɛjaje wiemɔ lɛ amɛtsɔɔ yɛ Perga lɛ, amɛkpeleke shi kɛtee Atalia. 26 Amɛbote lɛlɛ mli yɛ jɛmɛ kɛtee Antiokia, he ni atu amɛ awo Nyɔŋmɔ dromɔ lɛ mli yɛ kɛhã nitsumɔ ni amrɔ nɛɛ amɛtsu amɛgbe naa lɛ.+
27 Be ni amɛbashɛ ni amɛbua asafo lɛ naa lɛ, amɛgba amɛ nibii babaoo ni Nyɔŋmɔ tsɔ amɛnɔ efee lɛ, ni akɛ, egbele hemɔkɛyeli shinaa lɛ ehã jeŋmaji lɛ.+ 28 No hewɔ lɛ, amɛkɛ kaselɔi lɛ hi shi be saŋŋ.