Wɔhemɔkɛyeli lɛ Hefamɔ
“Nuntsɔ, Kristo lɛ, nyɛbua lɛ krɔŋkrɔŋ yɛ nyɛtsuii amli; ni daa nɛɛ nyɛsaa nyɛhe nyɛtoa, koni nyɛná hetoo nyɛha mɔ fɛɛ mɔ ni biɔ nyɛ hiɛnɔkamɔ ni yɔɔ nyɛmli lɛ shishi lɛ.”—1 PETRO 3:15.
1, 2. Mɛni hewɔ shitee-kɛ-woo efeee Yehowa Odasefoi naakpɛɛ lɛ, shi mɛni amɛshweɔ?
AKPƐLƐƆ Yehowa Odasefoi anɔ yɛ maji babaoo amli akɛ gbɔmɛi ni yeɔ anɔkwa, ní amɛyɔɔ jeŋba kpakpa. Mɛi babaoo naa amɛ akɛ akutsoŋbii kpakpai ni kɛ naagba ko baaa. Ni kɛlɛ, dɔlɛ sane ji akɛ, akɛ yiwaa ni ejaaa gbɛ eba Kristofoi ni sumɔɔ toiŋjɔlɛ nɛɛ anɔ—yɛ ta kɛ toiŋjɔlɛ bei amli. Nɛkɛ shitee-kɛ-woo nɛɛ efeee amɛ naakpɛɛ. Yɛ anɔkwale mli lɛ, amɛkpaa no gbɛ. Ejaakɛ amɛle akɛ Kristofoi anɔkwafoi ni hi shi yɛ Ŋ.B. klɛŋklɛŋ afii oha lɛ mli lɛ bafee ‘mɛi ni anyɛɔ amɛ,’ no hewɔ lɛ, mɛni hewɔ esa akɛ mɛi ni bɔɔ mɔdɛŋ akɛ amɛaafee Kristo sɛɛnyiɛlɔi diɛŋtsɛ ŋmɛnɛ lɛ akpa gbɛ akɛ akɛ amɛ baaye yɛ gbɛ ni yɔɔ srɔto nɔ? (Mateo 10:22) Kɛfata he lɛ, Biblia lɛ kɛɔ akɛ: “Mɛi fɛɛ hu ni taoɔ akɛ amɛaahi shi yɛ Nyɔŋmɔ jamɔ naa yɛ Kristo Yesu mli lɛ, aaawa amɛ yi.”—2 Timoteo 3:12.
2 Yehowa Odasefoi taooo yiwaa sɛɛgbɛ, ni amɛnáaa amanehului—shika toigbalamɔi, tsuŋwoi, aloo yiwalɛ nifeemɔi—ni ebaanyɛ ekɛba amɛnɔ lɛ ahe miishɛɛ. Amɛshweɔ akɛ ‘amɛaahi shi kpoo yɛ hejɔlɛ mli’ koni amɛnyɛ amɛshiɛ Nyɔŋmɔ Maŋtsɛyeli lɛ he sanekpakpa lɛ ní naatsii ko bɛ mli. (1 Timoteo 2:1, 2) Amɛhiɛ sɔɔ jamɔ mli heyeli ni amɛyɔɔ yɛ shikpɔji pii anɔ ní amɛkɛtsuɔ amɛjamɔ lɛ he nii lɛ, ni amɛjɛɔ henilee kpakpa mli amɛfeɔ bɔ fɛɛ bɔ ni amɛaanyɛ koni ‘amɛkɛ gbɔmɛi fɛɛ ahi shi yɛ hejɔlɛ mli,’ ní adesai anɔyelii lɛ anɔyelɔi lɛ hu fata he. (Romabii 12:18; 13:1-7) Belɛ, mɛni hewɔ amɛji ‘mɛi ni anyɛɔ amɛ’ lɛ mɔ?
3. Mɛni ji yiŋtoo kome hewɔ ní anyɛɔ Yehowa Odasefoi yɛ gbɛ ni ejaaa nɔ lɛ?
3 Klɛŋklɛŋ lɛ, anyɛɔ Yehowa Odasefoi yɛ gbɛ ni ejaaa nɔ, yɛ yiŋtoi ahewɔ ni awa mra be mli Kristofoi lɛ ayi lɛ nɔŋŋ hewɔ. Klɛŋklɛŋ lɛ, Yehowa Odasefoi tsuɔ amɛjamɔ mli hemɔkɛyelii lɛ ahe nii yɛ gbɛ̀i ni haa mɛi komɛi sumɔɔɔ amɛsane lɛ anɔ. Ákɛ nɔkwɛmɔnɔ lɛ, amɛkɛ ekãa shiɛɔ Nyɔŋmɔ Maŋtsɛyeli lɛ he sanekpakpa lɛ, shi bei pii lɛ, gbɔmɛi nuuu ekãa ni amɛyɔɔ nɛɛ shishi jogbaŋŋ, ni amɛbuɔ amɛ shiɛmɔ nitsumɔ lɛ akɛ “tutuamɔ ni amɛkɛtsakeɔ mɛi kɛbaa amɛjamɔ lɛ mli.” (Okɛto Bɔfoi lɛ Asaji 4:19, 20 he.) Amɛhiɔ shi hu akɛ mɛi ni kɛ amɛhe wooo jeŋmaji lɛ amaŋkwramɔ saji kɛ tai amli, ni bei komɛi lɛ, abuɔ enɛ yɛ gbɛ ni ejaaa nɔ akɛ etsɔɔ akɛ Odasefoi ji maŋbii ni yeee anɔkwa.—Mika 4:3, 4.
4, 5. (a) Yehowa Odasefoi etsɔmɔ mɛi ni akɛ amale naafolɔmɔi tutuaa amɛ yɛ mɛɛ gbɛ nɔ? (b) Namɛi bei pii lɛ amɛji mɛi titri ni woɔ yiwaa ni akɛbaa Yehowa tsuji anɔ lɛ he hewalɛ?
4 Nɔ ni ji enyɔ lɛ, Yehowa Odasefoi etsɔmɔ mɛi ni akɛ amale naafolɔmɔi shiɔ amɛ—amalei diɛŋtsɛ kɛ amɛhemɔkɛyelii lɛ ahe wiemɔi ni atsɔmɔ lɛ. Enɛ hewɔ lɛ, amɛtsɔmɔ mɛi ni atutuaa amɛ yɛ gbɛ ni ejaaa nɔ yɛ shikpɔji komɛi anɔ. Kɛfata he lɛ, akɛni amɛtaoɔ tsofafeemɔ ní akɛ lá tsuuu nii yɛ mli, ní kɛ bɔ ni amɛsumɔɔ ni amɛbo famɔ ni Biblia lɛ kɛha akɛ ‘atsi he kɛjɛ lá he’ lɛ kpãa gbee lɛ toi hewɔ lɛ, aatsɛ amɛ yɛ gbɛ ni ejaaa nɔ akɛ “mɛi ni gbeɔ gbekɛbii” kɛ “jamɔ kuu ni gbeɔ amɛ diɛŋtsɛ amɛhe.” (Bɔfoi lɛ Asaji 15:29) Shi anɔkwale lɛ ji akɛ, Yehowa Odasefoi buɔ wala akɛ ejara wa waa diɛŋtsɛ, ni amɛsumɔɔ ní amɛná tsofafeemɔ ni hi fe fɛɛ ni yɔɔ kɛha amɛ diɛŋtsɛ amɛhe kɛ amɛbii lɛ. Naafolɔmɔ ní akɛshiɔ amɛ akɛ Yehowa Odasefoi abii babaoo gboiɔ daa afi yɛ kpɛlɛmɔ ni amɛkpɛlɛɛɛ ni amɛhé lá amɛwo amɛmli lɛ hewɔ lɛ ji amale diɛŋtsɛ. Kɛfata he lɛ, akɛni Biblia mli anɔkwale lɛ naaa hewalɛ koome lɛ nɔŋŋ yɛ weku mli bii fɛɛ anɔ hewɔ lɛ, afolɔɔ Odasefoi anaa hu akɛ amɛfiteɔ wekui. Ni kɛlɛ, mɛi ni le Yehowa Odasefoi jogbaŋŋ lɛ le akɛ amɛbuɔ weku shihilɛ jogbaŋŋ diɛŋtsɛ, ni amɛbɔɔ mɔdɛŋ akɛ amɛaanyiɛ famɔi ni Biblia lɛ kɛha ákɛ wu kɛ ŋa asumɔ amɛhe ní amɛjie bulɛ kpo amɛtsɔɔ amɛhe, ní gbekɛbii hu abu amɛfɔlɔi, ekɔɔɔ he eko akɛ amɛji heyelilɔi loo amɛjeee heyelilɔi lɛ sɛɛ.—Efesobii 5:21–6:3.
5 Yɛ shihilɛi babaoo mli lɛ, anaa faŋŋ akɛ mɛi titri ni woɔ yiwaa ni akɛbaa Yehowa tsuji anɔ lɛ he hewalɛ ji jamɔ mli shitee-kɛ-wolɔi ní kɛ hewalɛ ni amɛyɔɔ yɛ maŋkwramɔŋ nɔyelɔi kɛ adafitswaa nitsumɔhei anɔ lɛ tsuɔ nii ní amɛkɛbɔɔ mɔdɛŋ ni amɛkɛtsĩ Odasefoi lɛ anitsumɔ naa lɛ. Ákɛ Yehowa Odasefoi lɛ, te esa akɛ wɔfee wɔnii yɛ nɛkɛ shitee-kɛ-woo nɛɛ he wɔha tɛŋŋ—kɛji ejɛ wɔhemɔkɛyelii loo nifeemɔi ahewɔ, aloo ejɛ amale naafolɔmɔi ahewɔ?
“Nyɛ Mlijɔlɛ lɛ Nyɛhaa Gbɔmɛi Fɛɛ Alea”
6. Mɛni hewɔ ehe hiaa ní wɔná mɛi ni bɛ Kristofoi asafo lɛ mli lɛ ahe jwɛŋmɔ ni ŋmɛɔ pɛpɛɛpɛ lɛ?
6 Klɛŋklɛŋ kwraa lɛ, ehe miihia ni wɔná jwɛŋmɔ ni ja—Yehowa jwɛŋmɔ—yɛ mɛi ni kɛ wɔ jamɔ mli hemɔkɛyelii kpãaa gbee lɛ ahe. Kɛ jeee nakai lɛ, no lɛ ekolɛ wɔbaaná nyɛɛ loo heguɔgbee ni he ehiaaa kɛjɛ mɛi krokomɛi aŋɔɔ. Bɔfo Paulo ŋma akɛ: “Nyɛ mlijɔlɛ lɛ nyɛhaa gbɔmɛi fɛɛ alea!” (Filipibii 4:5) No hewɔ lɛ, Biblia lɛ woɔ wɔ hewalɛ ní wɔná mɛi ni yɔɔ Kristofoi asafo lɛ sɛɛ lɛ ahe jwɛŋmɔ ni ŋmɛɔ pɛpɛɛpɛ.
7. Mɛni wɔhe ni ‘wɔɔto kɛjɛ je nɛŋ koni ekawo wɔhe muji’ lɛ biɔ?
7 Yɛ gbɛ kroko nɔ lɛ, Ŋmalɛi lɛ kɛ ŋaawoo ni yɔɔ faŋŋ haa wɔ akɛ, ‘wɔto wɔhe kɛjɛ je nɛŋ koni ekawo wɔhe muji.’ (Yakobo 1:27; 4:4) Wiemɔ ‘jeŋ’ ní akɛtsu nii yɛ biɛ, taakɛ eji yɛ Biblia lɛ mli hei babaoo lɛ, kɔɔ adesai fɛɛ ni fataaa anɔkwale Kristofoi ahe lɛ ahe. Wɔyɛ adesai ashihilɛ gbɛjianɔtoo nɛɛ mli; wɔkɛ amɛ kpeɔ yɛ nitsumɔhe, yɛ skul, yɛ akutso mli. (Yohane 17:11, 15; 1 Korintobii 5:9, 10) Ni kɛlɛ, wɔtsiɔ wɔhe kɛjɛɔ je lɛ he koni ekawo wɔhe muji kɛtsɔ kpoomɔ ni wɔkpooɔ subaŋi, wiemɔ, kɛ jeŋba ni kɛ Nyɔŋmɔ jalɛ gbɛ̀i lɛ kpãaa gbee lɛ nɔ. Ehe miihia hu ni wɔyoo oshara ni yɔɔ je nɛɛ ni akɛaabɔ gbagbalii lɛ mli, titri lɛ mɛi ni jieɔ lɛ kpo faŋŋ akɛ amɛbɛ bulɛ kwraa kɛha tɛi ni Yehowa efolɔ eshwie shi lɛ.—Abɛi 13:20.
8. Mɛni hewɔ ŋaa ni awoɔ wɔ akɛ wɔto wɔhe kɛjɛ je nɛŋ ní ekawo wɔhe muji lɛ haaa wɔ nɔdaamɔ nɔ ní wɔkɛaaba mɛi krokomɛi ashi lɛ?
8 Shi kɛlɛ, ŋaa ni awoɔ wɔ akɛ wɔtsi wɔhe kɛjɛ je lɛ he ní ekawo wɔhe muji lɛ haaa wɔ nɔdaamɔ nɔ ní wɔkɛaaje gbɛ wɔba mɛi ni amɛjeee Yehowa Odasefoi lɛ ashi. (Abɛi 8:13) Kaimɔ Yudafoi ajamɔ mli hiɛnyiɛlɔi lɛ anɔkwɛmɔnɔ, ní wɔsusu he yɛ nikasemɔ ni tsɔ hiɛ lɛ mli lɛ. Jamɔ ni amɛkɛba lɛ naaa Yehowa hiɛ duromɔ; ni ehaaa wekukpaa kpakpa aba amɛkɛ mɛi ni amɛjeee Yudafoi lɛ ateŋ hu. (Mateo 21:43, 45) Nɛkɛ gbɔmɛi ni yɔɔ shɛii yɛ jamɔ mli nɛɛ ahenɔwomɔ ni amɛkɛbuɔ amɛhe jalɔi lɛ haaa amɛbu Jeŋmajiaŋbii lɛ kwraa. Wɔnaaa susumɔ fɔŋ ni tamɔ nɛkɛ, ní aaaha wɔkɛ mɛi ni amɛjeee Odasefoi lɛ aye akɛ mɛi ni wɔbuuu amɛ. Taakɛ bɔfo Paulo ji lɛ, wɔshwee ji akɛ, mɛi fɛɛ ni nuɔ Biblia mli shɛɛ sane ni ji anɔkwale lɛ aná Nyɔŋmɔ hiɛ duromɔ.—Bɔfoi lɛ Asaji 26:29; 1 Timoteo 2:3, 4.
9. Mɛɛ hewalɛ esa akɛ Ŋmalɛ naa susumɔ ni ŋmɛɔ pɛpɛɛpɛ aná yɛ bɔ ni wɔwieɔ mɛi ni kɛ wɔhemɔkɛyelii kpaaa gbee lɛ ahe wɔhaa lɛ nɔ?
9 Esa akɛ Ŋmalɛ naa susumɔ ni ŋmɛɔ pɛpɛɛpɛ aná bɔ ni wɔwieɔ mɛi ni amɛjeee Odasefoi lɛ ahe wɔhaa lɛ nɔ hewalɛ. Paulo kɛ famɔ ha Tito akɛ ekai Kristofoi ni yɔɔ Kreta ŋshɔkpɔ lɛ nɔ lɛ ní “amɛkawie mɔ ko he efɔŋ, amɛkabé; shi moŋ amɛfee kpoo, ni amɛkɛ amɛhe atsɔɔ mɔ fɛɛ mɔ akɛ amɛhe jɔ.” (Tito 3:2) Kadimɔ akɛ esaaa akɛ Kristofoi wieɔ ‘mɔ ko mɔ ko’ he efɔŋ—mɛi ni yɔɔ Kreta ni amɛjeee Kristofoi, ní ale amɛteŋ mɛi komɛi yɛ amɛ malemɔ, fufeemɔ, kɛ anihaofeemɔ hewɔ lɛ po. (Tito 1:12) No hewɔ lɛ efeŋ nɔ ni kɛ Ŋmalɛi lɛ kpãa gbee akɛ wɔkɛ wiemɔi ni baa mɔ shi aaatsu nii kɛ́ wɔmiiwie mɛi ni kɛ wɔhemɔkɛyelii kpãaa gbee lɛ ahe. Kɛ́ wɔná su akɛ wɔnɔ kwɔlɔ lɛ, egbalaŋ mɛi krokomɛi kɛbaŋ Yehowa jamɔ he. Shi moŋ, kɛ́ wɔbuɔ mɛi krokomɛi ni wɔkɛ amɛ yeɔ yɛ Yehowa Wiemɔ lɛ mli shishitoo mlai ni nilee yɔɔ mli lɛ anaa lɛ, no lɛ ‘wɔwulaa Nyɔŋmɔ tsɔɔmɔ lɛ.’—Tito 2:10.
Be ni Sa akɛ Afee Dioo, Be ni Sa akɛ Awie
10, 11. Yesu fee he nɔkwɛmɔnɔ akɛ ele (a) “dioofeemɔ be”? (b) “wiemɔ be” yɛ mɛɛ gbɛ nɔ?
10 “Dioofeemɔ be yɛ, ni wiemɔ be yɛ,” taakɛ Jajelɔ 3:7 lɛ kɛɔ lɛ. Belɛ, biɛ ji he ni naagba lɛ yɔɔ lɛ: bɔ ni wɔɔfee wɔle be ni esa akɛ wɔku wɔhiɛ wɔfɔ̃ shitee-kɛ-wolɔi awiemɔi anɔ kɛ be ni esa akɛ wɔwie ní wɔkɛfã wɔhemɔkɛyeli lɛ he. Wɔbaanyɛ wɔkase nii babaoo kɛjɛ mɔ ni yeɔ emuu be fɛɛ be yɛ nilee mli—ni ji Yesu nɔkwɛmɔnɔ lɛ mli. (1 Petro 2:21) Ele “dioofeemɔ be.” Ákɛ nɔkwɛmɔnɔ lɛ, beni osɔfonukpai lɛ kɛ onukpai lɛ kɛ amale wiemɔi folɔɔ enaa yɛ Pilato hiɛ lɛ, Yesu “ejieee naa.” (Mateo 27:11-14) Esumɔɔɔ ni ewie nɔ ko ni baatsĩ Nyɔŋmɔ suɔmɔnaa nii kɛha lɛ lɛ he nitsumɔ naa. Yɛ no najiaŋ lɛ, ehala akɛ ebaaha enifeemɔi ní ale yɛ maŋ lɛ diɛŋtsɛ awie aha ehe. Ele akɛ anɔkwale lɛ po tsakeŋ amɛjwɛŋmɔi kɛ amɛtsuii ni wóɔ ehe nɔ lɛ. No hewɔ lɛ eku ehiɛ efɔ̃ amɛ naafolɔmɔ lɛ nɔ, ni ekuuu edioofeemɔ ni yiŋtoo yɔɔ sɛɛ lɛ mli.—Yesaia 53:7.
11 Shi kɛlɛ, Yesu le “wiemɔ be” hu. Bei komɛi lɛ, ekɛ mɛi ni wieɔ shiɔ lɛ lɛ taa saji anaa kɛ wiemɔ ni mli kã shi faŋŋ yɛ mɛi ahiɛ, ni ekɛkuɔ amɛ amale naafolɔmɔi lɛ anaa. Ákɛ nɔkwɛmɔnɔ lɛ, beni woloŋmalɔi lɛ kɛ Farisifoi lɛ ka akɛ amɛaagbe ehe guɔ yɛ gbɔmɛi babaoo ahiɛ kɛtsɔ enaa ni amɛfolɔ akɛ efamɔɔ daimonioi yɛ Beelzebul hewalɛ naa lɛ nɔ lɛ, Yesu kpɛ eyiŋ akɛ eshiŋ amale naafolɔmɔi nɛɛ efolo. Ekɛ sane naatsɔɔmɔ ni sa amɛhe waa kɛ mfonirifeemɔ ni mli wa waa butu amale wiemɔ lɛ. (Marko 3:20-30; kwɛmɔ Mateo 15:1-11; 22:17-21; Yohane 18:37 hu.) Nakai nɔŋŋ hu beni agbala Yesu kɛtee Akuashɔŋ lɛ hiɛ, yɛ esɛɛgbɛtsɔɔmɔ kɛ emɔmɔ lɛ sɛɛ lɛ, Osɔfonukpa Kaiafa kɛ ŋaatsɔɔ bi lɛ akɛ: “Mina Nyɔŋmɔ, hiɛkalɔi lɛ, akɛ, kɛji bo ji Kristo, Nyɔŋmɔ bi lɛ, kɛɛmɔ wɔ!” “Wiemɔ be” hu nɛ, ejaakɛ eji efee dioo kulɛ, abaanyɛ anu shishi yɛ gbɛ ni ejaaa nɔ akɛ ekpɛlɛɛɛ nɔ akɛ lɛ ji Kristo lɛ. No hewɔ lɛ Yesu ha hetoo akɛ: “Miŋ.”—Mateo 26:63, 64; Marko 14:61, 62.
12. Mɛni ji shihilɛi ni tsirɛ Paulo kɛ Barnaba ni amɛkɛ ekãa wie yɛ Ikoniom lɛ?
12 Susumɔ Paulo kɛ Barnaba nɔkwɛmɔnɔ lɛ hu he okwɛ. Bɔfoi lɛ Asaji 14:1, 2 lɛ kɛɔ akɛ: “Beni amɛyɔɔ Ikoniom lɛ, amɛyi enyɔ lɛ fɛɛ amɛtee Yudafoi lɛ akpeehe lɛ ni amɛyawie amɛtsɔɔ amɛ jogbaŋŋ, ni Yudafoi lɛ kɛ Helabii lɛ ateŋ mɛi babaoo hé ye. Shi Yudafoi toigbolɔi lɛ wo jeŋmajiaŋbii lɛ ayiŋ, ni amɛha amɛtsɔ amɛhiɛ amɛwo nyɛmimɛi lɛ.” The New English Bible lɛ kaneɔ akɛ: “Shi Yudafoi ni tsakeee lɛ wo Jeŋmajiaŋbii lɛ ayiŋ ni amɛfite amɛjwɛŋmɔ yɛ Kristofoi lɛ ahe.” Akɛni shɛɛ sane lɛ ni amɛ diɛŋtsɛ amɛkpoo lɛ kɛkɛ haaa amɛtsui anyɔ amɛmli hewɔ lɛ, Yudafoi shitee-kɛ-wolɔi lɛ je amale naafolɔmɔ wiemɔi ahe tafaa shishi, ni amɛbɔ mɔdɛŋ ní amɛha Jeŋmajiaŋbii lɛ aná Kristofoi ahe jwɛŋmɔ fɔŋ.a Kwɛ bɔ ni hetsɛ̃ ni amɛyɔɔ kɛha Kristojamɔ lɛ mli wa ha! (Okɛto Bɔfoi lɛ Asaji 10:28 he.) Paulo kɛ Barnaba nu he akɛ “wiemɔ be” nɛ, kɛ́ jeee nakai lɛ, amɛhe guɔ ni agbeɔ yɛ maŋ nɛɛ baaha kaselɔi heei lɛ anijiaŋ aje wui. “No hewɔ lɛ . . . [Paulo kɛ Barnaba] tsɛ yɛ jɛmɛ ni amɛkɛ ekãa wie yɛ Yehowa,” mɔ ni tsɔɔ enɔkpɛlɛmɔ kɛtsɔ hewalɛ ni eha amɛ ní amɛkɛfee naakpɛɛ okadii lɛ nɔ lɛ “hewalɛ naa.” Nɔ ni jɛ mli ba ji akɛ, mɛi komɛi “fata Yudafoi lɛ ahe, ni fã hu fata bɔfoi lɛ ahe.”—Bɔfoi lɛ Asaji 14:3, 4, NW.
13. Kɛ́ wɔmiitsu heguɔgbee he nii lɛ, bei pii lɛ, mɛɛ be ji “dioofeemɔ be”?
13 Belɛ, kɛ́ aagbe wɔhe guɔ lɛ, te esa akɛ wɔjie naa wɔha tɛŋŋ? Fɛɛ damɔ shihilɛi ni baaba lɛ nɔ. Shihilɛi lɛ ekomɛi biɔ ní wɔkɛ shishitoo mla ni kɛɔ akɛ “dioofeemɔ be yɛ” lɛ atsu nii. Enɛ baa lɛ nakai, titri lɛ kɛji shitee-kɛ-wolɔi ni etswa amɛfai shi lɛ bɔ mɔdɛŋ akɛ amɛaagbala wɔ amɛwo naataamɔi ni sɛɛnamɔ bɛ he lɛ amli. Esaaa ni wɔhiɛ kpaa nɔ akɛ mɛi komɛi sumɔɔɔ ní amɛle anɔkwale lɛ po kɛkɛ. (2 Tesalonikabii 2:9-12) Mɔdɛŋ ni wɔɔbɔ akɛ wɔkɛ mɛi ni ekpiliŋ amɛtsuii akɛ amɛheee amɛyeee lɛ aaasusu saji ahe lɛ woŋ yibii ko. Nɔ ni fe nakai lɛ, kɛ́ wɔkɛ amale naafolɔlɔ fɛɛ naafolɔlɔ ni tutuaa wɔ lɛ baataa saji anaa shɛii lɛ, no lɛ nakai feemɔ baagbala wɔjwɛŋmɔ kɛjɛ nitsumɔ ni he hiaa titri, ní nyɔmɔwoo hu yɔɔ mli—ni ji yelikɛbuamɔ ní wɔkɛaaha mɛi ni yɔɔ jalɛ tsuii, ní amɛmiitao amɛkase Biblia mli anɔkwale lɛ lɛɛlɛŋ lɛ nɔ. No hewɔ lɛ, kɛ́ wɔkɛ shitee-kɛ-wolɔi ni etswa amɛfai shi akɛ amɛaagbɛ wɔhe amale wiemɔi amɛshwã lɛ kpe lɛ, ŋaawoo ni jɛ mumɔŋ ji akɛ: ‘Nyɛtsia nyɛhe kɛjɛa amɛhe.’—Romabii 16:17, 18; Mateo 7:6.
14. Wɔbaanyɛ wɔfã wɔhemɔkɛyeli lɛ he yɛ mɛi krokomɛi ahiɛ yɛ mɛɛ gbɛ̀i anɔ?
14 Shi kɛlɛ, enɛ etsɔɔɔ akɛ wɔfãaa wɔhemɔkɛyeli lɛ he. Ejaakɛ, yɛ fɛɛ sɛɛ lɛ, “wiemɔ be” hu yɛ. Wɔsusuɔ gbɔmɛi anɔkwafoi ní awie wɔhe heguɔgbee wiemɔi atsɔɔ amɛ lɛ ahe jogbaŋŋ yɛ gbɛ ni ja nɔ. Wɔmiisumɔ ní wɔtsɔɔ wɔhemɔkɛyelii ni jɛ wɔtsuii amli tɔ̃ɔ lɛ amli wɔtsɔɔ mɛi krokomɛi; yɛ anɔkwale mli lɛ, wɔnyaa hegbɛ ni wɔnáa lɛ he. Petro ŋma akɛ: “Nuntsɔ, Kristo lɛ, nyɛbua lɛ krɔŋkrɔŋ yɛ nyɛtsuii amli; ni daa nɛɛ nyɛsaa nyɛhe nyɛtoa, koni nyɛná hetoo nyɛha mɔ fɛɛ mɔ ni biɔ nyɛ hiɛnɔkamɔ ni yɔɔ nyɛmli lɛ shishi lɛ, kɛ mlijɔlɛ kɛ gbeyeishemɔ.” (1 Petro 3:15) Kɛ́ aŋkroaŋkroi ni yɔɔ wiemɔ lɛ he miishɛɛ diɛŋtsɛ lɛ bi ní wɔye hemɔkɛyelii ní wɔbuɔ waa lɛ ahe odase wɔtsɔɔ amɛ, kɛ́ amɛbibii amale naafolɔmɔi ní shitee-kɛ-wolɔi kɛshiɔ wɔ lɛ ahe saji lɛ, no lɛ eji sɔ̃ ni kã wɔnɔ akɛ wɔfã wɔhemɔkɛyeli lɛ he, ní wɔha amɛ Biblia mli hetooi ni ja. Kɛfata he lɛ, wɔjeŋba kpakpa lɛ hu baanyɛ aye odase babaoo. Yɛ be mli ni mɛi ni ehiɛɛɛ wɔhe jwɛŋmɔ fɔŋ lɛ naa akɛ wɔbɔɔ mɔdɛŋ ní wɔhi shi yɛ jalɛ tɛi ni Nyɔŋmɔ efolɔ eshwie shi lɛ anaa lɛɛlɛŋ lɛ, amɛbaanyɛ amɛna amrɔ nɔŋŋ akɛ naafolɔmɔi ní akɛshiɔ wɔ lɛ ji amale.—1 Petro 2:12-15.
Shi Heguɔgbee Wiemɔi ni Agbɛɔ Ashwãa lɛ Hu?
15. Mɛɛ nɔkwɛmɔnɔ kome yɔɔ ni tsɔɔ bɔ ni awieɔ Yehowa Odasefoi ahe amale wiemɔi yɛ adafitswaa woji amli?
15 Bei komɛi lɛ, adafitswaa nitsumɔhei kɛ amɛhiɛ káa Yehowa Odasefoi ni amɛwieɔ amale wiemɔi amɛshiɔ amɛ. Ákɛ nɔkwɛmɔnɔ lɛ, yɛ August 1, 1997 lɛ, Russia adafitswaa wolo ko ŋma heguɔgbee sane ko, ni ekɛɛ kɛfata nibii krokomɛi ni eŋmala lɛ ahe akɛ Odasefoi jeɔ gbɛ amɛbiɔ ní amɛ mli bii lɛ ‘akpoo amɛŋamɛi, wumɛi, kɛ fɔlɔi kɛ́ amɛnuuu amɛhemɔkɛyeli lɛ shishi ni amɛkɛ amɛ efeee ekome yɛ mli.’ Mɔ fɛɛ mɔ ni le Yehowa Odasefoi jogbaŋŋ lɛɛlɛŋ lɛ le akɛ naafolɔmɔ nɛɛ ji amale. Biblia lɛ tsɔɔ akɛ esa akɛ Kristofoi kɛ amɛweku mli bii ni heee yeee lɛ aye yɛ suɔmɔ kɛ bulɛ mli, ni Odasefoi bɔɔ mɔdɛŋ akɛ amɛaanyiɛ nakai gbɛtsɔɔmɔ lɛ sɛɛ. (1 Korintobii 7:12-16; 1 Petro 3:1-4) Yɛ enɛ fɛɛ sɛɛ po lɛ, akala nakai sane lɛ, ni akɛha kanelɔi pii ná jwɛŋmɔ ni ejaaa. Mɛɛ gbɛ nɔ wɔɔtsɔ wɔfã wɔhemɔkɛyeli lɛ he kɛ́ aagbe wɔhe guɔ?
16, 17, kɛ akrabatsa ni yɔɔ baafa 16 lɛ. (a) Mɛni Buu-Mɔɔ lɛ wie be ko yɛ amale wiemɔi ni aŋmalaa awoɔ adafitswaa woji amli lɛ ahetoohamɔ he? (b) Mɛɛ shihilɛi amli ekolɛ Yehowa Odasefoi baanyɛ aha amale wiemɔi ni jeɔ kpo yɛ adafitswaa woji amli lɛ ahetoo yɛ?
16 Yɛ enɛ hu mli lɛ, “dioofeemɔ be yɛ, ni wiemɔ be yɛ.” Be ko lɛ, Buu-Mɔɔ lɛ wie he yɛ nɛkɛ gbɛ nɔ akɛ: “Kɛji wɔbaaku wɔhiɛ wɔfɔ̃ saji komɛi ni ji amale ni akala yɛ adafitswaa woji amli lɛ anɔ aloo wɔɔfã anɔkwale lɛ he kɛtsɔ gbɛ ni sa nɔ jio, edamɔ shihilɛ ni yɔɔ, kɛ mɔ ni wieɔ shiɔ wɔ lɛ, kɛ oti ni ekɛma ehiɛ lɛ nɔ.” Yɛ shihilɛi komɛi amli lɛ, nɔ ni hi fe fɛɛ ji ní wɔku wɔhiɛ wɔfɔ̃ wɔhe saji fɔji ni awieɔ lɛ anɔ, koni wɔkagbɛ amale lɛ wɔshwã.
17 Yɛ shihilɛi krokomɛi amli lɛ, ekolɛ eeefee “wiemɔ be.” Ekolɛ áwie Yehowa Odasefoi ahe wiemɔi komɛi ni ejaaa atsɔɔ adafitswaa wolo mli niŋmalɔ loo adafitswalɔ ko ni abuɔ lɛ waa, ni ekolɛ ebaasumɔ ní ele wɔhe anɔkwa saji. (Kwɛmɔ akrabatsa ni yitso ji “Wiemɔ ko ni Ejaaa lɛ Jajemɔ.”) Kɛ́ wɔhe wiemɔi fɔji ni jeɔ kpo yɛ adafitswaa woji amli lɛ ha mɛi ná wɔhe jwɛŋmɔ fɔŋ ni tsĩɔ wɔ shiɛmɔ nitsumɔ lɛ naa lɛ, no lɛ Buu Mɔɔ Asafo lɛ nitsumɔhe nine lɛ najiaŋdamɔlɔi baanyɛ aŋɔ hegbɛ lɛ ní amɛkɛfã anɔkwale lɛ he kɛtsɔ gbɛ ni sa jogbaŋŋ nɔ.b Ákɛ nɔkwɛmɔnɔ lɛ, abaanyɛ akɛ nitsumɔ awo onukpai ni sa lɛ adɛŋ ní amɛjie anɔkwa saji lɛ akpo, tamɔ TV nɔ wiemɔ mli nɛkɛ, hé ni ya ni ayaaa lɛ baanyɛ atsɔɔ akɛ Yehowa Odasefoi nyɛɛɛ amɛha wiemɔi ni awieɔ lɛ hetoo lɛ. Odasefoi aŋkroaŋkroi jɛɔ nilee mli amɛkɛ gbɛtsɔɔmɔi ní Buu Mɔɔ Asafo lɛ kɛ enajiaŋdamɔlɔi kɛhaa yɛ saji ni tamɔ nɛkɛ mli lɛ tsuɔ nii.—Hebribii 13:17.
Sanekpakpa Lɛ Hefamɔ yɛ Mla Naa
18. (a) Mɛni hewɔ ehe ehiaaa ní wɔná adesai anɔyelii agbɛŋmɛɛ ní wɔkɛshiɛ lɛ? (b) Kɛ́ aŋmɛɛɛ wɔ gbɛ ní wɔshiɛ lɛ, mɛɛ gbɛ esa akɛ wɔkɔ?
18 Hegbɛ ní wɔyɔɔ akɛ wɔshiɛ Nyɔŋmɔ Maŋtsɛyeli lɛ he sanekpakpa lɛ jɛ ŋwɛi. ‘Aŋɔ ŋwɛi kɛ shikpɔŋ nɔ hegbɛ fɛɛ aha’ Yesu, mɔ ni kɛ nitsumɔ nɛɛ wo wɔdɛŋ akɛ wɔtsu lɛ. (Mateo 28:18-20; Filipibii 2:9-11) No hewɔ lɛ, ehe ehiaaa ní wɔná adesai anɔyelii agbɛŋmɛɛ ní wɔkɛshiɛ. Ni kɛ nakai po lɛ, wɔyɔseɔ akɛ jamɔ mli heyeli ni wɔnáa lɛ yeɔ buaa Maŋtsɛyeli sane lɛ gbɛɛ-kɛ-shwãmɔ. Wɔkɛ mla gbɛjianɔtoi ni yɔɔ shikpɔji ni wɔyɔɔ heyeli ni wɔkɛtsuɔ wɔjamɔ lɛ he nii lɛ amli lɛ baatsu nii ní wɔkɛfã he. Yɛ hei ni ahaaa wɔ heyeli ni tamɔ nɛkɛ lɛ, wɔbaabɔ mɔdɛŋ wɔtsɔ mla gbɛjianɔtoo lɛ mli hegbɛi ni yɔɔ lɛ anɔ ni wɔnine ashɛ nɔ. Jeee shihilɛ hiɛ tsakemɔ ji oti ni mã wɔhiɛ, shi moŋ ‘sanekpakpa lɛ hefamɔ kɛ ha ni aaaha edamɔ shi shiŋŋ yɛ mla naa.’c—Filipibii 1:7.
19. (a) Mɛni ekolɛ ebaajɛ ‘Nyɔŋmɔ nii ni wɔkɛhaa Nyɔŋmɔ’ lɛ mli aba? (b) Mɛni wɔtswa wɔfai shi akɛ wɔbaafee?
19 Ákɛ Yehowa Odasefoi lɛ, wɔkpɛlɛɔ Yehowa nɔ akɛ Jeŋ Muu Fɛɛ Maŋtsɛ. Emla nɔ kwɔ fe fɛɛ. Wɔjɛɔ henilee kpakpa mli wɔboɔ adesai anɔyelii atoi, ni ‘wɔkɛ Kaisare nii haa Kaisare’ kɛtsɔ nakai feemɔ nɔ. Shi wɔŋmɛŋ gbɛ ní nɔ ko nɔ ko atsĩ gbɛnaa nii ni he hiaa fe fɛɛ ní esa akɛ wɔtsu he nii—‘Nyɔŋmɔ nii ní wɔkɛaaha Nyɔŋmɔ’ lɛ gbɛ. (Mateo 22:21) Wɔnuɔ shishi jogbaŋŋ akɛ nakai ní wɔɔfee lɛ baaha wɔtsɔmɔ ‘mɛi ni’ jeŋmaji lɛ ‘nyɛɔ amɛ,’ shi wɔkpɛlɛɔ enɛ nɔ akɛ kaselɔfeemɔ he gbɛnaa nii lɛ fã. Yehowa Odasefoi ahe mla naa saji ni aŋmala ashwie shi yɛ afii ohai 20 nɛɛ mli lɛ ji wɔfai shi ní wɔtswa akɛ wɔbaafã wɔhemɔkɛyeli lɛ he lɛ he odaseyeli. Wɔbaatsɔ Yehowa yelikɛbuamɔ kɛ sɛɛfimɔ nɔ wɔya nɔ ‘wɔtsɔɔ nii ní wɔjaje sanekpakpa lɛ ní wɔfɔ̃ɔɔ.’—Bɔfoi lɛ Asaji 5:42.
[Shishigbɛ niŋmai]
a Matthew Henry’s Commentary on the Whole Bible lɛ tsɔɔ mli akɛ Yudafoi shitee-kɛ-wolɔi lɛ “kɛfee amɛnitsumɔ akɛ amɛyaa [Jeŋmajiaŋbii] fɛɛ ni amɛle amɛ lɛ aŋɔɔ titri, ni amɛyakɛɔ amɛ nɔ fɛɛ nɔ ní amɛjwɛŋmɔ loo amɛhetsɛ̃ lɛ baanyɛ asɔ̃ awo amɛnaa, jeee ní amɛkɛgbe amɛhe guɔ kɛkɛ, shi ní amɛkɛdũ Kristojamɔ he jwɛŋmɔ fɔŋ hu amɛwo amɛmli.”
b Beni aŋma heguɔgbee sane lɛ awo Russia adafitswaa wolo (ní atsĩ tã yɛ kuku 15 lɛ) mli lɛ sɛɛ lɛ, Yehowa Odasefoi ŋma wolo kɛyaha Russian Federation Presidential Judicial Chamber for Media Disputes, ni amɛbi ní akwɛ amale naafolɔmɔi ni yɔɔ sane lɛ mli lɛ mli ekoŋŋ. Nyɛsɛɛ nɛɛ, kojomɔhe lɛ kɛ yiŋkpɛɛ ha ni amɛkã adafitswaa wolo lɛ ŋmalɔi lɛ ahiɛ waa yɛ nakai heguɔgbee sane ní amɛŋma lɛ hewɔ.—Kwɛmɔ Awake!, November 22, 1998, baafai 26-27.
c Kwɛmɔ sane ni yitso ji “Sanekpakpa lɛ Hebuu yɛ Mla Naa,” ni yɔɔ baafai 19-22 lɛ.
Ani Okaiɔ?
◻ Mɛni hewɔ Yehowa Odasefoi ji ‘mɛi ni anyɛɔ amɛ’ lɛ?
◻ Te esa akɛ wɔbu mɛi ni kɛ wɔjamɔ mli hemɔkɛyelii kpãaa gbee lɛ wɔha tɛŋŋ?
◻ Mɛɛ pɛpɛɛpɛ-ŋmɛɛ he nɔkwɛmɔnɔ Yesu fee efɔ̃ shi yɛ bɔ ni ekɛ shitee-kɛ-wolɔi ye eha lɛ mli?
◻ Kɛ́ aagbe wɔhe guɔ lɛ, wɔbaanyɛ wɔkɛ shishitoo mla ni kɛɔ akɛ “dioofeemɔ be yɛ, ni wiemɔ be yɛ” lɛ atsu nii yɛ mɛɛ gbɛ nɔ?
[Akrabatsa ni yɔɔ baafa 16]
Wiemɔ ko ni Ejaaa lɛ Jajemɔ
“Yɛ Yacuiba yɛ Bolivia lɛ, sanekpakpa jajelɔi akuu ko ni yɔɔ maŋ lɛ mli lɛ to gbɛjianɔ ni TV nitsumɔhe ko jie sini ko ní eka shi faŋŋ akɛ hemɔkɛyeli kwalɔi ji mɛi ni fee. Yɛ hewalɛ fɔŋ ni nakai sini lɛ ná yɛ mɛi anɔ lɛ hewɔ lɛ, onukpai lɛ kpɛ amɛyiŋ akɛ amɛbaaya TV nitsumɔhei enyɔ ní amɛyawo nyɔmɔ koni amɛjie Jehovah’s Witnesses—The Organization Behind the Name kɛ The Bible—A Book of Fact and Prophecy vidioi lɛ amɛtsɔɔ maŋbii lɛ. Yɛ Asafo lɛ vidioi lɛ kwɛmɔ lɛ sɛɛ lɛ, redio nitsumɔhe nɔtsɛ ko mli fu yɛ amale saji ni je kpo yɛ hemɔkɛyeli kwalɔi lɛ asini lɛ mli lɛ he, ni eha hegbɛ akɛ ebaatswa Yehowa Odasefoi akpokpaa wulu nɔ kpee ni baa lɛ he adafi yɛ eredio nitsumɔhe lɛ nifeemɔi amli ní eheee nɔ ko. Mɛi babaoo ba kpee lɛ fe bɔ ni akpaa gbɛ, ni mɛi ni yɔɔ jalɛ tsuii lɛ kɛ anɔkwayeli bɔi saji abimɔ kɛji Odasefoi lɛ tee amɛŋɔɔ yɛ shiɛmɔ nitsumɔ lɛ mli.”—1997 Yearbook of Jehovah’s Witnesses, baafai 61-62.
[Mfoniri ni yɔɔ baafa 17]
Bei komɛi lɛ, Yesu kuɔ mɛi ni wieɔ shiɔ lɛ lɛ amale naafolɔmɔi lɛ anaa yɛ faŋŋ mli