Maleaki
1 Sane ni ajaje atsɔɔ nɛ:
Yehowa wiemɔ ni etsɔ Maleaki* nɔ ekɛhã Israel nɛ:
Shi nyɛkɛɔ akɛ: “Mɛɛ gbɛ nɔ osumɔɔ wɔ?”
“Ani jeee Yakob nyɛmi nuu ji Esau?”+ Yehowa kɛɛ. “Shi misumɔ Yakob, 3 ni minyɛ Esau;+ ni mihã egɔji lɛ tsɔ amaŋfɔ,+ ni mishi egboshinii lɛ mihã ŋa mli gbei ni yɔɔ ŋa nɔ lɛ.”+
4 “Eyɛ mli akɛ Edom kɛɔ akɛ, ‘Akumɔ wɔ dukuduku, shi wɔbaaku wɔsɛɛ kɛya, ní wɔyasaa wɔmamɔ hei ni efee koikoi lɛ’ moŋ, shi nɔ ni Yehowa, taiatsɛ lɛ, kɛɛ nɛ, ‘Amɛbaamamɔ, shi makumɔ mashwie shi, ni abaatsɛ amɛ akɛ “nɔfɔŋfeemɔ kpokpaa” kɛ “maŋ ni Yehowa ebu lɛ fɔ kɛmiiya naanɔ.”+ 5 Nyɛ diɛŋtsɛ nyɛhiŋmɛii baana, ni nyɛbaakɛɛ akɛ: “Yehowa nɔ akwɔ gojoo yɛ Israel kpokpaa lɛ nɔ.”’”
6 “‘Bi kɛ woo hãa etsɛ,+ ni tsulɔ hu kɛ woo hãa enuŋtsɔ. No hewɔ lɛ, kɛ́ tsɛ ji mi lɛ,+ nɛgbɛ woo ni sa mi lɛ yɔɔ?+ Ni kɛ́ nuŋtsɔ* ji mi lɛ, nɛgbɛ gbeyeishemɔ* ni sa mi lɛ yɔɔ?’ nɔ ni Yehowa, taiatsɛ lɛ, kɛɔ nyɛ osɔfoi ni gbeɔ migbɛ́i lɛ he guɔ lɛ nɛ.+
“‘Shi nyɛkɛɔ akɛ: “Mɛɛ gbɛ nɔ wɔgbeɔ ogbɛ́i lɛ he guɔ?”’
7 “‘No ji akɛ, nyɛkɛ niyenii* ni he tseee bahãa yɛ mifɔleshaa latɛ lɛ nɔ.’
“‘Ni nyɛkɛɔ akɛ: “Mɛɛ gbɛ nɔ wɔwo ohe muji?”’
“‘No ji akɛ, nyɛkɛɔ akɛ: “Yehowa okpɔlɔ+ lɛ ji nɔ ko ni sa akɛ anyaŋe.” 8 Ni kɛ́ nyɛkɛ kooloo ni eshwila bahã akɛ afɔle lɛ, nyɛkɛɔ akɛ: “Ejeee nɔ fɔŋ ko.” Ni kɛ́ nyɛkɛ kooloo akpaketsɛ loo helatsɛ bahã lɛ, nyɛkɛɔ akɛ: “Ejeee nɔ fɔŋ ko.”’”+
“Ofainɛ, bo lɛ, feemɔ akɛ okɛyaahã omralo lɛ ni okwɛ. Ani ebaaná ohe miishɛɛ loo ebaahere bo kɛ miishɛɛ?” Yehowa, taiatsɛ lɛ kɛɛ.
9 “Ni agbɛnɛ, nyɛfainɛ, nyɛkpaa Nyɔŋmɔ fai, koni ena wɔ mɔbɔ. Kɛ́ nyɛhiɛ afɔlei ni tamɔ nɛkɛ yɛ nyɛdɛŋ lɛ, ani ebaahere nyɛteŋ mɔ ko kɛ miishɛɛ?” Yehowa, taiatsɛ lɛ kɛɛ.
10 “Ni nyɛteŋ namɔ miisumɔ ni eŋamɔ shinai* lɛ?+ Ejaakɛ nyɛshɛreee la po yɛ mifɔleshaa latɛ lɛ nɔ ní nyɛheee nɔ ko.+ Mibɛ nyɛhe miishɛɛ,” Yehowa, taiatsɛ lɛ kɛɛ, “ni mináaa nyɛdɛŋ nikee afɔle ko he miishɛɛ.”+
11 “Shi kɛjɛ hulushitee mli kɛyashi eshinyɔɔ mli* lɛ, migbɛ́i lɛ baaje agbo yɛ jeŋmaji lɛ ateŋ.+ He fɛɛ he lɛ, abaashã afɔlei koni eje lasu, ni akɛ afɔlei baahã migbɛ́i lɛ akɛ nikeenii krɔŋŋ; ejaakɛ migbɛ́i lɛ baaje agbo yɛ jeŋmaji lɛ ateŋ,”+ Yehowa, taiatsɛ lɛ kɛɛ.
12 “Shi nyɛbuleɔ lɛ,*+ ejaakɛ nyɛkɛɔ akɛ, ‘Yehowa okpɔlɔ lɛ he tseee, ni enɔ yibii, ni ji enɔ niyenii lɛ, esa akɛ anyaŋe.’+ 13 Nyɛkɛɔ hu akɛ, ‘Naa! Mɛɛ tɔlɛ po nɛ!’ ni nyɛshoɔ nyɛgugɔŋ kɛnyaŋeɔ enɛ,” Yehowa, taiatsɛ lɛ kɛɛ. “Ni nyɛkɛ kooloi ni ayaju kɛ kooloi akpaketsɛmɛi kɛ helatsɛmɛi bahãa. Hɛɛ, nyɛkɛ nibii ni tamɔ enɛɛmɛi baa akɛ nikeenii! Ani nyɛmiikpa gbɛ akɛ mahe yɛ nyɛdɛŋ?”+ Yehowa kɛɛ.
14 “Alomɔ ŋaatsɔlɔ ni yɔɔ toonuu ni kpa ko bɛ ehe yɛ etooku mli, ní kɛ́ ewo shi lɛ, ekɛ nɔ ni kpa yɔɔ ehe* yashãa afɔle ehãa Yehowa. Ejaakɛ Maŋtsɛ kpeteŋkpele ji mi,”+ Yehowa, taiatsɛ lɛ kɛɛ, “ni migbɛ́i lɛ he baafee gbeyei yɛ jeŋmaji lɛ ateŋ.”+