Hiɛmɔ O-Yehowa Gbeyeishemɔ Lɛ Mli
“Ejaakɛ Maŋtsɛ kpeteŋkpele ji mi Yehowa Zebaot kɛɛ, ni migbɛi Iɛ he yɛ gbeyei yɛ jeŋmaji Iɛ ateŋ!”—MALEAKI 1:14.
1, 2. (a) Mɛɛ shɛɛsane ni hewalɛ yɔɔ mli waa yɔɔ Maleaki wolo lɛ mli? (b) Mɛni wɔkaseɔ kɛjɛɔ Yehowa shɛɛsane lɛ shishijee wiemɔi lɛ amli?
“YEHOWA wiemɔ lɛ mli kojomɔ he gbalɛ ni atsɔ Maleaki nine nɔ akɛha Israel nɛ.” (Maleaki 1:1) Nɛkɛ wiemɔ kuku ni kanyaa mɔ nɛɛ ji nɔ ni je Biblia mli wolo ni ji Maleaki shishi. Yɛ Biblia mli lɛ, kojomɔ he gbalɛ bafeɔ wiemɔ ni akɛshiɔ efɔŋfeelɔi yɛ be fɛɛ mli. Ni enɛ ji anɔkwale hu yɛ Maleaki wolo lɛ mli yɛ emli shɛɛsane ni naa wa ni akɛha Israel maŋ lɛ hewɔ. Ehe susumɔ lɛ baaye abua wɔ ni wɔna bɔ ni ehe hiaa akɛ wɔɔhiɛ wɔ-Yehowa gbeyeishemɔ kɛ wɔsuɔmɔ kɛha lɛ lɛ mli.
2 Wolo lɛ klɛŋklɛŋ kukuji enyɔ lɛ kɛ nikasemɔ ko ni kɔɔ ŋaawoo kɛhamɔ he haa wɔ. Yehowa maa bɔ ni esumɔɔ ni eye ebua etoibolɔi lɛ anɔ mi ehaa amɛ: “Misumɔ nyɛ! Yehowa kɛɛ.” Mɛɛ hiɛkpamɔ wiemɔ ni haa mɔ tsui nyaa ni woɔ mɔ hewalɛ enɛ ji kɛha Israel sɛɛsɛɛyalɔi lɛ mli bii ni yɔɔ tsuijurɔ lɛ. Shɛɛsane lɛ tee nɔ akɛ: “Shi nyɛkɛɔ akɛ: ‘Mɛni mli osumɔɔ wɔ yɛ?’ ‘Ani Esau lɛ jeee Yakob nyɛmi?’ Yehowa kɛɛ. ‘Kɛlɛ misumɔɔ Yakob, shi miinyɛ Esau, ni mifee egɔji lɛ amaŋfo, ni mikɛ egbɛfaŋnɔ lɛ ha ŋaŋ gbeei.’”—Maleaki 1:2, 3.
3. Mɛni ha Yehowa nu saji ahe yɛ Yakob kɛ Esau he taakɛ efee lɛ?
3 Mɛni hewɔ Yehowa sumɔɔ Yakob ni yɛ sɛɛ mli lɛ, Yakob Seshibii, ni ji Israelbii lɛ? Ejɛ Nyɔŋmɔ gbeyeishelɔ ni Yakob ji kɛ bɔ ni ekɛ bulɛ haa efɔlɔi ni sheɔ Nyɔŋmɔ gbeyei lɛ hewɔ. Shi Esau, ji gbɔmɔ pɛsɛmkunyatsɛ, ni bɛ Nyɔŋmɔ gbeyeishemɔ. Agbɛnɛ ebɛ bulɛ kɛha efɔlɔi ni yɛ adebɔɔ naa lɛ amɛkpaa gbɛ akɛ eeeshe amɛ gbeyei lɛ. No hewɔ lɛ eja gbɛ akɛ Yehowa aaasumɔ Yakob ni enyɛ Esau. Enɛ ji kɔkɔbɔɔ nɔ kɛha wɔ. Esa akɛ wɔkwɛ jogbaŋŋ ni wɔkalaaje Nyɔŋmɔ ni wɔsheɔ lɛ gbeyei lɛ, ni wɔtsɔmɔ mɛi ni diɔ heloo gbɛfaŋ nibii asɛɛ tamɔ Esau, ni taoɔ ni edi eheloŋ akɔnɔi asɛɛ lɛ.—1 Mose 26:34, 35; 27:41; Hebribii 12:16.
4, 5. (a) Yakob kɛ Esau shihilɛ gbɛ lɛ na amɛseshibii lɛ anɔ hewalɛ yɛ mɛɛ gbɛi anɔ? (b) Enɛ sa Israelbii lɛ ahe yɛ mɛɛ gbɛ nɔ?
4 Taakɛ Yakob gbɛi lɛ tsɔ jɔɔmɔ kɛha eseshibii ni ji Israelbii lɛ, nakai nɔŋŋ Esau gbɛ lɛ hu batsɔ nɔ ni teɔ shi woɔ enɛ kɛha eseshibii, ni ji Edombii lɛ. Edombii lɛ naaa Yehowa jɔɔmɔ mli ŋɔɔmɔ. Shi moŋ, akɛni amɛnyɛɔ ewebii ni kɛ amɛ efee kpaŋmɔ lɛ waa hewɔ lɛ, amɛtee Yehowa mlifu shi. Nebukadnezar asraafoi lɛ ye amɛnɔ ni sɛɛ mli lɛ Arabiabii hu baye amɛnɔ. Yɛ naagbee lɛ, taakɛ Yehowa gba fɔ shi lɛ, Edombii lɛ laaje akɛ maŋ.—Obadia 18.
5 Nyɔŋmɔ kojomɔi ni ekɛba Edom nɔ lɛ je shishi dani Maleaki gbii lɛ shɛ. Te enɛ aaasa Israelbii lɛ ahe eha tɛŋŋ? Yehowa kɛɔ amɛ akɛ: “Ni nyɛhiŋmɛi aaana, ni nyɛ diɛŋtsɛ nyɛaakɛɛ akɛ: Yehowa da kɛteke Israel kpokpai lɛ!” (Maleaki 1:5) Israel kɛ lɛ diɛŋtsɛ “ehiŋmɛi” ena suɔmɔ ni Yehowa yɔɔ kɛha lɛ akɛ maŋ lɛ yɛ yinɔi lɛ amli.
Wɔnifeemɔ Baatsɔɔ Kɛji Akɛ Wɔsheɔ Nyɔŋmɔ Gbeyei
6. Yehowa folɔ Israelbii lɛ anaa yɛ mɛɛ gbɛ nɔ?
6 Kojomɔ he gbalɛ lɛ tee nɔ akɛ: “Bi woɔ etsɛ, ni tsulɔ hu woɔ enuŋtsɔ; kulɛ kɛji tsɛ ji mi lɛ; nɛgbɛ miwoo lɛ yɔɔ? Ni kɛji nuŋtsɔ hu ji mi lɛ, nɛgbɛ migbeyeishemɔ lɛ yɔɔ? Yehowa Zebaot miikɛɛ nyɛ, osɔfoi, ni nyɛgbeɔ migbɛi lɛ he guɔ lɛ.” (Maleaki 1:6; 2 Mose 4:22, 23; 5 Mose 32:6) Yehowa eka Israelbii, eha amɛ nɔ ni amɛtaoɔ, ebu amɛhe, taakɛ bɔ ni tsɛ baafee aha ebinuu. Mɛni ji nɔ ni lɛ hu ekpaa gbɛ kɛjɛɔ amɛdɛŋ yɛ gbɛ ni ja nɔ? Ni amɛkɛ woo aha lɛ ni amɛshe lɛ gbeyei. Maŋ muu lɛ, ni osɔfoi lɛ fata he lɛ efeee enɛ, amɛbuuu Yehowa gbɛi lɛ, ni amɛnyaŋeɔ egbɛi lɛ. Amɛbatsɔmɔ “bii sɛɛsɛɛyalɔi.”—Yeremia 3:14, 22; 5 Mose 32:18-20; Yesaia 1:2, 3.
7. Te Israelbii lɛ nu enaafolɔmɔ lɛ he amɛha tɛŋŋ, ni te Yehowa ha amɛ hetoo eha tɛŋŋ?
7 Israelbii lɛ bi akɛ: “Mɛni mli wɔgbeɔ ogbɛi lɛ he guɔ yɛ?” Yehowa kɛ hewalɛ ha amɛ hetoo akɛ: “Nyɛkɛ aboloo ni abule baahaa mi yɛ mifɔleshaalatɛ lɛ nɔ! Shi nyɛkɛɔ akɛ: Mɛni mli wɔbuleɔo yɛ? Ni nyɛkeɔ akɛ: Yehowa okpɔlɔ lɛ he guɔ egbo! lɛ. Ni kɛji nyɛkɛ kooloo shwilafo baha ni akɛsha afɔle lɛ, ejeee nɔ fɔŋ ko! Ni kɛji nyɛkɛ akpake ko loo helatsɛ baha lɛ, ejeee nɔ fɔŋ! Okɛyaha omralo lɛ: Ani eeena ohe tsui, aloo eeekwɛ ohiɛ? Yehowa Zebaot kɛɛ.”—Maleaki 1:6-8.
8. Mɛni Israelbii lɛ kɛ amɛnifeemɔi tsɔɔ lɛ?
8 Mɔ ko baanyɛ asusu bɔ ni Israelnyo kɛ hiɛtɛɛ baakwɛ etoi kuu lɛ ni ekɛ hiɛtɛɛ ahala nɔ ni eshwila aloo akpake ni yɔɔ mli lɛ ni ekɛsha afɔle eha Yehowa lɛ he. Ebaatsɔ nɛkɛ gbɛ nɔ etsɔ afɔleshaa nifeemɔi lɛ amli ni kɛlɛ ebaatsi ekooloi lɛ ateŋ nɔ ni hi fe fɛɛ lɛ naa eha lɛ diɛŋtsɛ ehe. Ebɛ hegbɛ akɛ efeɔ nɔ ko ni tamɔ nɛkɛ yɛ amralo lɛ hiɛ! Shi Israelbii lɛ fee Yehowa nakai —tamɔ nɔ ni enaaa amɛŋaatsɔɔ kɛ shishiumɔ lɛ. No hewɔ lɛ Yehowa bi yɛ gbɛ ni ja nɔ akɛ, ‘Nɛgbɛ migbeyeishemɔ lɛ yɔɔ?’ Amɛtsɔ amɛwiemɔi anɔ amɛkɛɛ akɛ amɛsheɔ Yehowa gbeyei, shi amɛnifeemɔi etsɔɔɔ nakai kwraa.—5 Mose 15:21.
9. Te osɔfoi lɛ fee amɛnii yɛ nɔ ni gbɔmɛi lɛ feɔ lɛ he amɛha tɛŋŋ?
9 Mɛni ji osɔfoi lɛ anifeemɔ yɛ nɛkɛ afɔlei ni ahiɔ nɛɛ amli? Amɛkɛɛ: “Ejeee nɔ fɔŋ!” Amɛbu Israelbii lɛ agbɛ fɔŋ lɛ bem. No hewɔ lɛ, eyɛ mli akɛ mɛi ni jɛ nomŋɔɔ mli amɛba kɛjɛ Babilon lɛ bɔ mɔdɛŋ ni amɛkɛ ekaa aje anɔkwale jamɔ ni aaato ama shi ekoŋŋ lɛ shishi moŋ, shi yɛ sɛɛ mli lɛ, amɛbafee mɛi ni nɔ ko jeee amɛhe sane ko, henɔwolɔi mɛi ni buɔ amɛhe jalɔi, amɛlaaje Yehowa gbeyeishemɔ ni amɛyɔɔ lɛ. No hewɔ lɛ, amɛsɔɔmɔ yɛ sɔlemɔwe lɛ bafee lakamɔ, ni amɛyeɔ gbijuji lɛ akɛ nɔ ko ni esa akɛ afee kɛkɛ—Maleaki 2:1-3; 3:8-10.
10. (a) Mɛɛ afɔleshaa Yehowa sumɔɔ ŋmɛnɛ? (b) Mɛɛ gbɛ pɛ nɔ wɔ afɔleshaa lɛ aaanyɛ afee nɔ ni sa Yehowa hiɛ yɛ?
10 Shi mɛi komɛi baate shi awo akɛ: ‘Enɛ kɔɔɔ wɔhe nɔ ko; wɔkɛ kooloi eshaaa afɔle dɔŋŋ.’ Shi wɔyɛ afɔle ko ni wɔshaa wɔhaa. Kadimɔ bɔ ni Paulo kɛ hehiamɔ wie enɛ he lɛ: “No hewɔ lɛ, anyɛmimɛi, mikɛ Nyɔŋmɔ mlitsɔlɛ miikpa nyɛ fai, akɛ nyɛŋɔ nyɛgbɔmɔtsei lɛ nyɛdamɔ shi akɛ afɔle ni hiɛ ka ni he tse ni sa Nyɔŋmɔ hiɛ ni nyɛjamɔ lɛ afee mumɔŋ jamɔ.” (Romabii 12:1) Afɔleshaa ni Yehowa taoɔ ŋmɛnɛ ji bo! Enɛ ji, ohewalɛi, nibii ni oyɔɔ, kɛ onyɛmɔi. Ebaakpɛlɛ wɔ afɔleshaa lɛ nɔ kɛ no ji wɔnɔ ni hi fe fɛɛ. Nɔ ni eshwɛ yɛ sɛɛ ni wɔkɛaaha Yehowa, tamɔ afɔle ni eje kpa, ni he miiye lɛ baafite wekukpaa ni ka wɔkɛ lɛ teŋ lɛ.
11. Esa akɛ Yehowa tsulɔ fɛɛ tsulɔ ni ejɔɔ ehe nɔ lɛ apɛi lɛ diɛŋtsɛ emli ekwɛ yɛ mɛɛ gbɛ nɔ?
11 Eyɛ mli akɛ mɛi komɛi kɛ nakai feemɔ baakɛɛ akɛ, “ejeee nɔ fɔŋ” moŋ, shi wɔle bɔ ni Yehowa nuɔ he ehaa. No hewɔ lɛ, nyɛhaa wɔpɛia “sɔɔmɔ krɔŋkrɔŋ” lɛ mli “afɔleshaa” ni wɔkɛhaa, ni nɔ ni fata he ji wɔhe ni wɔkɛwoɔ shiɛmɔ mli, wɔteemɔŋ nikasemɔ, sɔlemɔ, kɛ kpeei ni wɔyaa lɛ mli jogbaŋŋ. Ani otsui nyɔɔ omli akɛ okɛ nɔ ni hi fe fɛɛ miiha Yehowa, aloo nɔ ni eshwɛ yɛ shishi kɛkɛ? Oshara yɛ hiɛtserɛjiemɔ loo shwɛmɔ mli ni wɔkɛ wɔhe aaawo vii yɛ otsii lɛ anaagbee bɔ ni wɔnaŋ be loo hewalɛ ni wɔkɛaashiɛ Maŋtsɛyeli lɛ he sanekpakpa lɛ ni wɔya kpee lɛ mli. Esa akɛ wɔshihilɛ gbɛ lɛ fɛɛ, wɔdaa gbi shihilɛ, ni wɔsui kɛ henumɔi fata he lɛ afee nɔ ni kɛ afɔle ni wɔshaa wɔhaa Yehowa lɛ yaa. Kaaha efee nɔ kroko, efee nɔ ni hi fe fɛɛ lɛ pɛ!
Mɛi Ni Sheɔ Nyɔŋmɔ Gbeyei Diɛŋtsɛ lɛ Ni Wɔyoɔ Amɛ
12. Mɛɛ ŋaa awoɔ wɔ agbɛnɛ?
12 Gbalɔ lɛ tee nɔ ekɛɛ akɛ, “Agbɛnɛ, nyɛkpaa Mawu fai, koni eduro wɔ!” (Maleaki 1:9) Yehowa wo Israelbii lɛ hewalɛ ni amɛfee nɔ fɛɛ nɔ ni ja, amɛshe lɛ gbeyei yɛ gbɛ ni ja nɔ, ni amɛkɛ nɔ ni sa lɛ lɛ aha lɛ. Esa akɛ wɔfee nakai nɔŋŋ ŋmɛnɛ. Kɛ wɔhi shi yɛ Yehowa taomɔ nii anaa lɛ, no pɛ nɔ wɔɔtsɔ wɔna ni wɔhiɛ eduromɔ mli.
13. (a) Kɛ Yehowa gbeyeishemɔ bɛ lɛ, mɛɛ tsɔne wɔbaanyɛ wɔgbee mli? (b) Hiɛjoomɔ na Israel osɔfoi lɛ anɔ hewalɛ yɛ mɛɛ gbɛ nɔ?
13 Kɛ wɔsheee lɛ gbeyei yɛ gbɛ ni ja nɔ lɛ, wɔsɔɔmɔ ni wɔkɛhaa lɛ lɛ baafee nɔ ko ni ka wɔ nɔ kɛkɛ kɛha pɛsɛmkunya sɛɛnamɔ ko. Kadimɔ bɔ ni Yehowa biɔ Israel osɔfoi lɛ sane yɛ amɛsɔlemɔwe sɔɔmɔ lɛ he lɛ: “Mina ni kulɛ nyɛteŋ mɔ ko ŋamɔ shinaai lɛ, koni nyɛkashɛre la yɛ mifɔleshaalatɛ lɛ nɔ yakatswaa dɔŋŋ! Minaaa nyɛhe tsui, Yehowa Zebaot kɛɛ, ni nyɛdɛŋ nikee nii hu minaaa he miishɛɛ.” (Maleaki 1:10) O, hɛɛ, osɔfoi lɛ yɛ jɛmɛ ni amɛmiisɔmɔ yɛ sɔlemɔwe lɛ, amɛmiiŋamɔ sɔlemɔwe shinaa lɛ, amɛmiishɛre afɔleshaalatɛi lɛ anɔ la lɛ. Shi amɛfeee enɛ efolo. Amɛmiitao nikee kɛ nyɔɔŋnii kɛmiijɛ Israelbii ni baa amɛbashaa afɔle yɛ sɔlemɔwe lɛ adɛŋ. Yehowa naaa amɛhe miishɛɛ yɛ no beaŋ, ni enaaa amɛhe miishɛɛ ŋmɛnɛ hu. Yɛ sɔɔmɔ ni afeɔ yɛ pɛsɛmkunya sɛɛdii pɛ hewɔ lɛ mli. Enyaŋeɔ nii ni tamɔ nɛkɛ.
14. Mɛni hewɔ ehe hiaa yɛ be fɛɛ mli akɛ wɔɔha wɔhiɛ ahi wɔhe nɔ yɛ hiɛjoomɔ he lɛ?
14 Bɔ ni ehe hiaa ni wɔhiɛ ahi wɔhe nɔ yɛ pɛsɛmkunya kɛ hiɛjoomɔ he lɛ bako shi yɛ wɔgbii nɛɛ amli. Ŋmalɛi lɛ bɔɔ wɔ kɔkɔ shii abɔ yɛ hiɛjoomɔ he, etsɔɔ akɛ hiɛjoolɔi jeee mɛi ni yɔɔ Nyɔŋmɔ hiɛ duromɔ. (1 Korintobii 6:10; Efesobii 5:5) Yɛ be mli ni wɔtsuɔ wɔsɔɔmɔ lɛ he nii lɛ, eba akɛ wɔsuɔmɔ kɛ gbeyei ni wɔsheɔ Yehowa lɛ aaatsi wɔ gbɛ koni wɔye wɔhe kɛjɛ sɔɔmɔ ko ni wɔkɛaaha yɛ pɛsɛmkunya hewɔ lɛ he. Esa akɛ wɔhe afee oya ni wɔfamɔ sui loo shishifai komɛi ni tamɔ nɛkɛ ni aaate shi yɛ wɔtsuii amli lɛ. Abɔ onukpai kɛ asafoŋ sɔɔlɔi akɔkɔ titri akɛ amɛkafee ‘mɛi ni diɔ sɛɛnamɔ ni yɔɔ hiɛgbele sɛɛ.’ (Tito 1:7; 1 Timoteo 3:8; 1 Petro 5:2) Mɛi komɛi baaje gbɛ ni amɛkɛ nyɛmimɛi ni baanyɛ aye abua amɛ yɛ heloo gbɛfaŋ lɛ abɔ, ni nɔ ni baajɛ mli aba ji hiɛaŋkwɛmɔ kɛ shɔɔfeemɔ yɛ ŋaawoo ni akɛaaha mɛi ni tamɔ nɛkɛ lɛ. Ekabalɛ akɛ wɔɔtamɔ Israel osɔfoi hiɛjoolɔi lɛ ni miitao nikee kɛ nyɔɔŋnii kɛmiijɛ amɛnanemɛi Israelbii lɛ adɛŋ lɛ.
15. (a) Yɛ mɛɛ gbɛ nɔ Maleaki tsɔɔ akɛ Yehowa gbeyeishelɔi baa shikpɔŋ muu lɛ fɛɛ nɔ? (b) Mɛɛ ŋmalɛi krokomɛi fiɔ enɛ sɛɛ?
15 Ŋmɛnɛ, kɛ Yehowa bi sane lɛ akɛ, “Nɛgbɛ migbeyeishemɔ lɛ yɔɔ?” lɛ, ani gbɔmɛi komɛi baanyɛ aha hetoo akɛ, ‘Naa wɔ, wɔji mɛi ni sheɔ bo gbeyei lɛ’? Hɛɛ kɛ nɔmimaa! Namɛi ni? Yehowa Odasefoi anɔkwafoi lɛ, ni anaa amɛ yɛ shikpɔŋ lɛ nɔ he fɛɛ he lɛ. Nɛkɛ majimaji ateŋ kuu nɛɛ kɛ nitsumɔ ni amɛbaatsu lɛ ji nɔ ni agba afɔ shi yɛ Maleaki 1:11 lɛ: “Ejaakɛ kɛjɛ hulu shitee mli kɛyashi eshinyɔɔ mli lɛ, migbɛi lɛ da yɛ jeŋmaji lɛ ateŋ, . . . ni akɛ nikee nii ni he tse baa; ejaakɛ migbɛi lɛ da yɛ jeŋmaji lɛ ateŋ Yehowa Zebaot kɛɛ.”—Kwɛmɔ Lala 67:8; Yesaia 33:5, 6; 41:5; 59:19; Yeremia 32:39, 40 lɛ hu.
16. Kɛjɛ hulu shitee kɛyashi hulushinyɔɔ lɛ baanyɛ ana mɛɛ shishinumɔi sɔrɔtoi, ni enɛ miiba mli yɛ mɛɛ gbɛ nɔ?
16 Kwɛ bɔ ni Maleaki tsɔɔ nitsumɔ kpeteŋkpele ni atsuɔ yɛ wɔgbii nɛɛ amli ni ji sanekpakpa lɛ shiɛmɔ yɛ shikpɔŋ lɛ fɛɛ nɔ lɛ mli eha. (Mateo 24:14; Kpojiemɔ 14:6, 7) Kɛjɛ hulu shitee mli kɛyashi eshinyɔɔ mli, yɛ shikpɔŋ lɛ he mfoniri naa lɛ, nɔ ni etsɔɔ ji kɛjɛ boka kɛyashi anai. He fɛɛ he ni wɔɔkwɛ yɛ shikpɔŋ nɔ ŋmɛnɛ lɛ, wɔnaa Yehowa gbeyeishelɔi lɛ ni amɛmiifee esuɔmɔnaa nii. Kɛjɛ hulu shitee mli kɛyashi eshinyɔɔ mli hu tsɔɔ gbi muu fɛɛ. Hɛɛ, Nyɔŋmɔ tsuji ni sheɔ lɛ gbeyei lɛ kɛ yijiemɔ miiha yɛ be fɛɛ mli. Taakɛ Yehowa wo shi lɛ, mɛi ni sheɔ lɛ gbeyei lɛlɛŋ lɛ miijaje egbɛi lɛ yɛ shikpɔŋ muu lɛ fɛɛ nɔ.—2 Mose 9:16; 1 Kronika 16:23, 24; Lala 113:3.
Hiɛmɔ Nyɔŋmɔ Gbeyeishemɔ ni Sa lɛ Mli
17. Mɛni baajɛ bulɛ ni wɔyɔɔ kɛha Yehowa kɛ gbeyei ni wɔsheɔ lɛ lɛ ni wɔɔlaaje lɛ mli aba?
17 Kɛha mɛi ni kɛ woo haaa Yehowa ni amɛsheee lɛ gbeyei lɛ, jamɔ kɛ sɔɔmɔ batsɔɔ tamɔ jatsu kɛhaa amɛ. Yehowa kɛɛ Israelbii lɛ akɛ: “Nyɛmiibule mi yɛ kɛɛmɔ ni nyɛkeɔ akɛ, ‘Yehowa okpɔlɔ lɛ ji nɔ ko ni abule, ni enibaa nii hu ni ji eniyenii lɛ he guɔ egbo lɛ.’ Ni nyɛkɛɔ akɛ, ‘Naa! Mɛɛ naagba po nɛ!’” (Maleaki 1:12, 13, New World Translation.) Enɛ hu baanyɛ afee anɔkwale yɛ ŋmɛnɛŋmɛnɛ beaŋ. Kɛha mɛi ni laajeɔ Yehowa gbeyeishemɔ lɛ, kpeei, shiɛmɔyaa kɛ Kristofoi asɔɔmɔ nitsumɔi krokomɛi tsɔɔ tamɔ jatsu kɛhaa amɛ.
18. Mɛni ji nɔ ni baa ŋmɛnɛŋmɛnɛ beaŋ Nyɔŋmɔ tsuji komɛi anɔ yɛ be kɛ bei amli?
18 Kadimɔ bɔ ni atsɔɔ bɔ ni gbɔmɛi nɛɛ ji lɛ mli yɛ January 1, 1937 Watchtower lɛ mli: ‘Kɛha mɛi ni yeee anɔkwale lɛ, hegbɛ ni akɛaasɔmɔ Nyɔŋmɔ kɛtsɔ Maŋtsɛyeli lɛ yibii ni akɛaaha mɛi krokomɛi taakɛ Nuŋtsɔ lɛ efa lɛ, etsɔ tamɔ nifeemɔ ko ni tɔɔ mɔ ni afeɔ kɛkɛ, ni ekɛ hegbɛ ko haaa amɛ ni amɛaakpɛ yɛ gbɔmɛi ahiɛ. Maŋtsɛyeli lɛ he sane lɛ ni akala ni akɛaaya shia kɛ shia ni amɛkɛ enɛ aaaha gbɔmɛi lɛ ji nɔ ko ni baa mɔ shi yɛ nɛkɛ gbɔmɛi ni buɔ amɛhe tsɔ nɛɛ ahiɛ. Amɛnaaa miishɛɛ ko yɛ mli . . . hewɔ lɛ nɔ ni amɛkɛɛ, ni amɛyaa nɔ amɛkɛɔ ji akɛ: “Woji ni atereɔ akɛfoɔ shi nɛɛ ji woji ahɔɔmɔ nifeemɔ kɛkɛ. Mɛɛ tɔlɛ nitsumɔ po enɛ ji!’” Ŋmɛnɛ, mɛi komɛi yɛ ni yɛ be kɛ bei amli lɛ amɛnuɔ he akɛ shiɛmɔyaa ji nitsumɔ ni wa ni kpee yaa hu ji tɔlɛ nii diɛŋtsɛ. Enɛ ji nɔ ni baanyɛ aba kɛ wɔlaaje Yehowa gbeyeishemɔ, kɛ suɔmɔ ni wɔyɔɔ kɛha lɛ lɛ.
19. Te wɔɔfee tɛŋŋ wɔya nɔ wɔjie hiɛsɔɔ ni wɔyɔɔ kɛha gbɛjianɔ ni Yehowa eto lɛ kpo wɔtsɔɔ?
19 Kɛ wɔhiɛ Yehowa gbeyeishemɔ mli lɛ, eeeha wɔba wɔhe shi yɛ ehiɛ ni wɔhiɛ asɔ nɔ ni efeɔ kɛhaa wɔ lɛ yɛ be fɛɛ mli. Kɛji akɛ wɔbua wɔhe naa akɛ kuu bibioo yɛ shia aloo wɔyi fa akɛ akpei nyɔŋmanyɔŋmai abɔ yɛ kpeei wuji ashishi hu lɛ, wɔdaa Yehowa shi yɛ hegbɛi ni wɔna akɛ wɔkɛ wɔnyɛmimɛi Kristofoi aaakpe lɛ hewɔ. Wɔbaatsɔɔ akɛ wɔdaa lɛ shi kɛtsɔ jɛmɛ ni wɔɔya ni agbɛnɛ wɔwowoo wɔhe hewalɛ kɛya “suɔmɔ kɛ nitsumɔi kpakpai ahe” kɛtsɔ sanegbaa ni tswaa mɔ emaa shi kɛ saji ahetoohamɔ yɛ kpeei ashishi lɛ nɔ. (Hebribii 10:24, 25) Kɛ hegbɛ aaaba akɛ wɔɔkwɛ kpee lɛ fai komɛi anɔ lɛ, wɔtsiŋ wɔhesaamɔ lɛ wɔtoŋ kɛyashi be mli ni ekpe sɛɛ tsɔ ni kpee lɛ eshɛ shi lɛ da, koni wɔkɛ oyaiyeli abua nibii komɛi anaa wɔfee. Kaabu nɛkɛ nitsumɔ nɛɛ akɛ nɔ ko ni he ehiaa. Amɛji hegbɛi ni yɔɔ krɔŋkrɔŋ. Ni gbɛ ni wɔtsɔɔ nɔ wɔbuɔ amɛ lɛ tsɔɔ bulɛ ni wɔkɛhaa Yehowa kɛ bɔ ni wɔsheɔ lɛ gbeyei.
20. (a) Mɛni ji nɔ ni esaaa akɛ wɔhiɛ kpaa nɔ gbi ko gbi ko lɛ? (b) Te wɔmuɔ sane naa wɔhaa tɛŋŋ?
20 Kwɛ bɔ ni sane lɛ batsɔɔ awerɛhoo kɛhaa mɛi ni laajeɔ Nyɔŋmɔ gbeyeishemɔ lɛ! Amɛbɛ hiɛsɔɔ kɛha hegbɛi ni ekaaa ni ji wekukpaa ni aaaka wɔkɛ jeŋ muu fɛɛ Maŋtsɛ lɛ teŋ lɛ. “Ejaakɛ maŋtsɛ kpeteŋkpele ji mi, Yehowa Zebaot kɛɛ, ni migbɛi lɛ he yɛ gbeyei yɛ jeŋmaji lɛ ateŋ.” (Maleaki 1:14; Kpojiemɔ 15:4) Wɔhiɛ akakpa enɛ nɔ gbi ko gbi ko. Eba akɛ wɔteŋ mɔ fɛɛ mɔ aaatamɔ lalatsɛ lɛ ni kɛɛ: “Mɛi ni sheɔ gbeyei lɛ fɛɛ kɛ mɛi ni yeɔ okpoi lɛ anɔ lɛ anaanyo ji mi.” (Lala 119:63) Yɛ be mli ni wɔsusu nɛkɛ sane nɛɛ he lɛ, wɔmuɔ sane naa tamɔ bɔ ni Salomo fee yɛ be mli ni ekɛɛ: “She Nyɔŋmɔ gbeyei ni oye ekitai lɛ anɔ! Shi enɛ ji gbɔmɛi fɛɛ agbɛnaa. Ejaakɛ Nyɔŋmɔ baakojo nitsumɔ fɛɛ nitsumɔ kɛ teemɔŋ sane fɛɛ teemɔŋ sane hu, ekpakpa jio, efɔŋ jio.”—Jajelɔ 12:13, 14.a
[Shishigbɛ niŋmai]
a Ajie kɛjɛ December 1, 1987 Watctower lɛ mli.
Nii Ni Wɔkaseɔ Kɛjɛɔ Maleaki Wolo lɛ Mli
◻ Mɛni hewɔ esa akɛ Israelbii lɛ ashe Yehowa gbeyei lɛ?
◻ Yɛ mɛɛ gbɛ nɔ wɔnifeemɔi lɛ tsɔɔ kɛji akɛ wɔsheɔ Yehowa gbeyei Iɛlɛŋ?
◻ Mɛni yeɔ odase ekɛ Yehowa gbeyeishelɔi yɛ shikpɔŋ muu lɛ fɛɛ nɔ ŋmɛnɛ?
◻ Mɛni hewɔ esa akɛ wɔya nɔ wɔhiɛ Nyɔŋmɔ ni wɔɔshe lɛ gbeyei yɛ gbɛ ni ja nɔ lɛ mli Iɛ?
[Wiemɔ ni akɔ ni akɛmiitsu nii ni yɔɔ baafa 16]
Yehowa gbɛi lɛ baafee agbo kɛjɛ hulu shitee kɛyashi hulushinyɔɔ mli
[Mfoniri ni yɔɔ baafa 15]
Israelbii lɛ, gbe Yehowa he guɔ kɛtsɔ kooloi shwilafoi, akpakei loo nɔ ni he yeɔ lɛ ni amɛkɛsha afɔle lɛ nɔ