Nɔ Ni Yohane Ŋma

6 Enɛ sɛɛ lɛ, Yesu yiŋ etee Galilea Ŋshɔ loo Tiberia Ŋshɔ* lɛ sɛɛ.+ 2 Shi mɛi babaoo tee nɔ amɛnyiɛ esɛɛ,+ ejaakɛ amɛmiina naakpɛɛ okadii ni efeɔ, ni ji helatsɛmɛi ni etsaa lɛ.+ 3 No hewɔ lɛ, Yesu kwɔ kɛtee gɔŋ ko nɔ, ni eyata shi yɛ jɛmɛ, ekɛ ekaselɔi lɛ. 4 No mli lɛ, Hehoo lɛ,+ ni ji Yudafoi lɛ agbi jurɔ lɛ miibɛŋkɛ. 5 Be ni Yesu hole ehiŋmɛii anɔ ni ena akɛ mɛi babaoo miiba eŋɔɔ lɛ, ekɛɛ Filipo akɛ: “Nɛgbɛ wɔbaayahé blodo yɛ wɔhã mɛnɛɛmɛi ni amɛye?”+ 6 Shi ewie enɛ kɛka lɛ, ejaakɛ ele nɔ ni eeba ebafee. 7 Filipo hã lɛ hetoo akɛ: “Blodo denarioi* 200 falɛ po faaa bɔ ni amɛteŋ mɔ fɛɛ mɔ baaná fioo ko.” 8 Ekaselɔi lɛ ateŋ mɔ kome, Andrea, ni ji Simon Petro nyɛmi nuu lɛ, kɛɛ lɛ akɛ: 9 “Naa gbekɛ nuu fioo ko ni hiɛ barle* blodoi enumɔ kɛ ŋshɔŋ loi enyɔ. Shi mɛi pii nɛɛ, amɛnɛgbɛ enɛ baashɛ?”+

10 Yesu kɛɛ: “Nyɛhãa mɛi lɛ ataraa shi.” No mli lɛ, jwɛi pii yɛ jɛmɛ, no hewɔ lɛ, hii ni yifalɛ aaafee 5,000 lɛ ho amɛtara shi.+ 11 Ni Yesu kɔlɔ blodoi lɛ, ni be ni eda shi lɛ, ejara ehã mɛi ni tara shi lɛ; nakai nɔŋŋ efee yɛ loi bibii lɛ hu he, ni mɔ fɛɛ mɔ ná bɔ ni etaoɔ. 12 Shi be ni amɛye amɛtɔrɔ lɛ, ekɛɛ ekaselɔi lɛ akɛ: “Nyɛbuaa blodoi kukuji ni eshwɛ lɛ anaa, koni nɔ ko nɔ ko akafite.” 13 No hewɔ lɛ, amɛbua barle* blodoi enumɔ lɛ ni mɛi lɛ ye lɛ akukuji ni shwɛ lɛ anaa amɛwo kɛntɛŋi 12 obɔbɔ.

14 Be ni mɛi lɛ na okadi ni Yesu fee lɛ, amɛbɔi kɛɛmɔ akɛ: “Mɔ nɛ ji Gbalɔ ni baa je lɛ mli lɛ lɛɛlɛŋ.”+ 15 Agbɛnɛ, Yesu lɛ, akɛni ele akɛ amɛmiiba amɛbamɔ lɛ ni amɛwó lɛ maŋtsɛ hewɔ lɛ, eshi jɛmɛ+ ni ekome too etee gɔŋ lɛ nɔ ekoŋŋ.+

16 Be ni shɛ gbɛkɛnaashi lɛ, ekaselɔi lɛ kpeleke shi kɛtee ŋshɔ lɛ naa,+ 17 ni amɛbote lɛlɛ ko mli, ni amɛbɔi ŋshɔ lɛ foo kɛmiiya Kapernaum. Be nɛɛ mli lɛ, duŋ ewo, ni Yesu bako amɛŋɔɔ lolo.+ 18 Agbɛnɛ hu, akɛni kɔɔyɔɔ ni naa wa ko miitswa hewɔ lɛ, ŋshɔ lɛ fee hamahama.+ 19 Shi be ni amɛwiri aaafee mailii etɛ loo ejwɛ* lɛ, amɛna Yesu nyiɛ ŋshɔ lɛ hiɛ ni eebɛŋkɛ lɛlɛ lɛ, ni gbeyei mɔmɔ amɛ. 20 Shi ekɛɛ amɛ akɛ: “Mi ni; nyɛkashea gbeyei!”+ 21 No hewɔ lɛ, amɛná he miishɛɛ akɛ amɛbaahã eba lɛlɛ lɛ mli, ni amrɔ lɛ, lɛlɛ lɛ yakpeleke yɛ shikpɔŋ nɔ he ni amɛyaa lɛ.+

22 Enɔ jetsɛremɔ lɛ, mɛi babaoo lɛ ni damɔ ŋshɔ lɛ sɛɛ lɛ na akɛ lɛlɛ ko bɛ jɛmɛ. Kulɛ lɛlɛ bibioo ko yɛ jɛmɛ, shi Yesu fataaa ekaselɔi lɛ ahe kɛboteee nakai lɛlɛ lɛ mli, ejaakɛ ekaselɔi lɛ pɛ shi amɛtee. 23 Shi lɛji jɛ Tiberia ba he ni Nuŋtsɔ lɛ da shi ni amɛye blodoi lɛ yɛ lɛ masɛi. 24 No hewɔ lɛ, be ni mɛi lɛ na akɛ Yesu kɛ ekaselɔi lɛ fɛɛ bɛ jɛmɛ lɛ, amɛbote amɛlɛji lɛ amli ni amɛba Kapernaum koni amɛbatao Yesu.

25 Be ni amɛna lɛ yɛ ŋshɔ lɛ sɛɛ lɛ, amɛbi lɛ akɛ: “Rabi,+ mɛɛ be oba biɛ?” 26 Yesu hã amɛ hetoo ekɛɛ: “Lɛɛlɛŋ, lɛɛlɛŋ, miikɛɛ nyɛ akɛ, jeee okadii ni nyɛna lɛ hewɔ nyɛtaoɔ mi lɛ, shi moŋ, blodoi lɛ ni nyɛye ni nyɛtɔrɔ lɛ hewɔ ni.+ 27 Nyɛkatsua niyenii ni fiteɔ lɛ he nii, shi moŋ nyɛtsua niyenii ni fiteee ni hãa naanɔ wala+ ni gbɔmɔ Bi lɛ baahã nyɛ lɛ he nii; ejaakɛ mɔ nɛ ji mɔ ni Tsɛ lɛ, Nyɔŋmɔ diɛŋtsɛ, esɔo enaa kɛtsɔɔ akɛ eyɛ ehe miishɛɛ lɛ.”+

28 No hewɔ lɛ, amɛbi lɛ akɛ: “Mɛni esa akɛ wɔfee koni wɔnyɛ wɔtsu Nyɔŋmɔ nitsumɔi lɛ?” 29 Yesu hã amɛ hetoo akɛ: “Nyɔŋmɔ nitsumɔ lɛ ji akɛ, nyɛhe mɔ ni etsu lɛ lɛ nɔ nyɛye.”*+ 30 Ni amɛbi lɛ akɛ: “Mɛɛ okadi obaafee,+ koni wɔna ni wɔhe onɔ wɔye? Mɛɛ nitsumɔ obaatsu? 31 Wɔtsɛmɛi lɛ ye mana lɛ yɛ ŋa lɛ nɔ,+ tamɔ bɔ ni aŋma lɛ, akɛ: ‘Ehã amɛ niyenii* ni jɛ ŋwɛi ni amɛye.’”+ 32 Kɛkɛ ni Yesu kɛɛ amɛ akɛ: “Lɛɛlɛŋ, lɛɛlɛŋ, miikɛɛ nyɛ akɛ, Mose hãaa nyɛ niyenii* kɛjɛɛɛ ŋwɛi, shi moŋ mi-Tsɛ ji mɔ ni hãa nyɛ anɔkwa niyenii* kɛjɛɔ ŋwɛi. 33 Ejaakɛ Nyɔŋmɔ niyenii* lɛ ji mɔ ni kpeleke shi kɛjɛ ŋwɛi ni ekɛ wala hãa je lɛ.” 34 No hewɔ lɛ, amɛkɛɛ lɛ akɛ: “Nuŋtsɔ, hã wɔ niyenii* nɛɛ daa.”

35 Yesu kɛɛ amɛ akɛ: “Miji wala niyenii* lɛ. Mɔ fɛɛ mɔ ni baa miŋɔɔ lɛ, hɔmɔ yeŋ lɛ kɔkɔɔkɔ, ni mɔ fɛɛ mɔ ni heɔ minɔ eyeɔ* lɛ, kumai yeŋ lɛ kɔkɔɔkɔ.+ 36 Shi tamɔ bɔ ni mikɛɛ nyɛ lɛ, nyɛna mi moŋ, shi kɛ̃lɛ nyɛheee nyɛyeee.+ 37 Mɛi fɛɛ ni Tsɛ lɛ kɛhãa mi lɛ baaba miŋɔɔ, ni mɔ ni baa miŋɔɔ lɛ, mishwieŋ lɛ kɔkɔɔkɔ;+ 38 ejaakɛ mikpeleke shi kɛjɛ ŋwɛi+ kɛba koni mibafee mɔ ni tsu mi lɛ suɔmɔnaa nii, shi jeee mi diɛŋtsɛ misuɔmɔnaa nii.+ 39 Enɛ ji mɔ ni tsu mi lɛ suɔmɔnaa nii, akɛ mikahã mɛi ni ekɛhã mi lɛ ateŋ mɔ ko kwraa laaje, shi moŋ mitee amɛ shi+ yɛ naagbee gbi lɛ nɔ. 40 Ejaakɛ enɛ ji mi-Tsɛ suɔmɔnaa nii, akɛ mɔ fɛɛ mɔ ni yɔseɔ Bi lɛ, ni eheɔ enɔ eyeɔ* lɛ aná naanɔ wala,+ ni matee lɛ shi+ yɛ naagbee gbi lɛ nɔ.”

41 Kɛkɛ ni Yudafoi lɛ bɔi huhuuhuwiemɔ yɛ ehe, ejaakɛ ekɛɛ akɛ: “Miji niyenii* ni kpeleke shi kɛjɛ ŋwɛi lɛ.”+ 42 Ni amɛbɔi kɛɛmɔ akɛ: “Ani jeee Yesu, Yosef binuu lɛ, ni wɔle epapa kɛ emami lɛ nɛ?+ Te tɛŋŋ ni amrɔ nɛɛ ekɛɔ akɛ, ‘Mikpeleke shi kɛjɛ ŋwɛi’ lɛ?” 43 Yesu here nɔ ekɛɛ amɛ akɛ: “Nyɛkpaa huhuuhu lɛ wiemɔ yɛ nyɛteŋ. 44 Mɔ ko mɔ ko nyɛŋ aba miŋɔɔ, akɛ ja Tsɛ lɛ ni tsu mi lɛ gbala lɛ dã,+ ni matee lɛ shi yɛ naagbee gbi lɛ nɔ.+ 45 Aŋma yɛ Gbalɔi lɛ amli akɛ: ‘Yehowa* baatsɔɔ amɛ fɛɛ nii.’+ Mɔ fɛɛ mɔ ni boɔ Tsɛ lɛ toi ni ekaseɔ nii lɛ baa miŋɔɔ. 46 Jeee akɛ gbɔmɔ ko ena Tsɛ lɛ pɛŋ,+ ja mɔ ni jɛ Nyɔŋmɔ ŋɔɔ lɛ; mɔ nɛ ji mɔ ni ena Tsɛ lɛ.+ 47 Lɛɛlɛŋ, lɛɛlɛŋ, miikɛɛ nyɛ akɛ, mɔ fɛɛ mɔ ni heɔ eyeɔ lɛ yɛ naanɔ wala.+

48 “Miji wala niyenii* lɛ.+ 49 Nyɛtsɛmɛi lɛ ye mana lɛ yɛ ŋa lɛ nɔ, ni kɛ̃lɛ amɛgboi.+ 50 Enɛ ji niyenii* ni kpeleke shi kɛjɛ ŋwɛi lɛ, koni mɔ fɛɛ mɔ aye eko ni ekagbo. 51 Miji niyenii* ni hiɛ kã ni kpeleke shi kɛjɛ ŋwɛi lɛ. Kɛ́ mɔ ko ye blodo nɛɛ eko lɛ, ebaahi shi kɛya naanɔ; ni anɔkwa, blodo ni mikɛbaahã koni je lɛ aná wala lɛ ji miheloo lɛ.”+

52 Kɛkɛ ni Yudafoi lɛ bɔi ŋwanejee yɛ amɛteŋ amɛkɛɛ: “Te nuu nɛɛ baafee tɛŋŋ ekɛ eheloo ahã wɔ ni wɔye lɛ?” 53 No hewɔ lɛ, Yesu kɛɛ amɛ akɛ: “Lɛɛlɛŋ, lɛɛlɛŋ, miikɛɛ nyɛ akɛ, kɛji nyɛyeee gbɔmɔ Bi lɛ heloo lɛ, ni nyɛnuuu elá lɛ, nyɛbɛ wala yɛ nyɛmli.+ 54 Mɔ fɛɛ mɔ ni yeɔ miheloo ni enuɔ milá lɛ yɛ naanɔ wala, ni matee lɛ shi+ yɛ naagbee gbi lɛ nɔ; 55 ejaakɛ miheloo lɛ, niyenii diɛŋtsɛ ni, ni milá lɛ, nii ni anuɔ diɛŋtsɛ ni. 56 Mɔ fɛɛ mɔ ni yeɔ miheloo ni enuɔ milá lɛ, ekɛ mi feɔ ekome, ni mi hu mikɛ lɛ feɔ ekome.+ 57 Bɔ ni Tsɛ lɛ ni hiɛ kã lɛ tsu mi, ni Tsɛ lɛ hewɔ mihiɛ kã lɛ, nakai nɔŋŋ mɔ ni yeɔ miheloo lɛ hu hiɛ baakã yɛ mihewɔ.+ 58 Enɛ ji niyenii* ni kpeleke shi kɛjɛ ŋwɛi lɛ. Etamɔɔɔ be ni nyɛtsɛmɛi lɛ ye ni kɛ̃lɛ amɛgboi lɛ. Mɔ fɛɛ mɔ ni yeɔ niyenii* nɛɛ baahi shi kɛya naanɔ.”+ 59 Ewie nibii nɛɛ be ni etsɔɔ nii yɛ kpeehe ko* yɛ Kapernaum lɛ.

60 Be ni ekaselɔi lɛ ateŋ mɛi babaoo nu enɛ lɛ, amɛkɛɛ akɛ: “Wiemɔ ni wa nɛ; namɔ baanyɛ abo toi?” 61 Shi akɛni Yesu le yɛ emli akɛ ekaselɔi lɛ miiwie huhuuhu yɛ enɛ he hewɔ lɛ, ekɛɛ amɛ akɛ: “Ani enɛ miitɔ̃tɔ nyɛnane? 62 Ni kɛ́ nyɛna gbɔmɔ Bi lɛ miikwɔ kɛmiiya he ni eyɔɔ tsutsu lɛ hu?+ 63 Mumɔ lɛ ji nɔ ni hãa wala;+ heloo lɛ he bɛ sɛɛnamɔ ko kwraa. Wiemɔi ni mikɛ nyɛ wie lɛ, mumɔ ni, ni wala ni.+ 64 Shi nyɛteŋ mɛi komɛi yɛ ni heee yeee.” Ejaakɛ kɛjɛ shishijee lɛ, Yesu le mɛi ni heee yeee lɛ kɛ mɔ ni baajie lɛ ehã lɛ.+ 65 Etsa nɔ ekɛɛ akɛ: “Enɛ hewɔ mikɛɛ nyɛ akɛ, mɔ ko nyɛŋ aba miŋɔɔ ja Tsɛ lɛ ehã lɛ hegbɛ lɛ.”+

66 Enɛ hewɔ lɛ, kaselɔi lɛ ateŋ mɛi babaoo ku amɛsɛɛ kɛtee nibii ni yɔɔ sɛɛ lɛ ahe,+ ni amɛkɛ lɛ enyiɛɛɛ dɔŋŋ. 67 No hewɔ lɛ, Yesu kɛɛ Mɛi Nyɔŋma Kɛ Enyɔ lɛ akɛ: “Ani nyɛ hu nyɛmiitao ni nyɛya?” 68 Simon Petro hã lɛ hetoo akɛ: “Nuŋtsɔ, namɔ ŋɔɔ wɔbaaya?+ Bo oyɔɔ naanɔ wala wiemɔi lɛ.+ 69 Wɔ lɛ, wɔhe wɔye ni wɔná wɔle hu akɛ bo ji Mɔ Krɔŋkrɔŋ ni jɛ Nyɔŋmɔ ŋɔɔ lɛ.”+ 70 Yesu hã amɛ hetoo akɛ: “Ani jeee nyɛyi nyɔŋma kɛ enyɔ mihala?+ Shi nyɛteŋ mɔ kome wieɔ mɔ he efɔŋ.”*+ 71 Anɔkwa, no mli lɛ, eewie Yuda, Simon Iskariot binuu lɛ he, ejaakɛ mɔ nɛɛ ji mɔ ni baajie lɛ ehã lɛ, eyɛ mli akɛ eji Mɛi Nyɔŋma Kɛ Enyɔ lɛ ateŋ mɔ kome.+