1 Mose
11 Nakai beiaŋ lɛ, shikpɔŋ muu lɛ fɛɛ wieɔ wiemɔ kome lolo, ni amɛyɛ wiemɔkulibii kome. 2 Be ni amɛfãa gbɛ kɛyaa bokãgbɛ lɛ, amɛyana shikpɔŋ kplanaa* ko yɛ Shinear shikpɔŋ+ lɛ nɔ, ni amɛhi jɛmɛ. 3 Ni amɛkɛɛkɛɛ amɛhe akɛ: “Nyɛbaa! Nyɛhãa wɔfoa brikii,* ní wɔkɛ la ashãa.” No hewɔ lɛ, amɛkɛ brikii tsu nii yɛ tɛ najiaŋ, ni amɛkɛ kootaa* tsu nii* kɛtsara brikii lɛ. 4 Kɛkɛ ni amɛkɛɛ: “Nyɛbaa! Nyɛhãa wɔtoa maŋ wɔhãa wɔhe, kɛ mɔɔ ni yiteŋ yashiɔ ŋwɛi, ní wɔkɛfee gbɛ́i wɔhã wɔhe, koni wɔkagbɛ wɔshwã shikpɔŋ muu lɛ fɛɛ nɔ.”+
5 Ni Yehowa kpeleke shi kɛba* koni ebakwɛ maŋ lɛ kɛ mɔɔ lɛ ní gbɔmɛi abii lɛ ema lɛ. 6 Kɛkɛ ni Yehowa kɛɛ: “Naa! Gbɔmɛi kome ji amɛ, ni amɛwieɔ wiemɔ kome,+ ni nɔ ni amɛbɔi feemɔ nɛ. Amrɔ nɛɛ, nɔ ko nɔ ko bɛ ní kɛ́ amɛto amɛyiŋ akɛ amɛbaafee lɛ, amɛnyɛŋ amɛfee. 7 Nyɛbaa! Nyɛhãa+ wɔkpelekea shi* kɛyaa jɛmɛ ní wɔyafutua amɛwiemɔ lɛ, bɔ ni afee ni amɛteŋ mɔ ko akanu enyɛmi wiemɔ shishi.” 8 No hewɔ lɛ, Yehowa gbɛ amɛ eshwã kɛjɛ jɛmɛ kɛtee shikpɔŋ muu lɛ fɛɛ nɔ,+ ni fiofio lɛ amɛkpa maŋ lɛ too. 9 No hewɔ ni awo jɛmɛ gbɛ́i akɛ Babel*+ lɛ, ejaakɛ jɛmɛ Yehowa futu wiemɔ lɛ ni shikpɔŋ lɛ fɛɛ wieɔ lɛ yɛ, ni Yehowa gbɛ amɛ eshwã kɛjɛ jɛmɛ kɛtee shikpɔŋ muu lɛ fɛɛ nɔ.
10 Shem he sane nɛ.+
Shem eye afii 100 be ni efɔ Arpakshad+ yɛ Nu Afua lɛ sɛɛ afii enyɔ lɛ. 11 Be ni Shem fɔ Arpakshad lɛ, etee nɔ ehi shi afii 500. Efɔ bihii kɛ biyei.+
12 Arpakshad hi shi afii 35 ni efɔ Shela.+ 13 Be ni Arpakshad fɔ Shela lɛ, etee nɔ ehi shi afii 403. Efɔ bihii kɛ biyei.
14 Shela hi shi afii 30 ni efɔ Eber.+ 15 Be ni Shela fɔ Eber lɛ, etee nɔ ehi shi afii 403. Efɔ bihii kɛ biyei.
16 Eber hi shi afii 34 ni efɔ Peleg.+ 17 Be ni Eber fɔ Peleg lɛ, etee nɔ ehi shi afii 430. Efɔ bihii kɛ biyei.
18 Peleg hi shi afii 30 ni efɔ Reu.+ 19 Be ni Peleg fɔ Reu lɛ, etee nɔ ehi shi afii 209. Efɔ bihii kɛ biyei.
20 Reu hi shi afii 32 ni efɔ Serug. 21 Be ni Reu fɔ Serug lɛ, etee nɔ ehi shi afii 207. Efɔ bihii kɛ biyei.
22 Serug hi shi afii 30 ni efɔ Nahor. 23 Be ni Serug fɔ Nahor lɛ, etee nɔ ehi shi afii 200. Efɔ bihii kɛ biyei.
24 Nahor hi shi afii 29 ni efɔ Tera.+ 25 Be ni Nahor fɔ Tera lɛ, etee nɔ ehi shi afii 119. Efɔ bihii kɛ biyei.
26 Tera hi shi afii 70, ni no sɛɛ lɛ efɔ Abram+ kɛ Nahor+ kɛ Haran.
27 Tera he sane nɛ.
Tera fɔ Abram kɛ Nahor kɛ Haran; ni Haran fɔ Lot.+ 28 Be ni Haran papa Tera yɔɔ wala mli lolo lɛ, Haran gbo yɛ he ni afɔ lɛ yɛ lɛ, yɛ Ur+ yɛ Kaldea.+ 29 Abram kɛ Nahor kpee yei. Abram ŋa lɛ gbɛ́i ji Sarai,+ ni Nahor ŋa lɛ gbɛ́i ji Milka,+ Haran biyoo lɛ; Haran ji Milka kɛ Iska fɛɛ papa. 30 Agbɛnɛ, Sarai lɛ kene+ ni; ebɛ bi ko.
31 Tera ŋɔ ebinuu Abram kɛ enabi Lot,+ Haran binuu lɛ, kɛ eshaayoo Sarai, ebinuu Abram ŋa lɛ, ni amɛ kɛ lɛ shi Ur yɛ Kaldea koni amɛya Kanaan shikpɔŋ+ lɛ nɔ. Sɛɛ mli lɛ, amɛbashɛ Haran,+ ni amɛhi jɛmɛ. 32 Gbii ni Tera ye lɛ ji afii 205. Ni Tera gbo yɛ Haran.