Akɛmaje Hebribii Lɛ
1 Blema tɔ̃ɔ lɛ, Nyɔŋmɔ tsɔ gbalɔi lɛ anɔ ekɛ wɔtsɛmɛi lɛ wie yɛ bei srɔtoi amli kɛ agbɛnɛ hu, yɛ gbɛi srɔtoi anɔ.+ 2 Amrɔ nɛɛ, yɛ nɛkɛ gbii nɛɛ anaagbee mli lɛ, etsɔɔ Bi lɛ nɔ ekɛ wɔ wieɔ,+ mɔ ni ewó lɛ nibii fɛɛ niyelɔ,+ ni etsɔ enɔ efee nibii ni yɔɔ je lɛ mli lɛ.*+ 3 Lɛ ji mɔ ni hãa anaa Nyɔŋmɔ anunyam lɛ,+ ni eji esu lɛ henɔ pɛpɛɛpɛ,+ ni ekɛ ehewalɛ wiemɔ lɛ hãa nibii fɛɛ yaa nɔ amɛhiɔ wala mli. Ni be ni etsuu wɔhe kɛje wɔhe eshai lɛ amli egbe naa lɛ,+ eyata Anunyamtsɛ lɛ ninejurɔ nɔ yɛ ŋwɛi.+ 4 No hewɔ lɛ, etsɔ mɔ ni fe ŋwɛibɔfoi lɛ,+ aahu akɛ ená gbɛ́i ni fe amɛnɔ lɛ kwraa.*+
5 Akɛ nɔkwɛmɔnɔ lɛ, ŋwɛibɔfoi lɛ ateŋ namɔ Nyɔŋmɔ ekɛɛ lɛ pɛŋ akɛ: “Mibi ji bo; ŋmɛnɛ lɛ, mitsɔ otsɛ”?+ Kɛ agbɛnɛ hu: “Matsɔ etsɛ, ni lɛ hu ebaatsɔ mibinuu”?+ 6 Shi ekɛɛ yɛ be ni ebaahã e-Kromɔbi+ lɛ aba shikpɔŋ lɛ nɔ ekoŋŋ lɛ he akɛ: “Nyɔŋmɔ bɔfoi lɛ fɛɛ akoto lɛ.”
7 Agbɛnɛ hu, ekɛɛ yɛ ŋwɛibɔfoi lɛ ahe akɛ: “Efeɔ ebɔfoi lɛ mumɔi, kɛ esɔɔlɔi*+ lɛ hu lalilɛi.”+ 8 Shi Bi lɛ, ekɛɛ yɛ ehe akɛ: “Nyɔŋmɔ ji omaŋtsɛ sɛi+ kɛmiiya naanɔi anaanɔ, ni o-Maŋtsɛyeli maŋtsɛtso lɛ, jalɛ* maŋtsɛtso ni. 9 Osumɔɔ jalɛ nifeemɔ, ni onyɛɔ mlatɔmɔ. No hewɔ ni Nyɔŋmɔ, o-Nyɔŋmɔ lɛ, efɔ bo mu+ ni ehã oná miishɛɛ fe onyɛmimɛi maŋtsɛmɛi krokomɛi lɛ fɛɛ lɛ.”+ 10 Ni ekɛɛ hu akɛ: “Bo Nuŋtsɔ, shishijee lɛ mli lɛ, bo oto shikpɔŋ lɛ faneshii lɛ shishi, ni ŋwɛi lɛ, oninenaa nitsumɔi ni. 11 Amɛhiɛ baakpãtã, shi bo lɛ obaahi shi daa; ni amɛbaafite tamɔ atade fiteɔ lɛ, 12 ni obaakota amɛ tamɔ akotaa mama, tamɔ akotaa atade lɛ, ni abaatsake amɛ. Shi bo lɛ, oyɛ bɔ ni oyɔɔ lɛ nɔŋŋ, ni owala afii lɛ hu baŋ naagbee kɔkɔɔkɔ.”+
13 Shi ŋwɛibɔfoi lɛ ateŋ namɔ ni ekɛɛ yɛ ehe pɛŋ akɛ: “Ta mininejurɔ nɔ kɛyashi be ni mikɛ ohenyɛlɔi lɛ baafee onajiashi sɛi”?+ 14 Ani amɛ fɛɛ lɛ, jeee mumɔi ni kɛ sɔɔmɔ krɔŋkrɔŋ hãa* ji amɛ,+ mɛi ni atsu amɛ koni amɛyasɔmɔ mɛi ni baaná yiwalaheremɔ lɛ?