1 Mose
4 Agbɛnɛ, Adam kɛ eŋa Hawa ná bɔlɛ, ni Hawa ná musu.+ Be ni efɔ Kain+ lɛ, ekɛɛ: “Mifɔ* binuu yɛ Yehowa yelikɛbuamɔ naa.” 2 Sɛɛ mli lɛ, efɔ enyɛmi nuu Habel.+
Habel batsɔ tookwɛlɔ, shi Kain batsɔ okwaafonyo. 3 Be ko sɛɛ lɛ, Kain kɛ shikpɔŋ lɛ nɔ nibaa nii lɛ eko bahã Yehowa akɛ afɔle. 4 Shi Habel kɛ etooku lɛ ateŋ kromɔbii+ lɛ ekomɛi kɛ amɛfɔi lɛ hu ba. Yehowa ná Habel kɛ efɔle lɛ he miishɛɛ,+ 5 shi enáaa Kain kɛ efɔle lɛ he miishɛɛ. No hewɔ lɛ, Kain mli fu waa ni ehao. 6 Ni Yehowa kɛɛ Kain akɛ: “Mɛni hewɔ omli efu waa ni ohao nɛkɛ? 7 Kɛji otsake ni ofee ekpakpa lɛ, ani ohiɛ baŋ nyam?* Shi kɛji otsakeee ni obaafee ekpakpa lɛ, esha bu shinaa lɛ shi, ni eetao eye onɔ; shi bo lɛ, ye enɔ.”
8 Enɛ sɛɛ lɛ, Kain kɛɛ enyɛmi Habel akɛ: “Hã wɔya ŋa lɛ mli.” No hewɔ lɛ, be ni amɛyɔɔ ŋa lɛ mli lɛ, Kain tutua enyɛmi Habel ni egbe lɛ.+ 9 Sɛɛ mli lɛ, Yehowa bi Kain akɛ: “Nɛgbɛ onyɛmi Habel yɔɔ?” ni ekɛɛ: “Mileee. Ani mi mikwɛɔ minyɛmi lɛ nɔ?” 10 Kɛkɛ ni ekɛɛ:* “Mɛni ofee nɛɛ? Naa! Onyɛmi lɛ lá miibolɔ miitsɛ mi kɛmiijɛ shikpɔŋ.+ 11 Ni agbɛnɛ alomɔ bo, ashwie bo kɛje shikpɔŋ lɛ ni gbele enaa emi onyɛmi lɛ lá yɛ odɛŋ lɛ nɔ.+ 12 Kɛ́ odu nii yɛ shikpɔŋ lɛ nɔ lɛ, shikpɔŋ lɛ baŋ nii jogbaŋŋ* ehãŋ bo. Obaatsɔ shikpalɔ kɛ foijelɔ* yɛ shikpɔŋ lɛ nɔ.” 13 Kɛkɛ ni Kain kɛɛ Yehowa akɛ: “Mitɔmɔ lɛ he toigbalamɔ lɛ naa wa tsɔ kɛhã mi. 14 Ŋmɛnɛ lɛ, ooshwie mi kɛmiije shikpɔŋ lɛ nɔ,* ni mihiŋ ohiɛ; ni matsɔ shikpalɔ kɛ foijelɔ* yɛ shikpɔŋ lɛ nɔ, ni mɔ fɛɛ mɔ ni baana mi lɛ, ebaagbe mi.” 15 No hewɔ lɛ, Yehowa kɛɛ lɛ akɛ: “Enɛ hewɔ lɛ, mɔ fɛɛ mɔ ni baagbe Kain lɛ, abaatɔ Kain he owele toi kpawo yɛ enɔ.”
No hewɔ lɛ, Yehowa to okadi ko ehã Kain bɔ ni afee ni kɛji mɔ ko na lɛ lɛ ekatswa lɛ nɔ. 16 Kɛkɛ ni Kain shi Yehowa hiɛ etee, ni eyahi shikpɔŋ ko nɔ akɛ foijelɔ,* yɛ Eden+ bokãgbɛ.
17 No sɛɛ lɛ, Kain kɛ eŋa+ lɛ ná bɔlɛ, ni ená musu ni efɔ Henok. Ni eto maŋ ko, ni ekɛ ebi Henok gbɛ́i wo maŋ lɛ. 18 Sɛɛ mli lɛ, afɔ Irad ahã Henok. Ni Irad fɔ Mehuyael, ni Mehuyael fɔ Metushael, ni Metushael fɔ Lamek.
19 Lamek kɛ ŋamɛi enyɔ hi shi. Klɛŋklɛŋ mɔ lɛ gbɛ́i ji Ada, ni mɔ ni ji enyɔ lɛ gbɛ́i ji Zila. 20 Ada fɔ Yabal. Yabal ji mɔ klɛŋklɛŋ ni hi mama tsũi amli, ní lɛ kooloi. 21 Enyɛmi nuu lɛ gbɛ́i ji Yubal. Lɛ ji mɔ klɛŋklɛŋ ni bɔi saŋkutswaa kɛ bɛlɛkpãmɔ.* 22 Zila hu fɔ Tubal-kain, mɔ ni sɔ̃ akɔɔble kɛ dade nibii srɔtoi fɛɛ lɛ. Ni Tubal-kain nyɛmi yoo ji Naama. 23 Kɛkɛ ni Lamek fo lalawiemɔi nɛɛ ehã eŋamɛi Ada kɛ Zila ekɛɛ:
“Nyɛboa migbee toi, nyɛ Lamek ŋamɛi;
Nyɛboa nɔ ni mikɛɔ lɛ toi:
Migbe nuu ko akɛni epila mi lɛ hewɔ,
Hɛɛ, oblanyo ko, akɛni egba mi ma lɛ hewɔ.
24 Kɛji abaatɔ Kain he owele toi 7 lɛ,+
Belɛ, Lamek nɔ lɛ, toi 77.”
25 Adam kɛ eŋa lɛ ná bɔlɛ ekoŋŋ, ni efɔ binuu. Hawa wo lɛ Set,*+ ejaakɛ ekɛɛ, “Nyɔŋmɔ ehala seshi kroko yɛ Habel najiaŋ ehã mi, ejaakɛ Kain gbe lɛ.”+ 26 Afɔ binuu ahã Set hu, ni ewo lɛ gbɛ́i akɛ Enosh.+ Nakai beiaŋ mɛi bɔi Yehowa gbɛ́i lɛ tsɛmɔ.