Yoshua

20 Ni Yehowa kɛɛ Yoshua akɛ: 2 “Kɛɛmɔ Israelbii lɛ akɛ, ‘Nyɛhalaa abobaa maji+ ni mitsɔ Mose nɔ mikɛ nyɛ wie he lɛ nyɛhãa nyɛhe, 3 koni mɔ ni baagbe mɔ ko* ni jeee gbɛ eje egbe lɛ loo mɔ ni baagbe mɔ ko yɛ oshãra naa* lɛ ajo foi kɛya jɛmɛ. Ni amɛbaatsɔmɔ abobaahei amɛhã nyɛ kɛje lá he oweletɔlɔ lɛ dɛŋ.+ 4 Mɔ lɛ ajo foi kɛya maji nɛɛ ateŋ ekome mli,+ ni eyadamɔ maŋ lɛ agbó lɛ naa,+ ni ejaje esane lɛ etsɔɔ nakai maŋ lɛ mli onukpai lɛ. No sɛɛ lɛ, amɛhe lɛ kɛba maŋ lɛ mli ní amɛhã lɛ he ko, ní ekɛ amɛ ahi shi. 5 Kɛji lá he oweletɔlɔ lɛ tiu mɔ ni egbe gbɔmɔ lɛ kɛba lɛ, amɛkajie lɛ amɛwo edɛŋ, ejaakɛ oshãra naa* egbe enyɛmi gbɔmɔ lɛ, shi jeee akɛ eenyɛ lɛ momo.+ 6 Esa akɛ ehi nakai maŋ lɛ mli kɛyashi ebaayadamɔ maŋ lɛ hiɛ ni aye esane,+ ni ehi jɛmɛ kɛyashi osɔfonukpa ni sɔmɔɔ yɛ nakai beiaŋ lɛ baagbo.+ No sɛɛ lɛ, mɔ ni egbe gbɔmɔ lɛ baanyɛ aku esɛɛ kɛya maŋ ni ejo foi kɛje mli lɛ mli, ebaanyɛ eya lɛ diɛŋtsɛ emaŋ, kɛ lɛ diɛŋtsɛ eshĩa.’”+

7 No hewɔ lɛ, amɛfee maji nɛɛ krɔŋkrɔŋ:* Kedesh+ ni yɔɔ Galilea, yɛ Naftali gɔji lɛ anɔ lɛ, kɛ Shekem+ ni yɔɔ Efraim gɔji lɛ anɔ lɛ, kɛ Kiriat-arba,+ ni ji Hebron, ni yɔɔ Yuda gɔji lɛ anɔ lɛ. 8 Yɛ Yordan lɛ kpokpaa ni yɔɔ Yeriko bokãgbɛ lɛ, amɛhala Bezer+ yɛ ŋa lɛ nɔ, yɛ gɔŋ kɛ eyiteŋ tɛtrɛɛ lɛ nɔ kɛjɛ Ruben weku lɛ mli, kɛ Ramot+ ni yɔɔ Gilead lɛ kɛjɛ Gad weku lɛ mli, kɛ Golan+ ni yɔɔ Bashan lɛ kɛjɛ Manase weku lɛ mli.+

9 Enɛɛmɛi batsɔmɔ maji ni ahala ahã Israelbii lɛ fɛɛ kɛ gbɔi ni yɔɔ amɛteŋ lɛ, koni mɔ fɛɛ mɔ ni baagbe mɔ* ko ni jeee gbɛ eje egbe lɛ lɛ ajo foi kɛya jɛmɛ,+ ní ekagbo yɛ lá he oweletɔlɔ lɛ nine naa be ni eyadamɔko maŋ lɛ hiɛ ni abaaye esane lɛ.+