1 Samuel
21 Sɛɛ mli lɛ, David ba osɔfo Ahimelek ŋɔɔ yɛ Nob.+ Ahimelek kɛ hekpokpomɔ bakpee David, ni ebi lɛ akɛ: “Mɛni hewɔ okome onyiɛ ni mɔ ko fataaa ohe lɛ?”+ 2 David kɛɛ osɔfo Ahimelek akɛ: “Maŋtsɛ lɛ fã mi ni miyafee nɔ ko, shi ekɛɛ mi akɛ, ‘Kaahã mɔ ko mɔ ko le tsumɔ ni mitsuɔ bo lɛ kɛ gbɛtsɔɔmɔi ni mikɛhã bo lɛ he nɔ ko.’ Mikɛɛ miblahii lɛ koni amɛkɛ mi akpe yɛ he ko. 3 Kɛ́ oyɛ blodoi enumɔ loo niyenii kroko yɛ jɛmɛ lɛ, kɛhã mi.” 4 Shi osɔfo lɛ kɛɛ David akɛ: “Mibɛ blodo folo ko yɛ biɛ akɛ ja blodo krɔŋkrɔŋ+ lɛ—kɛ́ oblahii lɛ etako yoo he lɛ,*+ no lɛ, sane ko bɛ he.” 5 David kɛɛ osɔfo lɛ akɛ: “Yɛ anɔkwale mli lɛ, wɔtako yei ahe tamɔ bɔ ni wɔtaaa yei ahe kɛ́ mitee ta lɛ.+ Kɛ́ oblahii lɛ hiɛɔ amɛhe krɔŋkrɔŋ be ni amɛmiitsu nitsumɔ folo ko kɛkɛ po lɛ, enyiɛ nɔŋŋ ni amɛfeŋ nakai be ni amɛnyiɛ tsumɔ ni yɔɔ krɔŋkrɔŋ nɔ ŋmɛnɛ!” 6 No hewɔ lɛ, osɔfo lɛ kɛ blodo krɔŋkrɔŋ lɛ hã lɛ,+ ejaakɛ blodo ko kwraa bɛ akɛ ja hiɛmaa blodo lɛ, ni ajie yɛ Yehowa hiɛ koni akɛ blodo klakla ato najiaŋ yɛ nakai gbi ni ajie lɛ nɔ nɔŋŋ lɛ.
7 No mli lɛ, Saul tsuji lɛ ateŋ mɔ kome yɛ jɛmɛ nakai gbi lɛ, ni atsi enaa yɛ Yehowa hiɛ. Atsɛɔ lɛ Doeg,+ eji Edomnyo,+ ni lɛ ji Saul tookwɛlɔi lɛ anɔkwɛlɔ.
8 Kɛkɛ ni David bi Ahimelek akɛ: “Ani akpɔlɔ loo klante ko yɛ biɛ? Mikɔɔɔ mi diɛŋtsɛ miklante loo mitawuu nii lɛ, ejaakɛ maŋtsɛ lɛ tsumɔ lɛ yafee kplakpla.” 9 Kɛkɛ ni osɔfo lɛ kɛɛ akɛ: “Goliat,+ Filistinyo lɛ ni ogbe lɛ yɛ Ela Jɔɔ+ lɛ mli lɛ klante lɛ yɛ biɛ, akɛ mama ebala he ni ekã efɔd+ lɛ sɛɛ. Kɛ́ oosumɔ ni okɔ lɛ, kɔ, ejaakɛ no pɛ ji nɔ ni yɔɔ biɛ.” David kɛɛ lɛ akɛ: “Enɔ bɛ. Kɛhã mi.”
10 Nakai gbi lɛ, David te shi ni etee nɔ ejo foi+ kɛje Saul hiɛ, ni naagbee lɛ etee Gat+ maŋtsɛ Akish ŋɔɔ. 11 Akish tsuji lɛ kɛɛ lɛ akɛ: “Ani jeee David, shikpɔŋ lɛ nɔ maŋtsɛ lɛ nɛ? Jeee lɛ ehe lala alá ni akɛjo akɛ,
‘Saul egbe akpei,
Ni David egbe akpei nyɔŋmai’ lɛ?”+
12 David kɛ wiemɔi nɛɛ to etsui mli, ni eshe Gat maŋtsɛ Akish gbeyei waa.+ 13 No hewɔ lɛ, ekwa efee tamɔ eye sɛkɛ+ yɛ amɛhiɛ ni efee enii tamɔ sɛkɛyelɔ yɛ amɛteŋ.* No mli lɛ, eeŋmala agbó lɛ shinai lɛ ahe, ni eehã lajɔ̃ miitsere kɛmiiwo etsɛŋ mli. 14 Agbɛnɛ Akish kɛɛ etsuji lɛ akɛ: “Nyɛnaaa akɛ nuu nɛɛ eye sɛkɛ? Mɛni hewɔ nyɛkɛ lɛ ba miŋɔɔ? 15 Ani sɛkɛyelɔi ahe miihia mi hewɔ ni nyɛkɛ mɔ nɛ eba mihiɛ koni ebafee sɛkɛyelɔi anii yɛ mihiɛ nɛɛ? Ani esa akɛ nuu nɛɛ abote mishĩa mli po?”