Klɛŋklɛŋ Wolo Ni Akɛmaje Korintobii Lɛ

5 Yɛ anɔkwale mli lɛ, ababɔ amaniɛ akɛ ajwamaŋbɔɔ*+ ko miiya nɔ yɛ nyɛteŋ, ajwamaŋbɔɔ* ni bɛ jeŋmaji lɛ ateŋ po—akɛ nuu ko kɛ epapa ŋa yɛ.+ 2 Ni nyɛ lɛ, ani nyɛmiishwã yɛ enɛ he? Ani esaaa akɛ nyɛwerɛ hoɔ nyɛhe+ ni nyɛjieɔ nuu ni fee nɛkɛ nii nɛɛ yɛ nyɛteŋ moŋ?+ 3 Eyɛ mli akɛ mibɛ nyɛŋɔɔ yɛ gbɔmɔtsoŋ moŋ, shi miyɛ nyɛŋɔɔ yɛ mumɔŋ, ni mikojo nuu ni fee nii nɛɛ momo, tamɔ nɔ ni miyɛ nyɛŋɔɔ diɛŋtsɛ. 4 Kɛ́ nyɛnaa bakpe shi yɛ wɔ-Nuŋtsɔ Yesu gbɛ́i mli, ni nyɛle akɛ mikɛ nyɛ yɛ jɛmɛ yɛ mumɔŋ, ni wɔ-Nuŋtsɔ Yesu hewalɛ lɛ fata he lɛ, 5 esa akɛ nyɛkɛ nuu ni tamɔ nɛkɛ lɛ awo Satan dɛŋ+ koni akpãtã heloo lɛ hiɛ, koni ahere mumɔ lɛ yiwala yɛ Nuŋtsɔ lɛ gbi lɛ nɔ.+

6 Nyɛshwãa lɛ jeee shwãa kpakpa. Ani nyɛleee akɛ ashikishaŋ-sha bibioo shaa ashikishaŋ muu lɛ fɛɛ?+ 7 Nyɛjiea ashikishaŋ-sha momo lɛ nyɛshwiea, koni nyɛtsɔmɔ ashikishaŋ hee, tamɔ bɔ ni ashikishaŋ-sha ko bɛ nyɛmli lɛ. Ejaakɛ, anɔkwa, akɛ Kristo ni ji wɔ-Hehoo gwantɛŋbi+ lɛ ehã akɛ afɔle.+ 8 No hewɔ lɛ, agbɛnɛ, nyɛhãa wɔyaa nɔ wɔyea gbi jurɔ lɛ,+ jeee kɛ ashikishaŋ-sha momo, ni jeee kɛ ashikishaŋ-sha ni damɔ shi kɛhã nɔ gbonyo kɛ efɔŋfeemɔ lɛ, shi moŋ kɛ blodo ni ashikishaŋ-sha bɛ mli, ni damɔ shi kɛhã tsui krɔŋŋ kɛ anɔkwale lɛ.

9 Miŋma nyɛ yɛ miwolo lɛ mli akɛ nyɛkɛ ajwamaŋbɔlɔi* akpa bɔɔ, 10 mitsɔɔɔ akɛ nyɛkɛ je nɛɛ mli ajwamaŋbɔlɔi*+ loo amimyelɔi loo ojotswalɔi* loo amagajalɔi akabɔ kwraa. Nakai ni kulɛ, anɔkwa, ja nyɛje je lɛ mli.+ 11 Shi agbɛnɛ, miiŋma nyɛ koni nyɛkɛ mɔ fɛɛ mɔ ni atsɛɔ lɛ nyɛmi, ni ji ajwamaŋbɔlɔ* loo amimyelɔ+ loo amagajalɔ loo mɔjɛlɔ loo dãatɔlɔ+ loo ojotswalɔ*+ lɛ akpa bɔɔ,+ nyɛkɛ mɔ ni tamɔ nɛkɛ lɛ akayea nii po. 12 Ejaakɛ mɛni mɛi ni yɔɔ sɛɛ lɛ* akojomɔ kɔɔ yɛ mihe? Nyɛ lɛ, ani jeee mɛi ni yɔɔ mli lɛ nyɛkojoɔ, 13 ni Nyɔŋmɔ hu kojoɔ mɛi ni yɔɔ sɛɛ lɛ?+ “Nyɛjiea efɔŋfeelɔ lɛ kɛjea nyɛteŋ.”+