Mɛni Hewɔ Esa akɛ Abɔ Nɔ ni Ehiii He Amaniɛ?

MƐI komɛi kɛɔ yɛ Afrika Anaigbɛ akɛ, “mɔ ni jieɔ teemɔŋ sane ko kpo faŋŋ lɛ batsɔɔ gbɔmɛi lɛ ahenyɛlɔ.” Enɛ ji nɔ ni ba Olu nɔ, beni efolɔ enyɛmi nuu nukpa lɛ naa akɛ ekɛ amɛnyɛmi yoo lɛ ená bɔlɛ lɛ. Enyɛmi nuu lɛ bolɔ waa akɛ: “Amalelɔ ji bo!” Kɛkɛ ni ekɛ hiɛdɔɔ yi Olu waa, ni eshwie lɛ kɛjɛ weku shia lɛ, ni eshã Olu atadei fɛɛ. Akrowa lɛ mli bii lɛ fi enyɛmi nuu lɛ sɛɛ. Akɛni amɛtaooo lɛ yɛ akrowa lɛ dɔŋŋ hewɔ lɛ, esa akɛ Olu ashi jɛmɛ. Beni ana akɛ gbekɛ yoo lɛ eŋɔ hɔ́ lɛ dani amɛyoo akɛ Olu ewie anɔkwale. Enyɛmi lɛ jaje efɔŋ ni efee lɛ, ni Olu hiɛ ba nyam ekoŋŋ. Kulɛ nibii baanyɛ atsake kwraa. Kulɛ abaanyɛ agbe Olu.

Eyɛ faŋŋ akɛ, mɛi ni bɛ suɔmɔ kɛha Yehowa lɛ ahiɛ esɔŋ amɛtɔ̃mɔ ni aaakpa he mama lɛ. Adesa eshafeelɔ lɛ su ji ni ete shi ewo kãmɔ, ni enyɛ̃ mɔ fɛɛ mɔ ni kɛhaa lɛ. (Okɛto Yohane 7:7 he.) Belɛ ebɛ naakpɛɛ mɔ akɛ mɛi pii feɔ dioo tamɔ tɛi kɛ́ eba mɛi krokomɛi atɔ̃mɔi ni aaajie lɛ kpo atsɔɔ mɛi ni yɔɔ hegbɛ akɛ amɛaajaje mɔ lɛ.

Hiɛ ni Aaasɔ Sɛɛnamɔ ni Yɔɔ Kãmɔ He

Shi yɛ Yehowa webii ateŋ lɛ, ayɛ su kroko yɛ kãmɔ he. Hii kɛ yei ni sheɔ Nyɔŋmɔ gbeyei lɛ ahiɛ sɔɔ gbɛjianɔ ni Yehowa eto koni ekɛye ebua mɛi ni tɔ̃ɔ ni yɔɔ Kristofoi asafo lɛ mli lɛ waa. Amɛyɔseɔ nɛkɛ tsɔsemɔ nɛɛ akɛ eji emlihilɛ lɛ kpojiemɔ.—Hebribii 12:6-11.

Abaanyɛ ni akɛ sane ko ni ba yɛ Maŋtsɛ David shihilɛ mli lɛ afee enɛ he nɔkwɛmɔnɔ. Eyɛ mli akɛ eji jalɔ kɛjɛ egbekɛbiiashi tɔ̃ɔ moŋ, shi be shɛ ni ebafee efɔŋ ko ni hiɛdɔɔ yɔɔ mli waa. Klɛŋklɛŋ lɛ, efite gbala. Kɛkɛ lɛ, bɔni afee ni ehà enɔ fɔŋ feemɔ lɛ nɔ lɛ, eto gbɛjianɔ koni agbe yoo lɛ wu lɛ. Shi, Yehowa jie esha ni David fee lɛ kpo etsɔɔ gbalɔ Natan, ni kɛ sane lɛ fɔ̃ David hiɛ yɛ ekãa naa lɛ. Natan kɛ nɔkwɛmɔnɔ ko ni mli wa waa tsu nii, ni ebi David nɔ ni esa akɛ afee niiatsɛ ko ni yɔɔ tooi pii, shi egbe ohiafo ko too kome pɛ ni eyɔɔ ni ekɛ lɛ feɔ nɔ fɛɛ nɔ lɛ eha enaanyo ni eba lɛ saramɔ lɛ. David, tsutsu tookwɛlɔ lɛ mli wo la kɛ mlifu. Ekɛɛ: “Nuu ni ye nɛkɛ sane nɛɛ, esa gbele!” Kɛkɛ ni Natan kɛ nɔkwɛmɔnɔ lɛ to David he, ni ekɛɛ: “Bo ji nakai nuu lɛ!”—2 Samuel 12:1-7.

David mli fuuu Natan; ni asaŋ ebɔɔɔ mɔdɛŋ akɛ eeefã ehe loo ni eeefolɔ mɛi krokomɛi anaa. Yɛ no najiaŋ lɛ, Natan kãmɔ lɛ tsirɛ ehenilee waa. Akɛni edɔ lɛ yɛ etsuiŋ hewɔ lɛ, David jaje akɛ: “Mifee Yehowa shishi esha.”—2 Samuel 12:13.

David esha lɛ he mama ni Natan kpa, ni kãmɔ ni Nyɔŋmɔ gbeyeishemɔ yɔɔ mli nyiɛ sɛɛ lɛ wo yibii kpakpai. Eyɛ mli akɛ ahaaa David aye ehe kɛjɛ nibii ni jɛ etɔ̃mɔ lɛ mli ba lɛ ahe moŋ, shi etsake etsui ni akpata ekɛ Yehowa teŋ ekoŋŋ. Te David nu hiɛkãmɔ ni tamɔ nɛkɛ lɛ he eha tɛŋŋ? Eŋma akɛ: “Hã jalɔ agba mi ma kɛ mlihilɛ ni ekã mi, yiteŋ mu ji no: ni miyitso kwaaa.”—Lala 141:5.

Yɛ wɔgbii nɛɛ amli hu lɛ, Yehowa tsuji baanyɛ abote efɔŋfeemɔ ni hiɛdɔɔ yɔɔ mli po mli, ni ebaanyɛ eba mɛi ni eye anɔkwa afii pii lɛ po nɔ. Akɛni amɛyɔseɔ akɛ onukpai lɛ baanyɛ aye abua hewɔ lɛ, amɛteŋ mɛi pii ŋɔɔ hegbɛ lɛ ni amɛyaa amɛŋɔɔ kɛhaa yelikɛbuamɔ. (Yakobo 5:13-16) Shi yɛ bei komɛi amli lɛ, efɔŋfeelɔ lɛ baanyɛ aha esha ni efee lɛ nɔ, taakɛ Maŋtsɛ David fee lɛ. Mɛni esa akɛ wɔfee kɛ́ wɔbale tɔ̃mɔi ni hiɛdɔɔ yɔɔ mli yɛ asafo lɛ mli lɛ?

Namɛi Agbɛnaa Nii Ni?

Kɛ onukpai lɛ nu nɔ fɔŋ feemɔ ko ni hiɛdɔɔ yɔɔ mli he lɛ, amɛyaa mɔ ni ekɔɔ ehe lɛ ŋɔɔ koni amɛkɛ yelikɛbuamɔ ni he hiaa kɛ jajemɔ aha. Eji onukpai lɛ agbɛnaa nii akɛ amɛkojo gbɔmɛi ni tamɔ nɛkɛ ni yɔɔ Kristofoi asafo lɛ mli lɛ. Akɛni amɛkwɛɔ mɔ lɛ mumɔŋ shihilɛ lɛ jogbaŋŋ hewɔ lɛ, amɛyeɔ amɛbuaa ni amɛwoɔ mɔ fɛɛ mɔ ni miikɔ gbɛ ni nilee bɛ mli loo ejaaa lɛ ŋaa.—1 Korintobii 5:12, 13; 2 Timoteo 4:2; 1 Petro 5:1, 2.

Shi kɛji akɛ ojeee onukpa, shi obana ole Kristofonyo ko tɔ̃mɔ ni hiɛdɔɔ yɔɔ mli hu? Anaa gbɛtsɔɔmɔi yɛ Mla ni Yehowa kɛha Israel maŋ lɛ mli. Mla lɛ kɛɔ akɛ, kɛ mɔ ko na nifeemɔi ni tsɔɔ apasa hemɔkɛyeli, maŋjwaa nii, gbɔmɔgbee, loo efɔŋfeemɔi komɛi lɛ, gbɛnaa nii bakãa enɔ akɛ ebɔ he amaniɛ ni eye nɔ ni ena lɛ he odase. Mose Wolo ni Ji Etɛ 5:1 kɛɔ akɛ: “Kɛji mɔ ko fee esha ni enu mɔ ko miilomɔ, ni lɛ nɔŋŋ ji odase, ni ena loo ele sane lɛ, kɛ ejajeee lɛ, eloo musu.”—Okɛto 5 Mose 13:7-9; Ester 6:2; Abɛi 29:24 he.

Eyɛ mli akɛ Kristofoi ni yɔɔ ŋmɛnɛ lɛ bɛ Mose Mla lɛ shishi moŋ, shi shishitoo mlai ni yɔɔ sɛɛ lɛ baanyɛ akudɔ amɛ. (Lala 19:8, 9) No hewɔ lɛ, kɛ onu esha ko ni hiɛdɔɔ yɔɔ mli ni naanyo Kristofonyo ko efee lɛ he lɛ, mɛni esa akɛ ofee?

Sane lɛ He Nitsumɔ

Klɛŋklɛŋ kwraa lɛ, ehe miihia ni ana nɔ ni sa ni aaadamɔ nɔ ahe aye akɛ afee efɔŋ ko diɛŋtsɛ ni hiɛdɔɔ yɔɔ mli. Nilelɔ lɛ kɛɛ akɛ: “Kaaye odase oshi onaanyo yakatswaa, ni okɛ onaabu hu akashishiu mɔ ko.”—Abɛi 24:28.

Obaanyɛ okpɛ oyiŋ akɛ obaaya onukpai lɛ aŋɔɔ tɛ̃ɛ. Ejeee tɔ̃mɔ akɛ ooofee nakai. Shi efɔɔ kaa akɛ, gbɛ ni suɔmɔ yɔɔ mli waa ji ni oyana mɔ ni sane lɛ kɔɔ ehe lɛ. Ekolɛ anɔkwalei ni yɔɔ mli lɛ tamɔɔɔ bɔ ni ole lɛ. Aloo ekolɛ onukpai lɛ miitsu shihilɛ lɛ he nii momo. Okɛ mɔ lɛ asusu sane lɛ he yɛ mlijɔlɛ mli. Kɛ nɔ ko yɛ ni aaadamɔ nɔ ahe aye akɛ afee efɔŋ ko ni hiɛdɔɔ yɔɔ mli lɛ, wo mɔ lɛ hewalɛ ni eyana onukpai lɛ kɛha yelikɛbuamɔ, ni otsɔɔ lɛ nilee ni yɔɔ nakai feemɔ mli lɛ mli. Okɛ mɛi krokomɛi akawie sane lɛ he, ejaakɛ enɛ baafee oshekuyeli.

Kɛji akɛ mɔ lɛ eyabɔɔɔ onukpai lɛ amaniɛ yɛ be ni sa mli lɛ, belɛ esa kɛ ofee nakai. Kɛkɛ lɛ onukpa kome loo mɛi enyɔ kɛ mɔ ni afolɔɔ enaa lɛ baasusu sane lɛ he. Ehe miihia ni onukpai lɛ ‘atao ni amɛpɛi ni amɛbi sane lɛ mli fitsofitso’ koni amɛna kɛ́ afee efɔŋ ko. Kɛji akɛ nakai ni lɛ, amɛbaadamɔ Ŋmalɛ naa gbɛtsɔɔmɔ nɔ amɛtsu sane lɛ he nii.—5 Mose 13:13-15.

Kɛ hoo lɛ, esa akɛ aná odasefoi enyɔ ni baama tɔ̃mɔ ni akɛfɔ̃ɔ mɔ lɛ nɔ lɛ nɔ mi. (Yohane 8:17; Hebribii 10:28) Kɛji akɛ mɔ lɛ kɛɛ sane lɛ bɛ mli, ni bo pɛ ji odasefonyo lɛ, abaashi sane lɛ aha Yehowa. (1 Timoteo 5:19, 24, 25) Afeɔ enɛ kɛ jwɛŋmɔ akɛ nibii fɛɛ “yɛ faŋŋ ni agbele nɔ” yɛ Yehowa hiɛ, ni akɛ, kɛ gbɔmɔ lɛ yeɔ fɔ lɛ, yɛ naagbee lɛ, ehe eshai lɛ “baanina” lɛ.—Hebribii 4:13; 4 Mose 32:23, NW.

Shi ŋɔɔ lɛ akɛ, mɔ lɛ kɛɛ sane lɛ bɛ mli, ni bo pɛ ji odasefonyo ni na lɛ. Ani abaafolɔ bo hu onaa akɛ ogbe mɔ ko he guɔ? Dabi, ja oye mɔ lɛ he osheku otsɔɔ mɛi ni sane lɛ kɔɔɔ amɛhe lɛ dã. Ejeee heguɔgbee akɛ ooobɔ shihilɛi ni saa asafo lɛ he lɛ he amaniɛ otsɔɔ mɛi ni yɔɔ hegbɛ kɛ gbɛnaa nii akɛ amɛaatsu he nii ni amɛjaje saji lɛ. Yɛ anɔkwale mli lɛ, ekɛ bɔ ni wɔshweɔ be fɛɛ be akɛ wɔɔfee nɔ ni ja ni wɔye anɔkwa lɛ kpãa gbee.—Okɛto Luka 1:74, 75 he.

Krɔŋkrɔŋfeemɔ Mli ni Aaahiɛ yɛ Asafo lɛ Mli

Yiŋtoo kome ni haa abɔɔ nɔ fɔŋ feemɔ he amaniɛ ji akɛ, ebaa asafo lɛ hetsemɔ yi. Yehowa ji Nyɔŋmɔ ni he tse, Nyɔŋmɔ ni yɔɔ krɔŋkrɔŋ. Ebiɔ ni mɛi fɛɛ ni jaa lɛ lɛ ahe atse yɛ mumɔŋ kɛ jeŋba mli. E-Wiemɔ ni jɛ mumɔŋ lɛ woɔ wɔ ŋaa akɛ: “Nyɛfea nyɛhe tamɔ bii toibolɔi, ni nyɛkaba nyɛ jeŋ yɛ sa beni nyɛleee nɔ ko lɛ mli akɔnɔi lɛ anaa dɔŋŋ; shi moŋ, bɔ ni mɔ ni tsɛ nyɛ lɛ yɔɔ krɔŋkrɔŋ lɛ, nyɛ hu nyɛfea krɔŋkrɔŋ yɛ nyɛ jeŋba fɛɛ mli; ejaakɛ aŋma akɛ: ‘Nyɛfea krɔŋkrɔŋ, ejaakɛ krɔŋkrɔŋ ji mi.’ ” (1 Petro 1:14-16) Aŋkroaŋkroi ni diɔ nii ni he tseee loo efɔŋfeemɔ sɛɛ lɛ baanyɛ ni amɛkɛ mujiwoo kɛ Yehowa duromɔ ni anáŋ aba asafo muu lɛ fɛɛ nɔ, ja afee nii koni akɛjaje loo akɛjie tɔ̃mɔ lɛ.—Okɛto Yoshua, yitso 7 he.

Bɔfo Paulo woji ni eŋmala eyaha Kristofoi asafo lɛ ni yɔɔ Korinto lɛ tsɔɔ bɔ ni efɔŋfeemɔ ni abɔɔ he amaniɛ lɛ ha atsuu Nyɔŋmɔ webii ni yɔɔ jɛmɛ lɛ ahe. Paulo ŋma yɛ eklɛŋklɛŋ wolo lɛ mli akɛ: “Anuɔ yɛ nyɛhewɔ kwa, akɛ ajwamaŋbɔɔ yɛ nyɛteŋ, ajwamaŋbɔɔ ni bɛ jeŋmaji lɛ amli tete, akɛ mɔ ko wɛɔ etsɛ ŋa lɛ.”—1 Korintobii 5:1.

Biblia lɛ ekɛɛɛ wɔ mɔ dɛŋ ni bɔfo lɛ nine shɛ emaniɛbɔɔ lɛ nɔ kɛjɛ. Ekolɛ ebaanyɛ eba akɛ Paulo nu sane lɛ he kɛjɛ Stefana, Fortunato, kɛ Akaiko, ni fã gbɛ kɛjɛ Korinto kɛtee Efeso he ni Paulo hiɔ lɛ aŋɔɔ. Paulo nine eshɛ wolo ni Kristofoi asafo lɛ ni yɔɔ Korinto lɛ ŋma kɛmiibi saji amli lɛ hu nɔ. Bɔ fɛɛ bɔ ni wolo lɛ jɛɛhe ji lɛ, bei abɔ ni odasefoi ni aheɔ amɛ ayeɔ ebɔ shihilɛ lɛ he amaniɛ amɛtsɔɔ Paulo lɛ, enyɛ ekɛ gbɛtsɔɔmɔ ha yɛ sane lɛ he. Eŋma akɛ: “Nyɛjiea mɔ fɔŋ lɛ yɛ nyɛteŋ.” Ashwie gbɔmɔ lɛ kɛjɛ asafo lɛ mli.—1 Korintobii 5:13; 16:17, 18.

Ani nɔ̃ kpakpa jɛ Paulo fãmɔ lɛ mli ba? Hɛɛ, nɔ̃ kpakpa jɛ mli ba! Eyɛ faŋŋ akɛ efɔŋfeelɔ lɛ hiɛ ba ehe nɔ. Paulo wo asafo lɛ hewalɛ yɛ ewolo ni ji enyɔ ni eŋma eyaha Korintobii lɛ mli akɛ, “nyɛŋɔfaa lɛ ni nyɛshɛjea” mɔ ni etsake etsui lɛ “mii moŋ.” (2 Korintobii 2:6-8) No hewɔ lɛ, nɔ fɔŋ feemɔ he amaniɛ ni abɔ lɛ ha atsu he nii, ni nɔ ni jɛ mli ba ji asafo lɛ he ni atsuu, kɛ Nyɔŋmɔ hiɛ duromɔ ni aha mɔ ni efite ekɛ Nyɔŋmɔ teŋ wekukpaa lɛ na ekoŋŋ.

Wɔnaa nɔkwɛmɔnɔ kroko yɛ Paulo klɛŋklɛŋ wolo ni eŋma eyaha Kristofoi asafo ni yɔɔ Korinto lɛ mli. Bɔfo lɛ tsi odasefoi ni bɔ sane lɛ he amaniɛ amɛtsɔɔ lɛ lɛ agbɛii ata. Eŋma akɛ: “Kloe webii lɛ batswa mi adafi yɛ nyɛhewɔ, minyɛmimɛi, akɛ béi yɛ nyɛteŋ.” (1 Korintobii 1:11) Paulo le akɛ nɛkɛ béi nɛɛ, kɛ woo ni akɛhãa gbɔmɛi bɔ ni esaaa lɛ kɛ mligbalamɔ su eba ni miitao afite ekomefeemɔ ni yɔɔ asafo lɛ mli lɛ. No hewɔ lɛ, yɛ enanemɛi heyelilɔi ni yɔɔ jɛmɛ lɛ amumɔŋ hilɛ-kɛhamɔ hewɔ lɛ, Paulo tsu he nii oya, ni eŋma ŋaawoo wolo ni akɛjajeɔ mɔ eyaha asafo lɛ.

Ŋmɛnɛ, nyɛmimɛi hii kɛ yei ni yɔɔ asafoi ni yɔɔ shikpɔŋ muu lɛ fɛɛ nɔ lɛ amli lɛ ateŋ mɛi ni fa babaoo miitsu nii waa koni amɛkɛbaa asafo lɛ mumɔŋ hetsemɔ yi, kɛtsɔ nɔkpɛlɛmɔ shidaamɔ yɛ Nyɔŋmɔ hiɛ lɛ ni aŋkroaŋkroi bɔɔ mɔdɛŋ ni amɛhiɛ mli lɛ nɔ. Mɛi komɛi naa nɔ̃ yɛ nakai feemɔ mli; mɛi krokomɛi gboi po koni amɛhiɛ amɛ emuuyeli mli. Yɛ anɔkwale mli lɛ, ni aaakpɛlɛ efɔŋfeemɔ nɔ loo aha nɔ lɛ tsɔɔ hiɛsɔɔ ni abɛ kɛha nɛkɛ mɔdɛŋbɔi nɛɛ.

Yelikɛbuamɔ Kɛha Mɛi ni Tɔ̃ɔ Lɛ

Mɛni hewɔ mɛi ni yagbeɔ tɔ̃mɔ ni hiɛdɔɔ yɔɔ mli lɛ ateŋ mɛi komɛi sumɔɔɔ ni amɛbɔɔɔ asafo lɛ mli onukpai lɛ amaniɛ lɛ? Bei pii lɛ ejɛ le ni amɛleee sɛɛnamɔi ni jɛɔ mli baa yɛ onukpai lɛ aŋɔɔ ni amɛaaya lɛ hewɔ. Mɛi komɛi heɔ yeɔ yɛ gbɛ ni ejaaa nɔ akɛ, kɛ amɛjaje amɛhe eshai lɛ amɛtsɔɔ lɛ, abaabɔ asafo muu lɛ fɛɛ amaniɛ. Mɛi krokomɛi hu lakaa amɛhe yɛ hiɛdɔɔ ni yɔɔ amɛgbɛ lɛ mli lɛ he. Mɛi krokomɛi hu yɛ ni susuɔ akɛ amɛbaanyɛ amɛjaje amɛgbɛ ni onukpai lɛ ayelikɛbuamɔ he ehiaaa.

Shi asafo lɛ mli onukpai lɛ ayelikɛbuamɔ ni suɔmɔ yɔɔ mli lɛ he miihia nɛkɛ efɔŋfeelɔi nɛɛ. Yakobo ŋma akɛ: “Kɛ nyɛteŋ mɔ ko he waaa lɛ lɛ, etsɛ asafo lɛ mli onukpai lɛ kɛba eŋɔɔ, ni amɛkpa lɛ mu yɛ [Yehowa, NW] gbɛi amli ni amɛsɔle amɛha lɛ, ni hemɔkɛyeli sɔlemɔ lɛ aaahere helatsɛ lɛ yiwala, ni Nuntsɔ [Yehowa, NW] lɛ aaatee lɛ shi, ni kɛji efee eshai lɛ, aaaŋɔfa lɛ.”—Yakobo 5:14, 15.

Mɛɛ gbɛjianɔtoo ni yɔɔ naakpɛɛ ni akɛaaye abua mɛi ni tɔ̃ɔ lɛ koni akɛ amɛ aba amɛ mumɔŋ shihilɛ mli ekoŋŋ po nɛ! Kɛtsɔ ŋaawoo ni jɛ Nyɔŋmɔ Wiemɔ lɛ mli lɛ kɛ nitsumɔ, kɛ sɔlemɔ ni amɛaasɔle amɛha amɛ lɛ nɔ lɛ, onukpai lɛ baanyɛ aye abua mɛi ni he yeɔ yɛ mumɔŋ lɛ ni amɛjie amɛ kɛjɛ amɛ nɔtɔ̃mɔ gbɛi lɛ amli. No hewɔ lɛ, yɛ nɔ najiaŋ ni amɛaanu he akɛ abu amɛ fɔ lɛ, mɛi ni etsake amɛtsui lɛ nuɔ hejɔɔmɔ kɛ jatsu ni eje amɛkɔŋ nɔ lɛ he, kɛ́ amɛkɛ onukpai ni yɔɔ suɔmɔ kpe. Obalanyo ko ni jɛ Afrika Anaigbɛ bɔ ajwamaŋ ni ekɛ ehe esha lɛ tee nyɔji komɛi. Beni ehe esha lɛ je kpo lɛ, ekɛɛ onukpai lɛ akɛ: “Kwɛ bɔ ni mishwe akɛ mɔ ko aaabi mi nɔ ni tee nɔ yɛ mi kɛ nakai obalayoo lɛ teŋ lɛ he sane! Eji hejɔɔmɔ diɛŋtsɛ ákɛ aaajie teemɔŋ sane ni tamɔ nɛkɛ kpo faŋŋ.”—Okɛto Lala 32:3-5 he.

Suɔmɔ ni Damɔ Mla Nɔ lɛ Nifeemɔ

Nyɔŋmɔ tsuji ni abaptisi amɛ lɛ “[e]foŋ kɛjɛ gbele mli kɛtee wala mli.” (1 Yohane 3:14) Shi kɛji akɛ amɛfee esha ni hiɛdɔɔ yɔɔ mli lɛ, belɛ amɛku sɛɛ amɛbaje gbele gbɛ lɛ nɔ. Kɛji akɛ ayeee abuaaa amɛ lɛ, amɛbaakpiliŋ yɛ nɔ fɔŋ feemɔ mli, ni amɛsumɔŋ ni amɛtsake amɛtsui ni amɛku amɛsɛɛ kɛba anɔkwa Nyɔŋmɔ lɛ jamɔ mli.—Hebribii 10:26-29.

Efɔŋfeemɔ he amaniɛ ni abɔɔɔ lɛ ji nifeemɔ ni tsɔɔ nɔ fɔŋ feelɔ lɛ he ni asusuɔ diɛŋtsɛ. Yakobo ŋma akɛ: “Anyɛmimɛi, kɛji nyɛteŋ mɔ ko dũ gbɛ kɛjɛ anɔkwale lɛ mli ni mɔ ko miikpale lɛ ekoŋŋ lɛ, ha ni ele akɛ, mɔ ni kpaleɔ eshafeelɔ kɛjɛɔ egbɛdũu mli lɛ, eehere susuma yiwala kɛjɛ gbele mli, ni eeha eshai pii anɔ.”—Yakobo 5:19, 20.

No hewɔ lɛ, mɛni hewɔ esa akɛ obɔ nɔ ni ehiii he amaniɛ? Ejaakɛ ekɛ nɔ ni hi baa. Yɛ anɔkwale mli lɛ, efɔŋfeemɔ he amaniɛ ni abɔɔ lɛ ji nifeemɔ ni damɔ Kristofoi ashishitoo mla ni suɔmɔ yɔɔ mli ni ajieɔ lɛ kpo atsɔɔ Nyɔŋmɔ, atsɔɔ asafo lɛ, kɛ efɔŋfeelɔ lɛ nɔ. Yɛ be mli ni asafo lɛ mli bii lɛ ateŋ mɔ fɛɛ mɔ kɛ anɔkwayeli fiɔ Nyɔŋmɔ jalɛ taomɔ nii asɛɛ lɛ, Yehowa baajɔɔ asafo muu lɛ fɛɛ babaoo. Bɔfo Paulo ŋma akɛ: “Lɛ [Yehowa] nɔŋŋ eeewaje nyɛ kɛaatee naagbee, ni nyɛhe akaba kpa ko yɛ wɔ-Nuntsɔ Yesu Kristo gbi lɛ nɔ.”—1 Korintobii 1:8.

[Mfoniri ni yɔɔ baafa 26]

Odasefonyo ni tɔ̃ɔ ni ooowo lɛ hewalɛ ni ekɛ onukpai lɛ ayawie he lɛ tsɔɔ suɔmɔ

[Mfoniri ni yɔɔ baafa 28]

Onukpai lɛ yeɔ buaa ni asaa mɛi ni tɔ̃ɔ lɛ kɛbaa Nyɔŋmɔ duromɔ mli ekoŋŋ