Yitso 13
Maŋtsɛyeli Okpɔŋɔnɔtalɔ lɛ Je Kpo
1, 2. (a) Namɔ nɔ wɔgbalaa wɔjwɛŋmɔ kɛyaa agbɛnɛ, ni mɛni ehiɛ yɛ eninejurɔ? (b) Mɛni hewɔ akɛɛ Yohane akɛ ekpa yaafo lɛ? (d) Namɔ ji “Jata” ni jɛ Yuda akutso lɛ mli lɛ, ni mɛni hewɔ eji mɔ ni sa akɛ etserɛɔ naasɔomɔ nii lɛ anaa?
HA WƆGBELE kɛya Kpojiemɔ yitso enumɔ lɛ. Wɔkaneɔ ninaa ko ni jɛ mumɔŋ, ni akɛha bɔfo Yohane, ni kɔɔ Nyɔŋmɔ Maŋtsɛyeli lɛ ‘baa’ he tɛɛ lɛ he sane yɛ biɛ. Egbalaa jwɛŋmɔ kɛyaa Nuŋtsɔ Maŋtsɛ Yehowa, “Mɔ ni ta maŋtsɛsɛi lɛ nɔ lɛ” nɔ. Ehiɛ wolokpo ko ni aŋmala nii yɛ mli, “ni asoɔ naa kɛ naasɔomɔi kpawo,” yɛ eninejurɔ. Shi bɔfo Yohane fo aahu. Mɛni hewɔ? Ejaakɛ, anaaa mɔ ko mɔ ko kwraa, yɛ jeŋ muu lɛ fɛɛ mli, ni sa akɛ eeetserɛ naasɔomɔ nɔ lɛ ni eha ale emli sane. Shi naa! Mɔ ko yɛ ni sa! Ejeee mɔ ko mɔ ko fe “jata lɛ ni jɛ Yuda akutso lɛ mli lɛ,” David maŋtsɛyeli lɛ gboshiniyelɔ lɛ.—Kpojiemɔ 5:1-5.
2 Esa ejaakɛ “eye kunim.” Beni eyɔɔ shikpɔŋ nɔ akɛ adesa ni eye emuu lɛ, ejie anɔkwayeli ni hosooo kpo etsɔɔ e-Tsɛ lɛ, aahu kɛtee yiwalɛ gbele mli yɛ sɛŋmɔtso nɔ po. “Je lɛŋ lumɔ,” Satan nyɛɛɛ aku emuuyeli ni ehiɛ mli lɛ mli. No hewɔ lɛ Yesu nyɛ ewie akɛ: “Miye je lɛ nɔ kunim.”—Yohane 14:30; 16:33.
3. Mɛni hewɔ esa akɛ wɔna miishɛɛ yɛ Kpojiemɔ 5:9, 10 mlibaa he lɛ?
3 Mɛi krokomɛi hu yɛ ni amɛye je lɛ nɔ kunim, ni nɛkɛ “Jata” ni yɔɔ ekaa nɛɛ, ni ji Kristo Yesu buɔ amɛ akɛ emumɔŋ “nyɛmimɛi.” (Mateo 25:40) Mɛnɛɛmɛi baatsɔ ŋwɛi gbohiiashitee nɔ amɛfata ehe yɛ e-afii 1,000 Maŋtsɛyeli nɔyeli lɛ mli, ní amɛkɛ lɛ afee ekome ni akɛtsu sɛɛnamɔi ni jɛɔ ekpɔmɔ afɔleshaa lɛ mli baa yɛ adesai akpekpei akpei abɔ ni yɔɔ shikpɔŋ nɔ lɛ anɔ lɛ he nii. No hewɔ lɛ gbeei komɛi miila lala hee ko yɛ ŋwɛi. Amɛmiikɛɛ nɛkɛ Mɔ nɛɛ, ni be ko lɛ anyiɛ ehiɛ tamɔ toobi ni akɛ lɛ miiya ayagbe lɛ lɛ akɛ:
“Sa osa akɛ oheɔ wolo lɛ ni otserɛɔ enaasɔomɔi lɛ, ejaakɛ agbeo, ni okɛ ola lɛ ekpɔ wɔ oha Nyɔŋmɔ kɛjɛ akutso fɛɛ akutso kɛ wiemɔ fɛɛ wiemɔ kɛ maŋ fɛɛ maŋ kɛ jeŋmaŋ fɛɛ jeŋmaŋ mli, ni oŋɔ wɔ ofee maŋtsɛmɛi kɛ osɔfoi oha wɔ-Nyɔŋmɔ lɛ, ni wɔɔye maŋtsɛ yɛ shikpɔŋ lɛ nɔ.” (Kpojiemɔ 5:9, 10)
Mɛɛ jɔɔmɔ eji nɛkɛ, akɛ Maŋtsɛ lɛ, kɛ ehefatalɔi maŋtsɛmɛi ni aka amɛ ni amamɔ amɛ nɔ mi lɛ baatsu nii yɛ adesai ni anyɛɔ amɛnɔ lɛ agbɛfaŋ! Shi yɛ enɛ gbɛfaŋ lɛ, esa akɛ ta atsɔ hiɛ kɛba klɛŋklɛŋ.
OKPƆŊƆ YƐŊ LƐ NƆTALƆ LƐ
4. (a) Mɛni “okpɔŋɔ yɛŋ” lɛ, kɛ enɔtalɔ lɛ “gãi” lɛ, kɛ “akekre” ni aha lɛ lɛ feɔ he mfoniri? (b) Namɔ ji enɔtalɔ lɛ, ni mɛɛ be enine shɛ maŋtsɛyeli hegbɛ lɛ nɔ?
4 Beni “Toobi” lɛ he wolokpo lɛ ni egbele klɛŋklɛŋ naasɔomɔ nɔ lɛ naa lɛ, anu gbee ko gbɛɛmɔ yɛ ŋwɛi tamɔ nugbɔshimɔ akɛ: “Ba ni obakwɛ!” Ni mɛni wɔnaa? “Naa, okpɔŋɔ yɛŋ”—ni feɔ ta ni awuɔ yɛ jalɛ mli he mfoniri. Enɔtalɔ lɛ hiɛ “gãi.” Ebaanyɛ ekpata ehenyɛlɔi lɛ ahiɛ kɛjɛ shɔŋŋ—ni ebaanyɛ eshɛ hei ni jɛkɛ waa fe bɔ ni majimaji ateŋ okpɛlɛmii ni atswiaa lɛ baanyɛ ashɛ. Aha lɛ “akekre,” ni enɛ gbalaa jwɛŋmɔ kɛyaa ŋmɛnɛŋmɛnɛ beaŋ afi ni ji 1914, beni Yehowa ha lɛ maŋtsɛyeli yɛ jeŋmaji lɛ anɔ lɛ nɔ. Akɛni eyɛ hewalɛ kwraa fe adesai foji ni ji nuŋtsɔmɛi loo maŋtsɛmɛi hewɔ lɛ, nɛkɛ “nuŋtsɔmɛi a-Nuŋtsɔ kɛ maŋtsɛmɛi a-Maŋtsɛ” nɛɛ, kɛ “mɛi ni atsɛ́ kɛ mɛi ni ahala kɛ mɛi ni heɔ yeɔ” ni fata ehe, ni ji Kristofoi ni afɔ amɛ mu ni amɛkɛ lɛ efee ekome yɛ eŋwɛi maŋtsɛyeli lɛ mli lɛ baaye jalɛ he henyɛlɔi fɛɛ anɔ kunim.—Kpojiemɔ 6:1, 2; 17:14.
5. (a) Mɛɛ shishijee kunim ko nɛkɛ okpɔŋɔnɔtalɔ nɛɛ ye? (b) Mɛni ejɛ mli eba kɛha adesai, ni mɛni hewɔ esa akɛ wɔbo kɔkɔbɔɔ ni yɔɔ Marko 13:32-37 lɛ toi lɛ?
5 Kunimyelɔ kpeteŋkpele ji nɛkɛ “okpɔŋɔ yɛŋ” lɛ nɔtalɔ nɛɛ. Belɛ, mɛni baafee nɔ ni sa jogbaŋŋ, beni eho eta okpɔŋɔ lɛ nɔ lɛ, fe akɛ eshwie “blema onufu lɛ” ni ji Satan kɛ eŋwɛibɔfoi daimonioi lɛ kɛjɛ ŋwɛi? Ni eshɛrɛ amɛ eshwie shikpɔŋ nɛɛ nɔ! No hewɔ lɛ ebɛ naakpɛɛ akɛ amrɔ nɛɛ Abonsam mli efu waa. Taakɛ wɔtsɔ hiɛ wɔna momo lɛ, ejieɔ emlifu lɛ kpo yɛ adesai anɔ, ni no bafeɔ “kpoo ha mɛi ni yɔɔ shikpɔŋ lɛ nɔ kɛ ŋshɔ hiɛ lɛ.” Abonsam le akɛ “be fioo kɛkɛ eyɔɔ,” shi efeɔ nii yɛ gbɛ ni yɔɔ nigii nɔ babaoo diɛŋtsɛ. Ebaasumɔ ni ena wɔnɔ hewalɛ koni wɔsusu akɛ “naagbee gbii” lɛ baatsa nɔ aahu kɛya wɔsɛɛ be ko ni sɛɛ jɛkɛ waa mli. Ekaba akɛ susumɔ ni tamɔ nɛkɛ aaawɔle wɔteŋ mɔ ko ni ewɔ!—Kpojiemɔ 12:9-12; Marko 13:32-37.
OKPƆŊƆ TSURU
6. (a) Taakɛ Kpojiemɔ 6:3, 4 tsɔɔ lɛ, mɛni hu baje kpo faŋŋ agbɛnɛ? (b) Esoro Jeŋ Ta I yɛ tai krokomɛi fɛɛ ni awuu kɛtsɔ hiɛ lɛ ahe yɛ mɛɛ gbɛ nɔ?
6 “Toobi” lɛ tse naasɔomɔ nɔ ni ji enyɔ lɛ naa. Kɛkɛ ni “okpɔŋɔ kroko ni tsuɔ” kɛ foi je kpo! “Ni mɔ ni ta nɔ lɛ, aha lɛ hegbɛ koni ejie hejɔlɛ kɛjɛ shikpɔŋ lɛ nɔ ni amɛgbegbee amɛhe, ni aha lɛ klante kpeteŋkpele ko.” (Kpojiemɔ 6:4) Ah, klɛŋklɛŋ jeŋ ta ni awuu yɛ adesai ayinɔsane mli lɛ fɛ yɛ shikpɔŋ lɛ nɔ. Akɔ toiŋjɔlɛ kɛtee, jeee kɛjɛ jeŋmaji fioo komɛi pɛ mli, shi moŋ kɛjɛ “shikpɔŋ lɛ nɔ” beni asraafoi kɛ ŋshɔ hiɛ asraafoi akui wuji kɛ amɛhe wuɔ ta, ni amɛkɛ tawuu nii ni kpataa nii babaoo hiɛ shikome lɛ tsuɔ nii lɛ. Eyɛ mli akɛ asraafoi ni tawuu ji amɛnitsumɔ, ni bei pii lɛ amɛjɛ maji fioo amli lɛ pɛ wuu tsutsu tai ni awuu lɛ moŋ, shi Jeŋ Ta I bafee ta ni maji fɛɛ fata he kɛwuu. Enɛ ji klɛŋklɛŋ kwraa yɛ yinɔsane mli, ni jeŋmaji babaoo kɛ amɛnibii fɛɛ ni amɛyɔɔ, ní amɛmaŋbii ahewalɛ ni abua naa akɛ kuu kome lɛ fata he lɛ fɛɛ wo ta ni awuu lɛ mli.
7-9. Yɛ ‘gbɔmɛi agbee’ lɛ gbɛfaŋ lɛ, mɛɛ akɔntaabuu kɛ wiemɔi komɛi tsɔɔ akɛ afi 1914 kadi be ni agbe gbɔmɛi yɛ mli fe fɛɛ yɛ yinɔsane mli lɛ shishijee?
7 Gbalɛ lɛ tsĩ ‘gbee’ ta, ni ‘agbe’ hu! Yɛ ta ni awuu yɛ Somme lɛ mli lɛ, gbɔmɔgbee nii hee ni akɛtsu nii, ni ji tu ni tswaa tuŋtɛi pii shikome lɛ gbe Britania kɛ French asraafoi akpei ohai abɔ, ni taakɛ akɔntaabui komɛi tsɔɔ lɛ, no kɛkɛ gbe mɛi ni gboi lɛ fɛɛ amlijaa oha mli 80. Yɛ nyɔji nɛɛhu mli yɛ Verdun hu lɛ, hii ni gboi lɛ ayi fa kwraa fe Napoleon asraafoi ni yatutua Russia lɛ. Niŋmaa ko ni akɛ la eŋma yɛ gɔɔ he gbogbo he yɛ Verdun lɛ kaneɔ akɛ “KƐJƐ BIƐ KƐYAA HE NI AGBEƆ MƐI YƐ LƐ FEƆ KILOMITAI ENUMƆ.” Yɛ fɛɛ mli lɛ, agbe asraafoi 9,000,000 yɛ afii ejwɛ ni akɛwuu nakai Ta Kpeteŋkpele lɛ mli.
8 Ani 1914 ji afi nɔ ni “okpɔŋɔ kroko ni tsuɔ” lɛ nɔtalɔ lɛ kɔ toiŋjɔlɛ kɛjɛ shikpɔŋ lɛ nɔ lɛ? Yinɔsaneŋmalɔi pii fiɔ nakai susumɔ lɛ sɛɛ. Akɛ nɔkwɛmɔ nɔ lɛ, no sɛɛ aaafee afii 50 lɛ, niŋmalɔ nukpa ni kwɛɔ yinɔsane wolo ni gbɛi ji American Heritage lɛ nɔ lɛ ŋma akɛ: “Yɛ 1914 latsaa be mli lɛ, no mli lɛ toiŋjɔlɛ yɛ jeŋmaji lɛ ateŋ, ni etamɔ nɔ ni wɔsɛɛ be hu baafee kpoo. Kɛkɛ ni tui lɛ gbɛɛ, ni nibii efeŋ tamɔ bɔ ni eji tsutsu lɛ dɔŋŋ. . . . Afi 1914 ji jaramɔ afii fe fɛɛ ni eba yɛ yinɔsane mli lɛ ateŋ ekome . . . Nakai afi lɛ nɔ nakai tsakemɔi kpelei ni baaa fe shikome loo shii enyɔ yɛ afii akpe mli lɛ ekome ba. Ekolɛ ebaatsɛ waa dani wɔbaanu nɔ ni 1914 kɛ wɔ yawo mli lɛ shishi, shi kɛ hoo kwraa lɛ, wɔbaanyɛ wɔbɔi nɔ ni ejie wɔ kɛjɛ mli lɛ namɔ bianɛ.” Lɛlɛŋ, “okpɔŋɔ kroko ni tsuɔ” lɛ nɔtalɔ lɛ jie toiŋjɔlɛ kwraa kɛjɛ shikpɔŋ nɛɛ nɔ, ni 1914 ji nakai afi lɛ.
9 Okpɔŋɔnɔtalɔ lɛ tsa ekpojee ni kɛ gbɔmɔgbee baa lɛ nɔ aahu kɛtsɔ jeŋ ta ni ji enyɔ mli, ni asraafoi 16,000,000 gboi yɛ ta mli. Beni wɔyaa nɔ yɛ 1980 afii lɛ amli lɛ, Hungarynyo tsɔɔlɔ nukpa ko bu akɔntaa akɛ yɛ afii nyɔŋmai etɛ ni nyiɛ Jeŋ Ta II naagbee lɛ sɛɛ lɛ mli lɛ, asraafoi krokomɛi 25,000,000 hu egboi yɛ tai amli. Ewie akɛ yɛ afii 33 ni nyiɛ Jeŋ Ta II sɛɛ lɛ mli fɛɛ lɛ, gbii 26 pɛ ho ni awuuu ta yɛ he ko yɛ je lɛŋ.
10. Nɛkɛ okpɔŋɔnɔtalɔ nɛɛ kɛ “klante kpeteŋkpele” ko etsu nii yɛ mɛɛ gbɛ nɔ?
10 Gbalɛ lɛ kɛɔ wɔ akɛ aha nɛkɛ okpɔŋɔnɔtalɔ nɛɛ “klante kpeteŋkpele ko.” Ni lɛlɛŋ hu, tawuu nibii ni kpataa nii ahiɛ waa ena gbɛfaŋnɔ titri ko yɛ nɛkɛ afii ohai 20 nɛɛ mli gbɔmɔgbee lɛ mli. Jeŋ Ta I mli ji beni akɛ kɔɔyɔɔ ni ebɔɔ yɔɔ mli, tui ni tswiaa tɛŋtui pii shikome, tawuu tsɔnei, kɔɔyɔŋ lɛji kɛ ŋshɔ shishi tawuu lɛji tsu nii waa klɛŋklɛŋ kwraa. Yɛ Jeŋ Ta II mli lɛ, ta ni awuu kɛtsɔ kɔɔyɔɔ mli lɛ kpata maji babaoo ahiɛ diɛŋtsɛ, ni mɛi ni gboi yɛ mli lɛ ateŋ mɛi babaoo ji yei, gbekɛbii kɛ mɛi ni edara yɛ afii amli ni amɛfeko nɔ ko. Yɛ gbɛkɛ kome pɛ mli lɛ, akpata Coventry ni yɔɔ England lɛ hiɛ kwraa, ni sɛɛ mli lɛ, Maji ni Efee Ekome lɛ atutuamɔ ni jɛ kɔɔyɔŋ lɛ kpata mɛi 135,000 awala hiɛ yɛ Dresden, yɛ Germany. Kɛkɛ ni no sɛɛ hu lɛ, mɛi babaoo ahiɛkpatamɔ shikome kɛtsɔ atomik okpɛlɛmii anɔ lɛ hu ba, kɛ hoo lɛ mɛi aaashɛ 92,000 yɛ Hiroshima kɛ mɛi 40,000 yɛ Nagasaki, yɛ Japan, ni shikome ekoŋŋ lɛ, amɛteŋ mɛi pii ji maŋbii foji. Nɔ ni “klante kpeteŋkpele” lɛ baatsu ŋmɛnɛ kɛji nuklea ta ko aaafɛ lɛ fe bɔ ni aaanyɛ asusu he!
“NAA, OKPƆŊƆ DIŊ”
11, 12. (a) “Okpɔŋɔ diŋ” lɛ nɔtalɔ lɛ ejie ehe kpo akɛ okpɔŋɔnɔtalɔ ni ji enyɔ lɛ hefatalɔ yɛ mɛɛ gbɛ nɔ? (b) Mɛni tsɔɔ akɛ ekpɔŋɔnɔtamɔ lɛ etee nɔ aahu kɛbashi wɔgbii nɛɛ amli tɔ̃ɔ?
11 Beni “Toobi” lɛ tse naasɔomɔ nɔ ni ji etɛ lɛ naa lɛ, “okpɔŋɔ diŋ” ko kɛ foi je kpo. “Ni mɔ ni ta enɔ lɛ hiɛ ŋsɛnii yɛ edɛŋ.” (Kpojiemɔ 6:5) Ah, naa hefatalɔ kroko hu kɛha okpɔŋɔnɔtalɔ ni kɛ ta ni kpele jeŋ fɛɛ lɛ ba lɛ! Mɔ nɛ ji okpɔŋɔnɔtalɔ ni kɛ hɔmɔ ba lɛ. Yɛ jeŋ tai enyɔ lɛ fɛɛ mli lɛ, hɔmɔ ba maji babaoo nɔ. Niyenii jaa, taakɛ “ŋsɛnii” lɛ feɔ he mfoniri lɛ, batsɔ daa gbi shihilɛ kɛha maŋbii lɛ yɛ maji ni kɛ amɛhe wuɔ lɛ amli. Ni Jeŋ Ta I lɛ mli ji be mli ni hɔmɔ ni naa wa fe fɛɛ yɛ yinɔsane mli lɛ ba. The Nation ni je kpo yɛ June 7, 1919 lɛ bɔ amaniɛ akɛ gbɔmɛi 32,000,000 “miihe agboi kɛ hɔmɔ” yɛ India. World’s Work ni je kpo yɛ March 1921 lɛ wie akɛ yɛ China kooyigbɛ pɛ lɛ, gbɔmɛi 15,000 gboiɔ daa gbi yɛ hɔmɔ hewɔ. New York Times wolo ko ni ji Current History Magazine ni je kpo yɛ October 1921 lɛ tsɛ Britania amaniɛbɔɔ ko sɛɛ akɛ yɛ Russia lɛ, “gbɔmɛi fe 35,000,000 yɛ ni amanehulu ni amɛyɔɔ mli ji hɔmɔ kɛ tsɛŋemɔ helai.” Hɔmɔ ni tamɔ nakai nɔŋŋ ba hei sɔrɔtoi yɛ Jeŋ Ta II sɛɛ hu, beni Look wolo tɛtrɛɛ ni je kpo yɛ June 11, 1946 lɛ bɔ amaniɛ akɛ: “Je lɛ mlijaa ejwɛ mli ekome miigboi kɛ hɔmɔ ŋmɛnɛ.”
12 Kɛji ta ni aawuu yɛ jeŋ fɛɛ bɛ po lɛ, bei pii lɛ, ŋmɔshi nibii ni hiɛ kpataa yɛ wɔ amrɔ nɛɛ je nɛɛ mli lɛ haa adafitswaa woji ŋmalaa saji tamɔ enɛ, ni aŋma yɛ 1974 lɛ akɛ: “India yɛ okpɔŋɔnɔtalɔ ni ji etɛ lɛ susuma shishi.” Yɛ 1976 mli lɛ: “Jeŋ ni Hɔmɔ Miiye Amɛ Daa lɛ kɛ Niyenii he Jaramɔ Shihilɛ Wulu Miikpe.” Ni yɛ 1979 mli hu: “Gbɔmɛi akpekpei 450 miigboi kɛ hɔmɔ.” Beni je lɛŋ bii ayifalɛ yaa nɔ ekuɔ ebɔɔ he lɛ, belɛ niyenii shihilɛ yɛ maji ni kpaako amɛyaa amɛhiɛ, kɛ maji ni awuɔ ta yɛ mli lɛ amli lɛ miiya nɔ emli miiwa waa. Atlas World Press Review, ni yɔɔ New Scientist ni je kpo yɛ May 1975 lɛ mli lɛ, wie akɛ: “Je lɛ kɛ amanehulu ni egba ŋtai enyɔ miikpe. Hɔmɔ ji efãi sɔrɔtoi enyɔ lɛ mli ekome pɛ: ekroko lɛ ji gbɔmɔtsoŋ hewalɛ kpakpa ni anaaa yɛ niyenii kpakpa ni bɛ hewɔ. FAO [Food and Agriculture Organization] lɛ buɔ akɔntaa akɛ yɛ 1970 mli lɛ, maji 97 ni kpaako amɛyaa amɛhiɛ lɛ amli 61 duɔ loo amɛshɛɔ niyenii ni shɛɛɛ bɔ ni he hiaa ni amɛkɛlɛ amɛmaŋbii lɛ he kwraa. Kɛ aabu lɛ kwashiaiaŋ lɛ, FAO kpɛlɛɔ nɔ akɛ gbɔmɛi akpekpei 460 naaa gbɔmɔtsoŋ hewalɛ kpakpa yɛ niyenii kpakpa ni amɛnaaa amɛye hewɔ; kɛ akɛɛ aatsɔɔ yibɔ lɛ diɛŋtsɛ lɛ, ebaanyɛ eshɛ mɛi akpekpei akpe kome.” Amrɔ nɛɛ yɛ 1990 afii nɛɛ amli lɛ, shihilɛ lɛ efite kwraa agbɛnɛ.
13. Mɛɛ ŋmɛnɛŋmɛnɛ beaŋ shihilɛi kɛ gbeyeishemɔi komɛi afee he mfoniri yɛ Kpojiemɔ 6:6?
13 Beni okpɔŋɔnɔtalɔ ni ji etɛ lɛ yaa nɔ yɛ ekpɔŋɔtamɔ lɛ mli lɛ, gbee ko bo kɛjɛ ŋwɛi akɛ: “Ŋmaa susumɔ nɔ kome denario, ni abele susumɔ nii etɛ denario; ni mu kɛ wein lɛ kaata he!” (Kpojiemɔ 6:6) Akɛni denario feɔ gbi kome nyɔmɔwoo he mfoniri hewɔ lɛ, nitsulɔ lɛ mli baafu yɛ nibii ajara ni ewa waa nɛɛ hewɔ. Ni ani nibii ajara ni waa daa nɛɛ eyaaa nɔ efiteee gbɔmɛi foji anitsumɔ nyɔmɔwoo ŋmɛnɛ? Nakai nibii krokomɛi ni mɛi sumɔɔ waa, ni ji “mu” kɛ “wein” lɛ hu sɛɛ baafo. Shi mɛi ni kɛ hiɛjoomɔ naa mɛi ahe sɛɛ ni baasumɔ ni amɛbaa amɛ ninamɔ shihilɛ lɛ yi lɛ hu? Ani amɛbaaye omanye? Wɔbaana, beni “okpɔŋɔ diŋ” lɛ kɛ foi yaa ni ebaa yɛ shikpɔŋ lɛ nɔ fɛɛ lɛ.
‘OKPƆŊƆ LAMULU, KƐ GBELE’
14. Okpɔŋɔ ni ji ejwɛ lɛ nɔtalɔ lɛ kɛ ehefatalɔ lɛ kɛ nibii ni etee nɔ kɛjɛ 1914 kɛbaa nɛɛ nyiɛɔ pɛpɛɛpɛ yɛ mɛɛ gbɛ nɔ?
14 Atse naasɔomɔ nɔ ni ji ejwɛ lɛ naa, ni “okpɔŋɔ lamulu” bafata okpɔŋɔi kɛ amɛnɔtaralɔi ni tumɔɔ kɛyaa lɛ ahe. Enɔtalɔ ji Gbele. Nɔ ni nyiɛ esɛɛ kpaakpa kɛba hu ji Gbohiiaje loo Hades—ni kɛji eta okpɔŋɔ kroko nɔ jio, etaaa eko nɔ jio, nɔ ni aŋma lɛ ewieee he. Shi amɛhiɛ nitsumɔ ko ni yɔɔ gbeyei waa: “Aha amɛ hegbɛ yɛ shikpɔŋ lɛ mlijai ejwɛ mli ekome nɔ, akɛ amɛkɛ klante kɛ hɔmɔ kɛ gbele hela kɛ shikpɔŋ lɛ nɔ kooloi agbegbee amɛ.” (Kpojiemɔ 6:7, 8) Kɛjɛ nakai jaramɔ afi ni ji 1914 lɛ nɔ kɛbaa nɛɛ, lɛlɛŋ, ba ni Gbele kɛ Gbohiiaje eba lɛ egbɛ eshwa shikpɔŋ lɛ koji lɛ fɛɛ nɔ.
15, 16. (a) Mɛɛ mlibaa ni sa kadimɔ jogbaŋŋ nɛkɛ gbalɛ nɛɛ na yɛ 1918-1919? (b) Mɛni tsɔɔ akɛ okpɔŋɔ nɛɛ etee nɔ etumɔ kɛnyiɛ aahu kɛjɛ 1914 kɛbaa?
15 “Gbele hela”! Amɛtsɛ lɛ akɛ 1918-1919 hela ni gbɛ eshwa waa lɛ, aloo Spanish flu. Yɛ otsii fioo pɛ mli lɛ, mɛi ni egbe lɛ ayifalɛ yashɛ mɛi ni gboi yɛ tawuu hei yɛ Jeŋ Ta I mli lɛ yifalɛ lɛ toi enyɔ—yifalɛ ni yɔɔ gbeyei ni kɛ hoo lɛ eshɛɔ mɛi 21,000,000. Yɛ United States lɛ, yibɔ ni maŋ lɛ tsɔɔ kɛha flu gbelei ji 548,452, ni enɛ fa fe Amerika asraafoi ayibɔ ni gboi yɛ nakai ta lɛ mli lɛ toi 10. Mɛi titri ni egbe ji gbekɛbii kɛ mɛi ni yɔɔ obalaŋtaiaŋ hewalɛ. Yɛ India nɛkɛ lɛ, gbɔmɛi fe 12,000,000 gboi. Ejieee shikpɔŋ wulu loo ŋshɔkpɔ ko kwraa kɛjɛɛɛ mli—ja ekome pɛ ni ji St. Helena ŋshɔkpɔ lɛ. Ekpata akrowai mujii amlibii fɛɛ ahiɛ yɛ Eskimobii kɛ Afrika Teŋgbɛbii lɛ ekomɛi ateŋ. Yɛ Tahiti lɛ, yarafeemɔ la ni akɛshãa gbohii ji nɔ ni akɛtsu gbɔmɛi 4,500 ni gboi yɛ gbii 15 pɛ mli lɛ agbohii lɛ ahe nii, ni yɛ Western Samoa lɛ, nakai hela lɛ kpata maŋbii 38,000 lɛ ateŋ mɛi 7,500 ahiɛ.
16 Shi, jeee Spanish flu lɛ pɛ ji hela ni gbeɔ gbɔmɛi, ni “okpɔŋɔ lamulu” lɛ nɔtalɔ lɛ kɛba. New York Times lɛ bɔ amaniɛ akɛ yɛ 1915 mli lɛ, musuŋ-tsɔmɔ hela gbe asraafoi babaoo yɛ ta ni awuu kɛha Gallipoli lɛ mli, fe bɔ ni tuŋtɛi gbe. Kɛjɛ 1914 kɛbashi 1923 lɛ, shwee kɛ musuŋ-tsɔmɔ hela ni ji kolɛra lɛ gbe mɛi 3,250,000 yɛ India. Yɛ 1915 mli lɛ, awie akɛ “mɛi aaashɛ akpekpei enyɔ kɛ fa kɛmiimɔ akpekpei etɛ ni gboi” yɛ Russia lɛ agbele lɛ jɛ typhus. Ni beni okpɔŋɔnɔtalɔ lɛ yaa nɔ etaa aahu kɛbaa ŋmɛnɛŋmɛnɛ beaŋ lɛ, tsui helai kɛ kansa ebatsɔ helai ni gbeɔ mɔ fe fɛɛ, sampuu etsɔ “Tsɛŋemɔ Helai lɛ Ateŋ No. 2 ni Gbeɔ Mɔ Fe Fɛɛ” kɛ mlɛbo mli hela hu, “Hela ni Egbɛ Eshwa Je Lɛŋ Fɛɛ.”
KPƆMƆ EBƐŊKƐ!
17, 18. (a) Mɛni maŋ onukpa ko wie, ni tsɔɔ tsakpaa ni yɔɔ okpɔŋɔnɔtaralɔi ni ji enyɔ, etɛ kɛ ejwɛ lɛ teŋ? (b) Shi namɔ je lɛŋ hiɛnyiɛlɔi kuɔ amɛhiɛ amɛfɔɔ enɔ? (d) Mɛni hewɔ wɔbaanyɛ wɔna miishɛɛ yɛ nɔ ni Maŋtsɛ ni awo ehiɛ nyam lɛ baanyɛ afee lɛ he lɛ?
17 Amrɔ nɛɛ, “okpɔŋɔ kroko ni tsuɔ” lɛ, kɛ “okpɔŋɔ diŋ” lɛ kɛ “okpɔŋɔ lamulu” lɛ fɛɛ enyiɛ pɛpɛɛpɛ aahu nɔ ni fe afii 80 sɔŋŋ, ni Gbohiiaje loo Hades nyiɛ amɛsɛɛ. Lɛlɛŋ, Gbohiiaje ekpa yibii babaoo ni ji gbɔmɛi ni amɛgbe lɛ, ni amɛyifalɛ shɛɔ akpekpei ohai abɔ. Esa kadimɔ jogbaŋŋ akɛ United States tsutsu maŋ nɔkwɛlɔ Herbert Hoover kɛ nɛkɛ okpɔŋɔnɔtaralɔi etɛ nɛɛ fɛɛ tsa, ni ewie yɛ 1941 mli akɛ: “Nibii ni jɛɔ tai wuji amli baa be fɛɛ be ji hɔmɔ kɛ tsɛŋemɔ hela . . . Jeŋ Ta ni awuu afii nyɔŋmai enyɔ kɛ enumɔ nɛ lɛ kɛ hɔmɔ ba gbɔmɛi 300,000,000 nɔ. . . . Afi kɛ fa sɛɛ kɛjɛ be mli ni aje ta ni awuɔ amrɔ nɛɛ [Jeŋ Ta II] shishi nɛɛ, gbɔmɛi ni naaa niyenii amrɔ nɛɛ lɛ ayi fa fe mɛi ni naaa niyenii yɛ naagbee ta ni awuu lɛ sɛɛ afi etɛ mli lɛ kɛ nɔ ni miihe ashɛ gbɔmɛi 100,000,000.” Mɛɛ amanehulu jeŋ ta ni ji etɛ baaji kɛha adesai nɛkɛ!
18 Je lɛŋ hiɛnyiɛlɔi lɛ le hiɛkpatamɔ ni okpɔŋɔ ‘tsuru,’ kɛ ‘ediŋ’ kɛ ‘lamulu’ lɛ anɔtaralɔi lɛ kɛba. Shi kɛlɛ, amɛkuɔ amɛhiɛ amɛfɔɔ “okpɔŋɔ yɛŋ” lɛ Nɔtalɔ lɛ nɔ. Miishɛɛ gbi lɛ miibɛŋkɛ kɛha nɛkɛ Maŋtsɛ ni awo ehiɛ nyam nɛɛ ni ekɛaatsu nii ni ekɛtsake bɔ ni nibii yaa nɔ ehaa lɛ kwraa! Yɛ ta najiaŋ lɛ, ekɛ toiŋjɔlɛ baaba. Yɛ hɔmɔ najiaŋ lɛ, ebaaha niyenii babaoo aba. Yɛ hela najiaŋ lɛ, ebaaha adesai asaa amɛna gbɔmɔtsoŋ hewalɛ ni eye emuu, ni Gbohiiaje po baajie gbohii lɛ eha. Ŋmalɛ kroko ni tamɔ enɛ, ni yɔɔ Lalai lɛ amli lɛ wieɔ “okpɔŋɔ yɛŋ” lɛ nɔtalɔ lɛ he kɛ nɛkɛ wiemɔi nɛɛ, akɛ:
“Ekaalɔ, okɛ oklante aŋmɔ ohɛ, kɛ onunyam lɛ kɛ ogbojee lɛ fɛɛ! Anɔkwale kɛ mlijɔlɛ kɛ jalɛ hewɔ lɛ, jee kpo ni oba yɛ ogbojee lɛ mli, ni oninejurɔ atsɔɔo nii ni yɔɔ gbeyei!” (Lala 45:4, 5)
Maŋtsɛyeli Okpɔŋɔnɔtalɔ lɛ kunimyeli lɛ ebɛŋkɛ kpaakpa!
19. (a) Yɛ Kpojiemɔ 6:2-8 lɛ mlibaa hewɔ lɛ, ani esa akɛ wɔhao wɔhe? (b) Mɛɛ nɔkwɛmɔ nɔ ko aha ni baawo wɔ hewalɛ ni wɔhe awa yɛ hemɔkɛyeli mli?
19 No hewɔ lɛ, nyɛkahaa wɔhaoa wɔhe yakatswaa, yɛ jeŋ shihilɛ ni yaa nɔ efiteɔ daa yɛ shikpɔŋ nɛɛ nɔ lɛ hewɔ. Shi moŋ, eba akɛ wɔsusumɔ aaatamɔ Yehowa Odasefoi ateŋ mɔ kome, mɔ ni, yɛ ehemɔkɛyelii ahewɔ lɛ, eye afi 1956 kɛyashi afi 1978 lɛ amli afii 20 yɛ tsuŋwoo mli yɛ kwamaŋ nɔyeli maŋ ko mli lɛ susumɔ pɛpɛɛpɛ. Be ko po lɛ, abu lɛ gbele fɔ, ni faladokui ni ena kɛjɛ yiwaa mli piŋmɔi amli lɛ yɛ ehewolo nɔ lolo kɛbashi ŋmɛnɛ. Mɛɛ gbɛ nɔ etsɔ etee nɔ ehe wa yɛ hemɔkɛyeli mli? Efee nakai kɛtsɔ Ŋmalɛi kukuji babaoo ni ekai kɛjɛ e-Biblia mli nikasemɔ ni ekɛ ekaa efee kɛtsɔ hiɛ momo lɛ amli lɛ nɔ. Nyɛmiyoo nɛɛ wie akɛ amɛteŋ ekome ji Kpojiemɔ 6:2. Ena nɔmimaa ni mli wa akɛ akɛ “okpɔŋɔ yɛŋ” lɛ Nɔtalɔ, ni ji Maŋtsɛ Yesu Kristo eta maŋtsɛsɛi nɔ yɛ ŋwɛi yɛ 1914, ni lɛ nyɛmiyoo lɛ etswa efai shi akɛ ebaaŋmɛ etsui shi aahu kɛyashi maŋtsɛ nɛɛ “[baa]saa eye kunim” ekoŋŋ. Eba akɛ mɛi krokomɛi fɛɛ ni sɔleɔ ni Nyɔŋmɔ Maŋtsɛyeli lɛ “aba” lɛ hu baaya nɔ aye anɔkwa aahu kɛyashi Maŋtsɛ lɛ baaye kunim kwraa kɛmɔ shi!
[Akrabatsa ni yɔɔ baafa 123]
OKPƆŊƆ DIŊ LƐ MIIYA NƆ KƐ ETUUMƆ LƐ
“World Bank buɔ akɔntaa akɛ gbɔmɛi akpekpei 780 yɛ ohia futaa shihilɛ diɛŋtsɛ mli yɛ je lɛŋ fɛɛ, shihilɛ ni ‘baa shi kwraa fe bɔ ni aaanyɛ akɛ nilee atsɔɔ mli akɛ esa kɛha adesa.’ ”—Detroit “Free Press,” September 1, 1980