Yitso 14

‘Mikɛ Nyɛ Miifee Kpaŋmɔ Kɛha Maŋtsɛyeli’

 1. Mɛɛ hiɛnɔkamɔ Yesu kɛma ebɔfoi lɛ ahiɛ yɛ gbɛkɛ ni tsɔ egbele lɛ hiɛ lɛ?

YƐ GBƐKƐNAASHI dani abaagbe Yesu lɛ, ekɛɛ ebɔfoi anɔkwafoi lɛ akɛ: ‘Shihilɛ hei pii yɛ mi-Tsɛ we lɛ. Miiya ni miyasaa gbɛhe mato nyɛ, koni he ni miyɔɔ lɛ nyɛ hu nyɛhi jɛi.’ Ekɛɛ amɛ kɛfata he akɛ: “Mikɛ nyɛ miifee kpaŋmɔ, tamɔ bɔ ni mi-Tsɛ kɛ mi efee kpaŋmɔ lɛ, kɛha maŋtsɛyeli.” (Yoh. 14:2, 3; Luka 22:29, NW) Mɛɛ hiɛnɔkamɔ ni yɔɔ miishɛɛ ekɛma amɛhiɛ nɛkɛ!

 2. Mɛi enyiɛ baafata Kristo he yɛ eŋwɛi Maŋtsɛyeli lɛ mli?

² Shi, Yesu etsɔɔɔ akɛ bɔfoi nɛɛ pɛ ji mɛi ni baafata ehe kɛye maŋtsɛ yɛ eŋwɛi Maŋtsɛyeli lɛ mli. Aha ale yɛ sɛɛ mli akɛ mɛi 144,000 ni ahe amɛ kɛjɛ shikpɔŋ lɛ nɔ baana nakai hegbɛ ni yɔɔ nyam lɛ mli gbɛfaŋnɔ. (Kpoj. 5:9, 10; 14:1, 4) Ani mɛi komɛi miibɔ mɔdɛŋ ŋmɛnɛ ni amɛnine ashɛ enɛ nɔ?

MAŊTSƐYELI NIYELƆI LƐ ANAABUAMƆ

 3. Yesu gbala jwɛŋmɔ kɛba mɛɛ hegbɛ nɔ yɛ emaŋ sɔɔmɔ lɛ mli?

³ Beni Herode Antipa wo Yohane Baptisilɔ lɛ tsuŋ lɛ, Yesu wó emaŋshiɛmɔ nitsumɔ lɛ he tafaa lɛ nɔ ni egbala jwɛŋmɔ kɛba “ŋwɛi maŋtsɛyeli lɛ” nɔ. (Mat. 4:12, 17) Eha gbɔmɛi le akɛ amɛbaanyɛ amɛna hegbɛ amɛbote nakai Maŋtsɛyeli lɛ mli, ni ekaselɔi lɛ bɔ mɔdɛŋ koni amɛshɛ nakai nyɔmɔwoo lɛ he.—Mat. 5:3, 10, 20; 7:21; 11:12.

 4. (a) Mɛɛ be akɛ mumɔ krɔŋkrɔŋ lɛ fɔ Yesu kaselɔi lɛ ateŋ klɛŋklɛŋ bii lɛ mu? (b) Mɛni tsɔɔ akɛ aagbala jwɛŋmɔ kɛmiiba Maŋtsɛyeli niyelɔi lɛ anaabuamɔ nɔ kɛjɛ nakai be lɛ mli?

⁴ Akɛ mumɔ krɔŋkrɔŋ fɔ amɛteŋ klɛŋklɛŋbii lɛ mu yɛ Pentekoste yɛ afi 33 Ŋ.B. (Bɔf. 2:1-4; 2 Kor. 1:21, 22) Aha ale gbɛjianɔ ni Nyɔŋmɔ eto kɛha yiwalaheremɔ ni kɛ mɔ yaa ŋwɛi wala ni gbele bɛ mli lɛ mli lɛ. Petro kɛ “ŋwɛi maŋtsɛyeli lɛ naa samfei” lɛ tsu nii ni ekɛgbele nɛkɛ nilee nɛɛ naa—kɛha Yudafoi lɛ klɛŋklɛŋ, kɛ agbɛnɛ Samariabii lɛ, no sɛɛ lɛ Jeŋmajiaŋbii lɛ hu. (Mat. 16:19) Aagbala jwɛŋmɔ kɛmiiba mɛi ni feɔ nɔyeli ni baaye adesa nɔ afii 1,000 lɛ nɔ titri, ni etamɔ nɔ ni Kristofoi a-Hela Ŋmalɛi lɛ amli woji ni ajɛ mumɔ mli aŋmala lɛ fɛɛ gbalaa jwɛŋmɔ kɛbaa nɛkɛ Maŋtsɛyeli niyelɔi akuu nɛɛ anɔ titri—“krɔŋkrɔŋbii lɛ,” “ni ena ŋwɛi tsɛmɔ lɛ eko” lɛ.a

 5. Ani Nyɔŋmɔ tsuji kpakpai ni amɛji fe mɛi ni etsɔ amɛhiɛ lɛ hewɔ atsɛɔ amɛ ahaa ŋwɛi wala lɛ?

⁵ Amɛtsɛmɔ kɛmiiya ŋwɛi wala mli nɛɛ etsɔɔɔ akɛ amɛhi fe Nyɔŋmɔ tsuji krokomɛi fɛɛ ni gboi dani Pentekoste afi 33 Ŋ.B. shɛ lɛ. (Mat. 11:11) Shi moŋ, amrɔ nɛɛ Yehowa eje shishi eehala mɛi ni baafee nanemɛi nɔyelɔi kɛ Yesu Kristo lɛ. Yɛ enɛ sɛɛ aaafee afii ohai 19 lɛ, tsɛmɔ kome too pɛ ni ji ŋwɛi nɔ lɛ hi shi. Enɛ ji Nyɔŋmɔ mlihilɛ ni wɔsaaa lɛ ni ejie lɛ kpo etsɔɔ mɛi fioo ko, yɛ enilee kɛ eyiŋtoo ni suɔmɔ yɔɔ mli lɛ he nitsumɔ mli.—Efes. 2:8-10.

 6. (a) Mɛni hewɔ be ni ŋwɛi tsɛmɔ lɛ kɛbaaba naagbee baaba lɛ? (b) Namɔ baakudɔ saji bɔni afee ni gbalɛ ni kɔɔ “asafo babaoo” lɛ he lɛ hu aba mli, ni mɛni eba diɛŋtsɛ?

⁶ Yɛ be ni sa mli lɛ yibɔ ni ji 144,000 ni aje he husu nɛɛ baashɛ. Mumɔŋ Israelbii ni akpɛlɛ amɛnɔ nɛɛ anaasɔomɔ lɛ baaba naagbee. (Kpoj. 7:1-8) Kɛkɛ lɛ Yehowa baatsɔ emumɔ lɛ kɛ e-Wiemɔ ni ekɛha egbɛjianɔtoo ni anaa lɛ shishinumɔ nɔ akudɔ saji bɔni afee ni eha eyiŋtoo lɛ fa ni awie he yɛ Kpojiemɔ 7:9-17 lɛ aba mli. Abaabua “asafo babaoo” ko naa kɛjɛ jeŋmaji fɛɛ mli, kɛ hiɛnɔkamɔ ni yɔɔ miishɛɛ akɛ abaabaa amɛyi kɛtsɔ amanehulu kpeteŋkpele lɛ mli ni amɛhi shi kɛya naanɔ yɛ emuuyeli mli yɛ shikpɔŋ nɔ Paradeiso lɛ mli. Kɛ wɔsusu nɔ ni eba mli diɛŋtsɛ nɛɛ he lɛ, eka shi faŋŋ akɛ ŋwɛi tsɛmɔ lɛ ba naagbee kwraa yɛ aaafee afi 1935 Ŋ.B. beni “asafo babaoo” lɛ shikpɔŋ nɔ hiɛnɔkamɔ nɛɛ bafee faŋŋ lɛ. Kɛjɛ no sɛɛ lɛ, akɛ Yehowa jalɔi akpekpei abɔ ni hiɛ ka shihilɛ kɛmiiya naanɔ yɛ shikpɔŋ nɔ yɛ biɛ nɔ lɛ miifata ŋwɛi kuu lɛ ateŋ shwɛɛnii akpei fioo lɛ ahe.

 7. Ani eeenyɛ eba akɛ mɛi komɛi yɛ ŋmɛnɛ po ni amɛbaanyɛ amɛna ŋwɛi tsɛmɔ lɛ, ni mɛni hewɔ ohaa hetoo nakai?

⁷ Ani enɛ tsɔɔ akɛ mɔ ko bɛ amrɔ nɛɛ ni Nyɔŋmɔ tsɛɔ lɛ kɛhaa ŋwɛi wala lɛ? Eeenyɛ eba mli akɛ mɛi ni hiɛ nakai hiɛnɔkamɔ lɛ ateŋ mɛi fioo ko yeŋ anɔkwale ni ebaabi ni ahala mɛi krokomɛi ato amɛnajiaŋ kɛyashi beni amɛnaasɔomɔ lɛ baaba naagbee kwraa. Shi etamɔ nɔ ni shishinumɔ yɛ he akɛ enɛ efɔŋ kaa.

MUMƆŊ BII—TE AMƐFEƆ TƐŊŊ AMƐLEƆ?

 8. Mɛɛ sane naatsɔɔmɔ Paulo kɛha ni tsɔɔ bɔ ni mɛi ni akɛ mumɔ krɔŋkrɔŋ lɛ efɔ amɛ lɛ le anɔkwale ni enɛ ji lɛ?

⁸ Nyɔŋmɔ mumɔ lɛ maa nɔ mi akɛ aŋɔ Kristofoi ni abaptisi amɛ ni amɛna ŋwɛi tsɛmɔ lɛ akɛ mumɔŋ bii. Bɔfo Paulo tsɔɔ enɛ mli beni eŋma wolo eyaha “krɔŋkrɔŋ bii” ni yɔɔ Roma lɛ, ni ewie bɔ ni shihilɛ lɛ ji yɛ anɔkwa Kristofoi fɛɛ he yɛ nakai be lɛ mli lɛ he. Ekɛɛ: “Ejaakɛ mɛi abɔ ni Nyɔŋmɔ mumɔ lɛ kpalaa amɛ lɛ, amɛ amɛji Nyɔŋmɔ bii. Ejaakɛ jeee nyɔŋyeli mumɔ nyɛna ni nyɛsaa nyɛaashe gbeyei, shi moŋ nyɛna biiatsɔmɔ mumɔ, mɔ mli ni wɔbolɔɔ yɛ akɛ: ‘Aba, Ataa!’ lɛ. Lɛ mumɔ lɛ diɛŋtsɛ kɛ wɔmumɔ lɛ yeɔ odase akɛ Nyɔŋmɔ bii ji wɔ. Ni kɛ bii ji wɔ lɛ, belɛ, niyelɔi hu ji wɔ, Nyɔŋmɔ kɛ Kristo nanemɛi niyelɔi, kɛji eyɛ mli akɛ wɔkɛ lɛ naa amanehulu lɛ, koni awo wɔkɛ lɛ hiɛ nyam hu.”—Rom. 1:7; 8:14-17.

 9. ‘Lɛ mumɔ lɛ diɛŋtsɛ’ kɛ mɛi ni ji Nyɔŋmɔ bii diɛŋtsɛ lɛ amumɔ lɛ yeɔ “odase” yɛ mɛɛ gbɛ nɔ?

⁹ Agbala jwɛŋmɔ kɛba wiemɔ “mumɔ” ni akɛtsu nii shii enyɔ yɛ biɛ lɛ nɔ: “mumɔ lɛ diɛŋtsɛ” kɛ “wɔmumɔ.” Klɛŋklɛŋ nɔ lɛ ji Nyɔŋmɔ nitsumɔ hewalɛ ni anaaa lɛ. Ekanyaa hemɔkɛyeli yɛ emumɔŋ bii lɛ amli akɛ mɛi ni etsɔmɔ Nyɔŋmɔ bii ni yɔɔ heyeli. Nakai mumɔ lɛ hu yeɔ odase kɛtsɔɔ Nyɔŋmɔ Wiemɔ ni jɛ mumɔŋ ni ji Biblia lɛ ni tamɔ wolo ni eŋma eha emumɔŋ bii lɛ nɔ. (1 Pet. 1:10-12) Kɛ mɛi ni akɛ mumɔ krɔŋkrɔŋ lɛ efɔ amɛ lɛ kane nɔ ni Ŋmalɛi lɛ wieɔ etsɔɔ mɛi ni ji Nyɔŋmɔ mumɔŋ bii lɛ, amɛhereɔ nɔ yɛ gbɛ ni ja nɔ akɛ: ‘Enɛ kɔɔ mihe.’ No hewɔ lɛ, Nyɔŋmɔ diɛŋtsɛ nitsumɔ hewalɛ lɛ kɛ amɛmumɔ ni ji hewalɛ ni kanyaa amɛjwɛŋmɔ kɛ amɛtsuii diɛŋtsɛ lɛ yeɔ odase yɛ gbɛi sɔrɔtoi anɔ akɛ amɛji Nyɔŋmɔ bii. No hewɔ lɛ, yɛ nɔ ni Nyɔŋmɔ mumɔ lɛ tsɔɔ lɛ kɛ gbeekpamɔ naa lɛ, amɛjwɛŋmɔ kɛ amɛtsuii fɛɛ bakaa hiɛnɔkamɔ ni amɛyɔɔ akɛ Kristo hefatalɔi niyelɔi lɛ nɔ, ni amɛkpɛlɛɔ gbɛnaa nii ni ka amɛnɔ akɛ Nyɔŋmɔ mumɔŋ bii lɛ nɔ.—Fil. 3:13, 14.

10. (a) Mɛni nibii etsɔɔɔ akɛ mɔ ko ji Kristofoi ni afɔ amɛ mu lɛ ateŋ mɔ kome? (b) Mɛɛ jwɛŋmɔ “tooi krokomɛi” lɛ hiɛ yɛ amɛshidaamɔ yɛ Nyɔŋmɔ yiŋtoo mli lɛ he?

¹⁰ Ani enɛ ji anɔkwale yɛ ohe? Kɛ nakai lɛ, belɛ oyɛ hegbɛ fɛfɛo. Shi ebaafee tɔmɔ akɛ mɔ ko aaasusu akɛ akɛni mɔ ko yɔɔ hiɛsɔɔ babaoo kɛha mumɔŋ nibii ni mli kwɔlɔ aloo eyɛ ekaa yɛ shiɛmɔ nitsumɔ lɛ mli aloo eyɛ suɔmɔ ni mli wa kɛha enyɛmimɛi hewɔ lɛ esa akɛ efee Kristofonyo ni akɛ mumɔ efɔ lɛ mu. “Tooi krokomɛi” lɛ ateŋ mɛi pii hiɛ nɛkɛ sui nɛɛ. Nɔ ni amɛkaneɔ yɛ Ŋmalɛi lɛ amli ni kɔɔ Kristo nanemɛi niyelɔi lɛ ahe lɛ hu tsirɛɔ amɛtsui, shi amɛkɛ henɔwomɔ epeleee nɔ ni Nyɔŋmɔ kɛhako amɛ lɛ amɛhaaa amɛhe. (Okɛto 4 Mose 16:1-40 he.) Amɛle Nyɔŋmɔ shishijee yiŋtoo kɛha shikpɔŋ lɛ ni amɛkɛ hiɛsɔɔ tsuɔ nii bɔni afee ni amɛnine ashɛ no nɔ.

EYELI YƐ GBƐ NI SA NƆ

11. Namɛi baa daa afi Yesu gbele lɛ Kaimɔ lɛ shishi, ni mɛni hewɔ?

¹¹ Daa afi yɛ Nisan 14 beni hulu enyɔ shi sɛɛ lɛ, Yesu Kristo sɛɛnyiɛlɔi ni afɔ amɛ mu ni yɔɔ shikpɔŋ nɔ he fɛɛ he lɛ kaiɔ egbele lɛ, yɛ famɔ ni ekɛha ebɔfoi lɛ he nitsumɔ mli. (Luka 22:19, 20) “Tooi krokomɛi” lɛ hu baa nifeemɔ nɛɛ shishi, ni jeee kɛha aboloo kɛ wein lɛ yeli shi moŋ, akɛ nikwɛlɔi ni yɔɔ bulɛ.

12. Yɛ mɛɛ gbɛ nɔ mra be mli Kristofoi ni yɔɔ Korinto lɛ ateŋ mɛi komɛi ejieee hiɛsɔɔ ni sa kpo amɛtsɔɔɔ Nuŋtsɔ lɛ Gbɛkɛnaashi Niyenii lɛ?

¹² Enɛ jeee jamɔŋ nifeemɔ folo ko, shi moŋ ehiɛ shishinumɔ krɛdɛɛ ko. Bɔfo Paulo ŋma ŋaawoo wiemɔ ko ni hiɛdɔɔ yɔɔ mli eyaha klɛŋklɛŋ afii oha lɛ mli Kristofoi ni yɔɔ Korinto yɛ Hela, ni amɛteŋ mɛi komɛi ejieee bulɛ kpo amɛtsɔɔɔ nifeemɔ nɛɛ lɛ akɛ: “Mɔ fɛɛ mɔ ni yeɔ nɛkɛ aboloo nɛɛ ni enuɔ Nuŋtsɔ lɛ kpulu lɛ bɔ ni esaaa lɛ, eetɔ̃ Nuŋtsɔ lɛ gbɔmɔtso lɛ kɛ ela lɛ nɔ.” Mɛni haa amɛbafeɔ mɛi ni yeɔ lɛ ‘bɔ ni esaaa lɛ’? Amɛsaaa amɛhe jogbaŋŋ amɛhaaa enɛ yɛ amɛtsui kɛ amɛjwɛŋmɔ mli. Mligbalamɔi yɛ asafo lɛ mli. Agbɛnɛ mɛi komɛi hu yeɔ nii ni amɛnuɔ dãa babaoo dani kpee nɛɛ jeɔ shishi. Amɛbuuu Nuŋtsɔ lɛ Gbɛkɛnaashi Niyenii lɛ bɔ ni sa. Amɛnyɛɛɛ amɛyɔse hiɛdɔɔ ni yɔɔ nɔ ni aboloo lɛ kɛ wein lɛ feɔ he okadi lɛ mli.—1 Kor. 11:17-34.

13. Aboloo lɛ kɛ wein lɛ ni akɛhaa yɛ Kaimɔ lɛ shishi lɛ tsɔɔ mɛni?

¹³ Mɛni he okadi enɛ feɔ? Enɛ jeee naakpɛɛ gbɛ ni atsɔɔ nɔ atsakeɔ aboloo lɛ kɛ wein nɛɛ hiɛ. Akɛ Kristo eshaaa afɔle ekoŋŋ yɛ shishinumɔ ko naa yɛ Kaimɔ fɛɛ Kaimɔ ni ayeɔ lɛ shishi. Ŋmalɛ lɛ kɛɔ akɛ “aŋɔ lɛ [Kristo] aha shikome, koni etere mɛi pii ahe eshai kɛya.” (Heb. 9:28; 10:10; Rom. 6:9) Akpiti aboloo lɛ kɛ wein tsuru lɛ ji okadi nibii kɛkɛ ni akɛdamɔɔ shi ahaa Yesu gbɔmɔtso lɛ diɛŋtsɛ ni akɛsha afɔle lɛ kɛ ela ni afɔse ashwie shi lɛ diɛŋtsɛ. Shi kwɛ bɔ ni nibii kpakpai ni amɛdamɔ shi kɛha lɛ jara wa ha! Akɛ Yesu gbɔmɔtso ni esha ko bɛ mli nɛɛ ha bɔni afee ni adesai aje lɛ ana hegbɛ ni amɛhi shi kɛya naanɔ. (Yoh. 6:51) Ni ela ni afɔse ashwie shi nɛɛ tsuɔ yiŋtoi enyɔ he nii—etsuuɔ adesai ni naa enɛ mli hemɔkɛyeli lɛ ahe kɛjɛɔ amɛhe eshai amli, ni ehaa kpaŋmɔ hee ni ka Nyɔŋmɔ kɛ mumɔŋ Israel asafo ni Kristofoi ni akɛ mumɔ efɔ amɛ mu yɔɔ mli lɛ teŋ lɛ tsuɔ nii. (1 Yoh. 1:7; 1 Kor. 11:25; Gal. 6:14-16) Nɛkɛ gbɛjianɔtoi ni he yɔɔ sɛɛnamɔ babaoo nɛɛ ji nɔ ni ha Nyɔŋmɔ bu “asafoku bibioo” lɛ mli bii lɛ jalɔi ni akɛ adesa emuuyeli duro amɛ lɛ. (Luka 12:32) Afee enɛ bɔni afee ni mumɔ krɔŋkrɔŋ lɛ ahe amɛ akɛ Nyɔŋmɔ bii ni hiɛnɔkamɔ ji akɛ amɛkɛ Kristo baana gbɛfaŋnɔ yɛ eŋwɛi Maŋtsɛyeli lɛ mli. Beni amɛyeɔ Kaimɔ lɛ shishi niyenii nɛɛ daa afi ni amɛkɛyeɔ amɛŋwɛi hiɛnɔkamɔ lɛ he odase lɛ, hiɛsɔɔ ni amɛyɔɔ akɛ, amɛji “kpaŋmɔ hee” ni Kristo damɔ mli lɛ mlibii lɛ tsɔɔ ehee ni emli kwɔɔ.—Heb. 8:6-12.

“WƆKƐ NYƐ AAATEE”

14. (a) Mɛni hewɔ “tooi krokomɛi” lɛ yeee Kaimɔ niyenii lɛ, shi mɛni amɛkɛ hehiamɔ kpaa gbɛ? (b) Te amɛbuɔ naanyobɔɔ ni ka amɛkɛ Maŋtsɛyeli niyelɔi shwɛɛnii lɛ ateŋ lɛ amɛhaa tɛŋŋ?

¹⁴ “Tooi krokomɛi” lɛ ena bɔ ni Yehowa kɛ ebii ni efɔ amɛ mu lɛ tsuɔ nii ehaa lɛ, ni amɛkɛ amɛhe ebabɔ amɛhe ni amɛkɛɔ akɛ: “Wɔkɛ nyɛ aaatee; ejaakɛ wɔnu akɛ Nyɔŋmɔ kɛ nyɛ yɛ!” (Zak. 8:20-23) Jeee kpee pɛ amɛkɛ amɛ kpeɔ kutuu, shi moŋ amɛ fɛɛ amɛshiɛɔ Maŋtsɛyeli lɛ he sanekpakpa lɛ yɛ shikpɔŋ lɛ nɔ he fɛɛ he. Shi, akɛni “tooi krokomɛi” lɛ fataaa “kpaŋmɔ hee” ni akɛ mumɔŋ Israel fee lɛ he ni asaŋ amɛbɛ “kpaŋmɔ . . . kɛha maŋtsɛyeli” ni Yesu kɛ mɛi ni ahala ni amɛfata ehe yɛ ŋwɛi wala mli lɛ fee lɛ mli hewɔ, eja gbɛ jogbaŋŋ akɛ, amɛyeee Kaimɔ lɛ shishi niyenii lɛ eko. (Luka 22:20, 29) Shi beni “kpaŋmɔ hee” lɛ tsuɔ eyiŋtoo he nii egbeɔ naa, ni abuaa “asafoku bibioo” lɛ mli naagbee bii lɛ anaa kɛhaa ŋwɛi Maŋtsɛyeli lɛ, “tooi krokomɛi” lɛ yɔseɔ akɛ enɛ tsɔɔ akɛ jɔɔmɔi ni amɛbaana yɛ shikpɔŋ nɔ kɛtsɔ nakai Maŋtsɛyeli lɛ nɔ lɛ ebɛŋkɛ. Amɛbuɔ enɛ akɛ hegbɛ ni amɛna, yɛ “naagbee gbii” nɛɛ amli, ni amɛkɛ Maŋtsɛyeli lɛ niyelɔi lɛ ateŋ shwɛɛnii anɔkwafoi lɛ asɔmɔ yɛ ekomefeemɔ mli.

[Shishigbɛ niŋmaa]

Sanegbaa Ni Akɛtiɔ Mli

● Mɛni hewɔ Kristofoi a-Hela Ŋmalɛi lɛ pii gbalaa jwɛŋmɔ kɛyaa ŋwɛi hiɛnɔkamɔ nɔ lɛ?

● Te mɛi ni ahe amɛ akɛ Nyɔŋmɔ bii lɛ feɔ tɛŋŋ amɛleɔ enɛ? Mɛni ji Kaimɔ lɛ shishi niyenii lɛ ni amɛyeɔ lɛ shishi?

● Mɛɛ gbɛ nɔ “tooi krokomɛi” lɛ tsɔɔ amɛjieɔ amɛhe kpo akɛ mɛi ni kɛ “asafoku bibioo” lɛ feɔ ekome yɛ anɔkwale mli?