Yitso 24
Ŋɔɔmɔ kɛ Joomɔ Shɛɛ Sane
Ninaa 6—Kpojiemɔ 10:1–11:19
Saneyitso: Wolo bibioo lɛ he ninaa; sɔlemɔwe niiashikpamɔi; tɛtrɛmaŋtɛrɛ ni ji kpawo lɛ kpamɔ
Emlibaa be: Kɛjɛ be mli ni akɛ Yesu ta maŋtsɛsɛi nɔ yɛ 1914 kɛyashi amanehulu kpeteŋkpele be lɛ mli
1, 2. (a) Mɛni jɛ kpoo ni ji enyɔ lɛ mli ba, ni mɛɛ be mli abaajaje akɛ nɛkɛ kpoo nɛɛ eho? (b) Namɔ Yohane na agbɛnɛ akɛ eekpeleke shi kɛmiijɛ ŋwɛi?
KPOO ni ji enyɔ lɛ ekpata nii ahiɛ diɛŋtsɛ. Ehao Kristendom kɛ ehiɛnyiɛlɔi lɛ, “gbɔmɛi amlijai etɛ mli ekome” ni akpaa amɛhe mama akɛ amɛgboi yɛ mumɔŋ lɛ. (Kpojiemɔ 9:15) Yohane baanyɛ asusu eyiŋ yɛ nɔ ni kpoo ni ji etɛ lɛ kɛaaba yɛ enɛ sɛɛ lɛ he. Shi mɛɛ! Kpoo ni ji enyɔ lɛ bako naagbee—ja wɔtee kɛyashɛ Kpojiemɔ 11:14 da. Dani wɔɔshɛ no he lɛ, Yohane baaye saji ni tsake ni lɛ diɛŋtsɛ lɛ enaa mli gbɛfaŋnɔ babaoo lɛ he odase. Ejeɔ shishi kɛ ninaa ko ni yɔɔ naakpɛɛ:
2 “Ni mina bɔfo kroko ni he wa jɛ ŋwɛi miikpeleke shi, ni eha atatu, ni kwaabuɛtɛ yɛ eyiteŋ, ni ehiɛ tamɔ hulu, ni enaji tamɔ la akulashiŋi.”—Kpojiemɔ 10:1.
3. (a) Namɔ ji “bɔfo ni he wa” lɛ? (b) Kwaabuɛtɛ ni yɔɔ eyiteŋ lɛ tsɔɔ mɛni?
3 Namɔ ji “bɔfo . . . ni he wa” nɛɛ? Eka shi faŋŋ akɛ lɛ ji Yesu Kristo ni awo ehiɛ nyam lɛ yɛ nitsumɔ kroko mli. Ekɛ atatu ni haaa ana lɛ lɛ eha ehe, ni enɛ kaiɔ wɔ wiemɔi komɛi ni Yohane etsɔ hiɛ ewie yɛ Yesu he lɛ: “Naa, eeba kɛ atatui lɛ, ni hiŋmɛi fɛɛ hiŋmɛi aaana lɛ kɛ mɛi ni tsurɔ lɛ nii lɛ hu.” (Kpojiemɔ 1:7; okɛto Mateo 17:2-5 he.) Kwaabuɛtɛ ni yɔɔ eyiteŋ lɛ kaiɔ wɔ Yohane ninaa ko ni tsɔ hiɛ ni kɔɔ Yehowa maŋtsɛsɛi lɛ he lɛ, “ni kwaabuɛtɛ bɔle maŋtsɛsɛi lɛ he, ni kɛ akwɛ lɛ, etamɔ smaragde tɛ” lɛ. (Kpojiemɔ 4:3; okɛto Ezekiel 1:28 he.) Nakai kwaabuɛtɛ lɛ damɔ shi kɛha dioofeemɔ kɛ toiŋjɔlɛ ni ebɔle Nyɔŋmɔ maŋtsɛsɛi lɛ he lɛ. Yɛ nakai gbɛ nɔ nɔŋŋ lɛ, nɛkɛ kwaabuɛtɛ ni yɔɔ bɔfo lɛ yiteŋ lɛ baaha ayoo lɛ akɛ toiŋjɔlɛ bɔfo krɛdɛɛ ko, Yehowa “Toiŋjɔlɛ Lumɔ” ni agba ehe sane afɔ shi lɛ.—Yesaia 9:5, 6.
4. Mɛni enɛ tsɔɔ (a) bɔfo ni he wa lɛ “hiɛ [ni] tamɔ hulu” lɛ? (b) bɔfo lɛ najiaŋshi ni “tamɔ la akulashiŋi” lɛ?
4 Ŋwɛibɔfo ni he wa lɛ hiɛ “tamɔ hulu.” Mra mli yɛ eninaa ni kɔɔ Yesu he yɛ ŋwɛi sɔlemɔtsu lɛ mli lɛ, Yohane na akɛ Yesu hiɛ “tamɔ hulu ni tsoɔ waa.” (Kpojiemɔ 1:16) Yesu, akɛ “jalɛ hulu” lɛ kpɛɔ kɛ tsamɔ yɛ efiji ashishi koni ehe aba sɛɛnamɔ aha mɛi ni sheɔ Yehowa gbɛi lɛ gbeyei lɛ. (Maleaki 4:2) Jeee ehiɛ pɛ shi moŋ nɛkɛ bɔfo nɛɛ najiaŋshi hu yɛ nyam, “tamɔ la akulashiŋi.” Eshidaamɔ ni yɔɔ shiŋŋ lɛ tamɔ Mɔ ni Yehowa ‘eŋɔ ŋwɛi kɛ shikpɔŋ nɔ hegbɛ fɛɛ eha lɛ.’—Mateo 28:18; Kpojiemɔ 1:14, 15.
5. Mɛni Yohane na yɛ bɔfo ni he wa lɛ dɛŋ?
5 Yohane miikwɛ lolo: “Ni ehiɛ wolo bibioo ko ni agbele naa yɛ edɛŋ; ni ekɛ enanejurɔ ma ŋshɔ nɔ, ni ekɛ enane abɛku hu ma shikpɔŋ nɔ.” (Kpojiemɔ 10:2) Wolo kpo kroko? Hɛɛ, shi asɔoko naa yɛ biɛ. Akɛni wɔkɛ Yohane yɔɔ hewɔ lɛ, wɔbaakpa gbɛ akɛ etsɛŋ ni wɔbaana emli saji ni yɔɔ miishɛɛ lɛ. Shi klɛŋklɛŋ lɛ, ahaa wɔleɔ nɔ ni baanyiɛ sɛɛ aba lɛ.
6. (a) Mɛni hewɔ esa akɛ Yesu naji aaamamɔ shikpɔŋ kɛ ŋshɔ nɔ lɛ? (b) Mɛɛ be mli Lala 8:5-8 ba mli kwraa kɛgbe naa?
6 Nyɛhaa wɔyaa bɔ ni atsɔɔ akɛ Yesu ji lɛ he ekoŋŋ. Enaji ni tamɔ la lɛ ma shikpɔŋ kɛ ŋshɔ nɔ, he ni eyeɔ nɔ kɛ hewalɛ fɛɛ yɛ bianɛ lɛ. Etamɔ bɔ pɛ ni ajaje yɛ gbalɛ lalai lɛ amli lɛ: “Bo [Yehowa] otee nɔ ofee [Yesu] lɛ akɛ mɛi ni baa shi fe mɛi ni tamɔ nyɔŋmɔi lɛ, ni okɛ anunyam kɛ agbojee efi lɛ akekere. Oha eye oninenaa nitsumɔi lɛ anɔ; okɛ nɔ fɛɛ nɔ eto enajiashi: toi kɛ tsinai, amɛ fɛɛ, ŋa nɔ kooloi, ŋwɛi loofɔji kɛ ŋshɔ mli looi, nɔ fɛɛ nɔ ni hoɔ yɛ ŋshɔ mli gbɛi lɛ anɔ lɛ.” (Lala 8:5-8, New World Translation; kwɛmɔ Hebribii 2:5-9 hu.) Nɛkɛ lala nɛɛ ba mli kwraa yɛ 1914, beni awo Yesu akɛ Nyɔŋmɔ Maŋtsɛyeli lɛ nɔ Maŋtsɛ ni naagbee be lɛ je shishi lɛ. No hewɔ lɛ, nɔ ni Yohane naa yɛ biɛ yɛ ninaa mli lɛ mlibaa jeɔ shishi kɛjɛɔ nakai afi lɛ nɔ.—Lala 110:1-6; Bɔfoi lɛ Asaji 2:34-36; Daniel 12:4.
Nugbɔshiimɔi Kpawo Lɛ
7. Bɔfo ni he wa lɛ bo yɛ mɛɛ gbɛ nɔ, ni mɛni ebolɔmɔ lɛ tsɔɔ?
7 Bɔfo nɛɛ diɛŋtsɛ fo bɔ ni Yohane susuɔ nɛkɛ bɔfo ni he wa nɛɛ he lɛ mli: “Ni [bɔfo lɛ] ebo kɛ gbee waa, taakɛ jata boɔ; ni beni eboɔ lɛ, nugbɔshiimɔi kpawo lɛ wo amɛgbeei.” (Kpojiemɔ 10:3) Bolɔmɔ ni naa wa ni tamɔ nɛkɛ baagbala Yohane jwɛŋmɔ, ni ema nɔ mi diɛŋtsɛ akɛ Yesu ji “Jata lɛ ni jɛ Yuda akutso lɛ mli lɛ.” (Kpojiemɔ 5:5) Yohane baale hu akɛ yɛ bei komɛi amli lɛ akɛɔ akɛ Yehowa “huuɔ.” Bɔ ni Yehowa huuɔ yɛ gbalɛ naa lɛ tsɔɔ mumɔŋ Israel naabuamɔ ekoŋŋ kɛ “Yehowa gbi” ni kɛ hiɛkpatamɔ baa lɛ ni miiba. (Hoshea 11:10; Yoel 4:14, 16; Amos 1:2; 3:7, 8) Belɛ eyɛ faŋŋ akɛ, nɛkɛ bɔfo ni he wa nɛɛ bolɔmɔ ni tamɔ jata ni huuɔ lɛ tsɔɔ nibii wuji ni tamɔ nakai nɔŋŋ ni baaba aha ŋshɔ kɛ shikpɔŋ lɛ. Etsɛɔ nugbɔshiimɔi kpawo lɛ ni amɛwie.
8. Mɛni ji ‘nugbɔshiimɔi kpawo lɛ agbee’ lɛ?
8 Yohane etsɔ hiɛ enu nugbɔshiimɔi ni jeɔ kpo kɛjɛɔ Yehowa maŋtsɛsɛi lɛ mli diɛŋtsɛ lɛ he. (Kpojiemɔ 4:5) Mra mli yɛ David gbii lɛ amli lɛ, afɔɔ nugbɔshiimɔi diɛŋtsɛ ahe wiemɔ akɛ “Yehowa gbee.” (Lala 29:3) Beni Yehowa diɛŋtsɛ wie ni anu bɔ ni ejaje eyiŋtoo akɛ eeewo lɛ diɛŋtsɛ egbɛi lɛ hiɛ nyam yɛ Yesu shikpɔŋ nɔ sɔɔmɔ nitsumɔ gbii lɛ amli lɛ, kɛha mɛi pii lɛ egbɛɛmɔ tamɔ nugbɔshiimɔ. (Yohane 12:28, 29) No hewɔ lɛ, shishinumɔ yɛ mli akɛ aaamu sane naa akɛ ‘nugbɔshiimɔi kpawo lɛ agbee’ lɛ ji Yehowa diɛŋtsɛ yiŋtoi lɛ ahe wiemɔ. Anɔkwale ni eji akɛ nugbɔshiimɔi “kpawo” yɔɔ lɛ tsɔɔ akɛ nɔ ni Yohane na lɛ yeɔ emuu.
9. Mɛni gbee ko ni jɛ ŋwɛi lɛ fa akɛ afee?
9 Shi bo toi! Gbee kroko jije. Ekɛ famɔ ko ni tamɔ nɔ ni yɔɔ naakpɛɛ kɛha Yohane ha: “Ni beni nugbɔshiimɔi kpawo lɛ wo amɛgbee lɛ, kulɛ miihe maŋma; ni minu gbee ni jɛ ŋwɛi miikɛɛ mi akɛ: Sɔomɔ nii ni nugbɔshiimɔi kpawo lɛ wie lɛ anaa, ni okaŋma.” (Kpojiemɔ 10:4) Kulɛ Yohane he miitswa shi ni enu ni eŋma nakai nugbɔshiimɔi wiemɔi lɛ, taakɛ bɔ ni Yohane kuu lɛ ni yɔɔ ŋmɛnɛ lɛ kɛ hehiamɔ emɛ koni Yehowa ajie eŋwɛi yiŋtoi akpo koni aŋmala lɛ. Nɛkɛ kpojiemɔi nɛɛ baa yɛ be ni Yehowa eto lɛ mli pɛ.—Luka 12:42; kwɛmɔ Daniel 12:8, 9 hu.
Teemɔŋ Sane Krɔŋkrɔŋ lɛ Naagbee
10. Namɔ bɔfo ni he wa lɛ ka lɛ kita, ni mɛni ejaje etsɔɔ?
10 Beni enɛ yaa nɔ lɛ, Yehowa yɛ nitsumɔ kroko kɛha Yohane. Beni nugbɔshiimɔi kpawo lɛ jije lɛ, bɔfo ni he wa lɛ wie ekoŋŋ: “Ni bɔfo lɛ ni mina akɛ edamɔ ŋshɔ lɛ nɔ kɛ shikpɔŋ lɛ nɔ lɛ wo eninejurɔ nɔ kɛtee ŋwɛi, ni etsɛ mɔ ni hiɛ ka kɛjɛ naanɔ kɛyaa naanɔ ni bɔ ŋwɛi kɛ nii ni yɔɔ mli lɛ kɛ shikpɔŋ kɛ nii ni yɔɔ mli kɛ ŋshɔ kɛ nii ni yɔɔ mli lɛ ni ekɛka kita akɛ shishashaomɔ ko bɛ dɔŋŋ.” (Kpojiemɔ 10:5, 6, New World Translation) Namɔ bɔfo ni he wa lɛ tsɛ lɛ ekɛka kita lɛ? Yesu ni awo ehiɛ nyam lɛ ka kita, jeee lɛ diɛŋtsɛ ehe kita eka, shi Hegbɛ ni kwɔ fe fɛɛ lɛ, Yehowa, ŋwɛi kɛ shikpɔŋ Bɔlɔ ni gbooo lɛ. (Yesaia 45:12, 18) Bɔfo lɛ kɛ nɛkɛ kitakamɔ nɛɛ ma nɔ mi kɛha Yohane akɛ Nyɔŋmɔ fiteŋ be ko kwraa dɔŋŋ.
11, 12. (a) Akɛ “be ko be ko bɛ dɔŋŋ” lɛ tsɔɔ mɛni? (b) Mɛni akɛbaa naagbee lɛ?
11 Hela wiemɔ ni atsɔɔ shishi akɛ “shishashaomɔ” lɛ ji khroʹnos, ni eshishi diɛŋtsɛ ji “be.” Mɛi komɛi enu he akɛ esa akɛ atsɔɔ nɛkɛ bɔfo nɛɛ sanejajemɔ lɛ shishi akɛ: “Be ko be ko baŋ dɔŋŋ,” tamɔ nɔ ni be ni wɔle lɛ baaba naagbee. Shi akɛ wiemɔ khroʹnos ni yɔɔ biɛ lɛ tsu nii ni sutsɔɔmɔ wiemɔ fataaa he. No hewɔ lɛ etsɔɔɔ be fɛɛ kɛkɛ shi moŋ, “be ko” aloo “be kpalaŋŋ ko.” Yɛ shishinumɔ kroko mli lɛ, be kpalaŋŋ (aloo, shishashaomɔ) ko baŋ dɔŋŋ kɛjɛŋ Yehowa gbɛfaŋ. Akɛ Hela feemɔ-wiemɔ ko ni ana kɛjɛ khroʹnos mli lɛ hu tsu nii yɛ Hebribii 10:37, yɛ he ni beni Paulo tsɛɔ wiemɔ kɛjɛɔ Habakuk 2:3, 4, New World Translation lɛ, eŋma akɛ “mɔ ni baa lɛ . . . eshashaoŋ shi” lɛ.
12 “Be ko be ko bɛ dɔŋŋ”—kwɛ bɔ ni nakai wiemɔi lɛ ŋɔɔ Yohane kuu ni yɔɔ ŋmɛnɛ ni gbɔɔ lɛ naa ha! Be ko be ko bɛ dɔŋŋ yɛ mɛɛ shishinumɔ naa? Yohane kɛɔ wɔ: “Shi moŋ bɔfo ni ji kpawo lɛ gbee lɛ gbii lɛ amli, beni eheɔ ekpa lɛ, no lɛ agbe Nyɔŋmɔ teemɔŋ sane lɛ hu naa, bɔ ni ejaje sanekpakpa lɛ etsɔɔ lɛ diɛŋtsɛ etsuji ni ji gbalɔi lɛ.” (Kpojiemɔ 10:7) Yehowa be lɛ eshɛ ni ekɛ eteemɔŋ sane lɛ aaaba enaagbee kwraa ni yɔɔ miishɛɛ kɛ omanyeyeli yɛ anunyam mli!
13. Mɛni ji Nyɔŋmɔ teemɔŋ sane krɔŋkrɔŋ lɛ?
13 Mɛni ji nɛkɛ Nyɔŋmɔ teemɔŋ sane nɛɛ? Ekɔɔ seshi ni awo shi klɛŋklɛŋ yɛ ehe yɛ Eden, ni klɛŋklɛŋ lɛ ebatsɔ Yesu Kristo lɛ he. (1 Mose 3:15; 1 Timoteo 3:16) Ekɔɔ yoo lɛ ni Seshi lɛ baa kɛjɛɔ emli lɛ hu he. (Yesaia 54:1; Galatabii 4:26-28) Kɛfata he lɛ, agbɛnɛ ekɔɔ seshi kuu lɛ mlibii ni ji enyɔ lɛ kɛ Maŋtsɛyeli ni Seshi lɛ yeɔ maŋtsɛ yɛ mli lɛ he. (Luka 8:10; Efesobii 3:3-9; Kolosebii 1:26, 27; 2:2; Kpojiemɔ 1:5, 6) Esa akɛ ashiɛ sanekpakpa ni kɔɔ ŋwɛi Maŋtsɛyeli ni yɔɔ sɔrɔto nɛɛ he lɛ yɛ shikpɔŋ lɛ fɛɛ nɔ yɛ naagbee be nɛɛ mli.—Mateo 24:14.
14. Mɛni hewɔ haomɔ ni ji etɛ lɛ kɔɔ Nyɔŋmɔ Maŋtsɛyeli lɛ he lɛ?
14 Yɛ anɔkwale mli lɛ, enɛ ji sane ni hi fe fɛɛ. Ni kɛlɛ, yɛ Kpojiemɔ 11:14, 15 lɛ, kpoo ni ji etɛ lɛ kɔɔ Maŋtsɛyeli lɛ he. Mɛni hewɔ? Ejaakɛ kɛha adesai ni sumɔɔ Satan nibii agbɛjianɔtoo lɛ, tɛtrɛmaŋtɛrɛ kpamɔ akɛ akɛ Nyɔŋmɔ teemɔŋ sane lɛ he sanekpakpa lɛ eba naagbee lɛ—ni ji akɛ Nyɔŋmɔ Mesia Maŋtsɛ lɛ yɛ biɛ lɛ,—ji sane fɔŋ. (Okɛto 2 Korintobii 2:16 he.) Etsɔɔ akɛ aahe akpata jeŋ gbɛjianɔtoo ni amɛsumɔɔ no babaoo lɛ hiɛ. Nugbɔshiimɔi kpawo lɛ agbee lɛ, ni hiɛ ahum ni yɔɔ gbeyei ahe kɔkɔbɔɔ lɛ mli bafeɔ faŋŋ ni enaa waa yɛ be mli ni Yehowa oweletɔɔ gbi kpeteŋkpele lɛ bɛŋkɛɔ lɛ.—Zefania 1:14-18.
Wolo ni Agbele Naa Lɛ
15. Mɛni gbee ni jɛ ŋwɛi lɛ kɛ bɔfo ni he wa lɛ kɛɛ Yohane, ni te enɛ sa Yohane he eha tɛŋŋ?
15 Beni Yohane mɛɔ koni akpa tɛtrɛmaŋtɛrɛ ni ji kpawo lɛ ni akɛ Nyɔŋmɔ teemɔŋ sane krɔŋkrɔŋ lɛ aba naagbee lɛ, akɛ nitsumɔ kroko wo edɛŋ: “Ni gbee ni minu kɛjɛ ŋwɛi lɛ kɛ mi wie ekoŋŋ, ni ekɛɛ: Yaa ni oyahe wolo lɛ ni agbele naa lɛ yɛ bɔfo ni damɔ ŋshɔ lɛ nɔ kɛ shikpɔŋ lɛ nɔ lɛ dɛŋ. Ni mitee bɔfo lɛ ŋɔɔ ni miyakɛɛ lɛ akɛ: Ŋɔɔ wolo bibioo lɛ oha mi. Ni ekɛɛ mi akɛ: Hemɔ ni oye, ni eeejoo yɛ omusuŋ, shi odaaŋ moŋ lɛ eeeŋɔɔ dɔkɔdɔkɔ tamɔ wo. Ni mihe wolo bibioo lɛ yɛ bɔfo lɛ dɛŋ ni miye, ni eŋɔɔ dɔkɔdɔkɔ yɛ midaaŋ tamɔ wo, ni beni miye lɛ, ejoo yɛ mimusu mli. Ni ekɛɛ mi akɛ: Esa akɛ ogba ekoŋŋ yɛ maji kɛ jeŋmaji kɛ majianɔwiemɔi kɛ maŋtsɛmɛi pii ahe.”—Kpojiemɔ 10:8-11.
16. (a) Gbalɔ Ezekiel na niiashikpamɔ ko ni tamɔ Yohane nɔ lɛ yɛ mɛɛ gbɛ nɔ? (b) Mɛni hewɔ wolo bibioo lɛ ŋɔɔ Yohane naa lɛ, shi mɛni hewɔ ejooɔ yɛ musuŋ lɛ?
16 Yohane niiashikpamɔ lɛ tamɔ gbalɔ Ezekiel nɔ lɛ yɛ be mli ni eyɔɔ nom mli yɛ Babilonia shikpɔŋ lɛ nɔ lɛ. Lɛ hu afa lɛ ni eye wolo ko ni ŋɔɔ dɔkɔdɔkɔ yɛ edaaŋ. Shi beni eshɛ emusuŋ lɛ, ebafee mɔ ni gbɛnaa nii ka enɔ akɛ egba nibii ni jooɔ eshi Israel atuatsemɔ we lɛ. (Ezekiel 2:8-3:15) Wolo ni agbele naa ni Yesu Kristo ni awo ehiɛ nyam lɛ kɛhaa Yohane lɛ hu tamɔ ŋwɛi shɛɛ sane. Yohane baashiɛ yɛ “maji kɛ jeŋmaji kɛ majianɔwiemɔi kɛ maŋtsɛmɛi pii ahe.” Ni eeeye nɛkɛ wolo nɛɛ ŋɔɔ ejaakɛ ejɛɛhe lɛ jɛ ŋwɛi. (Okɛto Lala 119:103; Yeremia 15:15, 16 he.) Shi ena akɛ eejoo yɛ emusuŋ ejaakɛ—taakɛ eba yɛ Ezekiel nɔ tsutsu lɛ—egbaa nibii ni eŋɔɔɔ eshiɔ gbɔmɛi atuatselɔi.—Lala 145:20.
17. (a) Namɛi kɛɛ Yohane akɛ egba “ekoŋŋ” lɛ, ni mɛni enɛ tsɔɔ? (b) Mɛɛ be mli nɔkwɛmɔnii ni yɔɔ naakpɛɛ ni Yohane na lɛ baaba mli?
17 Ŋwanejee ko bɛ he akɛ mɛi ni kɛɔ Yohane akɛ egba ekoŋŋ lɛ ji Yehowa Nyɔŋmɔ kɛ Yesu Kristo. Eyɛ mli akɛ atswa Yohane nane shi tu kɛtee Patmo ŋshɔkpɔ lɛ nɔ moŋ, shi egba momo yɛ gbɔmɛi, yɛ maji kɛ majianɔwiemɔi kɛ maŋtsɛmɛi pii ahe kɛtsɔ saji ni eŋmala yɛ Kpojiemɔ wolo lɛ mli lɛ nɔ. Wiemɔ “ekoŋŋ” lɛ tsɔɔ akɛ esa akɛ eŋma ni eha ale saji krokomɛi ni aŋmala ashwie shi yɛ Kpojiemɔ wolo lɛ mli lɛ. Shi kaimɔ akɛ, Yohane kɛ ehe miiwo gbalɛ ninaa ko mli diɛŋtsɛ yɛ biɛ. Yɛ anɔkwale mli lɛ nɔ ni eŋmaa lɛ ji gbalɛ ni baaba mli yɛ 1914 sɛɛ, beni ŋwɛibɔfo ni he wa lɛ badamɔ egbɛhe ni enane kome ma shikpɔŋ lɛ nɔ ni ekroko hu ma ŋshɔ hiɛ lɛ. Belɛ mɛni ji nɔ ni nɛkɛ mfonirifeemɔ mli nɔkwɛmɔnɔ nɛɛ tsɔɔ kɛhaa Yohane kuu lɛ ŋmɛnɛ?
Wolo Bibioo lɛ Ŋmɛnɛ
18. Mɛɛ miishɛɛ kpo Yohane kuu lɛ jie yɛ Kpojiemɔ wolo lɛ he yɛ Nuŋtsɔ lɛ gbi lɛ shishijee mli?
18 Nɔ ni Yohane na lɛ feɔ Yohane kuu lɛ niiashikpamɔ yɛ Nuŋtsɔ lɛ gbi lɛ shishijee mli lɛ he mfoniri. Yehowa yiŋtoi ahe shishinumɔ ni nɔ ni nugbɔshiimɔi kpawo lɛ fata he lɛ tsɔɔ lɛ ji nɔ ko ni amɛnuuu shishi jogbaŋŋ. Kɛlɛ, amɛyɛ Kpojiemɔ lɛ he miishɛɛ waa, ni Charles Taze Russell ewie efai babaoo he yɛ ewala be mli. Yɛ egbele yɛ 1916 sɛɛ lɛ, abua eniŋmai lɛ pii anaa ni akɛfee wolo ni egbɛi ji The Finished Mystery lɛ. Shi yɛ be ni sa mli lɛ, nɛkɛ wolo nɛɛ bafee Kpojiemɔ lɛ mlitsɔɔmɔ ni haaa mɔ tsui anyɔ emli. Esa akɛ Kristo nyɛmimɛi lɛ ateŋ shwɛɛnii lɛ amɛ fioo, kɛyashi be mli ni ninaa lɛ mlibaa aaaje shishi, koni amɛna nakai niŋmaa ni jɛ mumɔŋ lɛ he shishinumɔ ni ja.
19. (a) Yehowa Nyɔŋmɔ kɛ Yohane kuu lɛ tsu nii po dani aŋmala nugbɔshiimɔi kpawo lɛ agbeei lɛ fɛɛ aha yɛ mɛɛ gbɛ nɔ? (b) Mɛɛ be mli akɛ wolo bibioo ni agbele naa lɛ ha Yohane kuu lɛ, ni mɛni enɛ tsɔɔ kɛhaa amɛ?
19 Shi, taakɛ Yohane ji lɛ, Yehowa kɛ amɛ tsu nii dani aŋmala nugbɔshiimɔi kpawo lɛ gbee lɛ po aha. No mli lɛ amɛkɛ ekaa eshiɛ afii 40 dani 1914 ba, ni amɛpele waa koni amɛya nɔ amɛtsu nii yɛ klɛŋklɛŋ jeŋ ta lɛ mli. Amɛjie amɛhe kpo akɛ mɛi ni, beni Nuŋtsɔ lɛ ba lɛ, ebana amɛ akɛ amɛmiiha shiabii lɛ niyenii yɛ be ni sa mli. (Mateo 24:45-47) No hewɔ lɛ, amɛji mɛi ni yɛ 1919 lɛ, akɛ wolo bibioo lɛ ha amɛ—ni ji akɛ, shɛɛ sane ni agbele naa ni abaashiɛ aha adesai lɛ. Taakɛ Ezekiel ji lɛ, amɛyɛ shɛɛ sane kɛha gbɛjianɔtoo ko ni yeee anɔkwale—Kristendom—ni kɛɔ akɛ esɔmɔɔ Nyɔŋmɔ, shi yɛ anɔkwale mli lɛ, efeee nakai lɛ. Taakɛ Yohane ji lɛ, esa akɛ amɛshiɛ ekoŋŋ yɛ “maji kɛ jeŋmaji kɛ majianɔwiemɔi kɛ maŋtsɛmɛi pii ahe.”
20. Wolo bibioo lɛ ni Yohane ye lɛ feɔ mɛni he mfoniri?
20 Wolo lɛ ni Yohane ye lɛ feɔ Yesu nyɛmimɛi lɛ ni kpɛlɛ nitsumɔ nɛɛ nɔ lɛ he mfoniri. Ebafee amɛfa, ni ji akɛ atsɔ Nyɔŋmɔ Wiemɔ ni jɛ mumɔŋ lɛ fa nɛɛ nɔ ayoo amɛ agbɛnɛ, ni no ji nɔ ni waje amɛ. Shi nɔ ni esa akɛ amɛshiɛ lɛ ji Yehowa kojomɔi ni yɔɔ mli ni eŋɔɔɔ adesai pii anaa lɛ. Yɛ anɔkwale mli lɛ, nɔ ni fata he ji haomɔi ni agba afɔ shi yɛ Kpojiemɔ yitso 8 lɛ. Shi eŋɔɔ nɛkɛ anɔkwale Kristofoi nɛɛ anaa akɛ amɛaale nɛkɛ kojomɔi nɛɛ ni amɛna amɛhe akɛ Yehowa kɛ amɛ miitsu nii ekoŋŋ yɛ ejajemɔ mli.—Lala 19:10, 11.
21. (a) Wolo bibioo lɛ mli sane lɛ ebafee nɔ ni ŋɔɔ asafo babaoo lɛ hu naa yɛ mɛɛ gbɛ nɔ? (b) Mɛni hewɔ sanekpakpa lɛ ji sane fɔŋ kɛha shitee-kɛwolɔi lɛ?
21 Yɛ be ni sa mli lɛ, nɛkɛ wolo nɛɛ mli sane lɛ hu bafee nɔ ni ŋɔɔ “asafo babaoo . . . ni jɛ jeŋmaŋ fɛɛ jeŋmaŋ kɛ akutsei kɛ maji kɛ majianɔwiemɔi amli” ni ana amɛ akɛ amɛmiidɔmɔ ŋtsɔi yɛ nihiinii ni amɛnaa akɛ afeɔ yɛ Kristendom teŋ lɛ anaa. (Kpojiemɔ 7:9; Ezekiel 9:4) Mɛnɛɛmɛi hu kɛ ekaa jajeɔ sanekpakpa lɛ, amɛkɛ wiemɔi ni ŋɔɔ ni duromɔ yɔɔ mli tsɔɔ Nyɔŋmɔ gbɛjianɔtoo ni yɔɔ naakpɛɛ lɛ mli amɛhaa Kristofoi ni tamɔ gwantɛŋi lɛ. (Lala 37:11, 29; Kolosebii 4:6) Shi kɛha shitee-kɛwolɔi lɛ, eji sane fɔŋ. Mɛni hewɔ? Etsɔɔ akɛ esa akɛ gbɛjianɔtoo ni amɛkɛ amɛhiɛ fɔ nɔ lɛ—ni ekolɛ ekɛ tsui ni nyɔɔ mɔ mli ni sɛɛ etsɛɛɛ ko ebaha amɛ lɛ—aya. Kɛha amɛ lɛ, sanekpakpa lɛ tsɔɔ hiɛkpatamɔ.—Filipibii 1:27, 28; okɛto 5 Mose 28:15; 2 Korintobii 2:15, 16 he.
[Mfonirii ni yɔɔ baafa 160]
Yohane kuu lɛ kɛ amɛhefatalɔi lɛ jajeɔ ŋɔɔmɔ kɛ joomɔ sane amɛhaa adesai fɛɛ