Yitso 34
Anu Teemɔŋ Sane ni Yɔɔ Gbeyei lɛ Shishi
1. (a) Te Yohane fee enii eha tɛŋŋ beni ena ajwamaŋ kpeteŋkpele lɛ kɛ kooloo ni he yɔɔ gbeyei ni eta enɔ lɛ, ni mɛni hewɔ? (b) Te Yohane kuu ni yɔɔ ŋmɛnɛ lɛ feɔ amɛnii amɛhaa tɛŋŋ yɛ be mli ni saji ni haa gbalɛ ninaa lɛ baa mli lɛ baa lɛ?
TE Yohane fee enii eha tɛŋŋ beni ena ajwamaŋ kpeteŋkpele lɛ kɛ kooloo ni he yɔɔ gbeyei ni eta enɔ lɛ? Lɛ diɛŋtsɛ eha hetoo: “Ni beni mina lɛ lɛ, minaa kpɛ mihe naakpa.” (Kpojiemɔ 17:6b) Adesa susumɔ ko nyɛŋ ekɛ ninaa ni tamɔ nɛkɛ aba. Ni kɛlɛ naa no—yɛ ŋa nɔ shɔŋŋ—ajwamaŋ ni eba shi ni ta kooloo ko ni he yɔɔ gbeyei ni tsuɔ tamɔ muneele nɔ! (Kpojiemɔ 17:3) Yohane kuu lɛ hu naa kpɛɔ amɛhe naakpa yɛ be mli ni saji ni haa gbalɛ ninaa lɛ baa mli lɛ baa lɛ. Eji gbɔmɛi ni yɔɔ je lɛŋ lɛ nyɛɔ amɛnaa kulɛ, amɛbaabolɔ akɛ, ‘Anyɛŋ ahe aye!’ Ni jeŋ nɔyelɔi lɛ hu kɛbaafata he akɛ, ‘Jwɛŋmɔ bɛ mli!’ Shi ninaa lɛ bafeɔ wɔbe nɛɛ mli naakpɛɛ nɔ ko ni yɔɔ diɛŋtsɛ. Nyɔŋmɔ webii lɛ ena ninaa lɛ mlibaa mli gbɛfaŋnɔ yɛ naakpɛɛ gbɛ nɔ momo, ni enɛ maa nɔ mi kɛhaa amɛ akɛ gbalɛ lɛ baaya nɔ tɛɛ kɛyashi enaagbee ni yɔɔ naakpɛɛ lɛ.
2. (a) Mɛni bɔfo lɛ kɛɛ Yohane beni ena ni enaa ekpɛ ehe lɛ? (b) Mɛni ajie lɛ kpo atsɔɔ Yohane kuu lɛ, ni mɛɛ gbɛ nɔ atsɔ afee enɛ yɛ?
2 Bɔfo lɛ kadi bɔ ni Yohane naa ekpɛ ehe eha lɛ. Kɛkɛ ni Yohane tee nɔ akɛ: “Ni bɔfo lɛ kɛɛ mi akɛ: Mɛɛ hewɔ onaa kpɛɔ ohe? Mibagbao yoo lɛ kɛ kooloo ni eta nɔ ni yɔɔ yitsei kpawo kɛ akoloŋtoi nyɔŋma lɛ ahe teemɔŋ sane lɛ.” (Kpojiemɔ 17:7) Ah, bɔfo lɛ baatsɔɔ teemɔŋ sane lɛ shishi agbɛnɛ! Etsɔɔ ninaa lɛ mli nibii sɔrɔtoi kɛ naakpɛɛ nibii ni baaje kpo lɛ mli etsɔɔ Yohane ni egbɛ ehiŋmɛi mli lɛ. Nakai nɔŋŋ hu beni amɛsɔmɔɔ yɛ ŋwɛibɔfoi agbɛtsɔɔmɔ shishi ŋmɛnɛ lɛ, ajie gbalɛ lɛ shishinumɔ kpo atsɔɔ Yohane kuu lɛ ni buɔ lɛ. “Ani shishitsɔɔmɔ lɛ jeee Nyɔŋmɔ nɔŋ?” Taakɛ anɔkwafo Yosef ji lɛ, wɔheɔ wɔyeɔ akɛ nakai eji. (1 Mose 40:8; okɛto Daniel 2:29, 30 he.) Kɛ aaawie lɛ, akɛ Nyɔŋmɔ webii lɛ ebawo teŋgbɛ shihilɛ ko mli yɛ be mli ni Yehowa tsɔɔ ninaa lɛ kɛ bɔ ni enaa amɛshihilɛ nɔ hewalɛ lɛ shishi ehaa amɛ lɛ. (Lala 25:14) Ejie yoo lɛ kɛ kooloo lɛ he teemɔŋ sane lɛ he shishinumɔ lɛ kpo yɛ be ni sa pɛpɛɛpɛ mli etsɔɔ amɛ.—Lala 32:8.
3, 4. (a) Mɛɛ maŋshiɛmɔ N. H. Knorr kɛha yɛ 1942 mli, ni mɛɛ gbɛ nɔ etsɔ eha ayoo kooloo ni tsuɔ tamɔ muneele lɛ? (b) Mɛɛ saji ní bɔfo lɛ kɛɛ Yohane lɛ N. H. Knorr wie he?
3 Kɛjɛ September 18 kɛyashi 20, 1942, yɛ be mli ni Jeŋ Ta II yaa nɔ waa lɛ, kɛkɛ ni Yehowa Odasefoi ni yɔɔ U.S. Amerika lɛ fee amɛ Jeŋ Hee Teokrase Kpee lɛ. Ajɛ kpee maŋ titri, Cleveland, Ohio, awie kɛtsɔ telifon nɔ kɛtee kpee maji fe 50 mli, ni mɛi fɛɛ ni bo wiemɔ lɛ toi lɛ ayibɔ yashɛ 129,699. Ati nɛkɛ wiemɔi ahe gbɛjianɔtoo nɛɛ mli yɛ he ni tawuu be mli shihilɛi ŋmɛɔ gbɛ lɛ yɛ jeŋ fɛɛ. No mli lɛ, Yehowa webii lɛ ateŋ mɛi pii miikpa gbɛ akɛ jeŋ ta lɛ baaya nɔ kɛyabote Nyɔŋmɔ ta ni ji Harmagedon lɛ mli; no hewɔ lɛ maŋshiɛmɔ, ni eyitso ji, “Toiŋjɔlɛ—Ani Esɛɛ Aaanyɛ Atsɛ Lo?” lɛ tee nibii pii ashi ni aatao ale mli. Te aaafee tɛŋŋ ni Buu Mɔɔ Asafo lɛ sɛinɔtalɔ hee, N. H. Knorr aaanyɛ awie toiŋjɔlɛ he yɛ be mli ni nɔ ni tamɔɔɔ nakai lɛ ji nɔ ni yɔɔ kɛha jeŋmaji lɛ?a Yiŋtoo lɛ ji akɛ Yohane kuu lɛ ‘miimɔ nii ni amɛnu’ yɛ Nyɔŋmɔ gbalɛ Wiemɔ lɛ mli lɛ mli waa.—Hebribii 2:1; 2 Petro 1:19.
4 Mɛɛ shishinumɔ wiemɔ ni ji “Toiŋjɔlɛ—Ani Esɛɛ Aaanyɛ Atsɛ Lo?” lɛ kɛha gbalɛ lɛ? Yɛ be mli ni etsɔɔ yɛ faŋŋ mli akɛ kooloo ni tsuɔ tamɔ muneele ni yɔɔ Kpojiemɔ 17:3 lɛ ji Jeŋmaji Akpaŋmɔ lɛ, N. H. Knorr tee nɔ edamɔ bɔfo lɛ wiemɔi ni ekɛha Yohane yɛ sɛɛ mli lɛ nɔ etsɔɔ kpaŋmɔ lɛ nitsumɔ ni naagbai eyi mli obɔ lɛ mli: “Kooloo lɛ ni ona lɛ yɛ, ni ebɛ, ni ebaajɛ bu kwɔŋkwɔŋ lɛ mli eje kpo kɛbaho hiɛkpatamɔ mli.”—Kpojiemɔ 17:8a.
5. (a) Te ebaa lɛ tɛŋŋ ni “kooloo lɛ . . . yɛ” ni agbɛnɛ “ebɛ” lɛ? (b) Te N. H. Knorr ha sanebimɔ, “Ani Kpaŋmɔ lɛ aaaya nɔ ahi bu lɛ mli lo” lɛ hetoo tɛŋŋ?
5 “Kooloo lɛ . . . yɛ.” Hɛɛ, ehi shi akɛ Jeŋmaji Akpaŋmɔ kɛjɛ January 10, 1920, kɛbaa, ni majimaji 63 ji mɛi ni kɛ amɛhe woɔ enifeemɔi amli yɛ be kɛ bei amli. Shi, Japan, Germany, kɛ Italia gbala amɛhe shi, ni ajie Soviet Union ni ji Russia kɛjɛ Kpaŋmɔ lɛ mli. Kɛkɛ ni Nazi nɔyelɔ ni yɔɔ Germany lɛ je Jeŋ Ta II shishi yɛ September 1939.b Akɛni enyɛɛɛ eha toiŋjɔlɛ ahi je lɛ mli hewɔ lɛ, Jeŋmaji Akpaŋmɔ lɛ ho egbee bu kwɔŋkwɔŋ ni anyɛɛɛ atsu nɔ ko yɛ mli lɛ mli. Beni shɛɔ 1942 lɛ, no mli lɛ ebafee mɔ ni kulɛ eyɔɔ. Atsɔɔɔ enɛ hiɛ akɛɛɛ nɔ ko ni asaŋ akɛɛɛ yɛ sɛɛ mli be ko mli—shi nakai be ni mli wa lɛ mli pɛpɛɛpɛ—Yehowa tsɔɔ ninaa lɛ fɛɛ shishi etsɔɔ ewebii lɛ! N. H. Knorr baanyɛ ajaje yɛ Jeŋ Hee Teokrase Kpee lɛ shishi, yɛ gbalɛ lɛ kɛ gbeekpamɔ naa, akɛ “kooloo lɛ . . . ebɛ.” Kɛkɛ ni ebi sane lɛ akɛ, “Ani Kpaŋmɔ lɛ baaya nɔ ahi bu lɛ mli?” Beni etsɛɔ wiemɔ kɛjɛɔ Kpojiemɔ 17:8 lɛ, eha hetoo akɛ: “Jeŋ majimaji anaanyobɔɔ lɛ baate shi ekoŋŋ.” Ni nakai pɛpɛɛpɛ ebafee—ni ekɛbu Yehowa gbalɛ Wiemɔ lɛ bem!
Bu Kwɔŋkwɔŋ lɛ Mli ni Eje Kpo Kɛjɛ
6. (a) Mɛɛ be mli kooloo ni tsuɔ tamɔ muneele lɛ kwɔ kɛje kpo kɛjɛ bu kwɔŋkwɔŋ lɛ mli, ni kɛ mɛɛ gbɛi hee? (b) Mɛni hewɔ Jeŋmaji Ekomefeemɔ lɛ ji kooloo ni tsuɔ tamɔ muneele lɛ ni atsiɛ ehiɛ ekoŋŋ lɛ?
6 Kooloo ni tsuɔ tamɔ muneele lɛ kwɔ kɛje kpo kɛjɛ bu kwɔŋkwɔŋ lɛ mli lɛlɛŋ. Yɛ June 26, 1945 lɛ, jeŋmaji 50 fɔ oshiki amɛkɛkpɛlɛ Jeŋmaji Ekomefeemɔ gbɛjianɔtoo lɛ Mla lɛ nɔ kɛ hoofeemɔ yɛ San Francisco, U.S. Amerika. Nɛkɛ kuu nɛɛ “baahiɛ majimaji ateŋ toiŋjɔlɛ kɛ shweshweeshwe shihilɛ mli.” Nibii pii yɛ ni je amɛhe yɛ Kpaŋmɔ lɛ kɛ Jeŋmaji Ekomefeemɔ lɛ teŋ. The World Book Encyclopedia lɛ kadi akɛ: “Jeŋmaji Ekomefeemɔ lɛ je Jeŋmaji Akpaŋmɔ lɛ ni ato ama shi yɛ Jeŋ Ta I sɛɛ lɛ yɛ gbɛi komɛi anɔ . . . Jeŋmaji ni to Jeŋmaji Ekomefeemɔ lɛ shishi lɛ ateŋ mɛi pii fata he ni ato Kpaŋmɔ lɛ. Taakɛ Kpaŋmɔ lɛ ji lɛ, ato Jeŋmaji Ekomefeemɔ lɛ ama shi koni eye ebua ni eha toiŋjɔlɛ aba maji ateŋ. Gbɛjianɔtoi titrii ni Jeŋmaji Ekomefeemɔ lɛ tsɔɔ nɔ ekɛtsuɔ nii lɛ tamɔ Kpaŋmɔ lɛ nɔ lɛ nɔŋŋ.” No hewɔ lɛ, Jeŋmaji Ekomefeemɔ lɛ ji kooloo ni tsuɔ tamɔ muneele lɛ ni aku sɛɛ akɛ lɛ eba ekoŋŋ. Emli bii ni feɔ aaafee maji 190 lɛ fa kwraa fe Kpaŋmɔ lɛ nɔ ni ji maji 63 lɛ; agbɛnɛ eloo gbɛnaa nii ni dara eshwie enɔ fe nɔ ni ebaye enajiaŋ lɛ.
7. (a) Mɛi ni hiɔ shikpɔŋ lɛ nɔ lɛ anaa ekpɛ amɛhe yɛ kooloo ni tsuɔ tamɔ muneele lɛ ni atsiɛ ehiɛ ekoŋŋ lɛ hewɔ yɛ mɛɛ gbɛ nɔ? (b) Mɛɛ oti ji nɔ ni elaaje Jeŋmaji Ekomefeemɔ lɛ, ni mɛni ji nɔ ni ewoloŋmalɔ nukpa lɛ kɛɛ yɛ enɛ gbɛfaŋ?
7 Kɛjɛ shishijee lɛ, ana hiɛnɔkamɔi wuji aha Jeŋmaji Ekomefeemɔ lɛ. Enɛ haa bɔfo lɛ wiemɔi lɛ baa mli: “Ni mɛi ni yɔɔ shikpɔŋ lɛ nɔ ni aŋmako amɛgbɛii yɛ wala wolo lɛ mli kɛjɛ jeŋ shishijee lɛ anaa aaakpɛ amɛhe, kɛ amɛna kooloo lɛ akɛ eyɛ, ni ebɛ, tsɛ eyɛ kɛ̃ lɛ.” (Kpojiemɔ 17:8b) Mɛi ni hiɔ shikpɔŋ lɛ nɔ lɛ anaa ekpɛ amɛhe yɛ nɛkɛ amaga kpeteŋkpele hee nɛɛ, ni tsuɔ nii kɛjɛɔ enitsumɔ he yitso ni yɔɔ New York East River lɛ he. Shi anɔkwa toiŋjɔlɛ kɛ shweshweeshwe shihilɛ elaaje Jeŋmaji Ekomefeemɔ lɛ. Gbeyei ni nɔyeli hewalɛi lɛ sheɔ amɛhe lɛ nɔ pɛ atsɔ ahiɛ jeŋ toiŋjɔlɛ lɛ mli yɛ afi ohai 20 lɛ mli be babaoo, ni tawuu nii afeemɔ lɛ etee nɔ babaoo kɛ foi. Yɛ Jeŋmaji Ekomefeemɔ lɛ mɔdɛŋbɔɔ, yɛ afii 40 sɛɛ lɛ, enukpa ni yɔɔ nakai beaŋ, ni ji Javier Pérez de Cuéllar ye awerɛho yɛ 1985 mli akɛ: “Sɛkɛyelɔi ayinɔ kroko mli wɔyɔɔ nɛɛ, ni wɔleee nɔ ni wɔɔnyɛ wɔfee yɛ he.”
8, 9. (a) Mɛni hewɔ Jeŋmaji Ekomefeemɔ lɛ bɛ jeŋ naagbai ahe hetoi lɛ, ni mɛni etsɛŋ ebaaba enɔ taakɛ Nyɔŋmɔ efa lɛ? (b) Mɛni hewɔ aŋmalako Jeŋmaji Ekomefeemɔ lɛ shishitolɔi kɛ mɛi ni jieɔ eyi lɛ agbɛi yɛ Nyɔŋmɔ “wala wolo” lɛ mli lɛ? (d) Mɛni ji nɔ ni Yehowa Maŋtsɛyeli lɛ baatsu yɛ omanyeyeli mli?
8 Jeŋmaji Ekomefeemɔ lɛ bɛ hetooi lɛ. Ni mɛni hewɔ? Ejaakɛ adesai fɛɛ a-Wala-Halɔ lɛ jeee mɔ ni ha Jeŋmaji Ekomefeemɔ lɛ wala. Ewala sɛɛ baafo kuku, ejaakɛ akpɔ ni Nyɔŋmɔ ewo lɛ ji, ‘ebaaho kɛya hiɛkpatamɔ mli.’ Aŋmalako mɛi ni to Jeŋmaji Ekomefeemɔ lɛ shishi loo mɛi ni jieɔ eyi lɛ agbɛi yɛ Nyɔŋmɔ wala wolo lɛ mli. Te aaafee tɛŋŋ ni adesai eshafeelɔi ni gboiɔ, ni amɛteŋ mɛi pii yeɔ Nyɔŋmɔ gbɛi lɛ he fɛo lɛ aaanyɛ atsɔ Jeŋmaji Ekomefeemɔ lɛ nɔ afee nɔ ni Yehowa Nyɔŋmɔ ejaje akɛ ebaafee, ni jeee kɛmiitsɔ adesai anine nɔ, shi moŋ kɛmiitsɔ e-Kristo lɛ Maŋtsɛyeli lɛ nɔ lɛ?—Daniel 7:27; Kpojiemɔ 11:15.
9 Jeŋmaji Ekomefeemɔ lɛ ji Nyɔŋmɔ Mesia Maŋtsɛyeli kɛtsɔ e-Toiŋjɔlɛ Lumɔ, Yesu Kristo—mɔ ni elumɔyeli lɛ sɛɛ efoŋ gbi ko gbi ko lɛ he musubɔɔ kantafit loo apasa nɔ. (Yesaia 9:6, 7) Kɛji akɛ Jeŋmaji Ekomefeemɔ lɛ baanyɛ ni ekɛ toiŋjɔlɛ ni hiɔ shi be fioo ko po aba lɛ, etsɛŋ ni tai baafɛlɛ ekoŋŋ. Enɛ ji adesai ni ji eshafeelɔi lɛ abɔɔ su. “Aŋmako amɛgbɛii yɛ wala wolo lɛ mli kɛjɛ jeŋ shishijee.” Jeee akɛ Yehowa Maŋtsɛyeli kɛtsɔ Kristo nɔ lɛ kɛ naanɔ toiŋjɔlɛ baaba shikpɔŋ nɔ kɛkɛ, shi moŋ ebaatsɔ Yesu kpɔmɔ afɔleshaa lɛ nɔ etee gbohii ni ji jalɔi kɛ mɛi ni ejaaa ni yɔɔ Nyɔŋmɔ kaimɔ mli lɛ ashi. (Yohane 5:28, 29; Bɔfoi lɛ Asaji 24:15) Mɛi ni fata he ji mɔ fɛɛ mɔ ni edamɔ shi shiŋŋ yɛ tutuamɔi ni Satan kɛ eseshi lɛ kɛba amɛnɔ lɛ fɛɛ sɛɛ, kɛ mɛi krokomɛi hu ni kpaako amɛbaajie amɛhe kpo akɛ amɛji toibolɔi lɛ hu. Eka shi faŋŋ akɛ mɛi ni kɛ amɛhe ekpɛtɛ Babilon Kpeteŋkpele lɛ he gbagbalii aloo mɛi fɛɛ ni yaa nɔ amɛjaa kooloo lɛ agbɛii ehiŋ Nyɔŋmɔ wala wolo lɛ mli kɔkɔɔkɔ.—2 Mose 32:33; Lala 86:8-10; Yohane 17:3; Kpojiemɔ 16:2; 17:5.
Toiŋjɔlɛ kɛ Shweshweeshwe Shihilɛ—Yaka Hiɛnɔkamɔ
10, 11. (a) Mɛni Jeŋmaji Ekomefeemɔ lɛ jaje yɛ 1986, ni te ahere enɛ nɔ aha tɛŋŋ? (b) “Jamɔ wekui” enyiɛ bua amɛhe naa yɛ Assisi, Italia, koni amɛsɔle amɛbi toiŋjɔlɛ lɛ, ni ani Nyɔŋmɔ haa sɔlemɔi ni tamɔ nɛkɛ lɛ ahetoo? Tsɔɔmɔ mli.
10 Bɔni afee ni ekanya adesai ahiɛnɔkamɔ lɛ, Jeŋmaji Ekomefeemɔ lɛ jaje 1986 akɛ eji “Majimaji Ateŋ Toiŋjɔlɛ Afi,” ni esaneyitso ji “Koni Abaa Toiŋjɔlɛ kɛ Adesai Awɔsɛɛ Be Yi.” Abi jeŋmaji ni kɛ amɛhe wuɔ ta lɛ ni amɛkɛ amɛtawuu nii ashwie shi, kɛ hooo lɛ kɛha afi. Mɛni jɛ mli ba? Taakɛ amaniɛbɔɔ ko ni International Peace Research Institute lɛ kɛha lɛ tsɔɔ lɛ, agbe mɛi ni naa shɛɔ akpekpei enumɔ yɛ ta ni awu yɛ 1986 lɛ pɛ mli! Eyɛ mli akɛ afee jwiɛtɛi shikai komɛi kɛ kaimɔ woji komɛi aha moŋ, shi jeŋmaji lɛ ateŋ mɛi pii efeee nɔ ko kwraa yɛ nɛkɛ toiŋjɔlɛ yɛ nakai afi lɛ mli lɛ sɛɛdii mli. Ni kɛlɛ, je lɛŋ jamɔi—ni be fɛɛ be nɛɛ amɛsumɔɔ ni naanyobɔɔ kpakpa aba amɛkɛ Jeŋmaji Ekomefeemɔ lɛ teŋ lɛ—je shishi akɛ amɛaatswa nakai afi lɛ he adafi yɛ gbɛi sɔrɔtoi anɔ. Yɛ January 1, 1986 mli lɛ, Paapa John Paul II jie Jeŋmaji Ekomefeemɔ lɛ nifeemɔ lɛ yi, ni ejɔɔ afi hee lɛ nɔ eha toiŋjɔlɛ. Ni yɛ October 27 lɛ, ebua je lɛŋ jamɔi ahiɛnyiɛlɔi lɛ babaoo naa yɛ Assisi, Italia, koni amɛsɔle amɛbi toiŋjɔlɛ.
11 Ani Nyɔŋmɔ haa toiŋjɔlɛ he sɔlemɔi ni tamɔ nɛkɛ hetoo? Ojogbaŋŋ, mɛɛ Nyɔŋmɔ nakai jamɔ mli hiɛnyiɛlɔi lɛ sɔleɔ amɛhaa lɛ lɛ? Kɛ obi amɛ lɛ, kuu fɛɛ kuu baaha hetoo kroko. Ani nyɔŋmɔi akpekpei abɔ ahenaabuamɔ ko yɛ ni baanyɛ anu ni amɛkpɛlɛ faikpamɔi ni akɛfɔɔ amɛhiɛ yɛ gbɛi sɔrɔtoi anɔ lɛ nɔ? Mɛi ni bua amɛhe naa lɛ ateŋ mɛi pii jaa Kristendom Triniti lɛ.c Buddhabii, Hindubii kɛ mɛi krokomɛi sɔle sɔlemɔi amɛha nyɔŋmɔi ni aleee amɛyifalɛ. Yɛ fɛɛ mli lɛ, “jamɔ mli wekui” 12 bua amɛhe naa, ni mɛi ni badamɔ amɛnajiaŋ nɛɛ ji gbɔmɛi ni ehe gbɛi ni ale amɛ tamɔ Anglican Canterbury Osɔfonukpa lɛ, Buddhabii a-Dalai Lama lɛ, Russia Orthodox osɔfonukpa, Tokyo Shinto Gbatsui Akuu lɛ sɛinɔtalɔ, Afrikabii ni jaa tsei kɛ tɛi, kɛ Amerika Indiabii ni amɛkɛ loofɔji atsɛji efee faii amɛbumɔ. Kɛ wɔkɛɛɛ nɔ ko kwraa lɛ, kɛ wɔkwɛ kuu lɛ, amɛhe yɛ fɛo diɛŋtsɛ, nɔ ko ni abaanyɛ ajie atsɔɔ fɛfɛo yɛ TV nɔ. Kuu kome sɔle aahu ni amɛkpaaa ŋmɛlɛtswai 12 yɛ be kome mli. (Okɛto Luka 20:45-47 he.) Shi ani nɛkɛ sɔlemɔi nɛɛ eko teke nugbɔnɛmɔ atatui ni tsotsoro henaabuamɔ lɛ yiteŋ lɛ? Dabi, yɛ yiŋtoi nɛɛ ahewɔ:
12. Mɛɛ yiŋtoi ahewɔ ni Nyɔŋmɔ haaa je lɛŋ jamɔ mli hiɛnyiɛlɔi lɛ asɔlemɔi kɛha toiŋjɔlɛ lɛ ahetoo lɛ?
12 Nɔ ni tamɔɔɔ mɛi ni ‘nyiɛɔ yɛ Yehowa gbɛi amli’ lɛ, nɛkɛ nyɔŋmɔi ajalɔi nɛɛ ateŋ mɔ kome folo po sɔleee ehaaa Yehowa, Nyɔŋmɔ hiɛkalɔ lɛ, ni egbɛi jeɔ kpo aaafee shii 7,000 yɛ shishijee Biblia ŋmalɛi lɛ amli lɛ. (Mika 4:5; Yesaia 42:8, 12)d Akɛ kuu lɛ, amɛtsɔɔɔ Yesu nɔ amɛbɛŋkɛɛɛ Nyɔŋmɔ, ejaakɛ amɛteŋ mɛi ni fa po heee Yesu Kristo nɔ amɛyeee. (Yohane 14:13; 15:16) Amɛteŋ mɔ ko bɛ ni feɔ Nyɔŋmɔ suɔmɔnaa nii kɛha wɔgbi nɛɛ, ni ji akɛ ni ajaje Nyɔŋmɔ Maŋtsɛyeli ni baa lɛ yɛ jeŋ muu fɛɛ—akɛ adesai ahiɛnɔkamɔ diɛŋtsɛ—shi jeee Jeŋmaji Ekomefeemɔ lɛ. (Mateo 7:21-23; 24:14; Marko 13:10) Nɔ ni amɛjamɔ gbɛjianɔtoi lɛ efee titri ji amɛhe ni amɛkɛwo tawuu yinɔsane ni la ekpa mli fɛɛ lɛ mli, ni jeŋ tai enyɔ ni awuu yɛ afi oha 20 lɛ mli lɛ hu fata he. Nyɔŋmɔ kɛɔ mɛi ni tamɔ nɛkɛ lɛ akɛ: “Ni kɛ nyɛgbɛ nyɛniji amli lɛ, maŋɔ mihiɛ matee nyɛ; ni kɛ nyɛsɔle babaoo tete lɛ, miboŋ nyɛ toi: Nyɛniji ahe eyimɔ kɛ la!”—Yesaia 1:15; 59:1-3.
13. (a) Mɛni hewɔ ekome ni je lɛŋ jamɔ mli hiɛnyiɛlɔi lɛ kɛ Jeŋmaji Ekomefeemɔ lɛ fee koni amɛkɛbi toiŋjɔlɛ lɛ ji nɔ ko ni sa kadimɔ jogbaŋŋ lɛ? (b) Toiŋjɔlɛ he bolɔmɔ lɛ baaya ayagbe naa yɛ mɛni ni ajɛ ŋwɛi agba afɔ shi lɛ mli?
13 Agbɛnɛ, akɛ je lɛŋ jamɔ mli hiɛnyiɛlɔi lɛ kɛ Jeŋmaji Ekomefeemɔ lɛ aaafee ekome ni amɛbi ni toiŋjɔlɛ aba yɛ nɛkɛ be nɛɛ mli lɛ tsɔɔ nɔ ko pɔtɛɛ diɛŋtsɛ. Amɛbaasumɔ ni amɛna Jeŋmaji Ekomefeemɔ lɛ nɔ hewalɛ kɛha amɛ diɛŋtsɛ amɛsɛɛnamɔ, titri lɛ yɛ ŋmɛnɛŋmɛnɛ yinɔ nɛɛ ni amɛwebii lɛ ateŋ mɛi pii miikpoo jamɔ lɛ hewɔ. Taakɛ blema Israel hiɛnyiɛlɔi ni yeee anɔkwale lɛ fee lɛ, amɛbolɔɔ akɛ, “ ‘Toiŋjɔlɛ yɛ! Toiŋjɔlɛ yɛ!’ beni toiŋjɔlɛ ko bɛ.” (Yeremia 6:14, New World Translation) Ŋwanejee ko bɛ he akɛ amɛbolɔmɔ kɛha toiŋjɔlɛ lɛ baaya nɔ, ebaaya nɔ aahu kɛyashɛ naagbee, yɛ nɔ ni bɔfo Paulo gba nɛkɛ yɛ he lɛ: “Yehowa gbi lɛ miiba tamɔ bɔ ni julɔ baa nyɔɔŋ lɛ pɛpɛɛpɛ. Be fɛɛ be ni amɛaakɛɛ akɛ: ‘Toiŋjɔlɛ kɛ shweshweeshwe shihilɛ!’ yɛ lɛ, kɛkɛ lɛ hiɛkpatamɔ ni baa trukaa aaabanina amɛ tamɔ kɔɔmɔ ninaa yoo ni musu eda lɛ; ni amɛjeŋ mli kɔkɔɔkɔ.”—1 Tesalonikabii 5:2, 3, New World Translation.
14. Bolɔmɔ kɛha “toiŋjɔlɛ kɛ shweshweeshwe shihilɛ!” lɛ baanyɛ aya nɔ yɛ mɛɛ gbɛ nɔ, ni te mɔ ko aaafee tɛŋŋ ni ekwa shishiumɔ ni enɛ aaashishiu lɛ lɛ?
14 Yɛ nyɛsɛɛ afii nɛɛ amli lɛ, maŋkwralɔi kɛ wiemɔ “hejɔlɛ yɛ ni wɔyɛ shweshweeshwe!” lɛ etsu nii shii abɔ ni amɛkɛtsɔɔ gbɛjianɔi srɔtoi ni adesai toɔ lɛ mli. Ani je lɛŋ hiɛnyiɛlɔi lɛ anifeemɔi nɛɛ lɛ tsɔɔ akɛ 1 Tesalonikabii 5:3 lɛ ená emlibaa kwraa? Aloo Paulo miiwie saji pɔtɛɛ komɛi ni yɔɔ naakpɛɛ aahu akɛ jeŋ muu lɛ fɛɛ baale? Akɛni bei pii lɛ, anuɔ Biblia mli gbalɛi ashishi jogbaŋŋ yɛ be mli ni amɛba mli sɛɛ loo be mli ni amɛmiiná amɛmlibaa hewɔ lɛ, esa akɛ wɔmɛ ni wɔkwɛ. Shi Kristofoi le akɛ toiŋjɔlɛ kɛ shweshweeshwe ni ebaafee tamɔ nɔ ni ekolɛ je lɛ ená lɛ fɛɛ sɛɛ lɛ, nɔ ko kwraa tsakeko. Ŋkomeŋfa nifeemɔi, nyɛ̃ɛ, yiwalɛ, wekui ni fiteɔ, jeŋba shara, hela, ŋkɔmɔyeli, kɛ gbele baakã he aya nɔ. Enɛ hewɔ lɛ kɛ́ oha ohiɛ hi nibii ni yaa nɔ yɛ je lɛŋ lɛ anɔ, ni obo gbalɛ kɔkɔbɔɔ ni yɔɔ Nyɔŋmɔ Wiemɔ lɛ mli lɛ toi lɛ, bolɔmɔ akɛ “ayɛ toiŋjɔlɛ kɛ shweshweeshwe shihilɛ” lɛ lakaŋ bo.—Marko 13:32-37; Luka 21:34-36.
[Shishigbɛ niŋmai]
a J. F. Rutherford gbo yɛ January 8, 1942, ni N. H. Knorr baye esɛɛ akɛ Buu Mɔɔ Asafo lɛ sɛinɔtalɔ.
b Yɛ November 20, 1940 lɛ, Germany, Italy, Japan, kɛ Hungary kɛ amɛwaonaa gbɛi wo “Jeŋmaji Akpaŋmɔ hee” ko shishi, ni gbii ejwɛ sɛɛ lɛ Vatican tswa Mass kɛ sɔlemɔ kɛha jamɔŋ toiŋjɔlɛ koni nibii agbɛjianɔtoo hee aba lɛ he adafi kɛtsɔ redio nɔ. Nakai “Kpaŋmɔ hee” lɛ eteee shi.
c Triniti he jwɛŋmɔ lɛ jɛ blema Babilon, he ni ajaa hulu nyɔŋmɔ Shamash, nyɔŋtsere nyɔŋmɔ Sin, kɛ ŋulami nyɔŋmɔ Ishtar yɛ akɛ nyɔŋmɔi etɛ lɛ. Mizraim nyiɛ nɔkwɛmɔ nɔ nɛɛ sɛɛ, ni ejaa Osiris, Isis, kɛ Horus. Afeɔ Ashur nyɔŋmɔ titri, Asshur he mfoniri akɛ eyɛ yitsei etɛ. Anaa amagai ni tamɔ nakai nɔŋŋ yɛ Katolik sɔlemɔi amli ni miitsɔɔ akɛ Nyɔŋmɔ yɛ yitsei etɛ.
d Webster’s Third New International Dictionary ni afee yɛ 1993 lɛ tsɔɔ bɔ ni Yehowa Nyɔŋmɔ ji akɛ “jeŋ muu fɛɛ Nyɔŋmɔ ni ayoo lɛ kɛ Nyɔŋmɔ pɛ ni Yehowa Odasefoi jaa lɛ.”
[Akrabatsa ni yɔɔ baafa 250]
“Toiŋjɔlɛ” ni kɛ Ehe Kpaaa Gbee Lɛ
Eyɛ mli akɛ Jeŋmaji Ekomefeemɔ lɛ jaje akɛ 1986 ji Majimaji Ateŋ Toiŋjɔlɛ Afi moŋ, shi tawuu nifeemɔ ni akɛgbeɔ he lɛ tee nɔ kɛ foi. World Military and Social Expenditures 1986 lɛ kɛ sane mlitsɔɔmɔ ni hiɛdɔɔ yɔɔ mli nɛɛ haa:
Yɛ 1986 mli lɛ, shika ni afite yɛ tawuu nii afeemɔ he lɛ yashɛ dɔlai akpekpei akpei 900.
Kulɛ abaanyɛ akɛ jeŋ muu fɛɛ shika ni afiteɔ yɛ tawuu nii ahe yɛ ŋmɛlɛtswaa kome mli lɛ ahe tsofai ni kuɔ helai anaa ní akɛgbu gbɔmɛi akpekpei 3.5 ni gboi daa afi yɛ helai ni tsɛŋeɔ mɛi ni abaanyɛ afee he nɔ ko ni ekamɔ amɛ lɛ.
Yɛ jeŋ muu fɛɛ lɛ, kɛ aja mli lɛ, mɔ kome yɛ mɛi enumɔ fɛɛ mli hi ohia futaa mli. Kulɛ abaanyɛ akɛ shika ni je lɛ fite yɛ tawuu nii ahe yɛ gbii enyɔ pɛ mli lɛ alɛ nɛkɛ gbɔmɛi ni hɔmɔ gbe amɛ nɛɛ afi sɔŋŋ.
Hewalɛ ni yɔɔ okpɛlɛmii ni abua naa akɛ nuklea tawuu nii amli lɛ fa fe Chernobyl okpɛlɛm ni fɛ lɛ nɔ lɛ toi 160,000,000.
Kulɛ abaanyɛ afɛ nuklea okpɛlɛm ni ehewalɛ fe okpɛlɛm ni aŋmɛɛ he afɔ Hiroshima nɔ yɛ 1945 mli lɛ toi 500 sɔŋŋ.
Abua nuklea tawuu nii ni fe nɔ ni aŋmɛɛ he ashwie Hiroshima nɔ lɛ nɔ toi akpekpe kome lɛ anaa. Efe okpɛlɛmii ni afɛlɛ yɛ Jeŋ Ta II mli, beni gbɔmɛi akpekpei 38 gboi lɛ nɔ toi 2,700.
Tawuu ebatsɔ nifeemɔ ni baa kpitiokpitio ni yeɔ awui fe be fɛɛ. Gbɔmɛi ni gboi yɛ tawuu mli yɛ afii ohai 18 lɛ mli lɛ feɔ akpekpei 4.4, ni yɛ afii ohai 19 lɛ mli lɛ, akpekpei 8.3, ni eyafee akpekpei 98.8 yɛ wɔ afii ohai 20 nɛɛ mli klɛŋklɛŋ afii 86 lɛ mli. Kɛjɛ afii ohai 18 lɛ mli kɛbaa nɛɛ, mɛi ni gboiɔ yɛ tawuu mli lɛ efa oyayaayai shii ekpaa fe je lɛŋ gbɔmɛi ayifalɛ. Kɛ akɛ mɛi ni gboi yɛ tawuu mli yɛ afii ohai 20 lɛ mli lɛ to he lɛ, efe afii ohai 19 nɔ lɛ nɔ toi nyɔŋma.
[Mfonirii ni yɔɔ baafa 247]
Taakɛ agba afɔ shi yɛ kooloo ni tsuɔ tamɔ muneele lɛ he lɛ, Jeŋmaji Akpaŋmɔ lɛ tee bu kwɔŋkwɔŋ lɛ mli yɛ Jeŋ Ta II be mli shi atsiɛ ehiɛ ekoŋŋ akɛ Jeŋmaji Ekomefeemɔ
[Mfonirii ni yɔɔ baafa 249]
Yɛ Jeŋmaji Ekomefeemɔ lɛ “Toiŋjɔlɛ Afi” lɛ sɛɛfimɔ mli lɛ, je lɛŋ jamɔ mli najiaŋdamɔlɔi lɛ kɛ babel sɔlemɔi sɔrɔtoi ha yɛ Assisi, Italia, shi amɛteŋ mɔ kome folo po sɔleee ehaaa Nyɔŋmɔ hiɛkalɔ lɛ, Yehowa