Yitso 43

Maŋ ni Kpɛlɛɔ Kaŋkaŋ Fɛfɛo Lɛ

Ninaa 16​—Kpojiemɔ 21:9–22:5

Saneyitso: Yerusalem Hee lɛ mlitsɔɔmɔ

Emlibaa be: Beni amanehulu kpeteŋkpele lɛ eba ni akɛ Abonsam ewo bu kwɔŋkwɔŋ lɛ mli lɛ sɛɛ

1, 2. (a) Nɛgbɛ bɔfo ko kɛ Yohane tee koni eyakwɛ Yerusalem Hee lɛ, ni mɛɛ sɔrɔtofeemɔ wɔkadiɔ yɛ biɛ? (b) Mɛni hewɔ enɛ ji Kpojiemɔ naagbee kwraa lɛ?

BƆFO ko eŋɔ Yohane kɛtee ŋa lɛ nɔ koni eyatsɔɔ lɛ Babilon Kpeteŋkpele lɛ. Agbɛnɛ bɔfoi akuu nɛɛ ateŋ mɔ kome kudɔ Yohane kɛtee gɔŋ ko ni kwɔ nɔ. Mɛɛ sɔrɔtofeemɔ enaa nɛkɛ! Naa maŋ ni jeee nɔ ni he tseee, ejeee nɔ ni bɛ jeŋba tamɔ Babilon ajwamaŋ lɛ, shi Yerusalem Hee lɛ—eyɛ krɔŋŋ, mumɔŋ nɔ, kɛ krɔŋkrɔŋ—ni eekpeleke shi kɛmiijɛ ŋwɛi diɛŋtsɛ.—Kpojiemɔ 17:1, 5.

² Shikpɔŋ nɔ Yerusalem po nako anunyam ni tamɔ nɛkɛ da. Yohane kɛɔ wɔ akɛ: “Ni bɔfoi kpawo ni hiɛ tɔi kpawo ni eyimɔ obɔbɔ kɛ naagbee haomɔi kpawo lɛ ateŋ mɔ kome ba miŋɔɔ ni ekɛmi bawie ekɛɛ: Ba, ni matsɔɔo ayemforo lɛ ni ji Toobi lɛ ŋa lɛ. Ni eŋɔ mi yɛ mumɔ mli kɛtee gɔŋ kpele ko ni kwɔ nɔ, ni etsɔɔ mi maŋ kpeteŋkpele lɛ ni ji Yerusalem krɔŋkrɔŋ lɛ ni ejɛ Nyɔŋmɔ ŋɔɔ yɛ ŋwɛi eekpeleke shi, ni ehiɛ Nyɔŋmɔ anunyam lɛ.” (Kpojiemɔ 21:9-11a) Yohane jɛ gɔŋ lɛ nɔ he ni kwɔ lɛ ekwɛ maŋ fɛfɛo lɛ kɛ emli anunyam lɛ fɛɛ fitsofitso. Gbɔmɛi ni yɔɔ hemɔkɛyeli lɛ kɛ hehiamɔ ekpa ebaa gbɛ kɛjɛ be mli ni adesai gbee shi kɛbote esha kɛ gbele mli lɛ. Yɛ naagbee lɛ, ebashɛ shi! (Romabii 8:19; 1 Korintobii 15:22, 23; Hebribii 11:39, 40) No ji mumɔŋ maŋ ni yɔɔ fɛo waa lɛ, ni emuuyeli mlihiɛlɔi anɔkwafoi 144,000 yɔɔ mli, ni ekrɔŋkrɔŋfeemɔ kpɛlɛɔ ni ejieɔ Yehowa diɛŋtsɛ anunyam lɛ kpo lɛ. Naa Kpojiemɔ naagbee kwraa lɛ!

 3. Te Yohane tsɔɔ Yerusalem Hee lɛ hefɛo lɛ mli eha tɛŋŋ?

³ Yerusalem Hee lɛ fɛo feɔ mɔ naakpɛɛ kɛ miishɛɛ fɛɛ: “Ni ekpɛlɛɔ tamɔ tɛ ni jara wa fe fɛɛ, tamɔ yaspi tɛ ni mli tse akɛ kristalo ashwishwɛ. Eyɛ gbogbo kpeteŋkpele ni kwɔ, kɛ agboi nyɔŋma kɛ enyɔ, ni bɔfoi nyɔŋma kɛ enyɔ damɔ agboi lɛ anɔ, ni aŋmala gbɛii yɛ nɔ ni ji Israelbii lɛ akutsei nyɔŋma kɛ enyɔ lɛ agbɛii. Agboi etɛ yɛ bokagbɛ, ni agboi etɛ yɛ kooyigbɛ, ni agboi etɛ yɛ wuoyigbɛ, ni agboi etɛ yɛ anaigbɛ. Ni maŋ lɛ gbogbo lɛ yɛ shishitoi (aloo faneshii) nyɔŋma kɛ enyɔ, ni Toobi lɛ bɔfoi nyɔŋma kɛ enyɔ lɛ agbɛii yɛ amɛmli.” (Kpojiemɔ 21:11b-14) Kwɛ bɔ ni esa jogbaŋŋ ha akɛ klɛŋklɛŋ nii ni Yohane ŋma fɔ shi lɛ aaafee nɔ ko ni kpɛlɛɔ kaŋkaŋ! Ekpɛlɛɔ ni eyɛ fɛo tamɔ ayemforo hee, no hewɔ lɛ Yerusalem Hee lɛ ji Kristo hefatalɔ ko ni sa. Ekpɛlɛɔ diɛŋtsɛ, akɛ nii ni sa “lai atsɛ lɛ” bɔɔ nii.—Yakobo 1:17.

 4. Mɛni tsɔɔ akɛ Yerusalem Hee lɛ jeee heloo naa Israel maŋ lɛ?

⁴ Aŋmala Israel akutsei 12 lɛ agbɛii yɛ egboi 12 lɛ anɔ. No hewɔ lɛ 144,000 lɛ ni asɔo amɛnaa “kɛjɛ Israelbii lɛ akutso fɛɛ akutso mli” lɛ feɔ nɛkɛ okadi maŋ nɛɛ. (Kpojiemɔ 7:4-8) Yɛ enɛ kɛ gbeekpamɔ naa lɛ, nɔ ni yɔɔ shishitoo tɛi lɛ anɔ ji Toobi lɛ bɔfoi 12 lɛ agbɛii. Hɛɛ, Yerusalem Hee lɛ jeee heloo naa Israel maŋ ni atswa ama Yakob bihii 12 lɛ anɔ lɛ. Eji mumɔŋ Israel, ni atswa ama “bɔfoi lɛ kɛ gbalɔi lɛ” ashishitoo lɛ nɔ.—Efesobii 2:20.

 5. Yerusalem Hee lɛ “gbogbo kpeteŋkpele ni kwɔ” lɛ kɛ anɔkwale ni eji akɛ akɛ bɔfoi edamɔ egboi lɛ anaa lɛ tsɔɔ mɛni?

⁵ Okadi maŋtiase lɛ yɛ gbogbo kpeteŋkpele ko. Yɛ blema bei amli lɛ, atswaa maji agbogboi yɛ hefamɔ hewɔ koni etsi henyɛlɔi anaa. Yerusalem Hee lɛ “gbogbo kpeteŋkpele ni kwɔ” lɛ tsɔɔ akɛ eyɛ shweshweeshwe yɛ mumɔŋ. Jalɛ henyɛlɔ ko, mɔ ni he tseee loo eyeee anɔkwale ko nyɛŋ ana gbɛ abote mli kɔkɔɔkɔ. (Kpojiemɔ 21:27) Shi kɛha mɛi ni aŋmɛɔ amɛ gbɛ ni amɛbaa mli lɛ, maŋ fɛfɛo nɛɛ mlibotemɔ lɛ tamɔ aabote Paradeiso. (Kpojiemɔ 2:7) Beni ashwie Adam sɛɛ lɛ, aha kerubim badamɔ shishijee Paradeiso lɛ hiɛ koni amɛtsi adesai ni he tseee lɛ agbɛ. (1 Mose 3:24) Nakai nɔŋŋ hu, akɛ bɔfoi edamɔ maŋ krɔŋkrɔŋ Yerusalem lɛ agboi lɛ anaa koni akɛbu maŋ lɛ mumɔŋ shweshweeshwe shihilɛ lɛ he. Yɛ anɔkwale mli lɛ, bɔfoi ji mɛi ni buɔ Kristofoi ni afɔ amɛ mu lɛ asafo lɛ, ni bafeɔ Yerusalem Hee lɛ he kɛjɛɔ Babilon mujiwoo he, yɛ naagbee gbii nɛɛ fɛɛ mli.—Mateo 13:41.

Maŋ lɛ Susumɔ

 6. (a) Te Yohane tsɔɔ maŋ lɛ susumɔ lɛ mli eha tɛŋŋ, ni mɛni nɛkɛ susumɔ nɛɛ tsɔɔ? (b) Mɛni baanyɛ atsɔɔ bɔ ni susumɔ lɛ ji “gbɔmɔ susumɔ nɔ, ni yɛ nakai beaŋ nɔŋŋ lɛ eji bɔfo susumɔ nɔ” lɛ mli? (Kwɛmɔ shishigbɛ niŋmaa lɛ.)

⁶ Yohane tee nɔ yɛ esane lɛ gbaa mli: “Ni mɔ ni kɛ mi wie lɛ hiɛ shika gãla susumɔ tso ko, koni ekɛsusu maŋ lɛ kɛ egboi lɛ kɛ egbogbo lɛ. Ni maŋ lɛ ka shi koji ejwɛ, ni ekɛlɛ tamɔ elɛɛmɔ nɔŋŋ. Ni ekɛ gãla lɛ susu maŋ lɛ, ni efee stadioi akpei nyɔŋma kɛ enyɔ. Ekɛlɛ kɛ elɛɛmɔ kɛ ekwɔlɛ ye egbɔ. Ni esusu gbogbo lɛ, efee ninetalɔi oha kɛ nyɔŋmai ejwɛ kɛ ejwɛ yɛ gbɔmɔ susumɔ nɔ ni bɔfo lɛ hiɛ lɛ naa.” (Kpojiemɔ 21:15-17) Beni asusu sɔlemɔ we lɛ, enɛ ma Yehowa yiŋtoo ni kɔɔ he lɛ mlibaa nɔ mi. (Kpojiemɔ 11:1) Agbɛnɛ bɔfo lɛ ni susuɔ Yerusalem Hee lɛ tsɔɔ bɔ ni Yehowa yiŋtoo ni kɔɔ nɛkɛ anunyam maŋ nɛɛ he lɛ tsakeee lɛ.a

 7. Mɛni sa kadimɔ yɛ maŋtiase lɛ susumɔi lɛ ahe?

⁷ Mɛɛ naakpɛɛ maŋ enɛ ji nɛkɛ! Maŋ nɛɛ yɛ koji ejwɛ ni yeɔ egbɔ, ni elɛɛmɔ kɛ ekɛlɛ feɔ stadioi 12,000 (aaafee shitoi 1,380) kɛbɔle, ni gbogbo ni shɛɔ ninetalɔi 144 ebɔle ehe, aloo nanetalɔi 210, yɛ ekwɔlɛ mli. Maŋ diɛŋtsɛ ko nyɛŋ ana susumɔ ni tamɔ nɛkɛ. Ebaahe shikpɔŋkuku ni edalɛ aaafee ŋmɛnɛŋmɛnɛ beaŋ Israel toi 14, ni ekwɔlɛ baashɛ aaafee shitoi 350 kɛmiibote ŋwɛiniiaŋ! Akɛ Kpojiemɔ ha yɛ okadii amli. No hewɔ lɛ, mɛni ji nɔ ni nɛkɛ susumɔi nɛɛ kɛɔ wɔ yɛ ŋwɛi Yerusalem Hee lɛ he?

 8. Mɛni enɛɛmɛi tsɔɔ (a) maŋ lɛ gbogboi ni ekwɔlɛ ji ninetalɔi 144 lɛ? (b) maŋ lɛ dalɛ ni ji stadioi 12,000 susumɔ lɛ? (d) maŋ lɛ ni yeɔ emuu yɛ ekoji ejwɛ fɛɛ lɛ?

⁸ Egbogbo ni ekwɔlɛ shɛɔ ninetalɔi 144 lɛ kaiɔ wɔ akɛ mɛi ni Nyɔŋmɔ eŋɔ amɛ akɛ emumɔŋ bii 144,000 feɔ nakai maŋ lɛ. Akɛ yibɔ okadi ni ji 12 ni jeɔ kpo yɛ maŋ lɛ dalɛ ni feɔ stadioi 12,000—yɛ ekɛlɛ, elɛɛmɔ, kɛ ekwɔlɛ ni yeɔ egbɔ lɛ mli lɛ—tsuɔ nii yɛ okadi gbɛ nɔ yɛ gbɛjianɔtoo mli yɛ Biblia gbalɛ mli. No hewɔ lɛ, Yerusalem Hee lɛ ji asafo ni ato he gbɛjianɔ jogbaŋŋ ni nɔ bɛ koni akɛtsu Nyɔŋmɔ naanɔ yiŋtoo he nii. Yerusalem Hee lɛ, kɛ Maŋtsɛ Yesu Kristo fɛɛ ji Yehowa Maŋtsɛyeli gbɛjianɔtoo lɛ. Agbɛnɛ, bɔ ni maŋ lɛ ka shi lɛ hu yɛ: koji ejwɛ ni yeɔ egbɔ pɛpɛɛpɛ. Yɛ Salomo sɔlemɔtsu lɛ mli lɛ, Krɔŋkrɔŋ Fe Fɛɛ lɛ, ni jɛmɛ ni Yehowa yɔɔ lɛ he okadi yɔɔ jɛmɛ lɛ feɔ koji ejwɛ ko ni yeɔ emuu. (1 Maŋtsɛmɛi 6:19, 20) Belɛ kwɛ bɔ ni esa jogbaŋŋ, akɛ Yerusalem Hee lɛ, ni Yehowa diɛŋtsɛ anunyam lɛ haa ekpɛɔ kaŋkaŋ lɛ, anaa akɛ eji koji ejwɛ ko ni yeɔ emuu! Esusumɔi lɛ fɛɛ ŋmɛɔ pɛpɛɛpɛ yɛ emuuyeli mli. Eji maŋ ni tɔmɔi loo kpa ko bɛ he.—Kpojiemɔ 21:22.

Tsumaa Nibii ni Jara Wa

 9. Te Yohane tsɔɔ tsumaa nibii ni akɛtswa maŋ lɛ mli eha tɛŋŋ?

⁹ Yohane tee nɔ etsɔɔ bɔ ni maŋ nɛɛ ji lɛ mli: “Ni nɔ ni akɛtswa egbogbo lɛ ji yaspi tɛ, ni maŋ lɛ shika krɔŋŋ ni tamɔ ashwishwɛ krɔŋŋ ni. Ni maŋ lɛ gbogbo lɛ shishitoi (faneshii) lɛ awula lɛ kɛ tɛi ni jara wa sɔrɔtoi fɛɛ: Klɛŋklɛŋ shishitoo lɛ yaspi, nɔ ni ji enyɔ lɛ safiro, nɔ ni ji etɛ lɛ kalkedon, nɔ ni ji ejwɛ lɛ smaragdo, nɔ ni ji enumɔ lɛ sardoniki, nɔ ni ji ekpaa lɛ sardio, nɔ ni ji kpawo lɛ krisolito, nɔ ni ji kpaanyɔ lɛ berilo, nɔ ni ji nɛɛhu lɛ topasion, nɔ ni ji nyɔŋma lɛ krisopraso, nɔ ni ji nyɔŋma kɛ ekome lɛ hiakinto, nɔ ni ji nyɔŋma kɛ enyɔ lɛ ametisto. Ni agboi nyɔŋma kɛ enyɔ lɛ adiagbai nyɔŋma kɛ enyɔ ni, agbo kome lɛ, adiagba kome akɛfee. Ni maŋ lɛ blohu lɛ shika krɔŋŋ ni, ni emli tse tamɔ ashwishwɛ.”—Kpojiemɔ 21:18-21.

10. Anɔkwale ni eji akɛ akɛ yaspi, shika, kɛ “tɛi ni jara wa sɔrɔtoi fɛɛ” tswa maŋ lɛ tsɔɔ mɛni?

¹⁰ Bɔ ni ama maŋ lɛ aha lɛ yɛ fɛo ni ekpɛlɛɔ kaŋkaŋ lɛlɛŋ. Ni akɛ je nɛŋ nibii, shikpɔŋ nɔ tsumaa nibii tamɔ su loo tɛi aaama lɛ, wɔkaneɔ yaspi, kɛ shika krɔŋŋ kɛ “tɛi ni jara wa sɔrɔtoi fɛɛ.” Kwɛ bɔ ni enɛɛmɛi sa ŋwɛi tsutswaa nibii ha! Nɔ ko nɔ ko bɛ ni baanyɛ afee fɛo tamɔ nakai. Akɛ shika ŋmiiŋmi ha blema kpaŋmɔ adeka lɛ he fɛɛ, ni yɛ Biblia mli lɛ, akɛ nii ni tamɔ nɛkɛ damɔɔ shi kɛhaa nibii ni hi ni sɛɛnamɔ yɔɔ he. (2 Mose 25:11; Abɛi 25:11; Yesaia 60:6, 17) Shi Yerusalem Hee lɛ kɛ maŋ lɛ blohu lɛ fɛɛ lɛ “shika krɔŋŋ . . . ni emli tse tamɔ ashwishwɛ,” ni tsɔɔ hefɛo kɛ jara ni haa ŋmiŋmi mɔɔ mɔ ni akɛtswa.

11. Mɛni maa nɔ mi akɛ mɛi ni feɔ Yerusalem Hee lɛ kɛ mumɔŋ hetsemɔ ni yɔɔ krɔŋŋ fe fɛɛ baakpɛ?

¹¹ Adesa tsɔne ni ekɛsereɔ su mli nii ko bɛ ni baanyɛ asere shika ni yɔɔ krɔŋŋ ni tamɔ nɛkɛ! Shi Yehowa ji Niiahetsuulɔ Nukpa lɛ. Etaa shi “akɛ jwiɛtɛi hetsuulɔ kɛ krɔŋŋfeelɔ,” ni etsuuɔ mumɔŋ Israel mli bii aŋkroaŋkroi lɛ ahe “tamɔ shika loo jwiɛtɛi,” ni ejieɔ muji ni yɔɔ amɛmli lɛ fɛɛ kɛjɛɔ amɛmli. No hewɔ lɛ aŋkroaŋkroi ni atsuu amɛhe, ni aha amɛfee krɔŋŋ nɛkɛ ji mɛi ni yɛ naagbee lɛ amɛfeɔ Yerusalem Hee lɛ, ni yɛ nɛkɛ gbɛ nɔ lɛ Yehowa kɛ tsutswaa nibii ni wala yɔɔ mli ni kɛ mumɔŋ krɔŋŋfeemɔ kpɛlɛɔ kaŋkaŋ tswaa maŋ lɛ.—Maleaki 3:3, 4.

12. Mɛni ji nɔ ni nɛkɛ anɔkwalei nɛɛ tsɔɔ (a) maŋ lɛ shishitoi lɛ ni akɛ tɛi 12 ni jara wa ewula lɛ lɛ? (b) akɛ maŋ lɛ agboi lɛ ji adiagbai lɛ?

¹² Maŋ lɛ shishitoi lɛ po yɛ fɛo, ni akɛ ojarawa tɛi 12 ewula lɛ. Enɛ haa wɔkaiɔ blema Yuda osɔfonukpa lɛ, ni yɛ gbijurɔyelii abe mli lɛ ewoɔ efod ni akɛ ojarawa tɛi sɔrɔtoi 12 etara mli tamɔ nɔ ni atsɔɔ mli yɛ biɛ nɛɛ lɛ. (2 Mose 28:15-21) Yɛ anɔkwale mli lɛ, enɛ jeee nɔ ko ni ba trukaa kɛkɛ! Shi moŋ, emaa Yerusalem Hee lɛ osɔfoi anitsumɔ, ni Yesu, akɛ Osɔfonukpa lɛ, eji “la ni kpɛɔ yɛ mli” lɛ nɔ mi. (Kpojiemɔ 20:6; 21:23; Hebribii 8:1) Agbɛnɛ hu, Yerusalem Hee lɛ nɔ atsɔɔ ni akɛ Yesu osɔfonukpa lɛ sɔɔmɔ nitsumɔ lɛ mli sɛɛnamɔi lɛ bahaa adesai. (Kpojiemɔ 22:1, 2) Maŋ lɛ agboi 12, ni eko fɛɛ eko ji adiagba kome ni yɔɔ fɛo babaoo lɛ haa wɔkaiɔ Yesu nɔkwɛmɔnɔ ko ni ekɛ Maŋtsɛyeli lɛ to adiagba kome ni jara wa waa he lɛ. Mɛi fɛɛ ni tsɔɔ nakai agboi lɛ amli lɛ ejie hiɛsɔɔ diɛŋtsɛ kpo amɛha mumɔŋ nibii ni jara wawai.—Mateo 13:45, 46; okɛto Hiob 28:12, 17, 18 he.

La Maŋ

13. Mɛni Yohane kɛɛ yɛ Yerusalem Hee lɛ he kɛnyiɛ sɛɛ, ni mɛni hewɔ sɔlemɔtsu diɛŋtsɛ ko he ehiaaa maŋ lɛ?

¹³ Yɛ Salomo be lɛ mli lɛ, nɔ ni keteɔ Yerusalem nɔ ji sɔlemɔtsu ko ni ama yɛ maŋtiase lɛ fa ni kwɔ fe fɛɛ ni ji Moria Gɔŋ ni yɔɔ kooyigbɛ lɛ nɔ. Shi Yerusalem Hee lɛ hu? Yohane kɛɔ akɛ: “Ni minaaa sɔlemɔtsu yɛ mli; ejaakɛ Nuŋtsɔ [Yehowa] Nyɔŋmɔ Ofe lɛ kɛ Toobi lɛ ji esɔlemɔtsu. Ni hulu loo nyɔŋtsere ehiaaa maŋ lɛ, ni etso aloo ekpɛ yɛ mli; ejaakɛ Nyɔŋmɔ anunyam lɛ tsoɔ yɛ mli, ni Toobi lɛ ji la ni kpɛɔ yɛ mli.” (Kpojiemɔ 21:22, 23) Yɛ anɔkwale mli lɛ, ehe ehiaaa ni atswa sɔlemɔtsu diɛŋtsɛ ko yɛ biɛ. Blema Yudafoi asɔlemɔtsu lɛ ji nɔkwɛmɔnɔ ko kɛkɛ, ni nɔ ni ji pɔtɛɛ kɛha nakai nɔkwɛmɔnɔ lɛ, mumɔŋ sɔlemɔtsu kpeteŋkpele lɛ, ehi shi kɛjɛ be mli ni Yehowa fɔ Yesu mu akɛ Osɔfonukpa yɛ afi 29 Ŋ.B. lɛ. (Mateo 3:16, 17; Hebribii 9:11, 12, 23, 24) Kɛ sɔlemɔtsu yɛ lɛ, belɛ no tsɔɔ akɛ osɔfoi akuu ni miisha afɔlei amɛha Yehowa yɛ gbɔmɛi lɛ ahewɔ hu yɛ. Shi mɛi fɛɛ ni ji Yerusalem Hee lɛ mli bii lɛ ji osɔfoi. (Kpojiemɔ 20:6) Ni akɛ afɔleshaa kpeteŋkpele lɛ, Yesu wala akɛ adesa ni yeɔ emuu lɛ eha shikome nyɔŋlo kɛha bei fɛɛ. (Hebribii 9:27, 28) Agbɛnɛ, mɔ fɛɛ mɔ ni hiɔ maŋ lɛ mli lɛ nyɛɔ eyaa Yehowa hiɛ diɛŋtsɛ.

14. (a) Mɛni hewɔ hulu kɛ nyɔŋtsere he ehiaaa Yerusalem Hee lɛ koni ekpɛ yɛ mli lɛ? (b) Mɛni Yesaia gbalɛ lɛ kɛɔ yɛ Yehowa jeŋ muu fɛɛ gbɛjianɔtoo lɛ he, ni enɛ kɔɔ Yerusalem Hee lɛ he yɛ mɛɛ gbɛ nɔ?

¹⁴ Beni Yehowa anunyam lɛ ho Mose he yɛ Sinai Gɔŋ lɛ nɔ lɛ, eha Mose hiɛ kpɛ kaŋkaŋ bɔ ni ehe bahia ni eha ehiɛ kɛ ebɛŋkɛ enanemɛi Israelbii lɛ. (2 Mose 34:4-7, 29, 30, 33) Belɛ ani obaanyɛ osusu maŋ ni Yehowa anunyam eha ekpɛ ni ekpɛmɔ hiɔ shi daa lɛ he? Maŋ ni tamɔ nɛkɛ bɛ gbɛkɛ. Hulu loo nyɔŋtsere diɛŋtsɛ he ehiaaa maŋ nɛɛ. Ebaaha la akpɛ kɛya naanɔ. (Okɛto 1 Timoteo 6:16 he.) Yerusalem Hee lɛ hiɔ kpɛmɔ ni tamɔ nɛkɛ mli. Yɛ anɔkwale mli lɛ, nɛkɛ ayemforo nɛɛ kɛ e-Yemforowu Maŋtsɛ lɛ batsɔɔ Yehowa jeŋ muu fɛɛ gbɛjianɔtoo—e-“Yoo” lɛ, “ŋwɛi Yerusalem” lɛ maŋtiase—ni Yesaia gba nɛkɛ yɛ ehe lɛ: “Jeee hulu baatsɔ ola shwane dɔŋŋ, ni asaŋ jeee nyɔŋtsere baakpɛ ni jeŋ atse ahao; shi moŋ Yehowa aaatsɔ ola kɛaatee naanɔ, ni o-Nyɔŋmɔ lɛ aaatsɔ onunyam. Ohulu lɛ enyɔŋ shi dɔŋŋ, ni onyɔŋtsere lɛ hu gboŋ; ejaakɛ Yehowa aaatsɔ ola kɛaatee naanɔ, ni okɔmɔyeli gbii lɛ hu asɛɛ aaafo.”—Yesaia 60:1, 19, 20; Galatabii 4:26.

La Kɛha Jeŋmaji Lɛ

15. Mɛɛ Kpojiemɔ wiemɔi ni kɔɔ Yerusalem Hee lɛ he tamɔ Yesaia gbalɛ lɛ nɔŋŋ?

¹⁵ Nɛkɛ gbalɛ nɛɛ nɔŋŋ gba fɔ shi akɛ: “Ni jeŋmaji aaanyiɛ kɛaaba ola lɛ he, ni maŋtsɛmɛi aaaba kpɛmɔ ni kpɛɔ yɛ onɔ lɛ he.” (Yesaia 60:3) Kpojiemɔ tsɔɔ akɛ wiemɔi nɛɛ baakɔ Yerusalem Hee lɛ he: “Ni jeŋmaji lɛ aaanyiɛ yɛ ela lɛ mli, ni shikpɔŋ lɛ nɔ maŋtsɛmɛi lɛ aaaŋɔ amɛnunyam lɛ kɛba mli. Ni egboi lɛ aŋamɔŋ kwraa shwane; ejaakɛ nyɔɔŋ bɛ jɛi; ni amɛkɛ jeŋmaji lɛ anunyam lɛ kɛ amɛwoo lɛ aaaba mli.”—Kpojiemɔ 21:24-26.

16. Namɛi ji “jeŋmaji” lɛ ni baanyiɛ yɛ Yerusalem Hee lɛ la lɛ mli lɛ?

¹⁶ Namɛi ji nɛkɛ “jeŋmaji” ni nyiɛɔ yɛ Yerusalem Hee lɛ la lɛ mli lɛ? Amɛji gbɔmɛi, ni be ko lɛ amɛji jeŋmaji ni yɔɔ jeŋ fɔŋ nɛɛ mli lɛ mlibii, ni kpɛlɛɔ la ni kpɛɔ kɛtsɔɔ anunyam ŋwɛi maŋ nɛɛ nɔ lɛ nɔ lɛ. Amɛteŋ mɛi titri ji asafo babaoo lɛ, ni amɛba momo kɛjɛ “jeŋmaŋ fɛɛ jeŋmaŋ kɛ akutsei kɛ maji kɛ majianɔwiemɔi” amli ni kɛ Yohane kuu lɛ jaa Nyɔŋmɔ nyɔɔŋ kɛ shwane lɛ. (Kpojiemɔ 7:9, 15) Kɛ Yerusalem Hee lɛ kpeleke shi kɛjɛ ŋwɛi ba lɛ sɛɛ ni Yesu kɛ gbele kɛ gbohiiaje (Hades) naa samfele lɛ tsu nii ni ekɛtee gbohii lɛ ashi lɛ, akpekpei krokomɛi baaba abafata amɛhe, ni kɛjɛ shishijee lɛ, mɛnɛɛmɛi jɛ “jeŋmaji” lɛ ateŋ, ni amɛbasumɔ Yehowa kɛ e-Bi lɛ, Yerusalem Hee lɛ Wu ni tamɔ Toobi lɛ.—Kpojiemɔ 1:18.

17. Namɛi ji “shikpɔŋ lɛ nɔ maŋtsɛmɛi” ni “aaaŋɔ amɛnunyam lɛ kɛba” Yerusalem Hee lɛ mli lɛ?

¹⁷ Belɛ, namɛi ji “shikpɔŋ lɛ nɔ maŋtsɛmɛi” ni “aaaŋɔ amɛnunyam lɛ kɛba mli” lɛ? Amɛjeee shikpɔŋ nɔ maŋtsɛmɛi lɛ diɛŋtsɛ akɛ kuu, ejaakɛ amɛyaa hiɛkpatamɔ mli akɛni amɛkɛ Nyɔŋmɔ Maŋtsɛyeli lɛ wuɔ yɛ Harmagedon lɛ hewɔ. (Kpojiemɔ 16:14, 16; 19:17, 18) Ani maŋtsɛmɛi nɛɛ baanyɛ afee jeŋmaji lɛ amli abladei ni batsɔmɔɔ asafo babaoo lɛ fa, aloo amɛji maŋtsɛmɛi ni atee amɛ shi ni baa amɛhe shi amɛhaa Nyɔŋmɔ Maŋtsɛyeli lɛ yɛ jeŋ hee lɛ mli? (Mateo 12:42) Dabida, ejaakɛ nɛkɛ maŋtsɛmɛi nɛɛ anunyam lɛ ji je lɛ nɔ, ni fɛɛ eho etee. No hewɔ lɛ “shikpɔŋ lɛ nɔ maŋtsɛmɛi” lɛ ni kɛ amɛnunyam baa Yerusalem Hee lɛ mli lɛ baafee 144,000 lɛ, ni “akpɔ amɛ . . . kɛjɛ akutso fɛɛ akutso kɛ wiemɔ fɛɛ wiemɔ kɛ maŋ fɛɛ maŋ kɛ jeŋmaŋ fɛɛ jeŋmaŋ mli” koni amɛkɛ Toobi Yesu Kristo aye nɔ akɛ maŋtsɛmɛi lɛ. (Kpojiemɔ 5:9, 10; 22:5) Amɛkɛ anunyam ni Nyɔŋmɔ kɛha amɛ lɛ baa maŋ lɛ mli koni amɛkɛbafata ekpɛmɔ lɛ he.

18. (a) Namɛi boteŋ Yerusalem Hee lɛ mli? (b) Namɛi pɛ abaaŋmɛ amɛ gbɛ ni amɛbote maŋ lɛ mli?

¹⁸ Yohane tee nɔ akɛ: “Ni nɔ ko ni he tseee kɛ mɔ ni feɔ nihiinii kɛ mɔ ni maleɔ boteŋ mli kwraa, akɛ ja mɛi ni aŋma amɛgbɛi yɛ Toobi lɛ wala wolo lɛ mli lɛ.” (Kpojiemɔ 21:27) Nɔ ko ni Satan nibii agbɛjianɔtoo lɛ ekpa he lɛ nyɛŋ afee Yerusalem Hee lɛ fa. Eyɛ mli akɛ egboi lɛ naa kamɔ daa moŋ, shi mɔ fɛɛ mɔ ni “feɔ nihiinii kɛ mɔ ni maleɔ boteŋ mli kwraa.” Hemɔkɛyeli kwalɔi ehiŋ nakai maŋ lɛ mli ni asaŋ Babilon Kpeteŋkpele lɛ mli bii ehiŋ mli. Ni kɛji akɛ mɔ ko bɔ mɔdɛŋ akɛ eeebule maŋ lɛ kɛtsɔ ewɔsɛɛ be mli bii lɛ fitemɔ yɛ be mli ni amɛyɔɔ shikpɔŋ nɔ lolo lɛ, ahaa amɛ mɔdɛŋbɔɔ lɛ feɔ yaka. (Mateo 13:41-43) Mɛi pɛ “ni aŋma amɛgbɛii yɛ Toobi lɛ wala wolo lɛ mli” lɛ, ni ji 144,000 lɛ pɛ baabote Yerusalem Hee lɛ mli yɛ naagbee.b—Kpojiemɔ 13:8; Daniel 12:3.

Wala Nu Faa Lɛ

19. (a) Te Yohane tsɔɔ bɔ ni atsɔɔ Yerusalem Hee lɛ nɔ akɛ jɔɔmɔi haa adesai lɛ mli eha tɛŋŋ? (b) Mɛɛ be mli “wala nu faa” lɛ hoɔ, ni te wɔfeɔ tɛŋŋ wɔleɔ?

¹⁹ Yerusalem Hee ni kpɛlɛɔ kaŋkaŋ lɛ baafɔse jɔɔmɔi babaoo ashwie adesai anɔ yɛ shikpɔŋ nɔ. Enɛ ji nɔ ni Yohane kase kɛnyiɛ sɛɛ: “Ni etsɔɔ mi wala nu faa, ni yɔɔ krɔŋŋ ni mli tse tamɔ kristalo, miiho kɛmiijɛ Nyɔŋmɔ kɛ Toobi lɛ maŋtsɛsɛi lɛ mli kɛmiitsɔ eblohu lɛ teŋ.” (Kpojiemɔ 22:1, 2a, New World Translation) Mɛɛ be mli nɛkɛ “faa” nɛɛ hoɔ? Akɛni eeho “kɛmiijɛ Nyɔŋmɔ kɛ Toobi lɛ maŋtsɛsɛi lɛ mli” hewɔ lɛ, ebaanyɛ eje shishi yɛ be mli ni Nuŋtsɔ lɛ gbi lɛ je shishi yɛ 1914 lɛ sɛɛ. Enɛ ji be kɛha sane ni atswa he adafi kɛtsɔ tɛtrɛmaŋtɛrɛ ni ji kpawo lɛ kpamɔ kɛ adafitswaa ni ŋɔɔ nɛɛ: “Agbɛnɛ yiwalaheremɔ lɛ kɛ hewalɛ lɛ kɛ maŋtsɛyeli lɛ etsɔ wɔ-Nyɔŋmɔ lɛ nɔ, ni akɛ hegbɛ lɛ eha e-Kristo lɛ.” (Kpojiemɔ 11:15; 12:10) Mumɔ lɛ kɛ ayemforo lɛ miifɔ̃ mɛi ni hiɛ tsui ni ja lɛ nine yɛ naagbee be nɛɛ mli koni amɛbayɛ wala nu lɛ yaka. Faa nɛɛ mli nu lɛ baakã he aho aha mɛi nɛɛ kɛyashi nibii agbɛjianɔtoo nɛɛ naagbee, kɛ agbɛnɛ hu yɛ jeŋ hee lɛ mli, beni Yerusalem Hee lɛ ‘jɛɔ ŋwɛi kpelekeɔ shi kɛjɛɔ Nyɔŋmɔ ŋɔɔ’ lɛ.—Kpojiemɔ 21:2.

20. Mɛni tsɔɔ akɛ wala nu lɛ saŋŋ yɛ momo po?

²⁰ Jeee enɛ ji klɛŋklɛŋ be mli ni akɛ wala nu eha adesai. Beni Yesu yɔɔ shikpɔŋ nɔ lɛ, ewie nu ni kɛ naanɔ wala haa lɛ he. (Yohane 4:10-14; 7:37, 38) Kɛfata he lɛ, Yohane miihe anu ninefɔɔ ni suɔmɔ yɔɔ mli nɛɛ: “Mumɔ lɛ kɛ ayemforo lɛ kɛɔ akɛ: Ba! Ni mɔ ni nuɔ lɛ, ha ni ekɛɛ: Ba! Ni mɔ ni kumai yeɔ lɛ lɛ, ha ni eba, ni mɔ ni sumɔɔ lɛ, ha ni ebayɛ wala nu lɛ yaka.” (Kpojiemɔ 22:17) Aatswa adafi nɛɛ bianɛ po, ni tsɔɔ akɛ wala nu lɛ saŋŋ yɛ momo. Shi yɛ jeŋ hee lɛ mli lɛ, nakai nui lɛ baaho kɛjɛ Nyɔŋmɔ maŋtsɛsɛi lɛ mli kɛtsɔ Yerusalem Hee lɛ mli akɛ faa ni egbɛi lɛ ja.

21. “Wala nu faa” lɛ damɔ shi kɛha mɛni, ni mɛɛ gbɛ nɔ Ezekiel ninaa ni kɔɔ nɛkɛ faa nɛɛ he lɛ yeɔ ebuaa wɔ ni wɔleɔ enɛ?

²¹ Mɛni ji nɛkɛ “wala nu faa” nɛɛ? Nu diɛŋtsɛ ji nibii ni he hiaa kɛha wala lɛ eko. Kɛ niyenii bɛ lɛ, gbɔmɔ baanyɛ ahi shi otsii komɛi, shi kɛ nu bɛ lɛ, ebaagbo aaafee otsi kome pɛ mli. Nu hu fɔɔ muji kɛyaa ni ehe hiaa kɛhaa gbɔmɔtsoŋ hewalɛnamɔ. No hewɔ lɛ, wala nu lɛ baadamɔ shi aha nɔ ko ni he hiaa kɛha wala kɛ adesai agbɔmɔtsoŋ hewalɛnamɔ. Akɛ “wala nu faa” nɛɛ hu he ninaa ha gbalɔ Ezekiel, ni yɛ eninaa lɛ mli lɛ, faa lɛ hoɔ kɛjɛɔ sɔlemɔtsu lɛ mli kɛyaa Ŋshɔ ni Egbo lɛ mli. Kɛkɛ ni naakpɛɛ nii amli naakpɛɛ nii! Nakai nu ni egbo, ni wala bɛ mli, ni emli nui lɛ tamɔ nui ni ebɔɔ yɔɔ mli lɛ tsake ni etsɔ nuŋma ni looi babaoo yɔɔ mli! (Ezekiel 47:1-12) Hɛɛ, ninaa mli faa lɛ kɛ nɔ ko ni tsutsu lɛ egbo baa wala mli, ni emaa nɔ mi akɛ wala nu faa lɛ feɔ gbɛjianɔ ni Nyɔŋmɔ eto kɛtsɔ Yesu Kristo nɔ koni ekɛ adesa wala ni yeɔ emuu aha adesa weku ni “egbo” lɛ he mfoniri. Nɛkɛ faa nɛɛ “mli tse tamɔ kristalo,” ni tsɔɔ bɔ ni Nyɔŋmɔ gbɛjianɔtoi lɛ yɔɔ krɔŋŋ kɛ krɔŋkrɔŋ ha. Etamɔɔɔ Kristendom “nui” ni la nyiɛ mli ni gbeɔ mɔ lɛ.—Kpojiemɔ 8:10, 11.

22. (a) Faa lɛ jeɔ shishi kɛjɛɔ nɛgbɛ, ni mɛni hewɔ enɛ sa jogbaŋŋ lɛ? (b) Wala nu lɛ kɔɔ mɛni he, ni mɛni fata nɛkɛ okadi faa nɛɛ he?

²² Faa lɛ jeɔ shishi kɛjɛɔ “Nyɔŋmɔ kɛ Toobi lɛ maŋtsɛsɛi lɛ mli.” Enɛ sa jogbaŋŋ, ejaakɛ nɔ ni adamɔɔ nɔ akɛ Yehowa gbɛjianɔtoi ni haa wala lɛ haa lɛ ji kpɔmɔ afɔleshaa lɛ, ni akɛ enɛ ha ejaakɛ Yehowa “sumɔ je lɛ, akɛ eŋɔ e-Bi koome lɛ eha, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ena naanɔ wala.” (Yohane 3:16) Wala nu lɛ hu kɔɔ Nyɔŋmɔ Wiemɔ, ni awie he akɛ nu yɛ Biblia lɛ mli lɛ hu he. (Efesobii 5:26) Shi, jeee anɔkwale lɛ pɛ fata wala nu faa lɛ he, shi moŋ Yehowa gbɛjianɔtoo fɛɛ gbɛjianɔtoo, ni damɔ Yesu afɔleshaa, ni abaatsɔ nɔ akpɔ adesai toibolɔi kɛjɛ esha kɛ gbele mli ni eha amɛ naanɔ wala lɛ hu fata he.—Yohane 1:29; 1 Yohane 2:1, 2.

23. (a) Mɛni hewɔ esa akɛ wala nu faa lɛ aaaho kɛaatsɔ Yerusalem Hee lɛ blohu lɛ teŋ lɛ? (b) Mɛɛ ŋwɛi shiwoo ni akɛha Abraham baaba mli beni wala nu lɛ hoɔ babaoo lɛ?

²³ Akɛ kpɔmɔ nɔ lɛ mli sɛɛnamɔ lɛ tsuɔ nii kɛmɔɔ shi yɛ Afii Akpe Nɔyeli lɛ mli kɛtsɔɔ Yesu kɛ esɔfoi bibii 144,000 lɛ osɔfoi anitsumɔ lɛ nɔ. No hewɔ lɛ esa jogbaŋŋ akɛ wala nu faa lɛ aaaho kɛaatsɔ Yerusalem Hee lɛ blohu lɛ teŋ. Enɛ feɔ mumɔŋ Israel, ni kɛ Yesu fɛɛ feɔ Abraham anɔkwa seshi lɛ. (Galatabii 3:16, 29) No hewɔ lɛ, kɛ wala nu lɛ ho babaoo kɛtsɔ okadi maŋ lɛ blohu lɛ teŋ lɛ, “shikpɔŋ lɛ nɔ jeŋmaji fɛɛ” baana hegbɛ ni yeɔ emuu ni amɛjɔɔ amɛ diɛŋtsɛ amɛhe kɛtsɔ Abraham seshi lɛ nɔ. Yehowa shiwoo kɛha Abraham lɛ baaba mli kwraa kɛmɔ shi.—1 Mose 22:17, 18.

Wala Tsei

24. Mɛni Yohane na agbɛnɛ yɛ wala nu faa lɛ afa gbɛ biɛ kɛ biɛ fɛɛ, ni amɛfeɔ mɛni he mfoniri?

²⁴ Yɛ Ezekiel ninaa lɛ mli lɛ, faa lɛ batsɔ faa ni da ni hoɔ kɛ foi, ni gbalɔ lɛ na ni tsei sɔrɔtoi ni woɔ yibii sɔrɔtoi fɛɛ miikwɛ yɛ faa lɛ toi biɛ kɛ biɛ. (Ezekiel 47:12) Shi mɛni ji nɔ ni Yohane na? Enɛ: “Faa lɛ toi biɛ kɛ biɛ fɛɛ lɛ wala tsei lɛ mamɔ shi, ni ewoɔ yibii shii nyɔŋma kɛ enyɔ, ni nyɔŋ fɛɛ nyɔŋ nɔ lɛ ewoɔ yibii, ni tso lɛ yibaai lɛ akɛtsaa jeŋmaji lɛ.” (Kpojiemɔ 22:2b) Esa akɛ nɛkɛ “wala tsei” nɛɛ hu afee Yehowa gbɛjianɔtoo ni ebaatsɔ nɔ ekɛ naanɔ wala aha adesai toibolɔi lɛ fa ko hu he mfoniri.

25. Mɛɛ gbɛjianɔtoo ni fa Yehowa kɛhaa adesai toibolɔi lɛ yɛ jeŋ muu fɛɛ Paradeiso lɛ mli?

²⁵ Mɛɛ gbɛjianɔ ni fa po Yehowa eto kɛha adesai toibolɔi lɛ nɛkɛ! Jeee akɛ amɛbaanyɛ amɛnu nakai nui ni shɛjeɔ mɔ mii lɛ kɛkɛ, shi moŋ amɛbaanyɛ amɛtserɛ yibii sɔrɔtoi ni wajeɔ mɔ kɛjɛ nakai tsei lɛ anɔ yɛ be fɛɛ mli. Oh, eji wɔ klɛŋklɛŋ fɔlɔi lɛ atsui nyɔ amɛmli kɛ gbɛjianɔtoo ni tamɔ nakai ‘ni baa mɔ tsine’ ni yɔɔ Eden Paradeiso lɛ mli lɛ kulɛ! (1 Mose 2:9) Shi agbɛnɛ jeŋ muu fɛɛ Paradeiso yɛ biɛ, ni Yehowa toɔ gbɛjianɔ kɛtsɔɔ nakai okadi tsei lɛ ayibaai anɔ po akɛ nɔ ni “akɛtsaa jeŋmaji lɛ.”c Ehi fe tsofa fɛɛ tsofa, tsei loo baai amli nɔ̃ loo ekroko ni akɛhaa ŋmɛnɛ, ejaakɛ nakai okadi baai lɛ atsamɔ lɛ baahole adesai ni heɔ yeɔ lɛ anɔ kɛya mumɔŋ kɛ gbɔmɔtsoŋ emuuyeli mli.

26. Wala tsei lɛ baanyɛ adamɔ shi kɛha mɛni hu, ni mɛni hewɔ?

²⁶ Nakai tsei lɛ, ni faa lɛ haa amɛnaa nui babaoo lɛ baanyɛ adamɔ shi kɛha 144,000 lɛ ni ji Toobi lɛ ŋa lɛ mli bii lɛ hu. Yɛ be mli ni amɛyɔɔ shikpɔŋ nɔ lɛ, mɛnɛɛmɛi hu nuɔ Nyɔŋmɔ gbɛjianɔtoo kɛha wala kɛtsɔ Yesu Kristo nɔ lɛ. Miishɛɛ sane ji akɛ atsɛ Yesu mumɔŋ nyɛmimɛi nɛɛ yɛ gbalɛ wiemɔ mli akɛ “jalɛ tsei wuji.” (Yesaia 61:1-3; Kpojiemɔ 21:6, New World Translation) Amɛwo mumɔŋ yibii babaoo momo amɛkɛjie Yehowa yi. (Mateo 21:43) Ni yɛ Afii Akpe Nɔyeli lɛ mli lɛ, amɛbaana gbɛfaŋnɔ yɛ kpɔmɔ nɔ lɛ he gbɛjianɔtoo ni akɛhaa ni “akɛtsaa jeŋmaji lɛ” kɛjɛɔ esha kɛ gbele mli lɛ mli gbɛfaŋnɔ.—Okɛto 1 Yohane 1:7 he.

Nyɔɔŋ Bɛ Dɔŋŋ

27. Mɛɛ jɔɔmɔi krokomɛi Yohane tsiɔ ta kɛhaa mɛi ni naa hegbɛ akɛ amɛaabote Yerusalem Hee lɛ mli lɛ, ni mɛni hewɔ akɛɔ akɛ “ni musu ko musu ko (loomɔ ko) bɛ dɔŋŋ” lɛ?

²⁷ Yerusalem Hee lɛ mlibotemɔ—yɛ anɔkwale mli lɛ, hegbɛ ko ni yɔɔ naakpɛɛ babaoo fe enɛ bɛ! Bo lɛ susumɔ enɛ he—nakai be ko mli adesai ni yeee emuu ni baa shi lɛ baanyiɛ Yesu sɛɛ kɛbote ŋwɛi ni amɛyafee anunyam gbɛjianɔtoo ni tamɔ nɛkɛ fa! (Yohane 14:2) Yohane kɛ jɔɔmɔi ni amɛbaana mli ŋɔɔmɔ lɛ ekomɛi haa, yɛ nɛkɛ wiemɔi nɛɛ amli: “Ni musu ko musu ko bɛ dɔŋŋ. Ni Nyɔŋmɔ kɛ Toobi lɛ maŋtsɛsɛi lɛ aaama emli; ni etsuji lɛ aaasɔmɔ lɛ; ni amɛaana ehiɛ, ni egbɛi lɛ aaahi amɛhiɛŋtsei anɔ.” (Kpojiemɔ 22:3, 4) Beni Israel osɔfoyeli lɛ bafee nɔ ni ekpɔtɔ lɛ, Yehowa loomɔ loo musu ba nɔ. (Maleaki 2:2) Yesu jaje akɛ ashi Yerusalem “we” ni yeee anɔkwale lɛ. (Mateo 23:37-39) Shi yɛ Yerusalem Hee lɛ mli lɛ, “musu ko musu ko (loomɔ) bɛ dɔŋŋ.” (Okɛto Zakaria 14:11 he.) Áka emli bii lɛ fɛɛ yɛ shikpɔŋ nɛɛ nɔ kaai ni tamɔ la lɛ mli, ni akɛni amɛye kunim hewɔ lɛ, ‘amɛwo nɔ ni fiteee lɛ kɛ nɔ ni gbooo lɛ.’ Yɛ amɛgbɛfaŋ lɛ, Yehowa le, taakɛ bɔ ni ele yɛ Yesu he lɛ, akɛ amɛgbeŋ shi kɔkɔɔkɔ. (1 Korintobii 15:53, 57) Kɛfata he lɛ, “Nyɔŋmɔ kɛ Toobi lɛ maŋtsɛsɛi lɛ” baahi jɛmɛ, ni ebaaha maŋ lɛ shidaamɔ afee nɔ ni yɔɔ shweshweeshwe kɛya naanɔi fɛɛ mli.

28. Mɛni hewɔ aŋmala Nyɔŋmɔ gbɛi yɛ Yerusalem Hee lɛ mli bii lɛ ahiɛnaai lɛ, ni mɛɛ gbɛkpamɔ ni yɔɔ miishɛɛ ka amɛhiɛ?

²⁸ Taakɛ Yohane diɛŋtsɛ ji lɛ, nakai ŋwɛi maŋ lɛ mli bii ni baaba wɔsɛɛ be mli lɛ fɛɛ baafee Nyɔŋmɔ “tsuji.” Ni bɔ ni amɛji nɛɛ hewɔ lɛ, aŋmaa Nyɔŋmɔ gbɛi yɛ amɛhiɛnaa yɛ faŋŋ mli, ni ayɔseɔ amɛ akɛ lɛ ji amɛ-Nɔtsɛ. (Kpojiemɔ 1:1; 3:12) Amɛbaabu hegbɛ ni amɛna akɛ amɛkɛ sɔɔmɔ krɔŋŋ aaaha lɛ akɛ Yerusalem Hee lɛ fa lɛ akɛ nɔ ni anyɛŋ akɛ nɔ ko ato he. Beni Yesu yɔɔ shikpɔŋ nɔ lɛ, ekɛ shiwoo ko ni yɔɔ miishɛɛ ha mɛi ni akpaa gbɛ akɛ amɛbaafee nɔyelɔi nɛɛ, akɛ: “Miishɛɛ ji mɛi ni amɛtsui mli tse, shi amɛaana Nyɔŋmɔ.” (Mateo 5:8, New World Translation) Kwɛ miishɛɛ ni nɛkɛ tsuji nɛɛ baana akɛ amɛaana ni amɛja Yehowa diɛŋtsɛ!

29. Mɛni hewɔ Yohane wieɔ yɛ ŋwɛi Yerusalem Hee lɛ he akɛ “ni nyɔɔŋ bɛ jɛi” dɔŋŋ lɛ?

²⁹ Yohane tee nɔ akɛ: “Ni nyɔɔŋ bɛ jɛi, ni kane loo hulu kpɛmɔ he ehiaŋ amɛ, ejaakɛ Nuŋtsɔ [Yehowa] Nyɔŋmɔ lɛ aaakpɛ aha amɛ.” (Kpojiemɔ 22:5a) Blema Yerusalem kɛ ehe fɔ hulu nɔ koni ena la shwane kɛ nyɔŋtsere kɛ kanei krokomɛi hu koni ena la kɛtsɔ nɔ yɛ gbɛkɛ taakɛ maŋ fɛɛ maŋ ni yɔɔ shikpɔŋ nɔ lɛ feɔ lɛ. Shi la kpɛmɔ ni tamɔ nɛkɛ he ebahiaŋ yɛ ŋwɛi Yerusalem Hee lɛ mli. Yehowa diɛŋtsɛ baakpɛ ashwie maŋ lɛ nɔ. Abaanyɛ akɛ “nyɔɔŋ” atsu nii yɛ mfonirifeemɔ shishinumɔ mli, ni akɛto haomɔ loo tsi ni atsiɔ he kɛjɛɔ Yehowa he lɛ he. (Mika 3:6; Yohane 9:4; Romabii 13:11, 12) Nyɔɔŋ ni tamɔ nakai ehiŋ Nyɔŋmɔ Ofe lɛ anunyam hiɛ ni kpɛlɛɔ lɛ mli.

30. Te Yohane mu ninaa ni yɔɔ fɛo kɛ naakpɛɛ lɛ naa eha tɛŋŋ, ni Kpojiemɔ maa mɛni nɔ mi kɛhaa wɔ?

³⁰ Yohane kɛ nɛkɛ anunyam ninaa nɛɛ baa naagbee kɛtsɔɔ nɔ ni ekɛɔ yɛ nɛkɛ Nyɔŋmɔ tsuji nɛɛ ahe lɛ nɔ: “Ni amɛaaye maŋtsɛ kɛaatee naanɔi anaanɔ.” (Kpojiemɔ 22:5b) Eji anɔkwale, yɛ afii akpe lɛ naagbee lɛ, no mli lɛ akɛ kpɔmɔ nɔ lɛ mli sɛɛnamɔi lɛ etsu nii kɛgbe naa, ni Yesu kɛ adesa weku ni eye emuu baaha e-Tsɛ. (1 Korintobii 15:25-28) Nɔ ni yɔɔ Yehowa jwɛŋmɔ mli kɛha Yesu kɛ 144,000 lɛ yɛ no sɛɛ lɛ, wɔleee. Shi Kpojiemɔ maa nɔ mi kɛhaa wɔ akɛ amɛhegbɛ ni ji sɔɔmɔ krɔŋŋ ni amɛkɛhaa Yehowa lɛ baaya nɔ kɛbote naanɔi fɛɛ mli.

Kpojiemɔ Naagbee Kwraa ni Yɔɔ Miishɛɛ Lɛ

31. (a) Yerusalem Hee lɛ he ninaa lɛ kadiɔ mɛni naagbee? (b) Mɛni Yerusalem Hee lɛ tsuɔ kɛhaa adesai anɔkwafoi krokomɛi?

³¹ Yerusalem Hee lɛ, Toobi lɛ ayemforo lɛ he ninaa nɛɛ mlibaa ji naagbee kwraa ni yɔɔ miishɛɛ ni Kpojiemɔ gbalaa jwɛŋmɔ kɛyaa nɔ lɛ, ni yɛ gbɛ ni sa nɔ. Yohane nanemɛi Kristofoi ni hi shi yɛ klɛŋklɛŋ afii oha lɛ mli lɛ fɛɛ ni aŋma wolo nɛɛ aha amɛ kɛjɛ shishijee lɛ kpa gbɛ akɛ amɛbaabote nakai maŋ lɛ mli akɛ mumɔŋ bɔɔ nii ni ji Yesu Kristo hefatalɔi nɔyelɔi ni gbooo. Kristofoi ni afɔ amɛ mu lɛ ateŋ shwɛɛnii ni yɔɔ wala mli lolo ŋmɛnɛ yɛ shikpɔŋ nɔ lɛ yɛ hiɛnɔkamɔ kome too nɛɛ nɔŋŋ. No hewɔ lɛ Kpojiemɔ yaa ehiɛ kɛyaa enaagbee kwraa lɛ he, yɛ be mli ni ayemforo kuu lɛ ni eye emuu lɛ kɛ Toobi lɛ feɔ ekome lɛ. Nɔ ni nyiɛ sɛɛ lɛ, abaatsɔ Yerusalem Hee lɛ nɔ akɛ Yesu kpɔmɔ afɔleshaa lɛ mli sɛɛnamɔi lɛ atsu adesai ahe nii, koni yɛ naagbee lɛ, anɔkwafoi lɛ fɛɛ abote naanɔ wala mli. Yɛ nɛkɛ gbɛ nɔ lɛ, ayemforo lɛ, Yerusalem Hee lɛ, akɛ anɔkwafo kɛ yelikɛbualɔ kɛha Ayemforowu kɛ Maŋtsɛ lɛ, baana gbɛfaŋnɔ yɛ jalɛ shikpɔŋ hee ko tswaa mli kɛya naanɔ—fɛɛ kɛha wɔ Jeŋ Muu Fɛɛ Nuŋtsɔ Maŋtsɛ Yehowa hiɛnyamwoo.—Mateo 20:28; Yohane 10:10, 16; Romabii 16:27.

32, 33. Mɛni wɔkase kɛjɛ Kpojiemɔ, ni mɛni esa akɛ efee enɔheremɔ ni jɛ wɔtsuiaŋ?

³² Mɛɛ miishɛɛ po wɔnuɔ he nɛkɛ, yɛ be mli ni wɔbɛŋkɛɔ Kpojiemɔ wolo lɛ ni wɔsusuɔ he lɛ naagbee he lɛ! Wɔna bɔ ni aha naagbee mɔdɛŋ ni Satan kɛ eseshi lɛ bɔ lɛ fee efolo ni atsu Yehowa jalɛ kojomɔi lɛ ahe nii kɛgbe naa. Esa akɛ Babilon Kpeteŋkpele lɛ alaaje kwraa kɛya naanɔ, koni Satan je lɛ mli gbɛjianɔtoi krokomɛi fɛɛ ni ekpɔtɔ lɛ hu anyiɛ sɛɛ. Akɛ Satan diɛŋtsɛ kɛ edaimonioi lɛ baawo bu kwɔŋkwɔŋ lɛ mli koni yɛ sɛɛ mli lɛ akpata amɛhiɛ. Yerusalem Hee lɛ kɛ Kristo baaye nɔ kɛjɛ ŋwɛi yɛ be mli ni gbohiiashitee lɛ kɛ kojomɔ lɛ yaa nɔ lɛ, ni adesai ni aha amɛye emuu lɛ baana naanɔ wala yɛ Paradeiso shikpɔŋ nɔ lɛ mli ŋɔɔmɔ yɛ naagbee. Kwɛ bɔ ni Kpojiemɔ tsɔɔ nɛkɛ nibii nɛɛ amli faŋŋ ha! Kwɛ bɔ ni ewoɔ wɔfaishitswaa ‘koni wɔjaje naanɔ sanekpakpa nɛɛ akɛ miishɛɛ saji wɔha jeŋmaŋ fɛɛ jeŋmaŋ kɛ akutso fɛɛ akutso kɛ majianɔwiemɔi kɛ gbɔmɛi’ ni yɔɔ shikpɔŋ nɔ ŋmɛnɛ lɛ mli hewalɛ ehaa! (Kpojiemɔ 14:6, 7) Ani okɛ ohewalɛ fɛɛ miiwo nitsumɔ kpeteŋkpele nɛɛ mli kɛmiimɔ shi?

³³ Akɛni shidaa eyimɔ wɔtsuii amli obɔbɔ hewɔ lɛ, nyɛhaa wɔgbalaa wɔjwɛŋmɔ kɛyaa Kpojiemɔ lɛ mli naagbee wiemɔi lɛ anɔ.

[Shishigbɛ niŋmai]