Yitso 89

Mɔbɔnalɛ He Gbɛfaa Kɛmiiya Yudea

OTSII fioo ni tsɔ hiɛ lɛ mli lɛ, Yudafoi lɛ bɔ mɔdɛŋ ni amɛgbe Yesu yɛ Sɔlemɔtsu Naagbelemɔ Kaimɔ Gbijurɔyeli lɛ shishi yɛ Yerusalem. No hewɔ efa gbɛ kɛtee kooyigbɛ, eka shi faŋŋ akɛ kɛtee he ko ni kɛ Galilea Ŋshɔ lɛ jɛkɛɛɛ.

Amrɔ nɛɛ, eeba wuoyigbɛ ekoŋŋ kɛmiibɛŋkɛ Yerusalem, ni eeshiɛ yɛ gbɛ lɛ nɔ yɛ Perea akrowai lɛ amli, yɛ Yordan Faa lɛ bokagbɛ niiaŋ. Yɛ be mli ni egba nuu niiatsɛ lɛ kɛ Lazaro he abɛbua lɛ sɛɛ lɛ, etee nɔ etsɔɔ ekaselɔi lɛ nibii ni etsɔ hiɛ etsɔɔ momo yɛ be mli ni eyɔɔ Galilea lɛ.

Akɛ nɔkwɛmɔ nɔ lɛ, ekɛɛ akɛ ebaahi eha mɔ ko akɛ ‘akɛ teji wiɛ aaaŋmɔ ekuɛ ni ayashɛ lɛ afɔ ŋshɔŋ,’ moŋ fe ni eeetɔtɔ Nyɔŋmɔ bii “bibii” lɛ ateŋ mɔ kome nane. Agbɛnɛ hu ema bɔ ni ehe hiaa ni akɛ sane ake lɛ nɔ mi, ni etsɔɔ mli akɛ: “Shi kɛji shii kpawo [onyɛmi] tɔ onɔ gbi kome, ni esaa eku esɛɛ eba oŋɔɔ shii kpawo gbi kome ni ekɛɛ: ‘Mishwa mihe’ lɛ, ŋɔɔ ofa lɛ.”

Beni ekaselɔi lɛ yabi lɛ akɛ, “Fatamɔ wɔhemɔkɛyeli lɛ he oha wɔ lɛ,” Yesu ha amɛ hetoo akɛ: “Kɛji nyɛyɛ hemɔkɛyeli tamɔ sinapi wu kuli lɛ, kulɛ nyɛaakɛɛ sikaminotso nɛɛ akɛ: ‘Fãa kɛ oshishifa ni oyama ŋshɔŋ!’ ni eeebo nyɛ toi.” No hewɔ lɛ hemɔkɛyeli bibioo po baanyɛ atsu nitsumɔi wuji.

Yɛ no sɛɛ lɛ, Yesu gba amɛ shihilɛ mli nɔ ko ni baa mli daa ni tsɔɔ su kpakpa ni esa akɛ Nyɔŋmɔ ofe lɛ tsulɔ ajie lɛ kpo lɛ he sane. Yesu bi akɛ: “Shi nyɛteŋ namɔ yɔɔ tsulɔ ni ekɛ tsina kɔi miihu aloo eelɛ kooloi, ni kɛ ejɛ ŋmɔshi eba pɛ lɛ, eeekɛɛ lɛ akɛ: ‘Baata shi mramra ni oye nii?’ Shi ekɛŋ lɛ moŋ akɛ: ‘Saamɔ nɔ ni mibaye lɛ oto, ni omia koni osɔmɔ mi ni maye nii ni manu nɔ ko da, ni no sɛɛ, koni bo hu oye nii ni onu nɔ ko’? Ani eeeda nakai tsulɔ lɛ shi, akɛ efee nɔ ni afã lɛ lɛ? Mikpaaa shi. Nakai nɔŋŋ nyɛ hu, kɛ nyɛfee nibii fɛɛ ni afa nyɛ lɛ, nyɛkɛa akɛ: ‘Tsuji ni he bɛ sɛɛnamɔ ko ji wɔ; nɔ ni ji wɔgbɛnaa akɛ wɔtsuɔ lɛ, no pɛ wɔtsu nɛɛ.’ ” No hewɔ lɛ, esaaa ni Nyɔŋmɔ tsuji nuɔ he akɛ amɛmiifee Nyɔŋmɔ ejurɔ ko kɛtsɔ sɔɔmɔ ni amɛsɔmɔɔ lɛ lɛ nɔ. Yɛ no najiaŋ lɛ, esa akɛ amɛkai hegbɛ ni amɛna akɛ amɛaaja lɛ akɛ eshiabii ni anyɛɔ akɛ he fɔɔ amɛnɔ lɛ ateŋ mɛi komɛi.

Ekolɛ ni Yesu gba amɛ abɛbua nɛɛ etsɛɛɛ kɛkɛ ni tsulɔ ko bashɛ shi. Maria kɛ Marta, ni ji Lazaro nyɛmimɛi yei, ni yɔɔ Betania yɛ Yudea lɛ tsu lɛ. Tsulɔ nɛɛ bakɛɛ: “Nuŋtsɔ, naa, mɔ ni osumɔɔ lɛ he miiye.”

Yesu here nɔ ni ekɛɛ: “Nɛkɛ hela nɛɛ, jeee gbele hela ni, shi moŋ Nyɔŋmɔ anunyam lɛ hewɔ ni, bɔni afee ni awo Nyɔŋmɔ Bi lɛ hiɛ nyam.” Beni ehi shi yɛ he ni eyɔɔ nɛɛ gbii enyɔ sɛɛ lɛ, Yesu kɛɛ ekaselɔi lɛ akɛ: “Nyɛhaa wɔyaa Yudea ekoŋŋ.” Shi kɛlɛ, amɛkai lɛ akɛ: “Rabi, eyeko gbi ko ni Yudafoi lɛ tao bo tɛi atswia lɛ, ni ooya jɛi ekoŋŋ lo?”

Yesu bi amɛ yɛ hetoohamɔ mli akɛ: “Ani jeee ŋmɛlɛtswai nyɔŋma-kɛ-enyɔ yɔɔ jenamɔ mli? Kɛji mɔ nyiɛ shwane lɛ, etɛɛɛ, ejaakɛ enaa je nɛɛ mli la lɛ. Shi kɛji mɔ ko nyiɛ nyɔɔŋ lɛ, no etɛɔ, ejaakɛ la bɛ emli.”

Nɔ ni Yesu tsɔɔ yɛ biɛ kɛkɛ ji akɛ ‘jetsɛremɔ kɛyashi jenamɔ,’ aloo be ni Nyɔŋmɔ eto kɛha Yesu shikpɔŋ nɔ sɔɔmɔ nitsumɔ lɛ hoko, ni kɛyashi be mli ni eeeho lɛ, mɔ ko mɔ ko nyɛŋ lɛ awui ko aye. Esa akɛ ekɛ ‘jetsɛremɔ’ be fioo ni eshwɛ kɛha lɛ lɛ atsu nii kwraa kɛmɔ shi, ejaakɛ yɛ no sɛɛ lɛ ebaabote “nyɔɔŋ” be mli yɛ be mli ni ehenyɛlɔi lɛ egbe lɛ lɛ.

Yesu kɛfata he akɛ: “Wɔshieŋtsɛ Lazaro ewɔ, shi miiya ni mayatsiɛ lɛ yɛ ewɔ lɛ mli.”

Eka shi faŋŋ akɛ akɛni amɛmiisusu akɛ Lazaro miijɔɔ ehe yɛ wɔ mli ni akɛ enɛ ji okadi kpakpa ni tsɔɔ akɛ ebaana hewalɛ hewɔ lɛ, ekaselɔi lɛ here lɛ nɔ akɛ: “Nuŋtsɔ, kɛ wɔ ewɔ lɛ, no lɛ ehe baawa lɛ mɔ.”

Kɛkɛ ni Yesu kɛɛ amɛ yɛ faŋŋ mli akɛ: “Lazaro egbo; ni nyɛ hewɔ lɛ eŋɔɔ minaa akɛ mibɛ jɛi, bɔni afee ni nyɛhe nyɛye; shi nyɛhaa wɔyaa eŋɔɔ.”

Beni Toma yoo akɛ abaanyɛ agbe Yesu yɛ Yudea, shi kɛlɛ eesumɔ ni amɛfi esɛɛ hu hewɔ lɛ, ewo enanemɛi kaselɔi lɛ hewalɛ akɛ: “Nyɛhaa wɔ hu wɔyaa, ni wɔkɛ lɛ ayagbo.” No hewɔ lɛ kaselɔi lɛ kɛ amɛwala wo oshara mli, ni amɛfata Yesu he yɛ emɔbɔnalɛ he gbɛfaa kɛmiiya Yudea lɛ mli. Luka 13:22; 17:1-10; Yohane 10:22, 31, 40-42; 11:1-16.

▪ Nɛgbɛ Yesu shiɛɔ yɛ yɛ nɛkɛ be nɛɛ mli?

▪ Mɛɛ nitsɔɔmɔ Yesu ti mli ekoŋŋ, ni mɛɛ shihilɛ mli nɔ ko ni afeɔ egba amɛ koni ekɛtsɔɔ mɛɛ oti ko mli?

▪ Mɛɛ adafitswaa Yesu nine shɛ nɔ, ni mɛni ekɛ wiemɔi ni ji ‘jetsɛremɔ’ kɛ “nyɔɔŋ” lɛ tsɔɔ?

▪ Mɛni Toma tsɔɔ beni ekɛɛ akɛ ‘Nyɛhaa wɔkɛ lɛ ayaa koni wɔkɛ lɛ ayagboi’ lɛ?