Yitso 90

Gbohiiashitee He Hiɛnɔkamɔ Lɛ

YƐ NAAGBEE lɛ Yesu yashɛ Betania akrowa ni kɛ Yerusalem jɛkɛmɔ aaafee shitoi enyɔ lɛ klotia. Gbii fioo ko pɛ nɛ ni Lazaro gbo ni afu lɛ. Enyɛmimɛi yei Maria kɛ Marta miiye ŋkɔmɔ lolo, ni mɛi pii eba amɛshia lɛ mli koni amɛbashɛje amɛmii.

Beni amɛyeɔ ŋkɔmɔ lɛ, mɔ ko ba ni ebakɛɛ Marta akɛ Yesu nyiɛ gbɛ kɛmiiba. No hewɔ lɛ eshi shia lɛ ni eyiŋ etee ni ekɛ lɛ ayakpe, ekolɛ ni ekɛɛɛ enyɛmiyoo lɛ po. Beni ebashɛ Yesu ŋɔɔ lɛ, Marta saa eti wiemɔi ni ekolɛ ekɛ enyɛmiyoo lɛ ewie shii abɔ yɛ gbii ejwɛ ni eho lɛ mli lɛ mli ekoŋŋ: “Eji oyɛ biɛ kulɛ, minyɛmi lɛ naaa agbo.”

Shi kɛlɛ, Marta jie hemɔkɛyeli kpo, ni etsi ta akɛ Yesu baanyɛ afee nɔ ko kɛ̃ aha enyɛminuu lɛ. Ekɛɛ: “Mile akɛ nɔ fɛɛ nɔ ni ooobi Nyɔŋmɔ lɛ, Nyɔŋmɔ aaahao.”

Yesu wo lɛ shi akɛ: “Onyɛminuu lɛ baate shi.”

Marta nu Yesu shishi akɛ eewie wɔsɛɛ gbohiiashitee ko he, nɔ ni Abraham kɛ Nyɔŋmɔ tsuji krokomɛi hu kpa gbɛ aahu lɛ. No hewɔ lɛ eha lɛ hetoo akɛ: “Mile akɛ ebaate shi yɛ gbohiiashitee lɛ mli yɛ naagbee gbi lɛ nɔ.”

Shi kɛlɛ, Yesu ha hiɛnɔkamɔ ni baaha emii ashɛ ehe amrɔ nɔŋŋ, ni ekɛɛ: “Mi lɛ miji shitee lɛ kɛ wala lɛ.” Ekai Marta akɛ Nyɔŋmɔ eha lɛ hewalɛ yɛ gbele nɔ, ni ekɛɛ lɛ akɛ: “Mɔ ni heɔ minɔ yeɔ lɛ, kɛji egbo tete lɛ, ehiɛ aaakã; ni mɔ fɛɛ mɔ ni hiɛ kã ni eheɔ minɔ eyeɔ lɛ, egboŋ gbi ko gbi ko kɛaatee naanɔ.”

Yesu ekɛɛɛ Marta yɛ biɛ akɛ anɔkwafoi ni yɔɔ wala mli yɛ nakai beaŋ lɛ gboiŋ kɔkɔɔkɔ. Dabi, shi oti ni etao ema nɔ mi lɛ ji akɛ hemɔkɛyeli ni aaajie kpo yɛ emli lɛ baanyɛ ekɛ mɔ aya naanɔ wala mli. Mɛi babaoo ji mɛi ni baana shihilɛ ni tamɔ nɛkɛ mli ŋɔɔmɔ kɛtsɔ shi ni aaatee amɛ kɛjɛ gbohii ateŋ yɛ naagbee gbi lɛ nɔ lɛ nɔ. Shi mɛi krokomɛi ni ji anɔkwafoi lɛ baaje nibii agbɛjianɔtoo nɛɛ naagbee lɛ mli shweshweeshwe yɛ shikpɔŋ nɔ, ni Yesu wiemɔi lɛ baaba mli tɛɛ yɛ mɛnɛɛmɛi agbɛfaŋ. Amɛgboiŋ gbi ko gbi ko kɛaatee naanɔ! Yɛ nɛkɛ wiemɔ ni sa kadimɔ waa nɛɛ sɛɛ lɛ, Yesu bi Marta akɛ, “Oheɔ enɛ oyeɔ lo?”

Eha hetoo akɛ: “Hɛɛ, Nuŋtsɔ, miihe miiye akɛ bo ji Kristo, Nyɔŋmɔ Bi lɛ ni baa je lɛ mli lɛ.”

Kɛkɛ ni Marta he fee oya ni eyatsɛ enyɛmiyoo lɛ, ni ekɛɛ lɛ yɛ teemɔŋ akɛ: “Nuŋtsɔ lɛ eba, ni eetsɛo.” Amrɔ nɔŋŋ kɛkɛ ni Maria shi shia lɛ. Beni mɛi krokomɛi lɛ na akɛ eeya lɛ, amɛnyiɛ esɛɛ, ni amɛmiisusu akɛ eeya kaimɔ bu lɛ naa.

Beni Maria ba Yesu ŋɔɔ lɛ, ebagbee enaji anaa kɛ yaafo. Ekɛɛ: “Nuŋtsɔ, eji oyɛ biɛ kulɛ, minyɛmi lɛ naaa agbo.” Beni Yesu na akɛ Maria kɛ mɛi babaoo ni nyiɛ esɛɛ lɛ fɛɛ miifo lɛ, enɛ tsirɛ lɛ waa. No hewɔ lɛ ebi akɛ: “Nɛgbɛ nyɛto lɛ yɛ?”

Amɛha lɛ hetoo akɛ: “Nuŋtsɔ, ba ni obakwɛ.”

Kɛkɛ ni Yesu hu fo, ni eha Yudafoi lɛ kɛɛ: “Kwɛ bɔ ni edɔɔ ehe!”

Amɛteŋ mɛi komɛi kai akɛ yɛ nyɔji fioo ni eho lɛ mli lɛ, Yesu tsa nuu ko ni afɔ lɛ shwilafo lɛ yɛ Asesei Agbijurɔyeli lɛ shishi, ni amɛbi akɛ: “Nuu nɛɛ ni gbele shwilafo lɛ hiŋmɛii lɛ, aso enyɛŋ efee ni kulɛ nuu nɛɛ akagbo?” Yohane 5:21; 6:40; 9:1-7; 11:17-37.

▪ Yɛ naagbee lɛ, mɛɛ be Yesu yashɛ Betania, ni te shihilɛ lɛ yɔɔ tɛŋŋ yɛ jɛmɛ?

▪ Mɛɛ nɔdaamɔ nɔ Marta yɔɔ ni ekaahe gbohiiashitee lɛ eye?

▪ Mɛɛ gbɛ nɔ Lazaro gbele lɛ sa Yesu he yɛ?