Yitso 10

Nyɔŋmɔ Maŋtsɛyeli lɛ Miiye Nɔ

 1, 2. Yɛ mɛɛ gbɛ nɔ ana akɛ adesa nɔyelii shɛɛɛ?

EKOLƐ ona tsɔne bibioo ko ni ohe, ni beni oyaakwɛ lɛ enyɛɛɛ etsu nɔ ko lɛ mli niiashikpamɔ. Kɛ wɔɔfee he nɔkwɛmɔ nɔ lɛ, oyatsɛ tsɔne-saalɔ. Shi beni “esaa” tsɔne lɛ egbe naa lɛ etsɛɛɛ ni ona akɛ efite ekoŋŋ. Kwɛ nijiaŋwujee ni enɛ ji!

² Nakai eji yɛ adesa nɔyelii ahe. Adesai eshwe nɔyeli ni kɛ toiŋjɔlɛ kɛ miishɛɛ baaha yɛ be fɛɛ mli lɛ. Ni kɛlɛ, mɔdɛŋ waa ni abɔɔ koni akɛsaa nibii ni fiteɔ yɛ gbɔmɛi ateŋ lɛ yeko omanye diɛŋtsɛ. Afee toiŋjɔlɛ kpaŋmɔi babaoo—kɛkɛ lɛ akumɔ mli. Agbɛnɛ hu, mɛɛ nɔyeli enyɛ ejie ohia, mɛi ahe jwɛŋmɔ fɔŋ namɔ, efɔŋ feemɔ, hela, kɛ nibii ni ebɔle wɔhe kɛkpe lɛ fitemɔ lɛ kɛtee? Anyɛŋ asaa gbɔmɔ nɔyeli. Israel Maŋtsɛ Salomo nilelɔ lɛ po bi akɛ: “Shi gbɔmɔ lɛ, te aaafee tɛŋŋ ni eeele egbɛ lɛ?”—Abɛi 20:24.

 3. (a) Mɛni ji Yesu shiɛmɔ lɛ saneyitso? (b) Te mɛi komɛi tsɔɔ akɛ Nyɔŋmɔ Maŋtsɛyeli lɛ ji ha tɛŋŋ?

³ Onijiaŋ akaje wui! Jeŋ nɔyeli ni ma shi shiŋŋ lɛ jeee lamɔ ko kɛkɛ. No ji Yesu shiɛmɔ lɛ saneyitso. Etsɛ enɛ akɛ “Nyɔŋmɔ maŋtsɛyeli,” ni etsɔɔ esɛɛnyiɛlɔi lɛ ni amɛsɔle amɛbi enɛ. (Luka 11:2; 21:31) Shi, atsiɔ Nyɔŋmɔ Maŋtsɛyeli lɛ ta yɛ bei komɛi amli yɛ Nyɔŋmɔ jálɔi ateŋ. Yɛ anɔkwale mli lɛ, akpekpei abɔ sɔleɔ yɛ enɛ he daa gbi yɛ be mli ni amɛtsiɔ Nuntsɔ lɛ Sɔlemɔ (ni atsɛɔ lɛ hu akɛ Wɔ Tsɛ ni Yɔɔ Ŋwɛi loo sɔlemɔ nɔkwɛmɔ nɔ) lɛ ta lɛ. Shi kɛ abi akɛ, “Mɛni ji Nyɔŋmɔ Maŋtsɛyeli” lɛ?, gbɔmɛi haa hetoo yɛ gbɛi sɔrɔtoi anɔ. Mɛi komɛi kɛɔ akɛ, “Eyɛ otsui mli.” Mɛi komɛi tsɛɔ lɛ ŋwɛi. Biblia lɛ kɛ hetoo ni mli ka shi faŋŋ haa taakɛ wɔbaana lɛ.

MAŊTSƐYELI NI HIƐ YIŊTOO

 4, 5. Mɛni hewɔ Yehowa hala akɛ eeetsɔɔ enɔyeli lɛ mli yɛ gbɛ hee nɔ lɛ, ni mɛni ebaatsu?

⁴ Yehowa Nyɔŋmɔ efee Maŋtsɛ yɛ be fɛɛ mli, loo Jeŋ Muu Fɛɛ Nɔyelɔ. Anɔkwale ni eji akɛ lɛ ebɔ nibii fɛɛ lɛ woɔ enɔ kɛyaa gbɛhe ni nɔ kwɔ nɛɛ mli. (1 Kronika 29:11; Lala 103:19; Bɔfoi lɛ Asaji 4:24) Shi Maŋtsɛyeli ni Yesu shiɛ yɛ he lɛ hɔ Nyɔŋmɔ jeŋ muu fɛɛ nɔyeli lɛ shishi. Nakai Mesia Maŋtsɛyeli lɛ yɛ yiŋtoo pɔtɛɛ ko, shi mɛni ji no?

⁵ Taakɛ atsɔɔ mli yɛ Yitso 6 lɛ, klɛŋklɛŋ adesai enyɔ lɛ tse atua amɛshi Nyɔŋmɔ nɔyeli. Yɛ saji titrii ni atee lɛ shi lɛ hewɔ lɛ, Yehowa hala akɛ ebaajie enɔyeli lɛ kpo yɛ gbɛ ni yɔɔ ehee kwraa nɔ. Nyɔŋmɔ tswa eyiŋtoo lɛ he adafi akɛ ekɛ “seshi” ko ni baajwara Onufu, Satan, yitso nɔ̃ baaba, ni ebaajie nɔ ni ejɛ esha ni adesa na akɛ gboshinii lɛ mli eba lɛ kɛya. “Seshi” lɛ titri ji Yesu Kristo, ni “Nyɔŋmɔ maŋtsɛyeli” lɛ ji nɔ ni abaatsɔ nɔ ni yɛ naagbee lɛ aye Satan nɔ kunim kwraa lɛ. Yesu Kristo baatsɔ Maŋtsɛyeli nɛɛ nɔ aku sɛɛ ato nɔyeli yɛ shikpɔŋ nɔ ama shi yɛ Yehowa gbɛi amli ni ebaabu jeŋ muu fɛɛ maŋtsɛ ni Nyɔŋmɔ ji yɛ gbɛ ni ja nɔ lɛ bem kɛya naanɔ.—1 Mose 3:15; Lala 2:2-9.

 6, 7. (a) Nɛgbɛ Maŋtsɛyeli lɛ yɔɔ, namɔ ji Maŋtsɛ kɛ ehefatalɔi nɔyelɔi lɛ? (b) Namɛi ji Maŋtsɛyeli lɛ shishibii?

⁶ Taakɛ shishitsɔɔmɔ ko tsɔɔ Yesu wiemɔi ni ekɛɛ Farisifoi yiwalɔi lɛ shishi lɛ, ekɛɛ: “Nyɔŋmɔ maŋtsɛyeli lɛ yɛ nyɛmli.” (Luka 17:21, King James Version) Ani Yesu miitsɔɔ akɛ Maŋtsɛyeli lɛ yɛ nakai gbɔmɛi ni amɛfite lɛ atsuii gbohii lɛ amli? Dabi. Shishijee Hela lɛ shishitsɔɔmɔ ko ni ja jogbaŋŋ kaneɔ akɛ: “Nyɔŋmɔ maŋtsɛyeli lɛ yɛ nyɛteŋ.” (New World Translation) No hewɔ lɛ, Yesu, ni yɔɔ amɛteŋ lɛ miiwie lɛ diɛŋtsɛ ehe akɛ wɔsɛɛ be mli Maŋtsɛ. Ejeee nɔ ko ni yɔɔ gbɔmɔ tsui mli kwraa, ejaakɛ Nyɔŋmɔ Maŋtsɛyeli lɛ ji nɔ ni yɔɔ pɔtɛɛ, nɔyeli ni miitsu nii ni yɔɔ nɔyelɔ kɛ eshishibii. Eji ŋwɛi nɔyeli, ejaakɛ atsɛɔ lɛ “ŋwɛi maŋtsɛyeli” kɛ “Nyɔŋmɔ maŋtsɛyeli” fɛɛ. (Mateo 13:11; Luka 8:10) Gbalɔ Daniel na e-Nɔyelɔ lɛ yɛ ninaa mli akɛ “mɔ ko tamɔ gbɔmɔ bi” ni akɛ lɛ ba Nyɔŋmɔ Ofe lɛ hiɛ ni aha lɛ naanɔ “nɔyeli kɛ anunyam kɛ maŋtsɛyeli, koni majimaji kɛ asafoi kɛ wiemɔi lɛ fɛɛ asɔmɔ lɛ.” (Daniel 7:13, 14) Namɔ ji nɛkɛ Maŋtsɛ nɛɛ? Ojogbaŋŋ, Biblia lɛ tsɛɔ Yesu Kristo akɛ “gbɔmɔ Bi.” (Mateo 12:40; Luka 17:26) Hɛɛ, Yehowa hala e-Bi, Yesu Kristo, akɛ efee Maŋtsɛ.

⁷ Jeee Yesu kome pɛ yeɔ nɔ. Mɛi ni fata ehe ji 144,000 ni “ahe kɛjɛ shikpɔŋ lɛ nɔ,” koni amɛbafee ehefatalɔi maŋtsɛmɛi kɛ osɔfoi. (Kpojiemɔ 5:9, 10; 14:1, 3; Luka 22:28-30) Nyɔŋmɔ Maŋtsɛyeli lɛ shishibii lɛ baafee jeŋ muu fɛɛ adesa weku ni baa amɛhe shi amɛhaa Kristo hiɛnyiɛmɔ. (Lala 72:7, 8) Shi, te wɔɔfee tɛŋŋ wɔna nɔmimaa akɛ Maŋtsɛyeli lɛ baabu jeŋ muu fɛɛ maŋtsɛ ni Nyɔŋmɔ ji lɛ bem ni esaa eto paradeiso shihilɛi yɛ wɔ shikpɔŋ nɛɛ nɔ ekoŋŋ?

BƆ NI NYƆŊMƆ MAŊTSƐYELI LƐ JI NƆ NI YƆƆ DIƐŊTSƐ HA

 8, 9. (a) Mɛɛ gbɛ nɔ wɔɔtsɔ wɔfee bɔ ni anyɛɔ akɛ he fɔɔ Nyɔŋmɔ Maŋtsɛyeli lɛ shiwooi lɛ anɔ lɛ he nɔkwɛmɔ nɔ yɛ? (b) Mɛni hewɔ wɔbaanyɛ wɔna nɔmimaa yɛ Maŋtsɛyeli lɛ ni yɔɔ diɛŋtsɛ lɛ he?

⁸ Ŋɔɔ lɛ akɛ la ekpata oshia hiɛ ni olaaje nɔ fɛɛ nɔ. Agbɛnɛ naanyo ko ni yɔɔ nɔ ko ewo shi akɛ ebaaye ebua ni esaa ema oshia nɛɛ ekoŋŋ ni eha oweku lɛ niyenii. Kɛji akɛ nakai naanyo lɛ yeɔ bo anɔkwa be fɛɛ be lɛ, ani oheŋ lɛ oyeŋ? Ŋɔɔ lɛ akɛ ojɛ nitsumɔ oba shia enɔ jetsɛremɔ lɛ ni ona akɛ nitsulɔi eje shishi momo amɛmiisaa nibii ni la lɛ efite lɛ lɛ ni akɛ niyenii baha oweku lɛ. Ŋwanejee ko bɛ he akɛ obaana nɔmimaa kwraa akɛ yɛ naagbee lɛ, jeee akɛ abaasaa nɔ fɛɛ nɔ kɛkɛ shi moŋ nibii baahi fe tsutsu ko.

⁹ Nakai nɔŋŋ Yehowa haa wɔ nɔmimaa yɛ bɔ ni Maŋtsɛyeli lɛ ji nɔ ni yɔɔ diɛŋtsɛ lɛ he. Taakɛ atsɔɔ yɛ Biblia mli wolo ni ji Hebribii lɛ mli lɛ, Mla lɛ he nibii pii fee Maŋtsɛyeli gbɛjianɔtoo lɛ he mfoniri. (Hebribii 10:1) Gbalɛ mli ninaai ni kɔɔ nɔ ni Nyɔŋmɔ Maŋtsɛyeli lɛ baatamɔ lɛ he hu je kpo yɛ shikpɔŋ nɔ Israel maŋtsɛyeli lɛ mli. Ejeee nɔyeli folo ko kɛkɛ, ejaakɛ nɔyelɔi lɛ tara “Yehowa sɛi” lɛ nɔ. (1 Kronika 29:23) Agbɛnɛ, agba afɔ shi akɛ: “Maŋtsɛtso ejeŋ Yuda dɛŋ, ni nɔyelitso hu ejeŋ enaji ateŋ, kɛyashi beyinɔ ni [Shiloh] mɔ nɔ ni ji lɛ aaaba, ni lɛ toi majimaji lɛ aaabo.” (1 Mose 49:10)a Hɛɛ, nɛkɛ Yuda maŋtsɛmɛi awekukpaa nɛɛ mli abaafɔ Yesu, Nyɔŋmɔ nɔyeli lɛ nɔ naanɔ Maŋtsɛ nɛɛ awo.—Luka 1:32, 33.

10. (a) Mɛɛ be ato Nyɔŋmɔ Mesia Maŋtsɛyeli lɛ shishi? (b) Mɛɛ nitsumɔ ko mɛi ni kpaa gbɛ akɛ amɛbaafata Yesu he akɛ ehefatalɔi nɔyelɔi lɛ baanyiɛ hiɛ yɛ shikpɔŋ nɔ?

¹⁰ Ato Nyɔŋmɔ Mesia Maŋtsɛyeli lɛ shishi kɛtsɔ Yesu bɔfoi lɛ ahalamɔ nɔ. (Efesobii 2:19, 20; Kpojiemɔ 21:14) Mɛnɛɛmɛi ji 144,000 ni baaye maŋtsɛ yɛ ŋwɛi akɛ Yesu Kristo hefatalɔi maŋtsɛmɛi lɛ mli klɛŋklɛŋ bii. Beni amɛyɔɔ shikpɔŋ nɔ lɛ, nɛkɛ hefatalɔi nɔyelɔi nɛɛ baanyiɛ odaseyeli he tafaa ko hiɛ, koni ekɛ Yesu famɔ akɛ: “Nyɛyaa ni nyɛyafea jeŋmaji fɛɛ mikaselɔi, nyɛbaptisia amɛ nyɛwoa Tsɛ lɛ kɛ Bi lɛ kɛ mumɔ krɔŋkrɔŋ lɛ gbɛi amli” lɛ akpa gbee.—Mateo 28:19.

11. Te atsuɔ Maŋtsɛyeli shiɛmɔ nitsumɔ lɛ he nii ahaa tɛŋŋ ŋmɛnɛ, ni mɛni jɛɔ mli baa?

¹¹ Aabo famɔ akɛ afee kaselɔi lɛ toi bianɛ yɛ gbɛ ni da fe fɛɛ nɔ. Yehowa Odasefoi miishiɛ Maŋtsɛyeli lɛ he sanekpakpa lɛ yɛ jeŋ muu lɛ fɛɛ, yɛ Yesu gbalɛ wiemɔi nɛɛ kɛ gbeekpamɔ naa: “Ni aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ni akɛye jeŋmaji lɛ fɛɛ odase; ni no dani naagbee lɛ aaaba.” (Mateo 24:14) Aatsu tsɔsemɔ gbɛjianɔtoo kpeteŋkpele ko he nii akɛ Maŋtsɛyeli shiɛmɔ nitsumɔ lɛ fa ko. Mɛi ni baa amɛhe shi amɛhaa Nyɔŋmɔ Maŋtsɛyeli lɛ he mlai kɛ taomɔ nii lɛ anine miishɛ toiŋjɔlɛ kɛ ekomefeemɔ ni adesa nɔyelii nyɛŋ ana lɛ nɔ bianɛ momo. Enɛɛmɛi fɛɛ kɛ odaseyeli ni mli ka shi faŋŋ haa akɛ Nyɔŋmɔ Maŋtsɛyeli lɛ ji nɔ ni yɔɔ diɛŋtsɛ!

12. (a) Mɛni hewɔ esa akɛ aaatsɛ Maŋtsɛyeli jajelɔi lɛ akɛ Yehowa Odasefoi? (b) Esoro Nyɔŋmɔ Maŋtsɛyeli lɛ yɛ adesai anɔyelii ahe yɛ mɛɛ gbɛ nɔ?

¹² Yehowa kɛɛ Israelbii lɛ akɛ: “Nyɛ ji midasefoi, kɛ mitsulɔ ni mihala lɛ.” (Yesaia 43:10-12) Yesu, “Odasefonyo Anɔkwafo” lɛ kɛ ekãa jaje Maŋtsɛyeli lɛ he sanekpakpa lɛ. (Kpojiemɔ 1:5; Mateo 4:17) No hewɔ lɛ eji nɔ ni sa akɛ ŋmɛnɛŋmɛnɛ beaŋ Maŋtsɛyeli shiɛlɔi lɛ aaana gbɛi ni ajɛ ŋwɛi ahala ni ji Yehowa Odasefoi. Shi mɛni hewɔ Odasefoi lɛ kɛ be kɛ mɔdɛŋbɔɔ babaoo wieɔ Nyɔŋmɔ Maŋtsɛyeli lɛ he amɛtsɔɔ mɛi krokomɛi lɛ? Amɛfeɔ nakai ejaakɛ Maŋtsɛyeli lɛ ji adesai ahiɛnɔkamɔ kome pɛ. Etsɛɛɛ ni yɛ naagbee lɛ adesai anɔyelii baa naagbee, shi Nyɔŋmɔ Maŋtsɛyeli lɛ baŋ naagbee kɔkɔɔkɔ. Yesaia 9:6, 7 tsɛɔ e-Nɔyelɔ, Yesu, akɛ “Hejɔlɛ Lumɔ” ni ekɛfata he akɛ: “Elumɔyeli lɛ shweremɔ kɛ hejɔlɛ lɛ sɛɛ efoŋ.” Nyɔŋmɔ Maŋtsɛyeli lɛ tamɔɔɔ gbɔmɛi anɔyelii—ŋmɛnɛ eyɛ biɛ, kɛkɛ lɛ awo lɛ atswa shi wɔ. Yɛ anɔkwale mli lɛ, Daniel 2:44 kɛɔ akɛ: “Nyɔŋmɔ ni yɔɔ ŋwɛi lɛ aaatee maŋtsɛyeli ko shi ama shi ni efiteŋ dɔŋŋ kɛaatee naanɔ, ni ashiŋ maŋtsɛyeli nɛɛ ahaŋ maŋ kroko; . . . shi lɛ diɛŋtsɛ lɛ eeedamɔ shi kɛaatee naanɔ.”

13. (a) Mɛɛ naagbai Nyɔŋmɔ Maŋtsɛyeli lɛ baatsu he nii yɛ omanyeyeli mli? (b) Mɛni hewɔ wɔbaanyɛ wɔna nɔmimaa yɛ Nyɔŋmɔ shiwooi ni aaaba mli anɔkwale lɛ he?

¹³ Mɛɛ adesa maŋtsɛ baanyɛ aha tawuu, awuiyeli, hela, hɔmɔ, kɛ wɔɔ he ni bɛ sɛɛ afo? Kɛfata he lɛ, mɛɛ shikpɔŋ nɔ nɔyelɔ baanyɛ atee mɛi ni egboi lɛ ashi? Nyɔŋmɔ Maŋtsɛyeli lɛ kɛ e-Maŋtsɛ lɛ baatsu saji nɛɛ ahe nii. Kpa ko baŋ Maŋtsɛyeli lɛ he, tamɔ tsɔne ko ni tsuuu nii ekpakpa ni be fɛɛ be lɛ ebiɔ ni asaa. Shi moŋ, Nyɔŋmɔ Maŋtsɛyeli lɛ baaye omanye, ejaakɛ Yehowa woɔ shi akɛ: “Miwiemɔ ni jɛɔ midaaŋ lɛ . . . ekuŋ esɛɛ kɛbaŋ miŋɔɔ efolo, shi moŋ eeefee nɔ ni sa mihiɛ lɛ, ni eeeha nɔ ni mitsu lɛ yɛ hewɔ lɛ aya nɔ!” (Yesaia 55:11) Nyɔŋmɔ yiŋtoo efeŋ yaka, shi mɛɛ be Maŋtsɛyeli nɔyeli baaje shishi?

MAŊTSƐYELI NƆYELI—MƐƐ BE?

14. Mɛni ji nɔ ni Yesu kaselɔi lɛ yanuuu shishi yɛ Maŋtsɛyeli lɛ he, shi mɛni Yesu le yɛ enɔyeli lɛ he?

¹⁴ “Nuntsɔ, ani nɛkɛ be nɛɛ mli obaatee maŋtsɛyeli lɛ shi oma shi oha Israel lɛ?” Sane ni Yesu kaselɔi lɛ bi nɛɛ tsɔɔ akɛ no mli lɛ amɛleee Nyɔŋmɔ Maŋtsɛyeli lɛ yiŋtoo kɛ be ni ato ni enɔyeli lɛ baaje shishi lɛ. Beni ebɔ amɛ kɔkɔ ni amɛkasusu amɛyiŋ yɛ sane nɛɛ he lɛ, Yesu kɛɛ: “Jeee nyɛ he sane ko ji akɛ nyɛaale be loo yinɔi lɛ ni Tsɛ lɛ eto yɛ lɛ diɛŋtsɛ ehewalɛ mli lɛ.” Yesu le akɛ ato shikpɔŋ lɛ nɔ ni eeeye lɛ aha wɔsɛɛ be, yɛ eshitee kɛ eŋwɛiyaa lɛ sɛɛ be kakadaŋŋ. (Bɔfoi lɛ Asaji 1:6-11; Luka 19:11, 12, 15) Ŋmalɛi lɛ egba enɛ efɔ shi. Yɛ mɛɛ gbɛ nɔ?

15. Mɛɛ gbɛ nɔ Lala 110:1 haa wɔnaa be ni Yesu baaje enɔyeli lɛ shishi?

¹⁵ Beni etsɔɔ gbalɛ nɔ ewieɔ Yesu he akɛ “Nuntsɔ” lɛ, Maŋtsɛ David kɛɛ: “Yehowa kɛɛ mi-Nuntsɔ lɛ akɛ: ‘Ta mininejurɔ nɔ kɛyashi beyinɔ ni maŋɔ ohenyɛlɔi lɛ mafee onajiashi maaŋoo.’” (Lala 110:1; okɛto Bɔfoi lɛ Asaji 2:34-36 he.) Gbalɛ nɛɛ tsɔɔ akɛ Yesu nɔyeli lɛ ejeŋ shishi amrɔ nɔŋŋ beni ekwɔ kɛtee ŋwɛi lɛ sɛɛ. Shi moŋ, ebaamɛ yɛ Nyɔŋmɔ ninejurɔ nɔ. (Hebribii 10:12, 13) Be ni ekɛmɛɔ nɛɛ baaya nɔ kɛyashi mɛɛ be? Mɛɛ be enɔyeli lɛ baaje shishi? Biblia lɛ yeɔ ebuaa wɔ koni wɔna hetooi lɛ.

16. Mɛni ba yɛ 607 D.Ŋ.B., ni te enɛ kɔɔ Nyɔŋmɔ Maŋtsɛyeli lɛ he ehaa tɛŋŋ?

¹⁶ Maŋ kome pɛ ni yɔɔ shikpɔŋ muu lɛ fɛɛ nɔ ni Yehowa kɛ egbɛi efɔ̃ nɔ ji Yerusalem. (1 Maŋtsɛmɛi 11:36) Eji maŋtiase hu kɛha shikpɔŋ nɔ maŋtsɛyeli ni Nyɔŋmɔ ekpɛlɛ nɔ ni feɔ Nyɔŋmɔ ŋwɛi Maŋtsɛyeli lɛ he mfoniri lɛ. No hewɔ lɛ, Yerusalem ni Babilonbii lɛ kpata hiɛ yɛ 607 D.Ŋ.B. lɛ tsɔɔ nɔ ko pɔtɛɛ. Nifeemɔ nɛɛ kadi Nyɔŋmɔ ni yeɔ ewebii ni yɔɔ shikpɔŋ nɔ lɛ anɔ tɛ̃ɛ lɛ ni afo mli yɛ be kakadaŋŋ mli lɛ shishijee. Aaafee afii ohai ekpaa sɛɛ lɛ, Yesu tsɔɔ akɛ nɛkɛ nɔyeli be ni afooo mli nɛɛ miiya nɔ lolo, ejaakɛ ekɛɛ: “Jeŋmaji lɛ aaanaanaa Yerusalem nɔ kɛyashi beyinɔ ni jeŋmaji abe lɛ aaashɛ.”—Luka 21:24.

17. (a) Mɛni ji “jeŋmaji abe,” ni amɛbaaya nɔ kɛyashi mɛɛ be? (b) Mɛɛ be “jeŋmaji abe” lɛ je shishi ni eba naagbee?

¹⁷ Yɛ “jeŋmaji abe lɛ” mli lɛ, abaaŋmɛ jeŋ nɔyelii agbɛ koni amɛfolɔ nɔyeli ni Nyɔŋmɔ ekpɛlɛ nɔ lɛ mli. Nakai be lɛ je shishi kɛ Yerusalem hiɛkpatamɔ lɛ yɛ 607 D.Ŋ.B., ni Daniel tsɔɔ akɛ ebaaya nɔ aahu kɛyashi “bei kpawo.” (Daniel 4:23-25) Mɛni ji enɛ sɛɛkɛlɛ? Biblia lɛ tsɔɔ akɛ “bei” etɛ kɛ fa feɔ gbii 1,260. (Kpojiemɔ 12:6, 14) Nakai be lɛ tói enyɔ, loo bei kpawo lɛ, baafee gbii 2,520. Shi nɔ ko pɔtɛɛ ni sa kadimɔ baaa yɛ nakai be kuku lɛ naagbee. Kɛ akɛ “gbi kome aaatsɔ afi” lɛ to Daniel gbalɛ lɛ he, ni akane afii 2,520 kɛjɛ 607 D.Ŋ.B. lɛ, wɔbashɛɔ afi 1914 Ŋ.B.—4 Mose 14:34; Ezekiel 4:6.

18. Mɛni Yesu fee beni enine shɛ Maŋtsɛyeli hewalɛ nɔ lɛ sɛɛ nɔŋŋ, ni te enɛ sa shikpɔŋ lɛ he eha tɛŋŋ?

¹⁸ Ani Yesu je nɔyeli shishi yɛ ŋwɛi yɛ nakai be lɛ mli? Abaasusu Ŋmalɛi amli yiŋtoi ni haa akɛɔ akɛ efee nakai lɛ he yɛ yitso ni nyiɛ sɛɛ lɛ mli. Shi, toiŋjɔlɛ ni aaaba shikpɔŋ nɔ amrɔ nɔŋŋ kadiŋ Yesu nɔyeli lɛ shishijee. Kpojiemɔ 12:7-12 tsɔɔ akɛ, kɛ Yesu nine shɛ Maŋtsɛyeli lɛ nɔ nɔŋŋ pɛ lɛ, ebaashwie Satan kɛ edaimonioi lɛ kɛjɛ ŋwɛi. Enɛ baatsɔ kpóo kɛha shikpɔŋ lɛ, shi eyɛ miishɛɛ akɛ aaakane akɛ “gbii fioo kɛkɛ” eshwɛ kɛha Abonsam. Etsɛŋ, wɔmli baanyɛ afili wɔ, ni jeee akɛ Nyɔŋmɔ Maŋtsɛyeli lɛ miiye nɔ kɛkɛ shi moŋ akɛ ekɛ jɔɔmɔi baaba abaha shikpɔŋ lɛ kɛ adesai toibolɔi. (Lala 72:7, 8) Te wɔfeɔ tɛŋŋ wɔleɔ akɛ etsɛŋ ni enɛ baaba mli?

[Shishigbɛ niŋmai]

KAA ONILEE OKWƐ

Mɛni ji Nyɔŋmɔ Maŋtsɛyeli lɛ, ni nɛgbɛ eyeɔ nɔ kɛjɛɔ?

Namɔ yeɔ nɔ yɛ Maŋtsɛyeli lɛ mli, ni namɛi ji eshishibii?

Mɛɛ gbɛ nɔ Yehowa etsɔ ema nɔ mi eha wɔ akɛ e-Maŋtsɛyeli lɛ ji nɔ ni yɔɔ diɛŋtsɛ?

Mɛɛ be “jeŋmaji abe” lɛ je shishi ni eba naagbee?

[Akrabatsa ni yɔɔ baafa 94]

SAJI KOMƐI NI BA NI HE HIAA NI KƆƆ NYƆŊMƆ MAŊTSƐYELI LƐ HE

• Yehowa tswa eyiŋtoo akɛ ekɛ “seshi” ko ni baajwara Onufu, Satan Abonsam yitso nɔ̃ baaba lɛ he adafi.—1 Mose 3:15.

• Yehowa tsɔɔ yɛ 1943 D.Ŋ.B. akɛ nɛkɛ “seshi” nɛɛ baafee Abraham seshinyo ni ji adesa.—1 Mose 12:1-3, 7; 22:18.

• Mla kpaŋmɔ ni akɛha Israel yɛ 1513 D.Ŋ.B. lɛ kɛ “nibii kpakpai ni baaba lɛ ahe susuma” haa.—2 Mose 24:6-8; Hebribii 10:1, NW.

• Israel shikpɔŋ nɔ maŋtsɛyeli lɛ je shishi 1117 D.Ŋ.B., ni etee nɔ yɛ sɛɛ mli yɛ David wekukpaa lɛ mli.—1 Samuel 11:15; 2 Samuel 7:8, 16.

• Akpata Yerusalem hiɛ yɛ 607 D.Ŋ.B., ni “jeŋmaji abe” lɛ je shishi.—2 Maŋtsɛmɛi 25:8-10, 25, 26; Luka 21:24.

• Afɔ Yesu mu akɛ Maŋtsɛ ni Ahala Lɛ yɛ 29 Ŋ.B. ni eje eshikpɔŋ nɔ sɔɔmɔ shishi.—Mateo 3:16, 17; 4:17; 21:9-11.

• Yesu kwɔ kɛtee ŋwɛi yɛ 33 Ŋ.B., koni eyamɛ yɛ jɛmɛ yɛ Nyɔŋmɔ ninejurɔ nɔ kɛyashi enɔyeli aaaje shishi.—Bɔfoi lɛ Asaji 5:30, 31; Hebribii 10:12, 13.

• Awo Yesu maŋtsɛ yɛ ŋwɛi Maŋtsɛyeli lɛ nɔ yɛ 1914 Ŋ.B. beni “jeŋmaji abe” lɛ ba naagbee.—Kpojiemɔ 11:15.

• Ashɛrɛ Satan kɛ edaimonioi lɛ ashwie shikpɔŋ lɛ nɔ ni ekɛ haomɔ babaoo ba adesai anɔ.—Kpojiemɔ 12:9-12.

• Yesu kwɛɔ Nyɔŋmɔ Maŋtsɛyeli lɛ he sanekpakpa lɛ shiɛmɔ yɛ jeŋ muu fɛɛ lɛ nɔ.—Mateo 24:14; 28:19, 20.