Yitso 18
Ha Efee Oti ni Ma Ohiɛ akɛ Obaasɔmɔ Nyɔŋmɔ Kɛya Naanɔ
1, 2. Mɛni hu ataoɔ yɛ Nyɔŋmɔ he nilee ni ayɔɔ lɛ sɛɛ?
ŊƆƆ lɛ akɛ odamɔ shinaa ko ni kɛ bo yaa tsu ko ni jwetrii babaoo yɔɔ mli shi aŋmɛ mli lɛ naa. Ha wɔkɛɛ akɛ mɔ ko ni yɔɔ hegbɛ kɛ samfee lɛ eha bo ni ekɛɛ bo akɛ oŋɔ nɛkɛ nibii ni jara wa nɛɛ mli nɔ fɛɛ nɔ ni osumɔɔ. Kɛji akɛ okɛ nakai samfee lɛ tsuuu nii lɛ, ehe baŋ sɛɛnamɔ kɛhaŋ bo. Nakai nɔŋŋ hu esa akɛ okɛ nilee atsu nii kɛ ehe aaaba sɛɛnamɔ kɛha bo.
2 Enɛ ji anɔkwale titri yɛ Nyɔŋmɔ nilee he. Yɛ anɔkwale mli lɛ, Yehowa Nyɔŋmɔ kɛ Yesu Kristo he anɔkwa nilee tsɔɔ naanɔ wala. (Yohane 17:3) Ni kɛlɛ, nine shɛŋ nakai gbɛkpamɔ lɛ nɔ kɛtsɔ nilee kɛkɛ ni mɔ ko yɔɔ lɛ nɔ. Taakɛ okɛ samfee ni sɛɛnamɔ yɔɔ he aaatsu nii lɛ, ehe miihia ni okɛ Nyɔŋmɔ he nilee lɛ atsu nii yɛ oshihilɛ mli. Yesu kɛɛ akɛ mɛi ni feɔ Nyɔŋmɔ suɔmɔnaa nii lɛ “aaabote . . . maŋtsɛyeli lɛ mli.” Aŋkroaŋkroi nɛɛ baana hegbɛ ni amɛsɔmɔ Nyɔŋmɔ kɛya naanɔ!—Mateo 7:21; 1 Yohane 2:17.
3. Mɛni ji Nyɔŋmɔ suɔmɔnaa nii kɛha wɔ?
3 Beni okase nɔ ni Nyɔŋmɔ suɔmɔnaa nii ji sɛɛ lɛ, ehe hiaa ni ofee. Mɛni osusuɔ akɛ Nyɔŋmɔ suɔmɔnaa nii ji kɛha bo? Abaanyɛ amu sane lɛ naa jogbaŋŋ yɛ nɛkɛ wiemɔi nɛɛ amli: Kasemɔ Yesu. Klɛŋklɛŋ Petro 2:21 kɛɔ wɔ akɛ: “Enɛ nɔŋŋ hewɔ atsɛ nyɛ, ejaakɛ Kristo hu na amanehulu eha nyɛ ni ekɛto okadi efɔ shi eha nyɛ, koni nyɛnyiɛ enanemaahei lɛ asɛɛ.” No hewɔ lɛ kɛ ooofee Nyɔŋmɔ suɔmɔnaa nii lɛ, ehe baahia ni onyiɛ Yesu nɔkwɛmɔ nɔ lɛ sɛɛ kpaakpa bɔ ni ooonyɛ. Nɛkɛ gbɛ nɔ otsɔɔ okɛ Nyɔŋmɔ he nilee lɛ tsuɔ nii yɛ.
BƆ NI YESU KƐ NYƆŊMƆ HE NILEE LƐ TSU NII EHA
4. Mɛni hewɔ Yesu le babaoo yɛ Yehowa he lɛ, ni ekɛ nilee nɛɛ etsu nii yɛ mɛɛ gbɛ nɔ?
4 Yesu Kristo yɛ Nyɔŋmɔ he nilee babaoo fe bɔ ni mɛi krokomɛi yɔɔ. Ehi shi ni ekɛ Yehowa Nyɔŋmɔ tsu nii yɛ ŋwɛi yinɔi babaoo dani eba shikpɔŋ nɔ. (Kolosebii 1:15, 16) Ni mɛni Yesu kɛ nakai nilee lɛ fɛɛ fee? Etsui enyɔɔɔ emli akɛ eyɔɔ enɛ pɛ kɛkɛ. Yesu hi shi yɛ naa. No hewɔ ni emli hi, etoɔ etsui shi, ni ejieɔ suɔmɔ kpo yɛ ekɛ enanemɛi adesai asharamɔ mli babaoo nakai lɛ. No hewɔ lɛ Yesu miikase eŋwɛi Tsɛ lɛ, ni eefee nii yɛ Yehowa gbɛi kɛ su kɛ baŋ he nilee ni eyɔɔ lɛ kɛ gbeekpamɔ naa.—Yohane 8:23, 28, 29, 38; 1 Yohane 4:8.
5. Mɛni hewɔ abaptisi Yesu, ni ehi shi yɛ ebaptisimɔ lɛ shishinumɔ naa yɛ mɛɛ gbɛ nɔ?
5 Nilee ni Yesu yɔɔ lɛ hu tsirɛ lɛ koni ekɔ gbɛ ko ni hiɛdɔɔ yɔɔ mli. Ejɛ Galilea kɛba Yordan Faa lɛ he, ni Yohane baptisi lɛ yɛ jɛmɛ. (Mateo 3:13-15) Yesu baptisimɔ lɛ feɔ mɛni he okadi? Akɛ Yudanyo lɛ, afɔ lɛ awo maŋ ni ejɔɔ ehe nɔ eha Nyɔŋmɔ lɛ mli. No hewɔ lɛ, Yesu ji mɔ ni ejɔɔ ehe nɔ kɛjɛ efɔmɔ mli. (2 Mose 19:5, 6) Baptisimɔ ni ekɛ ehe ha lɛ tsɔɔ akɛ, ekɛ lɛ diɛŋtsɛ ehe miiha Yehowa koni etsu ŋwɛi suɔmɔnaa nii ni yɔɔ kɛha lɛ yɛ nakai be lɛ mli lɛ he nii. (Hebribii 10:5, 7) Ni Yesu hi shi yɛ ebaptisimɔ lɛ shishinumɔ naa. Ekɛ ehe wo Yehowa sɔɔmɔ mli, ekɛ Nyɔŋmɔ he nilee lɛ ha gbɔmɛi yɛ hegbɛ fɛɛ hegbɛ ni eeena mli. Yesu mii shɛ Nyɔŋmɔ suɔmɔnaa nii ni efeɔ lɛ he, ekɛɛ po akɛ enɛ tamɔ niyenii kɛha lɛ.—Yohane 4:34.
6. Yesu kwa lɛ diɛŋtsɛ ehe yɛ mɛɛ gbɛ nɔ?
6 Yesu yɔse jogbaŋŋ akɛ, Yehowa suɔmɔnaa nii ni eeefee lɛ baaha elaaje nɔ ko waa—akɛ ebaalaaje ewala po. Shi kɛlɛ, Yesu kwa ehe, ekɛ enibii ni he hiaa lɛ lɛ ye gbɛhe ni ji enyɔ. Nyɔŋmɔ suɔmɔnaa nifeemɔ ba klɛŋklɛŋ yɛ bei fɛɛ mli. Te wɔɔfee tɛŋŋ wɔnyiɛ Yesu nɔkwɛmɔ nɔ ni yeɔ emuu lɛ sɛɛ yɛ enɛ gbɛfaŋ?
NIFEEMƆI NI KƐ MƆ YAA NAANƆ WALA MLI
7. Mɛni ji nibii ni esa akɛ mɔ ko afee koni ehe asa kɛha baptisimɔ?
7 Akɛni wɔtamɔɔɔ Yesu hewɔ lɛ, wɔyeee emuu, ni ja wɔfee nibii krokomɛi ni he hiaa lɛ kɛtsɔ hiɛ dani wɔbaanyɛ wɔshɛ baptisimɔ oti ni sa kadimɔ lɛ he. Enɛ jeɔ shishi kɛtsɔɔ Yehowa Nyɔŋmɔ kɛ Yesu Kristo he anɔkwa nilee ni wɔɔŋɔ wo wɔtsui mli lɛ nɔ. Enɛ feemɔ haa wɔkɛ hemɔkɛyeli tsuɔ nii ni wɔnáa suɔmɔ ni mli wa kɛhaa Nyɔŋmɔ. (Mateo 22:37-40; Romabii 10:17; Hebribii 11:6) Esa akɛ Nyɔŋmɔ mlai, shishitoo taomɔ nii, kɛ tɛi ni efolɔ eshwie shi lɛ nɔ yeli atsirɛ wɔ ni wɔtsake wɔtsui, ni wɔ werɛ aho wɔhe yɛ wɔ tsutsu eshai lɛ ahe yɛ Nyɔŋmɔ gbeyeishemɔ mli. Enɛ kɛ mɔ yaa tsakemɔ mli, ni ji akɛ, wɔjeɔ wɔhe sɛɛ ni wɔshiɔ efɔŋ fɛɛ efɔŋ gbɛ ni wɔnyiɛ nɔ tsutsu beni wɔbɛ Nyɔŋmɔ he nilee lɛ. (Bɔfoi lɛ Asaji 3:19) No hewɔ lɛ, kɛji akɛ wɔyaa nɔ lolo wɔfeɔ esha ko yɛ teemɔŋ fe ni wɔɔfee nɔ ni ja lɛ, belɛ wɔjeko wɔhe sɛɛ diɛŋtsɛ, ni asaŋ wɔshishiuko Nyɔŋmɔ hu. Yehowa naa osatofeemɔi fɛɛ.—Luka 12:2, 3.
8. Mɛni esa akɛ ofee kɛ oosumɔ ni okɛ ohe awo Maŋtsɛyeli-shiɛmɔ nitsumɔ lɛ mli?
8 Amrɔ nɛɛ ni okaseɔ Nyɔŋmɔ he nilee nɛɛ, ani ejeee nɔ ni sa akɛ ooosusu mumɔŋ saji ahe yɛ gbɛ ni kɔɔ bo diɛŋtsɛ ohe lɛ nɔ? Ekolɛ ooshwe ni ogba owekumɛi, nanemɛi, kɛ mɛi krokomɛi nɔ ni okaseɔ lɛ he sane. Yɛ anɔkwale mli lɛ, ekolɛ oje enɛ feemɔ shishi momo, taakɛ bɔ ni Yesu gba mɛi krokomɛi sanekpakpa lɛ yɛ trukaa gbɛi anɔ lɛ. (Luka 10:38, 39; Yohane 4:6-15) Agbɛnɛ obaasumɔ ni ofee babaoo. Kristofoi onukpai baana he miishɛɛ akɛ amɛkɛ bo aaawie bɔni afee ni amɛle kɛji akɛ oji mɔ ni sa, ni obaanyɛ okɛ ohe awo Yehowa Odasefoi a-Maŋtsɛyeli-shiɛmɔ nitsumɔ lɛ mli daa. Kɛ osa lɛ, onukpai lɛ baato gbɛjianɔ aha bo ni ofata Odasefonyo ko he yɛ sɔɔmɔ nitsumɔ lɛ mli. Yesu kaselɔi lɛ nyiɛ efamɔi asɛɛ bɔni afee ni amɛtsu amɛ sɔɔmɔ lɛ he nii yɛ gbɛjianɔtoo kpakpa naa. (Marko 6:7, 30; Luka 10:1) Yelikɛbuamɔ ni tamɔ nakai he baaba sɛɛnamɔ aha bo yɛ be mli ni okɛ ohe woɔ Maŋtsɛyeli sane lɛ ni agbɛɔ ashwaa yɛ shia kɛ shia kɛ agbɛnɛ yɛ gbɛi krokomɛi anɔ lɛ mli lɛ.—Bɔfoi lɛ Asaji 20:20, 21.
9. Mɛɛ gbɛ nɔ mɔ ko tsɔɔ efeɔ henɔjɔɔmɔ kɛha Nyɔŋmɔ, ni henɔjɔɔmɔ saa mɔ lɛ shihilɛ he yɛ mɛɛ gbɛ nɔ?
9 Sanekpakpa lɛ ni ashiɛɔ atsɔɔ gbɔmɛi sɔrɔtoi fɛɛ yɛ asafo lɛ shikpɔŋkuku lɛ mli lɛ ji gbɛ ni atsɔɔ nɔ akɛnaa mɛi ni sumɔɔ jalɛ nifeemɔ lɛ ni efata nitsumɔi kpakpai ni yeɔ odase akɛ oyɛ hemɔkɛyeli lɛ he. (Bɔfoi lɛ Asaji 10:34, 35; Yakobo 2:17, 18, 26) Kristofoi akpeei ni ayaa daa kɛ shiɛmɔ nitsumɔ lɛ ni akɛ he woɔ mli yɛ gbɛ ni mɔɔ shi nɔ lɛ hu ji gbɛi ni otsɔɔ nɔ otsɔɔ akɛ otsake otsui ni oje ohe sɛɛ ni agbɛnɛ otswa ofai shi akɛ obaahi shi yɛ Nyɔŋmɔ nilee lɛ kɛ gbeekpamɔ naa. Mɛni ji nifeemɔ ni ja ni nyiɛ sɛɛ? No ji ohe nɔ ni ooojɔɔ oha Yehowa Nyɔŋmɔ. Enɛ tsɔɔ akɛ okɛ sɔlemɔ ni jɛ tsui mli ekɛɛ Nyɔŋmɔ akɛ ojɛ otsui muu fɛɛ mli okɛ owala miiha lɛ koni ofee esuɔmɔnaa nii. Enɛ ji gbɛ ni oootsɔ nɔ ojɔɔ ohe nɔ oha Yehowa koni okpɛlɛ Yesu Kristo kɔŋtso ni waaa lɛ nɔ.—Mateo 11:29, 30.
BAPTISIMƆ—NƆ NI ETSƆƆ KƐHA BO
10. Mɛni hewɔ esa akɛ abaptisi bo beni ojɔɔ ohe nɔ oha Yehowa lɛ sɛɛ?
10 Taakɛ Yesu tsɔɔ lɛ, esa akɛ abaptisi mɛi fɛɛ ni batsɔmɔɔ ekaselɔi lɛ. (Mateo 28:19, 20) Mɛni hewɔ enɛ he hiaa beni ojɔɔ ohe nɔ oha Nyɔŋmɔ lɛ sɛɛ? Akɛni ojɔɔ ohe nɔ oha Yehowa hewɔ lɛ, ele akɛ osumɔɔ lɛ. Shi ŋwanejee ko bɛ he akɛ obaasumɔ ni ofee nii kɛya hiɛ koni oha mɛi krokomɛi ale suɔmɔ ni oyɔɔ kɛha Nyɔŋmɔ lɛ. Ojogbaŋŋ, baptisimɔ haa onáa hegbɛ koni oha mɛi fɛɛ ale ohe nɔ ni ojɔɔ oha Yehowa Nyɔŋmɔ lɛ.—Romabii 10:9, 10.
11. Mɛni ji baptisimɔ shishi?
11 Nɔ ni baptisimɔ shishinumɔ ji yɛ okadi feemɔ mli lɛ tsɔɔ babaoo. Beni akɛ bo woɔ nu lɛ mli, loo “afuɔ bo” yɛ nu lɛ shishi lɛ, efeɔ tamɔ nɔ ni ogbo oha otsutsu shihilɛ gbɛ lɛ. Kɛ ofa kpo kɛjɛ nu lɛ mli lɛ, etamɔ nɔ ni oofa kpo kɛmiiba shihilɛ hee mli, nɔ ni Nyɔŋmɔ suɔmɔnaa nii yeɔ nɔ shi jeee bo diɛŋtsɛ onɔ. Shi, no etsɔɔɔ akɛ otɔ̃ŋ dɔŋŋ, ejaakɛ wɔ fɛɛ wɔyeee emuu ni yɛ enɛ hewɔ lɛ wɔfeɔ esha daa gbi. Shi, akɛ Yehowa tsulɔ ni ojɔɔ ohe nɔ ni abaptisi bo lɛ, okɛ lɛ ebote wekukpaa krɛdɛɛ ko mli. Yɛ otsuitsakemɔ kɛ oheshibaa kɛha baptisimɔ hewɔ lɛ, Yehowa miisumɔ ni edamɔ Yesu kpɔmɔ afɔleshaa lɛ nɔ ekɛ ohe eshai ake bo. No hewɔ lɛ baptisimɔ kɛ mɔ yaa henilee ni mli tse mli yɛ Nyɔŋmɔ hiɛ.—1 Petro 3:21.
12. Mɛni baptisimɔ (a) ‘yɛ Tsɛ lɛ gbɛi amli’ lɛ tsɔɔ? (b) ‘yɛ Bi lɛ gbɛi amli’ lɛ tsɔɔ? (d) ‘yɛ mumɔ krɔŋkrɔŋ lɛ gbɛi amli’ lɛ tsɔɔ?
12 Yesu fa esɛɛnyiɛlɔi lɛ akɛ amɛbaptisi kaselɔi heei amɛwo “Tsɛ lɛ kɛ Bi lɛ kɛ mumɔ krɔŋkrɔŋ lɛ gbɛi amli.” (Mateo 28:19) Mɛni Yesu tsɔɔ? Baptisimɔ ‘yɛ Tsɛ lɛ gbɛi amli lɛ’ tsɔɔ akɛ mɔ ni abaptisiɔ lɛ lɛ kɛ etsui muu fɛɛ kpɛlɛɔ Yehowa Nyɔŋmɔ nɔ akɛ Bɔlɔ kɛ jeŋ muu fɛɛ Maŋtsɛ ni ja. (Lala 36:10; 83:19; Jajelɔ 12:1) Ni aaabaptisi mɔ ko yɛ ‘Bi lɛ gbɛi amli lɛ’ tsɔɔ akɛ mɔ aŋkro lɛ kpɛlɛɔ Yesu Kristo nɔ—kɛ titri lɛ E-kpɔmɔ afɔleshaa lɛ—akɛ nɔ kome pɛ ni Nyɔŋmɔ kɛha ni atsɔɔ nɔ ahereɔ mɔ yiwala. (Bɔfoi lɛ Asaji 4:12) Baptisimɔ ‘yɛ mumɔ krɔŋkrɔŋ lɛ gbɛi amli lɛ’ tsɔɔ akɛ mɔ ni abaptisiɔ lɛ lɛ kpɛlɛɔ Yehowa mumɔ krɔŋkrɔŋ, loo enifeemɔ hewalɛ lɛ nɔ, akɛ Nyɔŋmɔ dɛŋdade ni ekɛtsuɔ E-yiŋtoi ahe nii ni ekɛwoɔ E-tsuji ahewalɛ koni amɛfee E-jalɛ suɔmɔnaa nii yɛ gbɛjianɔtoo ni E-mumɔ lɛ kudɔɔ lɛ kɛ gbeekpamɔ naa.—1 Mose 1:2; Lala 104:30; Yohane 14:26; 2 Petro 1:21.
ANI OFEE KLALO KƐHA BAPTISIMƆ?
13, 14. Mɛni hewɔ esaaa akɛ wɔsheɔ gbeyei akɛ wɔɔhala akɛ wɔɔsɔmɔ Yehowa Nyɔŋmɔ?
13 Akɛni baptisimɔ tsɔɔ babaoo, ni eji mɔ lɛ shihilɛ mli oti ni he hiaa ni sa kadimɔ fe fɛɛ hewɔ lɛ, ani eji nifeemɔ ni esa akɛ oshe no gbeyei? Dabi kwraa! Yɛ be mli ni yiŋ ni akpɛɔ akɛ aaana baptisimɔ lɛ jeee nɔ ko ni aŋɔɔ lɛ akɛ hiɛdɔɔ bɛ mli lɛ, ŋwanejee ko bɛ he akɛ eji nɔ ni nilee yɔɔ mli fe fɛɛ ni ooonyɛ ofee.
14 Baptisimɔ kɛ odaseyeli haa akɛ ohala akɛ ooosɔmɔ Yehowa Nyɔŋmɔ. Susumɔ gbɔmɛi ni okɛ amɛ kpeɔ lɛ he okwɛ. Ani amɛteŋ mɔ fɛɛ mɔ sɔmɔɔɔ nuntsɔ ko yɛ gbɛ kome loo gbɛ kroko nɔ? Mɛi komɛi sɔmɔɔ ninamɔ. (Mateo 6:24) Mɛi krokomɛi hu kɛ hiɛdɔɔ diɔ amɛ heloo gbɛfaŋ nitsumɔi asɛɛ loo amɛsɔmɔɔ amɛ diɛŋtsɛ amɛhe kɛtsɔ amɛ diɛŋtsɛ amɛ akɔnɔi ni amɛnine aaashɛ nɔ lɛ ni amɛkɛfeɔ nɔ titri yɛ amɛ shihilɛ mli lɛ nɔ. Mɛi krokomɛi hu sɔmɔɔ apasa nyɔŋmɔi. Shi ohala akɛ obaasɔmɔ anɔkwa Nyɔŋmɔ lɛ, Yehowa. Mɔ ko mɔ ko bɛ ni jieɔ mlihilɛ, mɔbɔnalɛ, kɛ suɔmɔ kpo tamɔ lɛ. Nyɔŋmɔ kɛ nitsumɔ ni yiŋtoo yɔɔ mli ni tsɔɔ amɛ gbɛ kɛyaa yiwalaheremɔ he woɔ adesai ahiɛ nyam. Ekɛ naanɔ wala woɔ etsuji anyɔmɔ. Yɛ anɔkwale mli lɛ, Yesu nɔkwɛmɔ nɔ lɛ sɛɛnyiɛmɔ kɛ owala ni okɛaaha Yehowa lɛ jeee gbɛ ni esa akɛ ashe he gbeyei. Yɛ anɔkwale mli lɛ, no pɛ ji nɔ ni saa Nyɔŋmɔ hiɛ ni shishinumɔ ni yeɔ emuu yɔɔ mli.—1 Maŋtsɛmɛi 18:21.
15. Mɛni ji gbɛtsii nii komɛi kɛha baptisimɔ?
15 Kɛlɛ, baptisimɔ jeee gbɛ ni atsɔɔ nɔ yɛ nɔnyɛɛ hewɔ. Eji teemɔŋ sane ni ka bo kɛ Yehowa teŋ. (Galatabii 6:4) Akɛni otee hiɛ yɛ mumɔŋ hewɔ lɛ, ekolɛ obaasusu akɛ: “Mɛni tsiɔ mibaptisimɔ gbɛ?” (Bɔfoi lɛ Asaji 8:35, 36) Obaanyɛ obi ohe akɛ, ‘Ani weku shitee-kɛ-woo miitsi minaa? Ani mikɛ mihe woɔ shihilɛ ko loo eshafeemɔ nifeemɔ ko ni kɛ ŋmalɛ lɛ kpaaa gbee mli lolo? Ani eeenyɛ eba akɛ miishe akutsoŋbii ni basumɔŋ misane lɛ gbeyei?’ Enɛɛmɛi ji nibii komɛi ni esa akɛ osusu he, shi okɛ hiɛshikamɔ aŋmɛ fɛɛ yɛ nilee mli.
16. Yehowa ni ooosɔmɔ lɛ lɛ he baaba sɛɛnamɔ aha bo yɛ mɛɛ gbɛ nɔ?
16 Nilee bɛ mli akɛ ooosusu nɔ ni obaalaaje lɛ he yɛ be mli ni osusuko sɛɛnamɔi ni jɛɔ Yehowa sɔɔmɔ mli baa lɛ he. Akɛ nɔkwɛmɔ nɔ lɛ, susumɔ weku shitee-kɛ-woo sane lɛ he okwɛ. Yesu wo shi akɛ, kɛji akɛ ekaselɔi lɛ laaje amɛ wekumɛi po yɛ esɛɛnyiɛmɔ hewɔ lɛ, amɛbaaná mumɔŋ weku ni da. (Marko 10:29, 30) Nɛkɛ nanemɛi heyelilɔi nɛɛ baajie nyɛmimɛi asuɔmɔ kpo amɛtsɔɔ bo, amɛbaaye amɛbua bo koni oŋmɛ otsui shi yɛ yiwaa mli, ni amɛfi osɛɛ yɛ gbɛ ni kɛ mɔ yaa wala mli lɛ nɔ. (1 Petro 5:9) Asafo lɛ mli onukpai lɛ titri baaye abua bo koni onyɛ odamɔ naagbai anaa koni onyɛ okpee kaai sɔrɔtoi fɛɛ naa yɛ omanyeyeli mli. (Yakobo 5:14-16) Yɛ je nɛɛ ni basumɔŋ osane lɛ he lɛ, obaanyɛ obi ohe akɛ, ‘Mɛni manyɛ mikɛto jeŋ muu fɛɛ Bɔlɔ lɛ nɔkpɛlɛmɔ ni maná, ni eha emli afili lɛ yɛ mishihilɛ gbɛ ni mihala lɛ mli lɛ he?’—Abɛi 27:11.
OHENƆJƆƆMƆ KƐ BAPTISIMƆ LƐ NI OOOHI SHI YƐ NAA
17. Mɛni hewɔ esa akɛ osusu baptisimɔ he akɛ nɔ ko shishijee moŋ fe enaagbee lɛ?
17 Ehe miihia ni okai akɛ baptisimɔ jeee omumɔŋ nɔyaa lɛ naagbee. Ekadiɔ wala be fɛɛ sɔɔmɔ ni akɛhaa Nyɔŋmɔ akɛ sɔɔlɔ ni etu ehe eha kɛ Yehowa Odasefoi lɛ ateŋ mɔ kome lɛ shishijee. Eyɛ mli akɛ baptisimɔ he miihia waa moŋ, shi emaaa yiwalaheremɔ nɔ aduatsɔ. Yesu ekɛɛɛ akɛ: ‘Abaahere mɔ fɛɛ mɔ ni abaptisi lɛ lɛ yiwala.’ Shi moŋ ekɛɛ: “Mɔ ni hiɛɔ mli kɛyawulaa shi lɛ, lɛ aaahere eyiwala.” (Mateo 24:13) No hewɔ lɛ, ehe miihia ni otao Nyɔŋmɔ Maŋtsɛyeli lɛ klɛŋklɛŋ kɛtsɔ enɛ ni ooofee lɛ nɔ ni he hiaa titri yɛ oshihilɛ mli lɛ nɔ.—Mateo 6:25-34.
18. Yɛ baptisimɔ sɛɛ lɛ, mɛɛ otii komɛi obaatiu sɛɛ?
18 Bɔni afee ni oŋmɛ otsui shi yɛ osɔɔmɔ ni okɛhaa Yehowa lɛ mli lɛ, obaasumɔ ni okɛ mumɔŋ otii amamɔ shi kɛha bo diɛŋtsɛ ohe. Oti kome ni sa jogbaŋŋ ji ni oha Nyɔŋmɔ he nilee ni oyɔɔ lɛ aya hiɛ kɛtsɔ e-Wiemɔ lɛ ni oookase daa nɔ. Too gbɛjianɔ ni okane Biblia lɛ daa. (Lala 1:1, 2) Yaa Kristofoi akpeei daa, ejaakɛ naanyobɔɔ ni onaa yɛ jɛmɛ lɛ baaye abua bo ni eha ona mumɔŋ hewalɛ. Yɛ ogbɛfaŋ lɛ, mɛni hewɔ okɛfeee oti ni ma ohiɛ akɛ oooha saji ahetoo yɛ asafoŋ kpeei ashishi, ni otsɔ enɛ nɔ okɛjie Yehowa yi ni okɛtswa mɛi krokomɛi oma shi? (Romabii 1:11, 12) Oti kroko baanyɛ afee osɔlemɔi lɛ ahilɛ ni oooha eya hiɛ.—Luka 11:2-4.
19. Mɛɛ sui kpakpai komɛi mumɔ krɔŋkrɔŋ lɛ baanyɛ aye abua bo koni ojie lɛ kpo?
19 Kɛ ooohi shi yɛ nɔ ni obaptisimɔ lɛ tsɔɔ lɛ naa lɛ, ehe baahia ni oha ohiɛ ahi nɔ ni ofeɔ lɛ nɔ be fɛɛ be, ni oha Nyɔŋmɔ mumɔ krɔŋkrɔŋ lɛ awo sui kpakpai tamɔ suɔmɔ, miishɛɛ, toiŋjɔlɛ, tsuishiŋmɛɛ, mlihilɛ, ejurɔfeemɔ, hemɔkɛyeli, mlijɔlɛ, kɛ henɔyeli yɛ omli. (Galatabii 5:22, 23; 2 Petro 3:11) Kaimɔ akɛ, Yehowa kɛ emumɔ krɔŋkrɔŋ lɛ haa mɛi fɛɛ ni sɔleɔ amɛbiɔ enɛ ni amɛboɔ lɛ toi akɛ etsuji anɔkwafoi lɛ. (Luka 11:13; Bɔfoi lɛ Asaji 5:32) No hewɔ lɛ, sɔlemɔ oha Nyɔŋmɔ ni okɛbi emumɔ lɛ, ni obi ni eye ebua bo ni ojie sui kpakpai ni saa ehiɛ lɛ kpo. Nɛkɛ sui kpakpai nɛɛ baaje kpo babaoo yɛ owiemɔ kɛ ojeŋba mli, yɛ be mli ni oŋmɛɔ gbɛ ni Nyɔŋmɔ mumɔ lɛ náa hewalɛ yɛ oshihilɛ nɔ lɛ. Shi, aŋkroaŋkro fɛɛ ni yɔɔ Kristofoi asafo lɛ mli lɛ miibɔ mɔdɛŋ ni ená “gbɔmɔ hee” lɛ koni etamɔ Kristo babaoo. (Kolosebii 3:9-14) Wɔteŋ mɔ fɛɛ mɔ kɛ kaai sɔrɔtoi kpeɔ yɛ enɛ feemɔ mli ejaakɛ wɔ mumɔŋ nɔyaa lɛ eshɛ hei sɔrɔtoi. Akɛni oyeee emuu hewɔ lɛ, esa akɛ otsu nii waa ni oná Kristofoi asu kɛ baŋ lɛ. Shi kaaha onijiaŋ miije wui kɔkɔɔkɔ yɛ enɛ mli, ejaakɛ onine baanyɛ ashɛ nɔ kɛtsɔ Nyɔŋmɔ yelikɛbuamɔ nɔ.
20. Obaanyɛ okase Yesu yɛ sɔɔmɔ lɛ mli yɛ mɛɛ gbɛi anɔ?
20 Nɔ ni esa akɛ efata omumɔŋ otii lɛ ahe ji Yesu miishɛɛ nɔkwɛmɔ nɔ lɛ kasemɔ diɛŋtsɛ. (Hebribii 12:1-3) Esumɔɔ sɔɔmɔ nitsumɔ lɛ. Kɛ ona hegbɛ akɛ okɛ ohe aaawo Maŋtsɛyeli-shiɛmɔ nitsumɔ lɛ mli lɛ, no lɛ, kaaha eefee nɔ ko kɛkɛ ni ofeɔ. Ha otsui anyɔ omli kɛjɛ Nyɔŋmɔ Maŋtsɛyeli lɛ ni otsɔɔ mɛi krokomɛi ehe sane lɛ mli taakɛ Yesu fee lɛ. Okɛ gbɛtsɔɔmɔ ni asafo lɛ kɛhaa lɛ atsu nii koni eye ebua bo ni oya hiɛ akɛ tsɔɔlɔ. Ni na nɔmimaa akɛ Yehowa baanyɛ aha bo hewalɛ ni aaaha onyɛ otsu osɔɔmɔ lɛ.—1 Korintobii 9:19-23.
21. (a) Te wɔfeɔ tɛŋŋ wɔleɔ akɛ Yehowa buɔ anɔkwafoi aŋkroaŋkroi ni abaptisi amɛ lɛ waa? (b) Mɛni tsɔɔ akɛ baptisimɔ he miihia kɛha wɔ yibaamɔ yɛ fɔbuu kojomɔ ni Nyɔŋmɔ kɛaaba nibii agbɛjianɔtoo fɔŋ nɛɛ nɔ lɛ mli?
21 Mɔ ni ejɔɔ ehe nɔ, ni abaptisi lɛ, ni kɛ anɔkwayeli miibɔ mɔdɛŋ anyiɛ Yesu sɛɛ lɛ ji mɔ krɛdɛɛ kɛha Nyɔŋmɔ. Yehowa pɛiɔ adesai atsuii akpekpei toi akpei abɔ lɛ fɛɛ mli, ni ele bɔ ni nɛkɛ aŋkroaŋkroi nɛɛ ji mɛi ni afɔɔɔ namɔ ha. Ebuɔ amɛ akɛ amɛ tamɔ jwetrii, “nii ni asumɔɔ.” (Hagai 2:7, NW) Biblia gbalɛi tsɔɔ akɛ Nyɔŋmɔ buɔ mɛnɛɛmɛi akɛ akadi amɛ koni amɛyi ana wala yɛ ekojomɔ he nitsumɔ ni etsɛŋ ni ebaaba yiwalɛ nibii agbɛjianɔtoo nɛɛ nɔ lɛ mli. (Ezekiel 9:1-6; Maleaki 3:16, 18) Ani “ajie” bo “ato naanɔ wala”? (Bɔfoi lɛ Asaji 13:48) Ani ooshwe lɛlɛŋ ni akadi bo akɛ mɔ ni miisɔmɔ Nyɔŋmɔ? Henɔjɔɔmɔ kɛ baptisimɔ ji nakai kadimɔ nii lɛ fã, ni amɛhe miihia kɛha yiwalaheremɔ.
22. Mɛɛ gbɛkpamɔi “asafo babaoo” lɛ baanyɛ amɛkɛ amɛhiɛ afɔ nɔ?
22 Yɛ jeŋ muu fɛɛ Nu Afua lɛ sɛɛ lɛ, Noa kɛ eweku lɛ je kpo kɛjɛ adeka lɛ mli kɛba shikpɔŋ ni atsuu nɔ lɛ nɔ. Nakai nɔŋŋ hu ŋmɛnɛ, “asafo babaoo” ko ni kɛ Nyɔŋmɔ nilee tsuɔ nii yɛ amɛ shihilɛ mli lɛ náa Yehowa nɔkpɛlɛmɔ, ni amɛyɛ gbɛkpamɔ akɛ amɛyi baana wala yɛ nibii agbɛjianɔtoo fɔŋ nɛɛ naagbee lɛ mli, ni amɛyana naanɔ wala mli ŋɔɔmɔ daa yɛ shikpɔŋ ni atsuu nɔ lɛ nɔ. (Kpojiemɔ 7:9, 14) Te nakai shihilɛ lɛ baatamɔ aha tɛŋŋ?
KAA ONILEE OKWƐ
Yehowa miisumɔ ni okɛ ehe nilee ni oyɔɔ lɛ atsu nii yɛ mɛɛ gbɛ nɔ?
Mɛni ji nifeemɔi ni kɛ mɔ yaa baptisimɔ mli lɛ ekomɛi?
Mɛni hewɔ baptisimɔ jeee naagbee nifeemɔ shi eji nifeemɔ ko shishijee lɛ?
Mɛɛ gbɛ wɔbaanyɛ wɔtsɔ nɔ wɔhi shi yɛ wɔ henɔjɔɔmɔ kɛ baptisimɔ lɛ naa?
[Mfoniri ni yɔɔ baafa 172]
Ani ojɔɔ ohe nɔ oha Nyɔŋmɔ yɛ sɔlemɔ mli?
[Mfonirii ni yɔɔ baafa 174]
Mɛni tsiɔ obaptisimɔ gbɛ?