Yitso Etɛ
Aka Amɛ Akwɛ—Shi Amɛye Yehowa Anɔkwale!
1, 2. Mɛɛ saji ni tee nɔ ni sa kadimɔ tsɔ Daniel sane lɛ hiɛ?
DANIEL gbalɛ wolo lɛ je shishi yɛ majimaji ateŋ tsakemɔ be ni he hiaa waa mli. Ashur laaje emaŋtiase Ninive etsɛko. Átsĩ Mizraim naa awo gbɛhe ni he ehiaaa mli yɛ Yuda shikpɔŋ lɛ wuoyigbɛ. Ni Babilon miite shi oyayaayai akɛ jeŋ hewalɛ titri yɛ jeŋ hewalɛ he mpleshii lɛ mli.
2 Yɛ afi 625 D.Ŋ.B. lɛ, Mizraim Farao Neko bɔ enaagbee mɔdɛŋ koni etsĩ Babilon ni lɛɛɔ emli kɛbaa wuoyigbɛ lɛ naa. Yɛ enɛ hewɔ lɛ, enyiɛ eta lɛ hiɛ kɛtee Karkemish, ni yɔɔ Eufrate Faa ni yɔɔ yiteŋgbɛ lɛ naabu lɛ. Karkemish tawuu lɛ, taakɛ abatsɛ lɛ lɛ ji yinɔsane mli sane ni akɛmuaa saji anaa. Babilon asraafoi lɛ ni Lumɔ ni Baaye Etsɛ Sɛɛ, Nebukadnezar nyiɛ amɛhiɛ lɛ ye Farao Neko asraafoi lɛ anɔ butuu kwraa. (Yeremia 46:2) Akɛni ekunimyeli lɛ ekanya lɛ hewɔ lɛ, Nebukadnezar fã kɛtsɔ Siria kɛ Palestina, ni eba Mizraim hewalɛ nɔyeli lɛ shi kwraa yɛ nɛkɛ kpokpaa nɛɛ nɔ. Etsɛ Nabopolasar gbele pɛ tsĩ etafãa nɛɛ naa fioo.
3. Mɛni jɛ klɛŋklɛŋ ta ni Nebukadnezar wuu eshi Yerusalem lɛ mli ba?
3 Enɔ afi lɛ, Nebukadnezar—ní agbɛnɛ awo lɛ Babilon nɔ maŋtsɛ lɛ—gbala ejwɛŋmɔ kɛtee etawuu he tafãai lɛ anɔ ekoŋŋ yɛ Siria kɛ Palestina. Nɛkɛ be nɛɛ mli eba Yerusalem yɛ klɛŋklɛŋ be mli kwraa. Biblia lɛ bɔɔ amaniɛ akɛ: “Eyinɔ lɛ Nebukadnezar, Babel maŋtsɛ lɛ, fã kɛba, ni Yehoiakim sɔmɔ lɛ afii etɛ; kɛkɛ ni eku esɛɛ etse ehiɛ atũa.”—2 Maŋtsɛmɛi 24:1.
NEBUKADNEZAR YƐ YERUSALEM
4. Te esa akɛ anu wiemɔ “maŋtsɛ Yehoiakim nɔyeli afi ni ji etɛ” ni yɔɔ Daniel 1:1 lɛ shishi aha tɛŋŋ?
4 Wɔyɛ wiemɔ “afii etɛ” lɛ he miishɛɛ yɛ gbɛ krɛdɛɛ nɔ, ejaakɛ Daniel shishijee wiemɔi lɛ kaneɔ akɛ: “Yuda maŋtsɛ Yehoiakim maŋtsɛyeli afi ni ji etɛ lɛ nɔ lɛ Nebukadnezar, Babel maŋtsɛ lɛ, ba Yerusalem, ni ebasa eyi.” (Daniel 1:1) Yɛ Yehoiakim, ni ye maŋtsɛ kɛjɛ afi 628 kɛbashi 618 D.Ŋ.B. lɛ nɔyeli afi ni yeɔ emuu lɛ mli afi ni ji etɛ lɛ mli lɛ, no mli lɛ Nebukadnezar yeko “Babel maŋtsɛ” lolo, shi moŋ eji lumɔ ni baaye etsɛ sɛɛ. Nebukadnezar nyɛ Yehoiakim nɔ yɛ afi 620 D.Ŋ.B. koni etsũ onia. Shi aaafee afii etɛ sɛɛ lɛ, Yehoiakim tse atũa. No hewɔ lɛ, yɛ afi 618 D.Ŋ.B., loo yɛ Yehoiakim nɔyeli afi ni ji etɛ ákɛ maŋtsɛ ni sɔmɔɔ Babilon lɛ mli ni Maŋtsɛ Nebukadnezar ba Yerusalem nɔ ni ji shii enyɔ koni ebagbala Yehoiakim, atũatselɔ lɛ toi.
5. Mɛni jɛ Nebukadnezar ta ni ji enyɔ ni efã eshi Yerusalem lɛ mli ba?
5 Nɔ ni jɛ yisamɔ nɛɛ mli ba ji akɛ, “[Yehowa, NW] ŋɔ Yuda maŋtsɛ Yehoiakim kɛ Nyɔŋmɔ we lɛ nibii lɛ ekomɛi ewo edɛŋ.” (Daniel 1:2) Ekolɛ Yehoiakim gbo, kɛtsɔ awuiyeli nɔ loo yɛ atũa ni atse ashi lɛ yɛ yisamɔ lɛ shishijee bei lɛ amli lɛ hewɔ. (Yeremia 22:18, 19) Ebinuu Yehoiakin, ni eye afii 18 lɛ baye esɛɛ akɛ maŋtsɛ yɛ afi 618 D.Ŋ.B. Shi Yehoiakin nɔyeli lɛ ye nyɔji etɛ kɛ gbii nyɔŋma pɛ, ni eŋmɛɛ ehe eha yɛ afi 617 D.Ŋ.B.—Okɛto 2 Maŋtsɛmɛi 24:10-15 he.
6. Mɛni Nebukadnezar kɛ Yerusalem sɔlemɔwe lɛ krɔŋkrɔŋ nibii lɛ fee?
6 Nebukadnezar ŋɔ sɔlemɔwe ni yɔɔ Yerusalem lɛ mli krɔŋkrɔŋ nibii lɛ ni “ekɛ amɛ tee Shinear shikpɔŋ lɛ nɔ yɛ enyɔŋmɔ lɛ we lɛ, ni ekɛ nibii lɛ yato enyɔŋmɔ lɛ” ni ji Marduk, loo Merodak, yɛ Hebri mli lɛ “nitoo shia lɛ.” (Daniel 1:2; Yeremia 50:2) Ayana Babilonia niŋmaa ni akɛɛ Nebukadnezar miiwie Marduk sɔlemɔwe lɛ he yɛ mli akɛ: “Mibua jwiɛtɛi kɛ shika kɛ ojarawa tɛi anaa miwo mli . . . ni mikɛ jɛmɛ fee mimaŋtsɛyeli lɛ jwetri shia.” Wɔbaakane nɛkɛ krɔŋkrɔŋ nibii nɛɛ ahe sane ekoŋŋ yɛ Maŋtsɛ Belshazar gbii lɛ amli.—Daniel 5:1-4.
YERUSALEM GBEKƐBII LƐ ATEŊ NILELƆI FE FƐƐ
7, 8. Mɛni wɔbaanyɛ wɔkpa shi kɛjɛ Daniel 1:3, 4, kɛ 6, yɛ shihilɛ ni Daniel kɛ enanemɛi etɛ lɛ jɛ mli lɛ mli?
7 Akɛ nɔ ni fe Yehowa we lɛ jwetrii ba Babilon. Sane lɛ kɛɔ akɛ: “Ni maŋtsɛ lɛ kɛɛ Ashpenaz, epiafoi lɛ anukpa lɛ, akɛ ejie gbekɛbii hii komɛi yɛ Israelbii ni ji maŋtsɛ seshibii kɛ abladei lɛ ateŋ, gbekɛbii ni kpa ko bɛ amɛhe, ni amɛhe yɔɔ fɛo ni amɛaanyɛ ŋaa-fɛɛ-ŋaa amɛkase, ni amɛle nii, ni amɛyɔɔ jwɛŋmɔ, ni amɛaanyɛ maŋtsɛ lɛ mɔ̃ɔ lɛŋ amɛdamɔ.”—Daniel 1:3, 4.
8 Namɛi ahala? Akɛɛ wɔ akɛ: “Ni amɛteŋ mɛi ni jɛ Yudabii lɛ ateŋ ji Daniel, Hanania, Mishael kɛ Azaria.” (Daniel 1:6) Enɛ haa anaa Daniel kɛ enanemɛi lɛ ahe sane ni kulɛ efee tamɔ nɔ ni anaaa mli jogbaŋŋ lɛ mli faŋŋ. Ákɛ nɔkwɛmɔnɔ lɛ, wɔkadiɔ akɛ amɛji “Yudabii,” maŋtsɛmɛi aweku lɛ mli bii. Kɛji akɛ amɛjɛ odehei awekukpaa mli loo jeee nakai hu lɛ, jwɛŋmɔ yɛ mli akɛ aaasusu akɛ kɛ hoo lɛ amɛjɛ wekui ni he hiaa ni yɔɔ hegbɛ lɛ amli. Yɛ jwɛŋmɔ kɛ gbɔmɔtso kpakpa ni amɛyɔɔ lɛ sɛɛ lɛ, amɛyɛ sane shishinumɔ, nilee, jwɛŋmɔ, kɛ sɛɛyoomɔ—nakai amɛ fɛɛ amɛji beni amɛdarako kwraa ni aaanyɛ atsɛ amɛ “gbekɛbii,” ekolɛ ámɛye kɛjɛ afii nyɔŋma kɛ etɛ kɛyaa. Daniel kɛ enanemɛi lɛ baanyɛ afee gbɔmɛi ni ekaaa—maŋhiŋmɛi —yɛ Yerusalem gbekɛbii lɛ ateŋ.
9. Mɛni hewɔ eyɔɔ faŋŋ akɛ Daniel kɛ enanemɛi etɛ lɛ yɛ fɔlɔi ni sheɔ Nyɔŋmɔ gbeyei lɛ?
9 Sane lɛ ekɛɛɛ wɔ mɛi ni nɛkɛ gbekɛbii nɛɛ afɔlɔi ji. Shi kɛlɛ, ebaanyɛ efee anɔkwale akɛ amɛji aŋkroaŋkroi ni sheɔ Nyɔŋmɔ gbeyei ni kɛ hiɛdɔɔ tsu amɛ gbɛnaa nii akɛ fɔlɔi lɛ he nii. Kɛ asusu jeŋba kɛ mumɔŋ kpɔtɔmɔ ni yɔɔ Yerusalem yɛ nakai be lɛ mli, titri lɛ yɛ ‘odehei ashwiei lɛ kɛ abladei’ lɛ ateŋ lɛ ahe lɛ, eyɛ faŋŋ akɛ sui ni nɔ bɛ ni ana yɛ Daniel kɛ enanemɛi etɛ lɛ ahe lɛ baaa trukaa. Ŋwanejee ko bɛ he akɛ, fɔlɔi lɛ atsuii baakumɔ akɛ amɛaana ni akɛ amɛbihii lɛ miiya shikpɔŋ ko ni yɔɔ shɔŋŋ nɔ. Eji amɛaale nɔ ni baajɛ mli aba lɛ kulɛ, kwɛ bɔ ni amɛaapupuu amɛhe amɛha! Kwɛ bɔ ni ehe hiaa akɛ fɔlɔi aaatsɔse amɛbii “yɛ [Yehowa, NW] tsɔsemɔ kɛ ŋaawoo lɛ mli”!—Efesobii 6:4.
TAWUU KƐHA JWƐŊMƆ LƐ
10. Mɛni atsɔɔ Hebribii oblahii etɛ lɛ, ni mɛɛ yiŋtoo yɔɔ enɛ sɛɛ?
10 Amrɔ nɔŋŋ ni tawuu kɛha nomii nɛɛ ajwɛŋmɔ ni darako lɛ je shishi. Bɔni afee ni aná nɔmimaa akɛ abaatsɔse Hebri gbekɛbii ni eye afii nyɔŋma kɛ etɛ kɛyaa lɛ koni amɛtamɔ Babilonia gbɛjianɔtoo lɛ mli bii lɛ, Nebukadnezar wo akpɔ akɛ emaŋnukpai lɛ “atsɔɔ amɛ Kaldeamɛi awoloŋ kɛ wiemɔ.” (Daniel 1:4) Enɛ jeee tsɔsemɔ folo ko kɛkɛ. The International Standard Bible Encyclopedia lɛ tsɔɔ mli akɛ, “nɔ ni yɔɔ mli ji Sumeria, Akadia, Aramaik . . . , kɛ wiemɔi krokomɛi, kɛ agbɛnɛ woji babaoo ni aŋmala yɛ wiemɔi nɛɛ amli lɛ kasemɔ.” Nɔ ni yɔɔ “woji babaoo” lɛ amli ji yinɔsane, akɔntaabuu, ŋulamii ahe nilee, kɛ nibii krokomɛi. Shi kɛlɛ, “jamɔ mli niŋmaai, okadii kɛ ŋulamiiaŋkwɛmɔ . . . , tsu babaoo yɛ enɛ mli.”
11. Mɛɛ gbɛjianɔ ato koni aŋɔ Hebri gbekɛbii lɛ awo shihilɛ ni yaa nɔ yɛ Babilonia bɛgwafoi ashihilɛ mli lɛ mli?
11 Bɔni afee ni nɛkɛ Hebri gbekɛbii nɛɛ aŋɔ Babilonia bɛgwafoi ashihilɛ kɛ kusumii kɛ hiŋmɛigbelemɔ lɛ kwraa lɛ, “maŋtsɛ lɛ to akɛ aha amɛ amɛ daa ŋmãa kɛjɛ lɛ maŋtsɛ lɛ diɛŋtsɛ eniyenii kɛ wein ni enuɔ lɛ mli; ni alɛ amɛ afii etɛ, ni no sɛɛ ni amɛbadamɔ maŋtsɛ lɛ hiɛ.” (Daniel 1:5) Agbɛnɛ hu, “piafoi lɛ anukpa lɛ wo amɛ gbɛi, ni ewo Daniel Belteshazar, ni Hanania lɛ, ewo lɛ Shadrak, ni Mishael lɛ, ewo lɛ Meshak, ni Azaria lɛ, ewo lɛ Abednego.” (Daniel 1:7) Yɛ Biblia bei amli lɛ, nɔ ni afɔɔ feemɔ ji ni aha mɔ ko gbɛi hee koni akɛkadi be ni sa kadimɔ ko yɛ eshihilɛ mli. Ákɛ nɔkwɛmɔnɔ lɛ, Yehowa tsake Abram kɛ Sarai gbɛi ni ewo amɛ Abraham kɛ Sara. (1 Mose 17:5, 15, 16) Adesa ní aaatsake mɔ ko gbɛi lɛ ji hegbɛ loo nɔyeli he odaseyeli yɛ faŋŋ mli. Beni Yosef batsɔ niyenii anɔkwɛlɔ yɛ Mizraim lɛ, Farao wo lɛ gbɛi akɛ Zafenat-Panea.—1 Mose 41:44, 45; okɛto 2 Maŋtsɛmɛi 23:34; 24:17 he.
12, 13. Mɛni hewɔ abaanyɛ akɛɛ akɛ Hebri gbekɛbii lɛ agbɛi ni atsake lɛ ji mɔdɛŋ ni abɔ koni afite amɛhemɔkɛyeli lɛ?
12 Gbɛi tsakemɔ lɛ sa kadimɔ waa yɛ Daniel kɛ enanemɛi Hebribii etɛ lɛ asane lɛ mli. Gbɛi ni amɛfɔlɔi kɛha amɛ lɛ kɛ Yehowa jamɔ kpãa gbee. “Daniel” shishi ji “Mi-Kojolɔ Ji Nyɔŋmɔ.” “Hanania” shishi ji “Yehowa Ejie Duromɔ Kpo.” “Mishael” shishi baanyɛ afee “Namɔ Tamɔ Nyɔŋmɔ?” “Azaria” shishi ji “Yehowa Eye Ebua.” Ŋwanejee ko bɛ he akɛ eji amɛfɔlɔi lɛ ahiɛnɔkamɔ ni mli wa akɛ amɛbihii lɛ aaadara yɛ Yehowa Nyɔŋmɔ kudɔmɔ shishi koni amɛbatsɔmɔ etsuji anɔkwafoi kɛ anɔkwayelɔi.
13 Shi, gbɛi hee ni akɛha Hebribii ejwɛ lɛ fɛɛ kɔɔ apasa nyɔŋmɔi ahe kpaakpa, ni tsɔɔ akɛ nyɔŋmɔi ni tamɔ nɛkɛ eba anɔkwa Nyɔŋmɔ lɛ shi. Mɛɛ mɔdɛŋ ni fiteɔ nii yɛ teemɔŋ abɔ koni akpata gbekɛbii nɛɛ ahemɔkɛyeli lɛ hiɛ nɛ!
14. Mɛni ji gbɛi hee ni akɛha Daniel kɛ enanemɛi etɛ lɛ shishi?
14 Atsake Daniel gbɛi afee lɛ Belteshazar, ni eshishi ji “Buu Maŋtsɛ lɛ Wala He.” Eyɛ faŋŋ kɛ enɛ ji Bel, loo Marduk, Babilon nyɔŋmɔ titri lɛ tsɛmɔ kɛha yelikɛbuamɔ ni afo lɛ kuku. Kɛji akɛ Nebukadnezar le gbɛi ni ahala aha Daniel nɛɛ he nɔ ko aloo eleee hu lɛ, epupuuɔ ehe akɛ eeekpɛlɛ nɔ akɛ eji “bɔ ni atsɛɔ minyɔŋmɔ lɛ gbɛi lɛ.” (Daniel 4:8) Atsake Hanania gbɛi atsɛ lɛ Shadrak, ni woloŋlelɔi komɛi heɔ yeɔ akɛ eji gbɛi ni bɔ he enyɔ ni eshishi ji “Aku Fãmɔ.” Nɔ ni yɔɔ miishɛɛ ji akɛ, Aku ji Sumeria nyɔŋmɔ ko gbɛi. Atsake Mishael gbɛi atsɛ lɛ Meshak (ekolɛ, Mi·sha·aku), eyɛ faŋŋ akɛ “Namɔ Tamɔ Nyɔŋmɔ” lɛ ni átsake eshishinumɔ yɛ ŋaa mli afee lɛ “Namɔ Tamɔ Bɔ ni Aku Ji Lɛ?” Azaria Babilon gbɛi ji Abednego, ekolɛ eshishi ji “Nego Tsulɔ.” Ni “Nego” ji “Nebo,” nyɔmɔ ko ni akɛ egbɛi wo Babilonia maŋtsɛmɛi babaoo lɛ shishinumɔ kroko.
AMƐTSWA AMƐFAI SHI AKƐ AMƐBAAHI SHI AKƐ ANƆKWAFOI AMƐHA YEHOWA
15, 16. Mɛɛ osharai jwere Daniel kɛ enanemɛi lɛ ahiɛ agbɛnɛ, ni te amɛfee amɛnii yɛ he amɛha tɛŋŋ?
15 Babilonia gbɛi, tsɔsemɔ hee he gbɛjianɔtoo, kɛ niyenii krɛdɛɛ lɛ—enɛɛmɛi fɛɛ ji mɔdɛŋ ni abɔ, jeee ni aŋɔ Daniel kɛ Hebri gbekɛbii etɛ lɛ awo Babilonia shihilɛ gbɛ lɛ mli kɛkɛ, shi moŋ ni atse amɛ kɛjɛ amɛ diɛŋtsɛ amɛ-Nyɔŋmɔ ni ji Yehowa, he, ni agbɛnɛ kɛjɛ amɛ jamɔ mli tsɔsemɔ kɛ shihilɛ he. Akɛni nɛkɛ nɔnyɛɛ kɛ kaa nɛɛ fɛɛ kã amɛhiɛ hewɔ lɛ, mɛni nɛkɛ gbekɛbii nɛɛ baafee?
16 Mumɔ naa wiemɔ lɛ kɛɔ akɛ: “Daniel kpɛ mli yɛ etsui mli akɛ, ekɛ maŋtsɛ lɛ niyenii kɛ ewein ni enuɔ lɛ buleŋ ehe.” (Daniel 1:8a) Eyɛ mli akɛ Daniel pɛ atsĩ egbɛi atã moŋ, shi nɔ ni nyiɛ sɛɛ ba lɛ yeɔ odase akɛ enanemɛi etɛ lɛ fĩ eyiŋkpɛɛ lɛ sɛɛ. Wiemɔi “kpɛ mli yɛ etsui mli” lɛ tsɔɔ akɛ tsɔsemɔ ni Daniel fɔlɔi kɛ mɛi krokomɛi ni yɔɔ amɛmaŋ lɛ kɛha lɛ eshɛ etsui mli. Ŋwanejee ko bɛ he akɛ tsɔsemɔ ni tamɔ nakai nɔŋŋ kudɔ Hebribii etɛ ni eshwɛ lɛ yɛ amɛyiŋkpɛi amli. Enɛ feɔ sɛɛnamɔ ni yɔɔ wɔbii ni wɔɔtsɔɔ amɛ nii lɛ he lɛ he nɔkwɛmɔnɔ babaoo, yɛ be mli ni amɛtamɔ mɛi ni darako bɔ ni amɛaanu shishi po.—Abɛi 22:6; 2 Timoteo 3:14, 15.
17. Mɛni hewɔ maŋtsɛ lɛ niyenii lɛ pɛ Daniel kɛ enanemɛi lɛ kpoo shi jeee gbɛjianɔtoi krokomɛi lɛ?
17 Mɛni hewɔ Hebribii gbekɛbii lɛ kpoo niyenii lɛ kɛ wein lɛ pɛ shi jeee gbɛjianɔtoi krokomɛi lɛ? Daniel susumɔ lɛ tsɔɔ nɔ hewɔ lɛ mli faŋŋ: ‘Ebuleŋ ehe.’ Eyɛ mli akɛ ekase “Kaldeamɛi awoloŋ kɛ wiemɔ” ni aha lɛ Babilonia gbɛi, ni esumɔɔɔ moŋ, shi enɛ buleŋ mɔ ko. Susumɔ Mose nɔkwɛmɔnɔ, nɔ ni miihe ashɛ afii 1,000 ni tsɔ hiɛ lɛ he okwɛ. Eyɛ mli akɛ atsɔɔ lɛ “Mizraim nilee fɛɛ” moŋ, shi ehi shi akɛ anɔkwafo eha Yehowa. Lɛ diɛŋtsɛ efɔlɔi ni tsɔse lɛ lɛ ha ena shishitoo ni ma shi shiŋŋ. No hewɔ lɛ, “hemɔkɛyeli Mose diɛŋtsɛ kɛkpa yɛ enɔ, beni eda lɛ, akɛ akatsɛ lɛ Farao biyoo lɛ bi, eesumɔ moŋ akɛ ekɛ Nyɔŋmɔ maŋ lɛ ana amanehulu, fe nɔ ni eeeye esha mli ŋɔɔmɔ be fioo ko lɛ.”—Bɔfoi lɛ Asaji 7:22; Hebribii 11:24, 25.
18. Maŋtsɛ lɛ niyenii lɛ baabule Hebri gbekɛbii lɛ yɛ mɛɛ gbɛi anɔ?
18 Babilonia maŋtsɛ lɛ niyenii lɛ baabule gbekɛbii hii lɛ yɛ mɛɛ gbɛ nɔ? Klɛŋklɛŋ lɛ, ekolɛ nɔ ni baanyɛ afata niyenii lɛ ahe ji niyenii ni Mose Mla lɛ egu amɛyeli. Ákɛ nɔkwɛmɔnɔ lɛ, Babiloniabii lɛ yeɔ kooloi ni he tseee, ni Mla lɛ egu akɛ Israelbii lɛ akaye lɛ. (3 Mose 11:1-31; 20:24-26; 5 Mose 14:3-20) Nɔ ni ji enyɔ lɛ, ejeee Babiloniabii lɛ asu akɛ amɛaafolɔ kooloi asɛ̃ ni amɛlá aho dani amɛye loo lɛ diɛŋtsɛ. Looi ni lá yɔɔ mli ni aaaye lɛ ji Yehowa mla ni kɔɔ lá he lɛ mlikũu diɛŋtsɛ. (1 Mose 9:1, 3, 4; 3 Mose 17:10-12; 5 Mose 12:23-25) Nɔ ni ji etɛ lɛ, yɛ kusum naa lɛ, apasa nyɔŋmɔi ajalɔi kɛ amɛniyenii haa amagai dani amɛyeɔ akɛ niyenii ni amɛkɛ amɛ miiye. Yehowa tsuji kɛ amɛhe woŋ nifeemɔ ni tamɔ nɛkɛ mli! (Okɛto 1 Korintobii 10:20-22 he.) Naagbee kwraa lɛ, niyenii ni ŋɔɔ kɛ dãa ni wa ni akɛ he woɔ mli gbi fɛɛ gbi lɛ efeŋ nɔ ni baaha gbɔmɛi ni amɛye afi ko aná gbɔmɔtsoŋ hewalɛ kpakpa, aahu ni gbekɛbii.
19. Yɛ mɛɛ gbɛ nɔ kulɛ Hebri gbekɛbii lɛ baanyɛ asusu saji ahe, shi mɛni ye bua amɛ ni amɛmu sane naa yɛ gbɛ ni ja nɔ lɛ?
19 Eji nɔ kome akɛ aaale nɔ ni esa akɛ afee, shi eji nɔ kroko hu ákɛ aaana ekãa ni akɛaafee beni ayɔɔ nɔnyɛɛ loo kaa shishi lɛ. Kulɛ Daniel kɛ enanemɛi etɛ lɛ baanyɛ asusu akɛ akɛni amɛkɛ amɛfɔlɔi kɛ nanemɛi ateŋ jɛkɛ hewɔ lɛ, aŋkroaŋkroi nɛɛ leŋ nɔ ni amɛfee lɛ. Amɛbaanyɛ ni amɛtsɔɔ amɛjwɛŋmɔ hu akɛ eji maŋtsɛ lɛ famɔ ni etamɔ nɔ ni nɔ kroko bɛ ni amɛbaafee. Yɛ no sɛɛ lɛ, gbekɛbii krokomɛi kpɛlɛ gbɛjianɔtoo lɛ nɔ amrɔ nɔŋŋ ni amɛbu enɛ akɛ hegbɛ ni amɛna ni amɛkɛ amɛhe aaawo mli fe nɔ ko ni wa. Shi susumɔ ni ejaaa nɛɛ kɛ amɛ baawo shigbeemɔ ni ji teemɔŋ esha, ni tsɔ̃ɔ gbekɛbii pii atsɔne lɛ mli yɛ gbɛ ni waaa nɔ. Hebri gbekɛbii lɛ le akɛ “Yehowa hiŋmɛii yɛ he fɛɛ he” ni ákɛ “Nyɔŋmɔ baakojo nitsumɔ fɛɛ nitsumɔ kɛ teemɔŋ sane fɛɛ teemɔŋ sane hu, ekpakpa jio, efɔŋ jio.” (Abɛi 15:3; Jajelɔ 12:14) Nyɛhãa wɔ fɛɛ wɔkasea nii kɛjɛa gbekɛbii anɔkwafoi nɛɛ agbɛ lɛ mli.
EKÃA KƐ HEKÃMƆ KƐ NYƆMƆWOO BA
20, 21. Mɛni Daniel fee, ni mɛni jɛ mli ba?
20 Akɛni ekpɛ mli yɛ etsui mli akɛ ebaate shi eshi hewalɛi ni fiteɔ mɔ lɛ hewɔ lɛ, Daniel tee nɔ efee nii yɛ eyiŋkpɛɛ lɛ kɛ gbeekpamɔ naa. “Ekpa piafoi lɛ anukpa lɛ fai, koni ekabule ehe.” (Daniel 1:8b) ‘Ekpa lɛ fai’—wiemɔ ni sa kadimɔ waa nɛ. Bei pii lɛ, hekãmɔ kɛ mɔdɛŋbɔɔ he hiaa kɛ wɔhiɛ kã nɔ akɛ wɔɔye omanye yɛ kaai ni wɔwuɔ wɔshiɔ loo yɛ gbɔjɔmɔi komɛi ni wɔɔye nɔ kunim lɛ mli.—Galatabii 6:9.
21 Yɛ Daniel sane lɛ mli lɛ, hekãmɔ ye omanye. “Nyɔŋmɔ ha Daniel hiɛ ba nyam yɛ piafoi lɛ anukpa lɛ hiɛ, ni emusuŋ tsɔ̃ lɛ yɛ ehewɔ.” (Daniel 1:9) Jeee akɛ Daniel kɛ enanemɛi lɛ ji aŋkroaŋkroi ni he yɔɔ fɛo ni le nii hewɔ ni nibii tee nɔ jogbaŋŋ kɛha amɛ lɛ. Shi moŋ, ejɛ Yehowa jɔɔmɔ hewɔ. Ŋwanejee ko bɛ he akɛ Daniel kai Hebri abɛbua lɛ, akɛ: “Okɛ ohiɛ afɔ̃ Yehowa nɔ kɛ otsui fɛɛ, ni okɛ ohe akakpasa bo diɛŋtsɛ ojwɛŋmɔ; kaimɔ lɛ yɛ ogbɛi fɛɛ mli, ni lɛ eeejaje otempɔŋi lɛ.” (Abɛi 3:5, 6) Nakai ŋaawoo lɛ sɛɛnyiɛmɔ kɛ nyɔmɔwoo ba diɛŋtsɛ.
22. Mɛɛ shitee-kɛ-woo ni ja maŋtsɛ lɛ piafonyo lɛ tee lɛ shi?
22 Klɛŋklɛŋ lɛ, piafoi lɛ anukpa lɛ te shi wo enɛ: “Miishe minuntsɔ maŋtsɛ ni eto nyɛniyenii kɛ nyɛdãa eha nyɛ lɛ gbeyei akɛ aleee nɔ̃ eeena nyɛhiɛ mɔbɔmɔbɔ fe gbekɛbii hii nyɛtipɛŋfoi lɛ ahiɛ, ni nyɛaaha miyiwala atɔ̃ yɛ maŋtsɛ lɛ hiɛ?” (Daniel 1:10) Shitee-kɛ-wooi kɛ gbeyeishemɔi ni sa nɛ. Maŋtsɛ Nebukadnezar jeee mɔ ni abooo lɛ toi, ni piafoi anukpa lɛ yɔse akɛ, kɛji akɛ etsuuu maŋtsɛ lɛ famɔi ahe nii lɛ, ekɛ ‘ewala’ baawo oshara mli. Mɛni Daniel baafee?
23. Yɛ gbɛ ni etsɔ nɔ nɛɛ hewɔ lɛ, Daniel jie sane shishinumɔ kɛ nilee kpo yɛ mɛɛ gbɛ nɔ?
23 Biɛ ji he ni sane shishinumɔ kɛ nilee baa mli yɛ lɛ. Ekolɛ gbekɛ nuu Daniel kai abɛbua nɛɛ: “Naajɔlɛ hetoo kuɔ mlila naa; shi wiemɔ ni wa teeɔ mlifu shi.” (Abɛi 15:1) Yɛ nɔ najiaŋ ni ekɛ kuɛŋtimɔ aaama nɔ mi akɛ akpɛlɛ enibimɔ lɛ nɔ, ni ekolɛ étee mɛi krokomɛi amlifu shi ni amɛfee lɛ lá odasefonyo lɛ, Daniel ŋmɛɛ sane lɛ he. Yɛ be ni sa mli lɛ, etee “niyenii anɔkwɛlɔ” lɛ ni ekolɛ ebaasumɔ ni eŋmɛɛ sane he fioo akɛni ebuuu ehe akɔntaa etsɔɔɔ maŋtsɛ lɛ tɛ̃ɛ lɛ ŋɔɔ.—Daniel 1:11.
ATO GBII NYƆŊMA KAA HE GBƐJIANƆ
24. Mɛɛ kaa Daniel bi ni akɛba?
24 Daniel kɛ kaa ko fɔ̃ niyenii anɔkwɛlɔ lɛ hiɛ akɛ: “Kaa otsuji okwɛ gbii nyɔŋma, ni aha wɔ shwie ni wɔye kɛ nu ni wɔnu; ni akwɛ wɔhiɛaŋ kɛ gbekɛbii ni yeɔ maŋtsɛ lɛ niyenii lɛ ahiɛaŋ yɛ ohiɛ, ni bɔ fɛɛ bɔ ni ooona lɛ, ni okɛ otsuji aye.”—Daniel 1:12, 13.
25. Ekolɛ mɛni fata “shwie” ni akɛha Daniel kɛ enanemɛi etɛ lɛ he?
25 Gbii nyɔŋma ni abaaye ‘shwie ni anu nu’—ani ‘amɛhiɛ aaafee mɔbɔmɔbɔ’ kɛ́ akɛ amɛ to mɛi krokomɛi ahe lɛ? Atsɔɔ wiemɔ “shwie” shishi kɛjɛ Hebri wiemɔ ni eshishi diɛŋtsɛ ji “dumɔwui” mli. Biblia shishitsɔɔmɔi komɛi tsɔɔ shishi akɛ “yɔɔ,” ni atsɔɔ mli akɛ “yɔɔ srɔtoi ni adũɔ (tamɔ akwɛ̃ii, akpatramɔi, loo blɔfo yɔɔ).” Woloŋlelɔi komɛi nuɔ he akɛ emli sane lɛ tsɔɔ niyenii ni fe dumɔwui kɛkɛ ni ayeɔ. Wolo ko tsɔɔ mli akɛ: “Nɔ ni Daniel kɛ enanemɛi lɛ biɔ lɛ ji shwie niyenii kɛkɛ ni gbɔmɛi lɛ yeɔ lɛ shi jeee odehei akpɔ̃lɔ nɔ niyenii ni ŋɔɔ waa kɛ emli looi lɛ.” No hewɔ lɛ, nɔ ni baanyɛ afata shwie lɛ he ji niyenii ni ŋɔɔ ni akɛ yɔɔi, agorigoi, ayoi, baai, akpatramɔi, waatɛrɛi, kɛ sabolaii, kɛ bodobodo ni akɛ ŋmãai srɔtoi efee. Eji anɔkwale akɛ mɔ ko mɔ ko susuŋ enɛ he akɛ eji niyenii ni haa hɔmɔ yeɔ mɔ. Eyɛ faŋŋ akɛ niyenii anɔkwɛlɔ lɛ nu sane lɛ shishi. “Ni ebo amɛ toi yɛ nɛkɛ sane nɛɛ mli, ni eka amɛ ekwɛ gbii nyɔŋma.” (Daniel 1:14) Mɛni jɛ mli ba?
26. Mɛni jɛ gbii nyɔŋma kaa lɛ mli ba, ni mɛni hewɔ saji ba lɛ nakai lɛ?
26 “Ni gbii nyɔŋma lɛ sɛɛ lɛ ana akɛ amɛhiɛaŋ efee fɛo, ni amɛshwishwii fe gbekɛbii fɛɛ ni yeɔ maŋtsɛ lɛ niyenii lɛ.” (Daniel 1:15) Esaaa akɛ aŋɔɔ enɛ akɛ odaseyeli ni tsɔɔ akɛ niyenii ni akɛ baai kɛ aduawai efee lɛ hi fe niyenii kpakpa ni loo yɔɔ mli. Gbii nyɔŋma yɛ kuku fe bɔ ni aaana nɔ ko pɔtɛɛ kɛaajɛ niyenii ko mli, shi ejeee nɔ ni yɔɔ kuku tsɔ kɛha Yehowa akɛ ekɛaatsu eyiŋtoo he nii. E-Wiemɔ lɛ kɛɔ akɛ: “Yehowa jɔɔmɔ lɛ, no feɔ mɔ niiatsɛ; shi deŋmegbomɔ nyɛŋ ekɛ nɔ ko afata he.” (Abɛi 10:22) Hebri gbekɛbii ejwɛ lɛ kɛ amɛhemɔkɛyeli kɛ hekɛnɔfɔɔ wo Yehowa mli, ni ekwaaa amɛ. Afii ohai komɛi asɛɛ lɛ, Yesu Kristo hi shi ni eyeee nii gbii 40. Yɛ enɛ hewɔ lɛ, etsɛ wiemɔi ni anaa yɛ 5 Mose 8:3 lɛ, he ni wɔkaneɔ yɛ akɛ: “Jeee aboloo kɛkɛ haa gbɔmɔ yi náa wala, shi moŋ nɔ fɛɛ nɔ ni jɛɔ Yehowa daaŋ lɛ haa gbɔmɔ yi náa wala” lɛ sɛɛ. Daniel kɛ enanemɛi lɛ aniiashikpamɔ lɛ ji enɛ he nɔkwɛmɔnɔ ni ekaaa.
SANE SHISHINUMƆ KƐ NILEE YƐ NIYENII KPAKPA KƐ WEIN NAJIAŊ
27, 28. Yɛ mɛɛ gbɛ nɔ shihilɛ ni wa ni Daniel kɛ enanemɛi etɛ lɛ kɛ amɛhe wo mli lɛ ji saamɔ ni asaa amɛ kɛhaa nibii wuji ni jwere amɛhiɛ lɛ?
27 Gbii nyɔŋma ji kaa pɛ kɛkɛ, shi nɔ ni jɛ mli ba lɛ tsɔ̃ɔ mɔ yiŋ waa. “No hewɔ lɛ, niyenii anɔkwɛlɔ lɛ jieɔ amɛniyenii lɛ kɛ wein ni ahaa amɛ ni amɛnu lɛ, ni ahaa amɛ shwie.” (Daniel 1:16) Ewaaa akɛ aaasusu nɔ ni gbekɛbii krokomɛi ni yɔɔ tsɔsemɔ he gbɛjianɔtoo lɛ mli lɛ baasusu yɛ Daniel kɛ enanemɛi lɛ ahe lɛ he. Maŋtsɛ lɛ niyenii ni aaakpoo ni aye shwie daa gbi lɛ baatamɔ kwashiai asane yɛ amɛhiɛ. Shi etsɛŋ ni amɛkɛ kaai wuji baakpe, ni enɛɛmɛi baabi ni Hebri gbekɛbii lɛ aha amɛhiɛ ahi amɛhe nɔ ni amɛhiɛ akã shi jogbaŋŋ fe bei fɛɛ ni eho. Nɔ ni fe fɛɛ lɛ, amɛhemɔkɛyeli kɛ hekɛnɔfɔɔ ni amɛyɔɔ yɛ Yehowa mli lɛ ji nɔ ni baaha amɛje amɛhemɔkɛyeli he kaai lɛ amli shweshweeshwe.—Okɛto Yoshua 1:7 he.
28 Abaanyɛ ana odaseyeli ni tsɔɔ akɛ Yehowa kɛ nɛkɛ gbekɛbii nɛɛ yɛ lɛ yɛ nɔ ni awie kɛnyiɛ sɛɛ nɛɛ mli: “Shi nɛkɛ gbekɛbii hii ejwɛ nɛɛ Nyɔŋmɔ ha amɛle nii, ni amɛnyɛ amɛkase wolo fɛɛ wolo kɛ nilee fɛɛ nilee; ni Daniel lɛ, eha ena ninaa fɛɛ ninaa kɛ lamɔi ashishi.” (Daniel 1:17) Bɔni afee ni amɛnyɛ amɛtsu jaramɔ bei ni baa lɛ ahe nii lɛ, nɔ ni fe gbɔmɔtsoŋ hewalɛ kɛ hewalɛnamɔ kpakpa he miihia amɛ. “Ŋaalee aaabote otsui mli ni nilee aaaŋɔɔ osusuma naa; jwɛŋmɔ aaabaa oyi jogbaŋŋ, saneshishinumɔ aaabu ohe, ni ejieo kɛjɛ gbɛ fɔŋ nɔ, kɛjɛ mɛi ni wieɔ nibii kɔdɔji lɛ adɛŋ.” (Abɛi 2:10-12) Nakai pɛpɛɛpɛ Yehowa kɛha gbekɛbii anɔkwafoi ejwɛ lɛ koni ewula amɛ kɛha nɔ ni kã amɛhiɛ lɛ.
29. Mɛni hewɔ Daniel nyɛ ‘enu ninaai kɛ lamɔi fɛɛ shishi’ lɛ?
29 Awie akɛ Daniel ‘nuɔ ninaa fɛɛ ninaa kɛ lamɔi ashishi.’ Enɛ etsɔɔɔ akɛ ebatsɔ mɔ ni yɔɔ hewalɛ ni ekɛnaa teemɔŋ nibii. Nɔ ni yɔɔ miishɛɛ ji akɛ, eyɛ mli akɛ abuɔ Daniel akɛ Hebri gbalɔi wuji lɛ ateŋ mɔ kome moŋ, shi akɛ mumɔ kanyaaa lɛ koni ejaje wiemɔi tamɔ, “bɔ ni Nuntsɔ Yehowa kɛɛ nɛ” aloo “bɔ ni Yehowa Zebaot kɛɛ nɛ.” (Yesaia 28:16; Yeremia 6:9) Kɛlɛ, Nyɔŋmɔ mumɔ krɔŋkrɔŋ lɛ kudɔmɔ shishi pɛ Daniel nyɛ enu ni etsɔɔ ninaai kɛ lamɔi ni jieɔ Yehowa yiŋtoo kpo lɛ shishi.
NAAGBEE LƐ, KAA NI JARAA WAA LƐ
30, 31. Yɛ mɛɛ gbɛ nɔ gbɛ ni Daniel kɛ enanemɛi lɛ kɔ lɛ bafee sɛɛnamɔ kɛha amɛ?
30 Afii etɛ tsɔsemɔ ekoŋŋ kɛ saamɔ lɛ ba naagbee. Kɛkɛ ni kaa ni jaraa waa lɛ ba—maŋtsɛ lɛ baabibii amɛ saji. “Ni beni gbii ni maŋtsɛ lɛ eto ákɛ akɛ amɛ aba lɛ shɛ lɛ, piafoi lɛ anukpa lɛ kɛ amɛ ba Nebukadnezar hiɛ.” (Daniel 1:18) Be eshɛ ni gbekɛbii ejwɛ lɛ baabu amɛhe akɔntaa. Ani Yehowa mlai ni amɛkɛ amɛhe kpɛtɛ he fe Babilonia gbɛ̀i ni amɛkɛ amɛhe aaaha lɛ bafee nɔ ni sɛɛnamɔ yɔɔ he kɛha amɛ?
31 “Ni maŋtsɛ lɛ kɛ amɛ wie, ni amɛ fɛɛ lɛ anaaa amɛteŋ mɔ ko mɔ ko ni tamɔ Daniel, Hanania, Mishael, kɛ Azaria; no hewɔ lɛ amɛbadamɔ maŋtsɛ lɛ hiɛ.” (Daniel 1:19) Mɛɛ bembuu enɛ ji kɛha amɛ nifeemɔ gbɛ afii etɛ ni tsɔ hiɛ lɛ nɛkɛ! Ejeee sɛkɛyeli yɛ amɛgbɛfaŋ akɛ amɛkɛ amɛhe kpɛtɛ nifeemɔ ni yɔɔ kpɛŋŋ ni amɛhenilee kɛ hemɔkɛyeli etsɔɔ nɛɛ he. Yɛ anɔkwa ni amɛye yɛ nɔ ko ni tamɔ nɔ ko bibioo mli hewɔ lɛ, akɛ nibii wuji jɔɔ Daniel kɛ enanemɛi lɛ. Hegbɛ akɛ “amɛbadamɔ maŋtsɛ lɛ hiɛ” lɛ ji oti ko ni gbekɛbii lɛ fɛɛ ni yɔɔ tsɔsemɔ he gbɛjianɔtoo lɛ mli lɛ taoɔ. Kɛji akɛ Hebri gbekɛbii ejwɛ lɛ ji mɛi pɛ ni ahala amɛ lɛ, no lɛ Biblia lɛ ewieee. Yɛ fɛɛ mli lɛ, amɛ anɔkwayeli gbɛ lɛ kɛ “nyɔmɔwoo kpele” baha amɛ diɛŋtsɛ.—Lala 19:12.
32. Mɛni hewɔ abaanyɛ akɛɛ akɛ Daniel, Hanania, Mishael, kɛ Azaria ná hegbɛ ni da fe maŋtsɛ lɛ mɔ̃ɔ lɛ mli ni amɛaahi?
32 Ŋmalɛi lɛ kɛɔ akɛ: “Kɛ oona nuu ni bɔɔ mɔdɛŋ yɛ enitsumɔ mli lɛ, maŋtsɛmɛi ahiɛ tete eeedamɔ.” (Abɛi 22:29) No hewɔ lɛ, Nebukadnezar hala Daniel, Hanania, Mishael, kɛ Azaria koni amɛdamɔ maŋtsɛ lɛ hiɛ, ni ji akɛ, koni amɛfee maŋtsɛ lɛ bɛgwafoi lɛ fã. Yɛ enɛɛmɛi fɛɛ mli lɛ, wɔbaanyɛ wɔna Yehowa nine ni miikudɔ saji koni kɛtsɔ nɛkɛ oblahii nɛɛ anɔ lɛ—titri lɛ kɛtsɔ Daniel nɔ lɛ—aná ale ŋwɛi yiŋtoo lɛ he nibii ni he hiaa lɛ. Eyɛ mli akɛ halamɔ akɛ abafee Nebukadnezar bɛgwafoi lɛ fã lɛ ji woo moŋ, shi eji woo babaoo moŋ ákɛ Jeŋ Muu Fɛɛ Maŋtsɛ, Yehowa, kɛ mɔ ko aaatsu nii yɛ gbɛ ni yɔɔ naakpɛɛ nɛkɛ nɔ.
33, 34. (a) Mɛni hewɔ maŋtsɛ lɛ naa kpɛ ehe yɛ Hebri gbekɛbii lɛ ahe lɛ? (b) Mɛni wɔbaanyɛ wɔkase kɛjɛ Hebribii ejwɛ lɛ aniiashikpamɔ lɛ mli?
33 Etsɛɛɛ ni Nebukadnezar na akɛ, nilee kɛ shishinumɔ ni Yehowa kɛha Hebri gbekɛbii ejwɛ lɛ nɔ kwɔ kwraa fe nɔ ni eŋaawolɔi kɛ nilelɔi fɛɛ ni yɔɔ ebɛgwafoi lɛ ateŋ lɛ yɔɔ lɛ. “Ni ŋaa kɛ nilee saji fɛɛ ni maŋtsɛ lɛ bi amɛ lɛ ena yɛ mli akɛ amɛfe woloŋlelɔi kɛ okɔmfoi fɛɛ ni yɔɔ emaŋtsɛyelihei lɛ fɛɛ lɛ shii nyɔŋma.” (Daniel 1:20) Te eeefee tɛŋŋ efee srɔto yɛ enɛ he? “Woloŋlelɔi kɛ okɔmfoi lɛ” kɛ amɛhe fɔ̃ɔ je lɛ kɛ apasa hemɔkɛyeli nibii ni amɛkase yɛ Babilon lɛ nɔ, yɛ be mli ni Daniel kɛ enanemɛi lɛ kɛ amɛhe fɔ̃ nilee ni jɛ ŋwɛi lɛ nɔ. Anyɛŋ akɛ nɔ ko ato he—akaŋshii ko bɛ mli!
34 Nibii tsakeko tsɔ kɛtsɔ yinɔi lɛ amli. Yɛ Ŋ.B. klɛŋklɛŋ afii oha lɛ mli, beni Hela jeŋ nilee kɛ Roma mla ji nɔ ni ehe shi lɛ, akɛ mumɔ tsirɛ bɔfo Paulo koni eŋma akɛ: “Je nɛŋ nilee lɛ ji kwashiaiasane yɛ Nyɔŋmɔ hiɛ. Ejaakɛ aŋma akɛ: ‘Emɔɔ nilelɔi lɛ yɛ amɛ diɛŋtsɛ amɛhiɛtɛ̃ɛ lɛ mli.’ Ni asaŋ ‘[Yehowa, NW] le nilelɔi ajwɛŋmɔi lɛ, akɛ yakayakanii ni.’ No hewɔ lɛ, mɔ ko mɔ ko akashwã miifɔ̃ gbɔmɛi anɔ.” (1 Korintobii 3:19-21) Ŋmɛnɛ, ehe miihia ni wɔmɔ nɔ ni Yehowa etsɔɔ wɔ lɛ mli kpɛŋŋ ni wɔkaha nɔ ni yɔɔ fɛo ni kpɛ́lɛɔ yɛ je lɛ mli lɛ miigbala wɔjwɛŋmɔ yɛ gbɛ ni waaa nɔ.—1 Yohane 2:15-17.
AMƐYE ANƆKWA KƐYASHI NAAGBEE
35. Te saji ni agba wɔ yɛ Daniel nanemɛi etɛ lɛ ahe lɛ falɛ yɔɔ hã tɛŋŋ?
35 Áfee Hanania, Mishael, kɛ Azaria hemɔkɛyeli ni mli wa lɛ he mfoniri yɛ gbɛ ni yɔɔ naakpɛɛ nɔ yɛ Daniel yitso 3, yɛ Nebukadnezar shika amaga ni yɔɔ Dura ŋa lɛ nɔ lɛ kɛ flɔnɔɔ ni tsoɔ grigri kɛ la lɛ he kaa lɛ mli. Ŋwanejee ko bɛ he akɛ nɛkɛ Hebribii ni sheɔ Nyɔŋmɔ gbeyei lɛ hi shi akɛ anɔkwafoi amɛha Yehowa kɛyashi amɛgbele mli. Wɔle enɛ ejaakɛ ŋwanejee ko bɛ he akɛ, amɛhe Paulo wieɔ beni eŋma mɛi ni “tsɔ hemɔkɛyeli nɔ . . . amɛgbe la hewalɛ” lɛ ahe sane lɛ. (Hebribii 11:33, 34) Amɛji nɔkwɛmɔnii ni nɔ bɛ kɛha Yehowa tsuji, gbekɛbii kɛ onukpai fɛɛ.
36. Mɛɛ nitsumɔ ni nɔ bɛ Daniel ná?
36 Yɛ Daniel he lɛ, yitso 1 naagbee lɛ kɛɔ akɛ: “Ni Daniel hi jeŋ kɛyashi maŋtsɛ Koresh klɛŋklɛŋ afi lɛ nɔ.” Yinɔsane jieɔ lɛ kpo akɛ Koresh butu Babilon yɛ gbɛkɛ kome mli, yɛ afi 539 D.Ŋ.B. Eyɛ faŋŋ akɛ yɛ egbɛi ni ehe shi lɛ kɛ enɔyaa hewɔ lɛ, Daniel tee nɔ esɔmɔ yɛ Koresh bɛgwafoi lɛ ateŋ. Yɛ anɔkwale mli lɛ, Daniel 10:1 kɛɔ wɔ akɛ, “Koresh ni ji Persia maŋtsɛ lɛ afi ni ji etɛ lɛ nɔ lɛ,” Yehowa jie sane ko ni sa kadimɔ waa kpo etsɔɔ Daniel. Kɛji akɛ beni akɛ lɛ ba Babilon yɛ afi 617 D.Ŋ.B. lɛ no mli lɛ eyeko afii nyɔŋmai enyɔ lɛ, belɛ eehe eye afii 100 yɛ be mli ni akɛ nakai naagbee ninaa lɛ ha lɛ lɛ. Mɛɛ nitsumɔ ni ji anɔkwa sɔɔmɔ ni akɛhaa Yehowa yɛ be kakadaŋŋ mli ni jɔɔmɔ yɔɔ mli eji nɛkɛ!
37. Mɛni wɔbaanyɛ wɔkase kɛjɛ Daniel yitso 1 lɛ he susumɔ mli?
37 Daniel wolo lɛ shishijee yitso lɛ gbaa saji babaoo fe gbekɛbii anɔkwafoi ejwɛ ni kpee amɛhemɔkɛyeli he kaa naa yɛ omanyeyeli mli pɛ kɛkɛ. Etsɔɔ wɔ bɔ ni Yehowa baanyɛ ni ekɛ mɔ fɛɛ mɔ ni esumɔɔ atsu eyiŋtoo he nii. Sane lɛ tsɔɔ akɛ kɛji akɛ Yehowa ŋmɛ gbɛ lɛ, nɔ ni baatamɔ oshara lɛ baanyɛ atsu yiŋtoo kpakpa he nii. Ni ekɛɔ wɔ akɛ anɔkwayeli yɛ nibii bibii amli lɛ kɛ nyɔmɔwoo babaoo baa.
MƐNI OYƆSE?
• Mɛni abaanyɛ awie yɛ Daniel kɛ enanemɛi etɛ lɛ ashishijee tsɔsemɔ he?
• Yɛ mɛɛ gbɛ nɔ aka Hebri gbekɛbii ejwɛ lɛ atsɔsemɔ kpakpa lɛ akwɛ yɛ Babilon?
• Yɛ mɛɛ gbɛ nɔ Yehowa wo Hebribii ejwɛ lɛ nyɔmɔ yɛ ekãa ni amɛkɛdamɔ shi lɛ hewɔ?
• Mɛni Yehowa tsuji ni yɔɔ ŋmɛnɛŋmɛnɛ beaŋ lɛ baanyɛ akase kɛjɛ Daniel kɛ enanemɛi etɛ lɛ ŋɔɔ?
[Baafa muu mfoniri ni yɔɔ baafa 30]