Yitso Ekpaa
Yehowa Nyɔŋmɔ Na Shwɛɛnii ko Mɔbɔ
1, 2. Mɛni gbalɔ Yesaia gba efɔ̃ shi yɛ Yuda kɛ Yerusalem he?
AHUM ko ni naa wa waa tswa yɛ kpokpaa ní mɛi fá yɛ nɔ lɛ nɔ. Kɔɔyɔɔ ni naa wa, nugbɔnɛmɔ babaoo, kɛ nu afua gbá nujɔɔ ní lɛɛ yɛ shikpɔŋ lɛ nɔ, ni ekumɔ shiai, efite ŋmɔshi nibii, ni ekpata mɛi ahiɛ. Shi etsɛɛɛ kɛkɛ ni ahum lɛ sɛɛ fo, ni jeŋ dioofeemɔ be ko nyiɛ sɛɛ kɛba. Yɛ mɛi ní yi ná wala kɛtsɔ mli lɛ agbɛfaŋ lɛ, eji be kɛha nibii atswaa kɛ shimaa ekoŋŋ kɛ amɛsaamɔ.
2 Gbalɔ Yesaia gba nɔ ko ni tamɔ nakai efɔ̃ shi yɛ Yuda kɛ Yerusalem gbɛfaŋ. Ahum atatui ni ji ŋwɛi kojomɔi lɛ miitsi kɛmiibɛŋkɛ yɛ naakpɛɛ gbɛ nɔ—ni kɛ yiŋtoo kpakpa! Maŋ lɛ fɔyeli lɛ tsii. Nɔyelɔi lɛ kɛ maŋbii lɛ fɛɛ kɛ jalɛ sane ní ayeee kɛ láshishwiemɔ ewo shikpɔŋ lɛ nɔ obɔ. Yehowa tsɔ Yesaia nɔ ejie Yuda fɔyeli lɛ kpo etsɔɔ yɛ faŋŋ mli, ni ebɔ kɔkɔ akɛ E-baatsu kojomɔ he nii yɛ nakai maŋ ni tɔ̃ɔ mla nɔ lɛ nɔ. (Yesaia 3:25) Abaashi Yuda shikpɔŋ lɛ afɔ̃ shi amaŋfɔ kwraa yɛ ahum ni baatswa yɛ nɔ nɛɛ hewɔ. Eka shi faŋŋ akɛ gbɛkpamɔ nɛɛ baaha Yesaia werɛ aho ehe.
3. Mɛɛ sanekpakpa yɔɔ shɛɛ sane ni jɛ mumɔŋ ní yɔɔ Yesaia 4:2-6 lɛ mli?
3 Shi sanekpakpa ko yɛ! Ahum ni ji Yehowa jalɛ kojomɔ lɛ baaho, ni shwɛɛnii ko yi baaná wala. Hɛɛ, akɛ mɔbɔnalɛ baafata kojomɔ ni Yehowa kɛbaaba Yuda nɔ lɛ he! Yesaia shɛɛ sane ni jɛ mumɔŋ ní aŋma afɔ̃ shi yɛ Yesaia 4:2-6 lɛ kɛ hiɛnɔkamɔ kwɛɔ nɛkɛ jɔɔmɔ be nɛɛ gbɛ. Etamɔ nɔ ni hulu lɛ je kpo kɛjɛ atatui lɛ asɛɛ; shihilɛ lɛ tsake kɛjɛ kojomɔ he nibii ni anaa kɛ nibii ni anuɔ—ní awie he yɛ Yesaia 2:6–4:1 lɛ—kɛtee shikpɔŋ fɛfɛo kɛ gbɔmɛi ní akɛ amɛ eba ekoŋŋ lɛ nɔ.
4. Mɛni hewɔ esa akɛ wɔsusu Yesaia gbalɛ ni tsɔɔ shwɛɛnii ko ní akɛ amɛ baaku sɛɛ kɛba ekoŋŋ lɛ he lɛ?
4 Yesaia gbalɛ ni kɔɔ shwɛɛnii ko ní akɛ amɛ baaku sɛɛ kɛba ekoŋŋ kɛ amɛshweshweeshwe shihilɛ ní baanyiɛ sɛɛ aba lɛ he lɛ hu náa emlibaa yɛ wɔbe nɛɛ—ni ji “naagbee gbii lɛ amli.” (Yesaia 2:2-4) Nyɛhaa wɔsusua shɛɛ sane ní akɛha yɛ ebe naa nɛɛ he, ejaakɛ jeee akɛ ehiɛ gbalɛ mli shishinumɔ kɛkɛ, shi moŋ etsɔɔ wɔ Yehowa mɔbɔnalɛ lɛ he sane kɛ bɔ ni wɔɔfee ní wɔnine ashɛ nɔ aŋkroaŋkro.
‘Yehowa Tso Fɔ́ Gbamɔ Lɛ’
5, 6. (a) Te Yesaia wie toiŋjɔlɛ be ni baanyiɛ ahum kpele ni baa lɛ sɛɛ lɛ he eha tɛŋŋ? (b) Mɛni ji wiemɔ “tso fɔ́” lɛ shishinumɔ, ni mɛni enɛ tsɔɔ yɛ Yuda shikpɔŋ lɛ he?
5 Yesaia gbee ní ekɛwieɔ lɛ batsɔ miishɛɛ gbee beni ekwɛɔ nii kɛtekeɔ ahum kpele ni baa lɛ kɛyaa toiŋjɔlɛ babaoo be mli lɛ. Eŋma akɛ: “Nakai gbi lɛ nɔ lɛ Yehowa tso fɔ́ lɛ [“Yehowa tso fɔ́ lɛ aaagba (afoforo),” “NW” shishigbɛ niŋmaa] aaafee fɛo ni ehiɛ aaaba nyam, ni shikpɔŋ lɛ nɔ nibaa nii lɛ hu aaafee woo kɛ wulamɔ aha Israel mɛi ni eje mli lɛ.”—Yesaia 4:2.
6 Yesaia miiwie amɛsɛɛkuu kɛ amɛshikpɔŋ nɔ baa ekoŋŋ lɛ he yɛ biɛ. Hebri wiemɔ ni atsɔɔ shishi akɛ “tso fɔ́” lɛ kɔɔ ‘nɔ ko ní tsɛ̃ɔ, nɔ ko ní ekwɛ̃, tso nine’ he. Ekɔɔ shweremɔ, hiɛyaa, kɛ jɔɔmɔi ni jɛɔ Yehowa dɛŋ lɛ he. Enɛ hewɔ lɛ Yesaia kɛ hiɛnɔkamɔ he mfoniri miiha yɛ biɛ—amaŋfɔfeemɔ ni baa lɛ ehiŋ shi nakai kɛyaŋ naanɔ. Kɛtsɔ Yehowa jɔɔmɔ nɔ lɛ, Yuda shikpɔŋ ní be ko lɛ eshwereɔ lɛ baawo yibii babaoo ekoŋŋ.a—3 Mose 26:3-5.
7. Yehowa tso fɔ́ lɛ “aaafee fɛo ni ehiɛ aaaba nyam” yɛ mɛɛ gbɛ nɔ?
7 Yesaia kɛ wiemɔi ni mli kã shi faŋŋ tsu nii ni ekɛtsɔɔ bɔ ni tsakemɔ ni baa lɛ yɔɔ nyam ha. Yehowa tso fɔ́ gbamɔ lɛ “aaafee fɛo ni ehiɛ aaaba nyam.” Wiemɔ “fɛo” lɛ haa wɔkaiɔ bɔ ni Shiwoo Shikpɔŋ lɛ yɔɔ fɛo ha beni Yehowa kɛha Israel afii ohai abɔ ni etsɔ hiɛ lɛ. Eyɛ fɛo aahu akɛ abuɔ lɛ akɛ eji “shikpɔji lɛ ateŋ nɔ ni yɔɔ fɛo fe fɛɛ [“jwine,” New American Bible].” (Ezekiel 20:6) Enɛ hewɔ lɛ Yesaia wiemɔi lɛ maa nɔ mi kɛhaa gbɔmɛi lɛ akɛ abaaku sɛɛ akɛ Yuda shikpɔŋ lɛ aba etsutsu shihilɛ ni yɔɔ nyam kɛ fɛo lɛ mli ekoŋŋ. Lɛɛlɛŋ, ebaafee tamɔ akekre nɔ jwine yɛ shikpɔŋ lɛ nɔ.
8. Namɛi baahi shi koni amɛná shikpɔŋ lɛ shihilɛ ni yɔɔ fɛo, ní aku sɛɛ akɛba ekoŋŋ lɛ mli ŋɔɔmɔ, ni te Yesaia wie bɔ ni amɛhenumɔi baaji lɛ mli eha tɛŋŋ?
8 Shi, namɛi baahi shi koni amɛná shikpɔŋ lɛ shihilɛ ni yɔɔ fɛo, ní aku sɛɛ akɛba ekoŋŋ nɛɛ mli ŋɔɔmɔ? Yesaia ŋma akɛ: “Israel mɛi ni eje mli lɛ.” Hɛɛ, mɛi komɛi ayi baaná wala kɛfo hiɛkpatamɔ ni yɔɔ hiɛgbele, ní agba afɔ̃ shi kɛtsɔ hiɛ lɛ. (Yesaia 3:25, 26) Mɛi ni yi baaná wala lɛ ateŋ shwɛɛnii ko baaku amɛsɛɛ kɛya Yuda koni amɛyaná esaamɔ lɛ mli gbɛfaŋnɔ. Yɛ sɛɛkulɔi nɛɛ—“mɛi ni eje mli lɛ”—agbɛfaŋ lɛ, nibaa nii babaoo ní amɛshikpɔŋ ní akɛha amɛ ekoŋŋ lɛ baawo lɛ baafee “woo kɛ wulamɔ” nɔ̃. (Yesaia 4:2, NW shishigbɛ niŋmaa) Hiɛshishwiemɔ ní amaŋfɔfeemɔ lɛ kɛba lɛ baaje jɛmɛ ni hewoo henumɔ hee baaye najiaŋ.
9. (a) Yɛ Yesaia wiemɔi lɛ amlibaa mli lɛ, mɛni ba yɛ afi 537 D.Ŋ.B.? (b) Mɛni hewɔ abaanyɛ akɛɛ akɛ mɛi ní afɔ́ amɛ yɛ nomŋɔɔ mli lɛ ateŋ mɛi komɛi fata “mɛi ni eje mli lɛ” ahe lɛ? (Kwɛmɔ NW shishigbɛ niŋmaa lɛ.)
9 Yɛ Yesaia wiemɔi lɛ anaa pɛpɛɛpɛ lɛ, ahum ni ji kojomɔ lɛ ba yɛ afi 607 D.Ŋ.B. beni Babilonbii lɛ kpata Yerusalem hiɛ ní Israelbii pii ahiɛ kpata lɛ. Mɛi komɛi ayi ná wala ni aŋɔ amɛ nom kɛtee Babilon, shi kɛ́ jeee Nyɔŋmɔ mɔbɔnalɛ hewɔ lɛ, kulɛ amɛteŋ mɔ ko kwraa yi naŋ wala. (Nehemia 9:31) Yɛ naagbee lɛ, ashi Yuda afɔ̃ shi amaŋfɔ kwraa. (2 Kronika 36:17-21) Kɛkɛ ni yɛ afi 537 D.Ŋ.B. lɛ, Nyɔŋmɔ mɔbɔnalɔ lɛ ŋmɛ gbɛ ni “mɛi ni eje mli” lɛ ku amɛsɛɛ kɛba Yuda koni amɛbato anɔkwa jamɔ amɛma shi ekoŋŋ.b (Ezra 1:1-4; 2:1) Awie nakai nomii ni ku amɛsɛɛ lɛ aheshwamɔ ni jɛ amɛtsui mli lɛ he fɛfɛo yɛ Lala 137 lɛ, ní ekolɛ aŋma yɛ nomŋɔɔ be lɛ mli loo yɛ no sɛɛ nɔŋŋ lɛ mli. Ní amɛku amɛsɛɛ amɛba Yuda lɛ, amɛhu ni amɛdũ dumɔwui yɛ shikpɔŋ lɛ nɔ. Susumɔ bɔ ni amɛbaanu he amɛha beni amɛna akɛ Nyɔŋmɔ miijɔɔ amɛmɔdɛŋbɔi lɛ anɔ, ní eeha shikpɔŋ lɛ nɔ dumɔnii lɛ miikwɛ̃ fɛfɛo tamɔ “Eden trom” ní woɔ yibii lɛ he okwɛ!—Ezekiel 36:34-36.
10, 11. (a) Biblia Kaselɔi lɛ yaje “Babilon kpeteŋkpele lɛ” nomŋɔɔ shishi yɛ afii ohai 20 lɛ shishijee gbɛ yɛ mɛɛ gbɛ nɔ? (b) Yehowa jɔɔ mumɔŋ Israelbii shwɛɛnii lɛ yɛ mɛɛ gbɛ nɔ?
10 Saamɔ ko ní tamɔ nakai nɔŋŋ eba mli yɛ wɔgbii nɛɛ amli. Afii ohai 20 lɛ shishijee gbɛ lɛ, Biblia Kaselɔi, taakɛ ale Yehowa Odasefoi yɛ nakai beaŋ lɛ, baje mumɔŋ nomŋɔɔ shihilɛ mli yɛ “Babilon kpeteŋkpele lɛ,” ni ji jeŋ apasa maŋtsɛyeli lɛ shishi. (Kpojiemɔ 17:5) Eyɛ mli akɛ amɛkpoo apasa jamɔ mli tsɔɔmɔi babaoo moŋ, shi no mli lɛ, Babilonbii asusumɔi kɛ nifeemɔi komɛi miiwo Biblia Kaselɔi lɛ ahe muji lolo. Yɛ shitee-kɛ-woo ní osɔfoi lɛ wo he hewalɛ lɛ hewɔ lɛ, awo amɛteŋ mɛi komɛi tsuŋ diɛŋtsɛ. Ashi amɛmumɔŋ shikpɔŋ—ni ji amɛjamɔ, loo amɛmumɔŋ shihilɛ lɛ—afɔ̃ shi amaŋfɔ.
11 Shi afi 1919 agbiɛnaa be mli lɛ, Yehowa na mumɔŋ Israelbii shwɛɛnii nɛɛ mɔbɔ. (Galatabii 6:16) Ena amɛtsuitsakemɔ kɛ shwe ní amɛshweɔ akɛ amɛaajá lɛ yɛ anɔkwale mli lɛ, no hewɔ lɛ eha ajie amɛ kɛjɛ tsuŋwoo diɛŋtsɛ ni amɛyɔɔ mli lɛ mli, kɛ nɔ he hiaa fe fɛɛ lɛ, mumɔŋ nomŋɔɔ mli. Akɛ “mɛi ni eje mli” nɛɛ ku sɛɛ kɛba amɛmumɔŋ shihilɛ ní Nyɔŋmɔ kɛha amɛ, ní eha eshwere babaoo lɛ mli ekoŋŋ. Nɛkɛ mumɔŋ shihilɛ nɛɛ ebaje kpo faŋŋ kɛ su ní yɔɔ fɛo ní gbalaa mɔ kɛbaa he, ni enɛ egbala gbɔmɛi akpekpei abɔ krokomɛi ní sheɔ Nyɔŋmɔ gbeyei kɛba ni amɛbafata shwɛɛnii lɛ ahe yɛ anɔkwa jamɔ mli.
12. Yesaia wiemɔi lɛ jieɔ mɔbɔnalɛ ní Yehowa yɔɔ kɛhaa ewebii lɛ yi yɛ mɛɛ gbɛ nɔ?
12 Yesaia wiemɔi nɛɛ jieɔ mɔbɔnalɛ ní Nyɔŋmɔ yɔɔ kɛha ewebii lɛ kpo. Eyɛ mli akɛ, ákɛ maŋ lɛ, Israelbii lɛ te shi amɛshi Yehowa moŋ, shi ena shwɛɛnii ní tsake amɛtsui lɛ mɔbɔ. Wɔbaanyɛ wɔná miishɛjemɔ kɛjɛ le ní wɔle akɛ mɛi ni tɔ̃ɔ tɔmɔi ni hiɛdɔɔ yɔɔ mli lɛ po baanyɛ aku amɛsɛɛ kɛba Yehowa ŋɔɔ lɛ mli. Esaaa akɛ mɛi ni tsakeɔ amɛtsui lɛ nuɔ he akɛ Yehowa nyɛŋ ana amɛ mɔbɔ, ejaakɛ ekpooo tsui ni ekumɔ kɛ awerɛho yɛ eshai ahewɔ lɛ. (Lala 51:19) Biblia lɛ maa nɔ mi kɛhaa wɔ akɛ: “Mɔbɔnalɔ kɛ durolɔ ji Yehowa, emli fuuu mra, ni emɔbɔnalɛ fá. Bɔ ni tsɛ musuŋ tsɔɔ lɛ yɛ ebii ahe lɛ, nakai Yehowa musuŋ tsɔɔ lɛ yɛ mɛi ní sheɔ lɛ lɛ ahe.” (Lala 103:8, 13) Eka shi faŋŋ akɛ, Nyɔŋmɔ ní yɔɔ mɔbɔnalɛ tamɔ nɛkɛ lɛ sa wɔ yijiemɔ fɛɛ!
Shwɛɛnii ko Bafee Krɔŋkrɔŋ Amɛha Yehowa
13. Taakɛ aŋma yɛ Yesaia 4:3 lɛ, te Yesaia wie shwɛɛnii ní Yehowa baana amɛ mɔbɔ lɛ ahe eha tɛŋŋ?
13 Átsɔɔ wɔ mɛi ni ji shwɛɛnii ní Yehowa baana amɛ mɔbɔ lɛ momo, shi agbɛnɛ, Yesaia tsɔɔ mɛi ni amɛji lɛ mli fitsofitso. Eŋma akɛ: “Aaaba mli akɛ mɔ ní ashi yɛ Zion kɛ mɔ ni eshwɛ yɛ Yerusalem lɛ, aaatsɛ lɛ mɔ krɔŋkrɔŋ, mɔ fɛɛ mɔ ni aŋma egbɛi afutu hiɛkalɔi ateŋ yɛ Yerusalem lɛ.”—Yesaia 4:3.
14. Namɛi ji “mɔ ní ashi” kɛ “mɔ ni eshwɛ” lɛ, ni mɛni hewɔ Yehowa baana amɛ mɔbɔ lɛ?
14 Namɛi ji “mɔ ní ashi” kɛ “mɔ ni eshwɛ” lɛ? Amɛji mɛi ni eje mli ní atsĩ amɛ tã yɛ kuku ní tsɔ hiɛ lɛ mli lɛ—Yudafoi nomii ní abaaŋmɛ amɛ gbɛ ní amɛku amɛsɛɛ kɛba Yuda lɛ. Agbɛnɛ Yesaia tsɔɔ nɔ hewɔ ní Yehowa baana amɛ mɔbɔ lɛ—amɛbaafee “krɔŋkrɔŋ” amɛha lɛ. Krɔŋkrɔŋ feemɔ tsɔɔ “jamɔ mli falefalefeemɔ loo hetsemɔ; krɔŋŋ feemɔ.” Ní aaafee krɔŋkrɔŋ lɛ biɔ ní he atse, loo afee krɔŋŋ, yɛ wiemɔ kɛ nifeemɔ mli, ní ashɛ tɛ ní Yehowa efo efɔ̃ shi yɛ nɔ ni ja kɛ nɔ ni ejaaa gbɛfaŋ lɛ he. Hɛɛ, Yehowa baana mɛi ni yɔɔ “krɔŋkrɔŋ” kɛha lɛ lɛ mɔbɔ, ni ebaaŋmɛ amɛ gbɛ ní amɛku amɛsɛɛ kɛya Yerusalem, ni ji “maŋ krɔŋkrɔŋ” lɛ mli.—Nehemia 11:1.
15. (a) Mɛɛ Yudafoi akusum nifeemɔ ko kaiɔ wɔ wiemɔ ní awie akɛ ‘abaaŋma amɛgbɛi afutu hiɛkalɔi lɛ ateŋ yɛ Yerusalem’ lɛ? (b) Mɛɛ kɔkɔbɔɔ ní sa hesusumɔ waa Yesaia wiemɔi lɛ tsɔɔ?
15 Ani shwɛɛnii anɔkwafoi nɛɛ baaya nɔ ahi jɛmɛ? Yesaia wo shi akɛ ‘abaaŋma amɛgbɛi afutu hiɛkalɔi lɛ ateŋ yɛ Yerusalem.’ Enɛ haa wɔkaiɔ nɔ ko ní Yudafoi lɛ feɔ daa, ni ji Israel wekui kɛ akutsei lɛ agbɛi ní aŋmalaa awoɔ woji amli jogbaŋŋ lɛ. (Nehemia 7:5) Kɛ́ aŋma mɔ ko gbɛi awo woji amli lɛ, etsɔɔ akɛ eyɛ wala mli, ejaakɛ kɛ́ mɔ ko gbo lɛ, ajieɔ egbɛi kɛjɛɔ woji amli. Wɔkaneɔ mfonirifeemɔŋ gbɛi wolo, loo wolo, ní mɛi ni Yehowa kɛ wala baawo amɛ nyɔmɔ lɛ agbɛi yɔɔ mli lɛ he sane yɛ Biblia lɛ hei krokomɛi hu. Shi aŋmalaa gbɛi awoɔ wolo nɛɛ mli yɛ taomɔ nii komɛi anaa, ejaakɛ Yehowa baanyɛ ‘agbe’ mɛi agbɛi. (2 Mose 32:32, 33; Lala 69:29) Belɛ, Yesaia wiemɔi lɛ miitsɔɔ kɔkɔbɔɔ ni sa hesusumɔ waa—ja mɛi ni eku amɛsɛɛ lɛ tee nɔ amɛhi shi krɔŋkrɔŋ yɛ Nyɔŋmɔ hiɛ dani amɛbaaya nɔ amɛhi amɛshikpɔŋ ní akɛ amɛ eba nɔ ekoŋŋ lɛ nɔ.
16. (a) Mɛni Yehowa tao yɛ mɛi ní eŋmɛ gbɛ akɛ amɛku amɛsɛɛ kɛba Yuda yɛ afi 537 D.Ŋ.B. lɛ adɛŋ? (b) Mɛni hewɔ abaanyɛ awie akɛ mɔbɔ ní Yehowa na shwɛɛnii ní afɔ amɛ mu lɛ kɛ “tooi krokomɛi” lɛ efeko efolo lɛ?
16 Yɛ afi 537 D.Ŋ.B. lɛ, shwɛɛnii ní ku amɛsɛɛ kɛba Yerusalem lɛ fee nakai kɛ henumɔ ni yɔɔ krɔŋŋ—ákɛ amɛbaato anɔkwa jamɔ shishi ekoŋŋ. Mɔ ni kɛ wɔŋjamɔ mli nifeemɔi loo jeŋba ní he tseee, ní Yesaia ebɔ amɛ kɔkɔ waa yɛ he lɛ eko ewo ehe muji lɛ bɛ hegbɛ ní ekuɔ esɛɛ. (Yesaia 1:15-17) Mɛi ní Yehowa buɔ amɛ akɛ amɛyɛ krɔŋkrɔŋ lɛ pɛ baanyɛ aku amɛsɛɛ kɛya Yuda. (Yesaia 35:8) Nakai nɔŋŋ hu, kɛjɛ be mli ní ajie amɛ kɛjɛ mumɔŋ nomŋɔɔ mli yɛ afi 1919 kɛbaa nɛɛ, shwɛɛnii ní afɔ amɛ mu, ní amrɔ nɛɛ “tooi krokomɛi” akpekpei abɔ—ni ji mɛi ni yɔɔ naanɔ wala he hiɛnɔkamɔ yɛ shikpɔŋ nɔ lɛ—ebafata amɛhe lɛ, ebɔ mɔdɛŋ fɛɛ ní amɛaanyɛ ní amɛfee krɔŋkrɔŋ yɛ Nyɔŋmɔ hiɛ. (Yohane 10:16) Amɛjie Babilon tsɔɔmɔi kɛ nifeemɔi fɛɛ kɛjɛ amɛhe kwraa. Amɛbɔɔ mɔdɛŋ aŋkroaŋkro akɛ amɛaahiɛ jeŋba he tɛi ní nɔ kwɔlɔ ní Nyɔŋmɔ efolɔ eshwie shi lɛ amli. (1 Petro 1:14-16) Mɔbɔ ní Yehowa na amɛ lɛ efeko efolo.
17. Namɛi agbɛi Yehowa ŋmalaa yɛ ‘ewala wolo’ lɛ mli, ni mɛni esa akɛ wɔtswa wɔfai shi akɛ wɔɔfee?
17 Kaimɔ akɛ Yehowa kadi mɛi ni yɔɔ krɔŋkrɔŋ yɛ Israel lɛ, ni ákɛ ‘eŋmala amɛgbɛi kɛha wala.’ Ŋmɛnɛ hu, Yehowa kadiɔ mɔdɛŋ ní wɔbɔɔ ni wɔhe atse yɛ jwɛŋmɔ kɛ gbɔmɔtsoŋ beni ‘wɔkɛ wɔgbɔmɔtsei lɛ damɔɔ shi ákɛ afɔle ní hiɛ kã, ni he tse, ní sa Nyɔŋmɔ hiɛ lɛ.’ (Romabii 12:1) Ni Nyɔŋmɔ ŋmalaa mɛi fɛɛ ni nyiɛɔ nakai shihilɛ gbɛ lɛ nɔ lɛ ahe saji yɛ ‘ewala wolo’—ni ji mfonirifeemɔŋ wolo ní aŋma ní mɛi ni baaná naanɔ wala, yɛ ŋwɛi loo yɛ shikpɔŋ nɔ lɛ agbɛi yɔɔ mli lɛ mli. (Filipibii 4:3; Maleaki 3:16) Belɛ, nyɛhaa wɔfea bɔ fɛɛ bɔ ni wɔɔnyɛ koni wɔya nɔ wɔfee krɔŋkrɔŋ yɛ Nyɔŋmɔ hiɛ, ejaakɛ ja wɔfee nakai dani wɔgbɛi baaya nɔ ahi nakai “wolo” ní jara wa lɛ mli.—Kpojiemɔ 3:5.
Suɔmɔ Kwɛmɔ he Shiwoo
18, 19. Taakɛ Yesaia 4:4, 5 lɛ tsɔɔ lɛ, mɛɛ hetsuumɔ nitsumɔ ko Yehowa baatsu, ni mɛɛ gbɛ nɔ ebaatsɔ etsu he nii?
18 No sɛɛ lɛ Yesaia tsɔɔ gbɛ ní gbɔmɛi ni yɔɔ shikpɔŋ ni akɛ amɛ eba nɔ ekoŋŋ lɛ baatsɔ nɔ amɛfee krɔŋkrɔŋ kɛ nɔ̃ jɔɔmɔi hu ni mɛɔ amɛ. Ewie akɛ: “Beni Nuntsɔ lɛ kɛ kojomɔ mumɔ kɛ shãa mumɔ aaafɔ́ Zion biyei lɛ ahe muji lɛ ní eeetsumɔ Yerusalem lá lɛ kɛaajɛ emli lɛ. Ni Yehowa aaabɔ atatu kɛ lasu shwane, kɛ lalilɛi ní kpɛɔ hu nyɔɔŋ, ni ekɛaahà Zion gɔŋ lɛ nɔ he fɛɛ he kɛ mɛi ni ekpe yɛ jɛi lɛ anɔ; ejaakɛ akɛ nɔhaanɔ̃ aaahà anunyam lɛ fɛɛ nɔ.”—Yesaia 4:4, 5.
19 Mra mli kɛtsɔ hiɛ lɛ Yesaia kã “Zion biyei” lɛ, ní kɛ amɛjeŋba mli fitemɔ lɛ to amɛhewulamɔ nibii fɛfɛji lɛ ashishi lɛ ahiɛ. Ekpá bɔ ni maŋ muu lɛ fɛɛ hu eye lá yi sɔ̃ lɛ he mama, ni ewo amɛ hewalɛ ní amɛju amɛhe. (Yesaia 1:15, 16; 3:16-23) Shi, yɛ biɛ lɛ, eekpa be mli ní Nyɔŋmɔ diɛŋtsɛ ‘baafɔ́ amɛhe muji lɛ,’ loo jeŋba mli muji lɛ, ní ‘eeetsumɔ lá ní ekpá amɛhe lɛ’ gbɛ. (Yesaia 4:4, New International Version) Mɛɛ gbɛ nɔ abaatsɔ atsu hetsuumɔ nitsumɔ nɛɛ? Kɛtsɔ “kojomɔ mumɔ” lɛ kɛ “shãa mumɔ” lɛ nɔ. Yerusalem hiɛkpatamɔ ní baa kɛ nom ní abaaŋɔ amɛ kɛbaaya Babilon lɛ baafee Nyɔŋmɔ kojomɔi kɛ emlifu ní naa wa ní ekɛbaaba maŋ ni he tseee lɛ nɔ lɛ kpojiemɔ. Ebaaha shwɛɛnii ní yi baaná wala kɛtsɔ amanehului nɛɛ amli, ní amɛaaku amɛsɛɛ kɛba shia lɛ aba amɛhe shi, ni atsuu amɛhe. No hewɔ ni amɛbaafee krɔŋkrɔŋ amɛha Yehowa ni ebaana amɛ mɔbɔ lɛ.—Okɛto Maleaki 3:2, 3 he.
20. (a) Mɛni wiemɔi ni ji “atatu,” “lasu,” kɛ “lalilɛi ní kpɛɔ” lɛ haa wɔkaiɔ? (b) Mɛni hewɔ esaaa ní nomii ní atsuu amɛhe lɛ sheɔ gbeyei lɛ?
20 Yehowa tsɔ Yesaia nɔ ewo shi akɛ ebaaŋɔ shwɛɛnii ní etsuu amɛhe nɛɛ kɛba esuɔmɔ kwɛmɔ shishi. Wiemɔi ni ji “atatu,” “lasu,” kɛ “lalilɛi ní kpɛɔ” lɛ haa wɔkaiɔ bɔ ni Yehowa kwɛ Israelbii lɛ anɔ beni amɛshi Mizraim lɛ. “La kɛ atatu kutuu” bu amɛhe kɛjɛ Mizraimbii ni tiuɔ amɛ lɛ adɛŋ; enyiɛ amɛhiɛ yɛ ŋã lɛ nɔ hu. (2 Mose 13:21, 22; 14:19, 20, 24) Beni Yehowa jie ehe kpo yɛ Sinai Gɔŋ lɛ nɔ lɛ, gɔŋ “muu lɛ fɛɛ miije lasu.” (2 Mose 19:18) Belɛ, esaaa ní nomii ní atsuu amɛhe lɛ sheɔ gbeyei. Yehowa baafee amɛ Hebulɔ. Kɛji amɛbua amɛhe naa yɛ amɛ diɛŋtsɛ amɛshiai amli jio, amɛkpe kutuu yɛ kpeei krɔŋkrɔŋi amli jio, ekɛ amɛ baahi shi.
21, 22. (a) Mɛni ji yiŋtoo ní bei pii lɛ akɛmaa buu, loo asese? (b) Mɛɛ gbɛkpamɔ kã shwɛɛnii ní afɔ amɛ mu lɛ ahiɛ?
21 Yesaia gbala jwɛŋmɔ kɛba daa gbi shihilɛ nɔ ni ekɛmu bɔ ni etsɔɔ ŋwɛi hebuu mli eha lɛ naa. Eŋma akɛ: “Ni buu ko aaahi shi ní shishi yɔɔ hɔ̃ɔŋ yɛ shwane latsaa mli, ni eeefee abobaahe kɛ teemɔhe yɛ ahum kɛ nugbɔnɛmɔ mli.” (Yesaia 4:6) Bei pii lɛ, amaa buu, loo asese yɛ weintrom loo ŋmɔ mli koni eha hɔ̃ɔŋ ni he hiaa kɛjɛ hulu ni tsoɔ waa yɛ hulutsoo be mli lɛ nɔ, kɛ hebuu hu kɛjɛ nugbɔnɛmɔ beaŋ fɛ̃i kɛ ahum ni tswaa lɛ amli.—Okɛto Yona 4:5 he.
22 Kɛ́ amɛkɛ la ní shãa mɔ waa ni ji yiwaa, kɛ ahum ni ji shitee-kɛ-woo kpe lɛ, shwɛɛnii ní atsuu amɛhe lɛ baana akɛ Yehowa baafee hebuu, kɛ shweshweeshwefeemɔ Jɛɛhe, kɛ abobaahe kɛha amɛ. (Lala 91:1, 2; 121:5) Enɛ hewɔ lɛ, akɛ gbɛkpamɔ ni yɔɔ nyam nɛɛ efɔ̃ amɛhiɛ, akɛ: Kɛ́ amɛŋmɛɛ Babilon nifeemɔi kɛ hemɔkɛyelii ni he tseee lɛ ahe, ní amɛba amɛhe shi amɛha Yehowa kojomɔ ní ekɛtsuuɔ amɛhe lɛ, ní amɛbɔ mɔdɛŋ ákɛ amɛaahi shi krɔŋkrɔŋ be fɛɛ be lɛ, no lɛ amɛbaahi shi shweshweeshwe, tamɔ nɔ ni amɛyɛ “buu” ni ji ŋwɛi hebuu shishi.
23. Mɛni hewɔ Yehowa ejɔɔ shwɛɛnii ní afɔ amɛ mu lɛ kɛ amɛhefatalɔi lɛ?
23 Kadimɔ akɛ hetsuumɔ lɛ baaba klɛŋklɛŋ, no sɛɛ dani jɔɔmɔi lɛ baaba. Enɛ eba mli anɔkwale yɛ wɔgbii nɛɛ amli. Mra mli yɛ afi 1919 lɛ, shwɛɛnii ní afɔ amɛ mu lɛ jɛ heshibaa mli amɛkɛ amɛhe ha kɛha hetsuumɔ, ni Yehowa ‘fɔ́’ amɛhe muji lɛ kɛjɛ amɛhe. Kɛjɛ nakai beaŋ kɛbaa nɛɛ, “asafo babaoo,” ni ji tooi krokomɛi lɛ hu eŋmɛ gbɛ ni Yehowa etsuu amɛhe. (Kpojiemɔ 7:9) Akɛni atsuu amɛhe nɛkɛ hewɔ lɛ, ajɔɔ shwɛɛnii lɛ kɛ amɛhefatalɔi lɛ—Yehowa eŋɔ amɛ ewo esuɔmɔ kwɛmɔ kɛ hebuu shishi. Etsɔɔɔ naakpɛɛ gbɛ nɔ etsĩii la ní shãa mɔ waa ni ji yiwaa loo ahum ni ji shitee-kɛ-woo naa koni nɔ ko akasa amɛhe. Shi kɛlɛ, ebuɔ amɛhe, tamɔ nɔ ni ema ‘buu eha amɛ kɛha hɔ̃ɔŋ kɛ teemɔhe yɛ nugbɔnɛmɔ kɛ ahum mli.’ Yɛ mɛɛ gbɛ nɔ?
24. Anaa odaseyeli ni tsɔɔ akɛ Yehowa ejɔɔ ewebii lɛ ákɛ gbɛjianɔtoo yɛ mɛɛ gbɛ nɔ?
24 Susumɔ enɛ he okwɛ: Nɔyelii ni he wa fe fɛɛ yɛ yinɔsane mli lɛ ekomɛi etsĩ Yehowa Odasefoi ashiɛmɔ nitsumɔ lɛ naa loo amɛbɔ mɔdɛŋ akɛ amɛaabule amɛshishi kwraa. Shi kɛlɛ, Odasefoi lɛ edamɔ shi shiŋŋ, ni amɛtee nɔ amɛshiɛ ni amɛkpaaa! Mɛni hewɔ jeŋmaji ni he wa waa lɛ nyɛɛɛ atsĩ gbɔmɛi akuu bibioo, ní tamɔ mɛi ní bɛ hefãmɔ nɔ̃ ko kwraa nɛɛ anitsumɔ lɛ naa lɛ? Ejaakɛ Yehowa kɛ etsuji ni he tse lɛ ewo “buu” ni haa hebuu, ní adesa ko adesa ko nyɛŋ akumɔ ashwie shi lɛ mli!
25. Mɛni Yehowa ní wɔɔná ákɛ wɔ Hebulɔ lɛ tsɔɔ kɛha wɔ aŋkroaŋkro?
25 Shi wɔ, ákɛ aŋkroaŋkroi hu? Yehowa ní wɔɔná ákɛ wɔ Hebulɔ lɛ etsɔɔɔ akɛ wɔshihilɛ baafee nɔ ni naagba ko kwraa bɛ mli yɛ nibii agbɛjianɔtoo nɛɛ mli. Kristofoi anɔkwafoi pii kɛ jaramɔ shihilɛi ní mli wa waa, tamɔ ohia, adebɔɔ mli osharai, ta, helai, kɛ gbele kpeɔ. Kɛ́ wɔkɛ amanehului ni tamɔ enɛɛmɛi miikpe lɛ, nyɛkahaa wɔhiɛ kpaa nɔ kɔkɔɔkɔ ákɛ wɔ-Nyɔŋmɔ lɛ kɛ wɔ yɛ. Ebuɔ wɔhe yɛ mumɔŋ, ni ehaa wɔ nibii ni he hiaa wɔ—kɛ “hewalɛ ní fá kɛteke nɔ” po—koni wɔkɛ anɔkwayeli aŋmɛ wɔtsui shi yɛ kaai amli. (2 Korintobii 4:7) Akɛni wɔyɛ shweshweeshwe yɛ ehiɛ hewɔ lɛ, esaaa ní wɔsheɔ gbeyei. Ejaakɛ, bei abɔ ní wɔfeɔ nɔ fɛɛ nɔ ní wɔɔnyɛ koni wɔhi shi akɛ mɛi ni yɔɔ krɔŋkrɔŋ yɛ ehiɛ lɛ, nɔ ko nɔ ko ‘nyɛŋ agbála wɔkɛ Nyɔŋmɔ suɔmɔ lɛ mli.’—Romabii 8:38, 39.
[Shishigbɛ niŋmai]
a Woloŋlelɔi komɛi tsɔɔ akɛ wiemɔ kuku ni ji “Yehowa tso fɔ́” lɛ ji wiemɔ ko ni kɔɔ Mesia lɛ, ni pueŋ aahu kɛyashi Yerusalem tswaa kɛ shimaa ekoŋŋ sɛɛ lɛ he. Bɔ ni afo wiemɔ nɛɛ kuku aha yɛ Aramaik Targum srɔtoi lɛ amli lɛ kaneɔ akɛ: “Yehowa Mesia [Kristo] lɛ.” Nɔ ni yɔɔ miishɛɛ ji akɛ, sɛɛ mli lɛ, Yeremia kɛ nakai Hebri gbɛi (tseʹmach) lɛ nɔŋŋ tsu nii beni ewieɔ Mesia lɛ he ákɛ “jalɛ tso nine” ní aha ekwɛ̃ kɛha David lɛ.—Yeremia 23:5; 33:15.
b Mɛi ní afɔ́ yɛ nomŋɔɔ mli lɛ ateŋ mɛi komɛi fata “mɛi ni eje mli lɛ” ahe. Abaanyɛ abu amɛ akɛ mɛi ní “eje mli,” ejaakɛ eji amɛblematsɛmɛi lɛ ayi náaa wala kɛjɛɛɛ hiɛkpatamɔ lɛ mli kulɛ, afɔŋ amɛ kɔkɔɔkɔ.—Ezra 9:13-15; okɛto Hebribii 7:9, 10 he.
[Mfoniri ni yɔɔ baafa 63]
Ahum ni ji ŋwɛi kojomɔ miiba Yuda nɔ