Yitso Nyɔŋma Kɛ Nɛɛhu
Yaa Nɔ Ojaje Nyɔŋmɔ Wiemɔ lɛ Kɛ Ekãa
1. (a) Mɛɛ sanekpakpa Yesu kaselɔi lɛ jaje, shi te Yudafoi lɛ ateŋ mɛi komɛi fee amɛnii yɛ he amɛha tɛŋŋ? (b) Mɛɛ saji wɔɔnyɛ wɔbibii?
AAAFEE afii 2,000 ni eho nɛ lɛ, afɔ Nyɔŋmɔ Bi, Yesu Kristo mu ákɛ wɔsɛɛ be Maŋtsɛ yɛ shikpɔŋ muu lɛ fɛɛ nɔ. Agbe Yesu yɛ jamɔ mli henyɛlɔi lɛ ni tsirɛ mɛi ayisɛɛ kɛtsu he nii lɛ hewɔ, shi Yehowa tée lɛ shi kɛjɛ gbohii ateŋ. Naanɔ wala baanyɛ aba agbɛnɛ kɛtsɔ Yesu nɔ. Shi beni Yesu kaselɔi lɛ shiɛ nɛkɛ sanekpakpa nɛɛ yɛ faŋŋ lɛ, awa amɛyi. Awo amɛteŋ mɛi komɛi tsuŋ, ni ayi amɛ po, ni afã amɛ ni amɛkpa Yesu he wiemɔ. (Bɔfoi lɛ Asaji 4:1-3, 17; 5:17, 18, 40) Mɛni amɛbaafee? Ni kulɛ mɛni obaafee? Ani kulɛ obaaya nɔ okɛ ekãa aye odase?
2. (a) Mɛɛ sane ni ŋɔɔ waa ehe hiaa ni ajaje yɛ wɔgbii nɛɛ amli? (b) Gbɛnaa nii kã namɛi anɔ akɛ amɛjaje sanekpakpa lɛ?
2 Yɛ afi 1914 mli lɛ, awó Nyɔŋmɔ Maŋtsɛyeli lɛ nɔ Maŋtsɛ, ni ji Yesu Kristo maŋtsɛ yɛ ŋwɛi, koni eye lumɔ ‘yɛ ehenyɛlɔi lɛ ateŋ.’ (Lala 110:2) No sɛɛ lɛ, ashɛrɛ Satan kɛ edaimonioi lɛ ashwie shikpɔŋ lɛ nɔ. (Kpojiemɔ 12:1-5, 7-12) Ŋmɛnɛŋmɛnɛ yiwalɛ nibii agbɛjianɔtoo lɛ naagbee gbii lɛ je shishi. Kɛji akɛ nɛkɛ be kpalaŋŋ nɛɛ ba naagbee lɛ, Nyɔŋmɔ baakpata Satan nibii agbɛjianɔtoo muu lɛ fɛɛ hiɛ. (Daniel 2:44; Mateo 24:21) Nɔ ni baakã mɛi ni baaje mli lɛ ahiɛ ji naanɔ wala yɛ shikpɔŋ ni baatsɔ paradeiso nɔ. Kɛji akɛ ókpɛlɛ sanekpakpa nɛɛ nɔ lɛ, no lɛ obaasumɔ ni ogba mɛi krokomɛi. (Mateo 24:14) Shi mɛɛ nɔheremɔ obaanyɛ okpa gbɛ?
3. (a) Te mɛi hereɔ Maŋtsɛyeli shɛɛ sane lɛ nɔ amɛhaa tɛŋŋ? (b) Mɛɛ sanebimɔ esa akɛ wɔkpee naa?
3 Kɛji akɛ ojaje Maŋtsɛyeli sanekpakpa lɛ, ekolɛ mɛi komɛi kɛ miishɛɛ baahere nɔ, shi mɛi babaoo baafee shikplikpii yɛ he. (Mateo 24:37-39) Ekolɛ mɛi komɛi baaye ohe fɛo aloo amɛaate shi amɛwo bo. Yesu bɔ kɔkɔ akɛ shitee-kɛ-woo baanyɛ ajɛ bo diɛŋtsɛ owekumɛi aŋɔɔ kɛba. (Luka 21:16-19) Ebaanyɛ eba hu yɛ onitsumɔhe loo yɛ skul. Nɔyelii egu Yehowa Odasefoi anitsumɔ lɛ yɛ shikpɔŋ lɛ nɔ hei komɛi. Kɛ okɛ shihilɛi nɛɛ kpe lɛ, ani obaaya nɔ owie Nyɔŋmɔ wiemɔ lɛ ekãa naa ni ‘odamɔ shi shiŋŋ yɛ hemɔkɛyeli lɛ mli’?—1 Korintobii 16:13.
Wɔkɛ Wɔhe Akafɔ̃ Wɔ Diɛŋtsɛ Wɔhewalɛ Nɔ
4. (a) Bɔni afee ni wɔtsɔɔ akɛ Nyɔŋmɔ tsuji anɔkwafoi ji wɔ lɛ, mɛni ji shishijee taomɔ nii? (b) Mɛni hewɔ Kristofoi akpeei he hiaa waa nakai lɛ?
4 Nɔ ni he hiaa Yehowa tsulɔ anɔkwafo ni mɔ ko aaaji lɛ ji egbɛjianɔ ni eto lɛ ni ekɛ ehe aaafɔ̃ nɔ. Enɛɛmɛi ateŋ ekome ji asafoŋ kpeei. Ŋmalɛi lɛ woɔ wɔ hewalɛ ni wɔkaku wɔhiɛ wɔshwie nɔ. (Hebribii 10:23-25) Mɛi ni amɛtee nɔ amɛhi shi akɛ Yehowa Odasefoi anɔkwafoi lɛ emia amɛhiɛ waa koni amɛfee mɛi ni kɛ amɛnanemɛi jálɔi yaa kpeei daa. Ŋmalɛi lɛ ahe nilee ni wɔyɔɔ lɛ yaa hiɛ yɛ nɛkɛ kpeei nɛɛ ashishi. Agbɛnɛ hu, hiɛsɔɔ ni wɔyɔɔ yɛ anɔkwalei ni wɔle jogbaŋŋ lɛ ahe lɛ mli waa be fɛɛ be, ni wɔleɔ gbɛ̀i anɔ ni wɔɔtsɔ wɔkɛtsu nii lɛ hu jogbaŋŋ. Agbalaa wɔ kɛbɛŋkɛɔ wɔnyɛmimɛi Kristofoi lɛ ahe kpaakpa yɛ jamɔ ni efee ekome mli, ni awoɔ wɔ hewalɛ ni wɔfee Nyɔŋmɔ suɔmɔnaa nii. Yehowa mumɔ lɛ kɛ gbɛtsɔɔmɔ haa kɛtsɔɔ asafo lɛ nɔ, ni Yesu tsɔɔ nakai mumɔ lɛ nɔ ehiɔ wɔteŋ.—Mateo 18:20; Kpojiemɔ 3:6.
5. Kɛji akɛ agu Yehowa Odasefoi anitsumɔ lɛ, mɛni afeɔ yɛ kpeei ahe?
5 Ani oyaa kpeei lɛ fɛɛ daa, ni ani okɛ nɔ ni onuɔ ni asusuɔ he lɛ tsuɔ nii yɛ oshihilɛ mli? Yɛ bei komɛi amli lɛ, kɛ agu Yehowa Odasefoi anitsumɔ lɛ, ehe hiaa ni afee kpeei lɛ yɛ kui bibii amli yɛ mɛi ashiai amli. Hei nɛɛ kɛ bei ni akɛfeɔ lɛ baanyɛ atsake ni ekolɛ jeee be fɛɛ be ebaahi eha mɛi pii, ni kpeei lɛ ekomɛi po yɛ ni afeɔ lɛ gbɛkɛ beni je ena kwraa. Shi yɛ naagba ni akɛkpeɔ loo oshara ni baa lɛ fɛɛ sɛɛ lɛ, nyɛmimɛi hii kɛ yei anɔkwafoi bɔɔ mɔdɛŋ waa diɛŋtsɛ ni amɛya kpeei nɛɛ eko fɛɛ eko.
6. Mɛɛ gbɛ nɔ wɔtsɔɔ akɛ wɔkɛ wɔhe fɔ̃ɔ Yehowa nɔ yɛ, ni yɛ mɛɛ gbɛ nɔ enɛ baaye abua wɔ ni wɔya nɔ wɔwie yɛ ekãa naa?
6 Akɛ he fɔ̃ɔ Yehowa nɔ waa diɛŋtsɛ kɛtsɔ eŋɔɔ ni ayaa yɛ tsuiŋ sɔlemɔ mli daa lɛ nɔ, yɛ be mli ni wɔyɔseɔ akɛ Nyɔŋmɔ yelikɛbuamɔ he miihia wɔ lɛ. Ani ofeɔ nakai? Yesu sɔle shii abɔ yɛ eshikpɔŋ nɔ sɔɔmɔ nitsumɔ lɛ mli. (Luka 3:21; 6:12, 13; 22:39-44) Ni ewo ekaselɔi lɛ hewalɛ gbi gbɛkɛ ni enɔ jetsɛremɔ asɛŋ lɛ lɛ, akɛ: “Nyɛshia kpe ni nyɛsɔlea, koni nyɛkabote kaa mli.” (Marko 14:38) Kɛ wɔkɛ mɛi ni sumɔɔɔ ni amɛboɔ Maŋtsɛyeli lɛ he sane lɛ toi kpe lɛ, eeenyɛ eka wɔ ni wɔba wɔsɔɔmɔ nitsumɔ lɛ shi. Kɛji akɛ gbɔmɛi ye wɔhe fɛo aloo amɛwa wɔ yi lɛ, eeeha wɔnu he akɛ esa akɛ wɔfee dioo ni wɔkɛjo haomɔi anaa foi. Shi kɛ wɔsɔle waa wɔbi Nyɔŋmɔ mumɔ lɛ koni eye ebua wɔ ni wɔya nɔ wɔwie kɛ ekãa lɛ, ebaabu wɔhe kɛjɛ wɔhe ni wɔɔŋmɛɛ wɔha nakai kaai lɛ mli.—Luka 11:13; Efesobii 6:18-20.
Ekãa Naa Odaseyeli He Saji ni Aŋmala Ashwie Shi
7. (a) Mɛni hewɔ wɔyɔɔ saji ni aŋmala ashwie shi yɛ Bɔfoi lɛ Asaji awolo lɛ mli lɛ he miishɛɛ waa diɛŋtsɛ lɛ? (b) Ha sanebimɔi ni akɛha yɛ kuku nɛɛ naagbee lɛ hetoo, ni oma bɔ ni saji lɛ ahe baanyɛ aba sɛɛnamɔ kɛha wɔ lɛ nɔ mi.
7 Wɔ fɛɛ wɔyɛ saji ni aŋmala ashwie shi yɛ Bɔfoi lɛ Asaji awolo lɛ mli lɛ he miishɛɛ waa diɛŋtsɛ. Egbaa wɔ bɔ ni bɔfoi lɛ kɛ mra be mli kaselɔi krokomɛi lɛ—ni ji gbɔmɛi ni yɔɔ henumɔi tamɔ wɔ nɔŋŋ lɛ—ye gbɛtsii nii anɔ ni amɛjie amɛhe kpo akɛ Yehowa odasefoi anɔkwafoi ni yɔɔ ekãa. Nyɛhaa wɔpɛia nakai nɔ ni aŋma afɔ̃ shi lɛ fã ko mli wɔkwɛ kɛtsɔ sanebimɔi kɛ ŋmalɛi ni aŋmalako emli wiemɔi lɛ ni nyiɛ sɛɛ nɛɛ anɔ. Yɛ be mli ni wɔfeɔ nakai lɛ, susumɔ bɔ ni bo diɛŋtsɛ lɛ oooná nɔ ni okaneɔ lɛ he sɛɛ lɛ he.
Ani bɔfoi lɛ le woloŋ jogbaŋŋ? Ani amɛji aŋkroaŋkroi ní yɛ fɔmɔ su naa lɛ, amɛsheee nɔ fɛɛ nɔ ni baaba lɛ gbeyei kwraa? (Yohane 18:17, 25-27; 20:19; Bɔfoi lɛ Asaji 4:13)
Mɛni ha Petro nyɛ ekɛ ekãa wie yɛ Yudafoi asaneyelihe ní bu Nyɔŋmɔ diɛŋtsɛ Bi lɛ fɔ lɛ hiɛ lɛ? (Mateo 10:19, 20; Bɔfoi lɛ Asaji 4:8)
Mɛni bɔfoi lɛ feɔ yɛ otsii ni tsɔ hiɛ ba dani amɔmɔ amɛ kɛba Akuashɔŋ lɛ hiɛ lɛ mli lɛ? (Bɔfoi lɛ Asaji 1:14; 2:1, 42)
Beni nɔyelɔi lɛ fã bɔfoi lɛ akɛ amɛkashiɛ dɔŋŋ yɛ Yesu gbɛi amli lɛ, mɛɛ hetoo Petro kɛ Yohane kɛha amɛ? (Bɔfoi lɛ Asaji 4:19, 20)
Beni ajie bɔfoi lɛ kɛjɛ tsuŋ lɛ, namɔ nɔ amɛkɛ amɛhiɛ fɔ̃ kɛha yelikɛbuamɔ ekoŋŋ? Ani amɛsɔle koni yiwaa lɛ sɛɛ afo, aloo mɛni? (Bɔfoi lɛ Asaji 4:24-31)
Mɛni nɔ Yehowa tsɔ ekɛ yelikɛbuamɔ ha beni shitee-kɛ-wolɔi bɔ mɔdɛŋ ni amɛha akpa shiɛmɔ nitsumɔ lɛ? (Bɔfoi lɛ Asaji 5:17-20)
Mɛɛ gbɛ nɔ bɔfoi lɛ tsɔɔ yɛ akɛ amɛnuɔ yiŋtoo hewɔ ni ajie amɛ lɛ shishi? (Bɔfoi lɛ Asaji 5:21, 41, 42)
Beni agbɛ kaselɔi pii ashwã yɛ yiwaa lɛ hewɔ po lɛ, mɛni amɛtee nɔ amɛfee? (Bɔfoi lɛ Asaji 8:3, 4; 11:19-21)
8. Mɛɛ miishɛɛ saji jɛ klɛŋklɛŋ kaselɔi lɛ asɔɔmɔ lɛ mli ba, ni wɔ́bafee mɛi ni náa mli gbɛfaŋnɔ yɛ mɛɛ gbɛ nɔ?
8 Sanekpakpa shiɛmɔ nitsumɔ lɛ efeee efolo. Abaptisi kaselɔi aaafee 3,000 yɛ Pentekoste afi 33 Ŋ.B. “Akɛ mɛi ni heɔ Nuŋtsɔ lɛ nɔ yeɔ, hii kɛ yei babaoo, bafata amɛhe.” (Bɔfoi lɛ Asaji 2:41; 4:4; 5:14) Yɛ be ni sa mli lɛ, mɔ ko ni waa Nyɔŋmɔ webii lɛ ayi waa diɛŋtsɛ, ni ji Saulo ni jɛ Tarso lɛ po batsɔ Kristofonyo ni ekɛ ekãa je anɔkwale lɛ he odaseyeli shishi. Abale lɛ akɛ bɔfo Paulo. (Galatabii 1:22-24) Nitsumɔ ni je shishi yɛ klɛŋklɛŋ afii oha lɛ mli lɛ sɛɛ efoko. Emli ewa waa moŋ yɛ naagbee gbii nɛɛ amli ni eyashɛ shikpɔŋ lɛ nɔ hei srɔtoi fɛɛ. Wɔná hegbɛ akɛ wɔɔná mli gbɛfaŋnɔ, ni yɛ be mli ni wɔfeɔ nakai lɛ, wɔbaanyɛ wɔkase nii kɛjɛ nɔkwɛmɔnɔ ni odasefoi anɔkwafoi ni tsɔ hiɛ amɛsɔmɔ lɛ fee amɛfɔ̃ shi lɛ mli.
9. (a) Mɛɛ hegbɛi Paulo kɛtsu nii koni ekɛye odase? (b) Mɛɛ gbɛ̀i anɔ otsɔɔ ogbɛɔ Maŋtsɛyeli shɛɛ sane lɛ oshwãa ohaa mɛi krokomɛi yɛ?
9 Beni Paulo kase anɔkwale ni kɔɔ Yesu Kristo he lɛ, mɛni efee? “Amrɔ lɛ nɔŋŋ eshiɛ . . . akɛ Yesu ji Nyɔŋmɔ [Bi, NW] lɛ.” (Bɔfoi lɛ Asaji 9:20) Ehiɛ sɔ Nyɔŋmɔ mlihilɛ ni esaaa ni ajie lɛ kpo atsɔɔ lɛ lɛ, ni eyɔse akɛ sanekpakpa lɛ ni enine eshɛ nɔ lɛ he miihia mɔ fɛɛ mɔ. Yudanyo ji Paulo, ni taakɛ afɔɔ feemɔ yɛ nakai gbii lɛ amli lɛ, eyaa kpeehei lɛ ni eyayeɔ odase yɛ jɛmɛ. Eshiɛ yɛ shia kɛ shia hu, ni ekɛ mɛi susu saji ahe yɛ jarawoohei. Ni esumɔɔ akɛ eya shikpɔŋkukuji heei amli ni eyashiɛ sanekpakpa lɛ yɛ jɛmɛ.—Bɔfoi lɛ Asaji 17:17; 20:20; Romabii 15:23, 24.
10. (a) Mɛɛ gbɛ nɔ Paulo tsɔɔ yɛ akɛ, eyɛ mli akɛ eyɛ ekãa moŋ, shi ekɛ sanesɛɛkɔmɔ hu tsu nii yɛ gbɛ ni etsɔ eye odase lɛ nɔ? (b) Mɛɛ gbɛ nɔ wɔɔtsɔ wɔjie Paulo sui lɛ akpo beni wɔyeɔ wekumɛi, nanemɛi nitsulɔi, loo nanemɛi skulbii odase lɛ?
10 Paulo yɛ ekãa, shi ekɔɔ sane sɛɛ hu, taakɛ esa akɛ wɔfee lɛ. Edamɔ shiwoi ni Nyɔŋmɔ kɛha amɛblematsɛmɛi lɛ anɔ eshiɛ eha Yudafoi koni amɛbo toi. Edamɔ nibii ni Helabii lɛ le lɛ anɔ ewie etsɔɔ amɛ. Yɛ bei komɛi amli lɛ, ekɛ lɛ diɛŋtsɛ eniiashikpamɔ beni ekase anɔkwale lɛ tsu nii akɛ nɔ ni edamɔɔ nɔ ekɛyeɔ odase. Ekɛɛ akɛ: “Sanekpakpa lɛ hewɔ mifeɔ nibii fɛɛ, bɔni afee ni manyɛ mikɛ mɛi krokomɛi aná mli gbɛfaŋnɔ.”—1 Korintobii 9:20-23, NW; Bɔfoi lɛ Asaji 22:3-21.
11. (a) Mɛni Paulo fee koni ekwa béi ni ekɛ shitee-kɛ-wolɔi aaabé shii abɔ lɛ? (b) Mɛɛ be wɔbaanyɛ wɔkase Paulo nɔkwɛmɔnɔ lɛ yɛ nilee mli, ni yɛ mɛɛ gbɛ nɔ? (d) Hewalɛ ni haa anyɛɔ ayaa nɔ akɛ ekãa shiɛɔ lɛ baa kɛjɛɔ nɛgbɛ?
11 Kɛ́ shitee-kɛ-woo ha ebafee tamɔ nɔ ni ehi akɛ Paulo aaashiɛ yɛ he kroko kɛyashi be ko lɛ, efeɔ nakai, moŋ fe nɔ ni ekɛ shitee-kɛ-wolɔi aaabe shii abɔ. (Bɔfoi lɛ Asaji 14:5-7; 18:5-7; Romabii 12:18) Shi ehiɛ gbooo sanekpakpa lɛ he kɔkɔɔkɔ. (Romabii 1:16) Eyɛ mli akɛ Paulo na akɛ bulɛ ni abɛ kɛha mɔ—basabasafeemɔ po—ni shitee-kɛ-wolɔi lɛ kɛbaa mɛi anɔ lɛ eŋɔɔɔ enaa moŋ, shi ‘ená ekãa kɛtsɔ wɔ-Nyɔŋmɔ lɛ nɔ’ koni eya nɔ eshiɛ. Ekɛɛ akɛ: “Nuŋtsɔ lɛ fi misɛɛ ni ewo mi hewalɛ, koni atsɔ minɔ ama shiɛmɔ lɛ nɔ mi.” (1 Tesalonikabii 2:2; 2 Timoteo 4:17) Yesu, ni ji Kristofoi asafo lɛ Yitso lɛ yaa nɔ lolo ekɛ hewalɛ ni he hiaa koni akɛtsu nitsumɔ ni egba efɔ̃ shi kɛha wɔgbii nɛɛ lɛ haa.—Marko 13:10.
12. Mɛni yeɔ ekãa ni Kristofonyo feɔ lɛ he odase, ni mɛni nɔ edamɔ?
12 Wɔyɛ yiŋtoo fɛɛ yiŋtoo ni wɔɔdamɔ nɔ wɔya nɔ wɔkɛ ekãa ashiɛ Nyɔŋmɔ wiemɔ lɛ, tamɔ bɔ ni Yesu kɛ Nyɔŋmɔ tsuji anɔkwafoi krokomɛi lɛ fee yɛ klɛŋklɛŋ afii oha lɛ mli lɛ. Enɛ etsɔɔɔ akɛ wɔbaafee mɛi ni susuuu mɛi ahe, aloo ni wɔbɔ mɔdɛŋ wɔnyɛ mɛi ni sumɔɔɔ lɛ anɔ ni amɛkpɛlɛ sane lɛ nɔ. Shi wɔnijiaŋ ejeee wui akɛni gbɔmɛi bɛ he miishɛɛ lɛ hewɔ; ni asaŋ shitee-kɛ-woo nyɛŋ aha wɔbu wɔnaa. Taakɛ Yesu fee lɛ, wɔkɛ wɔnine tsɔɔ Nyɔŋmɔ Maŋtsɛyeli lɛ akɛ shikpɔŋ muu lɛ fɛɛ nɔ nɔyeli ni ja. Wɔkɛ hekɛnɔfɔɔ wieɔ ejaakɛ wɔdamɔ Yehowa ni ji Jeŋ Muu Fɛɛ Maŋtsɛ lɛ najiaŋ, ni agbɛnɛ sane ni wɔjajeɔ lɛ jɛɛɛ wɔŋɔɔ, shi moŋ lɛ eŋɔɔ ejɛ. Ni esa akɛ suɔmɔ ni wɔyɔɔ kɛha Yehowa lɛ afee nɔ ni kanyaa wɔ fe fɛɛ ni haa wɔjieɔ eyi.—Filipibii 1:27, 28; 1 Tesalonikabii 2:13.
Sanegbaa ni Akɛtiɔ Mli
• Mɛni hewɔ ehe hiaa ni akɛ Maŋtsɛyeli shɛɛ sane lɛ aha mɔ fɛɛ mɔ ni abaanyɛ akɛha lɛ lɛ, shi mɛɛ nifeemɔi wɔbaanyɛ wɔkpa gbɛ?
• Te wɔɔfee tɛŋŋ wɔtsɔɔ akɛ wɔkɛ wɔhe efɔ̃ɔɔ wɔ diɛŋtsɛ wɔhewalɛ nɔ koni wɔkɛsɔmɔ Yehowa?
• Mɛɛ nikasemɔi ni sɛɛnamɔ kpele yɔɔ he wɔkaseɔ kɛjɛɔ Bɔfoi lɛ Asaji awolo lɛ mli?
[Mfonirii ni yɔɔ baafa 173]
Taakɛ eji tsutsu ko lɛ, ŋmɛnɛ hu Yehowa tsuji kɛ ekãa shiɛɔ Nyɔŋmɔ wiemɔ lɛ