Biblia Mli Wolo ni Ji 65—Yuda

Mɔ ni Ŋma: Yuda

Heni Aŋma Yɛ: Palestina (?)

Be ni Aŋma Agbe Naa: Aaafee afi 65 Ŋ.B.

NYƐMIMƐI Kristofoi ni yɔɔ Yuda lɛ yɛ oshara mli! Yɛ Kristo Yesu gbele lɛ kɛ eshitee lɛ sɛɛ lɛ, nibii gbohii ju shi kɛbote Kristofoi asafo lɛ mli. Henyɛlɔi lɛ bote mli kɛ yiŋtoo akɛ amɛfite hemɔkɛyeli lɛ, taakɛ bɔ ni bɔfo Paulo etsɔ hiɛ ebɔ he kɔkɔ yɛ afii 14 ni eho lɛ. (2 Tes. 2:3) Te esa akɛ nyɛmimɛi lɛ ahɛle shi ni amɛkwɛ amɛhe nɔ jogbaŋŋ yɛ oshara lɛ he amɛha tɛŋŋ? Yuda wolo lɛ ni yɔɔ faŋŋ ni ekãa kɛ hewalɛ yɔɔ mli lɛ kɛ hetoo lɛ haa. Yuda diɛŋtsɛ tsɔɔ eshidaamɔ lɛ mli faŋŋ yɛ kukuji 3 kɛ 4 lɛ mli akɛ: ‘Mihe miijara mi akɛ maŋma nyɛ ejaakɛ gbɔmɛi komɛi eju shi ebabote mli, nɔshafeelɔi ni ŋɔɔ wɔ-Nyɔŋmɔ duromɔ lɛ amɛbɔɔ nyenyeŋtswi.’ Sane miihé aba shishitoo nɔ ní adamɔ nɔ kɛto tsɔɔmɔi ni nilee yɔɔ mli kɛ jeŋba kpakpa lɛ shishi lɛ ahe. Yuda nu he akɛ atsɛ́ lɛ ni ebafã enyɛmimɛi lɛ ahe, koni amɛ hu amɛnyɛ amɛwu hemɔkɛyeli lɛ he ta kpakpa lɛ.

² Shi namɔ ji Yuda? Hiɛkpamɔ wiemɔi lɛ kɛɔ wɔ akɛ mɔ ni ŋma wolo lɛ ji “Yuda, ni ji Yesu Kristo tsulɔ kɛ Yakobo nyɛmi lɛ, ŋma yaha mɛi ni atsɛ amɛ” lɛ. Ani Yuda, ji bɔfo akɛni atsɛɔ mɛi enyɔ Yuda yɛ Yesu bɔfoi 12 lɛ ateŋ lɛ? (Luka 6:16) Yuda ewieee lɛ diɛŋtsɛ ehe akɛ bɔfo, shi yɛ no najiaŋ lɛ ekɛ wiemɔ ni ji “amɛ” tsu nii beni ewieɔ bɔfoi lɛ ahe ni tsɔɔ akɛ efataaa mɛi etɛ nɛɛ ahe. (Yuda 17, 18) Kɛfata he lɛ, etsɛɔ lɛ diɛŋtsɛ ehe akɛ “Yakobo nyɛmi,” ni feɔ lɛ faŋŋ akɛ mɔ ni ŋma Yakobo wolo lɛ ji Yesu nyɛ bi. (Kk. 1) Ákɛ asafo lɛ mli “akulashiŋi” lɛ ateŋ mɔ kome yɛ Yerusalem lɛ, ale Yakobo nɛɛ waa ni no hewɔ lɛ Yuda wie ehe koni akɛna mɔ ni eji. Enɛ haa Yuda bafeɔ Yesu nyɛ bi, ni atsiɔ etã akɛ nakai eji. (Gal. 1:19; 2:9; Mat. 13:55; Mar. 6:3) Kɛ̃lɛ, Yuda ewieee weku tsakpãa ni kã ekɛ Yesu teŋ lɛ he, shi moŋ ejɛ heshibaa mli ema mumɔŋ wekukpãa ni kã ekɛ Yesu teŋ lɛ nɔ mi akɛ “Yesu Kristo tsulɔ.”—1 Kor. 7:22; 2 Kor. 5:16; Mat. 20:27.

³ Bɔ ni nɛkɛ Biblia wolo nɛɛ ja ha lɛ ji nɔ ni Muratori Wolo ní aŋma yɛ afi 100 Ŋ.B. afii lɛ amli lɛ ma nɔ mi lɛ. Kɛfata he lɛ, Clement ni jɛ Aleksandria (afi 100 Ŋ.B. afii lɛ amli) lɛ kpɛlɛ nɔ akɛ eja. Origen wie yɛ wolo nɛɛ he akɛ eji wolo ko “ni mli wiemɔi lɛ faaa ni kɛlɛ emli eyi tɔ kɛ tsamɔ wiemɔi ni jɛ Nyɔŋmɔ ni duroɔ mɔ lɛ dɛŋ.”a Tertullian hu wie he akɛ eja. Ŋwanejee ko bɛ he akɛ efata Ŋmalɛi krokomɛi ni ajɛ mumɔŋ aŋma lɛ ahe.

⁴ Yuda ŋma “mɛi ni atsɛ amɛ” lɛ, ni etsɔɔɔ asafo loo mɔ aŋkro pɔtɛɛ ko, ni no hewɔ lɛ ewolo ní eŋma lɛ yɛ kɛha Kristofoi fɛɛ yɛ jeŋ fɛɛ. Eyɛ mli akɛ atsĩii tã moŋ, shi eeenyɛ efee akɛ heni eŋma wolo lɛ yɛ ji Palestina. Ewa hu akɛ abaatsɔɔ be pɔtɛɛ ni eŋma. Kɛlɛ, eji wolo ko ní aŋma yɛ be mli ni Kristofoi asafo lɛ shwereɔ lɛ ejaakɛ Yuda gbala jwɛŋmɔ kɛtee “wiemɔi ni wɔ-Nuŋtsɔ Yesu Kristo bɔfoi lɛ wie sá lɛ” nɔ, ni eeenyɛ efee akɛ etsɛ́ 2 Petro 3:3 lɛ yisɛɛ. (Yuda 17, 18) Kɛfata he lɛ, Yuda wolo lɛ kɛ nɔ ni aŋma yɛ Petro Wolo ni Ji Enyɔ lɛ mli yitso ni ji enyɔ lɛ kpãa gbee waa. Enɛ tsɔɔ akɛ eŋma yɛ be mli ní Petro hu ŋma enɔ lɛ, ni amɛ fɛɛ amɛwie oshara ní miihé aba asafo lɛ mli ní gba amɛnaa waa yɛ nakai beaŋ lɛ he. No hewɔ lɛ, awieɔ afi 65 Ŋ.B. lɛ he akɛ be ni akɛŋma. Amaa afi nɛɛ nɔ mi hu akɛ eja ejaakɛ Yuda etsĩii Cestius Gallus ni kpeleke shi kɛba koni ebaye Yudafoi lɛ anɔ kunim beni amɛmaŋ basabasafeemɔ lɛ ba yɛ afi 66 Ŋ.B. aloo ni eeetsĩ Yerusalem hiɛkpatamɔ ni ba yɛ afi 70 Ŋ.B. lɛ atã. Yuda tsɛ́ Nyɔŋmɔ fɔbuu kojomɔi pɔtɛɛ komɛi ni ajaje ashwie mɛi fɔji anɔ lɛ ayisɛɛ yɛ ewolo lɛ mli, ni nilee yɛ mli akɛ eji akpãta Yerusalem hiɛ momo kulɛ ebaama esane naatsɔɔmɔ lɛ nɔ mi kɛtsɔ nakai fɔbuu kojomɔ lɛ he ní eewie he lɛ nɔ, titri lɛ akɛni no mli lɛ Yesu ewie he momo lɛ hewɔ.—Yuda 5-7; Luka 19:41-44.

NƆ HEWƆ NI EHE YƆƆ SƐƐNAMƆ

⁸ Yuda diɛŋtsɛ na akɛ Ŋmalɛi krɔŋkrɔŋ lɛ ahe yɛ sɛɛnamɔ kɛha kɔkɔbɔɔ, hewalɛwoo, mɔ nitsɔɔmɔ kɛ mɔ hiɛkamɔ kɛha “suɔmɔmɛi.” Beni ekpaa mɛi ní eju shi kɛba asafo lɛ mli esha ni yɔɔ hiɛdɔɔ lɛ he mama lɛ, ekɛ Hebri Ŋmalɛi lɛ amli wiemɔi ni mli kã shi faŋŋ tsu nii tamɔ Israelbii sɛɛsɛɛyalɔi, ŋwɛibɔfoi ni fee esha kɛ mɛi ni hi shi yɛ Sodoma kɛ Gomora koni ekɛtsɔɔ akɛ mɛi fɛɛ ni tsuɔ nibii gbohii ní tamɔ mɛnɛɛmɛi baaná nyɔmɔwoo ni tamɔ amɛnɔ lɛ eko. Ekɛ mɛi ni jeŋba efite lɛ to kooloi ni bɛ yitsoŋ lɛ ahe ni ewie yɛ amɛhe akɛ amɛkɔ Kain gbɛ lɛ, ni Bileam shishiumɔ he nyɔmɔwoo lɛ mli amɛkɛ amɛhe eyawo, ni Kora atuatsemɔ lɛ mli amɛhiɛ ekpata yɛ. Egbala saji amli kɛjɛ “adebɔɔ wolo lɛ” mli hu. Yuda wolo ni mli kã shi faŋŋ lɛ batsɔ “Ŋmalɛ fɛɛ Ŋmalɛ lɛ” fã ni esa akɛ akase afata Ŋmalɛi krokomɛi lɛ ahe ni wieɔ jeŋba kpakpa he yɛ “naagbee be lɛ mli lɛ” he.—Yuda 17, 18, 5-7, 11-13; 4 Mose 14:35-37; 1 Mose 6:4; 18:20, 21; 19:4, 5, 24, 25; 4:4, 5, 8; 4 Mose 22:2-7, 21; 31:8; 16:1-7, 31-35.

⁹ Shitee-kɛwoo kɛ kaai ni jeee asafo lɛ mli ejɛ lɛ nyɛɛɛ ni etsĩ Kristofoi lɛ ashweremɔ lɛ naa shi moŋ ebi ni nyɛmimɛi lɛ akwɛ amɛhe nɔ jogbaŋŋ yɛ fitemɔ ni yɔɔ asafo lɛ mli lɛ he. Mɛi komɛi ni ju shi kɛba asafo lɛ mli lɛ miitao akɛ amɛkɛ asafo lɛ fɛɛ awo oshara mli. Akɛni ena akɛ enɛ baanyɛ afee oshara ní efite nii babaoo hewɔ lɛ, Yuda wie yɛ bɔ ni ehe hiaa ní ‘awu hemɔkɛyeli ta lɛ he waa.’ Ewolo lɛ he yɛ sɛɛnamɔ ŋmɛnɛ taakɛ eji yɛ ebeaŋ lɛ. Nakai kɔkɔbɔɔ lɛ nɔŋŋ he miihia ŋmɛnɛ. Ehe miihia ni ahiɛ hemɔkɛyeli lɛ mli ni asaŋ awuu he ta, afo jeŋba shara sɛɛ, ajɛ mlihilɛ mli aye abua mɛi ni yiŋ feɔ amɛ kɔshikɔshi lɛ ni ‘asha amɛ kɛjɛ la lɛ mli’ kɛ ehe bahia ni afee nakai. Bɔni afee ní ahiɛ jeŋba kpakpa mli ni wekukpaa kpakpa akã mɔ kɛ Nyɔŋmɔ kɛ anɔkwa jamɔ teŋ hewɔ lɛ, esa akɛ Kristofoi ni yɔɔ ŋmɛnɛ lɛ aya nɔ atswa amɛhe amɛma shi yɛ hemɔkɛyeli krɔŋkrɔŋ lɛ mli. Esa akɛ amɛhi shi yɛ jalɛ tɛi anaa ni amɛtsi amɛbɛŋkɛ Nyɔŋmɔ yɛ sɔlemɔ mli. Ehe miihia ní amɛna jwɛŋmɔ kpakpa yɛ hegbɛ ni Nyɔŋmɔ eto ni kɔɔ “yitsoyeli” lɛ he yɛ Kristofoi asafo lɛ mli.— Yuda 3, 23, 8.

¹⁰ “Heloo gbɔmɛi ni bɛ mumɔ” boteŋ Nyɔŋmɔ Maŋtsɛyeli lɛ mli kɔkɔɔkɔ ejaakɛ no baatsĩ mɛi krokomɛi ni nyiɛ gbɛ kɛyaa naanɔ wala mli lɛ anaa. (Yuda 19; Gal. 5:19-21) Esa akɛ asafo lɛ abɔ kɔkɔ ashi amɛ ni ajie amɛ kɛjɛ asafo lɛ mli! No hewɔ lɛ, “mɔbɔnalɛ kɛ hejɔlɛ kɛ suɔmɔ” baafa babaoo yɛ suɔmɔ nyɛmimɛi lɛ agbɛfaŋ, ni amɛbaato amɛhe yɛ Nyɔŋmɔ suɔmɔ lɛ mli ‘ni amɛkwɛ wɔ-Nuŋtsɔ Yesu Kristo mɔbɔnalɛ lɛ gbɛ, koni amɛná naanɔ wala.’ Nyɔŋmɔ ni ji Yiwalaherelɔ lɛ baato Maŋtsɛyeli lɛ he niyelɔi lɛ ‘ni kpa ko bɛ amɛhe, yɛ mlifilimɔ mli.’ Ekã shi faŋŋ nɛkɛ mɛi nɛɛ baafata Yuda he koni aŋɔ “anunyam kɛ agbojee, nɔyeli kɛ hegbɛ fɛɛ” aha Lɛ kɛtsɔ Yesu Kristo nɔ.—Yuda 2, 21, 24, 25.

[Shishigbɛ niŋmaa]