Ohiɛ Ahi Ohe Nɔ Yɛ Kutumpɔo Tsui He

1, 2. Mɛni hewɔ ebɛ mlɛo akɛ wɔɔle bɔ ni wɔfonirifeemɔŋ tsui lɛ yɔɔ diɛŋtsɛ lɛ?

ŊƆƆ lɛ akɛ gbi ko leebi maŋkpa beni oyɔɔ saa mli lolo lɛ, onu he akɛ otsitsi mli miiwa ohe waa, ni kɛ́ omu lɛ, omumɔ shɛɛɛ shi. Ekolɛ, obaashwie oyiŋ akɛ, ‘Ani mitsui kpãa miihe atse?’ Ohiɛ ni oooku oshwie naagba lɛ nɔ kɛkɛ lɛ, yeŋ ebuaŋ bo. Ebaafee nɔ̃ ni sa akɛ ooofee he nɔ̃ ko amrɔ nɔŋŋ. Ekolɛ, obaaya helatsamɔhe amrɔ nɔŋŋ. Yɛ helatsamɔhe lɛ, datrɛfonyo ko baakwɛ bo jogbaŋŋ, ni ekolɛ ekɛ tsɔne ko (electrocardiograph) ni akɛkwɛɔ bɔ ni tsui fãji lɛ tsuɔ nii ehaa lɛ, baafee nakai. Kɛ́ ana hela ni yeɔ bo lɛ amrɔ nɔŋŋ, ni amɔ naa lɛ no baahi, kɛjeee nakai lɛ obaanyɛ ogbo.

² Wɔfonirifeemɔŋ tsui lɛ hu? Eeenyɛ efee akɛ, ebɛ mlɛo akɛ aaana bɔ ni eyɔɔ diɛŋtsɛ. Mɛni hewɔ? Wɔkaneɔ yɛ Biblia lɛ mli akɛ: “Tsui yɔɔ nɛɛ, eyi tɔ kɛ kutumpɔo fe nii fɛɛ, ni esane ehiii kwraa; namɔ aaanyɛ ale?” (Yer. 17:9) Belɛ, wɔtsui lɛ baanyɛ alaka wɔ, ni tsɔɔ akɛ ebaaha wɔna wɔhe akɛ wɔbɛ naagba ko yɛ mumɔŋ, be mli ni ekolɛ mɛi ena naagba lɛ he okadii, ni eegba amɛnaa. Mɛni hewɔ wɔtsui lɛ baanyɛ alaka wɔ? Ojogbaŋŋ, eshafeemɔ su ni yɔɔ wɔmli lɛ baanyɛ aná wɔnɔ hewalɛ, ni agbɛnɛ hu Satan kɛ enibii agbɛjianɔtoo lɛ baanyɛ aha wɔkana akɛ wɔyɛ naagba. Wɔbaanyɛ wɔkase nɔ̃ ko kɛjɛ Yeremia kɛ Yudabii ni hi shi yɛ ebeaŋ lɛ adɛŋ, yɛ bɔ ni wɔɔfee wɔpɛi wɔtsui lɛ mli lɛ he.

 3. Mɛɛ nibii etsɔmɔ nyɔŋmɔi kɛha mɛi babaoo?

³ Yudabii lɛ ateŋ babaoo kɛ amɛnifeemɔ tsɔɔ akɛ amɛfonirifeemɔŋ tsui lɛ he miiye. Amɛshi anɔkwa Nyɔŋmɔ koome lɛ sɛɛ ni amɛhenilee gbaaa amɛnaa, ni amɛyanyiɛ Kanaanbii anyɔŋmɔi lɛ asɛɛ. Yehowa tswa mɛi nɛɛ mpoa akɛ: ‘Nɛgbɛ onyɔŋmɔi ní ofee oha ohe lɛ yɔɔ? Ha ni amɛte shi, akɛ amɛaanyɛ oyiwala amɛhere yɛ ofimɔ be lɛ mli lo? Ejaakɛ bɔ ni omaji lɛ fá lɛ, nakai nɔŋŋ onyɔŋmɔi lɛ fá.’ (Yer. 2:28) Wɔgbɛfaŋ lɛ, ekã shi faŋŋ akɛ, wɔnaaa wɔhe akɛ wɔjáa wɔji. Shi, dishinari ko tsɔɔ wiemɔ ni ji “nyɔŋmɔ” lɛ shishi akɛ: “Mɔ ko loo nɔ̃ ko ni abuɔ lɛ fe fɛɛ.” Je lɛ mli lɛ, mɛi babaoo kɛ amɛnitsumɔ, amɛgbɔmɔtsoŋ hewalɛnamɔ, amɛweku, kɛ amɛshĩa kooloi po yeɔ klɛŋklɛŋ gbɛhe yɛ amɛshihilɛi amli. Mɛi krokomɛi buɔ kpɔiaŋgbɔlemɔ nifeemɔi, mɛi ni efee gbɛ́i, nilee ni akɛfeɔ nibii (technology), gbɛfãa, loo amɛkusumii fe nɔ̃ fɛɛ nɔ̃. Mɛi babaoo tiuɔ nibii ni tamɔ nɛkɛ lɛ asɛɛ kɛfiteɔ wekukpaa ni yɔɔ amɛ kɛ Bɔlɔ lɛ teŋ. Ani anɔkwa Kristofoi baanyɛ abote shihilɛ ni tamɔ nɛkɛ mli taakɛ Yudabii ni hi shi yɛ Yeremia beaŋ lɛ fee lɛ?

 4. Ani tsui krɔŋŋ mli Yudabii lɛ jɛ amɛkɛɛ akɛ: ‘Nɛgbɛ Yehowa wiemɔ lɛ yɔɔ? Ha ni eba koo!’ lɛ?

⁴ Ekã shi faŋŋ akɛ, kɛ́ ona nɔ̃ ni Yeremia wieɔ he beni ekɛɛ akɛ, tsui lɛ sane ehiii kwraa lɛ, ebaaha ojwɛŋ nii ahe waa. Yeremia yɔse akɛ maŋbii lɛ kɛɔ akɛ: ‘Nɛgbɛ Yehowa wiemɔ lɛ yɔɔ? Ha ni eba koo!’ (Yer. 17:15) Shi, ani tsui krɔŋŋ mli amɛjɛɔ amɛkɛɔ nakai lɛ? Ojogbaŋŋ, wɔkaneɔ yɛ Yeremia wolo lɛ yitso 17 lɛ klɛŋklɛŋ kuku lɛ mli akɛ: “Yuda he esha lɛ aŋma kɛ dade pɛn kɛ diamente naa piɔpiɔ, akpɛ́ yɛ amɛtsuiiaŋ tao lɛ nɔ.” Yudabii lɛ anaagba tuuntu ji akɛ, ‘amɛŋɔ amɛhiɛ amɛfɔ̃ adesa nɔ, ní amɛŋɔ heloo amɛfee amɛnine, ní amɛtsui je Yehowa he!’ Nɔ̃ ni tamɔɔɔ nakai lɛ, amɛteŋ mɛi fioo ko ŋɔ amɛhiɛ amɛfɔ̃ Nyɔŋmɔ nɔ, ni amɛkwɛ lɛ gbɛ kɛha gbɛtsɔɔmɔ koni ejɔɔ amɛ.—Yer. 17:1, 5, 7.

 5. Te Yeremia maŋbii lɛ fee amɛnii yɛ Yehowa gbɛtsɔɔmɔ he amɛha tɛŋŋ?

⁵ Ana bɔ ni Yudabii lɛ ateŋ babaoo atsui yɔɔ lɛ diɛŋtsɛ yɛ bɔ ni amɛfee amɛnii amɛha yɛ nɔ̃ ni Nyɔŋmɔ kɛɛ amɛ lɛ he lɛ mli. (Nyɛkanea Yeremia 17:21, 22.) Akɛ nɔkwɛmɔnɔ lɛ, ato Hejɔɔmɔ Gbi lɛ akɛ gbi ni akɛjɔɔ he kɛjɛɔ nitsumɔi amli, ni ehaa anáa hegbɛ akɛhe woɔ mumɔŋ nifeemɔi amli hu. Esaaa akɛ Yeremia maŋbii lɛ kwɛɔ nitsumɔ ko nɔ loo amɛtsuɔ nii amɛhaa mɔ ko yɛ Hejɔɔmɔ Gbi lɛ nɔ. Shi, bɔ ni amɛfee amɛnii yɛ nɛkɛ gbi nɛɛ nɔ lɛ ha ana bɔ ni amɛtsui yɔɔ diɛŋtsɛ. “Amɛbooo toi, ni amɛhaaa amɛtoi aba nɔ hu, shi amɛfee amɛhe kuɛŋtilɔi, ní amɛkanu, ní amɛkakpɛlɛ tsɔsemɔ.” Eyɛ mli akɛ amɛle Nyɔŋmɔ mla lɛ moŋ, shi amɛhiɛ amɛ diɛŋtsɛ amɛsusumɔ—amɛyɛ amɛ diɛŋtsɛ amɛnibii ni amɛbaafee yɛ Hejɔɔmɔ Gbi lɛ nɔ.—Yer. 17:23; Yes. 58:13.

6, 7. (a) Ŋmɛnɛ lɛ, yɛ ŋaawoo ni tsulɔ anɔkwafo kuu lɛ kɛhaa lɛ fɛɛ sɛɛ lɛ, mɛɛ gbɛ nɔ Kristofonyo ko baanyɛ asusu nii ahe yɛ gbɛ ni nilee bɛ mli lɛ nɔ? (b) Te enɛ baanyɛ asa wɔkpeeiyaa he eha tɛŋŋ?

⁶ Ŋmɛnɛ lɛ, wɔbɛ mla ni biɔ ni aye Hejɔɔmɔ Gbi lɛ shishi. Shi, kɔkɔbɔɔ yɛ bɔ ni Yeremia maŋbii lɛ fee amɛnii amɛha ni akɛna bɔ ni amɛtsui yɔɔ diɛŋtsɛ lɛ mli kɛha wɔ. (Kol. 2:16) Esa akɛ wɔkɛ nibii ni wɔ diɛŋtsɛ wɔshweɔ ni wɔfee loo nibii ni wɔfeɔ yɛ wɔshihilɛ mli lɛ aye gbɛhe ni ji enyɔ dani wɔbaanyɛ wɔfee Nyɔŋmɔ suɔmɔnaa nii. Wɔle akɛ nilee bɛ mli akɛ wɔɔbɔ mɔdɛŋ wɔsa Nyɔŋmɔ hiɛ yɛ gbɛ ni baatsu wɔ diɛŋtsɛ wɔtaomɔnii ahe nii lɛ nɔ. Kɛfata he lɛ, ekã shi faŋŋ akɛ wɔle mɛi babaoo ni kɛ Nyɔŋmɔ suɔmɔnaa nii ni amɛaafee lɛ yeɔ klɛŋklɛŋ gbɛhe yɛ amɛshihilɛ mli, ni nakai feemɔ eha amɛtsui enyɔ amɛmli ni amɛtoiiaŋ ejɔ amɛ hu. Belɛ, mɛɛ gbɛ nɔ wɔtsui baanyɛ alaka wɔ?

⁷ Kristofonyo ko baanyɛ asusu yɛ gbɛ ni ejaaa nɔ akɛ etsui nyɛŋ alaka lɛ, taakɛ bɔ pɛ ni eba lɛ yɛ mɛi babaoo agbɛfaŋ yɛ Yeremia beaŋ lɛ. Akɛ nɔkwɛmɔnɔ lɛ, nuu ko baanyɛ ashwie eyiŋ akɛ, ‘Esa akɛ mabɔ mɔdɛŋ koni minitsumɔ akaŋmɛɛ mi bɔni afee ni manyɛ makwɛ miweku lɛ,’ ni esane ja. Ni kɛ́ enɛ ha eshwie eyiŋ akɛ, ‘Esa akɛ matsa miwolokasemɔ lɛ nɔ koni minitsumɔ ni awoɔ mi nyɔmɔ jogbaŋŋ yɛ mli lɛ akaŋmɛɛ mi, loo maná nitsumɔ ni awoɔ mɔ nyɔmɔ jogbaŋŋ yɛ mli’ lɛ hu? Ebaafee tamɔ nɔ̃ ni nilee yɛ susumɔ nɛɛ mli, ni no baaha emu sane naa akɛ, ‘Nibii tamɔɔɔ tsutsu lɛ, ni ŋmɛnɛ lɛ, dani mɔ ko baanyɛ ahi jeŋ lɛ, ebiɔ ni ená kɔleji loo yunivɛsiti wolokasemɔ koni ená nitsumɔ kpakpa.’ Ewaaa kwraa akɛ enɛ baaha mɔ ko aba ŋaawoo kpakpa ni nilee yɔɔ mli ni tsulɔ anɔkwafo kɛ nilelɔ lɛ kɛhaa yɛ wolokasemɔ ni atsaa nɔ lɛ he lɛ shi, ni ebɔi asafoŋ kpeei amli folɔmɔ! Mɛi komɛi eha je nɛŋ susumɔi ená amɛnɔ hewalɛ yɛ enɛ gbɛfaŋ ni amɛyɔseee. (Efe. 2:2, 3) Biblia lɛ kɛ kɔkɔbɔɔ ni sa haa wɔ akɛ: “Nyɛkahaa jeŋ ni ebɔle nyɛ lɛ shɔ̃a nyɛ ni no ha nyɛfee nyɛnii tamɔ jeŋbii lɛ.”—Rom. 12:2, Phillips.a

 8. (a) Mɛni ekolɛ Kristofonyo ko kɛbaashwã? (b) Mɛni ehe hiaa ni aná kɛfata Nyɔŋmɔ kɛ enifeemɔi lɛ ahe anɔkwa nilee lɛ he?

⁸ Anɔkwa, Kristofoi ni hi shi yɛ klɛŋklɛŋ afii 100 lɛ mli lɛ ateŋ mɛi komɛi ji niiatsɛmɛi, ni eeenyɛ efee akɛ yɛ gbɛ ko nɔ lɛ, amɛyɛ gbɛnaa yɛ je lɛ mli. Ni nakai nɔŋŋ eji yɛ Kristofoi komɛi ni yɔɔ wɔbeaŋ nɛɛ hu agbɛfaŋ. Te esa akɛ amɛna nibii ni amɛnyɛ amɛfee lɛ amɛha tɛŋŋ, ni te esa akɛ wɔna mɛi ni tamɔ nɛkɛ lɛ wɔha tɛŋŋ? Yehowa kɛ sanebimɔ nɛɛ hetoo haa wɔ kɛtsɔ Yeremia nɔ. (Nyɛkanea Yeremia 9:23, 24.) Nɔ̃ najiaŋ ni mɔ aaashwã efɔ̃ nibii ni lɛ diɛŋtsɛ enyɛ efee lɛ anɔ lɛ, nilee yɛ mli moŋ akɛ eeeshwã efɔ̃ Jeŋ Muu Fɛɛ Nɔyelɔ lɛ he nilee ni eyɔɔ lɛ nɔ. (1 Kor. 1:31) Shi, mɛni tsɔɔ akɛ mɔ ko eyoo, ni asaŋ ele Yehowa? Ojogbaŋŋ, mɛi ni hi shi yɛ Yeremia beaŋ lɛ le Nyɔŋmɔ gbɛ́i lɛ. Kɛfata he lɛ, amɛle nɔ̃ ni efee kɛbaa amɛblematsɛmɛi lɛ ayi yɛ Ŋshɔ Tsuru lɛ naa, beni amɛyaa Shiwoo Shikpɔŋ lɛ nɔ, Kojolɔi lɛ abeaŋ, kɛ beni maŋtsɛmɛi anɔkwafoi lɛ yeɔ nɔ lɛ. Fɛɛ sɛɛ lɛ, amɛleee Yehowa jogbaŋŋ loo amɛbɛ emli hemɔkɛyeli krɔŋŋ. Shi, amɛkɛɛ akɛ: “Mifeko nɔ̃ ko: nto [Nyɔŋmɔ] mlifu lɛ eje minɔ!”—Yer. 2:35.

 9. Mɛni hewɔ wɔbaanyɛ wɔná nɔmimaa akɛ wɔbaanyɛ wɔtsake wɔsusumɔ yɛ bɔ ni wɔnaa Nyɔŋmɔ gbɛtsɔɔmɔ wɔhaa lɛ he lɛ?

⁹ Ehe bahia ni Yudafoi ni Yeremia kɛ Nyɔŋmɔ sane lɛ ha amɛ lɛ atsake amɛsusumɔ yɛ bɔ ni amɛnaa Nyɔŋmɔ gbɛtsɔɔmɔ amɛhaa lɛ he. Kulɛ, amɛbaanyɛ amɛfee nakai ejaakɛ Nyɔŋmɔ kɛɛ mɛi ni baaku amɛsɛɛ kɛjɛ nomŋɔɔ mli kɛba lɛ akɛ: ‘Maha amɛ tsui ní amɛkɛle mi, ákɛ mi ji Yehowa! Ni amɛaatsɔ mimaŋ ni mi hu matsɔ amɛ-Nyɔŋmɔ; ejaakɛ amɛaaku amɛsɛɛ kɛaaba miŋɔɔ.’ (Yer. 24:7) Ŋmɛnɛ hu, tsakemɔ ni tamɔ nakai baanyɛ aba. Kɛfata he lɛ, wɔteŋ mɛi babaoo baanyɛ asaa wɔfonirifeemɔŋ tsui lɛ jogbaŋŋ. Nibii etɛ ahe hiaa yɛ enɛ feemɔ mli, nomɛi ji: Nyɔŋmɔ Wiemɔ lɛ ni mɔ kɛ hiɛdɔɔ aaakase, bɔ ni Nyɔŋmɔ Wiemɔ lɛ náa wɔshihilɛi anɔ hewalɛ lɛ ni wɔɔnu shishi jogbaŋŋ, kɛ nibii ni wɔkaseɔ yɛ ehe lɛ ni wɔkɛaatsu nii. Nɔ̃ ni tamɔɔɔ mɛi ni hi shi yɛ Yeremia beaŋ lɛ, esa akɛ wɔha Yehowa, ni ji Tsuii Amlipɛilɔ lɛ apɛi wɔtsui mli. Kɛfata he lɛ, wɔbaanyɛ wɔdamɔ Biblia lɛ nɔ wɔpɛi wɔ diɛŋtsɛ wɔtsui mli, ni wɔbaanyɛ wɔtsɔ yɔsemɔ ni wɔɔyɔse nibii ni Yehowa feɔ ehaa wɔ lɛ hu anɔ wɔfee nakai. (Lala 17:3) Kwɛ bɔ ni nilee yɔɔ mli akɛ wɔɔfee nakai!

10, 11. (a) Mɛni hewɔ Yeremia yakwɛ gbɛshɔ̃lɔ ko lɛ? (b) Mɛni baatsɔɔ bɔ ni Yehowa baashɔ̃ mɛi eha?

¹⁰ Satan sumɔɔ ni eshɔ̃ mɛi fɛɛ yɛ gbɛ kome nɔ, shi Nyɔŋmɔ shɔ̃ɔ mɛi yɛ bɔ ni amɛji akɛ aŋkroaŋkroi lɛ anaa. Wɔnaa enɛ faŋŋ yɛ shihilɛ ko ni Yeremia kɛkpe lɛ mli. Gbi ko lɛ, Nyɔŋmɔ kɛɛ lɛ akɛ eya gbɛshɔ̃lɔ ko we. No mli lɛ, gbɛshɔ̃lɔ lɛ miitsu nii yɛ enishɔ̃ɔ tɛi anɔ, shi beni shɔ̃ɔ nɔ̃ ni efeɔ lɛ fite lɛ, esaa eŋɔ nakai sũ ni yɔɔ tswãa lɛ nɔŋŋ efee nɔ̃ kroko. (Nyɛkanea Yeremia 18:1-4.) Mɛni hewɔ afã Yeremia ni eyakwɛ nifeemɔ nɛɛ, ni mɛni wɔbaanyɛ wɔkase kɛjɛ nɔ̃ ni ena lɛ mli?

¹¹ Yehowa miitao ni Yeremia kɛ Israelbii lɛ ana akɛ eyɛ hegbɛ akɛ eshɔ̃ɔ gbɔmɛi kɛ maji bɔ ni sa ehiɛ. Te Nyɔŋmɔ kɛ sũ lɛ tsuɔ nii ehaa tɛŋŋ? Nɔ̃ ni tamɔɔɔ adesai gbɛshɔ̃lɔi lɛ, Yehowa efeee nɔ̃ ko ni sɛɛ mli lɛ ebaakɛɛ, mile kulɛ mifeee lɛ nakai; asaŋ efiteee eninenaa nitsumɔ kɛkɛ. Kɛ́ Yehowa miishɔ̃ mɛi lɛ, bɔ ni amɛfeɔ amɛnii yɛ he lɛ ni baatsɔɔ nɔ̃ ni ekɛ amɛ baafee.—Nyɛkanea Yeremia 18:6-10.

12. (a) Te Yehoiakim fee enii eha tɛŋŋ yɛ mɔdɛŋ ni Yehowa bɔ akɛ eeeshɔ̃ lɛ lɛ he? (b) Mɛɛ nikasemɔ onaa yɛ Yehoiakim he amaniɛbɔɔ lɛ mli?

¹² Belɛ, te Yehowa shɔ̃ɔ aŋkroaŋkroi ehaa tɛŋŋ? Ŋmɛnɛ lɛ, nɔ̃ titri ni ekɛfeɔ nakai ji Biblia lɛ. Bɔ ni mɔ ko feɔ enii ehaa beni ekaneɔ Biblia lɛ tsɔɔ nɔ̃ gbɔmɔ ni eji, ni Nyɔŋmɔ baanyɛ ashɔ̃ lɛ. Amrɔ nɛɛ, nyɛhaa wɔsusua Maŋtsɛ Yehoiakim nɔkwɛmɔnɔ lɛ he wɔkwɛa, koni wɔna bɔ ni mɛi ni hi shi yɛ Yeremia beaŋ lɛ fee amɛnii amɛha yɛ Yehowa nishɔ̃ɔ lɛ he yɛ amɛdaa gbi shihilɛ mli. Awo akpɔ yɛ Mla lɛ mli akɛ, ‘akawa apaafonyo ko yi’ loo akashishiu lɛ, kɛlɛ maŋtsɛ lɛ shishiu enyɛmimɛi Israelbii lɛ kɛtsɔ nii ni eha amɛtsu yakatswaa ‘kɛmã shĩa kpele’ lɛ nɔ. (5 Mose 24:14; Yer. 22:13, 14, 17) Nyɔŋmɔ bɔ mɔdɛŋ akɛ eeeshɔ̃ Yehoiakim kɛtsɔ ewiemɔi ni etsɔ gbalɔi lɛ anɔ ejaje lɛ nɔ. Fɛɛ sɛɛ lɛ, maŋtsɛ lɛ nyiɛ etsui ni yeɔ kutumpɔo lɛ sɛɛ. Ekɛɛ akɛ: “Mibooo toi!” ni etee nɔ ehiɛ su ni ejie lɛ kpo yɛ eblahiiaŋ lɛ mli. No hewɔ lɛ, Nyɔŋmɔ kɛɛ akɛ: “Aaafu [Yehoiakim] tamɔ afuɔ teji, aaashãtã lɛ ní ashɛ afɔ̃ Yerusalem agbói lɛ asɛɛ.” (Yer. 22:19, 21) Kwɛ bɔ ni nilee bɛ mli akɛ wɔɔkɛɛ akɛ: ‘Nakai abɔ mi’! Ŋmɛnɛ lɛ, Nyɔŋmɔ tsuuu gbalɔi tamɔ Yeremia, shi ekɛ gbɛtsɔɔmɔ haa. Tsulɔ anɔkwafo kɛ nilelɔ kuu lɛ yeɔ ebua wɔ ni wɔnaa Biblia mli shishitoo mlai, kɛ bɔ ni wɔɔfee wɔkɛtsu nii. Shishitoo mlai nɛɛ baanyɛ akɔ nibii ni wɔfeɔ yɛ wɔshihilɛ mli tamɔ atadewoo kɛ hesaamɔ, lalai ni atswaa kɛ joi ni ajoɔ yɛ yookpeemɔ shishi, loo okpɔlɔŋmɛɛ krokomɛi ashishi lɛ ahe. Ani wɔbaaŋmɛ gbɛ ni Nyɔŋmɔ Wiemɔ lɛ ashɔ̃ wɔ?

13, 14. (a) Mɛni hewɔ Yerusalembii ni yɔɔ nyɔji lɛ kpɛlɛ nɔ akɛ amɛbaaha nyɔji ni ji Hebribii lɛ aye amɛhe lɛ? (b) Mɛni ha ana nɔ̃ diɛŋtsɛ ni yɔɔ Yerusalembii ni yɔɔ nyɔji lɛ atsuiiaŋ?

¹³ Susumɔ nɔkwɛmɔnɔ kroko he okwɛ. Babilonbii lɛ wó Zedekia akɛ Yuda maŋtsɛ ni yɔɔ amɛkudɔmɔ shishi. No sɛɛ lɛ, Zedekia ku ehiɛ eshwie Nyɔŋmɔ ŋaawoo ni etsɔ Yeremia nɔ ekɛha lɛ nɔ, ni etse Babilonbii lɛ ahiɛ atua. (Yer. 27:8, 12) Enɛ ha Babilonbii lɛ wo Yerusalem he ka. Maŋtsɛ lɛ kɛ elumɛi lɛ nu he akɛ esa akɛ amɛfee nɔ̃ ko ni kɛ Mla lɛ kpãa gbee koni amɛná Nyɔŋmɔ hiɛ duromɔ. Akɛni Zedekia le akɛ esa akɛ aŋmɛɛ nyɔji ni ji Hebribii lɛ ahe yɛ amɛnyɔŋyeli afi ni ji kpawo lɛ nɔ hewɔ lɛ, ekɛ maŋbii lɛ kpaŋ koni amɛha nyɔji ni tamɔ nɛkɛ lɛ aye amɛhe. (2 Mose 21:2; Yer. 34:14) Hɛɛ, akɛni henyɛlɔi ebɔle Yerusalem he hewɔ lɛ, trukaa lɛ ebafee tamɔ nɔ̃ ni nilee yɛ mli akɛ maŋbii lɛ baaha amɛnyɔji lɛ aye amɛhe.—Nyɛkanea Yeremia 34:8-10.

¹⁴ Sɛɛ mli lɛ, Mizraim tabilɔi lɛ ba koni amɛbaye amɛbua Yerusalem, ni enɛ ha Babilonbii lɛ je Yerusalem he amɛtee. (Yer. 37:5) Mɛni mɛi ni eha amɛnyɔji lɛ eye amɛhe lɛ baafee? Amɛnyɛ amɛnyɔji ni amɛha amɛye amɛhe lɛ anɔ koni amɛbasɔmɔ amɛ ekoŋŋ. (Yer. 34:11) Oti ni yɔɔ sane nɛɛ mli ji akɛ, kɛji Yudafoi lɛ yaje oshara mli lɛ, amɛyeɔ Nyɔŋmɔ akpɔi lɛ anɔ, oookɛɛ no baaha amɛkaye fɔ yɛ amɛtsutsu toigbele lɛ he. Shi, kɛ́ amɛje oshara lɛ mli nɔŋŋ lɛ, kɛkɛ lɛ amɛku amɛsɛɛ amɛyata amɛyɛlɛ ŋmɔ lɛ mli ekoŋŋ. Bɔ ni amɛkwa amɛfee tamɔ amɛkɛ Mla lɛ mli shishitoo mlai lɛ tsuɔ nii lɛ fɛɛ sɛɛ lɛ, nibii ni amɛfee yɛ sɛɛ mli lɛ ha efee faŋŋ akɛ, yɛ amɛtsui mli lɛ amɛsumɔɔɔ ni amɛkɛ Nyɔŋmɔ Wiemɔ lɛ mli gbɛtsɔɔmɔ lɛ atsu nii ni eshɔ̃ amɛ.

15. Mɛɛ shihilɛi amli obaasumɔ ni Yehowa ashɔ̃ bo? Okɛ enɛ he nɔkwɛmɔnɔ aha.

¹⁵ Yehowa asafo lɛ yeɔ ebuaa wɔ ni wɔnaa Biblia mli shishitoo mlai ni kɔɔ shihilɛ pɔtɛɛ ko he. Akɛ nɔkwɛmɔnɔ lɛ, ekolɛ wɔle bɔ ni esa akɛ wɔfee wɔnii wɔha kɛ́ wɔnyaaa nyɛmi nuu ko nifeemɔ ko he. (Efe. 4:32) Ekolɛ, wɔbaakpɛlɛ nɔ akɛ nakai Biblia mli ŋaawoo lɛ ja, ni nilee yɛ mli. Fɛɛ sɛɛ lɛ, mɛɛ sũ wɔkɛ wɔnifeemɔ baatsɔɔ akɛ wɔji yɛ Yehowa dɛŋ? Ani wɔbaafee wɔhe sũ ni yɔɔ tswãa koni Yehowa ashɔ̃ wɔ? Kɛ́ wɔtsui yɛ tswãa lɛ, wɔbaafee tsakemɔi ni sa; Gbɛshɔ̃lɔ Kpele lɛ kɛ wɔ baashɔ̃ nɔ̃ ko ni hiɛ yɔɔ nyam ni ebaanyɛ ekɛtsu nii. (Nyɛkanea Romabii 9:20, 21; 2 Timoteo 2:20, 21.) Nɔ̃ najiaŋ ni wɔɔkpiliŋ wɔtsui tamɔ Yehoiakim loo mɛi ni yɔɔ nyɔji ni hi shi yɛ Zedekia beaŋ lɛ, esa akɛ wɔkpɛlɛ ni Yehowa ashɔ̃ wɔ kɛha nɔ̃ ko ni hiɛ yɔɔ nyam.

16. Mɛɛ anɔkwa sane Yeremia tsĩ tã?

¹⁶ Nyɔŋmɔ shɔ̃ Yeremia po. Te gbalɔ lɛ fee enii eha tɛŋŋ yɛ he? Wɔbaanyɛ wɔna enɛ yɛ nɔ̃ ni ewie akɛ: “Adesa ní nyiɛ nɛɛ, bɔ ni eeetsɔ ejaje enajifaamɔi eha lɛ, ebɛ edɛŋ” lɛ mli. Kɛkɛ ni ekpa fai akɛ: “Yehowa, kã mi.” (Yer. 10:23, 24) Oblahii kɛ Oblayei, ani nyɛbaakɔ Yeremia nane? Ekã shi faŋŋ akɛ, nyɛyɛ yiŋ babaoo ni nyɛbaakpɛ. Oblahii kɛ oblayei komɛi miisumɔ ni ‘amɛ diɛŋtsɛ amɛjaje amɛnajifaamɔi.’ Ani kɛ́ nyɛmiikpɛ nyɛyiŋ lɛ, nyɛbaatao gbɛtsɔɔmɔ kɛjɛ Nyɔŋmɔ dɛŋ? Taakɛ Yeremia fee lɛ, ani nyɛbaajɛ heshibaa mli nyɛkpɛlɛ nɔ akɛ adesai etsɔɔ akɛ amɛnyɛŋ amɛjaje amɛ diɛŋtsɛ amɛnajifaamɔi? Nyɛkaia akɛ: Kɛ́ nyɛtao Nyɔŋmɔ gbɛtsɔɔmɔ sɛɛ lɛ, ebaashɔ̃ nyɛ.

17-19. (a) Mɛni hewɔ Yeremia fã gbɛ kakadaŋŋ kɛtee Eufrate lɛ? (b) Mɛɛ gbɛ nɔ atsɔ aka Yeremia toiboo lɛ? (d) Mɛni jɛ bɔ ni Yeremia fee enii eha yɛ hɛfii nɔ̃ lɛ he lɛ mli kɛba?

¹⁷ Nitsumɔ ni akɛwo Yeremia dɛŋ lɛ biɔ ni ebo Nyɔŋmɔ gbɛtsɔɔmɔ toi. Oji Yeremia kulɛ, ani obaakpɛlɛ gbɛtsɔɔmɔi ni akɛha yɛ nakai beaŋ lɛ nɔ? Be ko lɛ, Yehowa kɛɛ Yeremia ni eyahe klala hɛfii nɔ̃ ni eŋɔfi ehɛ. No sɛɛ lɛ, Nyɔŋmɔ fã lɛ ni efã gbɛ kɛya Eufrate. Yaakwɛ shikpɔŋ he wolo (map) nɔ, ni obaana akɛ enɛ baabi ni efã gbɛ aaafee kilomitai 500 sɔŋŋ. Afã Yeremia akɛ, kɛ́ eyashɛ jɛmɛ lɛ ekɛ hɛfii nɔ̃ lɛ ayatee tɛsaa fɔlɔ ko mli, ni esaa eku esɛɛ kɛba Yerusalem ekoŋŋ. Sɛɛ mli lɛ, Nyɔŋmɔ fã lɛ ni eku esɛɛ eyakɔ hɛfii nɔ̃ lɛ kɛba. (Nyɛkanea Yeremia 13:1-9.) Fɛɛ mli lɛ, Yeremia fã gbɛ aaafee kilomitai 2,000. Ewa kɛha woloŋlelɔi ni wieɔ Biblia lɛ he lɛ akɛ amɛaahe amɛye akɛ Yeremia nyiɛ enane nɔ nyɔji abɔ kɛfã gbɛ kakadaŋŋ nɛɛ.b (Ezra 7:9) Shi, nɔ̃ ni Nyɔŋmɔ kɛɛ ji no, ni nakai Yeremia fee.

¹⁸ Feemɔ gbalɔ lɛ ni miinyiɛ kɛmiikwɔ Yuda gɔji lɛ ateŋ ekomɛi, kɛkɛ lɛ eyaje shia ŋa ni atsɔɔ nɔ kɛyaa Eufrate lɛ nɔ lɛ he mfoniri yɛ ojwɛŋmɔŋ okwɛ. Egbo deŋme nɛɛ fɛɛ koni ekɛ klala hɛfii nɔ̃ kɛkɛ ayato! Ekã shi faŋŋ akɛ, beni ekutsoŋbii lɛ enaaa lɛ be kplaŋŋ lɛ, no ha amɛhiɛ fee amɛ yaa. Beni eku esɛɛ lɛ, klala hɛfii nɔ̃ lɛ eŋmɔɔɔ ehɛ. Kɛkɛ ni Nyɔŋmɔ kɛɛ lɛ ni efã gbɛ kakadaŋŋ ekoŋŋ koni eyaŋɔ hɛfii nɔ̃ lɛ ni amrɔ nɛɛ efite ni “ehiii haaa nɔ̃ ko nɔ̃ ko dɔŋŋ” lɛ kɛba. Kwɛ bɔ ni ewaaa akɛ kulɛ ebaakɛɛ akɛ: ‘Mi mikɛɛ, shi enɛ lɛ, enaa wa tsɔ. Minaaa akɛ nilee yɛ enɛ mli.’ Shi, akɛni Nyɔŋmɔ shɔ̃ Yeremia hewɔ lɛ, efeee nakai. Nɔ̃ najiaŋ ni eeewie eshi gbɛtsɔɔmɔ lɛ, efee nɔ̃ ni afã lɛ akɛ efee lɛ pɛpɛɛpɛ!

¹⁹ Beni Yeremia fã gbɛ ni ji enyɔ lɛ sɛɛ dani Nyɔŋmɔ gbála saji amli eha lɛ. Yeremia nifeemɔi lɛ ha ená nɔ̃ ko ni ekɛbaafee nɔkwɛmɔnɔ kɛjaje sane ni naa wa akɛ: “Nɛkɛ maŋ fɔŋ nɛɛ ní ekpɛlɛɛɛ miwiemɔi lɛ atoiboo, ní amɛnyiɛɔ amɛtsuiwalɛ sɛɛ, ní amɛnyiɛɔ nyɔŋmɔi krokomɛi asɛɛ, ní amɛsɔmɔɔ amɛ ní amɛjáa amɛ lɛ, amɛaatsɔmɔ tamɔ nɛkɛ hɛfii nɔ̃ ní ehiii haaa nɔ̃ ko nɔ̃ ko dɔŋŋ nɛɛ pɛ!” (Yer. 13:10) Kwɛ bɔ ni Yehowa tsɔ gbɛ ni nɔ bɛ nɛɛ nɔ etsɔɔ ewebii lɛ anii! Bɔ ni Yeremia jɛ etsuiŋ ebo Yehowa toi yɛ sane ni etamɔ nɔ̃ ni hiɛdɔɔ bɛ he tsɔ lɛ mli lɛ ye ebua lɛ waa yɛ mɔdɛŋ ni ebɔ koni eshɛ emaŋbii lɛ atsui he lɛ mli.—Yer. 13:11.

20. Mɛni hewɔ Nyɔŋmɔ toi ni oboɔ lɛ baanyɛ aha mɛi komɛi ahiɛ afee amɛ yaa lɛ, shi mɛni esa akɛ oná nɔmimaa yɛ he?

²⁰ Ŋmɛnɛ lɛ, Nyɔŋmɔ biii ni Kristofoi anyiɛ kilomitai ohai abɔ koni ekɛtsɔɔ amɛ nɔ̃ ko. Shi, kɛ́ Kristofoi agbɛ ni onyiɛ nɔ lɛ ha okutsoŋbii loo onanemɛi nitsulɔi ahiɛ fee amɛ yaa loo amɛwie ohiɛ po hu? Ebaanyɛ ekɔ otadewoo kɛ ohesaamɔ, wolokasemɔ ni obaatiu sɛɛ, nitsumɔ ni obaahala, loo susumɔ ni ohiɛ yɛ daanumɔ po he lɛ he. Ani obaatswa ofai shi akɛ okɛ Nyɔŋmɔ gbɛtsɔɔmɔ baatsu nii taakɛ Yeremia fee lɛ? Kɛ́ oŋmɛ gbɛ ni Nyɔŋmɔ shɔ̃ otsui, ni no ha okɔ gbɛ ni sa lɛ, no baanyɛ aha mɛi ajie Yehowa yi waa. Fɛɛ mli lɛ, kɛ́ okɛ Yehowa famɔ ni yɔɔ e-Wiemɔ lɛ mli lɛ tsu nii, ni okpɛlɛ gbɛtsɔɔmɔ ni akɛhaa wɔ kɛtsɔɔ tsulɔ anɔkwafo kuu lɛ nɔ lɛ nɔ lɛ, obaaná he sɛɛ kɛya naanɔ. Nɔ̃ najiaŋ ni oooha kutumpɔo tsui akudɔ bo lɛ, obaanyɛ ofee onii tamɔ Yeremia. Belɛ, tswaa ofai shi akɛ obaaha Nyɔŋmɔ ashɔ̃ bo; ha eshɔ̃ bo akɛ shɔ̃ɔ nɔ̃ ni hiɛ yɔɔ nyam ni ekɛbaatsu nii kɛya naanɔ.