Nɔ Ni Kristo Tsuɔ Yɛ Nyɔŋmɔ Asafo Lɛ Mli

“SHISHIJEE lɛ, Nyɔŋmɔ bɔ ŋwɛi kɛ shikpɔŋ lɛ,” ni nibii fɛɛ ni efee lɛ ‘hi jogbaŋŋ diɛŋtsɛ.’ (1 Mo. 1:1, 31) Yehowa bɔ gbɔmɛi koni amɛná miishɛɛ ni amɛhi shi kɛya naanɔ. Shi atua ni atse yɛ Eden lɛ fite adesai amiishɛɛ. Kɛ̃lɛ, Yehowa yiŋ ni eto yɛ shikpɔŋ lɛ kɛ adesai ahe lɛ tsakeee. Nyɔŋmɔ tsɔɔ akɛ ebaakpɔ̃ Adam shwiei ni baabo lɛ toi lɛ. Ebaasaa eto anɔkwa jamɔ shishi ekoŋŋ, ni ekpãtã mɔ fɔŋ lɛ kɛ enitsumɔi fɔji lɛ fɛɛ ahiɛ. (1 Mo. 3:15) Shi kome ekoŋŋ lɛ, ‘nibii baahi jogbaŋŋ diɛŋtsɛ,’ tamɔ bɔ ni eji yɛ shishijee mli lɛ. Yehowa baatsɔ e-Bi Yesu Kristo nɔ efee enɛ. (1 Yoh. 3:8) Enɛ hewɔ lɛ, ehe miihia ni wɔle nɔ ni Kristo tsuɔ yɛ Nyɔŋmɔ asafo lɛ mli, ni wɔba wɔhe shi wɔhã lɛ.​—Bɔf. 4:12; Fip. 2:9, 11.

² Kristo tsuɔ nibii srɔtoi pii yɛ Nyɔŋmɔ asafo lɛ mli. Akɛ nɔkwɛmɔnɔ lɛ, Yesu sɔmɔɔ akɛ adesai a-Kpɔ̃lɔ, Osɔfonukpa, Kristofoi asafo lɛ Yitso, ni amrɔ nɛɛ, eesɔmɔ akɛ Nyɔŋmɔ Maŋtsɛyeli lɛ nɔ Maŋtsɛ hu. Kɛ́ wɔjwɛŋ nibii nɛɛ ni Kristo tsuɔ lɛ ahe lɛ, ehãa wɔhiɛ sɔɔ Nyɔŋmɔ asafo lɛ waa, ni ehãa suɔmɔ ni wɔyɔɔ kɛhã Kristo Yesu lɛ hu mli waa. Biblia lɛ wieɔ nibii ni etsuɔ lɛ ekomɛi ahe.

³ Be ni Kristo sɔmɔɔ yɛ shikpɔŋ lɛ nɔ lɛ, ebafee faŋŋ akɛ, abaatsɔ enɔ asaa adesai ni baabo Nyɔŋmɔ toi lɛ kɛ Nyɔŋmɔ teŋ. (Yoh. 14:6) Yesu ji adesai a-Kpɔ̃lɔ, ejaakɛ ekɛ ehe hã akɛ kpɔmɔnɔ kɛkpɔ̃ mɛi babaoo. (Mat. 20:28) Yesu ba ejeŋ jogbaŋŋ, ni esa akɛ wɔkase lɛ. Shi kɛfata he lɛ, lɛ ji mɔ titri ni Yehowa baatsɔ enɔ etsu eyiŋ ni eto yɛ adesai ahe lɛ he nii. Lɛ pɛ enɔ abaatsɔ asaa wɔ kɛ Nyɔŋmɔ teŋ. (Bɔf. 5:31; 2 Kor. 5:18, 19) Yesu wala ni ekɛshã afɔle lɛ kɛ eshitee lɛ hewɔ lɛ, adesai ni boɔ Nyɔŋmɔ toi lɛ baaná hegbɛ amɛhi shi kɛya naanɔ yɛ Nyɔŋmɔ Maŋtsɛyeli ni yɔɔ ŋwɛi lɛ shishi, ni Nyɔŋmɔ baajɔɔ amɛ.

⁴ Yesu ji Osɔfonukpa hu. ‘Enuɔ he ehãa wɔ yɛ wɔgbɔjɔmɔi lɛ ahewɔ,’ ni ekpãtãa esɛɛnyiɛlɔi ni yɔɔ shikpɔŋ lɛ nɔ ni abaptisi amɛ lɛ kɛ Nyɔŋmɔ teŋ, koni akɛ amɛhe eshai ake amɛ. Bɔfo Paulo wie akɛ: “Osɔfonukpa ni wɔyɔɔ lɛ, ejeee mɔ ni nyɛɛɛ anu wɔgbɔjɔmɔi lɛ ahe ehã wɔ, shi moŋ eji mɔ ni aka lɛ akwɛ yɛ nibii fɛɛ mli tamɔ wɔ nɔŋŋ, shi esha ko bɛ ehe.” No sɛɛ lɛ, Paulo wo mɛi ni heɔ Yesu Kristo nɔ amɛyeɔ lɛ hewalɛ ni amɛhã akpãtã amɛ kɛ Nyɔŋmɔ teŋ. Ekɛɛ amɛ akɛ: “Nyɛhãa wɔkɛ wiemɔ ni awieɔ kɛ nɔmimaa abɛŋkɛa dromɔ sɛi lɛ, koni wɔnine ashɛ mɔbɔnalɛ kɛ dromɔ ni baaye abua wɔ yɛ be ni sa mli lɛ nɔ.”​—Heb. 4:14-16; 1 Yoh. 2:2.

⁵ Agbɛnɛ hu, Yesu ji Kristofoi asafo lɛ Yitso. Kristofoi ni hi shi yɛ blema lɛ bɛ adesa hiɛnyiɛlɔ, ni nakai nɔŋŋ ŋmɛnɛ lɛ, ehe ehiaaa ni wɔná adesa hiɛnyiɛlɔ ko. Yesu tsɔɔ mumɔ krɔŋkrɔŋ lɛ kɛ nɔkwɛlɔi ni sɔmɔɔ yɛ eshishi lɛ anɔ ekɛ gbɛtsɔɔmɔ hãa. Nɔkwɛlɔi nɛɛ baabu bɔ ni amɛkwɛɔ Nyɔŋmɔ tooku lɛ nɔ amɛhãa lɛ he akɔntaa amɛhã lɛ kɛ e-Tsɛ ni yɔɔ ŋwɛi lɛ. (Heb. 13:17; 1 Pet. 5:2, 3) Yehowa gba yɛ Yesu he akɛ: “Naa! Mifee lɛ odasefonyo mihã jeŋmaji lɛ, hiɛnyiɛlɔ kɛ tatsɛ mihã jeŋmaji lɛ.” (Yes. 55:4) Sane ko ni Yesu kɛɛ ekaselɔi lɛ hã efee faŋŋ akɛ gbalɛ nɛɛ eba mli. Ekɛɛ amɛ akɛ: “Akatsɛ nyɛhiɛnyiɛlɔi hu, ejaakɛ mɔ kome ji nyɛ-Hiɛnyiɛlɔ, Kristo lɛ.”​—Mat. 23:10.

⁶ Yesu baa ehe shi ni eesumɔ ni eye ebua wɔ. Naa nɔ ko ni ewie ni tsɔɔ nakai. Ewie akɛ: “Nyɛbaa miŋɔɔ, nyɛ mɛi fɛɛ ni eetɔ nyɛ, ni nyɛtere jatsui ni tsii, ni mahã nyɛhe ajɔ nyɛ. Nyɛwóa mikɔɔŋtso lɛ nyɛfɔ̃a nyɛnɔ, ni nyɛkasea mi, ejaakɛ mihe jɔ, ni mibaa mihe shi yɛ mitsuiŋ, ni nyɛhe baajɔ nyɛ. Ejaakɛ mikɔɔŋtso lɛ teremɔ waaa, ni mijatsu lɛ etsiii.” (Mat. 11:28-30) Yesu Kristo, ni ji “tookwɛlɔ kpakpa” lɛ, kaseɔ Yehowa Nyɔŋmɔ, ni ji e-Tsɛ ni yɔɔ ŋwɛi lɛ, ni ekwɛɔ Kristofoi asafo lɛ nɔ yɛ mlijɔlɛ mli yɛ gbɛ ni baahã wɔhe ajɔ wɔ lɛ nɔ.​—Yoh. 10:11; Yes. 40:11.

⁷ Yɛ klɛŋklɛŋ wolo ni Paulo ŋma eyahã Korintobii lɛ mli lɛ, etsɔɔ nɔ kroko ni Yesu Kristo tsuɔ. Ewie akɛ: “Esa akɛ eye maŋtsɛ kɛyashi Nyɔŋmɔ kɛ ehenyɛlɔi lɛ fɛɛ baawo enajiashi. Shi kɛ́ akɛ nibii fɛɛ wo eshishi lɛ, no sɛɛ lɛ, Bi lɛ diɛŋtsɛ hu kɛ ehe baawo mɔ ni kɛ nibii fɛɛ wo eshishi lɛ shishi, koni Nyɔŋmɔ atsɔ nibii fɛɛ ahã mɔ fɛɛ mɔ.” (1 Kor. 15:25, 28) Yesu ji mɔ ni Nyɔŋmɔ bɔ klɛŋklɛŋ, ni dani ebaaba shikpɔŋ lɛ nɔ lɛ, esɔmɔ akɛ “ŋaalɔ kpanaa” kɛhã Nyɔŋmɔ. (Abɛi 8:22-31) Be ni Nyɔŋmɔ tsu Yesu kɛba shikpɔŋ lɛ nɔ lɛ, efee Nyɔŋmɔ suɔmɔnaa nii be fɛɛ be. Efi shi yɛ kaa ni fe fɛɛ lɛ mli, ni eye e-Tsɛ anɔkwa kɛtee gbele mli. (Yoh. 4:34; 15:10) Akɛni Nyɔŋmɔ Bi lɛ ye anɔkwa aahu kɛtee gbele mli hewɔ lɛ, Nyɔŋmɔ tee lɛ shi kɛtee ŋwɛi, ni ehã lɛ hegbɛ koni ebatsɔ ŋwɛi Maŋtsɛyeli lɛ nɔ Maŋtsɛ. (Bɔf. 2:32-36) Nyɔŋmɔ kɛ nitsumɔ ko ni yɔɔ nyam ewo Kristo Yesu, ni ji wɔ-Maŋtsɛ lɛ, dɛŋ akɛ, enyiɛ ŋwɛibɔfoi akpei nyɔŋmai abɔ ni yɔɔ hewalɛ lɛ ahiɛ koni amɛjie adesa nɔyelii yɛ shikpɔŋ lɛ nɔ ni amɛhã efɔŋfeemɔ fɛɛ sɛɛ afo kwraa. (Abɛi 2:21, 22; 2 Tes. 1:6-9; Kpo. 19:11-21; 20:1-3) Kɛkɛ lɛ, Nyɔŋmɔ Maŋtsɛyeli ni yɔɔ ŋwɛi lɛ, ni Kristo ji enɔ Maŋtsɛ lɛ, baafee nɔyeli kome pɛ ni baaye shikpɔŋ muu lɛ fɛɛ nɔ.​—Kpo. 11:15.

⁸ Yesu Kristo, mɔ ni wɔnyiɛ enanemaahei asɛɛ kpaakpa lɛ eye emuu. Akɛ nitsumɔ ewo edɛŋ koni ekwɛ wɔnɔ, ni ejɛɔ suɔmɔ mli efeɔ nakai. Kɛ́ wɔmiitao wɔná gbɛjianɔtoo nɛɛ he sɛɛ lɛ, mɛni ehe miihia ni wɔfee? Esa akɛ wɔye Yehowa anɔkwa daa ni wɔkɛ Yehowa asafo ni yaa hiɛ lɛ anyiɛ pɛpɛɛpɛ.

⁹ Kristofoi ni hi shi yɛ blema lɛ fee ekome kɛtsu nii yɛ Kristo yitsoyeli lɛ shishi, ni amɛkɛ gbɛtsɔɔmɔi ni etsɔ mumɔ krɔŋkrɔŋ lɛ nɔ ekɛhã amɛ lɛ tsu nii. Enɛ hãa wɔnaa akɛ, amɛba amɛhe shi amɛhã Kristo. (Bɔf. 15:12-21) Yɛ sane ko ni bɔfo Paulo ŋma lɛ mli lɛ, ewie ekomefeemɔ ni yɔɔ Kristofoi ni afɔ amɛ mu lɛ ateŋ lɛ he akɛ: “Be mli ni wɔwieɔ anɔkwale lɛ, nyɛhãa wɔtsɔa suɔmɔ nɔ wɔdaraa yɛ nibii fɛɛ amli kɛbotea mɔ ni ji yitso lɛ, ni ji Kristo lɛ mli. Lɛ emli gbɔmɔtso lɛ henii lɛ fɛɛ tsɔɔ talɔ fɛɛ talɔ nɔ ekɛ nɔ ni he hiaa hãa, ni amɛtsaratsaraa amɛhe jogbaŋŋ, ni amɛfeɔ ekome kɛtsuɔ nii. Kɛ́ gbɔmɔtso lɛ henii lɛ eko fɛɛ eko miitsu nii jogbaŋŋ lɛ, ehãa gbɔmɔtso lɛ daa, be mli ni gbɔmɔtso lɛ tswaa ehe emaa shi yɛ suɔmɔ mli lɛ.”​—Efe. 4:15, 16.

¹⁰ Kɛ́ asafo lɛ mli bii lɛ ateŋ mɔ fɛɛ mɔ kɛ mɛi krokomɛi ni yɔɔ asafo lɛ mli lɛ fee ekome kɛtsu nii yɛ Kristo yitsoyeli lɛ shishi lɛ, ehãa asafo lɛ shwereɔ, ni suɔmɔ hiɔ amɛteŋ, ejaakɛ suɔmɔ ji “kpãa ni feɔ mɛi ekome yɛ gbɛ ni eye emuu nɔ.”​—Kol. 3:14; 1 Kor. 12:14-26.

¹¹ Nibii ni Biblia lɛ wie akɛ ebaaya nɔ yɛ wɔgbii nɛɛ amli lɛ miiba mli, ni emaa nɔ mi akɛ kɛjɛ afi 1914 kɛbaa nɛɛ, awó Yesu Kristo akɛ Nyɔŋmɔ Maŋtsɛyeli lɛ nɔ Maŋtsɛ. Amrɔ nɛɛ, eeye maŋtsɛ yɛ ehenyɛlɔi lɛ ateŋ. (Lala 2:1-12; 110:1, 2) Te enɛ baasa mɛi ni yɔɔ shikpɔŋ lɛ nɔ amrɔ nɛɛ ahe ehã tɛŋŋ? Etsɛŋ, Yesu baakpãtã ehenyɛlɔi lɛ ahiɛ kɛtsɔɔ akɛ eji maŋtsɛmɛi a-Maŋtsɛ kɛ nuŋtsɔmɛi a-Nuŋtsɔ. (Kpo. 11:15; 12:10; 19:16) No sɛɛ lɛ, Yehowa baaye shi ni ewo be ni adesai tse atua yɛ Eden lɛ nɔ. No ji, ebaakpɔ̃ mɛi ni enáa amɛhe miishɛɛ lɛ, ni ji mɛi ni yɔɔ Kristo ninejurɔ nɔ lɛ. (Mat. 25:34) Eŋɔɔ wɔnaa waa akɛ wɔbana nɔ ni Kristo tsuɔ yɛ Nyɔŋmɔ asafo lɛ mli! Nyɛhãa wɔ kɛ wɔnyɛmimɛi ni yɔɔ jeŋ fɛɛ lɛ afea ekome kɛtsua shiɛmɔ nitsumɔ lɛ yɛ naagbee gbii nɛɛ amli, yɛ Kristo ni ji wɔ-Hiɛnyiɛlɔ lɛ shishi.