Bɔ Ni Ato Asafo Lɛ He Gbɛjianɔ Kɛ Bɔ Ni Akwɛɔ Nɔ

BE NI bɔfo Paulo ŋma wolo kɛmaje Korintobii lɛ klɛŋklɛŋ kwraa lɛ, ewie Nyɔŋmɔ he anɔkwale sane ko ni he hiaa. Ewie akɛ: “Nyɔŋmɔ lɛ, ejeee basabasafeemɔ Nyɔŋmɔ, shi moŋ toiŋjɔlɛ Nyɔŋmɔ ni.” No sɛɛ be ni ewieɔ asafoŋ kpeei ahe lɛ, ekɛɛ: “Nyɛfea nibii fɛɛ bɔ ni yɔɔ fɛo, kɛ agbɛnɛ hu, yɛ gbɛjianɔtoo naa.”​—1 Kor. 14:33, 40.

² Yɛ nakai wolo lɛ klɛŋklɛŋ yitso lɛ mli lɛ, bɔfo Paulo wie etsɔɔ Korinto asafo lɛ mli bii lɛ yɛ naataamɔi ni yɔɔ amɛteŋ lɛ hewɔ. Paulo wo nyɛmimɛi lɛ hewalɛ koni ‘amɛnaabu afee ekome’ ni ‘amɛjwɛŋmɔ kɛ amɛsusumɔ afee ekome kɛwula shi.’ (1 Kor. 1:10, 11) No sɛɛ lɛ, ewo amɛ ŋaa yɛ saji komɛi ni hãaa ekomefeemɔ ahi asafo lɛ mli lɛ ahe. Ekɛ adesa gbɔmɔtso lɛ fee nɔkwɛmɔnɔ kɛtsɔɔ bɔ ni ehe miihia ni amɛfee ekome kɛtsu yiŋtoo kome he nii. Ewo Kristofoi asafo lɛ mli bii lɛ fɛɛ hewalɛ koni amɛjɛ suɔmɔ mli amɛye amɛbua amɛhe, ekɔɔɔ he eko nɔ ni amɛtsuɔ yɛ asafo lɛ mli. (1 Kor. 12:12-26) Akɛni asafo lɛ mli bii lɛ baafee ekome kɛtsu yiŋtoo kome he nii hewɔ lɛ, ebaabi ni ato amɛhe gbɛjianɔ.

³ Shi te abaato Kristofoi asafo lɛ he gbɛjianɔ ahã tɛŋŋ? Namɔ baato he gbɛjianɔ? Te abaakwɛ asafo lɛ nɔ ahã tɛŋŋ? Namɛi akɛ sɔɔmɔ hegbɛi baawo amɛdɛŋ? Kɛ́ wɔhã saji ni yɔɔ Biblia lɛ mli lɛ tsɔɔ wɔ gbɛ lɛ, wɔbaaná sanebimɔi nɛɛ ahetoo ni yɔɔ faŋŋ.​—1 Kor. 4:6.

⁴ Ato Kristofoi asafo lɛ shishi yɛ afi 33 Ŋ.B. Pentekoste gbi lɛ nɔ. Mɛni wɔbaanyɛ wɔkase yɛ blema Kristofoi asafo lɛ he? Ato he gbɛjianɔ ni akwɛ nɔ yɛ teokrase gbɛ nɔ, ni tsɔɔ akɛ, Nyɔŋmɔ ji mɔ ni ye nɔ. (Yɛ Greek mli lɛ, the·osʹ shishi ji, “nyɔŋmɔ,” ni kraʹtos shishi ji, “nɔyeli.”) Akɛ Greek wiemɔkulibii enyɔ nɛɛ tsu nii yɛ 1 Petro 5:10, 11 lɛ. Nɔ ni tee nɔ yɛ Yerusalem aaafee afii 2,000 ni eho nɛ, ni mumɔ krɔŋkrɔŋ lɛ hã abɔ he amaniɛ yɛ Ŋmalɛ lɛ mli lɛ feɔ lɛ faŋŋ akɛ, Nyɔŋmɔ ji mɔ ni to asafo ni emli bii ji Kristofoi ni afɔ amɛ mu lɛ shishi. (Bɔf. 2:1-47) Asafo nɛɛ ji Nyɔŋmɔ tsũ, eshĩa. (1 Kor. 3:9; Efe. 2:19) Ato Kristofoi asafo ni yɔɔ ŋmɛnɛ lɛ he gbɛjianɔ tamɔ bɔ ni ato blema Kristofoi asafo lɛ he gbɛjianɔ ahã lɛ pɛpɛɛpɛ, ni bɔ ni atsu saji ahe nii ahã yɛ blema Kristofoi asafo lɛ mli lɛ, nakai pɛpɛɛpɛ atsuɔ saji ahe nii ahãa yɛ asafo ni yɔɔ ŋmɛnɛ lɛ hu mli.

⁵ Akɛ mɛi aaafee 120 ni to blema Kristofoi asafo lɛ shishi. Amɛji klɛŋklɛŋ mɛi ni afɔse mumɔ krɔŋkrɔŋ lɛ ashwie amɛnɔ, tamɔ bɔ ni agba yɛ Yoel 2:28, 29 lɛ. (Bɔf. 2:16-18) Shi nakai gbi lɛ nɔŋŋ nɔ lɛ, abaptisi mɛi aaafee 3,000 hu yɛ nu mli, ni amɛbafata asafo ni emli bii ji mɛi ni afɔ amɛ mu lɛ he. Amɛhe Kristo lɛ he sane lɛ amɛye, ni “amɛtee nɔ amɛhiɛ bɔfoi lɛ atsɔɔmɔ lɛ mli.” No sɛɛ lɛ, daa gbi lɛ, “Yehowa kɛ mɛi ni aahere amɛyiwala lɛ fataa amɛhe.”​—Bɔf. 2:41, 42, 47.

⁶ Asafo ni yɔɔ Yerusalem lɛ shwere waa, aahu akɛ, Yudafoi lɛ asɔfonukpa lɛ ye ŋkɔmɔ akɛ, kaselɔi lɛ ehã amɛtsɔɔmɔ lɛ eyi Yerusalem obɔ. Yudafoi osɔfoi lɛ ateŋ mɛi babaoo batsɔmɔ kaselɔi yɛ Yerusalem, ni amɛ hu amɛbatsɔmɔ asafo lɛ mli bii.​—Bɔf. 5:27, 28; 6:7.

⁷ Yesu kɛɛ: “Nyɛbaatsɔmɔ midasefoi yɛ Yerusalem, kɛ Yudea kɛ Samaria fɛɛ, kɛ agbɛnɛ hu, kɛyashi shikpɔŋ lɛ nɔ hei ni jekɛ waa lɛ.” (Bɔf. 1:8) Ni nakai eba lɛ yɛ Stefano gbele sɛɛ. Yiwaa kpele ko te shi yɛ Yerusalem, ni kaselɔi ni yɔɔ jɛmɛ lɛ gbɛ amɛshwã Yudea kɛ Samaria fɛɛ. Shi amɛtee nɔ amɛjaje sane kpakpa lɛ yɛ he fɛɛ he ni amɛtee, ni amɛfee mɛi Kristo kaselɔi. Samariabii komɛi po batsɔmɔ kaselɔi. (Bɔf. 8:1-13) Sɛɛ mli lɛ, ashiɛ sane kpakpa lɛ atsɔɔ jeŋmajiaŋbii ni afolɔko amɛ ketia lɛ, ni ewo yibii kpakpai. (Bɔf. 10:1-48) Shiɛmɔ nitsumɔ nɛɛ hewɔ lɛ, mɛi babaoo batsɔmɔ kaselɔi, ni ato asafoi hei ashishi yɛ maji krokomɛi anɔ afata asafo ni yɔɔ Yerusalem lɛ he.​—Bɔf. 11:19-21; 14:21-23.

⁸ Mɛɛ gbɛjianɔ ato koni asafo hee fɛɛ asafo hee ni ato shishi lɛ anyiɛ teokrase gbɛjianɔtoo sɛɛ ni akwɛ nɔ bɔ ni sa Nyɔŋmɔ hiɛ? Nyɔŋmɔ tsɔ emumɔ lɛ nɔ ehã ato gbɛjianɔ koni ahole tookwɛlɔi ni sɔmɔɔ yɛ Kristo shishi koni amɛkwɛ tooku lɛ. Klɛŋklɛŋ be ni Paulo kɛ Barnaba fã gbɛ kɛtee maŋsɛɛ koni amɛyashiɛ lɛ, amɛhole asafoŋ onukpai yɛ asafoi ni amɛyasara lɛ amli. (Bɔf. 14:23) Biblia ŋmalɔ Luka bɔ kpee ko ni Paulo kɛ Efeso asafo lɛ mli onukpai lɛ fee lɛ he amaniɛ. Paulo kɛɛ amɛ akɛ: “Nyɛhiɛ ahia nyɛ diɛŋtsɛ nyɛhe nɔ kɛ tooku lɛ hu fɛɛ nɔ, mɛi ateŋ ni mumɔ krɔŋkrɔŋ lɛ ehole nyɛ nɔkwɛlɔi yɛ lɛ, koni tamɔ bɔ ni tookwɛlɔ kwɛɔ etoi lɛ, nyɛ hu nyɛkwɛa Nyɔŋmɔ asafo lɛ ni ekɛ lɛ diɛŋtsɛ e-Bi lɛ lá hé lɛ.” (Bɔf. 20:17, 28) Hii nɛɛ shɛ Ŋmalɛ naa taomɔ nii lɛ ahe, ni no hewɔ lɛ, amɛsa jogbaŋŋ akɛ mɛi ni sɔmɔɔ akɛ asafoŋ onukpai. (1 Tim. 3:1-7) Ahã Paulo naanyo nitsulɔ Tito hegbɛ ni ehole asafoŋ onukpai yɛ asafoi ni yɔɔ Kreta lɛ amli.​—Tito 1:5.

⁹ Be ni atoɔ asafoi hei krokomɛi ashishi lɛ, bɔfoi lɛ kɛ asafoŋ onukpai lɛ ni yɔɔ Yerusalem lɛ tee nɔ amɛsɔmɔ akɛ mɛi ni kwɛɔ blema Kristofoi asafo lɛ, ni ji Kristofoi ni yɔɔ je lɛŋ fɛɛ lɛ nɔ. Amɛsɔmɔ akɛ Kristofoi asafo lɛ gbɛtsɔɔmɔ kuu.

¹⁰ Yɛ wolo ko ni Paulo ŋma eyahã asafo ni yɔɔ Efeso lɛ mli lɛ, ewie akɛ, kɛ́ Kristofoi asafo lɛ hã Nyɔŋmɔ mumɔ lɛ tsɔɔ amɛ gbɛ, ni amɛba amɛhe shi amɛwo Yesu Kristo, ni ji asafo lɛ Yitso lɛ, shishi lɛ, ekomefeemɔ baahi asafo lɛ mli be fɛɛ be. Paulo wo nyɛmimɛi ni yɔɔ Efeso lɛ hewalɛ ni amɛba amɛhe shi, ‘amɛhiɛ ekomefeemɔ ni amɛtsɔ mumɔ lɛ nɔ amɛná lɛ mli,’ ni amɛkɛ amɛhe ahi shi yɛ toiŋjɔlɛ mli. (Efe. 4:1-6) No sɛɛ lɛ, etsɛ wiemɔi ni yɔɔ Lala 68:18 lɛ yisɛɛ, ni ehã amɛle akɛ, ekɔɔ gbɛjianɔ ni Yehowa eto koni hii ni shɛɔ Ŋmalɛ naa taomɔ nii lɛ ahe lɛ asɔmɔ akɛ bɔfoi, gbalɔi, sane kpakpa shiɛlɔi, tookwɛlɔi, kɛ tsɔɔlɔi, koni amɛkɛye amɛbua asafo lɛ he. Hii nɛɛ, ni ji nikeenii ni jɛ Yehowa ŋɔɔ lɛ, baatswa asafo muu lɛ fɛɛ amɛma shi, koni asafo lɛ ada kɛmɔ shi yɛ mumɔŋ, ni esa Nyɔŋmɔ hiɛ.​—Efe. 4:7-16.

¹¹ Bɔ ni ato asafoi lɛ ahe gbɛjianɔ yɛ bɔfoi lɛ abeiaŋ lɛ, nakai nɔŋŋ ato Yehowa Odasefoi asafoi ni yɔɔ ŋmɛnɛ lɛ ahe gbɛjianɔ. Yehowa Odasefoi asafoi ni yɔɔ jeŋ fɛɛ lɛ efee ekome, tamɔ asafo kome mli bii, ni “gwantɛŋi krokomɛi” lɛ yeɔ amɛbuaa mɛi ni afɔ amɛ mu lɛ. (Zak. 8:23) Yesu Kristo ji mɔ ni ehã amɛfee ekome lɛ. Eye shi ni ewo akɛ ekɛ ekaselɔi ni afɔ amɛ mu lɛ baahi shi “gbii lɛ fɛɛ kɛyashi je lɛ naagbee gbii lɛ amli” lɛ nɔ. Asafo lɛ miishwere. Mɛi fɛɛ ni batsɔmɔɔ asafo nɛɛ mli bii lɛ heɔ Nyɔŋmɔ sane kpakpa lɛ amɛyeɔ, amɛjɔɔ amɛwala nɔ kwraa amɛhãa Yehowa, ni amɛhãa abaptisiɔ amɛ akɛ Yesu kaselɔi. (Mat. 28:19, 20; Mar. 1:14; Bɔf. 2:41) Amɛkpɛlɛɔ nɔ akɛ, Yesu Kristo, ni ji “tookwɛlɔ kpakpa lɛ,” ji tooku lɛ loo asafo lɛ Yitso, ni mɛi ni afɔ amɛ mu lɛ kɛ “gwantɛŋi krokomɛi” lɛ ni feɔ tooku lɛ. (Yoh. 10:14, 16; Efe. 1:22, 23) Kpɛlɛmɔ ni “tooku kome” nɛɛ kpɛlɛɔ nɔ akɛ Kristo ji asafo lɛ Yitso lɛ, kɛ agbɛnɛ hu, bɔ ni amɛbaa amɛhe shi amɛhãa “nyɔŋ anɔkwafo kɛ hiɛshikalɔ” ni Kristo ehala akɛ ekwɛ asafo lɛ nɔ lɛ hewɔ lɛ, ekomefeemɔ yɛ amɛteŋ. Nyɛhãa wɔyaa nɔ wɔkɛ wɔhiɛ afɔ̃a nyɔŋ lɛ nɔ, ni wɔhe wɔye kɛ wɔtsui fɛɛ akɛ, enɔ Kristo tsɔɔ ekwɛɔ asafo lɛ nɔ ŋmɛnɛ.​—Mat. 24:45.

¹² Asafo lɛ eto nitsumɔ kui komɛi ashishi koni anyɛ akɛ mumɔŋ niyenii ahã yɛ be ni sa mli, ni agbɛnɛ hu, anyɛ ashiɛ Maŋtsɛyeli lɛ he sane kpakpa lɛ dani naagbee lɛ aba. Ato nitsumɔ kui nɛɛ ashishi yɛ mla ni yɔɔ maŋ fɛɛ maŋ mli lɛ naa, ni nitsumɔ kui nɛɛ feɔ ekome kɛtsuɔ nii. Nitsumɔ kui nɛɛ yeɔ amɛbuaa ni ashiɛɔ sane kpakpa lɛ yɛ jeŋ fɛɛ.

¹³ Be fɛɛ be ni abaato nitsumɔhe nine ko shishi yɛ maŋ ko nɔ lɛ, ahalaa asafoŋ onukpai etɛ loo nɔ ni fa fe nakai koni amɛsɔmɔ akɛ Nitsumɔhe Nine Ajinafoi Akuu ni amɛkwɛ nitsumɔ ni yaa nɔ yɛ nakai maŋ lɛ loo maji ni yɔɔ nakai nitsumɔhe nine lɛ shishi lɛ anɔ. Ajinafoi akuu nɛɛ ateŋ mɔ kome sɔmɔɔ akɛ Nitsumɔhe Nine Ajinafoi Akuu lɛ saji ahe gbɛjianɔtolɔ.

¹⁴ Ajaraa asafoi ni yɔɔ nitsumɔhe nine lɛ shishi lɛ awoɔ kpokpai amli. Kpokpaa fɛɛ kpokpaa kɛ asafoi abɔ ni yɔɔ mli. Bei pii lɛ, hei ni asafoi lɛ yɔɔ, wiemɔ ni amɛwieɔ, kɛ asafoi abɔ ni yɔɔ nitsumɔhe nine lɛ shishi lɛ, ni tsɔɔ asafoi abɔ ni baahi kpokpaa ko mli. Ahalaa kpokpaa nɔkwɛlɔi koni amɛsɔmɔ asafoi ni yɔɔ kpokpai lɛ amli lɛ. Nitsumɔhe nine lɛ hãa kpokpaa nɔkwɛlɔi lɛ gbɛtsɔɔmɔi yɛ bɔ ni esa akɛ amɛtsu amɛnitsumɔ lɛ amɛhã lɛ he.

¹⁵ Asafoi lɛ kpɛlɛɔ bɔ ni Yehowa etsɔɔ akɛ esa akɛ ato ewebii lɛ ahe gbɛjianɔ ahã lɛ nɔ, ni wɔ fɛɛ wɔnáa enɛ he sɛɛ. Akɛ nɔkwɛmɔnɔ lɛ, amɛkpɛlɛɔ nɔ akɛ, esa akɛ ahole asafoŋ onukpai koni amɛkwɛ nitsumɔhe niji lɛ, kpokpai lɛ, kɛ asafoi lɛ anɔ. Agbɛnɛ hu, amɛkwɛɔ nyɔŋ anɔkwafo kɛ hiɛshikalɔ lɛ gbɛ kɛhã mumɔŋ niyenii yɛ be ni sa mli. Nyɔŋ anɔkwafo lɛ hu baa ehe shi ehãa Kristo, ni ji asafo lɛ Yitso lɛ yɛ nɔ fɛɛ nɔ mli, ekɛ Biblia mli shishitoo mlai tsuɔ nii, ni ehãa mumɔ krɔŋkrɔŋ lɛ tsɔɔ lɛ gbɛ. Awie yɛ blema Kristofoi lɛ ahe akɛ: “Anɔkwa, asafoi lɛ tee nɔ amɛhe wa yɛ hemɔkɛyeli lɛ mli ni amɛyibɔ lɛ tee nɔ efa daa gbi.” (Bɔf. 16:5) Kɛ́ wɔ fɛɛ wɔfee ekome kɛtsu nii lɛ, nakai nɔŋŋ ebaaba lɛ yɛ wɔ hu wɔgbɛfaŋ.