NIKASEMƆ 42
Mɛni Biblia Lɛ Kɛɔ Yɛ Oshijayeli Kɛ Gbalashihilɛ He?
Yɛ maji komɛi anɔ lɛ, mɛi komɛi susuɔ akɛ ja mɔ ko ebote gbãla mli dani ebaaná miishɛɛ. Kɛ̃lɛ, jeee gbalashihilɛ mli bii fɛɛ yɔɔ miishɛɛ, ni jeee oshijafoi fɛɛ bɛ miishɛɛ. Anɔkwale lɛ ji akɛ, Biblia lɛ kɛɛ oshijayeli kɛ gbalashihilɛ fɛɛ ji Yehowa dɛŋ nikeenii.
1. Mɛni ji oshijayeli he sɛɛnamɔi komɛi?
Biblia lɛ kɛɔ akɛ: “Mɔ fɛɛ mɔ ni boteɔ gbalashihilɛ mli lɛ baaná he sɛɛ, shi mɔ fɛɛ mɔ ni boteee gbalashihilɛ mli lɛ baaná he sɛɛ fe lɛ.” (Kanemɔ 1 Korintobii 7:32, 33, 38.) Mɛɛ gbɛi anɔ oshijafoi náa amɛshijayeli lɛ he sɛɛ fe bɔ ni gbalashihilɛ mli bii náa amɛgbalashihilɛ lɛ he sɛɛ? Kristofonyo ni ji oshija lɛ tsuuu hefatalɔ ko hiamɔ nii ahe nii ehãaa lɛ. No hewɔ lɛ, bei pii lɛ, oshijafoi yɛ hegbɛ ni amɛfeɔ nibii pii ni nɔ ko etsĩii amɛ gbɛ. Akɛ nɔkwɛmɔnɔ lɛ, amɛteŋ mɛi komɛi nyɛɔ amɛtsuɔ babaoo amɛhãa Yehowa yɛ gbɛi ni nɔ bɛ anɔ, tamɔ gbɛ ni afãa ayashiɛɔ sane kpakpa lɛ yɛ maŋ kroko nɔ lɛ nɛkɛ. Nɔ ni fe fɛɛ lɛ, amɛbaanyɛ amɛkɛ bei babaoo afee nibii ni baahã amɛtsi amɛbɛŋkɛ Yehowa waa.
2. Kɛ́ nuu kɛ yoo bote gbãla mli yɛ gbɛ kpakpa nɔ lɛ, mɛni ji ehe sɛɛnamɔi komɛi?
Sɛɛnamɔi komɛi yɛ gbalashihilɛ hu he, tamɔ eji yɛ oshijayeli gbɛfaŋ lɛ nɔŋŋ. Biblia lɛ kɛɛ “mɛi enyɔ hi fe mɔ kome.” (Jajelɔ 4:9) Enɛ ji anɔkwale, titri lɛ, kɛ́ Kristofoi kɛ Biblia mli shishitoo mlai tsu nii yɛ amɛgbãla lɛ mli. Nuu kɛ yoo ni boteɔ gbãla mli yɛ gbɛ kpakpa nɔ lɛ, woɔ shi akɛ amɛbaasumɔ amɛhe, amɛbaajie bulɛ kpo amɛtsɔɔ amɛhe, ni amɛbaajie hedɔɔ kpo hu amɛtsɔɔ amɛhe. Enɛ hewɔ lɛ, bei pii lɛ, amɛnuɔ he akɛ amɛyɛ shweshweeshwe fe nuu kɛ yoo ni hiɔ shi tamɔ wu kɛ ŋa shi amɛboteko gbãla mli lɛ. Ni kɛ́ amɛfɔ́ bii lɛ, bii lɛ hu baanu he akɛ amɛyɛ shweshweeshwe.
3. Te Yehowa naa gbalashihilɛ ehãa tɛŋŋ?
Be ni Yehowa to klɛŋklɛŋ gbãla lɛ he gbɛjianɔ lɛ, ekɛɛ: “Nuu baashi epapa kɛ emami ni ebaakpɛtɛ eŋa he.” (1 Mose 2:24) Yehowa sumɔɔ ni wu kɛ ŋa asumɔ amɛhe ni amɛkpɛtɛ amɛhe, bei abɔ ni amɛyɔɔ wala mli lɛ. Ja amɛteŋ mɔ kome eyabɔ ajwamaŋ dani eŋmɛɔ gbɛ ni atse gbãla. Kɛ́ eba lɛ nakai lɛ, Yehowa ehã mɔ ni eyabɔko ajwamaŋ lɛ hegbɛ ni ekpɛ eyiŋ kɛji ebaatse gbãla loo etseŋ.a (Mateo 19:9) Yehowa eŋmɛɛɛ Kristofoi gbɛ ni amɛná gbalashihilɛ mli hefatalɔ ni fe ekome.—1 Timoteo 3:2.
KASEMƆ PII OFATA HE
Kɛ́ oji oshija jio, obote gbãla mli jio lɛ, obaana bɔ ni obaafee oná miishɛɛ ni ohã Yehowa hu aná miishɛɛ.
4. Okɛ oshija ni oji lɛ atsu nii jogbaŋŋ
Yesu na oshijayeli akɛ nikeenii. (Mateo 19:11, 12) Nyɛkanea Mateo 4:23 lɛ, ni nyɛsusua sanebimɔ nɛɛ he:
Mɛɛ gbɛ nɔ Yesu kɛ oshija ni eji lɛ tsu nii kɛsɔmɔ e-Tsɛ lɛ ni ekɛwa mɛi krokomɛi hu?
Kɛ́ Kristofoi kɛ amɛshijayeli lɛ tsu nii tamɔ Yesu fee lɛ, amɛbaaná miishɛɛ. Jiemɔ VIDIO lɛ, ni nyɛsusua sanebimɔ ni nyiɛ sɛɛ nɛɛ he.
Mɛɛ nibii ni hãa mɔ tsui nyɔɔ emli Kristofoi ni ji oshijafoi lɛ baanyɛ afee?
Ani ole akɛ . . .
Biblia lɛ etsɔko afii pɔtɛɛ ni kɛ́ mɔ ko ye lɛ ebaanyɛ ebote gbãla mli? Shi ewoɔ hewalɛ ni mɔ amɛ kɛyashi “ejeee gbekɛ dɔŋŋ” dani ebote gbãla mli, ejaakɛ kɛ́ mɔ ko bote gbãla mli be ni eji gbekɛ [be ni ebɔlɛnamɔ henumɔi amli wa waa] lɛ, ewaaa akɛ ebaakpɛ yiŋ komɛi ni ejaaa.—1 Korintobii 7:36.
5. Halamɔ ohefatalɔ yɛ hiɛshikamɔ mli
Yiŋ ni he hiaa waa ni ehe baahia ni okpɛ lɛ eko ji, yiŋ ni obaakpɛ yɛ mɔ ni okɛbaabote gbãla mli lɛ he. Nyɛkanea Mateo 19:4-6, 9 lɛ, ni nyɛsusua sanebimɔ nɛɛ he:
Mɛni hewɔ esaaa akɛ Kristofonyo ko yeɔ ehe oyai kɛboteɔ gbãla mli lɛ?
Biblia lɛ baanyɛ awa bo ni ole sui ni esa akɛ hefatalɔ kpakpa aná. Nɔ ni he hiaa fe fɛɛ ji, ni obaahala hefatalɔ ni sumɔɔ Yehowa.b Nyɛkanea 1 Korintobii 7:39 kɛ 2 Korintobii 6:14 lɛ. No sɛɛ lɛ, nyɛsusua sanebimɔi nɛɛ ahe:
Mɛni hewɔ esa akɛ wɔkɛ Kristofonyo pɛ abote gbãla mli lɛ?
Kɛ́ wɔkɛ mɔ ko ni sumɔɔɔ Yehowa bote gbãla mli lɛ, kɛ́ okwɛ lɛ, te Yehowa baanu he ehã tɛŋŋ?
Kɛ́ akɛ kooloi enyɔ ni esoro amɛ kwraa wo kɔɔŋtso kome shishi lɛ, amɛbaana nɔ. Nakai nɔŋŋ kɛ́ Kristofonyo ko kɛ mɔ ko ni sumɔɔɔ Yehowa bote gbãla mli lɛ, ebaaná naagbai pii
6. Naa gbalashihilɛ taakɛ Yehowa naa lɛ lɛ
Yɛ blema Israel lɛ, hii komɛi fó amɛ pɛ amɛnɔ mli ni amɛshwie amɛŋamɛi. Nyɛkanea Maleaki 2:13, 14, 16 lɛ, ni nyɛsusua sanebimɔ nɛɛ he:
Mɛni hewɔ Yehowa nyɛɔ gbãla ni atseɔ yɛ gbɛ ni ejaaa nɔ lɛ?
Kɛ́ wu ko loo ŋa ko yabɔ ajwamaŋ loo etse gbãla lɛ, ehãa mɔ ni ebɔko ajwamaŋ lɛ kɛ amɛbii lɛ naa nɔ waa
Jiemɔ VIDIO lɛ, ni nyɛsusua sanebimɔ nɛɛ he.
Kɛ́ okɛ mɔ ko ni jáaa Yehowa ebote gbãla mli momo lɛ, mɛni obaanyɛ ofee koni nyɛgbãla asɔ?
7. Okɛ Yehowa mlai ni kɔɔ gbalashihilɛ he lɛ atsu nii
Ekolɛ, ja mɔ emia ehiɛ waa dani ebaanyɛ ekɛ Yehowa mlai ni kɔɔ gbalashihilɛ he lɛ atsu nii.c Shi Yehowa jɔɔ mɛi ni kɛtsuɔ nii lɛ. Jiemɔ VIDIO lɛ.
Nyɛkanea Hebribii 13:4 lɛ, ni nyɛsusua sanebimɔi nɛɛ ahe:
Kɛ́ okwɛ lɛ, jwɛŋmɔ yɛ Yehowa mlai ni kɔɔ gbalashihilɛ he lɛ amli? Kɛ́ okɛɛ ‘Hɛɛ’ lɛ, mɛni hewɔ, ni kɛ́ okɛɛ ‘Dabi’ hu lɛ, mɛni hewɔ?
Yɛ maji pii anɔ lɛ, amralofoi lɛ biɔ ni akɛ gbalashihilɛ kɛ gbalatsemɔ awo wolo nɔ, hewɔ lɛ, Yehowa kpaa gbɛ akɛ Kristofoi baaye mlai nɛɛ anɔ. Nyɛkanea Tito 3:1 lɛ, ni nyɛsusua sanebimɔ nɛɛ he:
Kɛ́ obote gbãla mli lɛ, ani ofee lɛ bɔ ni kɛ omaŋ lɛ mla kpãa gbee?
EKOLƐ MƆ KO BAABI BO AKƐ: “Mɛni hewɔ esa akɛ abote gbãla mli doo? Bɛ tɔmɔ ko bɛ he akɛ nuu kɛ yoo baahi shi tamɔ wu kɛ ŋa be ni amɛboteko gbãla mli?”
Mɛni obaakɛɛ lɛ?
EMLI OTI
Oshijayeli kɛ gbalashihilɛ fɛɛ ji Yehowa dɛŋ nikeenii. Kɛ́ mɔ ko ebote gbãla mli jio, eboteko mli jio lɛ, kɛ́ efee Yehowa suɔmɔnaa nii lɛ etsui baanyɔ emli ni ebaaná miishɛɛ hu.
Mɛni Okase?
Te mɔ ko aaafee tɛŋŋ ekɛ oshija ni eji lɛ atsu nii jogbaŋŋ lɛ?
Mɛni hewɔ Biblia lɛ kɛɛ esa akɛ wɔkɛ Kristofonyo pɛ abote gbãla mli lɛ?
Mɛni Biblia lɛ kɛɛ no pɛ nɔ mɔ ko baanyɛ edamɔ etse gbãla?
EHE SAJI KROKOMƐI
Kɛ́ akɛɛ abote gbãla mli “yɛ Nuŋtsɔ lɛ mli pɛ” lɛ, te atsɔɔ tɛŋŋ?
Vidioi enyɔ nɛɛ baawa bo ni okpɛ yiŋ kpakpai yɛ nyiɛmɔ ni tsɔɔ gbalashihilɛ hiɛ kɛ gbalashihilɛ he.
Obaana nɔ hewɔ ni nyɛmi nuu ko nuɔ he akɛ nibii ni Yehowa ehã lɛ lɛ fa kwraa fe nɔ fɛɛ nɔ ni eŋmɛɛ he lɛ.
Mɛɛ nibii komɛi esa akɛ mɔ ko asusu he dani ekpɛ eyiŋ akɛ ebaatse gbãla loo ebaatse ehe kɛje ehefatalɔ he?
“Wo ‘Nɔ Ni Nyɔŋmɔ Kɛtsa Lɛ’ Hiɛ Nyam” (Buu-Mɔɔ, December 2018)
a Kɛ́ ootao he ni atseɔ kɛjeɔ ŋa loo wu he be ni ŋa lɛ loo wu lɛ ebɔko ajwamaŋ lɛ he saji lɛ, kwɛmɔ Saji Krokomɛi 4.
b Yɛ maji komɛi anɔ lɛ, fɔlɔi ji mɛi ni halaa hefatalɔi amɛhãa amɛbihii loo amɛbiyei. Yɛ shihilɛ ni tamɔ nɛkɛ mli lɛ, nɔ klɛŋklɛŋ ni fɔlɔi ni yɔɔ suɔmɔ lɛ susuɔ he ji, kɛji mɔ lɛ sumɔɔ Yehowa lo, shi jeee kɛji eyɛ shika loo ehiɛ gbɛnaa wulu ko.
c Kɛ́ okɛ mɔ ko yɛ ni nyɛboteko gbãla mli lɛ, bo obaakpɛ oyiŋ kɛji obaashi lɛ loo okɛ lɛ baabote gbãla mli.