Saji Krokomɛi

1. Namɔ Ji Babilon Kpeteŋkpele Lɛ?

2. Mɛɛ Be Tuuntu Mesia Lɛ Baajie Ehe Kpo?

3. Helatsamɔ Gbɛi Ni Akɛ Lá Tsuɔ Nii Yɛ Mli

4. He Ni Atseɔ Kɛjeɔ Ŋa Loo Wu He

5. Gbijurɔyelii

6. Tsɛŋemɔ Helai

7. Saji Ni Kɔɔ Nitsumɔ Kɛ Mla He

1. Namɔ Ji Babilon Kpeteŋkpele Lɛ?

Te feɔ tɛŋŋ wɔleɔ akɛ “Babilon Kpeteŋkpele lɛ” feɔ amale jamɔi fɛɛ ahe mfoniri lɛ? (Kpojiemɔ 17:5) Naa otii komɛi ni tsɔɔ nakai:

• Eyɛ je lɛŋ he fɛɛ he. Biblia lɛ kɛɛ Babilon Kpeteŋkpele lɛ ta “gbɔmɛi akui kɛ jeŋmaji” anɔ. Agbɛnɛ hu, ‘eyeɔ shikpɔŋ lɛ nɔ maŋtsɛmɛi lɛ anɔ.’​—Kpojiemɔ 17:15, 18.

• Ejeee nɔyeli ko loo jarayeli kuu ko. Be ni akpãtã ehiɛ lɛ, “shikpɔŋ lɛ nɔ maŋtsɛmɛi” lɛ kɛ “jarayelɔi” lɛ fó lɛ.​—Kpojiemɔ 18:9, 15.

• Efiteɔ Nyɔŋmɔ gbɛ́i. Atsɛɔ lɛ ashawo, ejaakɛ ekɛ nɔyelɔi ni yɔɔ je lɛ mli lɛ bɔɔ waa koni ena shika loo nibii krokomɛi. (Kpojiemɔ 17:1, 2) Elakaa mɛi ni jɛ jeŋmaji lɛ fɛɛ amli lɛ. Ni ehã agbe mɛi babaoo.​—Kpojiemɔ 18:23, 24.

Kuu osɛɛ kɛya nikasemɔ 13 oti 6

2. Mɛɛ Be Tuuntu Mesia Lɛ Baajie Ehe Kpo?

Biblia lɛ gba akɛ, otsii 69 baaho dani Mesia lɛ baaba.—Kanemɔ Daniel 9:25.

• Mɛɛ be otsii 69 lɛ je shishi? Yɛ afi 455 D.Ŋ.B. Nakai beiaŋ Amralo Nehemia yashɛ Yerusalem ‘koni etswa maŋ lɛ ni ema lɛ ekoŋŋ’ lɛ.​—Daniel 9:25; Nehemia 2:1, 5-8.

• Bei enyiɛ otsii 69 lɛ feɔ? Yɛ Biblia gbalɛi komɛi amli lɛ, gbi kome damɔ shi kɛhã afi. (4 Mose 14:34; Ezekiel 4:6) Belɛ, otsi fɛɛ otsi damɔ shi kɛhã afii kpawo. Yɛ gbalɛ nɛɛ mli lɛ, otsii 69 lɛ baafee afii 483 (69 x 7).

• Mɛɛ be otsii 69 lɛ ba naagbee? Kɛ́ wɔkane afii 483 kɛjɛ afi 455 D.Ŋ.B. lɛ, ekɛ wɔ baa afi 29 Ŋ.B.a Nakai afi lɛ tuuntu abaptisi Yesu ni ebatsɔ Mesia lɛ!​—Luka 3:1, 2, 21, 22.

Kuu osɛɛ kɛya nikasemɔ 15 oti 5

3. Helatsamɔ Gbɛi Ni Akɛ Lá Tsuɔ Nii Yɛ Mli

Anɔkwa Kristofoi heee lá, ni amɛjieee amɛlá amɛhãaa mɛi krokomɛi hu. Shi ayɛ helatsamɔ gbɛi ni akɛ mɔ diɛŋtsɛ lá tsuɔ nii yɛ mli. Gbɛi nɛɛ ekomɛi yɛ ni esaaa kɛhãaa anɔkwa Kristofoi. Akɛ nɔkwɛmɔnɔ lɛ, mɛi hãa ajieɔ amɛlá amaa shi dani afeɔ amɛ opireshɛŋ. Shi anɔkwa Kristofoi efeee nakai.​—5 Mose 15:23.

Shi helatsamɔ gbɛi komɛi yɛ ni anɔkwa Kristofoi komɛi kpɛlɛɔ nɔ. Gbɛi nɛɛ ekomɛi ji, mɔ diɛŋtsɛ lá ni akwɛɔ mli kɛkwɛɔ kɛji eeye hela ko lo, hemodialysis, hemodilution, cell-salvage loo heart-lung bypass tsɔne ni akɛtsuɔ nii yɛ helatsamɔ mli.b Esa akɛ Kristofonyo fɛɛ Kristofonyo akpɛ eyiŋ yɛ bɔ ni ebaasumɔ ni akɛ lɛ diɛŋtsɛ elá atsu nii ahã kɛji aafee lɛ opireshɛŋ, aafee lɛ medical test ko, loo aatsɔ helatsamɔ gbɛ ko nɔ aatsa lɛ lɛ he. Ekolɛ srɔto fioo baahi bɔ ni dɔkitafoi komɛi kɛ helatsamɔ gbɛi nɛɛ tsuɔ nii amɛhãa lɛ yɛ dɔkitafoi krokomɛi anɔ he. No hewɔ lɛ, dani Kristofonyo ko baakpɛlɛ ni afee lɛ opireshɛŋ, afee lɛ medical test ko, loo atsɔ helatsamɔ gbɛ ko nɔ atsa lɛ lɛ, esa akɛ ebi bɔ ni akɛ lɛ diɛŋtsɛ elá baatsu nii ahã lɛ mli jogbaŋŋ. Bi ohe saji ni nyiɛ sɛɛ nɛɛ:

• Kɛ́ abaahã milá lɛ eko aje migbɔmɔtso lɛ mli kɛyatsɔ nɔ kroko mli, ni ekolɛ abaasa lá ni hoɔ lɛ naa be fioo ko dani eba migbɔmɔtso lɛ mli ekoŋŋ hu? Ani mihenilee baaŋmɛ mi gbɛ ni mana lá ni eje mimli lɛ akɛ ejeko mimli diɛŋtsɛ, ní no hewɔ lɛ, ehe ebahiaŋ ni atsi ‘ashwie shikpɔŋ’?​—5 Mose 12:23, 24.

• Kɛ́ akɛ helatsamɔ gbɛ ko miitsu nii yɛ migbɛfaŋ, ni agbala milá lɛ eko, afee nɔ ko yɛ he (akɛ nɔkwɛmɔnɔ lɛ, akɛ tsofa futu), ni asaa akɛhã mi ekoŋŋ loo akɛkpa he ko ni agba yɛ migbɔmɔtso lɛ he hu? Ani egbaŋ mihenilee ni mikɛ Biblia lɛ etsɔse lɛ lɛ naa?

Kuu osɛɛ kɛya nikasemɔ 39 oti 3

4. He Ni Atseɔ Kɛjeɔ Ŋa Loo Wu He

Nyɔŋmɔ Wiemɔ lɛ kɛɔ wu kɛ eŋa akɛ, esaaa akɛ amɛtseɔ amɛhe kɛjeɔ amɛhe, ni ehã efee faŋŋ akɛ, kɛ́ wu loo ŋa ko fee nakai lɛ, ebɛ hegbɛ akɛ eboteɔ gbãla mli ekoŋŋ. (1 Korintobii 7:10, 11) Shi ekolɛ, Kristofonyo ko baashwie eyiŋ kɛji esa akɛ etse ehe kɛje eŋa loo ewu he yɛ shihilɛi komɛi amli.

• Kɛ́ ewu je gbɛ ekwɛɛɛ weku lɛ: Enɛ tsɔɔ akɛ, wu lɛ ekpoo akɛ ebaahã weku lɛ amɛheloonaa hiamɔ nii, ni no hewɔ lɛ, weku lɛ náaa shihilɛ mli hiamɔ nibii.​—1 Timoteo 5:8.

• Kɛ́ aafee lɛ niseniianii: Enɛ tsɔɔ akɛ, aayi lɛ loo aawa lɛ yi aahu akɛ, eenu he akɛ egbɔmɔtsoŋ hewalɛnamɔ loo ewala yɛ oshãra mli.​—Galatiabii 5:19-21.

• Kɛ́ ehefatalɔ lɛ miifee nɔ fɛɛ nɔ ni ebaanyɛ koni efite ekɛ Yehowa teŋ wekukpaa lɛ: Enɛ tsɔɔ akɛ, wu lɛ loo ŋa lɛ miifee nɔ fɛɛ nɔ, koni ehefatalɔ lɛ akanyɛ esɔmɔ Yehowa.​—Bɔfoi 5:29.

Kuu osɛɛ kɛya nikasemɔ 42 oti 3

5. Gbijurɔyelii

Kristofoi yeee gbii juji ni esaaa Yehowa hiɛ. Shi yɛ shihilɛi komɛi ni kɔɔ gbii juji nɛɛ ahe lɛ amli lɛ, Kristofonyo fɛɛ Kristofonyo baadamɔ lɛ diɛŋtsɛ ehenilee ni ekɛ Biblia lɛ etsɔse lɛ lɛ nɔ ekpɛ eyiŋ yɛ bɔ ni ebaafee enii ehã lɛ he. Naa shihilɛi nɛɛ ekomɛi.

• Kɛ́ mɔ ko ŋa bo ŋamɔ ni aŋaa kɛ́ aaye gbi jurɔ ko. Obaanyɛ okɛɛ kɛkɛ akɛ, “Oyiwaladɔŋŋ.” Kɛ́ mɔ lɛ bi bo nɔ hewɔ ni oyeee nakai gbi jurɔ lɛ, obaanyɛ ogbála mli ohã lɛ.

• Ohefatalɔ ni jeee Yehowa Odasefonyo lɛ fɔ̃ bo nine ni okɛ ewekumɛi ayata shi kɛye nii be ni aaye gbi jurɔ ko. Kɛ́ ohenilee ŋmɛ bo gbɛ akɛ oya lɛ, obaanyɛ ogbála mli ohã ohefatalɔ lɛ akɛ, kɛ́ wɔŋjamɔ nifeemɔi komɛi baaya nɔ yɛ jɛmɛ lɛ, okɛ ohe woŋ mli.

• Onitsumɔtsɛ miike bo nii be ni aaye gbi jurɔ ko. Ani esa akɛ okpoo? Jeee doo. Ani gbi jurɔ lɛ hewɔ ekeɔ bo nii lɛ? Aloo bɔ ni ehiɛ esɔ onitsumɔ lɛ hewɔ ekeɔ bo nii lɛ?

• Mɔ ko ke bo nii be ni aaye gbi jurɔ ko. Ekolɛ ebaakɛɛ bo akɛ: “Mile akɛ oyeee gbi jurɔ lɛ eko, shi mikɛmiike bo kɛkɛ.” Ekolɛ mɔ lɛ miitao efee bo ejurɔ kɛkɛ. Shi, ani nɔ ko yɛ ni hãa onuɔ he akɛ mɔ lɛ miitao eka ohemɔkɛyeli lɛ, loo eetao ni bo hu oye gbi jurɔ lɛ eko? Kɛ́ osusu enɛ he sɛɛ lɛ, bo diɛŋtsɛ obaakpɛ oyiŋ kɛji obaahe nikeenii lɛ loo oheŋ. Wɔmiisumɔ ni wɔhiɛ henilee kpakpa, ni wɔye Yehowa anɔkwa yɛ yiŋ fɛɛ yiŋ ni wɔkpɛɔ lɛ mli.​—Bɔfoi 23:1.

Kuu osɛɛ kɛya nikasemɔ 44 oti 1

6. Tsɛŋemɔ Helai

Akɛni wɔsumɔɔ wɔnyɛmi gbɔmɔ hewɔ lɛ, wɔkwɛɔ jogbaŋŋ koni wɔkɛ hela ko akatsɛŋe mɛi krokomɛi. Hewɔ lɛ, kɛ́ wɔle akɛ wɔmiiye tsɛŋemɔ hela ko loo efeɔ wɔ akɛ wɔná eko lɛ, wɔkwɛɔ jogbaŋŋ koni wɔkɛkatsɛŋe mɛi krokomɛi. Wɔfeɔ nakai ejaakɛ Biblia lɛ efã wɔ akɛ: “Suɔmɔ onyɛmi gbɔmɔ tamɔ bo diɛŋtsɛ ohe.”​—Romabii 13:8-10.

Mɛɛ gbɛ nɔ mɔ ko ni miiye tsɛŋemɔ hela ko lɛ baanyɛ ajie suɔmɔ nɛɛ kpo? Esaaa akɛ efeɔ nibii ni mɛi feɔ kɛtsɔɔ akɛ amɛyɛ mɔ ko he miishɛɛ lɛ eko, tamɔ fuamɔ kɛ mɔnaashɔmɔ nɛkɛ. Esaaa akɛ emli fuɔ kɛ́ mɛi efɔ̃ɔɔ lɛ nine kɛbaaa amɛshĩa akɛni amɛmiitao amɛbu amɛweku lɛ he lɛ hewɔ. Ni dani abaabaptisi lɛ lɛ, esa akɛ ehã onukpai akuu lɛ saji ahe gbɛjianɔtolɔ lɛ ale akɛ eeeye tsɛŋemɔ hela ko, koni anyɛ ato gbɛjianɔ kɛbu mɛi krokomɛi hu ni abaabaptisi amɛ lɛ ahe. Esa akɛ mɔ ko ni etsɔ shihilɛ ko ni baanyɛ ahã ená tsɛŋemɔ hela ko lɛ mli lɛ ayakwɛ elá mli dani ekɛ mɔ ko aje nyiɛmɔ ni tsɔɔ gbalashihilɛ hiɛ lɛ shishi. Kɛ́ ofee nakai lɛ, etsɔɔ akɛ osusuɔ mɛi krokomɛi ahe, ejaakɛ ‘otaoɔ nibii ni hi hã mɛi krokomɛi, shi jeee nibii ni hi hã bo pɛ.’​—Filipibii 2:4.

Kuu osɛɛ kɛya nikasemɔ 56 oti 2

7. Saji Ni Kɔɔ Nitsumɔ Kɛ Mla He

Kɛ́ wɔŋmala kpaŋmɔi fɛɛ ni kɔɔ shika kɛ nitsumɔ he wɔshwie shi​—kɛ́ eji kpaŋmɔ ni wɔkɛ Kristofonyo kroko ekpaŋ po lɛ​—wɔkɛ naagbai pii ekpeŋ. (Yeremia 32:9-12) Loloolo lɛ, bei komɛi lɛ, naagbai bibii baanyɛ aba Kristofoi ateŋ yɛ shika loo saji krokomɛi hewɔ. Kɛ́ nɔ ko ni tamɔ nakai ba lɛ, esa akɛ amɛtsu he nii oya yɛ toiŋjɔlɛ mli, yɛ amɛ pɛ amɛteŋ.

Shi, kɛ́ saji ni yɔɔ hiɛdɔɔ tamɔ mɔgbɛ́ifitemɔ loo ojotswaa he saji ba lɛ, te esa akɛ wɔtsu amɛhe nii wɔhã tɛŋŋ? (Kanemɔ Mateo 18:15-17.) Yesu tsɔɔ gbɛi etɛ ni abaanyɛ atsɔ nɔ atsu amɛhe nii, ni nomɛi nɛ:

1. Bɔɔ mɔdɛŋ otsu he nii yɛ nyɛ pɛ nyɛteŋ.—Kwɛmɔ kuku 15 lɛ.

2. Kɛ́ no yeee omanye lɛ, bi asafoŋbii lɛ ateŋ mɔ kome loo mɛi enyɔ ni edara yɛ mumɔŋ ni amɛkɛ bo aya.—Kwɛmɔ kuku 16 lɛ.

3. Kɛ́ loloolo lɛ, nyɛnyɛɛɛ nyɛtsu sane lɛ he nii lɛ, no dani obaanyɛ okɛya asafoŋ onukpai lɛ ahiɛ.—Kwɛmɔ kuku 17 lɛ.

Yɛ shihilɛi pii amli lɛ, esaaa akɛ wɔkɛ wɔnyɛmimɛi lɛ yaa kɔɔtu, ejaakɛ kɛ́ wɔfee nakai lɛ, ebaahã awie Yehowa kɛ asafo lɛ he efɔŋ. (1 Korintobii 6:1-8) Shi saji komɛi yɛ ni ekolɛ yɛ mla naa lɛ, ebaabi ni akɛya kɔɔtu. Saji nɛɛ ekomɛi ji: gbalatsemɔ, fɔlɔ ni esa akɛ bi ahi eŋɔɔ, shika ni awoɔ ahãa hefatalɔ ni akɛ lɛ bɛ dɔŋŋ, inshuɔransi ni esa akɛ awo ahã mɔ ko, nitsumɔhe loo mɔ ko ni emɔ nyɔmɔ ni enyɛɛɛ ewo, loo shamaŋsheo he saji. Kɛ́ Kristofonyo ko tsɔ nɛkɛ gbɛ nɔ etsu sane lɛ he nii bɔ ni kɛ toiŋjɔlɛ baaba lɛ, ekuko ehiɛ efɔ̃ko Biblia lɛ mli ŋaawoo lɛ nɔ.

Kɛ́ eji esha ni yɔɔ hiɛdɔɔ tamɔ kabonaatoo, gbekɛ ni afeɔ lɛ niseniianii, mɔtutuamɔ, nɔ ko wulu ni ayajuɔ, loo gbɔmɔgbee lɛ, no lɛ, kɛ́ Kristofonyo ko kɛ sane lɛ yahã amralofoi lɛ, no hu ekuko ehiɛ efɔ̃ko Biblia lɛ mli ŋaawoo lɛ nɔ.

Kuu osɛɛ kɛya nikasemɔ 56 oti 3