Ehe Miihia Ni Ahala Gbɛ Ni Ja Lɛ Bianɛ

 1, 2. (a) Mɛɛ jeŋ nɛkɛ Biblia lɛ gbaa akɛ etsɛŋ ni ebaaba yɛ jamɔ gbɛfaŋ? (b) Mɛni hewɔ enɛ ji be ni he hiaa ni mɔ ko kɛaaato eyiŋ yɛ gbɛ ni enyiɛ nɔ lɛ he?

¹ TAAKƐ anɔkwalei ni aŋmala ashwie shi lɛ tsɔɔ lɛ, adesai ateŋ mɛi ni fá jaaa Ŋmalɛ Krɔŋkrɔŋ ni ji Biblia lɛ Nyɔŋmɔ lɛ. Shikpɔŋ lɛ nɔ bii ateŋ mɛi ni fa efeko nakai da yɛ yinɔsane ni eho lɛ fɛɛ mli. Kristendom Jamɔ ni Ato He Gbɛjianɔ lɛ kɛɛɔ akɛ amɛfeɔ nakai. Jamɔ gbɛjianɔtooi fioo ko hu yɛ ni amɛhu amɛbaakɛɛ akɛ amɛhu amɛfeɔ nakai kɛ hoo lɛ kɛtsɔ Biblia lɛ fa ko ni amɛmɔɔ mli lɛ nɔ. Shi kɛji akɛ akpata mɛi fɛɛ ni kɛɛɔ akɛ amɛhiɛ jamɔ ko mli nɛɛ ahiɛ aloo anyɛ amɛ nɔ ni amɛŋmɛɛ jamɔ mli ni amɛhiɛ lɛ he lɛ, ani enɛ kɛ sɔrɔto ko aaaba? Aloo mɛɛ jeŋ nɛkɛ enɛ aaaji? Ebaatsɔ jeŋ ko ni Biblia lɛ gbaa akɛ etsɛŋ ni ebaaba lɛ, jeŋ ko ni leee Nyɔŋmɔ, ni ebaahi shi be fioo ko.

² Shi, ebaaja “nibii agbɛjianɔtoo nɛɛ nyɔŋmɔ” lɛ yɛ faŋŋ mli fe be fɛɛ, ni Biblia lɛ ni haa ayooɔ nɛkɛ “nyɔŋmɔ” nɛɛ kɛɛɔ akɛ Iɛ ji Yehowa henyɛlɔ kpeteŋkpele lɛ, Satan Abonsam. (2 Kor. 4:​4, NW) Yesu Kristo tsɛ lɛ “lumɔ” aloo “je nɛŋ lumɔ.” (Yoh. 12:​31; 16:11) Beni etsɛŋ kwraa aaanyɛ jeŋ muu lɛ fɛɛ nɔ kɛya apasa “nyɔŋmɔ” nɛɛ jamɔ mli lɛ, mɛni ji nɔ ni gbɔmɔ ni susumɔ ko ni tamɔ nɛkɛ lɛ haa ehe jɔ̃ɔ lɛ ni efeɔ lɛ naakpɛɛ lɛ baafee? Mɛni eeenyɛ ekɛ jamɔŋ hewalɛ ni eyɔɔ lɛ afee? Ŋaawoo lɛ ji akɛ, enɛ ji be ni hiaa waa ni esa akɛ ato yiŋ yɛ he!

 3. Be enyiɛ Yehowa tsɔ hiɛ ekɛto eyiŋ dani etsu eyiŋtoo lɛ he nii eshi jeŋmaji lɛ?

³ Yoel 3:14 tsɔ hiɛ egba akɛ: “Asafoi, asafoi yɛ atɛŋbuu jɔɔ lɛ mli; ejaakɛ Yehowa gbi lɛ eshɛ shi eta, yɛ etɛŋbuu jɔɔ lɛ mli.” The Living Bible lɛ haa Yoel 3:14 shishinumɔ lɛ mli feɔ faŋŋ akɛ: “Asafoi, asafoi miimɛ yɛ jɔɔ ni aaabu amɛ atɛŋ aha hiɛkpatamɔ lɛ mli! Ejaakɛ Nuŋtsɔ lɛ Gbi lɛ ebɛŋkɛ, yɛ Atɛŋbuu Jɔɔ lɛ mli.” The Bible in Living English ni Byington fee lɛ tsɛɔ lɛ “Yiŋtoo Jɔɔ.” Gbalɔ Yoel gbe ewolo lɛ ŋmaa lɛ naa aaafee afi 820 D.Ŋ.B. Enɛ fe afii 200 dani Yehowa tsu “eyiŋtoo” lɛ he nii diɛŋtsɛ yɛ muji ni hi shi yɛ nakai blema bei lɛ amli lɛ anɔ.

 4. (a) Mɛɛ gbɛ nɔ Yehowa to nɔkwɛmɔ nɔ kpakpa efɔ shi yɛ enɛ gbɛfaŋ? (b) Mɛɛ gbɛ nɔ Baruk, Neria bi lɛ, to okadi kpakpa efɔ shi ehawɔ yɛ?

⁴ Yehowa to okadi kpakpa efɔ shi ehawɔ. Etsɔ hiɛ eto eyiŋ ni ejaje etsɔɔ yɛ faŋŋ mli. Ehe miihia ni wɔteŋ mɔ fɛɛ mɔ, ni ŋmɛnɛ wɔyɔɔ be ni he hiaa tamɔ nakai nɔŋŋ mli lɛ atsɔ hiɛ ato eyiŋ yɛ jeŋ amanehulu ni baa lɛ he. Ni mɔ ko aaana jwɛŋmɔ lɛ akɛ kɛ́ nakai be lɛ shɛ lɛ mɔ ko baanyɛ atsake gbɛ ni enyiɛ nɔ lɛ trukaa ni eto eyiŋ yɛ gbɛ ni ja nɔ ni ekɛ nakai feemɔ lɛ ajo amanehulu ni baa lɛ naa foi lɛ ji oshara ni mɔ kɛ-shishiuɔ lɛ diɛŋtsɛ ehe. Nuu ni fee nɔkwɛmɔ nɔ kpakpa yɛ gbɛ ni ja nɔ afii 18 dani nakai majimaji ateŋ amanehulu ni abɔ lɛ kɔkɔ yɛ he yɛ afi 625 D.Ŋ.B. lɛ ji Baruk, Neria bi lɛ. Afi 625 D.Ŋ.B. lɛ ji Yerusalem ni abu lɛ fɔ lɛ naagbee maŋtsɛ ni ji etɛ lɛ nɔyeli afi ni ji ejwɛ. Egbɛi ji Yehoiakim, Yosia bi lɛ. Ebaye maŋtsɛ yɛ afi 628 D.Ŋ.B., beni Mizraim maŋtsɛ Farao Neko shwie enyɛmi fio, Yehoahaz kɛjɛ sɛi lɛ nɔ ni eŋɔ lɛ kɛtee Mizraim lɛ.

 5, 6 (a) Mɛni hewɔ be mli ni Yehowa wiemɔ tsɔ Yeremia nɔ kɛba Baruk ŋɔɔ lɛ ji afi ko ni mli wa waa lɛ? (b) Taakɛ Yeremia 45:​1-3 tsɔɔ lɛ, te Baruk nuɔ nibii ahe ehaa tɛɛŋ?

⁵ Beni Yehoiakim eye maŋtsɛ afii etɛ akɛ mɔ ni sɔmɔɔ Mizraim lɛ, gbalɔ kɛ osɔfo Yeremia nine shɛ sane ko nɔ kɛjɛ Yehowa ŋɔɔ kɛha ewoloŋmalɔ Baruk Neria bi lɛ. Maŋtsɛ Yehoiakim nɔyeli afi ni ji ejwɛ lɛ be mli nɛ. Eji be ko ni mli wa waa, ejaakɛ nakai afi (625 D.Ŋ.B.) lɛ mli Nebukadnezar, Nabopolazar bi lɛ, bafee Babilon maŋtsɛ. Esani Yerusalem maŋtsɛ lɛ kɛ Jeŋ Nɔyeli ni ji Etɛ lɛ, Babilon nɔyelɔ, mɔni ye Asiria Maŋtsɛyeli lɛ nɔ lɛ akpe agbɛnɛ. Nyɛhaa wɔkanea Yeremia 54:​1-3 yɛ biɛ:

⁶ “Wiemɔ ni gbalɔ Yeremia kɛɛ Baruk Neria bi lɛ, beni eŋma nɛkɛ wiemɔi nɛɛ kɛjɛ Yeremia naa ewo wolo mli yɛ Yuda maŋtsɛ Yehoiakim, Yosia bi lɛ yinɔ afi ni ji ejwɛ lɛ nɔ lɛ nɛ: Bɔni Yehowa, Israel Nyɔŋmɔ lɛ, kɛɛ yɛ bo, Baruk, ohe nɛ: okɛɛ akɛ: Miiha mi he kpoo, ejaakɛ Yehowa eŋɔ awerɛhoo efata mi anɔnaa lɛ he! Etɔmi kɛ ŋtsɔidɔɔmɔ, ni minaaa hejɔɔmɔ!”

 7. Te Baruk baanu Yerusalem shihilɛ ni fiteɔ lɛ he eha tɛɛŋ, ni te ti ni Yeremia tee nɔ etĩ eshɛɛ sane ni kɔɔ hiɛkpatamɔ he lɛ mli lɛ ná Baruk na hewalɛ eha tɛɛŋ?

⁷ Bei abɔ ni Baruk kɛtsɔ hiɛ esɔmɔ akɛ Yeremia woloŋmalɔ lɛ, wɔleee, shi kɛlɛ, kɛ hoo kwraa lɛ eyɛ afii 18 lolo ni ekɛ aaafee gbalɔ lɛ hefatalɔ “Nɔnaa” ni enu he yɛ be mli ni ena Yuda maŋtsɛyeli lɛ shihilɛ ni fiteɔ lɛ, no lɛ wɔnyɛŋ wɔle; shi agbɛnɛ nɔni fata he lɛ, esani eŋma hiɛkpatamɔ ni yɔɔ gbeyei lɛ he shɛɛ sane ni, Yeremia wie efɔ shi. Ebaanu he tamɔ Yeremia yɛ be mli ni nɛkɛ gbalɔ nɛɛ ŋma wolo ni atsɛɔ lɛ akɛ “Yeremia Yaafo” yɛ be mli ni Babilon maŋtsɛ lɛ kpata Yerusalem hiɛ yɛ afi 607 D.Ŋ.B. lɛ.​—Benɛ bɔni Yeremia tee nɔ ekɛ hekamɔ shiɛ hiɛkpatamɔ gbalɛ etɔɔɔ lɛ ha etɔ Baruk.

 8. Mɛni Yehowa jie kpo etsɔɔ Baruk akɛ eji eyiŋtoo, shi mɛni ji nɔni Baruk taoɔ aha lɛ diɛŋtsɛ ehe?

⁸ Baruk kpaaa gbɛ akɛ eeená ‘hejɔɔmɔhe’ eha lɛ diɛŋtsɛ ehe.Yehowa kadi nɔni Baruk susuɔ yɛ emli gbɛ lɛ ni ekɛɛ Yeremia ni ekɛɛ lɛ akɛ: “Bɔni Yehowa kɛɛ nɛ; Naa, nɔni mima lɛ, mi nɔŋŋ mikumɔɔ nɛɛ, ni nɔni mitɛo lɛ, mi nɔŋŋ mifamɔɔ nɛɛ ni nakai ji shikpɔŋ muu lɛ fɛɛ. Ni bo lɛ nii wuji otaoɔ oha ohe. Kaatao!”​—Yer 45:​4, 5.

 9, 10 Mɛni hewɔ esaaa ni Yehowa kpɛlɛɔ “nii wuji” ni Baruk taoɔ aha lɛ diɛŋtsɛ ehe yɛ nakai be Iɛ mli lɛ nɔ lɛ?

⁹ Baruk le nɔ̃ “nii wuji” ni etaoɔ eha ehe lɛ, eyɛ mli akɛ Yehowa egbaaa lɛ enɛɛmɛi ahe sane. Eka shi faŋŋ akɛ Yehowa ekpɛlɛɛɛ nɔ, no hewɔ lɛ esani ekpa enɛɛmɛi ataomɔ. Mɛni hewɔ?

¹⁰ Ejɛ yiŋtoo ni Yehowa taoɔ atsu he nii amrɔ nɔŋŋ lɛ hewɔ. Nakai afi lɛ nɔŋŋ mli ewó Nebukadnezar Babilon maŋtsɛ, ni mɔ nɛ ji mɔ ni eto eyiŋ akɛ ekɛ lɛ baatsu nii akɛ Baruk maŋbii lɛ ahiɛkpatalɔ. Kɛjɛ Maŋtsɛ David gbii lɛ amli (1077-1037 D.Ŋ.B.) titri Yehowa tswa Israel maŋtsɛyeli lɛ ema shi, agbɛnɛ ebaatsɔ Nebukadnezar nɔ ekumɔ nakai odehei anɔyeli lɛ ni ekahi shi dɔŋŋ aahu afii 2,520, aloo kɛyashi 1914 yɛ wɔ afii oha nɛɛ mli. Yɛ sɛɛ mli tɔ̃ɔ yɛ afi 1473 D.Ŋ.B. Yehowa tɛo Israel maŋ lɛ yɛ Shiwoo Shikpɔŋ lɛ nɔ, shi agbɛnɛ, yɛ nɔni fe afii 800 nɛ lɛ, be eshɛ ni ebaafamɔ, Yuda maŋtsɛyeli lɛ shikpɔŋ lɛ baaka shi amaŋfɔ afii 70 ni Yudanyo aloo shiakooloi ko bɛ nɔ, yɛ be mli ni enɔbii lɛ yɔɔ nom mli yɛ Nebukadnezar shikpɔŋ lɛ nɔ lɛ. Yɛ nɛkɛ nibii nɛɛ ni baa nɛɛ hewɔ lɛ, ani eji be ni sa kɛha nuu ni le Yehowa yiŋtoo taakɛ Yeremia ejaje lɛ akɛ etao “nii wuji” eha lɛ diɛŋtsɛ ehe? Dabida kwraa!

11. Yiŋkpakpa ni Baruk aaato Iɛ damɔ mɛni nɔ, ni mɛni hewɔ esa ni efee nakai bianɛ Iɛ?

¹¹ No hewɔ ni Yehowa kɛɛ lɛ akɛ ekpa nɛkɛ nibii nɛɛ atoamɔ lɛ. Mɛni, kɛji akɛ Baruk tee nɔ etao pɛsɛmkunya nibii? ‘Ani eeenyɛ ena tsui ko ni kɛ shɛɛ sane ni akɛ lɛ tsuɔ nii akɛ eŋma efɔ shi ni ejaje etsɔɔ lɛ kpaa gbee? Dabi! Mligbalamɔ baanyiɛ sɛɛ aba lɛ kɛ Yehowa gbalɔ Yeremia teŋ. Kɛji akɛ Baruk miisumɔ ni etsui kɛ Yeremia kɛ esane lɛ akpa gbee lɛ, belɛ esa ni eku pɛsɛmkunya nitaomɔ lɛ naa. Eshwɛ afii 18 lolo dani nakai amanehulu ni agba afɔ shi lɛ baaba, ni kɛlɛ ehe miihia ni Baruk ato eyiŋ. Ewala diɛŋtsɛ ‘esusuma’ damɔ eyiŋ kpakpa ni eeeto lɛ nɔ, hɛɛ, ni ekɛ ehe akpɛtɛ he. Kɛji akɛ esumɔɔɔ ni mligbalamɔ aba amɛteŋ lɛ, belɛ esa ni efee nakai.

12. Taakɛ eji yɛ Baruk gbɛfaŋ lɛ, mɛni hewɔ enɛ ji be ni esa akɛ wɔfɔ̃ɔ “nii wuji” ni wɔɔɔtao wɔha wɔ diɛŋtsɛ wɔhe yɛ je nɛɛ mli lɛ?

¹² Kwɛ bɔni shihilɛ ni mli wa ni Baruk yɔɔ mli lɛ tamɔ wɔ mɛi ni wɔle nɔni yaa nɔ ŋmɛnɛ lɛ nɔ̃ lɛ! Titri lɛ kɛjɛ afi 1914 kɛbaa nɛɛ, ejaakɛ kɛjɛ nakai be lɛ mli Yehowa Odasefoi etee nɔ eshiɛ akɛ mɔ ko ni da fe Nebukadnezar, ŋwɛi Maŋtsɛ Yesu Kristo ni yeɔ nɔ bianɛ lɛ baakpata Kristendom ni akɛ Yerusalem ni yeee anɔkwale lɛ fee he mfoniri yɛ ŋmɛnɛ beaŋ lɛ hiɛ. No hewɔ lɛ efeŋ nɔni sa kwraa akɛ mɔ ko ni kɛɛɔ akɛ ekɛ Nyɔŋmɔ yɔɔ kpaŋmɔ mli lɛ aatao “nii wuji” aha ehe yɛ be mli ni nibii agbɛjianɔtoo nɛɛ kumɔɔ shwieɔ shi nɛɛ mli, yɛ be ni he hiaa tamɔ nɛkɛ mli bianɛ. Ebaatsɔɔ akɛ wɔyooo akɛ “naagbee be” lɛ mli wɔyɔɔ nɛɛ. Ebaatsɔɔ akɛ wɔbɛ hemɔkɛyeli kɛ hiɛnɔkamɔ yɛ bɔni shɛɛ sane ni Yeremia kuu lɛ jajeɔ amɛtsɔɔ Iɛ ja ni eba yɛ ebe mli pɛpɛɛpɛ ni kɔɔ nibii agbɛjianɔtoo momo nɛɛ hiɛkpatamɔ he lɛ mli. Oshara eba gbɔmɔ wala, ‘esusuma’ he! Yehowa baaje enitsumɔ ni ji kuumɔ kɛ faamɔ lɛ shishi agbɛnɛ, kɛtsɔ mɔ ko ni he wa fe Nebukadnezar, Yesu Kristo nɔ. Ani wɔmiisumɔ ni akpata wɔ kɛ mɔ ni akɛ lɛ fee Yerusalem ni ekwa anɔkwale lɛ he mfoniri yɛ ŋmɛnɛ beaŋ, ni ji Kristendom lɛ hiɛ? Kɛ́ jeee nakai lɛ, belɛ esa ni wɔto wɔyiŋ yɛ be mli ni be yɔɔ lolo nɛɛ ni wɔfee nɔni Yehowa kɛɛ Yeremia woloŋmalɔ Baruk akɛ efee lɛ, no ji akɛ ni wɔkpa “nii wuji” ni wɔɔtao yɛ je nɛŋ.

13. Enɛ ji be ni esa akɛ wɔkɛ Yeremia kuu lɛ ana mɛni feemɔ mli gbɛfaŋnɔ?

¹³ Ákɛ aŋkroaŋkroi lɛ, nyɛhaa wɔhia shi bɔni ekɛ shɛɛ sane ni Yeremia kuu lɛ jajeɔ lɛ aakpa gbee. Nyɛhaa wɔtsia wɔhe kɛjɛa pɛsɛmkunya hiɛnyam taomɔ he, ni wɔkasumɔ nibii agbɛjianɔtoo ni abu lɛ fɔ nɛɛ mli nibii ni hoɔ yaa lɛ. Enɛ biɔ ni wɔkɛ Yeremia kuu lɛ ana gbɛfaŋnɔ yɛ kɔkɔbɔɔ ni kɔɔ Yehowa oweletɔɔ gbi ni baa lɛ mli yɛ ekaa naa. Jeee tsui ni mli egbala ji nɔni esa akɛ wɔna bianɛ.​—Yes. 61:​1, 2.

14, 15. (a) Yɛ toiboo ni efee hewɔ lɛ, mɛni Baruk baaana aha lɛ diɛŋtsɛ ehe akɛ “haanɔ”? (b) Ani eba mli nakai?

¹⁴ Mɛɛ nyɔmɔwoo yɔɔ enɛ ni aaafee lɛ mli? Atsɔɔ yɛ nɔni akɛɛ Yeremia akɛ ekɛɛ Baruk lɛ mli: “Ejaakɛ naa, mikɛ efɔŋ aaaba heloo fiaa nɔ, Yehowa kɛɛ, shi maŋɔ osusuma mahao akɛ haanɔ yɛ he fɛɛ he ni oootsɔ.”​—Yer. 45:5b.

¹⁵ Eba nakai diɛŋtsɛ kɛha Baruk. Enɛ tsɔɔ akɛ eto eyiŋ yɛ gbɛ ni ja nɔ ni shishashaomɔ ko kwraa bɛ mli. Anaa enɛ yɛ yitso ko ni tsɔ hiɛ lɛ mli, yɛ Yeremia 43:​5-7 ni gbaa nɔni ba yɛ be mli ni akpata Yerusalem hiɛ yɛ afi 607 D.Ŋ.B. lɛ sɛɛ lɛ. Wɔkaneɔ akɛ: Yudafoi ni eshwɛ yɛ sɛɛ ni sheɔ gbeyei lɛ jo foi kɛjɛ Yuda shikpɔŋ lɛ nɔ kɛtee Mizraim, ni amɛkɛ “Yeremia kɛ Baruk, Neria bi lɛ fɛɛ, ni amɛtee Mizraim shikpɔŋ lɛ nɔ; ejaakɛ amɛbooo Yehowa gbee toi; ni amɛshɛ Takpanes,” yɛ Mizraim kooyigbɛ. Shi yɛ no sɛɛ po lɛ Yeremia tee nɔ egba etsɔɔ nakai Yudafoi toigbolɔi lɛ.​—Yer. 43:​8–44:⁠30.

16. Kɛji akɛ Baruk hi shi aahu kɛyashi Babilon maŋtsɛ lɛ fite Mizraim Iɛ, mɛni ebaakpa gbɛ kɛjɛ nɔyelɔ lɛ dɛŋ?

¹⁶ Nakai Yudafoi ni yeɔ amɛtsui naa sane lɛ nyɛɛɛ alaka Babilonia Jeŋ Hewalɛ ni yeɔ nɔ lɛ yɛ be kakadaŋŋ mli, ejaakɛ be bashɛ ni Nebukadnezar kɛ Mizraim shikpɔŋkuku lɛ fata emaŋtsɛyeli lɛ he. Kɛji akɛ Yeremia kɛ Baruk je mli ni amɛna bɔni Babilon baye nɔ nɛkɛ hu lɛ, amɛbaŋ Nebukadnezar mlifu shishi. Eyɛ nɔni ebaadamɔ nɔ ekai amɛ yɛ mlihilɛ mli. Baruk baaya nɔ ana ‘esusuma’ akɛ haanɔ ni no abu Yehowa shiwoo yɛ Yeremia 45:5 lɛ bem. Kɛkɛ lɛ ebaayoo bɔni nilee yɔɔ mli kɛ bɔni jwɛŋmɔ ni ena lɛ ja akɛ etsi ehe kwraa kɛjɛ gbɛ ni ejaaa ni ekɔ ni ji “nii wuji” ni eeetao eha lɛ diɛŋtsɛ ehe lɛ he lɛ.

17. Mɛɛ sɛnaamɔ wɔɔɔnyɛ wɔna kɛjɛ Baruk toiboo nifeemɔ lɛ mli akɛ nɔkwɛmɔ nɔ kɛha mɛni ni esa akɛ wɔfee?

¹⁷ Ani wɔ hu ŋmɛnɛ wɔɔnyɛ wɔna heshibaa ni Baruk fee eha Yehowa tsɔsemɔ ŋaawoo lɛ he sɛɛ? Hɛɛ! Yɛ bɔni wɔkɛ Yeremia kuu lɛ bɛŋkɛ kpaakpa ha lɛ fɛɛ sɛɛ lɛ, kɛji akɛ wɔtaooo “nii wuji” wɔhaaa wɔhe yɛ nɛkɛ Kristendom naagbee gbii nɛɛ amli lɛ, belɛ nibii ni ŋwɛi ekpɛlɛ nɔ akɛ wɔfee lɛ wɔfeɔ lɛ. Wɔ “susuma,” wɔ wala, akɛ gbɔmɛi lɛ jara wa kwraa fe “nii wuji” ni abu amɛ fɔ ni kɛ yiwalɛ jeŋ ni baaho aya ni baakpala mɔ fɛɛ mɔ he nɔ fɛɛ nɔ kɛyashɛ ‘esusuma’ he lɛ. Ni mɔ ko hiɛ aaaka akɛ “susuma” yɛ ŋwɛi nɔkpɛlɛmɔ shishi lɛ baafee nɔ ko ni jara wa kwraa fe ni wɔɔɔna Kristendom kɛ Jamɔi ni Ato amɛ Gbɛjianɔ lɛ anibii ni laajeɔ lɛ mli ŋɔɔmɔ yɛ be fioo mli.

Loomɔ Ni Wɔɔɔkwa Yɛ “Klante” Lɛ Ni Wɔkɛtsuŋ Nii Hewɔ

18, 19. Mɛni hewɔ amanehulu ni ba Yuda kɛ Yerusalem nɔ lɛ etsɔɔɔ akɛ belɛ Yehowa “oweletɔɔ gbi” Iɛ sɛɛ efo lɛ?

¹⁸ Baruk kɛ Yeremia ye awerɛhoo yɛ Yerusalem fitemɔ lɛ kɛ enɔ bii ni ajieɔ amɛ kɛjɛɔ shikpɔŋ lɛ nɔ lɛ hewɔ. Shi jeŋ maji ni bɛŋkɛ amɛ aloo amɛbɔle amɛ lɛ ná miishɛɛ babaoo yɛ amanehulu ni eba Yehowa kpaŋmɔ webii anɔ nɛɛ hewɔ. (Lala 83:​6-8; 137:⁠7) Shi Mizraim nyaaa he, ejaakɛ eŋɔɔ enaa akɛ eeena Yuda kɛ Yerusalem ni amɛba amɛhe shi amɛha lɛ ni amɛ kɛ lɛ abote kpaŋmɔ mli. Nɔni fata he lɛ Yuda maŋtsɛyeli lɛ etsu nii akɛ shikpɔŋkuku ni ka lɛ kɛ Babilon Jeŋ Hewalɛ ni woɔ amɛhe gbeyei lɛ teŋ. Shi Mizraim efee gbɛi ko ni ehiii kwraa kɛha ehe yɛ Yuda kɛ emaŋtiase, Yerusalem, heni “Yehowa sɛi” ni maŋtsɛmɛi ni jɛ David odehei aweku lɛ mli lɛ taa nɔ yɛ lɛ. Bɔni jeŋ maji lɛ hiɔ Yehowa kpaŋmɔ webii lɛ jogbaŋŋ lɛ jeee nɔ ko ni enaaa, ejaakɛ ekɔɔ ejamɔ he.

¹⁹ No hewɔ lɛ Yehowa “oweletɔɔ gbi” lɛ baaa naagbee yɛ be mli ni ekɛ Babilon maŋtsɛ lɛ tsu nii akɛ edɛŋdade ni ekɛfite Yuda maŋtsɛyeli lɛ. Kpulu ni ji oshara ni baa maŋ nɔ ni akɛto Yuda kɛ Yerusalem naa lɛ ji nɔni sa akɛ akɛtoɔ nakai jeŋ maji ni hiɛ yiŋsusumɔ fɔŋ lɛ naa koni akɛfite amɛ akɛ mɛi ni nyɛɛɔ Yehowa.

20. (a) Yehowa kɛ emumɔ tsirɛ Yeremia ni efee mɛni yɛ nakai jeŋmaji ni yeɔ amɛtsui naa sane lɛ ahe? (b) Ajaje Yeremia 48:10 lɛ atsɔɔ yɛ namɛi ahewɔ, ni ani amɛbatee mɛi ni sa akɛ nakai loomɔ Iɛ baa amɛnɔ?

²⁰ No hewɔ lɛ Yehowa kɛ emumɔ lɛ kanya Yeremia koni emu egbalɛ lɛ naa kɛtsɔ gba ni eeegba butumɔ kpele ni baa mɔji fɔji tamɔ Mizraim, Filistia, Moab, Amon, Edom, Kedar kɛ Elam po nɔ lɛ. (Yer. 46:​1–49:​39; 25:​15-33) Babilonbii lɛ ni yɔɔ Maŋtsɛ Nebukadnezar shishi lɛ ji mɛi ni Yehowa to eyiŋ akɛ ekɛ amɛ baatsu nii koni amɛkɛ ekojomɔ “klante” lɛ atswia nakai jeŋmaji ni teɔ shi woɔ anɔkwa Nyɔŋmɔ lɛ. No hewɔ lɛ nakai tabilɔi oblafoi lɛ ahewɔ Yehowa kɛ emumɔ tsirɛ Yeremia ni ekɛɛ akɛ: “Alomɔ mɔ ni tsuɔ Yehowa nitsumɔ lɛ jabejabe, ni alomɔ mɔ ni tsiɔ eklante lɛ naa kɛjɛɔ lá he!” (Yer. 48:10) Babiloniabii lɛ kɛ amɛ maŋtsɛ Nebukadnezar baaa nakai loomɔ lɛ shishi yɛ tsu ni amɛtsuuu amɛ nitsumɔ ni jɛ Nyɔŋmɔ ŋɔɔ lɛ jogbaŋŋ lɛ hewɔ.

21. (a) Ani “alomɔ” Yeremia kɛ Baruk yɛ “klante” lɛ ni amɛkɛtsuuu nii hewɔ? (b) Ani Yehowa Odasefoi ji mɛi ni baajie Kristendom kɛya, aloo namɛi baafee?

²¹ Shi ŋmɛnɛ wɔ hu? Ani wɔ hu wɔɔɔnyɛ wɔba loomɔ ni tamɔ nakai nɔŋŋ shishi yɛ wɔhiɛ ni wɔɔɔku wɔshwie wɔ nitsumɔ nɔ ni wɔtsĩ wɔ “klante” lɛ naa lɛ hewɔ? Eji anɔkwale, wɔle akɛ Yeremia aloo Baruk kɛ klante diɛŋtsɛ tsuuu nii amɛshiii nakai jeŋmaji henyɛlɔi lɛ. Jeee no ji amɛ nitsumɔ. Akɛ nitsumɔ ni tamɔ enɛ lɛ ha Babilonbii lɛ ni yɔɔ amɛ maŋtsɛ ni awolɛ ehee, Nebukadnezar shishi lɛ adɛŋ. Ákɛ Yeremia kuu ni yɔɔ ŋmɛnɛ lɛ Yehowa Odasefoi kɛ mlifu eteŋ shi amɛwoŋ Kristendom, mɔ ni akɛ lɛ fee Yerusalem ni ekwa anɔkwale lɛ kɛ emaŋtsɛyelihe lɛ he mfoniri lɛ. Be ko mli Kristendom maŋkwramɔŋ hefatalɔi lɛ kɛ gbɛjianɔtooi krokomɛi ni leee Nyɔŋmɔ lɛ baajie lɛ kɛya kwraa ni amɛnaŋ lɛ mɔbɔ, tamɔ bɔ pɛ ni eŋɔɔ jeŋmaji ni kɛ amɛ jeɔ husu lɛ anaa akɛ aaajie Yerusalem kɛ emaŋtsɛyeli lɛ kɛaaya lɛ.

22. Namɛi naŋ mɛi ni baafite Jamɔi ni Ato Amɛ Gbɛjianɔ lɛ hiɛkpatamɔ lɛ mli gbɛfaŋnɔ, ni mɛni baafee mɛnɛɛmɛi asubaŋ yɛ nɛkɛ nɔyeli heei nɛɛ ahe?

²² Shi kɛlɛ, mɛni ji nɔni Kristendom kɛ jeŋ apasa jamɔ maŋtsɛyeli lɛ fãi krokomɛi fɛɛ ni aaabɛɛ amɛ kɛya lɛ aaashi yɛ shikpɔŋ lɛ nɔ? Maŋkwramɔ gbɛjianɔtooi ni leee Nyɔŋmɔ ni amɛaaŋɔ adesai agbɛjianɔtooi fɛɛ ni amɛye nɔ! Amɛaafee nakai kɛ miishɛɛ babaoo akɛ amɛyɛ amɛhe ni Jamɔ ni Ato he Gbɛjianɔ lɛ ekɛɛɛ amɛ nɔni esa akɛ amɛfee dɔŋŋ. (Okɛto Ezekiel, yitso 23 he.) Shi Yeremia kuu lɛ kɛ amɛ hefatalɔi ni sheɔ Nyɔŋmɔ gbeyei lɛ kɛ amɛhe woŋ hiɛnɔkamɔi ni teɔ shi woɔ Nyɔŋmɔ nɛɛ mli, eyɛ mli akɛ mɛnɛɛmɛi baa amɛhe shi yɛ gbɛ ni husu yɔɔ mli nɔ amɛhaa hewalɛi heei ni yeɔ nɔ lɛ akɛ “hegbɛi ni yeɔ nɔ” lɛ moŋ.​—Rom. 13:​1, 2.

23. Mɛni baaha Yehowa “oweletɔɔ gbi” Iɛ mli nɔni eshwɛ lɛ aba mli?

²³ No mli lɛ Yehowa “oweletɔɔ gbi” lɛ eje shishi momo, shi ebaŋ naagbee yɛ Jamɔ ni Ato he Gbɛjianɔ, ni ji jeŋ epasa jamɔ maŋtsɛyeli lɛ hiɛkpatamɔ lɛ mli. Esa ni eya nɔ aahu kɛyashi be mli ni aaafɔse ŋwɛi “oweletɔɔ ashwie mɛi fɛɛ ni teɔ shi woɔ Yehowa jeŋ muu fɛɛ maŋtsɛyeli lɛ anɔ. Shi klɛŋklɛŋ lɛ, amɛbaabɔ mɔdɛŋ ni amɛha Yeremia kuu lɛ kɛ amɛ hefatalɔi anɔkwafoi lɛ aba amɛhe shi amɛha nibii agbɛjianɔtoo nɛɛ ni leee Nyɔŋmɔ lɛ kwraa, tamɔ bɔ pɛ ni Yohanan kɛ esɛɛnyiɛlɔi lɛ ŋɔ Yeremia kɛ Baruk nom ni amɛnyɛ amɛ nɔ kɛtee Mizraim lɛ. Akɛni amɛnyɛŋ amɛyɛ omanye yɛ enɛ mli hewɔ lɛ amɛbaabɔ mɔdɛŋ fɛɛ ni amɛ aaanyɛ ni amɛtutua Yehowa jalɔi ni amɛkpɛlɛɛɛ akɛ amɛŋmɛɛɔ sane he ni amɛkɛsaa lɛ. Amɛbaabɔ mɔdɛŋ ni amɛtutua ni amɛbote Yehowa shwɛɛnii lɛ kɛ amɛnanemɛi ni amɛkɛ amɛhe ekpɛtɛ amɛhe gbagbalii lɛ amumɔŋ paradeiso lɛ taakɛ bɔni asafoi babaoo ni jɛ majimaji ateŋ ni yɔɔ Gog ni jɛ Magog shikpɔŋ lɛ nɔ lɛ fee lɛ. No hewɔ lɛ akɛ ni amɛkɛto amɛyiŋ akɛ jeŋ fɛɛ nɔyeli amɛtaoɔ hewɔ lɛ, amɛbaajie amɛhe kpo akɛ mɛi ni esa akɛ Yehowa fɔseɔ emlifu ni ji oweletɔɔ la lɛ fɛɛ eshwieɔ amɛ nɔ.​—Ezek. 38:​1–39:⁠20.

24. Namɛi baate shi ayatutua amɛ agbɛnɛ, ni ani amɛbaafee mɛi ni sa “loomɔ” yɛ nii ni amɛtsu lɛ jabejabe eloo nɔni esa akɛ amɛtsu ni amɛtsuuu lɛ hewɔ?

²⁴ Kɛkɛ lɛ mɛni? Kpojiemɔ 19:​11-21 tsɔɔ akɛ Yesu Kristo, nɔyelɔ ni da kwraa fe Maŋtsɛ Nebukadnezar lɛ baanyiɛ ŋwɛi asafoi lɛ ahiɛ ni amɛyatutua amɛ. Alomɔŋ amɛ akɛ ni amɛtsuɔ nitsumɔ ni Yehowa kɛwo amɛdɛŋ lɛ jabejabe. Amɛbafeŋ mɛi ni sa loomɔ yɛ kojomɔ “klante” lɛ ni amɛtsiɔ naa kɛjɛɔ henyɛlɔi alá he lɛ hewɔ. (Yer 48:10) Amɛbaatsu Yehowa oweletɔɔ lɛ he nii amɛshi jeŋmaji ni hiɛ wa lɛ. Akɛ anumnyam kunimyeli baajɔɔ amɛ yɛ nakai feemɔ mli, kɛha Yehowa naanɔ bembuu.

25. Esa akɛ Yehowa Odasefoi akase Yeremia yɛ mɛɛ gbɛ nɔ yɛ be mli ni agbala lɛ kɛtee shikpɔŋ ni egba eshiamɛ lɛ nɔ lɛ?

²⁵ Kɛjɛ afi 1914 kɛbaa nɛɛ “naagbee be” lɛŋ wɔyɔɔ nɛɛ. (Dan. 12:⁠4) No hewɔ lɛ agbɛnɛ esa ni Yeremia kuu lɛ kɛ amɛ hefatalɔi ni amɛjɔɔ amɛhe nɔ lɛ agbala je lɛ jwɛŋmɔ kɛba “klante” ni woɔ amɛhe gbeyei lɛ nɔ, dɛŋdade ni Yehowa kɛbaatsu nii ni ekɛkpata hiɛ yɛ “amanehulu kpeteŋkpele” ni baa lɛ mli. (Mat. 24:21) Esa ni amɛkase Yeremia, mɔ ni yɛ be amli ni anyɛ enɔ ni agbala Iɛ kɛjɛ Yuda shikpɔŋ lɛ nɔ kɛtee lɛ, ejaje Maŋtsɛ Nebukadnezar “klante” ni woɔ mɔ he gbeyei lɛ eshi shikpɔŋ ni agbala lɛ kɛtee nɔ lɛ, Mizraim, agbɛnɛ Filistia, Moab, Amon, Edom, kɛ henyɛlɔi ashikpɔji babaoo. Ŋmɛnɛ, dani “amanehulu kpeteŋkpele” lɛ aaafɛ lɛ, amɛyɛ ŋwɛi famɔ shishi akɛ ‘amɛ jaje wɔ Nyɔŋmɔ lɛ oweletɔɔ gbi lɛ’ amɛshi Jamɔi ni Ato he Gbɛjianɔ lɛ kɛ jeŋmaji lɛ fɛɛ. (Yer. 46:​1–49:39) Amɛ “nitsumɔ” ji ni amɛjaje kɔkɔbɔɔ sane lɛ: “Ejaakɛ Yehowa oweletɔɔ gbi ni, kɛ najiaŋtoo afi ni ekɛ aaaye Zion sane eha lɛ.”​—Yes. 34:⁠8.

26, 27. Mɛɛ Yehowa wiemɔi ni ekɛha Ezekiel ákɛ bulɔ esa akɛ Yeremia kuu lɛ abo toi agbɛnɛ?

²⁶ Enɛ kɔɔ Yesu gbalɛ wiemɔi ni yɔɔ Luka 21:22 lɛ ahe akɛ: “Ejaakɛ oweletɔɔ gbii lɛ nɛ, koni nibii fɛɛ ni aŋma lɛ aba mli.” Enɛ ji be titri ni esa akɛ Yeremia kuu lɛ kɛ Yehowa wiemɔ ni ekɛha Ezekiel, mɔ ni je shishi egba yɛ Babilon yɛ afi 613 D.Ŋ.B., afii kpawo dani agbala Yeremia kɛtee Mizraim ni jeee yɛ esuɔmɔnaa lɛ ato amɛtsui mli:

²⁷ “Shi kɛji bulɔ lɛ na klante lɛ miiba, ni ekpaaa tɛtrɛmantrɛ lɛ, ni etswaaa maŋ lɛ adafi, ni klante lɛ ba ni ebaŋɔ amɛteŋ mɔ ko kɛtee lɛ: lɛ lɛ, aŋɔ lɛ kɛtee yɛ enishaianii lɛ ahewɔ moŋ, shi mabi ela shi yɛ bulɔ lɛ dɛŋ. Ni agbɛnɛ bo, gbɔmɔ bi, mitoo bulɔ miha lsrael we lɛ, no hewɔ lɛ bo midaaŋ wiemɔ lɛ toi, ni obɔ amɛ kɔkɔ oha mi. Kɛji mikɛɛ efɔŋfeelɔ akɛ: efɔŋfeelɔ, gbo ooogbo! ni owieee obɔɔɔ efɔŋfeelɔ lɛ kɔkɔ ni eje egbɛ fɔŋ lɛ nɔ lɛ: lɛ efɔŋfeelɔ lɛ eeegbo yɛ enishaianii lɛ hewɔ moŋ, shi mabi ela shi yɛ odɛŋ. Shi kɛji obɔ efɔŋfeelɔ lɛ kɔkɔ ni ekpale kɛjɛ egbɛ lɛ nɔ, ni kɛ́lɛ ekpaleee kɛjɛɛɛ egbɛ lɛ nɔ lɛ: lɛ lɛ eeegbo yɛ enishaianii lɛ hewɔ, shi bo lɛ, ohere osusuma yiwala.”​—Ezek. 33:​6-9; okɛto Ezekiel 9:​2-10 he.

28. Mɛni ji Yeremia kuu lɛ kɛ amɛhefatalɔi lɛ asuɔmɔnaanii yɛ enɛ gbɛfaŋ, shi mɛni baanyɛ aba, ni mɛni ji nɔni enɛ aaatsɔɔ aha amɛ?

²⁸ Yeremia kuu ni yɔɔ ŋmɛnɛ lɛ kɛ amɛhefatalɔi ni kɛ amɛfeɔ ekome lɛ sumɔɔɔ ni amɛyeɔ la he fɔ yɛ nɛkɛ gbɛ nɔ. Shi ebaanyɛ ebalɛ nakai yɛ amɛ gbɛfaŋ. Kɛji akɛ yɛ gbɔmɔ gbeyeishemɔ hewɔ lɛ amɛkpa Yehowa “oweletɔɔ gbi” lɛ “klante” lɛ he kɔkɔ ni amɛaaabɔ gbɔmɛi fɛɛ ni yɛ no hewɔ lɛ amɛtsuuu amɛnitsumɔ lɛ he nii lɛ, amɛbaafee mɛi ni loomɔ nɛɛ sa amɛ. Yɛ amɛ gbɛfaŋ lɛ, ebaatsɔɔ yiwalaheremɔ ni amɛnaŋ yɛ amɛnɔfɔŋfeemɔ lɛ hewɔ.

29. Beni afee ni amɛkwa mɛi ni booo sane toi lɛ asɛɛnyiɛmɔ yɛ be mli ni akpata Jamɔ ni Ato Amɛ Gbɛjianɔ lɛ hiɛ Iɛ sɛɛ lɛ, mɛni esa akɛ mɛi ni taoɔ wala lɛ ahala agbɛnɛ?

²⁹ Kɛji akɛ ŋwɛi oweletɔɔ “klante” nɛɛ tswia Jamɔi ni Ato Amɛ Gbɛjianɔ nɛɛ fɛɛ nii yɛ “amanehulu kpeteŋkpele” ni baa oyayaayai nɛɛ mli lɛ, gbɔmɛi ni boko Yehowa “bulɔ” ni ji Yeremia kuu lɛ toi lɛ baatao abobaahe yɛ maŋkwramɔ gbɛjianɔtoo lɛ masɛi​—ni nɔni baajɛ mli aba nɔŋŋ ji amɛhiɛkpatamɔ yɛ “Nyɔŋmɔ ofe lɛ gbi wulu lɛ nɔ ta, lɛ mli” yɛ Harmagedom (Kpoj. 16:​14, 16) Beni afee ni wɔkwa amɛsɛɛ ni wɔɔnyiɛ kɛya nakai gbɛ lɛ nɔ lɛ, esa ni wɔhala gbɛ ni ja lɛ bianɛ yɛ be mli ni gbɛ ni ja lɛ ka shi lolo nɛɛ. Ehe ebahiaŋ ni mɛi ni taoɔ wala lɛ atsake amɛ gbɛ yɛ enɛ mli.a

[Shishigbɛ niŋmai]

[Mfoniri ni yɔɔ baafa 4]

Nyɔŋmɔ oweletɔɔ gbi lɛ jee be ni mɔ kɛtaoɔ “nii wuji” ehaa ehe

[Mfoniri ni yɔɔ baafa 5]

Wɔkaku wɔhiɛ wɔshwie “Yehowa nitsumɔ” Iɛ nɔ kɔkɔɔkɔ