Nɔ Fɔŋ Ko Ni Miiba Je Lɛŋ Nyɔŋmɔi Ajalɔi Fɛɛ Nɔ
1. Mɛi ni kɛɛɔ akɛ amɛfata jamɔ kuu ko he lɛ ayifalɛ aaafee enyiɛ, ni mɛɛ hewalɛ enɛ aaana yɛ Jeŋmaji lɛ anɔ yɛ be mli ni nakai jamɔŋ maŋtsɛyeli Iɛ aaagbee shi Iɛ?
MƐI NI tsɛɔ amɛhe nyɔŋmɔi ajalɔi ni yɔɔ je lɛ mli lɛ fa naakpa. Afi 1980 World Almanac lɛ tsɔɔ akɛ amɛyifalɛ aaashɛ 2,511,417,750. Mɛi ni fata yibɔ nɛɛ he lɛ ji mɛi ni kɛɛɔ akɛ amɛji Kristofoi, Yudafoi, Moslembii, Budhabii, Hindubii kɛ mɛi krokomɛi. Kɛji akɛ jamɔ maŋtsɛyeli ni mli egbala nɛɛ gbee shi lɛ, ebaafee adesai ni baaje mli lɛ ateŋ mɛi pii anaakpɛɛ. Agba bɔni enɛ baagba amɛ naa aha lɛ yɛ nɛkɛ wiemɔi nɛɛ amli: “Gbee ni kɛɛɔ akɛ: Aŋɔ Babel! lɛ gbɛɛmɔ naa lɛ, shikpɔŋ aaahoso, ni aaanu ebɔlɔmɔ lɛ yɛ jeŋmaji lɛ ateŋ.” “Anuɔ bolɔmɔ kɛjɛɔ Babel, kɛ hiɛkpatamɔ kpeteŋkpele kɛjɛɔ Kaldiabii lɛ ashikpɔŋ lɛ nɔ! Ejaakɛ Yehowa miikpata Babel hiɛ, ni eeha hoofeemɔ sɛɛ miifo yɛ mli; ni amɛ ŋshɔkei lɛ huuɔ tamɔ nui babaoo ni amɛgbee lɛ gbɛɛmɔ naa wa. Ejaakɛ hiɛkpatalɔ aaaba enɔ, eeeba Babel nɔ, ni amɔmɔ emli hii kakalɔi lɛ, akumɔkumɔɔ amɛgãii lɛ amli; ejaakɛ najiaŋtoo Mawu ji Yehowa, ewoɔ nyɔmɔ pɛpɛɛpɛ.”—Yer. 50:46; 51:54-56.
2. (a) Mɛɛ “gbee” nɛkɛ blema Babilon kɛwie etsɔɔ jeŋmaji lɛ, shi agbɛnɛ Iɛ anuuu “egbee” lɛ he dɔŋŋ lo? (b) Kpojiemɔ fee eŋmɛnɛŋmɛnɛ beaŋ fa ni yɔɔ lɛ he mfoniri akɛ eta mɛni nɔ, ni mɛni nɔni eta nɔ lɛ baafee lɛ?
2 Enɛ mlibaa kɛ jeŋ tsakemɔ ko baaba, nɔ̃ ni anuko eko dã. (Yer. 51:2, 60, 64) Ákɛ Jeŋ Hewalɛ ni ji Etɛ yɛ blema yinɔsane mli lɛ, Babilon kɛ nɔyeli “gbee wulu” wie. Shi mɛi ni tutuaa lɛ ni yeɔ enɔ kunim tamɔ ŋshɔkei ni feɔ hoo lɛ “gbee” shiu lɛ yɛ afi 539 D.Ŋ.B. Eŋmɛnɛŋmɛnɛ beaŋ fa ni yɔɔ, Babilon Kpeteŋkpele lɛ kɛ nɔnyɛɛ “gbee” po ni fe nakai ewie. Jeŋ muu lɛ fɛɛ ebo toi. Biblia mli wolo ni ji Kpojiemɔ, yitso 17 lɛ feɔ ehe mfoniri akɛ mɔni ta kooloo ko ni yɔɔ yitsei kpawo ni bɛ mɔbɔnalɛ kwraa nɔ, ni nɛkɛ kooloo ni tsuɔ nɛɛ damɔ shi kɛha jeŋ gbɛjianɔtoo. Eyitsei kpawo lɛ feɔ jeŋ hewalɛi kpawo ni ámɛye nɔ kɛtsara nɔ aahu kɛbashi Ŋleshi kɛ Amɛrika Jeŋ Hewalɛ ni yɔɔ ŋmɛnɛ lɛ he mfoniri. (Kpoj. 17:1-6) Kooloo lɛ akolontoi 10 lɛ “maŋtsɛmɛi nyɔŋma ni.” (Kpoj. 17:12) Akolontoi kpawo nɛɛ mli nɔni gbeɔ yi feɔ etɛ lɛ feɔ Babilonia Maŋtsɛyeli lɛ he mfoniri, ni nɔni ji ejwɛ lɛ feɔ Media kɛ Persia Maŋtsɛyeli lɛ he mfoniri. Jemɔ mli Babilon Kpeteŋkpele lɛ kɛ jeŋ hewalɛi kpawo lɛ fɛɛ ebɔ ajwamaŋ. Ebɔ mɔdɛŋ akɛ eeeta amɛfɛɛ nɔ akɛ amɛ awulaa. Ámɛnu jamɔ mli tsofa ni afutu ni yɔɔ eshika kpulu lɛ mli lɛ. Kɛ́ amɛnɔ ni eta lɛ tɔ amɛ lɛ, naagbee lɛ amɛbaanyɛ lɛ ni amɛbaashɛ lɛ kɛjɛ amɛsɛɛ amɛfɔ̃.
3. (a) Yehowa jaje etsɔɔ akɛ ekɛ-baate shi ashi nɔni akɛfee Babilon Kpeteŋkpele lɛ he mfoniri yɛ blema lɛ, ni kɛbaajɛ nɛgbɛ? (b) Mɛni hewɔ aha Mediabii Iɛ je kpo waa yɛ gbalɛ nɛɛ mli lɛ?
3 Nɔni akɛfataa naataomɔ akɛ aje Babilon Kpeteŋkpele lɛ mli amrɔ nɔŋŋ lɛ he lɛ, Yehowa jaje eyiŋtoo akɛ eeeha “majimaji kɛ asafoi ate shi kɛjɛ kooyigbɛ” aba blema nɔ̃ ni akɛfee ehe mfoniri lɛ nɔ ni amɛbatutua lɛ. Akɛ ni ‘jeŋmaji’ nɛɛ baafee asafoi nilee amɛ ekome yɛ falɔ kome shishi hewɔ lɛ abaanyɛ atsɛamɛ hu akɛ “majimaji ni jɛ kooyigbɛ.” (Yer. 50:3, 8, 9) Ŋmalɛ lɛ ba mli anɔkwale yɛ nɔni ekɛɛ akɛ “Mediabii amaŋtsɛmɛi” titri abaana amɛ yɛ nɛkɛ ‘asafoi’ ni jɛ jeŋmaji lɛ ateŋ lɛ mli. (Yer. 51:11) Atsĩii Persiabii ata akɛ amɛfata asafoi lɛ ahe. Enɛ jeee nɔ ko ni hiɛ je nɔ trukaa ejaakɛ Koresh Kpeteŋkpele lɛ, ni ji mɔ ni bafee “asafoi” lɛ anɔyelɔ kpeteŋkpele lɛ yɛ Mediabii ala yɛ emli. Beni eye Media maŋtsɛyeli lɛ nɔ kunim pɛ kɛkɛ ni eŋɔ Media asraafoi titri efata esraafoi lɛ ahe. Koresh bana hewalɛ yɛ Yeremia gbii lɛ asɛɛ.
4. Namɔ klɛŋklɛŋ je shishi eye maŋtsɛ yɛ nakai maŋtiase lɛ mli yɛ Babilon shigbeemɔ lɛ sɛɛ, ni mɛɛ gbɛ nɔ Daniel wie anɔkwale yɛ nɔ ni baaje kpo waa yɛ Media kɛ Persia Maŋtsɛyeli lɛ mli lɛ he?
4 Beni Babilon gbee shi yɛ afi 539 D.Ŋ.B. lɛ, no mli lɛ Dario, ni ji Medianyo lɛ ni je enɔyeli shishi yɛ jɛmɛ lɛ eye afii 62. (Dan. 5:30, 31) Yɛ Mediabii kɛ Persiabii amaŋtsɛyeli lɛ he lɛ, Daniel 8:3 wie anɔkwale yɛ be mli ni etsɔɔ akɛ Persiabii lɛ hu baaba abaye nɔ yɛ no sɛɛ lɛ. Koresh ni ji Persianyo lɛ ji mɔ ni wo akpɔ akɛ Yudafoi ni aŋɔ amɛ nom lɛ aku amɛsɛɛ ni amɛya amɛshikpɔŋ nɔ ekoŋŋ Ezra 1:1-4.
5. (a) Nɛgbɛ ji heni Yehowa tsɔɔ akɛ hiɛkpatamɔ lɛ baajɛ aba? (b) Namɔ ejaje akɛ ekɛlɛ baatsu nii akɛ ehamlɛ ni ekɛ jwara jeŋmaji lɛ kɛ maŋtsɛyelii lɛ dukuduku?
5 Taakɛ eji yɛ Yerusalem hiɛkpatamɔ ni tsɔ hiɛ ba yɛ afi 607 D.Ŋ.B. lɛ gbɛfaŋ lɛ, hiɛkpatamɔ baajɛ “kooyigbɛ” aba Babilon nɔ. (Ezek. 1:4; 9:2; Yer. 50; 51:48) Yɛ hé ni enɛ aaajɛ kɛaaba lɛ, Lala 75:7, 8 kɛ kooyigbɛ toɔ Nyɔŋmɔ he yɛ faŋŋ mli beni ekɛɛ akɛ: “Nɔwomɔ jɛɛɛ bokagbɛ lɛ, ejɛɛɛ anaigbɛ hu, ni asaŋ ejɛɛɛ ŋa nɔ hu, shi Nyɔŋmɔ ji kojolo, ebaa mɔ ko shi ni ewoɔ yinɔ ko nɔ!” Maŋtsɛ Nebukadnezar ni jɛ Babilon lɛ tsɔ kooyigbɛ ko nɔ kɛba yɛ 609 D.Ŋ.B. ni ekɛte shi ewo Yerusalem kɛ emaŋtsɛ atuatselɔ Zedekia. Afii enyɔ sɛɛ lɛ, “Zionnyo” aaakɛɛ akɛ: “Babel maŋtsɛ lɛ . . . emi wɔ hu tamɔ jeŋ [aloo drako].” (Yer. 51:34, 35) Yɛ bɔni Yerusalem hiɛkpatamɔ lɛ kɔɔ Yehowa Nyɔŋmɔ he lɛ hewɔ lɛ, Yeremia ŋɔ wiemɔ ko kɛjɛ eŋɔɔ akɛ no ko ni ewie aaafee afi 614 D.Ŋ.B. ni kɔɔ Nebukadnezar ni ekɛ lɛ tsuɔ nii akɛ edɛŋ-dade lɛ he akɛ: “Mihamlɛ kɛ mitawuunii jio; bo mikɛ jwaraa jeŋmaji [Yuda, Mizraim, Moab, Amon, Edom kɛ mɛi krokomɛi]. Ni bo mikɛ fiteɔ maŋtsɛyelihei ni bo mikɛ jwaraa amraloi kɛ lumɛi.”—Yer. 51:20-23.
6. Mɛni ji nɔni Yehowa jaje akɛ ekɛ baawo Kaldeabii lɛ anyɔmɔ yɛ nɛkɛ wiemɔi nɛɛ asɛɛ?
6 Yɛ no sɛɛ lɛ mɛni, O Yehowa? “Ni mawo Babel [jeee Nebukadnezar] kɛ Kaldeabii lɛ fɛɛ amɛnifɔji fɛɛ ni amɛfee Zion [aloo Yerusalem] lɛ he nyɛmiɔ yɛ nyɛ hiŋmɛiaŋ! Yehowa kɛɛ.”—Yer. 51:24, 59, 60.
7. Mɛɛ ta-faa gbee Yehowa wo nɔ eshi Babilon yɛ afi 614 D.Ŋ.B., ni namɛi here nɔ?
7 Yɛ Nebukadnezar kɛ esɛɛyelɔi lɛ agbii lɛ amli lɛ, Media Maŋtsɛyeli lɛ yɛ Tigri Paa lɛ sɛɛ kɛmiiya Babilon Maŋtsɛyeli lɛ boka kɛ kooyigbɛ. Beni afee ni gbalɛ aba mli lɛ Koresh Kpeteŋkpele lɛ, ni Media Maŋtsɛ Dario fata ehe lɛ ba kɛjɛ kooyigbɛ ni amɛbatutua Kaldeabii ashikpɔŋ lɛ kɛ amɛ maŋtiase Babilon. Mɛi ni fite Babilon nɛɛ here Yehowa ta-fãmɔ ni ekɛha momo yɛ afi 614 D.Ŋ.B. lɛ nɔ:
“Nyɛshia aflaŋaa yɛ shikpɔŋ lɛ nɔ! Nyɛkpaa tɛtrɛmantɛrɛ yɛ jeŋmaji lɛ ateŋ! Nyɛfea jeŋmaji lɛ krɔŋkrɔŋ nyɛwoa lɛ! Nyɛkpeea Ararat, Mini kɛ Ashkenaz [ni yɔɔ kooyigbɛ] maŋtsɛyelii lɛ nyɛwoa ehe! Nyɛtoa tatsɛ nyɛwoa lɛ! Nyɛhaa okpɔŋɔi lɛ abaa tamɔ agai kɛ amɛhe sakasaka! Nyɛfea jeŋmaji lɛ krɔŋkrɔŋ nyɛwoa lɛ, Media maŋtsɛmɛi lɛ, amraloi kɛ elumɛi lɛ fɛɛ kɛ emaŋtsɛyeli shikpɔŋ muu lɛ fɛɛ! Shikpɔŋ lɛ miihoso, ni ejija ejaakɛ Yehowa yiŋ ni etotoi yɛ Babel he lɛ damɔ shi akɛ eeefee Babel shikpɔŋ lɛ amaŋfɔ, ni mɔ ko mɔ ko akahi mli dɔŋŋ.”—Yer. 51:27-29.
8. Namɔ Yehowa feelɛ krɔŋkrɔŋ ni ekɛlɛ atsu nii akɛ nɔni ekɛ baashi Babilon Kpeteŋkpele lɛ ni mɛɛ be ahiɛkpatamɔ lɛ baa? Yɛ namɛi akpɔmɔ sɛɛ?
8 Yehowa tee no “efee” Persianyo Koresh Kpeteŋkpele lɛ “krɔŋkrɔŋ” kɛha E-tawuu nitsumɔi ni ekɛbaashi blema Babilon lɛ. Yehowa wiemɔi ni yɔɔ Yesaia 44:28 kɛyashi 45:7 lɛ kɛ Koresh gbɛi diɛŋtsɛ tsɛɔ lɛ akɛ “mitookwɛlɔ” kɛ “mɔ ni mifɔ lɛ mu.” Efee Yehowa “Tookwɛlɔ” Kpeteŋkpele Yesu Kristo, mɔ ni Yehowa baatsɔ enɔ ekpata nɔni akɛ blema Babilon fee he okadi, ni ji Babailon Kpeteŋkpele, jeŋ apasa jamɔ maŋtsɛyeli lɛ hiɛ lɛ he mfoniri. Yehowa etsɔ nɛkɛ Koresh Kpeteŋkpele nɛɛ nɔ ekpɔ ewebii ni amɛjɔɔ amɛhe nɔ lɛ kɛ́jɛ Babilon Kpeteŋkpele lɛ nyɔŋyeli shishi kɛjɛ afi 1919 kɛbaa nɛɛ. Enaagbee hiɛkpatamɔ kwraa lɛ baaba kɛtsɔ nɛkɛ Koresh Kpeteŋkpele nɛɛ nɔŋŋ nɔ yɛ “amanehulu kpeteŋkpele” ni baa ni agba afɔ shi yɛ Kpojiemɔ 7:13, 14 lɛ mli.
Nɔni “Nyɔŋmɔi” Kɛ “Nyɔŋmɔyei” Lɛ Nyɛɛɛ Afee
9. Mɛɛ nyɔŋmɔi blema Babilon yɔɔ, ni gbɛ ni amɛtsɔ nɔ amɛdamɔ efɔŋ nɔ ba enɔ lɛ naa lɛ tsɔɔ mɛni yɛ Babilon Kpeteŋkpele lɛ he yɛ “amanehulu kpeteŋkpele” lɛ mli?
9 Blema Babilon yɛ enyɔŋmɔi, tamɔ Bel, Merodak (Marduk) , Sukot-Benot, Nebo, nyɔŋmɔyoo Ishtar (Ashtoret) , kɛ ekrokomɛi kɛfata osɔfoi ŋkunyaayelɔi lɛ ahe. (Yer. 50:2; 51:44; 2 Maŋts. 17:30; Yes. 46:1, 2) Mɛni hewɔ amɛbayeee amɛbuaaa blema Babilon? Hetoo lɛ ji akɛ, nakai nyɔŋmɔi ni ji wɔji lɛ jeee nyɔŋmɔi ko kwraa. (1 Kor. 8:5, 6) Nyɛ ni amɛnyɛɛɛ amɛfee he nɔ ko lɛ ji okadi ni tsɔɔ hewalɛ ni Babilon kpeteŋkpele lɛ nyɔŋmɔi lɛ bɛ ni amɛkɛ aaahere lɛ kɛaaajɛ amanehulu ni ato akɛ ebaaba enɔ yɛ “amanehulu kpeteŋkpele” lɛ mli lɛ mli. Eyɛ nyɔŋmɔi kɛ nyɔŋmɔyei babaoo. Yɛ Hindu jamɔ gbɛfaŋ lɛ abɔ amaniɛ akɛ amɛyɛ nyɔŋmɔi aaafee 330,000,000, ni nyɔŋmɔi etɛ ni amɛfee ekome, triniti, ni ji Brahma, Vishnu kɛ Siva fata he. (The Americana, baafa 196, 1929 nɔ̃) Agbɛnɛ Afrika wekui kɛ voodoo jamɔ mli nyɔŋmɔi lɛ hu yɛ, Budhabii kɛ Konfusiobii anyɔŋmɔi, ni nɔni anyɛŋ aku hiɛ ashwie nɔ hu ji Kristendom “triniti Nyɔŋmɔ” lɛ. Amɛbɛ hewalɛ ni akɛhereɔ mɔ yiwala.
10. Namɔ maŋtsɛ baaye kunim yɛ nyɔŋmɔi mpleshii ni baa lɛ mli?
10 Yɛ mɔ ni ji Nyɔŋmɔ ni baajie ehe kpo atsɔɔ, yɛ mpleshii ni baa lɛ mli lɛ, ebaafee nɔni Yehowa Nyɔŋmɔ Ofe lɛ baate shi ashi Babilon jeŋ apasa jamɔ maŋtsɛyeli lɛ mli nyɔŋmɔi kɛ nyɔŋmɔyei lɛ fɛɛ. Satan Abonsam, nibii agbɛjianɔtoo nɛɛ nyɔŋmɔ ni anaaa lɛ lɛ nyɛŋ atsɔɔ akɛ Babilon Kpeteŋkpele lɛ nyɔŋmɔi lɛ fɛɛ ji nyɔŋmɔi ni esa ákɛ akɛ hiɛ afɔ amɛnɔ kɛha yiwalaheremɔ (Efe. 2:2; 2 Kor. 4:4) Yehowa pɛ ji mɔ ni baashwɛ akɛ kunimyelɔ yɛ akaŋshiihe lɛ, ákɛ mɔ ni ji anɔkwa Nyɔŋmɔ hiɛkalɔ kome, Yiwalaherelɔ lɛ.
11. Namɔ Yehowa kɛlɛ tsuɔ nii diɛŋtsɛ ni anaa yɛ Babilon Kpeteŋkpele lɛ hiɛkpatamɔ mli, ni mɛni ji nɔni Kpojiemɔ 17:11 kɛɛɔ yɛ nɔni ekɛtsuɔ nii nɛɛ nɛɛ?
11 Yɛ ‘nyɔŋmɔi lɛ mpleshii’ ni baa nɛɛ mli lɛ, Yehowa Nyɔŋmɔ kɛ e-Koresh Kpeteŋkpele Yesu Kristo tsuŋ nii diɛŋtsɛ ni ebutu Babilon Kpeteŋkpele lɛ. Ebaaha Jeŋ Hewalɛ ni ji Kpaanyɔ, yɛ Biblia yinɔsane mli lɛ najiaŋdamɔlɔi kɛ hiɛdɔɔ atsu nii ni amɛkɛ te shi amɛwo Babilon Kpeteŋkpele lɛ. Nakai jeŋ hewalɛ ni ba nyɛsɛɛ nɛɛ ji nɔni jeŋmaji lɛ éto he gbɛjianɔ ni amɛkɛ tsu nii kɛ́jɛ 1919 ni amɛkɛbɔ mɔdɛŋ ni amɛkɛbaa jeŋ toiŋjɔlɛ kɛ shweshweeshwe shihilɛ yi, ni amrɔ nɛɛ no ji Jeŋmaji Ekomefeemɔ lɛ. Nɛkɛ adesai agbɛjianɔtoo nɛɛ yɛ “asafoi” 152 ni ji mɔji bianɛ yɛ esɛɛ. Afee ehe mfoniri akɛ kooloo ni hiɛ wa ni tsuɔ ni hiɛ yitsei kpawo kɛ akolontoi 10, ni ehe Kpojiemɔ 17:11 kɛɛɔ akɛ: “Lɛ ji mɔ ni ji kpaanyɔ, ni ejɛ [yitsei] mɛi kpamɔ lɛ mli, ni eeya hiɛkpatamɔ mli.” Dani aaakpata ehiɛ yɛ “Nyɔŋmɔ Ofe lɛ gbi wulu lɛ nɔ ta lɛ mli” yɛ Harmagedon lɛ, eŋmɛɔ nɛkɛ Jeŋ Hewalɛ ni ji Kpaanyɔ nɛɛ gbɛ ni eyeɔ kunim ko ni yɔɔ naakpɛɛ kɛhaa lɛ diɛŋtsɛ ehe, shi jeee nɔ ni ekɛ-mite shi ashi lɛ.—Kpoj. 16:14, 16.
12. Kɛjɛ be mli ni ato ama shi kɛjɛ 1919 kɛbaa nɛɛ, namɔ ji mɔ ni kudɔɔ “kooloo” Iɛ, shi taakɛ Kpojiemɔ 17:15-17 tsɔɔ lɛ, mɛni ji nɔni “kooloo” lɛ baafee mɔ ni ta enɔ lɛ?
12 Akɛ ni okadi kooloo ni tsuɔ lɛ ba shihilɛ mli yɛ ta lɛ sɛɛ yɛ 1919 hewɔ lɛ eha jamɔŋ ajwamaŋ Babilon Kpeteŋkpele lɛ eta enɔ tamɔ maŋnyɛ ni ekudɔ lɛ. (Kpoj. 17:18) Yɛ “amanehulu kpeteŋkpele” lɛ mli, kɛ́ be ni Nyɔŋmɔ kɛbaatsu nii lɛ shɛ lɛ, abaana okadi ni tsɔɔ akɛ atsu ehe nii lɛ yɛ ewiemɔi ni yɔɔ Kpojiemɔ 17:15-17 lɛ mli: “Nui lɛ ni [Yohane] ona ni yoo ajwamaŋ lɛ ta nɔ lɛ ji maji kɛ asafoi kɛ jeŋmaji kɛ majianɔ wiemɔi. Ni akolontoi nyɔŋma ni ona lɛ, kɛ kooloo lɛ, amɛaanyɛ ajwamaŋ lɛ, ni amɛaafeelɛ amaŋfɔ, ni amɛaaŋmɛlɛ yayai, ni amɛaaye eheloo, ni amɛkɛ la aaashɛ lɛ ejaakɛ Nyɔŋmɔ kɛwo amɛtsuiaŋ ni amɛfee eyiŋtoo nii lɛ ni amɛhiɛ jwɛŋmɔ kome, ni amɛkɛ amɛ maŋtsɛyeli lɛ aha kooloo lɛ kɛyashi beyinɔ ni aaagbe nii ni Nyɔŋmɔ ekɛɛ lɛ anaa.”
13, 14. (a) Yɛ nɔni Yehowa tsɔɔ hiɛ eleɔ hewɔ lɛ, mɛni ebaaha maŋkwramɔŋ hemɛi lɛ afee “ajwamaŋ” lɛ? (b) Yɛ no sɛ nɔŋŋ lɛ mɛni mɛi ni eye enɔ kunim lɛ baafee yɛ Yehowa Odasefoi ahe, ni mɛni baajɛ amɛ nifeemɔ nɛɛ mli aba?
13 No hewɔ lɛ taakɛ agba afɔ shi lɛ, jeŋmaji lɛ ni kɛ amɛhe yafata ehe lɛ kɛ hewalɛ ko ni akɛkuɔ nifeemɔ naa ha klɛŋklɛŋ lɛ Jeŋmaji Akpaŋmɔ lɛ kɛ agbɛnɛ esɛɛyelɔ, Jeŋmaji Ekomfeemɔ lɛ, ni ekɛbaa jeŋ toiŋjɔlɛ kɛ shweshweeshwe shihilɛ yi. Yehowa tsirɛɛɛ amɛ ni amɛfee nakai, shi akɛni etsɔɔ hiɛ esusuɔ nii ahe hewɔ lɛ, etsɔ hiɛ eha aŋma nɔni ele yɛ he lɛ yɛ e-Wiemɔ ni aŋma afɔ shi lɛ mli. Egba eto ekoŋŋ akɛ ajwamaŋ Babilon Kpeteŋkpele lɛ ni kɛ ehe woɔ majimaji ateŋ maŋkwramɔ saji amli lɛ baatsɔ jatsu aha nakai jeŋmaji ni amɛbua amɛhe naa tamɔ “asafo” lɛ, ni ebaaha etɔ amɛ. Kɛji akɛ ashɛ́ lɛ kɛjɛ nakai majimaji ateŋ toiŋjɔlɛ gbɛjianɔtoo lɛ sɛɛ afɔ ni naagbee lɛ akɛ la sha lɛ lɛ, Yehowa odasefoi Kristofoi lɛ sheŋ nakai “efɔŋ” ni baa enɔ lɛ gbeyei. Amɛle kɛjɛ Nyɔŋmɔ Wiemɔ lɛ mli akɛ amɛdamɔ ŋwɛi “nuŋtsɔmɛi a-Nuŋtsɔ kɛ maŋtsɛmɛi a-Maŋtsɛ,” Yesu Kristo najiaŋ yɛ shikpɔŋ lɛ nɔ, ni yɛ nɛkɛ yiŋtoo nɛɛ hewɔ lɛ mɛi ni susuɔ akɛ amɛye Babilon Kpeteŋkpele lɛ nɔ kunim ni eŋɔɔ amɛnaa nɛɛ baatutua amɛ akɛ naagbee gbɛtsiinii kɛha jeŋ fɛɛ nɔyeli ni amɛtaoɔ lɛ. Átsɔ hiɛ abɔ Yehowa Odasefoi akɔkɔ yɛ enɛ he, yɛ gbalɛ ni yɔɔ Kpojiemɔ 17:13, 14 lɛ mli:
14 “Mɛnɛɛmɛi [maŋkwramɔ gbɛjianɔtooi ni yɔɔ Jeŋmaji Ekomefeemɔ lɛ mli] hiɛ jwɛŋmɔ kome, ni amɛkɛ amɛhewalɛ kɛ amɛhegbɛ lɛ eha kooloo lɛ kwraa. Mɛnɛɛmɛi kɛ toobi lɛ baawuu, ni toobi lɛ baaye amɛnɔ kunim, ejaakɛ lɛ ji nuŋtsɔmɛi a-Nuŋtsɔ kɛ maŋtsɛmɛi a-Maŋtsɛ, ni mɛi ni kɛlɛ yɔɔ lɛ ji mɛi ni atsɛ kɛ mɛi ni ahala kɛ mɛi ni heɔ yeɔ lɛ.”
15, 16. (a) Belɛ mɛni ji nɔni nakai naagbee ta ni kɔɔ jeŋ nɔyeli he lɛ tsɔɔ? (b) Bɔfo Yohane ha wɔtsɔ hiɛ wɔna mɛni mli yɛ enɛ he, ni mɛni jɛɛɔ mli baa?
15 Nɛkɛ tawuu nɛɛ ji “Nyɔŋmɔ Ofe lɛ gbi wulu lɛ nɔ ta lɛ” yɛ jeŋ shihilɛ ni atsɛɔ lɛ akɛ Harmagedon lɛ mli. (Kpoj. 16:13-16) Yehowa odasefoi ni yɔɔ shikpɔŋ nɛɛ nɔ lɛ baaye nakai “ta” ni atsɔɔ mli yɛ Kpojiemɔ 19:11-21 lɛ he odase yɛ Yehowa hebuu shishi. Beni afee ni amɛtsɔ hiɛ amɛna jeŋ nɔyeli he sane ni kɛ tawuu baa nɛɛ mli lɛ, Kristofonyo bɔfo Yohane tsɔɔ nɔni baajɛ ta lɛ mli aba, eŋma akɛ:
16 “Ni mina kooloo lɛ kɛ shikpɔŋ lɛ nɔ maŋtsɛmɛi lɛ kɛ amɛtai ni abua naa lɛ, ni amɛkɛ mɔ ni ta okpɔŋɔ lɛ nɔ [Yehowa asafoiatsɛ, Yesu Kristo] kɛ eta lɛ [ŋwɛi bɔfoi asafoi] lɛ yawuu. Ni amɔ kooloo lɛ kɛ amale gbalɔ lɛ [Ŋleshi kɛ Amerika Jeŋ Hewalɛ] ni fee okadii yɛ ehiɛ ni ekɛshishiu mɛi ni he kooloo lɛ okadi lɛ kɛ mɛi ni jaa emaga [Jeŋmaji Ekomefeemɔ] lɛ afata ehe; aŋɔ mɛi enyɔ lɛ fɛɛ hiɛkalɔi awo la kpaakpo lɛ ni tsoɔ kɛ shwɔɔ lɛ mli, ni mɛi ni shwɛ lɛ, akɛ mɔ ni ta okpɔŋɔ lɛ nɔ lɛ tsi ni jɛɛɔ edaaŋ lɛ gbe amɛ, ni loofɔji fɛɛ [ni atsi ta yɛ kuku 17, 18 lɛ] tɔrɔ kɛ amɛlooi lɛ.”
17. Efɔŋ ni baa maŋkwramɔŋ nɔyelɔi ni leee Nyɔŋmɔ lɛ anɔ lɛ kɛ mɛni baa naagbee, ni mɛni baa emlibii ni anaaa amɛ lɛ anɔ?
17 Nibii agbɛjianɔtoo nɛɛ ni Satan yeɔ nɔ lɛ mli gbɛjianɔtoo ni lee Nyɔŋmɔ lɛ fɛɛ ahiɛkpatamɔ baaba yɛ “amanehulu kpeteŋkpele” ni atsi ta yɛ Kpojiemɔ 7:14 lɛ mli. Nɔ ni baanyiɛ sɛɛ ji Satan Abonsam, je nɛŋ nɔyelɔ ni anaaa lɛ lɛ kɛ edaimonioi bɔfoi lɛ fɛɛ ni akɛamɛ aaawo bu kwɔŋkwɔŋ lɛ mli afii 1,000.—Kpoj. 10:1-3.
18. Mɛni Nyɔŋmɔ Wiemɔ lɛ tsɔɔ kɛji akɛ tai amli ta lɛ baashi wɔshikpɔŋ nɛɛ efolo ni adesa ko bɛ nɔ?
18 Ani nakai tai amli ta ni baa yɛ Harmagedon lɛ baashi shikpɔŋ lɛ efolo ni adesa wala ko kwraa bɛ nɔ? Noa gbii lɛ amli blema je lɛ naagbee kɛtsɔ nu afua lɛ nɔ lɛ shiii shikpɔŋ lɛ efolo ni mɔ ko bɛ nɔ, ejaakɛ adesai kpaanyɔ je nakai jeŋ fɛɛ nu afua lɛ mli. (2 Pet. 2:5) Noa Nyɔŋmɔ, ni ji Yehowa, fee shikpɔŋ lɛ “ni ahi nɔ.” (Yes. 45:18) Yehowa tsɔ Yesaia nɔ egba Persia nɔyelɔ, Koresh Kpeteŋkpele lɛ he sane, ni etsi egbɛi ata, ni atee nɛkɛ kpɔlɔ kɛha Yudafoi ni aŋɔ amɛ nom nɛɛ shi ni efee Kpɔlɔ Kpeteŋkpele, Yesu Kristo he mfoniri. Yɛ “Nyɔŋmɔ Ofe lɛ gbi wulu lɛ nɔ ta” ni baa yɛ Harmagedon lɛ mli lɛ, Yesu Kristo baaye Yehowa kɛ ewebii lɛ ehenyɛlɔi ni yɔɔ shikpɔŋ nɔ lɛ fɛɛ anɔ kunim, ni ebaagbe Nyɔŋmɔ maŋtsɛyeli lɛ henyɛlɔi lɛ fɛɛ. Yesu Kristo tsuŋ nɛkɛ hiɛkpatamɔ nitsumɔ nɛɛ ni ekɛye shwɛɛnii ni akɛ mumɔ efɔ́ amɛ, ni afɔ amɛ mu, ni yɔɔ shikpɔŋ nɔ lolo lɛ awui, ejaakɛ kɛ eba lɛ nakai lɛ, ebafeŋ kunimyeli kwraa kɛhaŋ Nyɔŋmɔ maŋtsɛyeli lɛ. Agbɛnɛ, “asafo babaoo” ni ji shwɛɛnii ni afɔ amɛ mu lɛ ahefatalɔi anɔkwafoi lɛ hu? Kpojiemɔ 7:9-15 tsɔɔ mli faŋŋ akɛ, nɛkɛ “asafo babaoo” nɛɛ baaje “amanehulu kpeteŋkpele” lɛ ni baaba naagbee yɛ Harmagedon lɛ mli.
Aha Ale Efɔŋ Ni Baa Lɛ
19, 20. (a) Namɛi esa ni aha amɛle, dani efɔŋ nɛɛ aba lɛ Iɛ nɔ? (b) Mɛɛ gbɛ nɔ Yehowa tsɔ efee nɛkɛ adafi ni atswaa nɛɛ he nɔkwɛmɔ nɔ yɛ Yeremia gbii lɛ amli?
19 Efɔŋ ko ka wɔhiɛ ni miiba je lɛ nɔ! Esani aha nakai Babilon Kpeteŋkpele lɛ ni ehe gbɛi fe fɛɛ yɛ je lɛŋ lɛ ale enɛ. Afee adafi ni atswa lɛ nɛɛ he mfoniri yɛ blema yɛ gbalɔ Yeremia gbii lɛ amli, hɛɛ, yɛ afi 614 D.Ŋ.B. ekɛɛɔ wɔ yɛ enɛ he akɛ:
20 “Wiemɔ ni gbalɔ Yeremia kɛha Seraia, Maeseia bi, Neria bi lɛ, beni ekɛ Yuda Maŋtsɛ Zedekia tee Babel yɛ eyinɔ afi ni ji ejwɛ lɛ nɔ lɛ nɛ. Ni Seraia ji piafonyo nukpa. Ni Yeremia ŋma efɔŋ fɛɛ ni baaba Babel nɔ lɛ ewo wolo kome mli, no ji wiemɔi nɛɛ fɛɛ ni aŋma yɛ Babel he lɛ. Ni Yeremia kɛɛ Seraia akɛ: Kɛ́ oshɛ Babel lɛ, kwɛmɔ ni okane nɛkɛ wiemɔi nɛɛ fɛɛ, ni okɛɛ: Yehowa! Bo owie yɛ biɛ nɛɛ he akɛ oooplene lɛ, ni mɔ ko mɔ ko akahi mli dɔŋŋ, gbɔmɔ jio, shia kooloo jio, shi moŋ etsɔ naanɔ amaŋfɔ! Ni aba akɛ kɛ okane wolo nɛɛ ogbe naa lɛ, ofi tɛ okpɛtɛ he, ni oshɛ ofɔ Eufrate teŋ, ni okɛɛ: Nɛkɛ Babel baashiu, ni eteŋ shi dɔŋŋ, yɛ efɔŋ fɛɛ ni mikɛ aaaba enɔ lɛ hewɔ, ni amɛaata.”—Yer. 51:59-64.
21, 22. Mɛɛ gbɛ nɔ gbɛ nɔ atsɔ akase Seraia nifeemɔ yɛ gbalɛ mli yɛ Kpojiemɔ wolo lɛ mli, ni mɛɛ wiemɔi fata he?
21 Aŋma nɔni afa Seraia, Baruk nyɛmi, ni ji Neria bi lɛ akɛ efee beni afee ni ekɛfee bɔni abaafite blema Babilon lɛ he mfoniri lɛ awo Kpojiemɔ wolo lɛ mli. Klɛŋklɛŋ lɛ niŋmalɔ lɛ, Kristofonyo bɔfo Yohane tsɔɔ bɔni abaakpata majimaji ateŋ jamɔŋ “ajwamaŋ” ni ji Babilon kpeteŋkpele nɛɛ hiɛ lɛ mli, ni etee nɔ ekɛɛ akɛ:
22 “Ni bɔfo ko ni he wa wo tɛ ko ni tamɔ wie wulu, ni eshɛ efɔ ŋshɔŋ ekɛɛ: Nɛkɛ abaashɛ Babilon maŋ kpeteŋkpele lɛ afɔ trukaa ni anaŋ lɛ kwraa dɔŋŋ ni anuŋ ayɛmforowu kɛ ayemforo gbee kwraa dɔŋŋ yɛ omli; ejaakɛ ojarayelɔi lɛ ji shikpɔŋ lɛ nɔ gbɔmɛi wuji, ejaakɛ okunyaayeli lɛ akɛ shishiu jeŋmaji lɛ fɛɛ; ni emli ana gbalɔi kɛ krɔŋkrɔŋbii kɛ mɛi fɛɛ ni agbe yɛ shikpɔŋ lɛ nɔ lɛ alá lɛ yɛ.”—Kpoj. 18:21-24.
23. (a) Mɛni hewɔ nyamɔ ni Babilon kpeteŋkpele lɛ nɔyelɔi ni leee Nyɔŋmɔ lɛ aaanya lɛ sɛɛ baafo kuku lɛ? (b) No hewɔ Iɛ mɛni mɛi ni leee Nyɔŋmɔ nɛɛ aaabɔ mɔdɛŋ akɛ amɛaafee, ni mɛni baajɛ mli aba?
23 Nyamɔ ni baaba “maŋtsɛmɛi” aloo maŋkwramɔŋ nɔyelɔi ni leee Nyɔŋmɔ lɛ ateŋ yɛ be mli ni ashɛ Babilon kpeteŋkpele lɛ afɔ hiɛkpatamɔ ŋshɔ lɛ mli lɛ baafee nɔni sɛɛ etsɛɛɛ kwraa. Mɛi ni amɛbaana amɛ lolo ji Yehowa Nyɔŋmɔ hiɛkalɔ lɛ jalɔi babaoo ni amɛje mli, ni mɛnɛɛmɛi ji shwɛɛnii ni afɔ amɛ mu lɛ ni ji Yeremia kuu lɛ kɛ amɛnanemɛi anɔkwafoi, “asafo babaoo” lɛ ni bɔfo Yohane tsɔ hiɛ ena amɛ lɛ. Esani amɛkɛ mɛnɛɛmɛi aye. Kɛji akɛ nakai maŋkwramɔŋ nɔyelɔi lɛ bɔ mɔdɛŋ akɛ amɛaakpata jamɔ fɛɛ hiɛ kɛjɛ shikpɔŋ nɔ kɛtsɔ shwɛɛnii lɛ kɛ amɛnanemɛi lɛ ni amɛkɛ amɛnine aaata amɛhe lɛ nɔ lɛ, belɛ ebaafee tamɔ nɔni amɛmiita amɛ ŋwɛi Nuŋtsɔ, Yesu Kristo, ni ji Koresh Kpeteŋkpele lɛ diɛŋtsɛ he. Nɔni enɛ baatsɔ ji ta ni amɛ kɛ lɛ baana yɛ Harmagedon. Ni ta ni baate shi lɛ baafe atɔmik tai ni jeŋmaji lɛ bɔɔ mɔdɛŋ bianɛ akɛ amɛaatsi naa yɛ amɛteŋ lɛ, ejaakɛ Yesu Kristo kɛ eŋwɛi tai ni ji bɔfoi lɛ baajɛ amɛshihilɛhe ni anaaa jɛmɛ lɛ akpata henɔwolɔi ni teɔ shi woɔ Yehowa Odasefoi nɛɛ ahiɛ.
24. Namɛi baana hegbɛ ni amɛkɛ amɛhiŋmɛi ana nakai “gbi wulu lɛ nɔ ta” lɛ, ni amɛkɛ amɛhe woŋ mli hu, shi te amɛbaafee amɛnii yɛ he amɛha tɛɛŋ?
24 Mɛɛ hegbɛ po enɛ aaaji akɛ mɔ ko kɛ ehiŋmɛi aaana “Nyɔŋmɔ ofe lɛ gbi wulu lɛ nɔ ta lɛ” yɛ Harmagedom! Kɛtsɔ ehebuu shishi kɛ agbɛnɛ amɛhe ni amɛkɛwooo nakai ta lɛ mli hewɔ lɛ, shwɛɛnii lɛ ni ji Yeremia kuu lɛ kɛ amɛhefatalɔi ni amɛtuu amɛhe amɛha lɛ aaana nakai hegbɛ lɛ mli gbɛfaŋnɔ yɛ shikpɔŋ nɛɛ nɔ, heni abaawuu ta lɛ yɛ lɛ. Abaawo amɛ nyɔmɔ babaoo yɛ “wɔ Nyɔŋmɔ “lɛ oweletɔɔ gbi” lɛ ni amɛshiɛ amɛtsɔɔ lɛ hewɔ; eyafeee efolo. (Yes. 61:2) Namɔ po baanyɛ asusu bɔni amɛ kɛ ŋwɛi bɔfoi krɔŋkrɔŋi fɛɛ ni yɔɔ Kristo shishi lɛ anyamɔ lɛ aaafa babaoo aha lɛ he?
25. (a) Mɛɛ hegbɛ nɛkɛ “asafo babaoo” lɛ ni amɛje mli lɛ kɛ amɛhe baawo mli yɛ “ta” lɛ sɛɛ? (b) Mɛɛ hewalɛ esa akɛ nibii ni yɔɔ nyam nɛɛ ahe gbɛkpamɔ Iɛ awo Yehowa webii ŋmɛnɛ?
25 Nɛkɛ Yehowa yibaamɔ hewalɛ lɛ he okadii ni yɔɔ wala mli nɛɛ kɛ miishɛɛ kɛ nyamɔ baaya amɛhiɛ kɛbote enibii agbɛjianɔtoo hee lɛ mli, yɛ shikpɔŋ ni nɔ tse lɛ nɔ. Hegbɛ ni akɛaaje jeŋ fɛɛ paradeiso saamɔ shishi lɛ baagbele aha amɛ, ni mɛi ni baana enɛ mli gbɛfaŋnɔ ji “asafo babaoo” ni ji anɔkwafoi lɛ kɛya naanɔ. Mɛɛ hewalɛ nɛkɛ esa ni nɛkɛ nibii ni yɔɔ nyam ni akpaa gbɛ nɛɛ fɛɛ awo mɛi ni bianɛ amɛsumɔɔ akɛ abu amɛ akɛ amɛfata “mimaŋ” ni ji Yehowa webii lɛ ahe lɛ? Nɔni esa akɛ ewo amɛ hewalɛ lɛ ji toiboo ni amɛaafee amɛha famɔ ni amɛnuɔ akɛ “nyɛjea” henɔwolɔ Babilon Kpeteŋkpele lɛ mli mra, ni agbɛnɛ amɛhi shi akɛ Kristofoi ni amɛkɛ amɛhe wooo amaŋkwramɔŋ hemɛi lɛ asaji amli, ni amɛmɔ Yehowa maŋtsɛyeli kɛtsɔ Kristo nɔ lɛ mli kpɛŋŋ ni amɛŋmɛɛɛ sane he amɛkɛsaaa kɛyashi anumnyam kunimyeli gbi lɛ nɔ lɛ!a
(Enɛ gbeɔ Yeremia gbalɛ ni akase kɛ-tsara nɔ lɛ naa.)
[Shishigbɛ niŋmai]
a Ajie kɛjɛ May 15, 1980 Blɔfo Buu-Mɔɔ lɛ mli.
[Mfoniri ni yɔɔ baafa 16]
Etsɛŋ ni abaashɛ ajwamaŋ, Babilon Kpeteŋkpele lɛ afɔ̃ kɛjɛ kooloo lɛ sɛɛ