Afii Akpe Hiɛnɔkamɔ Lɛ Shishijee

ŊMƐNƐ, nɔ ko bɛ ni abaanyɛ ayoo yɛ Katolek, Protestant loo Yudafoi ahiɛnɔkamɔi kɛ gbeyeishemɔi amli. Etamɔ nɔ ni amɛfɛɛ amɛheɔ adesa susuma ni gbooo lɛ amɛyeɔ kɛ hemɔkɛyelii ni fata he ni ji ŋwɛi shihilɛ yɛ miishɛɛ mli yɛ mumɔi ajeŋ ko mli, aloo naanɔ piimɔ yɛ “hell” ko mli.

Akɛni Kristendom jamɔi lɛ kɛɔ akɛ amɛkɛ Yudafoi lɛ fɛɛ jaa Nyɔŋmɔ kome ni amɛkpɛlɛɔ Yudafoi aŋmalɛi lɛ anɔ akɛ ejɛ mumɔŋ hewɔ lɛ ebaafee miishɛɛ akɛ aaakwɛ akɛ ani ŋmɛnɛŋmɛnɛ beaŋ Yudafoi lɛ ahiɛnɔkamɔ kɛ “Kristofoi” lɛ anɔ̃ lɛ kɛ hiɛnɔkamɔ ni akɛma shi yɛ Hebri Ŋmalɛi lɛ amli lɛ kɛ mra be mli Yudafoi lɛ ahemɔkɛyeli kpaa gbee lo.

Mesia Lɛ He Hiɛnɔkamɔ

Kɛ adamɔ ŋmalɛi tamɔ 1 Mose 3:​15; 22:​15-18; 49:10 kɛ 5 Mose 18:18 ni ji ŋmalɛi ejwɛ pɛ ni jɛ Hebri Biblia mli ŋmalɛi 456 ni Yudafoi ablema kpeehe lɛ buɔ nomɛi akɛ ekɔɔ Mesia lɛ he lɛ nɔ asusu he lɛ, mɛni pɔtɛɛ ji nɔ ni Yudafoi lɛ kpaa no gbɛ? Mɛni ji amɛhiɛnɔkamɔ?

Yudafoi awolo ko ni kɛ hewalɛ wieɔ kɛ nɛkɛ adafitswaa nɛɛ ha: “. . . jwɛŋmɔ ni ahiɛ akɛ Mesia ko ni ji gbɔmɔ baaba lɛ yɛ Kpaŋmɔ Momo lɛ mli fɛɛ. No ji nɔ ni ejɛ gbalɛ ni kɔɔ wɔsɛɛ be he hiɛnɔkamɔ lɛ mli eba. Klɛŋklɛŋ gbalɔ ni kɛ bɔni maŋtsɛ kpakpa nɛɛ baaba yɛ wɔsɛɛ be mli lɛ he mfoniri ha ji Yesaia (9:16 [2-7 yɛ Bibliai ni jeee Yudafoi anɔ̃ mli], 11:​1-10, 32:​1-5) . . . . Maŋtsɛ kpakpa ni Yesaia kpaa lɛ gbɛ lɛ baafee Yishai seshinyo, ni lɛ ji mɔ ni Nyɔŋmɔ mumɔ ni ji nilee, hewalɛ kɛ jamɔ mumɔ baahi enɔ, ni ebaaye nɔ yɛ Nyɔŋmɔ gbeyeishemɔ mli, ni ekɛ jalɛ kɛ anɔkwayeli aaafi emli (11:​1-3a, 5) . Ekɛ ehe woŋ tawuu mli aloo ni eeeye jeŋmaji lɛ anɔ; ebaakpata tawuu nibii ahiɛ (9:4 [5]) , nɔ ni he baahia lɛ titri ji ni eto jalɛ yɛ gbɔmɛi lɛ ateŋ (9:6b [7b]; 11:3b, 4) . Nɔyeli lɛ yibii ji toiŋjɔlɛ yɛ shikpɔŋ muu lɛ fɛɛ nɔ. Toogwantɛŋ sheŋ kalaŋ gbeyei, ni asaŋ kootsɛ hu yeŋ abotia bi awui (11:8 [6]) ; ni ji akɛ taakɛ kukuji ni nyiɛ sɛɛ nɛɛ tsɔɔ lɛ, yiwalɛ kɛ awuyeli ehiŋ shi dɔŋŋ yɛ Nyɔŋmɔ gɔŋ krɔŋkrɔŋ lɛ nɔ, ejaakɛ Nyɔŋmɔ he nilee baayi shikpɔŋ lɛ nɔ obɔ tamɔ nu haa ŋshɔ shishi lɛ (okɛto 32:​1, 2, 16 he) . Gbɔmɛi lɛ eshweŋ akɛ amɛaatsɔmɔ gbɔmɛi agboi yɛ maŋkwramɔŋ shi moŋ amɛaahi shi tamɔ heshibalɔi (32:​18, 20) . Nɔ ni baanyɛ aba yɛ shihilɛi kpakpai ni tamɔ nɛkɛ shishi ji shweremɔ, ni amɛsheŋ maŋ ko ni aaajɛ sɛɛ ebatutua amɛ lɛ gbeyei (9:6a [7a], 32:15) . Yishai shishifa hee ni ete shi lɛ baadamɔ shi tamɔ kane aha jeŋmaji lɛ, ni amɛbaaba eŋɔɔ kɛha gbɛtsɔɔmɔ kɛ amɛteŋ sane saamɔ (11:10) . Abaatsɛ lɛ ‘Naakpɛɛ Ŋaawalɔ,’ ‘Nyɔŋmɔ Hewalɔ,’ ‘Naanɔ Tsɛ,’ ‘Toiŋjɔlɛ Lumɔ.’ (9:5 [6]) .

“Nɛkɛ mfoniri ni kɔɔ wɔsɛɛ be he lɛ kɛ nɔ ni Yesaia susuɔ lɛ kpaa gbee kwraa, akɛ, nɔ ni baanyiɛ kojomɔ lɛ sɛɛ aba ji mumɔŋ hewalɛnamɔ loo fɔmɔ hee ni ekɛ jeŋba kpakpa kɛ jamɔŋ shihilɛ ni eye emuu baaba.”​—The Jewish Encyclopedia, Vol. 8, baafa 506.

Enɛ fa kɛha Mesia lɛ he hiɛnɔkamɔ ni akɛha Yudafoi lɛ yɛ Ŋmalɛ krɔŋkrɔŋ lɛ mli. Nɔ ko bɛ ni kɔɔ “ŋwɛi” he yɛ mli! Shi Yudafoi aniŋmai ni jɛɛɛ Biblia lɛ mli lɛ hu? Nɔ ni aŋma yɛ he nɛɛ yaa nɔ ekɛɔ lolo akɛ: “Jwɛŋmɔ ni keɔ shikpɔŋ nɔ Mesia lɛ he lɛ ji nɔ ni yɔɔ Rabifoi aniŋmai ni kɔɔ naagbee be lɛ he lɛ mli, ni eji nɔ ni Yuda jamɔ hu ekpɛlɛ nɔ diɛŋtsɛ kɛjɛ ŋmɛnɛŋmɛnɛ beaŋ klɛŋklɛŋ afii oha lɛ naagbee mli.”​—Baafa 510.

Shikpɔŋ Nɔ Hiɛnɔkamɔ

No hewɔ lɛ Yudafoi lɛ ashishijee hiɛnɔkamɔ lɛ ji shikpɔŋ nɔ nɔ̃. Ŋmalɛ mli odaseyeli ko ‘bɛ ni tsɔɔ akɛ amɛblematsɛmɛi, Abraham, Isak kɛ Yakob na hiɛnɔkamɔ akɛ amɛbaaya ŋwɛi. Mla ni akɛha kɛtsɔ Mose nɔ lɛ kɛ hiɛnɔkamɔ ko ni tamɔ nakai haaa. Nakai nɔŋŋ hu abaanyɛ akɛɛ yɛ Hebri Ŋmalɛi lɛ amli lalai awoji kɛ Gbalɔi lɛ ahe.

Yɛ enɛ hewɔ lɛ Dictionnaire de Théologie Catholigue ni kɛ hewalɛ wieɔ lɛ kɛɛ akɛ: “Kadimɔ shweremɔ ni hiɔ shi be fioo ni gbɔmɔ ni ji Nyɔŋmɔjalɔ lɛ hiɛ ka nɔ, ni damɔ Nyɔŋmɔ shiwoo ni ekɛha lɛ lɛ nɔ, kɛ eweku kɛ emaŋ lɛ nɔ yɛ Kpaŋmɔ Momo lɛ mli lɛ. Nɔ ni fata he lɛ, yɛ mumɔŋ kɛ jeŋbaŋ nikeenii ahe hiɛnɔkamɔ, Mesia lɛ kɛ emaŋtsɛyeli ni baa lɛ he hiɛnɔkamɔ.” (Nɔ ni atsɔmɔ lɛ lɛ ji wɔ nɔ̃)

Protestantbii a-Dictionnaire Encyclopedique de la Biblia lɛ maa enɛ nɔ mi. Wɔkaneɔ akɛ: “Hiɛnɔkamɔi ni yɔɔ K. M. [Kpaŋmɔ Momo] lɛ mli lɛ ba ‘fiofio. Amɛjɛɔ shishi kɛ shikpɔŋ nɔ sɛɛnamɔi, maŋkwramɔŋ nisaamɔ kɛ gbɔmɛi lɛ agbɛjianɔtoo ekoŋŋ . . . Nakai hiɛnɔkamɔ lɛ tee nɔ ni ebatsɔ jeŋ mu fɛɛ nɔ̃. Yehowa ji je lɛ Nuŋtsɔ. . . . ’Naanɔ lɛ Tsulɔ’ lɛ baaba; ebaatsɔ enɔnaa kɛ shi ni abaa lɛ lɛ nɔ ehere ewebii lɛ ayiwala. Yesaia 42:​1-4 tsɔɔ akɛ je lɛ hiɛ ka etsɔɔmɔ lɛ nɔ. Kɛkɛ lɛ Naanɔ lɛ Tsulɔ lɛ anunyam lɛ baaba, Mesia lɛ be lɛ kɛ adesai ni amɛtsɔmɔ mɛi heei.” (Nɔ ni atsɔmɔ lɛ lɛ ji wɔ nɔ.)

Amua nɛkɛ Yudafoi ashikpɔŋ nɔ hiɛnɔkamɔ nɛɛ naa fɛfɛo yɛ The Jewish Encgclopedia, lɛ mli akɛ: “. . . Gbalɔi lɛ na Mesia kpakpa ko he hiɛnɔkamɔ yɛ wɔsɛɛ be kɛtsɔ David we lɛ binuu ko nɔyeli nɔ​—paradeiso hejɔlɛ mli yinɔ kpakpa ko . . . Ebaaba akɛ jeŋ ko ni toiŋjɔlɛ ni yeɔ emuu kɛ gbeɔ kpamɔ yɛ bɔɔnii fɛɛ ateŋ yɔɔ mli, bɔfoi ashihilɛ ko ni gbɔmɔ yɔɔ mli dani efee esha (Yes. 11:​1-10; 65:​17-25: ‘Ŋwɛi hee kɛ shikpɔŋ hee’) . . . . ’bɔɔnii fɛɛ atsakemɔ koni amɛbatsɔmɔ kuu kome ni amɛfee Nyɔŋmɔ suɔmɔnaa nii’ ji Israel Mesia he hiɛnɔkamɔ lɛ mli nɔ titri; esa akɛ ‘awuyeli maŋtsɛyeli lɛ’ ajie kɛya dani ato Nyɔŋmɔ maŋtsɛyeli lɛ ama shi. . . . Shi atsake Persia kɛ Babilonia jeŋ afii ni feɔ akpei nyɔŋma kɛ enyɔ lɛ yɛ Yudafoi [anikasemɔ ni kɔɔ,nɔ ni baa adesai aje lɛ nɔ lɛ he] lɛ mli afee lɛ jeŋ otsi ni feɔ afii akpei, kpawo ni kɛ Nibɔɔ otsi lɛ kpaa gbee, ni kuku ‘Ohiɛ lɛ, afii akpe tamɔ nyɛ, kpaakpa nyɛ’ (Lala 90:⁠4) lɛ kɛ jwɛŋmɔ lɛ baa akɛ nɔ ni baanyiɛ ŋmɛnɛŋmɛnɛ jeŋ kɛ emli tɔlɛ (‘olam ha-zeh’) lɛ sɛɛ aba ji Sabbatical millennium (Hejɔɔmɔ gbi afii akpe) ko ni baaba’ lɛ (‘olam ha-ba’ . . . ) .”​—Vol. 5, baafai 209-211. (Nɔ ni atsɔmɔ lɛ lɛ ji wɔ nɔ)

Gbohiiashitee, Jeee Shishilɛ Ni Gbele Bɛ Mli Ni Ana

Afii ohai babaoo ho ni Yudafoi lɛ heee wɔŋjalɔi ahemɔkɛyeli akɛ adesa susuma lɛ gbooo lɛ amɛyeee. Yudafoi lɛ ji gbɔmɛi ni atsɔse amɛ, ni Yudafoi ni le woloŋ lɛ nyɛɔ amɛkaneɔ Hebri Ŋmalɛi lɛ babaoo ni tsɔɔ faŋŋ akɛ “susuma” (Hebri, nephesh) lɛ baanyɛ agbo. Emli fioo ko nɛ: 1 Mose 19:​19, 20; 4 Mose 23:​15; Yoshua 2:​13, 14; Lala 22:29 (kuku 30 yɛ Yudafoi abiblia mli) ; Ezekiel 18:​4, 20.

No hewɔ lɛ mra be mli Yudafoi ahiɛnɔkamɔ ni kɔɔ wala yɛ shikpɔŋ nɔ paradeiso ni atsɔ Mesia lɛ nɔ akɛba lɛ damɔ hemɔkɛyeli yɛ gbohiiashitee lɛ nɔ, shi jeee adesa susuma ko ni gbooo nɔ. The Jewish Encyclopedia, lɛ maa enɛ nɔ mi, akɛ: “Gbohiiashitee fata Mesia lɛ he hiɛnɔkamɔ lɛ he (Yes. 26:​19; Dan. 12:⁠2) . . . . Shishijee lɛ abu gbohiiashitee akɛ naakpɛɛ nikeenii ni akɛhaa mɛi ni ja pɛ. . . ., shi yɛ sɛɛ mli lɛ, abu enɛ akɛ nii ni abaatsu he nii yɛ jeŋ muu fɛɛ, ni ekɔɔ Naagbee Kojomɔ lɛ he . . . Kɛji akɛ gbɔmɔtso lɛ feemɔ yɛ Gbohiiashitee be lɛ mli lɛ tamɔ fɔmɔ nɔŋŋ lɛ, enɛ ebatsɔ naataamɔ ni ka Hilelbii kɛ Shamatbii ateŋ.”​—Vol. 5, baafa 216.

Nɛkɛ wolo ni kɔɔ Yudafoi asaji ahe ni kɛ hewalɛ wieɔ lɛ wie kɛkɔ “Gehena” (Kristendom Hell-la) lɛ he akɛ: “Nɔ ko bɛ Ŋmalɛ lɛ mli ni abaadamɔ nɔ ahe najiaŋtoo loo toigbalamɔ kɛha susuma lɛ yɛ gbele sɛɛ aye; Babilonbii kɛ Persiabi kɛ enɛ ba, ni Yudafoi kɛ enɛ to wiemɔ ‘Gehinnon (Hinon Jɔɔ) ni la ni Manase kɛshaa afɔle ehaa Molek lɛ ha jɛmɛ fee heni anyaŋeɔ lɛ he. (Maŋts. 23:​10.)

No hewɔ lɛ te fee tɛɛŋ ni ŋmɛnɛ Yudafoi ajamɔ mli tsɔɔlɔi tsɔɔ tsɔɔmɔi ni keɔ susuma ni gbooo kɛ naanɔ toigbalamɔ he lɛ? Supplement afu Dictionnaire de la Bible lɛ kɛ amaniɛbɔɔ ni nyiɛ sɛɛ nɛɛ haa wɔ: “ [Kɛha Yudafoi lɛ] amɛsusuɔ Yiwalaheremɔ he akɛ nɔ ni abaana ajɛ shikpɔŋ nɔ . . . ekɔɔɔ bɔni Mesia lɛ he hiɛnɔkamɔ lɛ ji nɔ ni ma shi shiŋŋ lɛ he nɔ ko, kɛ bɔni wɔsɛɛ be nɔyeli lɛ sɛɛ baatsɛ kɛyashi lɛ he nɔ ko​—mɛi komɛi po heɔ yeɔ akɛ ebaafee nɔ ni baahi shi kɛya naanɔ​—bɔni maŋ lɛ kɛ nakai jamɔ be lɛ ji shikpɔŋ hɔ nɔ̃ ha lɛ ji shishijee nii. Kɛkɛ ni gbɛkpamɔ hee ko jie ‘ehe kpo: Miishɛɛ shihilɛ yɛ gbele sɛɛ ni ‘abale ehee.’” (Nɔ ni atsɔmɔ lɛ lɛ ji wɔ nɔ)

Te fee tɛɛŋ ni Yudafoi lɛ “bayoo” akɛ “gbɔmɔ yɛ “susuma” ni hiɔ shi yɛ gbɔmɔtso lɛ gbele sɛɛ? Woji ni kɛ hewalɛ wieɔ lɛ yaa nɔ amɛkɛ enɛ he adafitswaa ni ma shi Shiŋŋ haa wɔ. The Jewish Encyclopedia, lɛ kpɛlɛɔ nɔ akɛ: “Be mli ni Yudafoi lɛ kɛ Persiabii kɛ Helabii asusumɔ lɛ bakpe pɛ kɛkɛ ni susuma ni ejie ehe kɛjɛ gbɔmɔtso lɛ mli, ni etsɔ mɔ aŋkro lɛ bahe shi yɛ Yuda jamɔ mli.” Dictionnaire Encyclopedia de la Bible lɛ maa enɛ nɔ mi, akɛ: “Susuma ni gbooo lɛ he jwɛŋmɔ lɛ ji Helabii asusumɔ, yɛ be mli ni gbohiiashitee he hiɛnɔkamɔ lɛ ji Yudafoi ajwɛŋmɔ . . . Be mli ni Alexander ye kunim pɛ kɛkɛ ni Yudajamɔ je shishi ekpɛlɛ Helabii ahemɔkɛyeli nɔ fiofio.”

Kɛji akɛ mɔ ko jeɔ he ni Yudafoi lɛ heee susuma ni gbooo lɛ amɛyeee kɛjɛ shishijee Iɛ he ŋwane lɛ, belɛ efa po ákɛ aaakɛɛ akɛ yɛ Ŋmɛnɛŋmɛnɛ Beaŋ klɛŋklɛŋ afii oha lɛ mli tɔ̃ɔ lɛ no mli lɛ sane lɛ ji nɔ ko ni Yudafoi lɛ enako naa jogbaŋŋ yɛ amɛjwɛŋmɔi amli, ni nɔ ni yeɔ anɔkwa sane nɛɛ he odase ji Farisifoi lɛ ni heɔ susuma ni gbooo lɛ amɛyeɔ, yɛ be mli ni Sadukifoi lɛ heee yeee lɛ.​—Kwɛmɔ Josephus, Antiquities, Book 18, chapter 1, par. 3, 4; Wars, Book 2, chapter 8, par. 14; okɛto Bɔfoi 23:8 he.

Atsake Shishijee Mesia He Hiɛnɔkamɔ Lɛ

Taakɛ bɔni Yudafoi lɛ ŋmɛɛ amɛhiɛnɔkamɔ kɛha wɔsɛɛ be mli wala kɛtsɔ gbohiiashitee nɔ lɛ mli fiofio ni amɛkpɛlɛ wɔŋjalɔi ajwɛŋmɔ ni kɔɔ “susuma” ni etse ehe ni gbooo lɛ he lɛ, nakai nɔŋŋ amɛshishijee Mesia lɛ he hiɛnɔkamɔ bafee nɔ ni etsake. Beni shɛɔ Ŋmɛnɛŋmɛnɛ Beaŋ klɛŋklɛŋ afii oha lɛ mli lɛ, no mli lɛ Yudafoi a-Mesia hiɛnɔkamɔ lɛ ebatsɔ maŋ lɛ maŋkwramɔŋ hiɛnɔkamɔ

Beni emaa enɛ nɔ mi lɛ, The Jewish Encyclopedia lɛ kaneɔ akɛ: “Beni Makabii amaŋtsɛyeli [afii ohai enyɔ D.Ŋ.B. lɛ gbee shi sɛɛ̃, yɛ be mli ni Herode kpeteŋkpele lɛ kɛ eweku lɛ kɛ eyiwalɛ nɔyeli lɛ kɛ Roma maŋtsɛyeli lɛ kɛ yiwaa kɛ efɔŋfeemɔ eha amɛshihilɛ lɛ efee nɔ ni amɛnyɛɛɛ dɔŋŋ lɛ dani Yudafoi lɛ je shishi amɛtao abobaahe yɛ adesa ko ni ji Mesia lɛ diɛŋtsɛ mli akɛ amɛhiɛnɔkamɔ. Amɛshwe shiwoo kpɔlɔ ni baajɛ David we aba lɛ, mɔ ni baaha amɛye amɛhe kɛjɛ maŋsɛɛ nɔyelɔ lɛ kɔŋtso ni amɛhiɔ lɛ shishi lɛ.”

Alfred Edersheim ŋma yɛ ewolo ni ji Life and Times of Jesus the Mesia lɛ mli akɛ: “Fɛɛ ni Israel hiɛ ka nɔ pɛ ji maŋ lɛ ni aaato ama shi ekoŋŋ kɛ enunyam Atu nɔ fɛɛ nɔ aha enɛ he nitsumɔ; Mesia Diɛŋtsɛ ji dɛŋdade kpeteŋkpele ni aaatsɔ nɔ akɛná enɛ. . . . Jwɛŋmɔ ni Rabifoi lɛ hiɛ yɛ Mesia lɛ he lɛ jeee akɛ,‘la ni baakpɛ aha Jeŋmajiaŋbii, kɛ E-webii, Israel anunyam’​—nɔ ni adesai taoɔ ni amɛtsui anyɔ amɛmli lɛ.”

Edersheim tee nɔ etsɔɔ akɛ, ‘beni shɛɔ wɔ Ŋmɛnɛŋmɛnɛ Beaŋ klɛŋklɛŋ afii oha lɛ mli lɛ, no mli lɛ Yudafoi ajamɔ mli hiɛnyiɛlɔi lɛ ahiɛ kaaa Mesia-Kpɔlɔ ko nɔ dɔŋŋ.’ Etsɔɔ mli akɛ: “Amɛsusumɔi ni abua naa kɛjɛ amɛniŋmaai amli lɛ tsɔɔ akɛ, Shishijee Esha he tsɔɔmɔi wuji lɛ kɛ wɔ eshafeemɔ su lɛ jeee nɔ ni blema Rabifoi lɛ heɔ yeɔ dɔŋŋ. Akɛni amɛnuuu he akɛ kpɔmɔ kɛmiijɛ esha mli he miihia hewɔ lɛ, wɔbaanyɛ wɔnu nɔ hewɔ ni Rabifoi ablemasaji lɛ ekpɛlɛɛɛ Mesia lɛ Osɔfoi anitsumɔ lɛ nɔ, kɛ bɔni E-puemɔ akɛ amɛmaŋtsɛ kɛ Kpɔlɔ haa nɔ ni E-kɛɔ akɛ lɛ ji E-maŋbii lɛ a-Gbalɔ lɛ nɔ kwraa lɛ. Enɛ ji hiamɔ ni bɛ ni ayooɔ daa lɛ diɛŋtsɛ ni maa nɔ mi babaoo yɛ be mli ni Israel maŋ lɛ piimɔi tamɔ nɔ ni anyɛɛɛ atsɔɔ mli kwraa lɛ.”

No hewɔ lɛ Yudafoi ashishijee hiɛnɔkamɔ lɛ laaje fiofio. Mesia maŋtsɛ ko, ni jeee Yudafoi anɔ pɛ ebaaye, shi moŋ ebaatsɔ “kane eha jeŋmaji krokomɛi” lɛ laaje ni nɔ ni akɛto najiaŋ ji maŋ hiɛnyiɛlɔ ni baanyiɛ amɛhiɛ ni amɛyɛ amɛmaŋkwramɔŋ kɛ jamɔŋ henyɛlɔi lɛ anɔ kunim he hiɛnɔkamɔ ni yɔɔ keketee. Nɔ ni akɛto shikpɔŋ nɔ “Afii Akpe Hejɔɔmɔ Gbi” he hiɛnɔkamɔ ni no mli lɛ Mesia lɛ kɛ “paradeiso toiŋjɔlɛ yinɔ kpakpa baaba,” “jeŋ ni toiŋjɔlɛ kɛ ekomefeemɔ ni yeɔ emuu yɔɔ bɔɔnii fɛɛ ateŋ,” lɛ najiaŋ ji ŋwɛi hiɛnɔkamɔ ko ni anaaa naa ni damɔ susuma ni gbooo ni ana kɛjɛ Babilonbii, Persiabii kɛ Helabii adɛŋ.

Afii lɛ tee nɔ ho. Ni maŋkwramɔŋ Mesia ko ni tamɔ nakai baaa ni eeebakpɔ Yudafoi lɛ aloo yɛ Yerusalem hiɛkpatamɔ yɛ afi 70 Ŋ.B. lɛ mli koni ebabua amɛnaa ni eto amɛ gbɛjianɔ ekoŋŋ. No hewɔ lɛ nɛkɛ Mesia lɛ he hiɛnɔkamɔ ni amɛtsake lɛ nɛɛ hu laaje yɛ Yudafoi lɛ atsui mli. Taakɛ Edersheim wie he lɛ: “Mɛni hewɔ ni Israel kpɔmɔ kɛ Mesia lɛ baa lɛ etsɛ tsɔ ni anyɛɛɛ atsɔɔ mli Lɛ? Biɛ ji heni kpeehe lɛ naa ehe yɛ teemɔŋ sane ni anyɛɛɛ ana naa ni yɔɔ be fɛɛ lɛ mli. Emlitsɔɔmɔ ni abɔɔ mɔdɛŋ ni akɛha lɛ ji yiŋsusumɔi komɛi kɛkɛ ni akɛhaa, aloo mɔdɛŋ ni abɔɔ koni ajo sane ni ka shi lɛ naa foi. Gbɛ pɛ ni ka shi ni eshwɛ ji ni afee dioo yɛ nɛkɛ sanebimɔi nɛɛ ahe kwraa​—dioofeemɔ ni tsɔɔ shi ni aba yɛ awerɛho mli ni tsɔɔ nɔ ko faŋŋ ni kɛlɛ anyɛɛɛ atsɔɔ mli, . . . dioofeemɔ ni eba yɛ nijiaŋwujee kɛ haomɔ ni baa yɛ be fɛɛ mli hewɔ. No hewɔ lɛ kpeehe lɛ hiɛnɔkamɔ kpeteŋkpele lɛ etsɔ tamɔ gbonyobu loo sãi nɔ niŋmaai ni mɛi akpei abɔ ni yɛ afii ohai babaoo nɛɛ amli lɛ amɛkɛ yaafonui ni sɛɛnamɔ bɛ he efɔ Sɔlemɔwe lɛ ni etsɔ amaŋfɔ lɛ mli lɛ ati mli akane.”

Nɔ ni yɔɔ miishɛɛ ji akɛ,‘shishijee paradeiso ni ato ama shikpɔŋ nɔ lɛ he hiɛnɔkamɔ yɛ Mesia lɛ nɔyeli shishi lɛ yɛ lolo kɛha Yudafoi anɔkwafoi, ni mɛi komɛi po ekpɛlɛ enɛ nɔ momo ni amɛkpa yaafo. Shi sanebimɔ ni yɔɔ kɛha wɔ kanelɔi krokomɛi babaoo lɛ kahe eji akɛ: Mɛɛ gbɛ nɔ Yesu Kristo ni ji Mesia lɛ baa lɛ baaná hewalɛ yɛ “Afii Akpe Hejɔɔmɔ Gbi” lɛ ni “toiŋjɔlɛ kɛ ekomefeemɔ baahi bɔɔnii fɛɛ ateŋ” yɛ shikpɔŋ nɔ lɛ nɔ hewalɛ? Ni kɛji akɛ Kristo ma nakai hiɛnɔkamɔ lɛ nɔ mi lɛ, mɛni hewɔ ni Protestant kɛ Katolek “Kristofoi” fɛɛ ekpɛlɛɛɛ nakai afii akpe hiɛnɔkamɔ lɛ nɔ lɛ?

[Mfoniri ni yɔɔ baafa 5]

Komunist “miishɛɛ ni baaba wɔsɛɛ lo”? Hindu loo Budhabii a-Nirvana? Katolek loo Protestant “ŋwɛi hejɔɔmɔ”? Mɛɛ hiɛnɔkamɔ Biblia kɛhaa?

[Akrabatsa ni yɔɔ baafa 7]

“Nyɔŋmɔ, okɛ okojomɔi lɛ aha maŋtsɛ lɛ, ni okɛ ojalɛ Iɛ aha maŋtsɛ bi lɛ. Ha ekɛ jalɛ aye omaŋ lɛ nɔ, ní ekɛ kojomɔ abu onɔnalɔi lɛ ohe. Gɔji lɛ aaawo hejɔlɛ aha maŋ lɛ, ni ŋmeŋmei lɛ hu kɛ jalɛ aaaba. Eeeye maŋbii lɛ ateŋ nɔnalɔi asane eha amɛ, ni eeehere ohiafoi abii ayiwala, ni eeekumɔ wieyelɔ dukuduku.”​—Lala 72:​1-4.