Ani Obaabo Nyɔŋmɔ Toi?

‘SHI yɛ anɔkwale mli lɛ Biblia lɛ ehi wɔmasɛi yɛ be kakadaŋŋ mli, ni shihilɛ ni yɔɔ je lɛ mli lɛ miifite fe be fɛɛ!’ Enɛ ji anɔkwale lɛlɛŋ, ni yiŋtoo lɛ ji akɛ gbɔmɛi booo Nyɔŋmɔ toi beni ewieɔ. Mɛni hewɔ?

Yɛ shihilɛi komɛi amli lɛ amɛjeee mɛi ni yɔɔ toiboo he miishɛɛ. Nyɛsɛɛ nɛɛ kuu ko ni amɛkɛɛ amɛyɔɔ adesai ashihilɛ he miishɛɛ jaje akɛ: “[Wɔ] kpoo jwɛŋmɔ ni ahiɛ akɛ Nyɔŋmɔ kɛ ehe ewo yinɔsane mli yɛ naakpɛɛ gbɛ nɔ aloo ejie lɛ diɛŋtsɛ ehe kpo etsɔɔ mɛi fioo ko aloo ákɛ ebaanyɛ ehere eshafeelɔi ayiwala lɛ.” Yɛ anɔkwale mli lɛ Nyɔŋmɔ wieɔ ŋmɛnɛ. Jeee kɛha “mɛi fioo ni ahala amɛ,” shi moŋ kɛha mɛi fɛɛ ni baabo toi. “Nyɔŋmɔ . . . eewo gbɔmɛi fɛɛ ni yɔɔ he fɛɛ he lɛ kita akɛ amɛtsake amɛtsui.” (Bɔf. 17:30) Shi kɛlɛ, mɔ fɛɛ mɔ ni kpooɔ jwɛŋmɔ ni ahiɛ akɛ Nyɔŋmɔ wieɔ lɛ boŋ lɛ toi. Amɛwɔsɛɛ be ewo duŋ kpii.

Eji anɔkwale akɛ jeŋ nɔyelɔi pii ekɛɛ akɛ amɛheɔ Nyɔŋmɔ nɔ amɛyeɔ. Shi kɛlɛ amɛyeko amɛbuako ni nibii ahi. Mɛni hewɔ? Titri lɛ taakɛ France nilelɔ Voltaire kɛɛ be ko lɛ: “Gbɔmɛi wuji ni yɔɔ je lɛ mli lɛ ateŋ mɛi babaoo hiɔ shi tamɔ mɛi ni amɛheee Nyɔŋmɔ nɔ amɛyeee.” Kɛɛmɔ ni amɛkɛɔ akɛ amɛjaa Nyɔŋmɔ lɛ hako amɛkpa gbɔmɛi ahiɛkpatamɔ, tawuu, nɔnyɛɛ, yiwaa kɛ kutumpɔo ni efee nibii ni yaa nɔ yɛ yinɔsane mli lɛ. Eka shi faŋŋ akɛ, beni Nyɔŋmɔ wieɔ lɛ amɛbooo etoi.

MƐI KOMƐI NUƆ SHI AMƐBOOO TOI

‘Shi ani ejeee anɔkwale akɛ jamɔi pii kɛ Biblia lɛ tsuɔ nii yɛ amɛsɔlemɔi amli, ni gbɔmɛi nuɔ emli wiemɔi lɛ daa Hɔgbaa?’ Eji anɔkwale. Shi be mli ni amɛnuɔ lɛ, ani amɛboɔ toi lɛlɛŋ, ni ji akɛ, amɛkɛ nɔ ni amɛnuɔ lɛ tsuɔ nii?

Akɛ nɔkwɛmɔ nɔ lɛ, sɔlemɔi pii kɛ wiemɔ “Wɔ Tsɛ ni yɔɔ Ŋwɛi” sɔlemɔ lɛ (aloo, “Nuŋtsɔ lɛ Sɔlemɔ”) lɛ tsuɔ nii yɛ amɛ Hɔgbaa sɔlemɔi amli. Sɔlemɔ nɛɛ ji Biblia lɛ fa. Yɛ Katolek Biblia ko mli lɛ, sɔlemɔ lɛ klɛŋklɛŋ wiemɔi lɛ kaneɔ nɛkɛ: “Wɔ Tsɛ ni yɔɔ ŋwɛi. Ogbɛi lɛ he atse. Omaŋtsɛyeli lɛ aba. Afee osuɔmɔnaa nii yɛ shikpɔŋ nɔ taakɛ afeɔ yɛ ŋwɛi lɛ.”​—Mat. 6:​9, 10, Douay.

Mɛni ji Nyɔŋmɔ suɔmɔnaa nii ni esa akɛ afee yɛ shikpɔŋ nɔ lɛ? Atsɔɔ efa ko yɛ nɛkɛ shiwoo nɛɛ mli: “Shi mɛi ni he jɔ lɛ, shikpɔŋ lɛ aaatsɔ amɛnɔ, ni amɛmii aaashɛ amɛhe yɛ hejɔlɛ babaoo mli.” (Lala 37:11) Taakɛ “wɔ Tsɛ ni yɔɔ Ŋwɛi” sɔlemɔ lɛ tsɔɔ lɛ Nyɔŋmɔ “maŋtsɛyeli” ni ji enɔyeli lɛ ji nɔ ni kɛ nɛkɛ hejɔlɛ nɛɛ baaba.

No hewɔ lɛ eyɛ miishɛɛ waa akɛ aaakane yɛ adafitswaa woji amli yɛ afi 1965 mli, beni Pope Paul VI yasra Jeŋmaji Ekomefeemɔ lɛ akɛ ekɛɛ akɛ: “Gbɔmɛi ni yɔɔ shikpɔŋ lɛ nɔ lɛ tsɔɔ amɛhiɛ amɛhaa Jeŋmaji Ekomefeemɔ lɛ akɛ amɛnaagbee toiŋjɔlɛ kɛ ekomefeemɔ he hiɛnɔkamɔ kome pɛ.” (Niŋmaa ni atsɔmɔ lɛ lɛ ji wɔ nɔ) Eka shi faŋŋ akɛ nɛkɛ wiemɔ nɛɛ ha Jeŋmaji Ekomefeemɔ lɛ mlibii lɛ nu shishi akɛ amɛnitsumɔ lɛ he miihia ni esa. Shi kɛji no ji naagbee toiŋjɔlɛ he hiɛnɔkamɔ lɛ, belɛ Nyɔŋmɔ maŋtsɛyeli lɛ hu? Eka shi faŋŋ akɛ Pope Paul VI lɛ boko “Wɔ Tsɛ ni yɔɔ Ŋwɛi” sɔlemɔ lɛ mli wiemɔi lɛ atoi.

Nɔkwɛmɔ nii babaoo yɛ ni tsɔɔ akɛ kɛji akɛ gbɔmɛi nu ni aakane Biblia lɛ po lɛ, ebafeɔ tamɔ kusum nifeemɔ ko pɛ yɛ amɛhiɛ, ni amɛbooo toi ni amɛnuuu nɔ ni akɛɔ lɛ hu shishi.

TOIBOO KƐ ENƆ YELI

“Ni aaabo toi” hu atsɔɔ “ni akɛ hiɛdɔɔ aaasusu he.” Mɛi pii yɛ ni ŋmɛnɛ amɛnuɔ nɔ ni Nyɔŋmɔ kɛɔ yɛ saji komɛi ahe lɛ shishi jogbaŋŋ shi amɛkɛ hiɛdɔɔ susuuu ewiemɔi lɛ ahe. Amɛnyiɛɔ amɛ diɛŋtsɛ amɛsusumɔi asɛɛ. No hewɔ lɛ, kɛ Nyɔŋmɔ wie lɛ, amɛbooo toi.

Enɛ he nɔkwɛmɔ nɔ ji jeŋba he sane lɛ. Nyɔŋmɔ kɛ tɛi ni efolɔ eshwie shi yɛ jeŋba he lɛ emamɔ shi faŋŋ. Ekɛɔ akɛ: “Ajwamaŋbɔlɔi loo wɔŋjalɔi loo gbalaŋkulɔi loo mɛi ni kɛ amɛ diɛŋtsɛ amɛheloo feɔ yakayakanii loo hii ni kɛ hii feɔ yakayakanii . . . anine shɛŋ Nyɔŋmɔ maŋtsɛyeli lɛ nɔ kwraa.”​—1 Kor. 6: 9, 10.

Ŋmɛnɛŋmɛnɛ beaŋ gbɔmɛi ni Nyɔŋmɔjamɔ mli hiɛnyiɛlɔi babaoo fata he kpooɔ tɛi ni afolɔ ashwie shi nɛɛ. Amɛtsɛɔ enɛ akɛ ebe eho, ni amɛwoɔ hewalɛ ni ahi shi ‘yɛ gbɛ ni yɔɔ mlɛo’ nɔ. Mɛni ejɛ mli eba? Gbekɛbii yei ahɔŋɔɔ, musufitemɔi, babaso helai, gbalafitemɔ kɛ henumɔi amli naagbai ni etsɔ tamɔ tsɛŋemɔhela.

Esaaa akɛ enɛ feɔ wɔ naakpɛɛ. “Nyɔŋmɔ lɛ aliii lɛ yaka. Ejaakɛ nɔ pɛ ni gbɔmɔ duɔ lɛ, no nɔŋŋ ebaakpa.” (Gal. 6:⁠7) Nyɔŋmɔ mlai ni kɔɔ jeŋba he lɛ yɛ kɛha wɔ yibaamɔ beni afee ni ahi aha wɔ taakɛ bɔ ni mlai ni kɔɔ enibɔɔ he lɛ ji lɛ pɛpɛɛpɛ. Kɛ mɔ ko tse Nyɔŋmɔ hiɛ atua lɛ, nɔ ni baajɛ mli aba lɛ efeŋ ekpakpa. Kɛ mɔ ko ekpɛlɛɛɛ tɛi ni Nyɔŋmɔ efolɔ eshwie shi lɛ anɔ lɛ, etamɔ nɔ ni eete shi kɛmiiwo nigbalamɔ hewalɛ he mlai. Bɔ fɛɛ bɔ ni wɔ aŋkroi lɛ asusumɔ ji ha lɛ, kɛ wɔte shi wɔshi enɛ lɛ, ekɛ oshara baaba wɔ nɔ.

KƐ NYƆŊMƆ WIE LƐ, ANI MƆ KO BOƆ TOI?

Obaabi akɛ, ‘Kɛji akɛ Nyɔŋmɔjalɔi kɛ je lɛŋ hiɛnyiɛlɔi babaoo nɛɛ booo Nyɔŋmɔ toi kɛ ewie lɛ, ani mɔ ko yɛ ni boɔ toi?’ Hɛɛ, mɛi komɛi feɔ nakai. Be ko lɛ Yesu jaje akɛ: “Mɔ fɛɛ mɔ ni jɛ anɔkwale lɛ mli lɛ nuɔ migbee.” Akɛni ekɛɛ akɛ nɔ fɛɛ nɔ ni ewieɔ lɛ jɛ Nyɔŋmɔ ŋɔɔ hewɔ lɛ, toiboo ni aaafee aha Yesu lɛ tamɔ nɔ ni aabo Nyɔŋmɔ toi. No hewɔ lɛ, “mɔ fɛɛ mɔ ni jɛ anɔkwale lɛ mli lɛ” boɔ Nyɔŋmɔ toi.​—Yoh. 18:​37; 7:​16, 17.

Ni mɛnɛɛmɛi feɔ babaoo fe toiboo kɛkɛ. Amɛjeɔ kpo amɛyayeɔ amɛbuaa mɛi krokomɛi ni amɛbo toi. Yesu fa amɛ akɛ: “Nyɛyaa ni nyɛyafea jeŋmaji fɛɛ mikaselɔi, nyɛbaptisia amɛ . . . ni nyɛtsɔɔ amɛ ni amɛye nii fiaa ni mikɛɛnyɛ lɛ anɔ.” (Mat. 28:​1, 20) Ani mɔ ko yɛ ni feɔ enɛ ŋmɛnɛ?

Sanebimɔ nɛɛ hi obalayoo ko jwɛŋmɔ mli afii pii ni eho nɛ. Jamɔi ni ele lɛ efutu ejwɛŋmɔ yɛ nibii ni teɔ shi woɔ amɛhe ni enaa lɛ hewɔ, ni ebafee mɔ ko ni heee nɔ ko eyeee dɔŋŋ. Eetao su ko ni Yesu kɛɛ akɛ abaana yɛ mɛi ni “jɛ anɔkwale lɛ mli” lɛ ahe lɛ, tsɛbelɛ eleee: “Amɛyibii lɛ nyɛkɛ aaale amɛ.” Akɛni eleee Nyɔŋmɔjamɔ kuu ko ni woɔ yibii ni ale akɛ eji yibii kpakpai hewɔ lɛ, enu he akɛ Nyɔŋmɔ ewieee ŋmɛnɛ.​—Mat. 7:⁠16.

Be ko, beni afee ni efee nɔ ko ni baasa enaanyo ko hiɛ lɛ, nɛkɛ obalayoo nɛɛ yasra Nyɔŋmɔjamɔ kuu ko ni ekɛ ehe ebɔko amɛhe da. Akɛni amɛhiɛ naanyobɔɔ su hewɔ lɛ ebi amɛteŋ mɔ kome sane koni ekwɛ nɔ ni baaba. Efee lɛ naakpɛɛ beni eha lɛ hetoo diɛŋtsɛ ni jɛ Biblia lɛ mli lɛ. Kɛkɛ ni etee kuu lɛ mlinyo kroko ŋɔɔ ni ebi lɛ nakai sane lɛ nɔŋŋ. Ehiɛ fee lɛ yaa beni ena akɛ mɔ lɛ gbele e-Biblia mli ni eha hetoo kometoo lɛ nɔŋŋ. Eku sɛɛ eti nifeemɔ nɛɛ mli ni ena akɛ yɛ jamɔ gbɛfaŋ lɛ, nɛkɛ gbɔmɛi nɛɛ efee ekome. Amɛyiŋ futuko.

Enɛ fee yoo nɛɛ fɛo. Eleee akɛ trukaa lɛ eba le gbɔmɛi ni “jɛ anɔkwale lɛ mli” lɛ asubaŋ ko. Amɛbɔɔ mɔdɛŋ ni ‘amɛyitsoŋ kɛ amɛjwɛŋmɔ afee ekome.’ (1 Kor. 1:10) Amɛyooɔ akɛ “ŋmalɛ fɛɛ ŋmalɛ jɛ Nyɔŋmɔ mumɔŋ” No hewɔ lɛ, jeee gbɔmɛi ajwɛŋmɔi amɛkaseɔ ni amɛtsɔɔ, shi moŋ nɔ ni Nyɔŋmɔ kɛɔ yɛ e-Biblia Iɛ mli lɛ.​—2 Tim. 3:⁠16.

Obalayoo nɛɛ ŋmɛɛ Nyɔŋmɔ ni eheee eyeee su lɛ he fiofio. Ebana miishɛɛ akɛ kɛ Nyɔŋmɔ aaawie lɛ eeebo toi. Ni ekɛ ehe bɔ gbɔmɛi “ni jɛ anɔkwale lɛ mli” lɛ ni yaa amɛyakaneɔ Biblia lɛ amɛtsɔɔ mɛi krokomɛi, ni amɛkɛyeɔ amɛbuaa gbɔmɛi babaoo koni kɛ Nyɔŋmɔ wie lɛ ni amɛbo toi lɛ ahe yɛ miishɛɛ mli. Yɛ naagbee lɛ, ebatsɔ Yehowa Odasefoi asafoi lɛ mlinyo ni yɔɔ ekaa.

NƆ NI NYƆŊMƆ KƐƆ

Ani “ojɛ anɔkwale lɛ mli”? Belɛ obaasumɔ ni obo toi​—obo toi lɛlɛŋ, kɛ shishinumɔ akɛ ooogbala ojwɛŋmɔ kɛba nɔ ni akɛɔ lɛ nɔ ni okɛ nɔ ni Nyɔŋmɔ kɛɔ lɛ awo otsui mli. Enɛ ni ooofee lɛ baafee tamɔ nɔ ni eshwɛ okometoo, akɛni gbɔmɛi pii booo Nyɔŋmɔ toi ŋmɛnɛ lɛ hewɔ. Nɔ ni yɔɔ mɔbɔ ji akɛ, “amɛleee Yehowa gbɛ lɛ” tamɔ blema Israelbii lɛ.​—Yer. 5:⁠4.

Shi kɛlɛ, jwɛŋmɔ yɛ mli akɛ wɔɔbo Nyɔŋmɔ nilee toi. “Shi mɔ ni boɔ mi [anɔkwale nilee] toi lɛ aahi shi shweshweeshwe, ni ehe aaajɔ lɛ ni efɔŋ gbeyeishemɔ bɛ mli.” (Abɛi 1:​20-33) Ŋmɛnɛ, akudɔɔ mɛi ni boɔ Nyɔŋmɔ toi lɛ koni amɛkwa osharai ni jɛɔ jeŋ ni yeee emuu nɛɛ mli baa lɛ. No hewɔ lɛ amɛjoɔ osharai ni he ehiaaa akɛ eba amɛnɔ lɛ naa foi. Ni kɛji akɛ amɛtee nɔ amɛye anɔkwale lɛ, etsɛŋ ni amɛbaahi shi yɛ jeŋ ni ‘osharai’ ehiŋ mli dɔŋŋ lɛ mli. Yɛ nakai be lɛ mli lɛ, Nyɔŋmɔ “aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyelɔi ko kɛ bolɔmɔ ko kɛ nɔnaa ko hu bɛ dɔŋŋ.”​—Kpoj. 21:⁠4.

Enɛ ji jeŋ ni Nyɔŋmɔ baasaa aha mɛi ni “jɛ anɔkwale lɛ mli” lɛ. Ani obaasumɔ ni ofee jeŋ ni tamɔ nɛkɛ lɛ fa? Belɛ ha efee oti ni ma ohiɛ akɛ kɛ Nyɔŋmɔ wie lɛ ooobo toi. Yehowa Odasefoi aaana he miishɛɛ akɛ amɛaaye amɛbuao ni ofee nakai.

[Akrabatsa ni yɔɔ baafa 6]

Sɛɛnamɔi Ni Jɛɔ Toiboo Ni Afeɔ Beni Nyɔŋmɔ Wieɔ Lɛ Mli Baa

● Paradeiso shikpɔŋ he hiɛnɔkamɔ

● Hekɛnɔfɔɔ yɛ wɔsɛɛ be mli

● Miishɛɛ weku shihilɛ bianɛ

● Toiŋjɔlɛ mli miishɛɛnamɔ

● Ekomefeemɔ yɛ anɔkwale jamɔ mli

● Hemɔkɛyeli yɛ Nyɔŋmɔ maŋtsɛyeli kɛtsɔ Kristo nɔ lɛ mli