Mɛni Hewɔ Osɔleɔ Akɛ, “Ha Omaŋtsɛyeli Lɛ Aba”?
“Nyɔŋmɔ maŋtsɛyeli lɛ baaa taakɛ nɔ ko ni anaa yɛ faŋŋ mli, ni asaŋ gbɔmɛi ekɛŋ akɛ, ‘Kwɛmɔ jɛmɛ!’ aloo ‘Biɛ!’ Ejaakɛ, naa! Nyɔŋmɔ maŋtsɛyeli lɛ yɛ nyɛteŋ.”—Luka 17:20, 21, NW.
1, 2. Yɛ nɔ ni kɛ adafitswaa woji ni anyɛɔ akɛ he fɔɔ nɔ kpaa gbee lɛ, mɛni hewɔ abaanyɛ atsɔɔ akɛ wɔbe nɛɛ ji be ni gbeyeishemɔ yɔɔ mli lɛ?
1 ANI Nyɔŋmɔ maŋtsɛyeli lɛ he miihia wɔ? Eka shi faŋŋ akɛ ehe miihia wɔ! Ejaakɛ wɔ, ni ji adesai lɛ miitsɔ yinɔsane be ni wa fe fɛɛ lɛ mli ŋmɛnɛ. Gbeyei bei nɛ! Yɛ be mli ni emaa enɛ nɔ mi lɛ, Manchester Guardian Weekly ni aŋma yɛ June 7, 1981 lɛ yɛ enɛ kɛɛmɔ: “SS-20 osramaŋi ni Soviet Union, Rusia, kɛmamɔ shi kɛjɛ nyɔŋ nɛɛ shishijee mli lɛ baanyɛ akpata London, Paris, Bonn, Rome kɛ Brussels fɛɛ hiɛ . . . Nɛkɛ osramaŋi nɛɛ eko fɛɛ eko tere ta okplɛmii ni amɛtsiimɔ shɛɔ kilitons 150, ni tsɔɔ akɛ, hewalɛ ni abaafɛ ashwie maŋtiase kome nɔ lɛ da fe nɔ ni afɛ ashwie Hiroshima nɔ lɛ nɔ toi 30. Kɛ Rusia tswia nɛkɛ SS-20 nɛɛ mli enumɔ lɛ, nɔ ni baashwɛ kɛha lɛ lolo ji 210 ni abaanyɛ atswia kɛya he kroko, ni ebiŋ po ni kɔɔyɔŋ ta lɛji ni tere okplɛmii, ŋshɔ shishi lɛji ni yɔɔ aloo majimaji ateŋ osramaŋi 1,400 ni eko fɛɛ eko tere okplɛmii megatons abɔ ni akɛto aha be ni he hiaa lɛ po aye abua lɛ.”
2 Times wolo tɛtrɛɛ ni aŋma yɛ October 26, 1981 lɛ wie noko yɛ ehiɛ gbɛ sane lɛ he ni kɔɔ “Tawuu nii ni akɛ wulaa Je lɛ,” he ni etsɔɔ shihilɛ lɛ mli akɛ “anyɛɛɛ aye nɔ dɔŋŋ ni aleee he ni abaafo he husu kɛyata.” Ewie “nɔ ni yɔɔ gbeyei ni abɔi feemɔ bianɛ ni miiya nɔ kɛ foi lɛ he: yɛ maji wuji kɛ maji bibii fɛɛ agbɛfaŋ lɛ, tawuu nii ahɔɔmɔ ebatsɔ nii titri ni atsɔɔ nɔ akɛyeɔ majimaji pii ateŋ saji . . . ’nɔ titri yɛ jeŋ maŋkwramɔ shishitoo mli.’”
3. (a) Taakɛ 1 Mose 6:11, 13 lɛ tsɔɔ lɛ, Noa gbii lɛ tamɔ wɔgbii nɛɛ yɛ mɛɛ gbɛ nɔ? (b) Mɛɛ Yesu wiemɔi ji nɔ ni eba mIi bianɛ?
3 Yɛ anɔkwale mli lɛ, taakɛ “bɔ ni Noa gbii lɛ fee lɛ,” “Shikpɔŋ lɛ nɔ eyi obɔ kɛ yiwalɛ” kɛ nɔ ko ni baanyɛ afite nii waa fe fɛɛ yɛ jeŋ fɛɛ. (1 Mose 6:11, 13; Mateo 24:37) Ŋwanejee ko bɛ he akɛ, beni Yesu gba “nɛkɛ nibii ni baaba” yɛ je lɛ naagbee be mli lɛ he lɛ, ewie akɛ “jeŋmaji afimɔ lɛ aaaba shikpɔŋ lɛ nɔ, ni amɛaafee yeyeeye . . . ni nɔ aaanyɔnyɔɔ gbɔmɛi anɔ yɛ gbeyei nibii ni baa je lɛŋ agbɛkwɛmɔ hewɔ.”—Luka 21:25, 26, 36.
Nyɛtsui Anyɔa Nyɛmli!
4. Mɛni hewɔ esa ekɛ wɔna nibii ahe jwɛŋmɔ kpakpa lɛ?
4 Shi kɛlɛ, ani wɔbaanyɛ wɔkpa gbɛ akɛ wɔshikpɔŋ fɛfɛo nɛɛ Bɔlɔ ni yɔɔ suɔmɔ lɛ baaŋmɛ gbɔmɛi loo jeŋmaji ni sumɔɔ basabasafeemɔ ni tawuu he pɛ amɛnyaa lɛ gbɛ ni amɛfite eninenaa nitsumɔ lɛ kwraa? Ani wɔbaanyɛ wɔsusu akɛ Yehowa Nyɔŋmɔ baaŋmɛ ehenyɛlɔi agbɛ ni amɛkpata adesai ateŋ mɛi ni kɛ amɛklantei esɔ kɔii ni jaa lɛ yɛ “mumɔ kɛ anɔkwale mli” lɛ ahiɛ kwraa? (Yesaia 2:2-4; Yohane 4:24) Eŋmɛŋ gbɛ kɔkɔɔkɔ! Ni no hewɔ ni Yesu kɛ nɛkɛ wiemɔi nɛɛ fata bɔ ni etsɔɔ shihilɛ ni baaba yɛ ŋmɛnɛŋmɛnɛ gbii nɛɛ amli lɛ he lɛ, “shi beni nibii nɛɛ aaatsɔ naa shi lɛ, no lɛ nyɛkwɛa ŋwɛi ni nyɛholea nyɛyitsei anɔ, ejaakɛ nyɛkpɔmɔ lɛ miibɛŋkɛ.” (Luka 21:28) Yesu kɛɔ wɔ akɛ wɔna jwɛŋmɔ ni ja ni hi hu yɛ shihilɛi sɔrɔtoi ni ebɔle wɔhe kɛkpe yɛ “nibii agbɛjianɔtoo nɛɛ naagbee be” lɛ he.—Mateo 24:3-8, 33.
5. Mɛɛ je nɛkɛ esa akɛ wɔhi mli lɛ, ni kɛlɛ mɛɛ jwɛŋmɔ esa akɛ wɔna?
5 Hei pii yɛ je lɛŋ ni gbɛjegbɛi anɔ nyiɛmɔ bɛ shweshweeshwe dɔŋŋ. Gbalamlitsemɔ efa babaoo, wekui amligbalamɔ miiya nɔ, ni tsofai ni akɛ tsuɔ nii yɛ gbɛi fɔji anɔ kɛ ajwamaŋbɔɔ efa kɛyashɛ he ni etsɔ tsɛŋemɔ hela po. Enɛ ji jeŋ ni esa akɛ Yehowa jalɔi ahi mli lɛ. Shi tsɛ wɔyɛ je lɛŋ moŋ, shi esaaa akɛ je lɛ haa wɔnɔ. Ejaakɛ wɔbaanyɛ wɔna jwɛŋmɔ ni Yesu yɔɔ lɛ nɔŋŋ eko, mɔ ni jaje akɛ: “Je lɛŋ lɛ, hejaramɔ nyɛnaa, shi kɛlɛ nyɛtsui anyɔa nyɛmli, miye je lɛ nɔ kunim.”—Yohane 16:33.
6. (a) Mɛɛ nɔkwɛmɔ nɔ kpakpa Yesu fee yɛ ‘je lɛ nɔ kunim ni eye’ lɛ mli? (b) Mɛni hewɔ Yesu tsɔɔ akɛ wɔsɔle akɛ, “Ha omaŋtsɛyeli lɛ aba” lɛ?
6 Mɛni hewɔ Yesu nyɛ ‘eye je lɛ nɔ kunim’? Eje hemɔkɛyeli ni ma shi shiŋŋ ni eyɔɔ yɛ Nyɔŋmɔ maŋtsɛyeli ni ewo shi yɛ he lɛ mli lɛ hewɔ. Ele akɛ Yehowa kɛ Maŋtsɛyeli lɛ baaba yɛ Lɛ diɛŋtsɛ ebe ni sa mli kɛ egbɛ nɔ. Yesu hiɛ sɔ lɛ diɛŋtsɛ enitsumɔ ni akɛwo edɛŋ akɛ Maŋtsɛ ni ahala lɛ lɛ waa. Bɔni afee ni enine ashɛ nakai Maŋtsɛyeli lɛ nɔ lɛ, eŋmɛɛ nɔ fɛɛ nɔ ni kulɛ eeena akɛ gbɔmɔ ni yeɔ emuu yɛ shikpɔŋ nɔ lɛ he. Ni eesumɔ ni wɔ hu wɔna Maŋtsɛyeli lɛ mli jɔɔmɔi. Yɛ yiŋtoo nɛɛ hewɔ ni Yesu tsɔɔ ekaselɔi lɛ ni amɛsɔle akɛ: “Ha omaŋtsɛyeli lɛ aba.” (Mateo 6:10, NW) Gbɔmɛi akpekpei toi ohai abɔ eti nɛkɛ sɔlemɔ nɛɛ mli amɛkɛɛ yɛ afii ohai abɔ lɛ amli. Shi kwɛ bɔ ni mɛi fio ko pɛ yooɔ nɔ ni Maŋtsɛyeli lɛ diɛŋtsɛ ji shishi!
Maŋtsɛyeli Lɛ—Nɔ Ni Yɔɔ Diɛŋtsɛ
7. (a) Mɛni kɛ wɔkɛto he lɛ ehaa wɔnaa akɛ Nyɔŋmɔ maŋtsɛyeli lɛ ji nɔ ni yɔɔ diɛŋtsɛ? (b) Mɛɛ gbɛ nɔ atsɔɔ abuaa Maŋtsɛyeli lɛ nɔyelɔi lɛ, ni mɛni hewɔ wɔbaanyɛ wɔna nɔmimaa akɛ amɛbaakwɛ nibii ni he hiaa adesai lɛ anɔ diɛŋtsɛ?
7 Nyɔŋmɔ maŋtsɛyeli lɛ ji nɔ ni yɔɔ diɛŋtsɛ. Tamɔ bɔ ni ŋmɛnɛ wɔyɔɔ adesai amaŋtsɛyelii lolo, tamɔ Ŋleshi Maŋtsɛyeli, Nepal Maŋtsɛyeli, Denmark Maŋtsɛyeli kɛ ekrokomɛi babaoo lɛ, nakai nɔŋŋ hu Nyɔŋmɔ maŋtsɛyeli lɛ ji nɔyeli gbɛjianɔtoo diɛŋtsɛ. Tamɔ bɔ ni shikpɔŋ nɔ maŋtsɛyelii yɔɔ amɛmaŋ ajinafoi agwabɔɔ, bɛgwafoi kɛ najiaŋdamɔlɔi ni ahala amɛ lɛ, nakai nɔŋŋ hu ŋwɛi maŋtsɛyeli lɛ yɔɔ Yesu akɛ Maŋtsɛ ni Nyɔŋmɔ ehala lɛ, kɛ ehefatalɔi nɔyelɔi ni ahala amɛ. Shi yɛ enɛ mli lɛ, Nyɔŋmɔ diɛŋtsɛ halaa amɛ kɛjɛɔ adesai ni anyɛɔ akɛ he fɔɔ amɛnɔ lɛ ateŋ. Amɛji [“Nyɔŋmɔ halamɔ bii,” Authorized Version], “mɛi krɔŋkrɔŋi kɛ suɔmɔ mɛi.” (Kolosebii 3:12) Nyɔŋmɔ diɛŋtsɛ le sui ni hi fe fɛɛ ni ataoɔ yɛ nɔyelɔi jalɔi ahe fe mɔ fɛɛ mɔ, bɔni afee ni mɛnɛɛmɛi atsu adesai ahiamɔ nii ahe nii yɛ anɔkwale mli. Kɛ atee amɛ shi kɛtee ŋwɛi maŋtsɛyeli lɛ mli sɛɛ lɛ, nɛkɛ ŋwɛi nɔyelɔi 144,001 nɛɛ baahi gbɛhe ko ni he hiaa waa mli kɛha Maŋtsɛyeli lɛ nibii ni yɔɔ enɔyeli he ni yɔɔ shikpɔŋ nɔ lɛ nɔkwɛmɔ mli.—Kpojiemɔ 14:1.
8, 9. (a) Mɛni hewɔ Kristendom nyɛɛɛ atsɔɔ akɛ MaŋtsɛyeIi lɛ yɛ eshishibii lɛ? (b) Shi kɛlɛ namɛi ji eshishibii lɛ, ni amɛbaanyɛ amɛnya yɛ mɛɛ Biblia mli shiwooi ahewɔ? (d) Namɛi pɛ ji mɛi ni ŋmɛnɛ amɛjajeɔ “sanekpakpa” lɛ, ni mɛɛ miishɛɛ ji nɔ ni baanyɛ afee onɔ ŋmɛnɛ?
8 Belɛ namɛi baafee Maŋtsɛyeli lɛ shishibii? Kɛji akɛ wɔtee Kristendom jamɔi amli kɛha hetoo lɛ, amɛbaakɛɛ bo akɛ shishibii komɛi ehiŋ shi. Amɛnyiɛɔ Hela jeŋ nilee ni tsɔɔ akɛ susumai fɛɛ gbooo, ni akɛ amɛyaa “ŋwɛi” aloo “Hell” lɛ sɛɛ. Amɛheee Biblia mli shiwoo ni kɔɔ shikpɔŋ nɔ gbohiiashitee ni yɔɔ naakpɛɛ, ni ákɛ Nyɔŋmɔ kɛ adesai “baahi shi” ni ákɛ “Nyɔŋmɔ” “aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ” lɛ amɛyeee. (Yohane 5:28, 29; Kpojiemɔ 21:3, 4) Hɛɛ, Maŋtsɛyeli lɛ shishibii lɛ baafee adesai akpekpei toi akpekpei abɔ ni baahi shi kɛya naanɔ yɛ jeŋ muu fɛɛ paradeiso mli yɛ shikpɔŋ nɛɛ nɔ lɛ. Ni yɛ jamɔi fɛɛ ni yɔɔ shikpɔŋ nɔ lɛ ateŋ lɛ, Yehowa Odasefoi pɛ ji mɛi ni ŋmɛnɛ amɛgbaa nɛkɛ “sanekpakpa” nɛɛ amɛtsɔɔ gbɔmɛi ni yɔɔ shikpɔŋ nɔ lɛ.—Lala 37:9, 29.
9 Kɛji akɛ ókpɛlɛ “sanekpakpa” lɛ nɔ momo lɛ ani, eŋɔɔɔ onaa akɛ mɔ ko bagba bo nɛkɛ hiɛnɔkamɔ nɛɛ? Ani eŋɔɔɔ onaa fe nine akɛ ole nɔ ni Nyɔŋmɔ maŋtsɛyeli lɛ baafee aha adesai? Ani efeee bo miishɛɛ akɛ, yɛ be mli ni okpaa nibii fɛɛ ni Maŋtsɛyeli lɛ baafee aha adesai lɛ gbɛ lɛ, oooná gbɛfaŋnɔ yɛ nakai maŋtsɛyeli lɛ Halɔ lɛ gbɛi ni yɔɔ nyam lɛ hetsemɔ mli? Shi hegbɛ ko bɛ ni da ŋmɛnɛ, fe akɛ aaajaje “maŋtsɛyeli lɛ he sanekpakpa nɛɛ” atsɔɔ adesai ni ehe ehia amɛ lɛ!—Mateo 14:14; Lala 145:10, 11.
Wɔsɔlemɔ Ni Mli Wa
10. Mɛni hewɔ esa akɛ wɔkɛ sɔlemɔ ni mli wa ni kɔɔ Maŋtsɛyeli lɛ he aha lɛ, kɛ mɛɛ hekɛnɔfɔɔ?
10 Belɛ kwɛ bɔ ni esa akɛ wɔha wɔsɔlemɔ akɛ atsɔ maŋtsɛyeli ni baa lɛ nɔ atse Nyɔŋmɔ gbɛi lɛ he lɛ mli awa! Kwɛ hekɛnɔfɔɔ ni esa akɛ wɔna akɛ Maŋtsɛyeli lɛ baaba ni etsɛŋ kwraa, koni ebatsu Nyɔŋmɔ suɔmɔnaa nii ni kɔɔ wɔ-shikpɔŋ lɛ he lɛ he nii! Akɛni wɔbatsɔmɔ Nyɔŋmɔ tsuji ni wɔjɔɔ wɔhe nɔ ni abaptisi wɔ hewɔ lɛ, wɔ hu wɔbaanyɛ wɔna hekɛnɔfɔɔ akɛ Yehowa baabo wɔ daa gbi sɔlemɔi kɛha nibii ni he hiaa wɔ, kɛha wɔhe eshaifaa, koni abu wɔhe kɛjɛ blema “onufu” Abonsam ŋaatsɔi lɛ ahe lɛ toi. Enɛɛmɛi ji nibii ni Yesu tsɔɔ wɔ akɛ wɔsɔle yɛ he.—Mateo 6:9-13; Kpojiemɔ 12:9.
11. Yɛ jeŋ naagbai ahewɔ lɛ, mɛɛ Paulo kɔkɔbɔɔ ji nɔ ni ekɛha yɛ ebe naa pɛpɛɛpɛ, ni mɛni hewɔ?
11 Lɛlɛŋ eji jeŋ ni yi wa ni yɔɔ keketee ni wumɛi pii miina akɛ ewa diɛŋtsɛ akɛ aaanyɛ adamɔ nibii ajara ni waa kɛ shika helɛtemɔ he naagbai krokomɛi lɛ anaa. Belɛ ehe miihia ni wɔkwɛ wɔhe nɔ jogbaŋŋ yɛ be fɛɛ mli koni wɔkagbee shi yɛ mumɔŋ loo yɛ jeŋba mli yɛ henyɛlɔ lɛ tutuamɔ shishi. Yɛ bɔfo Paulo ŋaawoo ni yɔɔ Efesobii 6:11-18 lɛ kɛ gbeekpamɔ naa lɛ nyɛhaa ni wɔkɛ “sɔlemɔ kɛ faikpamɔ fɛɛ asɔlea daa yɛ mumɔ mli.” Ejaakɛ Nyɔŋmɔ hu baaha emɛi ni amɛtuu amɛhe amɛha Iɛ lɛ asɔlemɔi ahetoo kɛ̃—sɔlemɔi ni kɛ esuɔmɔnaa nii kpaa gbee lɛ.—Lala 65:3, 5, 6.
12. Mɛni hewɔ esa akɛ Maŋtsɛyeli lɛ afee nɔ oti yɛ wɔsɔlemɔi amli lɛ?
12 Wɔbaanyɛ wɔjɛ wɔtsuiŋ fɛɛ wɔsɔle akɛ, “ha omaŋtsɛyeli lɛ aba.” Mɛni hewɔ esa akɛ Maŋtsɛyeli lɛ afee nɔ ni he hiaa waa yɛ wɔsɔlemɔi amli lɛ? Ejaakɛ no ji nii ni Nyɔŋmɔ baatsɔ nɔ, edɛŋ-dade, ni ekɛbajie ehenyɛlɔ kpeteŋkpele lɛ kɛjɛ jeŋ muu fɛɛ nɛɛ mli kɛ agbɛnɛ mɛi fɛɛ ni kɛ amɛwala haa Satan nɔyeli lɛ. Mesia maŋtsɛyeli lɛ ji egbɛjianɔtoo ni ekɛbaatse enaakpɛɛ gbɛi Iɛ he kɛjɛ ahoarabɔɔ fɛɛ ni akɛba nɔ yɛ afii akpei ekpaa be ni eho lɛ mli. Maŋtsɛyeli kɛtsɔ Nyɔŋmɔ Bi Yesu Kristo nɔ lɛ kɛ Yesu afɔleshaa kpɔmɔ nɔ lɛ hewalɛ lɛ baatsu adesai ahe nii, ni akɛtee mɛi akpekpei toi akpekpei abɔ ni wɔɔ yɛ gbohii abui amli lɛ po shi kɛba wala mli. (1 Timoteo 2:3-6; Kpojiemɔ 20:12) Ani oyeɔ awerɛho yɛ suɔlɔ ko gbele he? Ani jeŋ shihilɛ ni yaa nɔ fiteɔ lɛ haa oyeɔ awerɛho? Ani efeee bo miishɛɛ akɛ obaanyɛ ofee gbɔmɛi pɛ ni yɔɔ shikpɔŋ nɔ ni amɛhiɛnɔkamɔ yɔɔ Yehowa kɛ enunyam Maŋtsɛyeli lɛ shiwoo lɛ mli lɛ fa? (Lala 144:15; 146:5) Esa akɛ ona miishɛɛ! Esa akɛ okɛ hekɛnɔfɔɔ asɔle akɛ: “Ha omaŋtsɛyeli lɛ aba.”a
[Shishigbɛ niŋmai]
a Ajie kɛjɛ May 1, 1982 Blɔfo Buu-Mɔɔ lɛ mli
NƆ NI MAŊTSƐYELI LƐ ‘BAA’ BAATSU
□ Ebaajie efɔŋfeemɔ, tawuu, kɛ nɔnyɛɛ kɛya
□ Ebaahere mɛi fɛɛ ni jaa “Nyɔŋmɔ yɛ mumɔ kɛ anɔkwale mli” lɛ yiwala
□ Ekɛ nɔyeli diɛŋtsɛ ni hiɛ nɔyelɔi ni Nyɔŋmɔ ehala amɛ baaha
□ Ebaatee gbohii ashi, ebaafee gbɔmɛi fɛɛ ekome akɛ Maŋtsɛyeli lɛ shishibii yɛ shikpɔŋ nɔ
□ Ekɛ shweremɔ, jalɛsaneyeli kɛha mɛi fɛɛ baato ohia kɛ fitemɔ najiaŋ
[Wiemɔ ni akɔ ni akɛmiitsu nii ni yɔɔ baafa 14]
“Ni bɔ ni ona dade ni sũ ni akpɔtɔ futu mli lɛ, nakai amɛkɛ gbɔmɛi aseshibii aaafutu amɛmli moŋ, shi amɛkpɛtɛŋ, taakɛ bɔ ni dade kɛ sũ futuuu lɛ. Ni nɛkɛ maŋtsɛmɛi nɛɛ ayinɔ lɛ, Nyɔŋmɔ ni yɔɔ ŋwɛi lɛ aaatee maŋtsɛyeli ko shi ama shi, ni efiteŋ dɔŋŋ kɛaatee naanɔ, ni ashiŋ maŋtsɛyeli nɛɛ ahaŋ maŋ kroko; eeejwara maŋtsɛyelii nɛɛ fɛɛ wɔtsɔwɔtsɔ, ni eeekpata amɛhiɛ, shi Iɛ diɛŋtsɛ Iɛ eeedamɔ shi kɛaatee naanɔ.”—Daniel 2:43, 44.
[Mfoniri ni yɔɔ baafa 13]
Taakɛ bɔ ni adesa nɔyelii ji nɔ ni yɔɔ diɛŋtsɛ lɛ, nakai nɔŋŋ hu ji ŋwɛi Maŋtsɛyeli nɔyeli lɛ