Bɔ Ni Maŋtsɛyeli Lɛ ‘Baa’ Hãa
1. Mɛni hewɔ ebɛ naakpɛɛ akɛ jeŋ muu fɛɛ “naagbee gbi” lɛ etee nɔ aahu kɛbashi 1982 nɛɛ?
1 BEI ABƆ ni eshwɛ dani “amanehulu kpeteŋkpele” lɛ afɛ ashwie shi lɛ, wɔ lɛ, wɔleee. Yudafoi anibii agbɛjianɔtoo lɛ “naagbee gbii” lɛ je shishi kɛjɛ afi 29 kɛyashi 70 Ŋ.B., ni fɛɛ fee afii 41. Shi amrɔ nɛɛ lɛ, Nyɔŋmɔ fɔbuu kojomɔ kã gbɛjianɔtoo ko ni da hiɛ. No ji Abonsam jeŋ fɛɛ gbɛjianɔtoo lɛ ni jeŋ apasa jamɔ maŋtsɛyeli, ni Kristendom kɛ epasa jamɔi lɛ titri ji efa ni ahiɔ fe fɛɛ lɛ fata he lɛ. No hewɔ lɛ ebɛ naakpɛɛ akɛ nɛkɛ jeŋ gbɛjianɔtoo nɛɛ “naagbee gbii” lɛ mli ekpã kɛyashɛ aaafee afii 68 bianɛ, kɛjɛ 1914 kɛbashi 1982 lɛ. Enɛɛmɛi fɛɛ yɛ kɛha yiŋtoo ko. Ni mɛni ji no?
2. Klɛŋklɛŋ afii oha lɛ mli Kristofoi lɛ ji nɔkwɛmɔ nɔ kɛha wɔ ŋmɛnɛ yɛ mɛɛ gbɛ nɔ?
2 Ojogbaŋŋ, mɛni ji nɔ ni klɛŋklɛŋ afii oha lɛ mli Kristofoi lɛ fee yɛ Yudafoi agbɛjianɔtoo lɛ “naagbee gbii” lɛ mli? Amɛshiɛ! Amɛbɔ kɔkɔ! No hewɔ lɛ, bɔfo Paulo nyɛ eŋma yɛ afii nyɔŋmai fioo ko mli akɛ: “Sanekpakpa lɛ ni nyɛnu ni ashiɛɔ atsɔɔ bɔɔ nii fɛɛ ni yɔɔ ŋwɛi shishi lɛ, . . . nɔhiɛkamɔ lɛ.”—Kolosebii 1:23.
3, 4. Yehowa mumɔ lɛ ewo namɛi ahewalɛ koni amɛkɛ ŋmɛnɛŋmɛnɛ beaŋ odaseyeli lɛ aha, ni mɛni ejɛ mli eba?
3 Ŋmɛnɛ, ŋmɔ lɛ mli elɛɛ waa. No ji je lɛ, jeŋ fɛɛ! Ni agbɛnɛ, yɛ Nyɔŋmɔ mumɔ lɛ ni haa hewalɛ ni tsirɛɔ mɔ hewɔ lɛ, Yehowa odasefoi Kristofoi lɛ enyɛ etee shikpɔŋ lɛ naagbee hei. Amɛshiɛ anɔkwale lɛ yɛ nɔ ni fe Wiemɔi sɔrɔtoi 160 mli. Amɛbua gbɔmɛi ni tamɔ gwantɛŋi lɛ anaa kɛjɛ jeŋmaji fɛɛ mli ni mɛi ni amɛyifalɛ shɛɔ 5,980,000 ba Kristo gbele lɛ Kaimɔ ni amɛye yɛ 1981 lɛ shishi. Akɛ bulɔ kuu lɛ, “tsulɔ anɔkwafo kɛ nilelɔ” lɛ enyiɛ hiɛ yɛ Yehowa oweletɔɔ gbi lɛ jajemɔ mli, yɛ be mli ni amɛyaa nɔ amɛshɛjeɔ mɛi ni yeɔ ŋkɔmɔ lɛ fɛɛ amii. (Yesaia 21:11, 12; 61:1, 2) Yɛ amɛshiɛmɔ nitsumɔ nɛɛ hewɔ lɛ, Yehowa Odasefoi eja Bibliai kɛ woji wuji ni akɛkaseɔ Biblia lɛ 460,000,000, kɛ Buu-Mɔɔ kɛ Awake! woji tɛtrɛbii lɛ ekomekomei 4,767,000,000 amɛha yɛ afii oha ni eho lɛ mli. Ani enɛ Jeee Yehowa gbɛi kɛ emaŋtsɛyeli lɛ he odaseyeli kpeteŋkpele ni yɔɔ naakpɛɛ?
4 Amrɔ nɛɛ Maŋtsɛyeli lɛ he sanekpakpa lɛ shiɛmɔ miibɛŋkɛ enaagbee kwraa! Maŋsɛɛ sanekpakpa shiɛlɔi, gbɛgbalɔi kɛ asafoŋ shiɛlɔi anɔkwafoi etsu nitsumɔ ko ni yɔɔ naakpɛɛ yɛ ekomefeemɔ mli yɛ shikpɔŋ lɛ fɛɛ nɔ—“jeee nyɛmɔ naa lɛ, jeee hewalɛ naa, shi mimumɔ lɛ naa! Yehowa Zebaot kɛɛ.” Nɔ ni ejɛ mli eba ji akɛ, adesai ateŋ mɛi akpekpei abɔ eba ni amɛkɛ amɛhe ebabɔ ‘tsulɔ anɔkwafo’ lɛ he, kɛmiikɛɛ akɛ: “Wɔkɛnyɛ aaatee; ejaakɛ wɔnu akɛ Nyɔŋmɔ kɛnyɛ yɛ!”—Zakaria 8:23.
5. Te Daniel yitso 2 fee Maŋtsɛyeli lɛ ‘baa’ lɛ he mfoniri eha tɛŋŋ?
5 Nɔ ni eshwɛ bianɛ ji ni Nyɔŋmɔ maŋtsɛyeli lɛ “aba”! Aba yɛ mɛɛ gbɛ nɔ? Yɛ gbɛ ni gbalɔ Daniel tsɔɔ mli yɛ egbalɛ lɛ yitso ni ji enyɔ lɛ mli! Afee Mesia maŋtsɛyeli lɛ he mfoniri akɛ etamɔ “tɛ” ni jɛ Yehowa naanɔ maŋtsɛyeli ni tamɔ “gɔŋ” lɛ nɔ. Nɛkɛ “tɛ” nɛɛ tse tamɔ osramaŋ kɛ foi, hɛɛ, ‘eba’ ni ebatswa adesa nɔyelii ni ato ama shi lɛ, ni egbɛlɛɔ amɛ ni amɛtsɔɔ tamɔ mlu. Kɛkɛ lɛ Maŋtsɛyeli “tɛ” lɛ diɛŋtsɛ ebatsɔ “gɔŋ” ni kpeleɔ shikpɔŋ muu lɛ fɛɛ nɔ, fɛɛ kɛha Yehowa yijiemɔ kɛ anunyam.—Daniel 2:34, 35, 44, 45.
“Ajwamaŋ” Lɛ Hiɛkpatamɔ
6. (a) Mɛni hewɔ esaaa akɛ efeɔ naakpɛɛ akɛ Yehowa kɛ adesai agbɛjianɔtooi ni yɔɔ veveeve lɛ aaatsu nii yɛ efɔbuu kojomɔ he nitsumɔ mli? (b) Te nɔ ni ji Yerusalem henɔ ni yɔɔ ŋmɛnɛŋmɛnɛ beaŋ lɛ, ni mɛɛ maŋtsɛyeli eji efa hu?
6 Shi kɛ̃lɛ, nibii komɛi tsɔɔ adesa nɔyeli ni yɔɔ shikpɔŋ nɔ lɛ naagbee jwaramɔ lɛ hiɛ baa. Kpojiemɔ gbalɛ wolo lɛ tsɔɔ akɛ, klɛŋklɛŋ lɛ, Yehowa kɛ jeŋ hewalɛ ni yɔɔ veveeve ni yɔɔ Jeŋmaji Ekomefeemɔ lɛ mli lɛ baatsu nii akɛ hiɛkpatamɔ hamlɛ ni asɔ̃. Esaaa akɛ enɛ feɔ wɔ naakpɛɛ, ejaakɛ Yehowa kɛ Babilonia jeŋ hewalɛ lɛ tsu nii yɛ blema bei amli akɛ “shikpɔŋ lɛ fɛɛ hamlɛ” yɛ efɔbuu kojomɔ ni ekɛba jeŋmaji lɛ anɔ lɛ mli, kɛ agbɛnɛ yɛ hemɔkɛyelikwalɔ Yerusalem titri nɔ. (Yeremia 50:23) Blema Yerusalem yɛ ehenɔ yɛ ŋmɛnɛŋmɛnɛ gbii nɛɛ amli, ni lɛ ji Kristendom jamɔ ni ato amɛ gbɛjianɔ lɛ. Mɛnɛɛmɛi kɛɔ akɛ amɛjaa Biblia lɛ Nyɔŋmɔ lɛ, shi nɔ ni efee ehe moŋ ji apasa jamɔ maŋtsɛyeli lɛ fa. Gbalɛ haa ayɔseɔ nakai maŋtsɛyeli lɛ akɛ “Babilon Kpeteŋkpele lɛ, shikpɔŋ lɛ nɔ ajwamaŋi lɛ kɛ nihii nii lɛ anyɛ lɛ.”—Kpojiemɔ 17:5.
7. (a) Apasa jamɔ ehala mɛni? (b) Te enaawielɔi tsɔɔ nɔ ni ji amɛhiɛnɔkamɔ lɛ amɛhaa tɛŋŋ? (d) Shi mɛni Ŋmalɛi lɛ tsɔɔ akɛ no ji adesai ahiɛnɔkamɔ?
7 Jeŋ apasa jamɔ maŋtsɛyeli lɛ ehala nɔ ni esumɔɔ. Ekpoo Nyɔŋmɔ maŋtsɛyeli ni baa kɛtsɔ Mesia lɛ nɔ lɛ, ni ehala nɔ ni adesai kɛmamɔ shi lɛ. Ŋmɛnɛ je lɛŋ jamɔi lɛ amli osɔfoi lɛ kɛ amɛtsui muu lɛ fɛɛ fiɔ Jeŋmaji Ekomefeemɔ lɛ sɛɛ. Taakɛ Yudanyo rabi ko kɛɛ lɛ, Jeŋmaji Ekomefeemɔ lɛ ji “hiɛnɔkamɔ kome pɛ kɛha naanɔ toiŋjɔlɛ yɛ jeŋ ni eyiwalaheremɔ damɔ nɔ lɛ.” Ni Pope John Paul II tsɔɔ enɛ mli akɛ eji “toiŋjɔlɛ kɛ jalɛsaneyeli kpee he ni fe fɛɛ.” Shi ani Jeŋmaji Ekomefeemɔ lɛ kɛ toiŋjɔlɛ kɛ jalɛsaneyeli eba shikpɔŋ nɔ? Ani Jeŋmaji Ekomefeemɔ lɛ ji adesai “ahiɛnɔkamɔ pɛ”? Aloo nakai hiɛnɔkamɔ lɛ ji Nyɔŋmɔ maŋtsɛyeli lɛ? Yɛ anɔkwale mli lɛ, nakai hiɛnɔkamɔ lɛ hɔ Nyɔŋmɔ maŋtsɛyeli ni ‘baa’ ni yɔɔ Mesia lɛ dɛŋ lɛ mli! —Mateo 12:18, 21.
8. Mɛɛ Jeŋmaji Ekomefeemɔ lɛ Mla kaiɔ wɔ 1 Tesalonikabii 5:3, ni mɛni hewɔ esa akɛ enɛ afee nɔ ko ni wɔyɔɔ he miishɛɛ lɛ?
8 Jeŋmaji Ekomefeemɔ lɛ jajeɔ yɛ e-Mla lɛ mli akɛ eklɛŋklɛŋ yiŋtoo ji ni “eha toiŋjɔlɛ kɛ shweshweeshwe shihilɛ aba majimaji ateŋ.” Akɛ Yehowa Odasefoi lɛ, ani wɔyoo nɔ ko ni wɔle momo yɛ nakai wiemɔi lɛ amli? Wɔyoo! Ejaakɛ Bɔfo Paulo kɛɛ, “ejaakɛ be mli ni amɛaakɛɛ akɛ: ‘Toiŋjɔlɛ kɛ shweshweeshwe shihilɛ yɛ!’ lɛ, kɛkɛ lɛ, no mli nɔŋŋ hiɛkpatamɔ aaabatua amɛ trukaa tamɔ kɔɔmɔ tuaa yoo ni musu eda lɛ; ni amɛjeŋ mli kɔkɔɔkɔ.” (1 Tesalonikabii 5:3, NW) No hewɔ lɛ, yɛ be mli ni wɔyaa hiɛ kɛyashɛɔ nɛkɛ “naagbee gbii” nɛɛ naagbee kwraa lɛ he lɛ, wɔbaanyɛ wɔkpa wiemɔ ko ni gbalaa wɔjwɛŋmɔ ni kɔɔ “toiŋjɔlɛ kɛ shweshweeshwe shihilɛ!” he lɛ gbɛ. Kɛji akɛ enɛ jije kɛjɛ jeŋmaji lɛ adaaŋ lɛ, mɛni nyiɛɔ sɛɛ? Gbalɛ lɛ haa hetoo: ‘Hiɛkpatamɔ ni baa trukaa ni anyɛŋ aje mli kɔkɔɔkɔ!’
9. (a) Mɛɛ hiɛkpatamɔ ni yɔɔ gbeyei mɛɔ apasa jamɔ? (b) Te maŋkwramɔŋ hiɛnyiɛlɔ kɛ nitsumɔtsɛmɛi wuji aaabu enɛ amɛha tɛŋŋ, ni mɛni hewɔ?
9 Ahoshwi ni je lɛŋ jamɔi kɛ Jeŋmaji Ekomefeemɔ lɛ ebɔ lɛ baaba naagbee kɛ hiɛkpatamɔ! Ebaa naagbee yɛ “ŋmlɛtswaa kome” mli! Jeŋmaji Ekomefeemɔ “kooloo” lɛ “akolontoi nyɔŋma” lɛ baatsɔ ehiɛ eha Babilon Kpeteŋkpele lɛ. Nakai jeŋ gbɛjianɔtoo lɛ mlibii ni yɔɔ veveeve ni sumɔɔ tawuu lɛ baatsɛrɛ lɛ, amɛfee lɛ butuu, amɛjie ehewɔ nibii kɛ etadei fɛfɛji lɛ fɛɛ kɛjɛ ehe ni amɛkɛ la asha lɛ. Maŋkwralɔi ni amɛkpɔtɔ ni amɛkɛ apasa etsu nii kɛwaje amɛgbɛhe kɛ nitsumɔtsɛmɛi wuji ni amɛkɛ lɛ tsu nii akɛ mɔ ni amɛkɛ lɛ eto amɛhiɛ kɛha jarayeli yɛ tawuu nii amli kɛ guɔyeli nii ni agu ehɔɔmɔ mli yɛ be mli ni amɛhɔlɔ esɛɛ lɛ baadamɔ sɛɛ flɛŋŋ ni amɛfo lɛ. Amɛaafo lɛ amɛkɛɛ akɛ: “Kpoo, kpoo, maŋ kpeteŋkpele lɛ, Babilon, maŋ ni he wa lɛ! Ejaakɛ ŋmlɛtswaa kome mli ni okojomɔ eba nɛɛ. . . . Ejaakɛ ŋmlɛtswaa kome pɛ mli lɛ, nɛkɛ nii afalɛ babaoo nɛɛ fɛɛ etsɔ amaŋfo!”—Kpojiemɔ 18:10, 16.
Harmagedon—Kɛ No Sɛɛ
10. Mɛni hewɔ Harmagedon baanyiɛ sɛɛ aba amrɔ nɔŋŋ kɛ foi lɛ, ni mɛni baajɛ mli aba?
10 Nibii baaya nɔ oyayaayai kɛyashi naagbee. Nakai maŋkwramɔŋ “akolontoi” lɛ nɔŋŋ ni kpata “ajwamaŋ kpeteŋkpele” lɛ hiɛ Iɛ baatsɔ amɛhiɛ amɛha Yehowa odasefoi ni tamɔ mɛi ni bɛ hefamɔ ko lɛ. Shi agbɛnɛ amɛbaana amɛhe akɛ jeee mɔ ko folo ko amɛkɛwuɔ lɛ ákɛ Yehowa, “nuŋtsɔmɛi a-Nuŋtsɔ kɛ maŋtsɛmɛi a-Maŋtsɛ lɛ.” No mli lɛ Harmagedon amɛyɔɔ lɛ. Jɛmɛ Yehowa maŋtsɛyeli kɛtsɔ Mesia Iɛ nɔ Iɛ ‘baa’ ni ebatsu enifeemɔ kpeteŋkpele ni fe fɛɛ ni ekɛbu jeŋ muu fɛɛ maŋtsɛ ni Yehowa ji kɛ agbɛnɛ etsuji anɔkwafoi lɛ bem yɛ. Ta lɛ mli baawa ni ebaafee oya ni akɛbaaha naagbee kwraa ni ŋwanejee ko baŋ he. Abaafo Satan tawuu kɛ maŋkwramɔŋ nɔyeli ni yɔɔ shikpɔŋ nɔ lɛ ashɛ afɔ, ni abaafimɔ Satan diɛŋtsɛ ni ashɛ lɛ afɔ bu kwɔŋkwɔŋ lɛ mli afii 1,000, “koni ekashishiu jeŋmaji lɛ dɔŋŋ.”—Kpojiemɔ 16:14; 17:14; 19:11-21; 20:2, 3.
11. (a) Yɛ mɛɛ gbɛ nɔ Maŋtsɛyeli lɛ ‘baa’ lɛ baajɔɔ adesai fɛɛ agbɛnɛ? (b) Mɛɛ jiemɔ nyiɛɔ sɛɛ baa yɛ be mli ni afi 1,000 lɛ baa naagbee lɛ, kɛ mɛɛ gbɛkpamɔ ni yɔɔ miishɛɛ?
11 No sɛɛ lɛ mɛni? Afii akpe maŋtsɛyeli lɛ baaba! Kwɛ bɔ ni mɛi ni amɛje Harmagedon mli lɛ amii baashɛ amɛhe aha! Kwɛ bɔ ni suɔmɔ, miishɛɛ, toiŋjɔlɛ ni baagbɛ ashwa shikpɔŋ muu lɛ fɛɛ nɔ lɛ baafee nɔ ni yɔɔ naakpɛɛ aha! Kwɛ bɔ ni gbohiiashitee ni baaha suɔlɔi fɛɛ afee ekome ekoŋŋ yɛ jeŋ muu fɛɛ lɛ baafee nɔ ni yɔɔ naakpɛɛ aha! Kwɛ bɔ ni gbɔmɔtsoŋ helatsamɔ he gbɛjianɔtoo lɛ kanyaa mɔ haa, yɛ be mli ni Yesu kɛ enanemɛi maŋtsɛmɛi kɛ osɔfoi lɛ kɛ ekpɔmɔ afɔleshaa lɛ mli sɛɛnamɔi lɛ tsaa amɛ lɛ, ni amɛwoɔ adesai akpekpei toi akpekpei abɔ lɛ anɔ kɛyaa emuuyeli mli lɛ! Yɛ mɛi fɛɛ ni ajieɔ amɛ kɛjɛɔ Kristo afii 1,000 maŋtsɛyeli lɛ nɔyeli he lɛ mli kɛyaa Yehowa naanɔ maŋtsɛyeli lɛ nɔyeli he lɛ mli, ni agbɛnɛ amɛyeɔ omanye yɛ Satan kaa lɛ mli lɛ agbɛfaŋ lɛ, mɛɛ mlifilimɔ po baaji amɛnɔ̃ nɛkɛ yɛ be mli ni amɛnaa nibii ni yɔɔ naakpɛɛ ni abaajie lɛ kpo yɛ naanɔi anaanɔ lɛ mli aha amɛ lɛ mli gbɛfaŋnɔ lɛ!—Kpojiemɔ 20:7-9; 21:3, 4.
12. Mɛni haa nɛkɛ nibii ni yɔɔ naakpɛɛ nɛɛ baa, no hewɔ lɛ esa akɛ enɛ atsirɛ wɔ ni wɔfee mɛni bianɛ?
12 Nyɔŋmɔ maŋtsɛyeli lɛ ‘baa’ kɛtsɔ Mesia lɛ nɔ lɛ ji nɔ ni haa naakpɛɛ nibii nɛɛ fɛɛ baa mli. Ani enɛ tsirɛɛɛ wɔ, yɛ Satan gbɛjianɔtoo nɛɛ gbele gbii nɛɛ amli, ni wɔwie “Nyɔŋmɔ niwuji,” emaŋtsɛyeli lɛ anunyam lɛ kɛ e-Mesia lɛ maŋtsɛyeli ni anyɛŋ ahoso lɛ gbi ko gbi ko lɛ he sane wɔtsɔɔ mɛi? (Lala 145:11; Bɔfoi lɛ Asaji 2:11; Hebribii 12:28) Ani enɛ tsirɛɛɛ wɔ ni wɔkɛ hiɛdɔɔ asɔle wɔha wɔŋwɛi Tsɛ lɛ, akɛ, “Ha emaŋtsɛyeli lɛ aba”?—Mateo 6:9, 10, NW.
13. Mɛni hewɔ esa akɛ wɔjɛ wɔtsuiŋ fɛɛ wɔsɔle ni Maŋtsɛyeli lɛ ‘ABA’?
13 Hɛɛ, “BA,” Nyɔŋmɔ maŋtsɛyeli lɛ, ni obakpata Satan nitsumɔi kɛ egbɛjianɔtoo lɛ fɛɛ hiɛ kɛjɛ shikpɔŋ nɔ! Hɛɛ, “BA,” ni okɛ nɔyeli ni ja abaha adesai! Hɛɛ, “BA,” ni okɛ Kristo anunyam afii akpe maŋtsɛyeli lɛ aba, koni eku sɛɛ ekɛ Paradeiso aba ekoŋŋ, ni ekɛ gbohii lɛ ashitee kɛ adesai akpekpei toi akpekpei abɔ lɛ anɔwomɔ kɛmiishɛ adesa emuuyeli mli aba ekoŋŋ! Hɛɛ, “BA,” O Mesia lɛ maŋtsɛyeli ni obatse Jeŋ Muu Fɛɛ Nuŋtsɔ YEHOWA lɛ gbɛi ni eko kɛ lɛ yeee egbɔ lɛ he kɛya naanɔi fɛɛ mli!a
[Shishigbɛ niŋmai]
a Ajie kɛjɛ May 1, 1982 Blɔfo Buu-Mɔɔ lɛ mli
MAŊTSƐYELI NI YƆƆ NYƆŊMƆ YIŊTOO MLI LƐ
□ Yehowa gbalɔi gba he sane
□ Akɛ David maŋtsɛyeli lɛ fee he mfoniri
□ Yesu kaselɔi lɛ shiɛ enɛ
□ Ato ama shi yɛ ŋwɛi, 1914
□ Ashiɛ ni akɛye jeŋmaji fɛɛ odase, kɛjɛ 1919
□ Aabua “asafo babaoo” ko naa bianɛ kɛha yiwalaheremɔ
□ Naagbee lɛ baa—Kɛ bolɔmɔ akɛ “Toiŋjɔlɛ kɛ Shweshweeshwe” yɛ □ ‘Babilon Kpeteŋkpele’ lɛ hiɛkpatamɔ, Maŋtsɛyeli lɛ kpataa maŋkwramɔŋ nɔyelɔi, tabilɔi kɛ amɛsɛɛfilɔi ahiɛ
□ Maŋtsɛyeli lɛ kɛ nyamɔ, toiŋjɔlɛ kɛ Yehowa yijiemɔ woɔ shikpɔŋ lɛ nɔ obɔ
[Mfoniri ni yɔɔ baafa 21]
Maŋtsɛyeli tɛ lɛ diɛŋtsɛ batsɔɔ “gɔŋ” ekpeleɔ shikpɔŋ lɛ fɛɛ nɔ