Yɛ He Ni Harmagedon Miihe Afɛ Yɛ

AAAFEE afii akpei ejwɛ kɛ fa nɛ, ni gbɛjianɔtooi wuji enyɔ enyiɛ gbɛ ni baaha amɛkpe hiɛ kɛ hiɛ lɛ nɔ. Hewalɛ ni baajɛ enɛ mli aba lɛ baafɔ̃ je lɛ awo yinɔsane mli ta ni kpataa nii ahiɛ fe fɛɛ lɛ mli. Biblia lɛ tsɛɔ lɛ “Nyɔŋmɔ Ofe lɛ gbi wulu lɛ nɔ ta lɛ.” Shi, ekolɛ, ale lɛ jogbaŋŋ kɛ gbɛi ko ni yɔɔ gbeyei Harmagedon.a​—Kpojiemɔ 16:​14, 16.

Jeee be fɛɛ be akɛ gbɛi nɛɛ ele nɛkɛ ta nɛɛ. Shi ta, lɛ baakɔ seshibii enyɔ ni atsi amɛ ta yɛ 1 Mose 3:15 lɛ ahe, he ni wɔkaneɔ yɛ akɛ: “Ni [Nyɔŋmɔ] mikɛ nyɛɛ aaaŋmɛ okɛ yoo lɛ teŋ, kɛ oseshi kɛ eseshi teŋ; eeetswa oyitso nɔ, ni bo hu oootswa enanetsitsi nɔ.”

Yehowa Nyɔŋmɔ tee nɔ ejie lɛ kpo fiofio akɛ hewalɛ diɛŋtsɛ ni yɔɔ onufu Iɛ sɛɛ, ni etamɔ nɔ ni lɛ ji mɔ ni akɛ lɛ wieɔ wiemɔi ni yɔɔ yiteŋgbɛ nɛɛ ji mumɔŋ bɔɔ nɔ ko ni abale lɛ akɛ “mɔ ni atsɛɔ lɛ Abonsam kɛ Satan.” (Kpojiemɔ 12:​9, NW) ‘Eseshi’​—ni yɔɔ ŋwɛi kɛ shikpɔŋ nɔ lɛ fɛɛ​—lɛ ji hewalɛ gbɛjianɔtoo ni ekpiti jeŋ muu lɛ fɛɛ kɛmiiya gbele mli. (Yohane 8:​44; Efesobii 6:​12; Hebribii 2:14) “Yoo” lɛ diɛŋtsɛ ni Yehowa Nyɔŋmɔ wieɔ ehe lɛ ji eŋwɛi gbɛjianɔtoo ni tamɔ ŋa anɔkwafo lɛ. (Galatabii 4:26) Yoo nɛɛ yɛ “seshi” aloo shwiei ko ni Satan Abonsam gbɛjianɔtoo lɛ teɔ shi woɔ lɛ.

Nɔ Hewɔ Ni Esa Akɛ Ta Aba

Akɛni Satan laka wɔklɛŋklɛŋ fɔlɔi lɛ ni eha amɛsusu akɛ amɛbaanyɛ amɛye amɛ diɛŋtsɛ amɛhe nɔ hewɔ lɛ, efite toiŋjɔlɛ Paradeiso ni gbɔmɔ yɔɔ mli lɛ. (1 Mose 3:​1-6) Nɔ ni etsɔɔ ji akɛ, Nyɔŋmɔ lɛ pɛsɛmkunyatsɛ ni, kɛ nɔyelɔ ni esaaa ni emlai kɛ shishitoo taomɔ nii ahe ehiaaa, ni etsiɔ mɛi anaa yɛ yiwalɛ gbɛ nɔ. Je muu fɛɛ Nuŋtsɔ lɛ eyaŋ nɔ ekpɛlɛŋ egbɛi Iɛ kɛ ehe guɔ ni agbeɔ yɛ gbɛ ni ejaaa nɔ nɛɛ nɔ yɛ be fɛɛ mli. Nakai feemɔ baaha ana lɛ akɛ ebɛ hewalɛ ko, ni yɛ be ni sa mli lɛ nɔ fɛɛ nɔ ni yɔɔ je muu fɛɛ lɛ baafite.

No hewɔ lɛ, yɛ lɛ diɛŋtsɛ ehewɔ lɛ, Nyɔŋmɔ baatsu he nii, eŋmɛŋ gbɛ ni agbe egbɛi lɛ he guɔ kɛya naanɔ, aloo ni eeeŋmɛ gbɛ ni abɔ jeŋ muu fɛɛ maŋtsɛ ni eji lɛ ahora ni ebuuu ehe bem. (Okɛto Yesaia 48:​11, 12 he) Satan gbɛjianɔtoo lɛ nɔ kunim ni eeeye yɛ Harmagedon lɛ baaha atse Nyɔŋmɔ gbɛi ni ji Yehowa ni eko kɛ lɛ yeee egbɔ lɛ he. (Lala 83:19) Ni akɛni ta ni akɛ Satan baawuu lɛ hu baaha adesai agboi babaoo hewɔ lɛ, Nyɔŋmɔ ta lɛ baakpata Satan shikpɔŋ nɔ gbɛjianɔtoo lɛ aloo enibii agbɛjianɔtoo lɛ hiɛ. Enɛ baafee “amanehulu kpeteŋkpele” ni Yesu gba fɔ shi yɛ Mateo 24:​21, 22 ni no mli lɛ aaahere “heloo” ko yiwala lɛ. Gbɔmɔ ni kɛɛ ebaaye ehe lɛ kɛ ‘fitemɔ’ eba shikpɔŋ lɛ nɔ kɛtsɔ tai, mujiwoo kɛ nibii ni tamɔ nakai lɛ anɔ. Ni Harmagedon “baafite mɛi ni fiteɔ shikpɔŋ lɛ.” (Kpojiemɔ 11:18) Kɛ Nyɔŋmɔ jie mɛi ni fiteɔ shikpɔŋ lɛ kɛtee lɛ, no baagba gbɛ kɛha Paradeiso lɛ.

Shi kɛlɛ yɛ mɛɛ gbɛ nɔ ni mɛɛ be Nyɔŋmɔ ta lɛ baaba? Mɛi pii susuɔ akɛ ebaafɛ yɛ Boka Teŋgbɛ, titri yɛ nɔ ni ba yɛ jɛmɛ yɛ May 14, 1948 lɛ hewɔ. Nakai gbi lɛ nɔ Israel jaje akɛ etsɔ maŋ​—kunim ko ni etamɔ nɔ ni gbɔmɛi ni akɛ afii babaoo ewa amɛyi ni agbɛ amɛ ashwa ni abule amɛshishi eye. Ni eyɛ mli akɛ etamɔ nɔ ni eshidaamɔ bɛ shweshweeshwe kɛjɛ shishijee lɛ moŋ, shi nakai maŋ bibioo lɛ etee nɔ edamɔ shi lɛ diɛŋtsɛ yɛ Boka Teŋgbɛ ni naagba yɔɔ jɛmɛ babaoo lɛ afii nyɔŋmai etɛ. Mɛi pii naa ŋmɛnɛŋmɛnɛ beaŋ Israel fɔmɔ lɛ akɛ Nyɔŋmɔ nine yɛ mli kɛ Okadi ni tsɔɔ lɛlɛŋ akɛ Harmagedon ebɛŋkɛ.

Eji anɔkwale akɛ, jeee Nyɔŋmɔ he nikaselɔi fɛɛ hiɛ nɛkɛ jwɛŋmɔ nɛɛ. Presbyterian osɔfo ko kɛɛ akɛ: “Misusuɔ akɛ eji be fitemɔ akɛ aaabɔ mɔdɛŋ ni akɛ ŋmɛnɛŋmɛnɛ beaŋ okadii kɛ saji ni yaa nɔ le awo ŋmɛnɛ [Biblia] gbalɛi amli ni abɔ mɔdɛŋ akɛɛ akɛ ekɔɔ gbɔmɛi pɔtɛɛ komɛi ahe.” Shi kɛlɛ, woji, sinii, TV nɔ shiɛlɔi babaoo miifi jwɛŋmɔ ni ahiɛ akɛ Boka Teŋgbɛ lɛ baafee he ni wɔsɛɛ Harmagedon baaba yɛ lɛ sɛɛ.

Shi ani Harmagedon baaba diɛŋtsɛ yɛ Boka Teŋgbɛ? Yɛ anɔkwale mli lɛ, mɛ gbɛ nɔ abaatsɔ awuu nɛkɛ “Nyɔŋmɔ Ofe lɛ gbi wulu lɛ nɔ ta” nɛɛ? Mɛni baaha ta nɛɛ aje shishi? Mɛɛ gbɛ nɔ mɔ ko baatsɔ aje Harmagedon mli? Ni mɛni baanyiɛ nakai ta kpele lɛ sɛɛ aba?

[Shishigbɛ niŋmai]