Jajemɔ Nyɔŋmɔ Wiemɔ Lɛ akɛ Mɔ ni Sheee Gbeyei Yɛ Nuklea Be nɛɛ Mli
‘Jajemɔ Nyɔŋmɔ wiemɔ Iɛ akɛ mɔ ni sheee gbeyei.’—FILIPIBII 1:14.
1. Atɔm lɛ kɛ nɔ ni hɔ mli lɛ Bɔlɔ lɛ eha áwie mɛni ni asheee gbeyei afii 48 ni eho nɛ?
1 NUKLEA be lɛ enina wɔ. Nuklea tawuu miiwo je muu lɛ fɛɛ he gbeyei agbɛnɛ! Atɔm kɛ nɔ ni hɔ mli lɛ Bɔlɔ Ofe lɛ le enɛ jogbaŋŋ. Mɛni ji e-Wiemɔ kɛha ŋmɛnɛ gbi nɛɛ ni he miihia ni ashiɛ yɛ jeŋ fɛɛ lɛ? Eha okadi ‘nuu ko ni wo klala ni woloŋmalɔ tɔ ŋmɔ ehɛ’ miitsu kadimɔ nitsumɔ ko yɛ wɔbe nɛɛ mli.
2. Mɛɛ kadimɔ nitsumɔ etee nɔ, ni kɛha mɛɛ yiŋtoo?
2 Nɛkɛ “nuu” nɛɛ miikadi gbɔmɛi ni foɔ ni dɔmɔɔ ŋtsɔi yɛ nihii nii fɛɛ ni afeɔ, titri lɛ yɛ Kristendom ni kɛɔ akɛ ejaa Nyɔŋmɔ lɛ jamɔ nɔyeli he lɛ hewɔ lɛ ahiɛnaai. (Ezekiel, yitso 9) Kɛ amɛkai Kristendom osɔfoi lɛ ajeŋba yɛ Jeŋ Ta I kɛ II be lɛ mli lɛ, nɛkɛ gbɔmɛi nɛɛ haoɔ waa yɛ nɔ ni amɛsusuɔ akɛ nakai jamɔ mli hiɛnyiɛlɔi lɛ baanyɛ afee yɛ be mli ni nuklea ta aaaba yɛ jeŋ fɛɛ lɛ he lɛ. Akɛni amɛkpaa nibii kpakpai agbɛ kɛjɛɔ nakai mɛi ni atsɛɔ amɛ Kristendom hiɛnyiɛlɔi lɛ adɛŋ hewɔ lɛ, amɛhaoɔ waa yɛ nɔ ni osɔfoi lɛ ŋmɛɔ gbɛ agbɛnɛ yɛ jeŋ ni bɛ jeŋba kwraa ni basabasafeemɔ kɛ jamɔ mli mligbalamɔ eyi mli obɔ nɛɛ mli lɛ hewɔ. Aakadi gbɔmɛi ni hiɛ tsuijurɔ nɛɛ kɛha yibaamɔ kɛmiiya jalɛ nibii agbɛjianɔtoo hee ko mli yɛ nibii agbɛjianɔtoo ni abu lɛ fɔ aha hiɛkpatamɔ ni baaba oya nɛɛ mli.
3. Awerɛho ni ayeɔ yɛ mɛni he he hiaa kwraa fe awerɛho ni aaaye yɛ seshi ko shishibulemɔ kwraa he, ni kadimɔ nitsumɔ lɛ ebi mɛni?
3 Anaaa nɔyaa ko yɛ jeŋ shihilɛ mli. Yɛ gbɔmɛi babaoo ni hiɛ tsuijurɔ ni yɔɔ Kristendom teŋ kɛ esɛɛ fɛɛ lɛ agbɛfaŋ lɛ, mɛni baaba amɛgbeyeishemɔ ákɛ akɛ yiwalɛ aaabule amɛshishi kwraa yɛ be kukuoo mli lɛ shĩ? Ojogbaŋŋ, ekolɛ amɛbaaye awerɛho yɛ bɔ ni nibii yɔɔ lɛ hewɔ. Shi nɔ ni he hiaa fe fɛɛ ji akɛ, ani amɛyeɔ awerɛho akɛni ekɔɔ Ŋmalɛ Krɔŋkrɔŋ ni ji Biblia lɛ Nyɔŋmɔ lɛ gbɛi he, ni aagbe he guɔ, yɛ bɔ ni mɛi ni kɛɔ akɛ amɛji ewebii lɛ feɔ amɛnii amɛhaa hewɔ lɛ? Shi, namɔ ji okadi ‘nuu ni wo klala’ ni kadiɔ mɛi ni yeɔ awerɛho babaoo lɛ, ni mɛɛ gbɛ nɔ etsɔɔ efeɔ nakai yɛ? Kristendom osɔfoi lɛ ahiɛ esɔɔɔ nɛkɛ kadimɔ nitsumɔ nɛɛ ni amɛte shi amɛwo waa. No hewɔ lɛ ébi ekãa babaoo dani anyɛ atsu kadimɔ nitsumɔ nɛɛ agbe naa.
4. Namɛi feɔ nuu ni tsuɔ kadimɔ nitsumɔ lɛ he mfoniri, no hewɔ lɛ mɛni ebiɔ ni ana yɛ mɛi ni tsuɔ kadimɔ nitsumɔ lɛ ŋmɛnɛ lɛ ahe?
4 Shi kɛlɛ etee nɔ kɛ hewalɛ babaoo po kɛjɛ 1935. Kristofoi akuu ko ni amɛjɔɔ amɛhe nɔ amɛha Yehowa Nyɔŋmɔ kɛtsɔ Yesu Kristo nɔ, ni gbalɔ Ezekiel, blema Israel osɔfo ko fee amɛhe mfoniri lɛ tsu enɛ. Lɛ ji mɔ ni ná ‘nuu ni wo klala ni woloŋmalɔ tɔ ŋmɔ ehɛ’ lɛ he ninaa Iɛ. Amɛjɔɔ amɛhe nɔ amɛha Nyɔŋmɔ kome too lɛ nɔŋŋ tamɔ Ezekiel, no hewɔ lɛ amɛji Yehowa odasefoi taakɛ Ezekiel ji lɛ. Ŋmɛnɛŋmɛnɛ beaŋ Ezekiel lɛ ni yɔɔ 1983 mli lɛ ji osɔfoi akuu, ni fata mumɔŋ Israel he, ni bɔfo Petro wie wiemɔi nɛɛ ni anaa yɛ 1 Petro 2:9 yɛ amɛhe lɛ: “Shi nyɛ lɛ, weku ni ahala ji nyɛ, maŋtsɛmɛi ni yeɔ osɔfoi, jeŋ maŋ krɔŋkrɔŋ, maŋ ni eŋɔfee enɔ̃, koni nyɛjaje mɔ ni tse nyɛ kɛje duŋ lɛ mli kɛba lɛ diɛŋtsɛ enaakpɛɛ la lɛ he lɛ agbojee lɛ.”
5. Osɔfoi bibii enyiɛ yɔɔ ni baahi mɔ ni Yehowa kɛ kitakamɔ ŋɔ lɛ ewo osɔfo-nukpayeli lɛ mli lɛ shishi?
5 No hewɔ lɛ wɔyooɔ Ezekiel kuu lɛ ŋmɛnɛ akɛ amɛji mɛi ni sɔmɔɔ yɛ mumɔŋ gbɛ nɔ akɛ osɔfoi bibii, yɛ Osɔfonukpa Yesu Kristo, mɔ ni Yehowa Nyɔŋmɔ ka kita ekɛ ŋɔ lɛ ewo “Melkizedek,” ni ji blema Salem maŋtsɛ kɛ “Ŋwɛi Flooflo Nyɔŋmɔ lɛ osɔfo” lɛ “gbɛjianɔ lɛ naa” lɛ osɔfoyeli lɛ mli lɛ shishi. (Lala 110:4: 1 Mose 14:18; Hebribii 5:10; 6:20; 7:10, 11, 15-17) Kɛjɛ klɛŋklɛŋ afii oha lɛ ni bɔfo Petro ŋma ewolo lɛ yɛ mli lɛ mli tɔɔ Yehowa Nyɔŋmɔ ehala nɛkɛ “maŋtsɛmɛi ni yeɔ osɔfoi” ni yɛ naagbee lɛ amɛyibɔ baafee 144,000 yɛ Osɔfonukpa Yesu Kristo shishi lɛ mlibii lɛ.—Kpojiemɔ 7:1-8; 14:1-4.
6. “Maŋtsɛmɛi ni yeɔ osɔfoi” nɛɛ ateŋ mɛi enyiɛ yɔɔ heloo mli lolo yɛ shikpɔŋ nɔ, ni amɛsɔmɔɔ ákɛ mɛɛ okadi gbɔmɔ?
6 Ŋmɛnɛ, “maŋtsɛmɛi ni yeɔ osɔfoi” nɛɛ mlibii lɛ ateŋ shwɛɛnii fioo ko yɛ heloo mli lolo yɛ shikpɔŋ nɔ, taakɛ jeŋ akɔntaabuu ni jɛ Nuŋtsɔ lɛ Gbɛkɛnaashi Niyenii yɛ March 29, 1983 mli lɛ tsɔɔ lɛ. Mɛnɛɛmɛi fɛɛ sɔmɔɔ kutuu akɛ okadi nuu ni wo klala, ni kadiɔ mɛi ni sa lɛ ahiɛnaai lɛ.
7. Mɛni ji nɔ ni ŋmɛnɛ esa akɛ mɛi ni akɛ nuu ni wo klala ni woloŋmalɔ tɔ ŋmɔ ehɛ lɛ fee amɛhe mfoniri lɛ kɛ amɛhe afɔ Yehowa nɔ ni efee eha amɛ?
7 Ehe bahia ni gbalɔ Ezekiel ni hi shi yɛ blema lɛ ana ekãa babaoo koni ekashe Israelbii shitee-kɛ-wolɔi ni yɔɔ egbii lɛ amli lɛ gbeyei. Shi Nyɔŋmɔ Ofe lɛ wo shi akɛ ebaaha Ezekiel hiɛ awa tamɔ bɔ ni mɛi ni teɔ shi woɔ lɛ lɛ ahiɛ wa, hɛɛ, ebaaha ehiɛ awa po fe amɛnɔ̃ lɛ. No hewɔ lɛ esaaa akɛ esheɔ adesai ni teɔ shi woɔ lɛ lɛ agbeyei. (Ezekiel 2:4; 3:8; Yesaia 51:12) Nakai nɔŋŋ hu ehe hiaa ni shwɛɛnii ni ji Kristofoi ni akɛ mumɔ efɔ amɛ mu lɛ ni feɔ kuu ni akɛ nuu ni wo klala ni woloŋmalɔ tɔ ŋmɔ ehɛ lɛ fee amɛhe mfoniri lɛ kɛ amɛhe afɔ Ezekiel Nyɔŋmɔ lɛ nɔ kwraa koni eha amɛhiɛŋtsei awa keketee awo shitee-kɛ-wolɔi ni yɔɔ Kristendom kɛ esɛɛ fɛɛ lɛ ahiɛŋtsei ni wawai lɛ koni amɛkɛ amɛ akpe pɛpɛɛpɛ.
8. Mɛɛ famɔi ni sa jogbaŋŋ ŋmɛnɛ, Yesu kɛha?
8 Afii ohai nyɔŋma kɛ nɛɛhu ni eho nɛ, ni Yehowa Bɔfo Nukpa, Yesu Kristo tsu ekaselɔi lɛ ni amɛyashiɛ Nyɔŋmɔ Wiemɔ lɛ ni amɛsheee gbeyei yɛ amɛ diɛŋtsɛ amɛmaŋ. Shi dani eeetsu amɛ lɛ, ekɛɛ amɛ akɛ: “Nyɛkashea mɛi ni gbeɔ gbɔmɔtso lɛ shi amɛnyɛɛɛ susuma lɛ amɛgbe lɛ agbeyei; shi moŋ nyɛshea mɔ ni nyɛɔ susuma kɛ gbɔmɔtso fɛɛ hiɛ ekpataa yɛ gehena mli lɛ gbeyei.” (Mateo 10:28) Kɛfata he lɛ, ekɛɔ shwɛɛnii ni afɔ amɛ mu lɛ ni yɔɔ wɔgbii nɛɛ amli lɛ yɛ Biblia lɛ naagbee wolo lɛ mli akɛ: “Kaashe amanehulu ni ebaana lɛ eko eko gbeyei. Naa, abonsam baaŋɔ nyɛteŋ mɛi komɛi awo tsuŋ, koni aŋɔka nyɛ, ni nyɛaana amanehulu gbii nyɔŋma. Feemɔ anɔkwafo kɛyashi gbele mli, ni mahao wala akekre lɛ.” (Kpojiemɔ 2:10) Kwɛ bɔ ni wiemɔi nɛɛ woɔ mɔ hewalɛ babaoo ha!
9. (a) Tsuŋ ni awoɔ Yehowa Odasefoi pii ŋmɛnɛ le tsɔɔ akɛ amɛmiibo mɛɛ famɔ ni akɛha yɛ yiteŋgbɛ nɛɛ toi? (b) Mɛni moŋ je kpo fe nɔ ni akpaa gbɛ lɛ yɛ Paulo sane lɛ mli?
9 Kɛ wɔkai akɛ, ŋmɛnɛ, Yehowa odasefoi yɛ shikpɔji fe 40 ni atsĩ amɛnitsumɔ lɛ naa aloo akɛ mla egu anɔ lɛ—ni ŋwanejee ko bɛ he akɛ amɛji Kristofoi babaoo bianɛ fe yibɔ ni awo amɛ tsuŋ yɛ klɛŋklɛŋ afii oha lɛ kɛ ohai enyɔ lɛ mli lɛ—wɔnaa akɛ Yehowa Odasefoi ni yɔɔ ŋmɛnɛ lɛ sheee amanehulu ni amɛaana ni tsuŋwoo hu fata he lɛ gbeyei. Kristofoi atsuŋwoo baanyɛ ana nanemɛi Kristofoi anɔ hewalɛ ko ni tamɔɔɔ nɔ ni henyɛlɔ lɛ susuɔ lɛ. Bɔfo Paulo ni awo lɛ tsuŋ lɛ ŋma kɛjɛ etsuŋwoohe lɛ akɛ: “Nyɛmimɛi ni yɔɔ Nuŋtsɔ lɛ mli lɛ ateŋ mɛi babaoo etsɔ mikpãai lɛ anɔ ena ekãa babaoo fe tsutsu lɛ kɛmiijaje Nyɔŋmɔ wiemɔ lɛ ni amɛsheee gbeyei.”—Filipibii 1:14.
10. (a) Ahala Yehowa Odasefoi ŋmɛnɛ ni amɛwie mɛɛ shɛɛ sane ni jɛ nɛgbɛ? (b) Mɛɛ shidaamɔ ni tamɔ bɔfoi lɛ anɔ̃ yɛ afii ohai 19 ni eho nɛ esa akɛ amɛkɔ?
10 Ŋmɛnɛ, taakɛ eji yɛ Paulo gbii lɛ amli lɛ, jeee gbɔmɔ adesa sane ko ji nɔ ni ‘Yehowa odasefoi lɛ shiɛɔ ni amɛsheee gbeyei lɛ. Eji shɛɛ sane ni ashiɛɔ yɛ ebe naa pɛpɛɛpɛ ni ana kɛjɛ Ŋmalɛ Krɔŋkrɔŋ, Biblia lɛ ni ji Ŋwɛi Flooflo Nyɔŋmɔ, Yehowa, mumɔ naa Wiemɔ lɛ mli. Ekɛɔ ewebii ni amɛjɔɔ amɛhe nɔ ni abaptisi amɛ lɛ yɛ nakai Wiemɔ lɛ mli akɛ esa akɛ amɛfee edasefoi, ni amɛye Nyɔŋmɔ ni eji kɛ Maŋtsɛ ni eji lɛ he odase. (Yesaia 43:10, 12) Akɛni ekɛɔ amɛ akɛ amɛjaje e-Wiemɔ ni tɔmɔ ko bɛ mli lɛ amɛtsɔɔ hewɔ lɛ, mɛɛ bɔɔ nɔ̃ ni egbɛhe nɔ kwɔ aloo ebaa shi, yɔɔ hegbɛ loo hewalɛ, ni ekɛaafa amɛ aloo ekɛaanyɛ amɛnɔ ni amɛkpa wiemɔ? Esa akɛ akɔ shidaamɔ ni bɔfoi Kristofoi lɛ kɔ yɛ afii 1,900 ni eho nɛ lɛ, beni amɛkɛɛ nɔyelɔi lɛ akɛ: “Esa akɛ aboɔ Nyɔŋmɔ moŋ toi fe gbɔmɛi” lɛ.—Bɔfoi lɛ Asaji 5:29.
11. Ani gbɔmɛi etsɔmɔ amɛhe nyɔŋmɔi yɛ atɔmik okplɛm ni amɛfee lɛ hewɔ, ni hewalɛ ni amɛyɔɔ ni amɛkɛaate shi amɛwo Mantsɛyeli lɛ shiɛmɔ lɛ hu?
11 Gbɔmɛi efeko amɛhe nyɔŋmɔi yɛ nuklea okplɛm ni amɛfee lɛ hewɔ, ni esa akɛ amɛbu gbɛ ni amɛtsɔɔ nɔ amɛkɛtsuɔ nii lɛ he akɔntaa amɛha Ŋwɛi Flooflo Nyɔŋmɔ lɛ. (Kadimɔ Lala 82:6, 7) Yɛ nuklea okplɛm lɛ ni woɔ mɔ he gbeyei ni amɛfee lɛ hewɔ lɛ, nɔyelii lɛ miisumɔ ni amɛha shikpɔŋ lɛ nɔ ni amɛyeɔ lɛ ahi shi daa, moŋ fe ni amɛaaha Nyɔŋmɔ Maŋtsɛyeli kɛtsɔ Yesu Kristo nɔ lɛ he nibii ashwere. Amɛtaooo nakai Maŋtsɛyeli ni Yesu Kristo sɛɛnyiɛlɔi anɔkwafoi kɛ toibolɔi ni yɔɔ ŋmɛnɛ lɛ jajeɔ lɛ ni amɛkɛ naatsii nibii folɔɔ mli. Nɛkɛ nuklea be nɛɛ hako Kristo gbalɛ nɛɛ afee nɔ ni ebe eho aloo anyɛɛɛ atsu he nii: “Enɛɛmɛi ji kɔɔmɔi lɛ abɔimɔ. Shi nyɛ Iɛ, nyɛlea nyɛhe nɔ kwɛmɔ; ejaakɛ amɛaaŋɔ nyɛ kɛaatee gwabɔɔi amli, ni aaayi nyɛ yɛ kpeehei lɛ, ni akɛ nyɛ aaadamɔ lumɛi kɛ maŋtsɛmɛi ahiɛ yɛ mihewɔ, koni akɛye amɛ odase. Ni ja ashiɛ sanekpakpa lɛ atsɔɔ jeŋmaji fɛɛ da. Shi kɛ amɛkpala nyɛ kɛtee amɛyaha lɛ, nyɛkahaoa nyɛhe nyɛtoa yɛ nɔ ni nyɛaawie hewɔ, ni asaŋ nyɛkayea he ŋkɔmɔ; shi moŋ nɔ ni akɛaaha nyɛ yɛ nakai ŋmlɛtswaa lɛ nɔ lɛ, no nyɛwiea; ejaakɛ jeee nyɛ nyɛwieɔ lɛ, shi moŋ Mumɔ krɔŋkrɔŋ lɛ ni.”—Marko 13:8-11.
12. Yɛ shitee-kɛ-woo ni naa wa lɛ fɛɛ sɛɛ lɛ, mɛni esa akɛ ashiɛ klɛŋklɛŋ, ni mɛni he okadi ni ekaaa fe fɛɛ enɛ baafee?
12 Je lɛ kɔɔmɔi abɔimɔ lɛ je shishi yɛ 1914. Kɛkɛ ni Yesu Kristo sɛɛnyiɛlɔi anɔkwafoi kɛ toibolɔi lɛ ayiwaa ni ágba afɔ shi lɛ nyiɛ sɛɛ ni etee nɔ aahu kɛbashi wɔgbii nɛɛ amli. Odaseyelii lɛ fɛɛ tsɔɔ akɛ “nibii agbɛjianɔtoo lɛ naagbee” lɛ mli wɔyɔɔ lɛ, hɛɛ, ni eebɛŋkɛ enaagbee kwraa lɛ he yɛ nuklea be nɛɛ mli. (Mateo 24:3; Marko 13:3, 4) Shi dani naagbee kwraa lɛ aaaba lɛ, esa akɛ “ashiɛ sanekpakpa lɛ” “klɛŋklɛŋ dã.” No hewɔ lɛ Maŋtsɛyeli lɛ ‘shiɛmɔ yɛ jeŋ fɛɛ ni asheee gbeyei’ lɛ ji okadi loo odaseyelii ni ekaaa fe fɛɛ ni tsɔɔ akɛ “nibii agbɛjianɔtoo lɛ naagbee” lɛ mli wɔyɔɔ lɛ ateŋ ekome.—Mateo 24:14.
Nyɔŋmɔ Wiemɔ Lɛ Ni Aaye Ni Ashiɛ Yɛ Jeŋ Fɛɛ
13. Mɛɛ niiashikpamɔ ni tamɔ nɔ ni atsɔɔ mli yɛ Kpojiemɔ yitso 10 shwɛɛnii lɛ ná yɛ Jeŋ Ta I sɛɛ, ni mɛɛ famɔ akɛha beni amɛná mumɔŋ hewalɛwoo Iɛ sɛɛ?
13 Yohane, kaselɔi ni Yesu hala amɛ akɛ bɔfoi lɛ ateŋ mɔ kome ni ji naagbee mɔ ni shwɛ lɛ gbe eshikpɔŋ nɔ nitsumɔ lɛ naa yɛ klɛŋklɛŋ afii oha lɛ naagbee gbɛ. Yɛ nɛkɛ “nibii agbɛjianɔtoo nɛɛ naagbee” lɛ mli kɛjɛ 1914 kɛbaa nɛɛ, shwɛɛnii ni ji Kristofoi ni akɛ Yehowa mumɔ lɛ efɔ amɛ mu ni amɛjɔɔ amɛhe nɔ ni abaptisi amɛ yɛ. Yohane, ni ji Biblia mli naagbee wolokpo ni atsɛɔ lɛ Kpojiemɔ lɛ ŋmalɔ lɛ fee shwɛɛnii nɛɛ ahe mfoniri. Yɛ ta lɛ sɛɛ klɛŋklɛŋ afi ni ji 1919 mli ni shwɛɛnii nɛɛ na niiashikpamɔ ko ni tamɔ nɔ ni Yohane tsɔɔ mli ni kɔɔ lɛ diɛŋtsɛ ehe yɛ Kpojiemɔ yitso 10 lɛ. Nɛkɛ niiashikpamɔ nɛɛ baaba mli yɛ be mli ni akɛ “Nyɔŋmɔ teemɔŋsane” aloo “eteemɔŋ sane krɔŋkrɔŋ” lɛ baaba naagbee lɛ. (Kpojiemɔ 10:7, Authorized Version, NW) Beni amɛná mumɔŋ hewalɛwoo, taakɛ eji lɛ, kɛtsɔ “wolo bibioo” ni ŋɔɔ dɔkɔdɔkɔ ni akɛha amɛ nɛɛ yeli nɔ lɛ, kɛkɛ ni akɛɛ mɛi ni feɔ ŋmɛnɛŋmɛnɛ beaŋ kuu lɛ ni Yohane fee amɛhe mfoniri lɛ akɛ: “Esa akɛ ogba ekoŋŋ yɛ maji kɛ jeŋmaji kɛ majianɔwiemɔi kɛ maŋtsɛmɛi pii ahe.”—Kpojiemɔ 10:10, 11.
14. Namɛi tsu nitsumɔ ni akɛha bɔfo Yohane yɛ Patmo lɛ he nii?
14 Kɛji akɛ bɔfo Yohane ni yɔɔ Patmo-ŋshɔkpɔ lɛ nɔ lɛ nyɛ etsu esɔɔmɔ nitsumɔ ni da waa nɛɛ he nii yɛ egbɔlɛ be mli lɛ, no lɛ wɔbɛ nɔ ko ni jɛ mumɔŋ ni áŋma afɔ shi ni tsɔɔ nakai. Shi mɛi ni afɔ amɛ mu ŋmɛnɛ, ni Yohane fee amɛhe mfoniri lɛ hu? Kuu nɛɛ tsuɔ egbalɛ nitsumɔ lɛ he nii, ni amɛkwɛɔ koni atsu nitsumɔ ni akɛwo edɛ lɛ he nii ni agbe naa kwraa. Wiemɔ, “esa akɛ ogba ekoŋŋ” lɛ tsɔɔ akɛ aafolɔ edaseyeli nitsumɔ ni esa akɛ ekɛ heyeli atsu lɛ mli yɛ Patmo ŋshɔkpɔ lɛ nɔ ni atswa enaneshi tu kɛtee lɛ hewɔ. Eka shi faŋŋ akɛ nɔ ni akɛɛ lɛ yɛ jɛmɛ lɛ kɔɔ eŋmɛnɛŋmɛnɛ beaŋ fã lɛ he ŋmɛnɛ. Akɛni nɛkɛ sane lɛ ji hewɔ lɛ, esa akɛ wɔbi akɛ: Shikpɔji kɛ wiemɔi enyiɛ Yehowa Odasefoi shiɛɔ Nyɔŋmɔ Wiemɔ lɛ yɛ mli ni amɛsheee gbeyei yɛ be mli ni amɛbɔɔ mɔdɛŋ ni amɛshiɛ “maŋtsɛyeli lɛ he sanekpakpa nɛɛ . . . yɛ shikpɔŋ ni ayɔɔ nɔ lɛ fɛɛ nɔ” lɛ?—Mateo 24:14.
15. Nɛgbɛ shiɛmɔ lɛ etee nɔ kɛyashɛ bianɛ?
15 Afi 1983 Yearbook of Jehovah’s Witnesses lɛ bɔɔ shikpɔji 205 he amaniɛ ni amɛfeɔ Biblia kasemɔ he woji yɛ wiemɔi 190 mli. Mɛidiji, blɔfomɛi, mɛi ni hewolo nɔ su tamɔ eŋɔli, asara su, mɛi ni tsuɔ, mɛi ni jɛ wekui, wiemɔi kɛ jamɔi sɔrɔtoi amli kɛ shikpɔji anɔ. Kɛjɛ Jeŋ Ta I sɛɛ kɛbaa nɛɛ, “maŋtsɛmɛi” ni taraa maŋtsɛsɛii anɔ lɛ ayibɔ lɛ nɔ egbɔ naakpa, shi maŋkwramɔŋ nɔyelɔi sɔrɔtoi babaoo hu ebaŋɔ nɔyeli hewalɛ. Bɔ fɛɛ bɔ ni amɛgbɛhe ji yɛ nɔyeli mli aloo bɔ ni nɔ̃ maŋkwramɔ kuu ni amɛkɛyaa lɛ ji lɛ, Yehowa Odasefoi ni yɔɔ ŋmɛnɛ lɛ asane lɛ kɔɔ amɛ fɛɛ amɛhe. Yehowa Odasefoi ni amɛtsiɔ amɛnaa ni amɛguɔ amɛ yɛ shikpɔji babaoo nɔ lɛ yeɔ anɔkwasane nɛɛ he odase.
16. No hewɔ lɛ mɛɛ sane jajemɔ etee nɔ ni anyɛɛɛ naa atsi, yɛ jeŋ hiɛnyiɛlɔi lɛ asɔlemɔ kɛha mɛni lɛ fɛɛ sɛɛ?
16 No hewɔ lɛ, yɛ Jeŋmaji Akpaŋmɔ lɛ kɛ esɛɛyelɔ, Jeŋmaji Ekomefeemɔ lɛ ni ato ama shi akɛ no nɔ abaatsɔ ni aha jeŋ ni efee ekome ahi shi ni eya nɔ lɛ fɛɛ sɛɛ lɛ, Nyɔŋmɔ Maŋtsɛyeli kɛtsɔ Kristo nɔ lɛ jajemɔ akɛ adesai ahiɛnɔkamɔ kome lɛ etee nɔ ni asheee gbeyei ni anyɛɛɛ atsi naa hu. “Maŋtsɛyeli lɛ he sanekpakpa” nɛɛ efeko tamɔ nɔ ko “kpakpa” kɛhako jeŋ nɔyelɔi lɛ, ejaakɛ eyɛ sɔrɔto kwraa yɛ nɔ ni amɛsusu akɛ eji ekpakpa loo ehi lɛ he, hɛɛ, nɔ ni hi fe fɛɛ kɛha adesai ni ehao lɛ. Amɛnuɔ he akɛ amɛ diɛŋtsɛ amɛbaanyɛ amɛtsu shikpɔŋ lɛ nɔ saji ahe nii tamɔ amɛ diɛŋtsɛ amɛnitsumɔ Kɛji akɛ amɛnuɔ he akɛ yelikɛbuamɔ ko ni fe adesa nɔ̃ he miihia lɛ, “je nɛŋ nyɔŋmɔ” lɛ ŋɔɔ diɛŋtsɛ amɛjamɔ sɔlemɔi lɛ yaa, shi jeee he ko ni kwɔ fe nakai. “Maŋtsɛyeli lɛ he sanekpakpa” lɛ Shishijelɔ ni ji mɔ krɔŋkrɔŋ lɛ sumɔɔɔ ‘je nɛɛ’ ni Satan Abonsam ji enyɔŋmɔ lɛ.—2 Korintobii 4:4.
17. (a) Mɛni hewɔ shitee-kɛ-wolɔi nyɛɛɛ afite Nyɔŋmɔ Wiemɔ ni aŋma lɛ? (b) Namɛi anɔ atsɔ anu nakai Wiemɔ lɛ mli sane kɛjɛ 1919 kɛbaa nɛɛ?
17 Biblia lɛ ni ji gbalɛ wolo lɛ jajeɔ yɛ faŋŋ mli akɛ Nyɔŋmɔ wiemɔ lɛ hiɔ shi kɛyaa naanɔ, ni ákɛ ebaahi shi daa. (1 Petro 1:23-25) Anako nakai wiemɔi lɛ akɛ eji amale kɛbashi ŋmɛnɛ. Atsũmɔko kɛjɛko shihilɛ mli, yɛ adesa mɔdɛŋbɔɔi fɛɛ nɔ ni atsɔ gu ni aguɔ kɛ la ni akɛshãa lɛ lɛ fɛɛ sɛɛ. Nɔ ni kɛ enɛ kpaa gbee lɛ, ehe miihia ni ana mɔ ko ni baashiɛ nakai Nyɔŋmɔ Wiemɔ ni aŋma lɛ kɛ egbee koni anu. Nakai Nyɔŋmɔ Wiemɔ lɛ shiɛmɔ ni Yehowa Odasefoi feɔ ni amɛsheee gbeyei lɛ etee nɔ kɛ faishitswaa kɛjɛ ta lɛ sɛɛ afi ni ji 1919 mli, ni naabui pii ni faa yɛ be fɛɛ mli feɔ enɛ, yɛ mɔdɛŋ ni shitee-kɛ-wolɔi ni mli efu lɛ bɔɔ koni amɛha shiɛlɔi ni sheee gbeyei lɛ akpa lɛ fɛɛ sɛɛ.
18 Ani yiŋkɔshikɔshifeemɔ ko baanyɛ ahi ya ni nakai Wiemɔ lɛ Ŋwɛi Halɔ lɛ aaaya nɔ aha eŋmɛnɛŋmɛnɛ beaŋ Ezekiel kuu lɛ kɛ amɛnanemɛi ekãalɔi lɛ ahiɛŋtsei anɔ awa tamɔ ojarawatɛ koni amɛkɛ shitee-kɛ-wolɔi ni yitsoŋ wa lɛ akpe kɛyashi be mli ni hiɛkpatamɔ aaaba amɛshitee-kɛ-woo lɛ shi lɛ he? Dabi, yiŋkɔshikɔshifeemɔ ko bɛ he! Eha edasefoi lɛ agbɛ lɛ eye omanye kɛbashi bianɛ. Ni ebaaya nɔ eha amɛgbɛ lɛ ashwere kɛyashi be mli ni aaagbe ‘gba ni aaagba ekoŋŋ yɛ gbɔmɛi kɛ jeŋmaji kɛ majianɔwiemɔi kɛ maŋtsɛmɛi ahe’ ni asheee gbeyei kwraa lɛ naa. Abaakpa lɛ gbɛ ni efee enɛ, kɛha lɛ diɛŋtsɛ eyijiemɔ kɛ jeŋ muu fɛɛ maŋtsɛ ni eji lɛ bembuu.a
[Shishigbɛ niŋmai]
a Ajie kɛjɛ December 15, 1983 Blɔfo Buu-Mɔɔ lɛ mli.
Ani Obaanyɛ Okai?
□ ‘Nuu ni wo klala ni woloŋmalɔ tɔ ŋmɔ ehɛ’ lɛ feɔ mɛni he mfoniri yɛ wɔgbii nɛɛ amli, ni mɛɛ nitsumɔ etsuɔ bianɛ?
□ Mɛni hewɔ ebiɔ ni Yehowa Odasefoi afee mɛi ni sheee gbeyei lɛ?
□ Beni bɔfo Yohane ye “wolo bibioo” ko lɛ, mɛni esa akɛ efee yɛ no sɛɛ, ni mɛɛ ehenɔ yɔɔ ŋmɛnɛŋmɛnɛ beaŋ?
18. Yehowa baaya nɔ aha gbɔmɛi nɛɛ ahiɛŋtsei anɔ awa kɛyashi mɛɛ be?
[Mfoniri ni yɔɔ baafa 11]
Yɛ nuklea be nɛɛ mli lɛ, okadi nuu ko ni wo klala miitsu nitsumɔ ko ni esheee gbeyei. Ani okɛ ohe ewo nakai nitsumɔ Iɛ mli?
[Mfoniri ni yɔɔ baafa 13]
Taakɛ Yohane nine shɛ okadi wolo bibioo ko nɔ ni afa lɛ akɛ “esa akɛ ogba ekoŋŋ” lɛ, nakai nɔŋŋ Kristofoi ni yɔɔ ŋmɛnɛ lɛ jajeɔ Nyɔŋmɔ wiemɔ lɛ ni amɛsheee gbeyei