Tswaa Owɔsɛɛ Be Oma Yehowa Gbɛjianɔtoo Lɛ Nɔ
“Hiɛmɔ Yehowa gbeyeishemɔ mli daa nɛɛ. Ejaakɛ lɛlɛŋ, ákɛ wɔsɛɛ be ko yɛ, ni ohiɛnɔkamɔ Iɛ efeŋ yaka.”—ABƐI 23:17, 18.
1, 2. Mɛni hu bɔfo Yohane na kɛmiiba Ŋ.B. klɛŋklɛŋ afii oha lɛ naagbee?
1 YEHOWA jieɔ nibii ni baaba yɛ wɔsɛɛ be mli lɛ kpo etsɔɔ ewebii ni enɛ haa amɛnyɛɔ amɛfeɔ amɛnii yɛ nilee mli. (Yesaia 42:9) Akɛ nɔkwɛmɔ nɔ lɛ, kɛmiiba klɛŋklɛŋ afii oha Ŋ.B. lɛ naagbee lɛ, Nyɔŋmɔ kɛ ninaai ni kanyaa hiɛnɔkamɔ kɛha wɔsɛɛ be ha bɔfo Yohane ni egbɔ lɛ. Kwɛ bɔ ni wɔmii eshɛ wɔhe akɛ Yohane “ye nibii fɛɛ ni ena lɛ” he odase, ni ákɛ aŋmala fɛɛ yɛ Biblia mli wolo ni ji Kpojiemɔ lɛ mli aha wɔ!—Kpojiemɔ 1:1, 2.
2 Nibii ni Yohane na lɛ ekomɛi ji “ŋwɛibɔfoi ejwɛ” ni hiɛ “kɔɔyɔi ni kɛ amanehulu kpeteŋkpele” baaba lɛ mli lɛ. Be enyiɛ amɛbaatsi ŋwɛibɔfoi lɛ agbɛ koni amɛkaŋmɛɛ nakai kɔɔyɔi ni kpataa nii ahiɛ lɛ he? Ŋwɛibɔfo kroko kɛɛ amɛ akɛ: “Nyɛkafea shikpɔŋ lɛ loo ŋshɔ lɛ loo tsei lɛ efɔŋ ko kɛyashi beyinɔ ni wɔkɛ naasɔomɔ nɔ aaakadi wɔ-Nyɔŋmɔ lɛ tsuji lɛ ahiɛŋtsei anɔ da.”—Kpojiemɔ 7:1-3, 14; Mateo 24:21, 22.
3. Dani “kɔɔyɔi” ni aŋmɛɛ he lɛ aaafite Satan gbɛjianɔtoo lɛ, no mli lɛ mɛni etsɔ hiɛ ni kɛtsɔ mɛni nɔ?
3 “Kɔɔyɔi” ni aaaŋmɛɛ he lɛ kɛ haomɔi baaba Satan Abonsam shikpɔŋ nɔ gbɛjianɔtoo lɛ nɔ ni ekpata hiɛ kwraa. (Okɛto Yeremia 25: 32, 33 he.) Shi dani no aaaba lɛ, esa akɛ asɔo shwɛɛnii lɛ ni afɔ amɛ mu lɛ ni kɛ Yesu Kristo baaye maŋtsɛ yɛ ŋwɛi lɛ anaa da. Atsɔɔ Nyɔŋmɔ mumɔ krɔŋkrɔŋ, aloo enifeemɔ hewalɛ ni Kristofoi ni afɔ amɛ mu lɛ yɔɔ akɛ amɛŋwɛi gboshiniyeli lɛ he akadi lɛ nɔ asɔoɔ “wɔ-Nyɔŋmɔ lɛ tsuji lɛ ahiɛŋtsei anɔ.” (2 Korintobii 1:21, 22; Efesobii 1:12-14) Nyɔŋmɔ Maŋtsɛyeli lɛ he sanekpakpa lɛ shiɛmɔ yɛ “naagbee gbii lɛ amli” lɛ kɛ nɛkɛ “mɛi ni ahala” nɛɛ anaabuamɔ lɛ baa naagbee kwraa.—Mika 4;1; Mateo 24:14, 31.
4. “Nyɔŋmɔ tsuji” enyiɛ abaasɔo amɛnaa kɛya naanɔ kwraa ni te ooofee tɛŋŋ okɛ Ŋmalɛ lɛ afi ohetoo lɛ sɛɛ?
4 “Wɔ-Nyɔŋmɔ lɛ tsuji” lɛ ateŋ mɛi enyiɛ aaasɔo amɛnaa kwraa? Yohane, ni eji amɛteŋ mɔ kome lɛ kɛ anɔkwayeli bɔ amaniɛ akɛ: “Ni minu mɛi ni akɛ naasɔomɔ nɔ lɛ ekadi lɛ ayibɔ: Mɛi akpei oha kɛ nyɔŋmai ejwɛ kɛ ejwɛ.” Mɛnɛɛmɛi feɔ “Nyɔŋmɔ Israel,” mumɔŋ Israel, ni akutsei 12 ni eko fɛɛ eko mlibii feɔ 12,000 yɔɔ mli lɛ. (Kpojiemɔ 7:4-8; Galatabii 6:16) Mɛɛ gbɛjianɔtoo loo asafo po nɛ! Ni 144,000 lɛ baafee ‘maŋtsɛmɛi kɛ osɔfoi aha wɔ-Nyɔŋmɔ lɛ, ni amɛbaaye shikpɔŋ lɛ nɔ akɛ maŋtsɛmɛi’ yɛ Maŋtsɛ Yesu Kristo shishi—Kpojiemɔ 5:10; 14:1-4, NW.
5. (a) Ŋamɛi kɛ amɛhe ebɔ mumɔŋ Israel shwɛɛnii lɛ ahe agbɛnɛ? (b) Mɛi fɛɛ ni sheɔ Yehowa gbeyei lɛ feɔ mɛɛ kuu agbɛnɛ, ni taakɛ Abɛi 23:17, 18 tsɔɔ lɛ, mɛni yɔɔ kɛha amɛ?
5 Beni bɔfo Yohane na mumɔŋ Israel sɛɛ lɛ, ena “asafo babaoo” ko, ni ebɔi eyiŋ susumɔ akɛ namɛi kwraa nɛ. Akɛɛ lɛ akɛ: “Mɛnɛɛmɛi ji mɛi ni jɛ amanehulu kpeteŋkpele lɛ mli lɛ, ni amɛfɔ amɛtadei lɛ ahe ni amɛha eyɛ futaa yɛ Tobi lɛ lá lɛ mli.” Mɛi ni feɔ “asafo babaoo” lɛ ji Maŋtsɛyeli lɛ shishibii ni yɔɔ shikpɔŋ nɔ ni agba afɔ shi akɛ “toobi” Yesu Kristo “baatsɔɔ amɛ gbɛ kɛaatee wala nu bui ahe”—hɛɛ, naanɔ wala yɛ paradeiso shikpɔŋ nɔ lɛ. (Kpojiemɔ 7:9, 14, 17; Luka 23:43) Amrɔ nɛɛ nɛkɛ “tooi krokomɛi” nɛɛ kɛ Maŋtsɛyeli niyelɔi ni ji shwɛɛnii lɛ efee “kuu kome” ni nɛkɛ gbɔmɛi ni sheɔ Yehowa gbeyei nɛɛ fɛɛ bafeɔ Nyɔŋmɔ shikpɔŋ nɔ gbɛjianɔtoo loo asafo lɛ. (Yohane 10:16) Kɛ amɛye lɛ anɔkwale lɛ, amɛbaana wɔsɛɛ be ni jɔɔmɔ yɔɔ mli, ejaakɛ wɔkaneɔ akɛ: “Hiɛmɔ Yehowa gbeyeishemɔ mli daa nɛɛ. Ejaakɛ lɛlɛŋ, ákɛ wɔsɛɛ be ko yɛ, ni ohiɛnɔkamɔ lɛ efeŋ yaka.”—Abɛi 23:17, 18.
Gbɛjianɔtoo Momo Nɛɛ Bɛ Wɔsɛɛ Be
6. Nɛgbɛ wɔnaa wɔhe yɛ agbɛnɛ yɛ be naa?
6 Wɔbote yiwalɛ nibii agbɛjianɔtoo nɛɛ “naagbee gbii” lɛ amli vii kɛshɛ shɔŋŋ diɛŋtsɛ. (2 Timoteo 3:1-5) Jeŋ saji ni kɛ Biblia be he akɔntaabuu kpãa lɛ kɛ anɔkwasane lɛ ma shi akɛ Yesu Kristo je enɔyeli shishi yɛ ŋwɛi yɛ 1914 gbo be mli. (Lala. 110:1, 2) Adafitswaa woji bɔɔ amaniɛ daa gbi akɛ Yesu “ba ni eba” lɛ he “okadi” ni nibii pii yɔɔ mli lɛ kɛ nibii agbɛjianɔtoo nɛɛ naagbee lɛ he odaseyeli lɛ ka shi faŋŋ. (Mateo, yitsei 24, 25) Eji anɔkwale akɛ, “yinɔ” ni yɔɔ kɛjɛ be mli ni ato Maŋtsɛyeli lɛ ama shi yɛ 1914 lɛ miiya hiɛ yɛ afii amli. Shi Yesu wiemɔi lɛ tsɔɔ akɛ “ehoŋ” ja “amanehulu kpeteŋkpele” lɛ kɛ adesai aje ni ka “mɔ fɔŋ” Satan Abonsam “hewalɛ mli” lɛ eba naagbee dã. Mɛɛ mra enɛ aaaji? Eka shi faŋŋ akɛ etsɛŋ, ejaakɛ afii 70 nɛ ni Maŋtsɛyeli lɛ bɔi nɔyeli! Mateo 24:21, 34; 1 Yohane 5:19.
7. (a) Mɛni baaba yɛ “amanehulu kpeteŋkpele” lɛ shishijee mli? (b) Mɛni baaba yɛ apasa jamɔ hiɛkpatamɔ lɛ sɛɛ nɔŋŋ?
7 “Amanehulu kpeteŋkpele” lɛ baaje shishi trukaa yɛ naakpɛɛ gbɛ nɔ. (Mateo 24:36-44) Yɛ eshishijee mli lɛ, hiɛkpatamɔ baaba “Babilon Kpeteŋkpele” lɛ ni ji jeŋ apasa jamɔ maŋtsɛyeli lɛ nɔ. Satan gbɛjianɔtoo lɛ fa ni ehe gbɛi waa nɛɛ hiɛkpatamɔ lɛ baasa maŋkwramɔŋ kɛ jarayeli mli hemɛi lɛ ahe. Bɔfo Yohane jie enɛ kpo yɛ he, akɛ, “shikpɔŋ lɛ nɔ maŋtsɛmɛi” lɛ baafó lɛ, akɛ: “Kpoo, kpoo, maŋ kpeteŋkpele lɛ, Babilon, maŋ ni he wa lɛ! Ejaakɛ ŋmlɛtswaa kome mli ni okojomɔ eba nɛɛ.” Ni ejarayeli mli hemɛi lɛ hu? Yohane kɛfata he akɛ: “Ni shikpɔŋ lɛ nɔ jarayelɔi lɛ aaafó lɛ ni amɛaaye lɛ ŋkɔmɔ, ejaakɛ mɔ ko mɔ ko heee amɛjarayeli nibii lɛ dɔŋŋ.” (Kpojiemɔ 18:1-19) Kɛ akpata apasa jamɔ hiɛ nɔŋŋ lɛ, Yesu Kristo kɛ eŋwɛi ta lɛ baatsu nii ni ekpata mɛi ni eshwɛ yɛ yiwalɛ nibii agbɛjianɔtoo nɛɛ mli lɛ ahiɛ. Amɛhiɛ baakpata oya yɛ “Nyɔŋmɔ Ofe lɛ gbi wulu lɛ nɔ ta” ni baa kɛ foi yɛ Harmagedon lɛ mli.—Kpojiemɔ 16:14-16; 19:11-21.
8. Mɛɛ gbɛjianɔtoo kome pɛ yɔɔ wɔsɛɛ be ni baahi shi kɛya naanɔ, ni mɛni hewɔ nakai enɛ ji lɛ?
8 Mɛni ji nɔ ni enɛ tsɔɔ kɛha mɛi ni sheɔ Yehowa gbeyei yɛ anɔkwale mli lɛ? Etsɔɔ akɛ nɛkɛ je ni yɔɔ Satan hewalɛ shishi nɛɛ bɛ wɔsɛɛ be! Ebe lɛ fɛɛ eta momo! No hewɔ lɛ, Yehowa gbɛjianɔtoo loo esafo lɛ ji nɔ̃ pɛ ni yɔɔ ni okɛaatswa owɔsɛɛ be ni hiɔ shi kɛyaa naanɔ lɛ.
9. (a) Yɛ nɔ ni baa lɛ hewɔ lɛ, mɛɛ sanebimɔi abaanyɛ abi? (b) Mɛɛ ŋaawoo ni eha yɛ ebe naa pɛpɛɛpɛ anaa yɛ 1 Timoteo 6:17-19?
9 Yɛ nɔ ni ka wɔhiɛ ni baa lɛ hewɔ lɛ, belɛ ani eeetsɔɔ akɛ oyɛ hemɔkɛyeli, aloo jwɛŋmɔ kpakpa po, akɛ ooobɔ mɔdɛŋ otswa wɔsɛɛ be ni hejɔlɛ yɔɔ mli oma shi yɛ gbɛjianɔtoo ni abu lɛ fɔ aha hiɛkpatamɔ nɛɛ mli nitsumɔ ko nɔ? Akɛ nɔkwɛmɔ nɔ lɛ, mɛɛ je lɛ gbɛjianɔtoo loo nitsumɔ gbɛjianɔtoo obaanyɛ otswa owɔsɛɛ be ni hiɔ shi kɛyaa naanɔ oma nɔ shweshweeshwe? Eko kwraa bɛ! No hewɔ lɛ ani jwɛŋmɔ bɛ mli akɛ omii aaashɛ hehaanɔ̃ kɛ daaŋ ŋmaa pɛ he yɛ be mli ni okɛ Maŋtsɛyeli lɛ he nibii lɛ yeɔ klɛŋklɛŋ gbɛhe lɛ? (Mateo 6:33; 1 Timoteo 6:7-12; 2 Timoteo 2:4) Enɛ ji be krɛdɛɛ ni abaanyɛ akɛ bɔfo Paulo ŋaawoo nɛɛ atsu nii: “Niiatsɛmɛi ni yɔɔ je nɛŋ lɛ, wo amɛ kita ni amɛkajwɛŋ nii wuji, ni amɛkaŋɔ amɛhiɛ hu amɛfɔ nifalɛ ni bɛ shweshweeshwe lɛ nɔ, shi moŋ Nyɔŋmɔ hiɛkalɔ lɛ nɔ, mɔ hu ni ŋɔɔ nibii fɛɛ ehaa wɔ babaoo, akɛ wɔye mli ŋɔɔmɔ lɛ, ni amɛfee ejurɔ, ni amɛtsɔmɔ niiatsɛmɛi yɛ ejurɔfeemɔi agbɛfaŋ, amɛsumɔ nihamɔ, amɛnine akpɔ, amɛbɔ jwetri amɛha amɛhe, ni efee shishitoo kpakpa eha be ni baaba lɛ, koni amɛmɔ anɔkwa wala lɛ mli.”—1 Timoteo 6:17-19.
Tswaa Owɔsɛɛ Be Oma Shi Yɛ Nilee Mli
10. Akɛni “amanehulu kpeteŋkpele” lɛ ewo kusuu yɛ wɔhiɛ hewɔ lɛ, mɛni esa akɛ efee nɔ ni he hiaa wɔ titri?
10 Mɛɛ pɛpɛɛpɛ ni aaaŋmɛ yɛ mumɔŋ po jeɔ kpo yɛ bɔfo lɛ wiemɔi lɛ amli nɛkɛ! Yehowa webii naa gbɛ ni amɛaatsɔ nɔ amɛje mli yɛ enɛ mli. No ji enɛ: Amɛkɛ heloo gbɛfaŋ nibii eto amɛgbɛhe ni sa lɛ, ni amɛyoo akɛ esaaa akɛ amɛmaa “nifalɛ ni bɛ shweshweeshwe” lɛ nɔ mi, shi moŋ “amɛtsɔmɔ niiatsɛmɛi yɛ ejurɔfeemɔi [nitsumɔi kpakpai] agbɛfaŋ.” Eka shi faŋŋ akɛ nɔ ni fata he hu ji ekãa ni akɛaawo Kristofoi asɔɔmɔ lɛ mli daa. Akɛni “amanehulu kpeteŋkpele” lɛ ahum ni baatswa lɛ miibua ehe naa bianɛ hewɔ lɛ, enɛ jeee be ni akɛtoɔ gbɛjianɔ ahaa wɔsɛɛ be ninamɔ yɛ je lɛŋ nitsumɔ ko mli, aloo ni aaahe gbɛi akɛ mɔ ni ena nii yɛ nitsumɔ mli. Be ni akɛaashiɛ Nyɔŋmɔ Maŋtsɛyeli lɛ he sanekpakpa lɛ nɛ, koni abɔ mɛi ni leee nɔ ni yaa nɔ lɛ kɔkɔ yɛ oshara ni baa lɛ he. Agbɛnɛ, Yesu Kristo kɛ nitsumɔ ewo wɔdɛŋ akɛ wɔshiɛ ni wɔfee kaselɔi. No hewɔ lɛ, no titri ji nɔ ni esa akɛ efee wɔ hiamɔ nii akɛ Yehowa Odasefoi.—Mateo 24:14; 28:19, 20; Yesaia 43:10-12.
11. Mɛni baafee Kristofoi asɔɔmɔ nitsumɔ lɛ mli naanɔ sɛɛnamɔi komɛi?
11 Nitsumɔi pii ni mɛi ni yɔɔ je lɛŋ bianɛ lɛ diɔ sɛɛ lɛ ateŋ babaoo baaba naagbee kwraa yɛ “amanehulu kpeteŋkpele” lɛ mli. Eyɛ mli moŋ akɛ nitsumɔi komɛi yɛ ni abaaku sɛɛ atsu yɛ Nyɔŋmɔ shiwoo nibii agbɛjianɔtoo hee lɛ mli. Shi ani ole ŋmɛnɛŋmɛnɛ gbii nɛɛ amli nitsumɔ ko ni he yɔɔ sɛɛnamɔ babaoo tamɔ Kristofoi asɔɔmɔ nitsumɔ lɛ? Mumɔŋ nɔyaa kɛ shweremɔ ni baa yɛ nɛkɛ nitsumɔ ni Nyɔŋmɔ kɛha nɛɛ mli lɛ baafee nɔ ni sɛɛnamɔ yɔɔ he babaoo fe fɛɛ yɛ Gbɛjianɔtoo Hee lɛ mli. Mɔ kɛ Yehowa teŋ wekukpaa ni mli wa ni anaa yɛ sɔɔmɔ nitsumɔ lɛ mli lɛ mli baalɛɛ kɛyabote nakai nibii agbɛjianɔtoo lɛ mli. Ni tsɔsemɔ he ŋaa ni étee hiɛ lɛ he baaba sɛɛnamɔ yɛ gbɔmɛi akpekpei abɔ ni átee amɛ shi lɛ atsɔsemɔ mli.—Yesaia 54:13; Yohane 5:28, 29; Kpojiemɔ 20:12.
12. (a) Ákɛ Yehowa tsuji lɛ, mɛɛ gbɛkpamɔi ni yɔɔ naakpɛɛ wɔyɔɔ, shi mɛni he hiaa ni wɔfee?
12 Kɛ nɔ ni he hiaa wɔ titri bianɛ ji ni wɔsa Nyɔŋmɔ hiɛ ni wɔfee esuɔmɔnaa nii lɛ, belɛ wɔyɛ gbɛkpamɔi kpakpai ni yɔɔ naakpɛɛ lɛlɛŋ. (Lala 40:9; Romabii 12:1, 2) Yɛ anɔkwale mli lɛ, kɛ ‘wɔsheɔ Yehowa gbeyei lɛ, belɛ wɔsɛɛ be yɛ kɛha wɔ, ni afoŋ wɔ hiɛnɔkamɔ lɛ ashɛŋ afɔŋ.’ (Abɛi 23:17, 18) Kɛ wɔtee nɔ wɔnyiɛ “wala gbɛ” lɛ nɔ yɛ Nyɔŋmɔ gbeyeishemɔ mli lɛ, naanɔ wala baafee wɔ nɔ̃. (Lala 16:11) Shi yɛ be mli ni wɔyaa nɔ lɛ, ehe baahia ni wɔkɛ teokrase otii ni shishinumɔ yɔɔ mli amamɔ wɔhiɛ ni wɔnine ashɛ nɔ.
Otii Komɛi Ni Shishinumɔ Yɔɔ Mli
13. (a) Yɛ Ŋmalɛ naa lɛ, mɛni hewɔ wɔbaanyɛ wɔkɛɛ akɛ átee nɔ áwo Yehowa jamɔ lɛ nɔ lɛ? (b) No hewɔ lɛ, mɛni ji otii ni gbɔmɛi akpei ohai abɔ anine eshɛ nɔ lɛ ekomɛi?
13 Kpaako mɛi komɛi eje nɔ ni abaanyɛ atsɛ lɛ akɛ kwɔ ni amɛkwɔɔ “Yehowa we gɔŋ” lɛ shishi. Kɛjɛ tai afii ni ji 1914-18 sɛɛ kɛbaa nɛɛ, Yehowa jamɔ krɔŋŋ ni be ko lɛ esɔlemɔtsu loo “we” lɛ yɔɔ Yerusalem gɔŋ ko nɔ lɛ efee nɔ ni átee nɔ áwo nɔ. “Akɛma shi yɛ gɔji lɛ” ni amamɔ apasa nyɔŋmɔi asɔlemɔtsui yɛ nɔ lɛ “ayiteaŋ.” No hewɔ lɛ, Yehowa jamɔ lɛ efee nɔ ni “áwo nɔ fe gɔŋkpɔi lɛ.” Ni Yehowa jamɔ ni áwo nɔ nɛɛ he asafoi babaoo hoɔ yuu kɛyaa lɛ. (Mika 4:1-4; Yesaia 2:2-4) Yɛ be mli ni ámɛna ŋmalɛi lɛ ahe anɔkwale nilee lɛ, amɛtsakeɔ, ni amɛkuɔ amɛsɛɛ, ni amɛjɔɔ amɛhe nɔ amɛhaa Nyɔŋmɔ yɛ sɔlemɔ mli ni amɛkɛ nu mli baptisimɔ feɔ enɛ he okadi. (Yohane 17:3; Bɔfoi lɛ Asaji 2: 38; 3:19) No tsɔɔ akɛ, enɛ ji oti ni gbɔmɛi ni jɛ jeŋmaji fɛɛ mli ni sɔmɔɔ Yehowa yɛ no sɛɛ yɛ anɔkwayeli mli ákɛ eshikpɔŋ nɔ gbɛjianɔtoo loo asafo lɛ fa lɛ anine shɛɔ nɔ. Kwɛ miishɛɛ ni ámɛna akɛ amɛkɛ amɛhe aaawo anɔkwa Nyɔŋmɔ kome pɛ lɛ jamɔ ni áwo nɔ lɛ mli! Shi bo hu? Ani ótsɔ gbɛ ni tamɔ nɛkɛ nɔ?
14. Yɛ be mli ni wɔje shishi wɔmiija Yehowa po lɛ, esa akɛ wɔya hiɛ kɛyashɛ mɛni he, ni mɛɛ gbɛ nɔ wɔɔtsɔ wɔfee enɛ yɛ?
14 Kɛ wɔ́je shishi wɔkɛ Yehowa webii miisɔmɔ po lɛ, ehe miihia ni wɔya nɔ wɔna mumɔŋ niyenii ahe akɔnɔ ni sa. Akɛni wɔkase “Kristo shishijee saji” lɛ hewɔ lɛ, esa akɛ “wɔfoŋ kɛya dalɛ mli.” Kɛtsɔ mumɔŋ nibii ni Yehowa eto he gbɛjianɔ kɛtsɔ “tsulɔ anɔkwafo kɛ nilelɔ” lɛ nɔ lɛ fɛɛ ni wɔkɛaatsu nii lɛ nɔ. (Hebribii 6:1-3; Mateo 24;45-47) No hewɔ lɛ obaanyɛ obi ohe akɛ: “Ani mikaneɔ Nyɔŋmɔ Wiemɔ lɛ daa? Ani miji woji ni atsɔ “tsulɔ” kuu lɛ nɔ akɛha lɛ kaselɔ kpakpa?—Hebribii 5:11-14.
15. (a) Mɛɛ ŋaawoo Paulo kɛha yɛ Hebribii 10: 24, 25, shi mɛni ji nɔ ni mɛi komɛi feɔ? (b) Kɛ hegbɛ yɛ akɛ mɔ ko baanyɛ aya ehiɛ yɛ kpeei ni ayaa lɛ mli aloo yɛ Kristofoi asɔɔmɔ nitsumɔ lɛ mli lɛ, mɛɛ ŋaa awoɔ?
15 Agbɛnɛ hu, esa akɛ wɔbo Paulo ŋaawoo lɛ toi: “Nyɛhaa wɔjwɛŋa wɔteŋ mɔ fɛɛ mɔ he, wɔkanya wɔhe yɛ suɔmɔ kɛ nitsumɔi kpakpai amli. Kaagbala ohe shi kɛmiijɛ kpeei ni kuu lɛ feɔ lɛ he, taakɛ mɛi komɛi feɔ lɛ, shi moŋ nyɛwoa nyɛhe hewalɛ ni nyɛyaa nɔ; babaoo moŋ, akɛni nyɛnaa akɛ Gbi lɛ miibɛŋkɛ nɛɛ.” (Hebribii 10:24, 25, The Jerusalem Bible) Kristofoi akpeei ni wɔɔya daa lɛ ji wɔ “sɔɔmɔ krɔŋkrɔŋ” lɛ fa. Shi mɛi komɛi yaa maŋshiɛmɔ lɛ pɛ shishi daa otsi, ni amɛshiɔ Maŋtsɛyeli Asa lɛ nɔ amrɔ dani ajeɔ Buu-Mɔɔ nikasemɔ lɛ shishi. Mɛi komɛi eyaaa Sɔɔmɔ kpee lɛ. Ani efee nɔ ni shishinumɔ bɛ he tsɔ̃ kɛha amɛ, yɛ amɛhe ni amɛkɛwooo shia kɛ shia odaseyeli nitsumɔ lɛ mli kɛ Kristofoi asɔɔmɔ nitsumɔi krokomɛi lɛ amli babaoo lɛ hewɔ? Kɛji akɛ onaa akɛ esa akɛ ‘oya ohiɛ yɛ nibii nɛɛ ekomɛi amli lɛ, mɛni hewɔ ni okɛ nɛkɛ saji nɛɛ efɔɔɔ Yehowa hiɛ yɛ sɔlemɔ mli, ni obi ni eye ebua bo ni ofee mɔ ni kɛ ehe woɔ “sɔɔmɔ krɔŋkrɔŋ” lɛ mli nibii fɛɛ mli daa, ni ofee nɔkwɛmɔ nɔ kpakpa hu yɛ mli?—Hebribii 12:25-29.
16. (a) Mɛɛ teokrase otii ni shishinumɔ yɔɔ mli atsi ta yɛ biɛ? (b) Kɛji akɛ Ŋmalɛ naa gbɛnaa nii po tsiɔ mɔ ko gbɛ ni enɛ haaa enine ashɛ otii nɛɛ anɔ lɛ, mɛni lolo ji nɔ ni ebaanyɛ efee?
16 Mɛni ji teokrase otii krokomɛi ni shishinumɔ yɔɔ mli? Ojogbaŋŋ, aŋkroaŋkroi pii kɛ amɛhe miiwo be fɛɛ sɔɔmɔ nitsumɔ lɛ mli bianɛ akɛ daa loo gbɛgbalɔi awalɔi. Ani obaanyɛ olɛɛ osɔɔmɔ lɛ mli yɛ nɛkɛ gbɛi anɔ? Ni kɛji akɛ Ŋmalɛ naa gbɛnaa nii ni ka onɔ lɛ tsiɔ bo gbɛ hewɔ lɛ onine shɛɛɛ otii nɛɛ anɔ hu lɛ, obaanyɛ ofi be fɛɛ shiɛlɔi nɛɛ asɛɛ kɛ hewalɛwoo yɛ be mli ni bo diɛŋtsɛ lɛ ofeɔ babaoo ni ooonyɛ yɛ Nyɔŋmɔ sɔɔmɔ mli yɛ bɔ ni shihilɛ mli ni oyɔɔ lɛ aaaŋmɛ bo gbɛ ni ofee. Kɛ wɔkɛ anɔkwayeli já Yehowa ni wɔsɔmɔ lɛ kɛjie eyi lɛ, wɔ fɛɛ wɔbaanyɛ wɔtsɔɔ akɛ ‘wɔkɛ wɔhiɛ efɔko nifalɛ ni bɛ shweshweeshwe lɛ nɔ, shi moŋ Nyɔŋmɔ hiɛkalɔ lɛ nɔ.’ Ni kɛha mɛi ni kɛ amɛhe woɔ gbɛgbamɔ nitsumɔ lɛ mli lɛ, enɛ ji gbɛ ni hi fe fɛɛ lɛlɛŋ ni aaatsɔ nɔ “amɔ anɔkwa wala lɛ mli kpɛŋŋ” lɛ ateŋ ekome.—1 Timoteo 6:17-19, NW.
17. (a) Mɛɛ sɔɔmɔ hegbɛ obalaŋtai lɛ titri baafee jogbaŋŋ kɛ amɛsusu he? (b) Mɛɛ tsui ni nyɔɔ mɔ mli Betel weku lɛ mli bii lɛ yɔɔ?
17 Betel shiai ni ebɔle je lɛŋ lɛ ekome mli ni aaasɔmɔ yɛ lɛ hu ji hegbɛ ko ni ekaaa, nɔ ni obalaŋtai lɛ titri baanyɛ atsɔ sɔlemɔ nɔ asusu he jogbaŋŋ. Betel sɔɔmɔ lɛ kɛ tsɔsemɔ ni nɔ bɛ haa yɛ wekukpaa ni ka gbɔmɛi ateŋ lɛ mli, ejaakɛ Betel nitsulɔi lɛ feɔ ekome ni amɛkɛtsuɔ Maŋtsɛyeli lɛ he nii kɛyaa hiɛ. Nitsumɔ mli ŋaai komɛi ni akaseɔ yɛ Betel lɛ he baanyɛ aba sɛɛnamɔ yɛ nitsumɔ kpeteŋkpele ni baaya nɔ yɛ Gbɛjianɔtoo Hee lɛ mli lɛ mli. Shi, akɛni mɛi pii boteɔ Betel sɔɔmɔ mli mra yɛ amɛwala be mli hewɔ lɛ, amɛbɛ heloo gbɛfaŋ nibii tsɔ, shi amɛmii shɛɔ niyenii kɛ hehaanɔ ni amɛnaa lɛ he ni amɛtsui nyɔɔ amɛmli diɛŋtsɛ akɛni amɛle akɛ amɛnitsumɔ lɛ he baa sɛɛnamɔ kɛhaa mɛi krokomɛi babaoo yɛ mumɔŋ hewɔ.—Jajelɔ 3: 12, 13.
18. Be fɛɛ sɔɔmɔ lɛ mli ni mɔ ko kɛ ehe aaawo lɛ baanyɛ atsɔɔ loo atsɔse lɛ yɛ mɛni mli, ni Ŋmalɛ lɛ fiɔ enɛ sɛɛ yɛ mɛɛ gbɛ nɔ.
18 Be fɛɛ sɔɔmɔ lɛ mli fai krokomɛi ni akɛ he aaawo mli lɛ baanyɛ atsɔɔ mɔ nii ni ekɛ ehe afɔ Yehowa Nyɔŋmɔ nɔ babaoo. Jɛ lɛŋ bii ni kɛ amɛhe fɔɔ “nifalɛ ni bɛ shweshweeshwe lɛ nɔ lɛ fɔɔ jwɛŋmɔ ni ji akɛ mɔ ko akwɛ lɛ diɛŋtsɛ ehe lɛ námɔ. Shi be fɛɛ sɔɔlɔ lɛ titri ji mɔ ni baanyɛ akase akɛ Yehowa toɔ gbɛjianɔ babaoo ehaa mɛi ni “taoɔ Maŋtsɛyeli lɛ kɛ ejalɛ lɛ tsutsu” lɛ. (Mateo 6:25-34) Gbɔmɛi akpei babaoo ni amɛsɔmɔ akɛ gbɛgbalɔi afii pii lɛ baanyɛ aye anɔkwasane lɛ he odase akɛ shihilɛ mli nibii ebɔko amɛ. Okɛ amɛ awie, ni obaana akɛ amɛbaajɛ amɛtsuiŋ fɛɛ ni amɛkɛ lalatsɛ David akpa gbee, mɔ ni jaje akɛ: “Sa lɛ gbekɛ jimi, ni agbɛnɛ mitsɔ nuumo, shi minako jalɔ ko ni akwa lɛ, aloo ni eseshibii miisisɛ aboloo pɛŋ” lɛ.—Lala 37:25.
Tswaa Wɔsɛɛ Be Ni Yɔɔ Shweshweeshwe Oma Shi
19, 20. (a) Akɛni be ni eshwɛ kɛha nibii agbɛjianɔtoo nɛɛ faaa kwraa hewɔ lɛ, mɛni esa akɛ ana wɔ ni wɔmiifee? (b) No hewɔ lɛ, tɛ wɔɔfee wɔnii yɛ nilee mli wɔha tɛŋŋ yɛ wɔsɛɛ be hewɔ?
19 Kɛ wɔji Yehowa odasefoi anɔkwafoi lɛ, belɛ wɔyoo akɛ be ni eshwɛ kɛha gbɛjianɔtoo nɛɛ faaa kwraa. No hewɔ lɛ mɛni esa akɛ ana wɔ ni wɔmiifee? Esa ni ana wɔ ni wɔmiifee nii yɛ nilee mli bɔ ni kɛ bɔfo Petro wiemɔi nɛɛ kpaa gbee: “Akɛni nɛkɛ nibii nɛɛ fɛɛ baafite hewɔ lɛ, mɛɛ gbɔmɛi esa akɛ nyɛtsɔmɔ yɛ jeŋbai krɔŋkrɔŋi kɛ Nyɔŋmɔ jamɔi amli? Mɛi ni kwɛɔ gbɛ ni amɛshweɔ Nyɔŋmɔ gbi lɛ baa lɛ, nɔ mli ni ŋwɛi aaahere kɛ la ni eeeshã, ni jeŋ shishijee nii hu aaasere yɛ la mli.”—2 Petro 3:11, 12.
20 Bɔfo Yohane hu ha efee faŋŋ akɛ, je nɛɛ miiho aya. (1 Yohane 2:15-17) Etsɛŋ ni nɛkɛ gbɛjianɔtoo momo nɛɛ baalaaje. No hewɔ lɛ, esa akɛ gbɔmɛi fɛɛ ni sheɔ Nyɔŋmɔ gbeyei lɛ efee mɛi ni amrɔ nɛɛ amɛkɛ amɛhe ewo ‘jeŋbai krɔŋkrɔŋi kɛ Nyɔŋmɔ jamɔi amli, yɛ be’ mli ni amɛmɛɔ ni amɛbaa ba ni Yehowa gbi lɛ eba lɛ hiɔ amɛjwɛŋmɔ mli kpaakpa lɛ.’ Kaaha ohiɛ miikpa nɔ akɛ Nyɔŋmɔ asafo lɛ loo egbɛjianɔtoo lɛ pɛ baaje nibii agbɛjianɔtoo ni gbóɔ nɛɛ naagbee lɛ mli. No hewɔ lɛ okɛ nilee atsu nii, ni oto gbɛjianɔ oha naanɔ wala kɛtsɔ Yehowa gbɛjianɔtoo lɛ ni okɛaatswa owɔsɛɛ be oma shi lɛ nɔ.a
[Shishigbɛ niŋmai]
a Ajie kɛjɛ July 15, 1984 Watchtower lɛ mli.
Kɛha Emlitii
◻ Mɛni nɛkɛ mɛi fɛɛ ni sheɔ Yehowa gbeyei lɛ feɔ, ni mɛɛ nɔmimaa Abɛi 23:17, 18 kɛhaa amɛ?
◻ Mɛɛ gbɛjianɔtoo loo osafo pɛ yɔɔ wɔsɛɛ be, ni mɛni hewɔ ohaa hetoo nakai?
◻ Akɛni “amanehulu kpeteŋkpele” Iɛ ebɛŋkɛ kpaakpa hewɔ lɛ, mɛni titri esa akɛ Yehowa Odasefoi asusu he?
Mɛni ji teokrase otii ni mɛi pii anine baanyɛ ashɛ nɔ Iɛ ekomɛi?
[Wiemɔ ni akɔ ni akɛmiitsu nii ni yɔɔ baafa 25]
Ŋmɛnɛ, mɛi ni sheɔ Nyɔŋmɔ gbeyei yɛ anɔkwale mli Iɛ fɛɛ ená Yesu akɛ amɛ-Tookwɛlɔ ni amɛsɔmɔɔ yɛ ekomefeemɔ mli akɛ Yehowa shikpɔŋ nɔ gbɛjianɔtoo loo asafo
[Mfoniri ni yɔɔ baafa 27]
Akɛni ŋwɛi jɔɔmɔ yɔɔ Maŋtsɛyeli-shiɛmɔ nitsumɔ lɛ nɔ hewɔ lɛ, gbɔmɛi asafoi pii miiho yuu kɛmiiya Yehowa jamɔ ni áwo nɔ lɛ he
[Wiemɔ ni akɔ ni akɛmiitsu nii ni yɔɔ baafa 28]
Ani ootswa owɔsɛɛ bo ooma Yehowa gbɛjianɔtoo lɛ nɔ? Gbɛgbamɔ nitsumɔ lɛ kɛ Betel sɔɔmɔ fata teokrase otii ni mɛi pii anine eshɛ nɔ Iɛ he
[Wiemɔ ni akɔ ni akɛmiitsu nii ni yɔɔ baafa 29]
“Ajɔɔ gbɔmɔ ni enyiɛɛɛ mɛi fɔji ajina mli, ni edamɔɔɔ eshafeelɔi agbɛ nɔ, ni etaaa hefɛoyelɔi atramɔ he, shi moŋ Yehowa mla lɛ he emii shɛɔ yɛ, ni emla lɛ he nɔŋŋ ejwɛŋɔ shwane kɛ nyɔɔŋ! Etamɔ tso ni atɛo yɛ faai atoi, ni woɔ eyibii yɛ ebe lɛ mli, ni eyibaai kpɔŋ; ni nɔ fɛɛ nɔ ni efeɔ lɛ shwereɔ. Jeee bɔ ni mɛi fɔji yɔɔ nɛ.”—Lala 1:1-4.