Maŋtsɛyeli Jajelɔi Bɔ Amaniɛ
Gbohiiashitee Hiɛnɔkamɔ lɛ
GBOHIIASHITEE hiɛnɔkamɔ lɛ fata Biblia mli “shishijee saji” lɛ ahe ni ekɛ mumɔŋ hewalɛ haa mɔ ko kɛ mɔ lɛ kɛ gbele miikpe. (Hebribii 6:1, 2; Yohane 5:28, 29) Yehowa ji mɔ ni kɛ hiɛnɔkamɔ nɛɛ ha. Nikaselɔ ko ni jɛ Japan na hiɛnɔkamɔ nɛɛ ni ekɛha mɛi krokomɛi.
Beni Maŋtsɛyeli jajelɔ ko kɛ nɛkɛ nikaselɔ nɛɛ kpe klɛŋklɛŋ be mli kwraa lɛ, ekpoo akɛ eeehe Biblia he woji lɛ ejaakɛ esumɔɔɔ ni ekaneɔ. Shi afɔ nine atsɛ lɛ koni eba Yehowa Odasefoi amaŋtsɛyeli Asa nɔ ni akɛ miishɛɛ babaoo here lɛ atuu. Enyã nɔ ni enu lɛ he, ni yɛ sɛɛ mli lɛ efɔ nine etsɛ enanemɛi skulbii lɛ ateŋ mɛi etɛ, ni amɛ fɛɛ amɛba. Gbekɛbii hii ejwɛ nɛɛ atsɔɔlɔi lɛ buɔ amɛ gbekɛbii “fɔji.”
Yɛ be mli ni amɛyaa nɔ amɛkaseɔ wolo, Your Youth,Getting the Best out of It lɛ, amɛ atuatsemɔ su lɛ tsake, ni amɛtsɔɔlɔ lɛ yoo enɛ, ni lɛ hu ebanya wiemɔ lɛ he ni ekɛ ehe wo Biblia lɛ kasemɔ mli. Gbekɛbii “fɔji” nɛɛ ahiɛnyiɛlɔ lɛ helatsɛ ni, ni egbo beni eye afii 15. Eyɛ mli akɛ be kuku pɛ ekɛtee Kristofoi ni ji Yehowa Odasefoi akpeei moŋ, shi ekɛtswa hemɔkɛyeli ko ni yɔɔ naakpɛɛ ewo emli. No hewɔ lɛ dani eeegbo lɛ, eŋma wolo ni ekɛtsɔɔ hemɔkɛyeli ni mli wa ni eyɔɔ yɛ gbohiiashiteei hiɛnɔkamɔ lɛ mli lɛ. Ekɛɛ akɛ:
“Miwala baaba naagbee yɛ afii 15 sɛɛ yɛ gbɔmɔtso lɛ mli fatɔɔi komɛi ni haaa mada dɔŋŋ hewɔ. Kɛ akɛto adesa wala sɛɛkɛlɛ he lɛ, miwala be lɛ mli mlijaa enumɔ mli ekome pɛ miye. Shi mitsui enyɔ mimli diɛŋtsɛ yɛ nakai afii 15 lɛ mli. Titri lɛ miwala be afii 15 lɛ agbiɛnaa be mli mikɛná gbii ni ŋɔɔ jogbaŋŋ diɛŋtsɛ. Nɔ ni fe fɛɛ lɛ ji nilee ákɛ Nyɔŋmɔ Ofe ko ni baanyɛ atsa helai ni ejie gbele kɛya yɛ. Ákɛ aaale akɛ kɛ mɔ ko gbo lɛ, gbohiiashitee hiɛnɔkamɔ yɛ lɛ ji sane ko ni ŋɔɔ waa.”
Obalanyo fioo nɛɛ sumɔɔ ŋmalɛ ni haa ‘ŋwɛi hee kɛ shikpɔŋ hee ni jalɛ hiɔ mli’ he hiɛnɔkamɔ lɛ. (2 Petro 3:13) Ekɛfata he akɛ: “Mawɔ fioo. Ni kɛ Nyɔŋmɔ aaasumɔ lɛ, wɔbaakpe ekoŋŋ yɛ Paradeiso. . . . Kaafo oha mi. Wɔ kɛkɛ mawɔ. Etsɛŋ kwraa ni mate shi. Taomɔ mi yɛ afii akpe Maŋtsɛyeli lɛ mli. Mɛɛ mi. Etsɛŋ kwraa ni maba.”
Obalanyo fioo nɛɛ tsɔ ehemɔkɛyeli kɛ hiɛnɔkamɔ ni mli wa lɛ nɔ ewo mɛi krokomɛi ahewalɛ. Etsɔɔlɔi lɛ ateŋ mɛi enyɔ kɛ enanemɛi lɛ ateŋ mɛi etɛ tee nɔ amɛkase Biblia lɛ ni amɛba Yehowa Odasefoi akpeei. Jeee akɛ gbohiiashitee hiɛnɔkamɔ lɛ waje obalanyo nɛɛ kɛkɛ, shi ebaanyɛ ewaje mɛi fɛɛ ni heɔ Yehowa Nyɔŋmɔ shiwooi lɛ amɛyeɔ lɛ hu.
September Daa Gbi Ŋmalɛ
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)