Yehowa ‘Baaha Afee Oya’
“Kɛ eshɛ ebe lɛ, mi, Yehowa, maha ofee oya.”—Yesaia 60:22.
1. Esoro Yehowa webii ahiɛnɔkamɔ lɛ kwraa yɛ Satan je lɛ nɔ̃ lɛ he yɛ mɛɛ gbɛ nɔ, ni mɛni hewɔ?
1 Ŋmɛnɛ, jeee mlifilimɔ kɛ nyamɔ pɛ ji nɔ ni anaa yɛ Yehowa ŋwɛi gbɛjianɔtoo lɛ mli, shi moŋ yɛ Yehowa Odasefoi agbɛjianɔtoo ni yɔɔ shikpɔŋ muu lɛ fɛɛ nɔ lɛ hu mli. Esoro wɔmiishɛɛ lɛ kwraa ni jeɔ kpo faŋŋ lɛ yɛ duŋ kpii ni eha Satan je muu fɛɛ nɔ lɛ he. (Lala 144:15) Wɔyɛ mumɔŋ niyenii kɛ nɔ ni wɔnuɔ babaoo, no hewɔ lɛ, “wɔlaa kɛ tsui jurɔ.” (Yesaia 65:13-19) Wɔjeee mɛi ni leee je lɛŋ haomɔi ni yɔɔ ŋmɛnɛ lɛ he nɔ ko. Wɔhiɛnɔkamɔ kɛha kpɔmɔ ni Nyɔŋmɔ Maŋtsɛyeli lɛ kɛbaaha wɔ oya lɛ ji nɔ ko ni ma shi shiŋŋ yɛ be mli ni wɔnaa Biblia gbalɛi amlibaa ni eko tsa eko nɔ ni tsɔɔ akɛ wɔmiipele kɛmiibɛŋkɛ Harmagedon he nɛɛ. Wɔle akɛ nɛkɛ “Nyɔŋmɔ ofe lɛ gbi wulu lɛ nɔ ta” lɛ baaba pɛpɛɛpɛ yɛ “be ni ato” lɛ mli ejaakɛ “eeye oyai ni eshɛ enaagbee, ni emaleŋ.”—Kpojiemɔ 16:14, 16; Habakuk 2:3.
2. Mɛni fa babaoo yɛ Yehowa gbɛjianɔtoo lɛ mli lɛ, ni mɛɛ sanebimɔ enɛ kɛbaa?
2 Taakɛ eji yɛ ŋwɛi Iɛ, Yehowa teokrase gbɛjianɔtoo lɛ hu baama shi shiŋŋ kɛya naanɔ yɛ shikpɔŋ nɔ. Agbɛnɛ hu, akɛni Yehowa ji hewalɛ kpele Jɛɛhe hewɔ lɛ, ‘ehaa mɛi ni hiɛ kaa enɔ lɛ naa hewalɛ babaoo.’ (Yesaia 40:29-31) Nitsumɔi pii yɛ egbɛjianɔtoo lɛ mli ni eyaa hiɛ yɛ be fɛɛ mli. (Okɛto Ezekiel 1:15-21 he.) Ato Yehowa Odasefoi asafoi 47,869 ni yɔɔ shikpɔji 203 nɔ yɛ je lɛŋ he fɛɛ he lɛ gbɛjianɔ jogbaŋŋ koni amɛkɛ ekãa aya amɛhiɛ yɛ Maŋtsɛyeli nitsumɔ lɛ mli. (Mateo 24: 14) Mɛɛ gbɛ nɔ atsɔ ato je muu fɛɛ gbɛjianɔtoo kpele nɛɛ he gbɛjianɔ ama shi?
3. (a) Yesaia 60:17 eba mli yɛ ŋmɛnɛŋmɛnɛ beaŋ yɛ mɛɛ gbɛ nɔ? (b) Mɛɛ gbɛjianɔtoo ni tamɔ nakai nɔŋŋ kɛ shweremɔ ba yɛ Biblia bei amli?
3 “Gbɛjianɔtoo” ji nikasemɔ ko ni je kpo yɛ Blɔfo Buu-Mɔɔ ni ji June 1 kɛ 15, 1938 nɔ̃ lɛ mli. Nɛkɛ nikasemɔi nɛɛ wie Yesaia 60:17 he babaoo, yɛ be mli ni Yehowa wieɔ eŋwɛi gbɛjianɔtoo lɛ he akɛ: “Akɔɔble najiaŋ lɛ, mikɛ shika aaaba, ni dade najiaŋ lɛ, mikɛ jwiɛtɛi aaaba, ni tsei anajiaŋ lɛ, akɔɔble, ni tɛi anajiaŋ lɛ, dade; ni maŋɔ hejɔlɛ mafee onɔyelɔi, ni maŋɔ jalɛ mafee onukpai” lɛ. Yɛ be mli ni wɔsusuɔ shihilɛi kpakpai nɛɛ ahe lɛ, awo Yehowa gbɛjianɔtoo ni yɔɔ shikpɔŋ nɔ Iɛ mli hewalɛ. Taakɛ bɔ ni shika jara wa babaoo fe akɔɔble lɛ (kɛ bɔ ni akɛ nibii krokomɛi ni atsi ta lɛ to he yɛ enɛ mli lɛ) nakai nɔŋŋ teokrase gbɛjianɔtoo ni Buu Mɔɔ Asafo lɛ tsɔɔ mli etsɔɔ Nyɔŋmɔ webii asafoi lɛ yɛ 1938 mli—ni amɛjɛ amɛtsui muu fɛɛ mli amɛkpɛlɛ nɔ—lɛ ji nɔ ni abaasumɔ jogbaŋŋ fe tsutsu demokrase loo kwasafo gbɛjianɔtoo lɛ. Edamɔ Ŋmalɛ lɛ nɔ. Ekɛ gbɛjianɔtoo kpakpa baa yɛ Nyɔŋmɔ nitsumɔ lɛ tsumɔ mli, taakɛ bɔ ni gbɛjianɔtooi komɛi ni tamɔ nakai nɔŋŋ kɛ shweremɔ ba yɛ Mose gbii lɛ amli kɛ agbɛnɛ yɛ Kristofoi asafo Iɛ shishijee gbii lɛ amli lɛ.—2 Mose 18:25; Bɔfoi lɛ Asaji 6:3-7; Tito 1:5; 1 Petro 5:1-3.
4. (a) Mɛɛ gbɛ nɔ atsɔ awaje Yehowa Odasefoi aha 1939-45 kaai lɛ? (b) Mɛni yeɔ odase akɛ Yehowa jɔɔmɔ yɛ teokrase gbɛjianɔtoo lɛ nɔ?
4 No hewɔ lɛ, yɛ afi 1938, afi kome dani Jeŋ Ta II aaafɛ lɛ, “nɔyelɔi” kɛ “onukpai” ni yɔɔ asafoi lɛ amli lɛ fɛɛ bafee “hejɔlɛ” kɛ “jalɛ.” Ato gbɛjianɔtoo ko ni efee ekome he gbɛjianɔ ama shi ni enɛ tee ehiɛ kɛ shweremɔ babaoo. Yehowa jɔɔ edasefoi ni amɛfee ekome lɛ. Amɛyibɔ lɛ ku bɔ he kɛjɛ 77,509 kɛyashi 141,606 kɛjɛ afi 1939 kɛyashi 1945 pɛ, yɛ nakai tai afii lɛ amli nɔnyɛɛ kɛ yiwaa lɛ fɛɛ sɛɛ.
‘Yiwalɛ Bɛ Dɔŋŋ’
5. Yɛ “toiŋjɔlɛ” gbɛfaŋ Iɛ, esoro Yehowa webii lɛ yɛ je lɛ he yɛ mɛɛ gbɛ nɔ?
5 Shi, yɛ Jeŋ Ta II sɛɛ afii lɛ hu? Toiŋjɔlɛ bɛ shikpɔŋ lɛ nɔ jeŋmaji lɛ ateŋ. Yɛ anɔkwale mli lɛ abɔ amaniɛ akɛ gbɔmɛi fe 30,000,000 egboi yɛ tai “bibii” ni awu kɛjɛ 1945 kɛbashi amrɔ nɛɛ lɛ amli. Eshɛɔ be ni “tai bibii” aaafee 40 yaa nɔ yɛ be kometoo lɛ nɔŋŋ mli yɛ shikpɔŋ lɛ nɔ hei sɔrɔtoi. No hewɔ lɛ miishɛɛ ji wɔ, akɛ wɔkɛ gbɛjianɔtoo ko ni ekpoo awuyeli loo yiwalɛ miisɔmɔ agbɛnɛ! (Yesaia 2:4; Abɛi 20:22) Agbɛnɛ hu, ákɛ je muu fɛɛ gbɛjianɔtoo lɛ, wɔnaa toiŋjɔlɛ mli ŋɔɔmɔ diɛŋtsɛ yɛ wɔteŋ. Akɛni wɔkɛ “toiŋjɔlɛ Nyɔŋmɔ” lɛ nyiɛɔ hewɔ lɛ, wɔbale “Nyɔŋmɔ toiŋjɔlɛ ni fe jwɛŋmɔi fɛɛ” lɛ.—Filipibii 4:7-9.
6, 7. (a) Mɛni haa esoroɔ Yehowa webii lɛ kwraa lɛ? (b) Yesaia 60:18 eba mli yɛ wɔnɔ yɛ mɛɛ gbɛ nɔ? (d) Esoro wɔ yɛ apasa nyɔŋmɔi ajalɔi ahe yɛ mɛɛ gbɛ ni ekaaa nɔ?
6 Akɛni “hejɔlɛ” kɛ “jalɛ” hiɔ Yehowa webii ateŋ hewɔ lɛ, wɔji gbɔmɛi ni esoro wɔ kwraa yɛ Satan je lɛ he. Akɛni wɔ akutseiaŋbii komɛi eyoo enɛ hewɔ lɛ, amɛkɛɔ akɛ, ‘Wɔhiɛ sɔɔ nyɛ, shi wɔsumɔɔɔ nyɛjamɔ lɛ.’ Shi, ani jeee wɔjamɔ lɛ moŋ ji nɔ ni efee wɔ gbɔmɛi ni wɔji lɛ? Wɔbɛ miishɛɛ ko yɛ jwɛŋmɔi sɔrɔtoi kɛ hetsɛ̃ ni egbala je lɛŋ jeŋmaji lɛ ateŋ lɛ he. Shi moŋ nibii enyɔ ni wɔyɔɔ he miishɛɛ lɛ ji (1) ni wɔtsɔɔ gbɔmɛi heshibalɔi lɛ yiwalaheremɔ gbɛ ni baa kɛtsɔɔ Kristo Maŋtsɛyeli lɛ nɔ lɛ kɛ (2) agbɛnɛ ni wɔjie Yehowa yi, ni wɔha gbɔmɛi fɛɛ ale egbɛi lɛ akɛ odaseyeli. ‘Wɔjɛɛɛ je lɛ mli.’—Yohane 17:14, 16.
7 No hewɔ lɛ, wɔna Yehowa shiwoo nɛɛ mlibaa mli gbɛfaŋnɔ: “Anuŋ yiwalɛ he dɔŋŋ yɛ oshikpɔŋ lɛ nɔ, anuŋ fitemɔ loo hiɛkpatamɔ he dɔŋŋ yɛ ohusui lɛ amli. Shi oootsɛ ogbogboi lɛ akɛ Yiwalaheremɔ, ni oootsɛ ogbói lɛ akɛ Yijiemɔ.” (Yesaia 60:18, NW) Yijiemɔ fɛɛ ji Yehowa, wɔ-Nyɔŋmɔ lɛ nɔ̃! Kristendom jamɔ mli hiɛnyiɛlɔi (kɛ amɛnanemɛi hemɔkɛyeli kwalɔi lɛ fɛɛ) gbeɔ nakai gbɛi lɛ he guɔ—ni amɛyaa nɔ po akɛ amɛkɛ osatofeemɔ aaabɔ mɔdɛŋ ni amɛjie gbɛi nɛɛ kɛjɛ amɛ Biblia mli shishitsɔɔmɔi amli. “Shi wɔ lɛ, wɔɔnyiɛ yɛ Yehowa, wɔ-Nyɔŋmɔ lɛ gbɛi amli kɛaatee naanɔi anaanɔ!”—Mika 4:5.
8. (a) Mɛɛ hewalɛwoo Yehowa kɛha ewebii yɛ Yesaia 60:19-21? (b) Mɛni ‘frɔkeɔ’ ni haa Yehowa he feɔ fɛo aloo ewoɔ ehiɛ nyam lɛ, ni yɛ mɛɛ gbɛ nɔ?
8 Yehowa woɔ wɔ hewalɛ koni wɔnyiɛ yɛ egbɛi amli. Emaa nɔ mi yɛ Yesaia 60:19-21 ehaa eŋwɛi gbɛjianɔtoo lɛ akɛ ‘eeetsɔ ela kɛaatee naanɔ’ eha lɛ, ni ekpɛmɔ lɛ po baafee hulu kɛ nyɔŋtsere kpɛmɔ. Yɛ mumɔŋ gbɛfaŋ hu lɛ, ebafeɔ fɛo nii ni woɔ ehiɛ nyam, ni enɛ hu haa shi ni ewo egbɛjianɔtoo lɛ mlibii lɛ nɛɛ hu baa mli: “Ni omaŋ muu lɛ fɛɛ aaatsɔmɔ jalɔi sɔŋŋ; amɛaaye shikpɔŋ lɛ nɔ kɛaatee naanɔ, amɛji miŋmɔ lɛ mli tsonine ni frɔkeɔ kɛ minine naa nitsumɔ ni akɛaawo mihiɛ nyam.” Yɛ anɔkwale mli lɛ, Yehowa eha “shikpɔŋ,” aloo he ni edasefoi lɛ tsuɔ nii yɛ lɛ eshwere. Eyaa nɔ ‘efrɔkeɔ’ kɛ yibiiwoo babaoo yɛ be mli ni abuaa mɛi heei pii anaa kɛbaa Maŋtsɛyeli lɛ masɛi ni ayeɔ abuaa amɛ koni amɛwo Kristofoi agbɔmɔtso lɛ, (Kolosebii 3:10 12-14) Enɛ haa Yehowa ‘he feɔ fɛo,’ ewoɔ egbɛi ni jara wa waa lɛ hiɛ nyam.
9. (a) Yehowa miijɔɔ edasefoi lɛ yɛ Mexico, yɛ mɛɛ gbɛ nɔ, ni mɛni hewɔ? (b) Mɛni ji nɔ ni adafitswaa wolo ko wie yɛ be mli ni eyoo emuuyeli mli ni amɛhiɛɔ lɛ?
9 Nɔkwɛmɔ nɔ ko ni etsɛko kwraa ji Mexico. Shiɛlɔi ayifalɛ ni fe fɛɛ yɛ nakai shikpɔŋ lɛ nɔ lɛ tee hiɛ kɛjɛ 113,823 kɛyashɛ 151,807 yɛ afii enyɔ ni eho lɛ mli—oha fɛɛ mli 33 ákɛ nɔyaa ni sa yijiemɔ! (Mɛi ni ba amɛ 1984 Yesu gbele lɛ Kaimɔ lɛ shishi lɛ ayibɔ ji 695,369.) Wɔnyɛmimɛi ni yɔɔ Mexico lɛ yɛ ekãa waa yɛ amɛshiɛmɔ nitsumɔ lɛ mli. Monterrey adafitswaa wolo ko kadi enɛ nyɛsɛɛ nɛɛ, kɛ agbɛnɛ hu emuuyeli mli ni amɛhiɛɔ ni amɛkɛ-kpeeɔ saji ni amɛkɛ amɛhe wooo mli he saji lɛ anaa lɛ, ni eyoo enɛ hu kɛfata nibii krokomɛi ahe: “Mɛɛ bulɛ ni mli kwɔ po amɛ shiŋŋfeemɔ kɛ ekãa ni amɛyɔɔ yɛ nɔ ni amɛhe amɛyɛ lɛ he lɛ enɛ kanyaa yɛ wɔmli nɛkɛ. Eyɛ mli akɛ ashwieɔ amɛbii kɛjɛɔ skul moŋ, shi amɛsumɔɔ ni amɛye amɛhemɔkɛyeli, kɛ amɛtsɔɔmɔ lɛ anɔkwale. Te eeeba lɛ tɛŋŋ kɛ wɔ fɛɛ ni wɔji Kristofoi lɛ aaahi shi yɛ nakai gbɛ nɔ ni mligbalamɔ ko bɛ kuu loo jamɔ ko mli? Mexico baafee ŋwɛi nitsumɔ he nine.”
10. (a) Mɛni tsɔɔ akɛ Yehowa Odasefoi woɔ yibii yɛ he ni atsĩ nitsumɔ lɛ naa yɛ po? (b) Mɛɛ sane abiɔ yɛ biɛ?
10 Yehowa Odasefoi yaa nɔ amɛwoɔ yijiemɔ yibii nɛɛ yɛ shikpɔji ni shitee-kɛ-woo baaa shi yɛ nɔ lɛ po mli. Kwɛ miishɛɛ ni eji akɛ wɔɔkadi yɛ 1984 Sɔɔmɔ Afi Akɔntaabuu lɛ mli akɛ shiɛlɔi ayibɔ ni yɔɔ maji 28 ni nɔyelii lɛ egu loo amɛtsi nitsumɔ lɛ naa yɛ jɛmɛ lɛ ayifalɛ tee hiɛ oha fɛɛ mli 3.1, ni ji akɛ kɛyashɛ nɔ ni fe akpeiakpe mlijaa ejwɛ mli ekome, ni gbɛgbalɔi ayifalɛ tee hiɛ oha fɛɛ mli 23! Ani onaa bɔ ni gbɛgbamɔ baanyɛ afee nɔ ni etsumɔ wa yɛ nakai shihilɛi ashishi lɛ? Kɛ aja mli lɛ, wɔnyɛmimɛi hii kɛ yei ni yɔɔ nɛkɛ shikpɔji nɛɛ anɔ lɛ ateŋ 6,905 feɔ nakai daa nyɔŋ nɔ! Kɛoyɛ heyeli fioo yɛ shikpɔŋ nɔ he ni oyɔɔ lɛ, ani obaanyɛ ni okɛ ohe awo daa gbɛgbamɔ sɔɔmɔ lɛ mli, aloo kɛ hoo lɛ okɛ ohe awo gbɛgbalɔi awamɔ sɔɔmɔ lɛ mli?—Okɛto Luka 17: 5, 6 he.
‘Aatsɔ Mɛi Akpe’
11, 12. (a) Mɛni ji shiwoo ni Yehowa diɛŋtsɛ kɛhaa bianɛ lɛ klɛŋklɛŋ fa lɛ? (b) Mɛni ji ‘mɔ bibioo aaatsɔ mɔ agbo’ lɛ he nɔkwɛmɔ nɔ fioo ko? (d) Mɛni hewɔ yifalɛ lɛ etee nɔ oyayaayai nakai lɛ?
11 Yɛ egbɛi ni nɔ bɛ lɛ hewɔ lɛ, agbɛnɛ Yehowa diɛŋtsɛ kɛ shiwoo ni bɔ he sɔrɔtoi etɛ eha. (Yesaia 60:22) Klɛŋklɛŋ lɛ ekɛɔ wɔ akɛ: “Mɔ bibioo ko aaatsɔ mɛi akpe.” Yɛ be mli ni okaneɔ Yearbook of Jehovah’s Witnesses (Afi Wolo) lɛ, ani okadi bɔ ni Maŋtsɛyeli shiɛlɔ kome pɛ aloo mɛi fioo ko pɛ jeɔ shishi yɛ shikpɔji komɛi ni amrɔ nɛɛ akpei komɛi yɔɔ jɛmɛ lɛ anɔ lɛ? Ákɛ nɔkwɛmɔ nɔ lɛ, gbɛgbalɔ ko ni ji nyɛminuu ko ni lɛ ji klɛŋklɛŋ mɔ ni ye odase yɛ Chile lɛ yahi shia ko mli ni efɔ nine etsɛ mɛi koni amɛba Hɔgbaa kpee. Yɛ naagbee lɛ mɔ kome ni yɔɔ wiemɔ lɛ he miishɛɛ ba. Nuu nɛɛ bi sane nɛɛ: ‘Ni mɛɛ be mɛi krokomɛi lɛ baaba?’ Gbɛgbalɔ lɛ shɛje emii akɛ: “Amɛbaaba.” Ni amɛba. Yɛ aaafee afii 50 sɛɛ lɛ, nakai mɔ bibioo lɛ ebatsɔ 23,985.
12 Musolini yiwalɛ nɔyeli lɛ wa Yehowa Odasefoi ayi waa yɛ Italia. Yɛ ta lɛ sɛɛ afi ni ji 1946 mli lɛ, no mli lɛ amɛteŋ mɛi 120 pɛ buɔ amɛsɔɔmɔ nitsumɔ he akɔntaa Shi kaimɔ hu akɛ aaafee mɛi 120 pɛ kpe yɛ Pentekoste gbi lɛ nɔ yɛ afi 33 Ŋ.B. Ni susumɔ nɔ ni je shishi yɛ nakai be lɛ mli lɛ he okwɛ! (Bɔfoi lɛ Asaji 1:15; 2:1-4, 41) Agbɛnɛ, yɛ gbɛ kroko nɔ lɛ, afɔse Yehowa mumɔ lɛ ashwie shi yɛ Italia. Yɛ afii 38 pɛ mli lɛ, shiɛlɔi lɛ ayi efa kɛyashɛ yifalɛ ni fe fɛɛ ni ji 119,408, taakɛ nyɛsɛɛ akɔntaabuu lɛ tsɔɔ lɛ, ni eehe efee yifalɛ ni bɔ he toi akpe taakɛ eji yɛ Katolek shikpɔji sɔrɔtoi anɔ yɛ jeŋ fɛɛ lɛ, ejaakɛ Yehowa Odasefoi miiná yifalɛ kpele he niiashikpamɔ—Okɛto Lala 69:10; Yesaia 63:14 he.
“Maŋ Ni Wa”
13, 14. (a) Yehowa shiwoo lɛ fa ni ji enyɔ lɛ eba mli yɛ mɛɛ gbɛ nɔ? (b) 1 Petro 2 :9 kɛ Yesaia 59:21 kɔɔ enɛ he yɛ mɛɛ gbɛ nɔ? (d) Mɛni ji nɔ ni ewo wɔshiɛmɔ lɛ mli hewalɛ waa lɛ?
13 Yehowa shiwoo ni bɔ he toi etɛ lɛ fa ni ji enyɔ lɛ ji: “Ni mɔ fioo hu aaatsɔ maŋ ni wa.” Eji “mɔ fioo” lɛlɛŋ, shwɛɛnii ni afɔ amɛ mu lɛ ni agbɛ amɛ ashwa ni abua amɛnaa akɛ amɛ eba Yehowa duromɔ “shikpɔŋ” lɛ nɔ ekoŋŋ yɛ 1919. Shi amɛyifalɛ lɛ tee hiɛ kɛyashi be mli ni mumɔŋ Israel fɛɛ ba mli—yibɔ lɛ fɛɛ ni ji Maŋtsɛyeli niyelɔi 144,000 lɛ. (Romabii 11:25, 26) Yɛ anɔkwale mli lɛ, ákɛ Nyɔŋmɔ “maŋkrɔŋkrɔŋ” lɛ fa lɛ, átsɛ shwɛɛnii ni afɔ amɛ mu ni yɔɔ shikpɔŋ nɔ lɛ kɛjɛ duŋ kpii lɛ mli kɛba enaakpɛɛ la lɛ mli. Amɛmli filiɔ amɛ akɛ amɛaajaje amɛ-Nyɔŋmɔ lɛ, Yehowa, agbojee lɛ amɛtsɔɔ yɛ he fɛɛ he. (1 Petro 2:9) Eyɛ mli akɛ amɛyi faaa moŋ, shi Nyɔŋmɔ mumɔ lɛ eha amɛfee mɛi ni he wa. “Ni mi lɛ, enɛ ji mikɛ amɛ kpaŋmɔ lɛ, Yehowa kɛɛ: Mimumɔ ni yɔɔ onɔ lɛ, kɛ miwiemɔi lɛ ni mikɛwo onaa lɛ, ejeŋ odaaŋ kɛ oseshibii adaaŋ kɛ oseshibii aseshibii adaaŋ, Yehowa kɛɛ, kɛjɛ be nɛɛ mli kɛyashi naanɔ!”—Yesaia 59:21.
14 Yehowa tsɔɔ nɛkɛ wiemɔ nɛɛ nɔ emaa nɔ mi kɛhaa wɔ akɛ ‘nibii kpakpai ahe sanekpakpa’ ni wɔjajeɔ lɛ baaye omanye kɛ̃, ni enɛ he fai wɔkpaa waa yɛ nɛkɛ ‘Yehowa gbi’ nɛɛ nɔ. Wɔshiɛmɔ lɛ etee hiɛ waa yɛ be mli ni shwɛɛnii ni afɔ amɛ mu lɛ okadi “seshibii” lɛ ni ji “asafo babaoo” lɛ kɛ amɛ hu amɛ “seshibii” (ni ji mɛi heei ni amɛgbala amɛ kɛba Nyɔŋmɔ gbɛjianɔtoo lɛ mli lɛ) ŋɔɔ nɛkɛ yiwalaheremɔ wiemɔ nɛɛ woɔ amɛdaaŋ, ni amɛjajeɔ yɛ faŋŋ mli amɛtsɔɔ lɛ. Nɔ ni ejɛ mli eba ji akɛ, asafoi lɛ fɛɛ miiya nɔ kɛmiishwere yɛ mumɔŋ, kɛ agbɛnɛ yɛ yibɔ naa—Romabii 10:10, 15; Lala 118:24, 25; 1 Tesalonikabii 3:12.
15. Te Nyɔŋmɔ okadi “maŋ” lɛ yifalɛ yɔɔ tɛŋŋ, ni mɛni hewɔ eji miishɛɛ maŋ Iɛ?
15 Kwɛ bɔ ni Maŋtsɛyeli yibiiwoo lɛ etee nɔ efa babaoo yɛ naakpɛɛ gbɛ nɔ nyɛsɛɛ nɛɛ nɔŋŋ! Akɛni “asafo babaoo” lɛ mlibii pii baa hewɔ lɛ eha Nyɔŋmɔ okadi maŋ lɛ yikulɛ eyashɛ Odasefoi ni yɔɔ ekãa 2,842,531, akɛ yifalɛ ni fe fɛɛ. Nɛkɛ “maŋ” nɛɛ ayi fa fe majimaji 92 komɛi kɛ je lɛŋ maŋkwramɔ mligbalamɔi komɛi yɛ shikpɔŋ nɔ. Wɔkɛ miishɛɛ miiti lalatsɛ Iɛ ni egbee ŋɔɔ lɛ wiemɔi nɛɛ amli: “Yehowa ajina lɛ damɔɔ shi shiŋŋ kɛyaa naanɔ, etsuiŋ jwɛŋmɔi lɛ yɛ ha yinɔbii fɛɛ. Ajɔɔ maŋ ni e-Nyɔŋmɔ ji Yehowa, maŋ ni ehala efee lɛ diɛŋtsɛ egbɛfaŋnɔ lɛ!”—Lala 33:11, 12.
‘Aaha Eefee Oya’
16, 17. (a) Mɛni tsɔɔ akɛ Yehowa shiwoo lɛ fa ni ji etɛ lɛ miiba mli? (b) Ajie suɔmɔ kɛha Nyɔŋmɔ kɛ Kristo kpo yɛ mɛɛ gbɛ nɔ? (d) Mɛɛ miishɛɛ nitsumɔ kɛ mumɔ eye ebua ni anyɛ atsu enɛ ‘oya’ lɛ? (e) Mateo 9:35-38 kɔɔ wɔhe ŋmɛnɛ yɛ mɛɛ gbɛ nɔ?
16 Yehowa kɛ fa ni ji etɛ Iɛ fataa nɛkɛ eshiwoo nɛɛ he: “Kɛ shɛ ebe lɛ, mi, Yehowa, maha afee oya.” Yɛ be mli ni wɔbadamɔ “amanehulu kpeteŋkpele” lɛ naa kpaakpa diɛŋtsɛ nɛɛ, be kɛha enɛ lɛ ji BIANƐ! (Marko 13:10, 18, 19) Bɔ ni Maŋtsɛyeli nitsumɔ lɛ etee nɔ oyayaayai kɛ foi yɛ afii enyɔ ni eho nɛɛ amli lɛ yeɔ enɛ he odase. Anaa nɛkɛ ‘oyaiyeli’ nɛɛ yɛ jeŋ fɛɛ, yɛ shikpɔji po ni ebi ni Yehowa Odasefoi ni yɔɔ jɛmɛ lɛ ajie suɔmɔ ni amɛyɔɔ kɛha Yehowa Nyɔŋmɔ kɛ Yesu Kristo lɛ kpo kɛtsɔ shiɛmɔ ni amɛaashiɛ yɛ yiwaa shishi aloo yɛ shihilɛi komɛi ni haa amɛwala diɛŋtsɛ baa oshara mli lɛ anɔ. Akɛni be fɛɛ shiɛlɔi lɛ ayi miifa babaoo hewɔ lɛ, eha gbɛgbalɔi lɛ ebaje ta lɛ hiɛ. Ni mɛɛ miishɛɛ amɛnaa yɛ Yehowa sɔɔmɔ mli nɛkɛ!—Abɛi 10:22.
17 Nɛkɛ gbɛgbamɔ mumɔ ni yɔɔ miishɛɛ nɛɛ ewo asafoi ni yɔɔ he fɛɛ he lɛ hewalɛ ni amɛkɛ ‘oyaiyeli’ ana amɛgbɛfaŋnɔ yɛ naagbee naabuamɔ lɛ mli. Yɛ yifalɛ babaoo nɛɛ po sɛɛ lɛ, wɔbaanyɛ wɔkɛɛ akɛ “nikpamɔ lɛ fa, shi nitsulɔi lɛ faaa.” Gbɔmɛi lɛ anii feɔ wɔ mɔbɔ yɛ je ni yɔɔ ŋmɛnɛ ni hiɛnɔkamɔ bɛ kɛha lɛ lɛ mli, ejaakɛ taakɛ Yesu fee yɛ shikpɔŋ nɔ lɛ, gbɔmɛi lɛ “efee yuuyaa tamɔ tooi ni bɛ kwɛlɔ.” No hewɔ lɛ wɔmiikpa “nikpamɔ Nuŋtsɔ lɛ fai koni ewo nitsulɔi agbɛ kɛba enikpamɔ lɛ mli,” ni eŋɔɔ wɔnaa waa akɛ wɔmiina ni aaha wɔsɔlemɔi lɛ ahetoo yɛ naakpɛɛ gbɛ nɔ.—Mateo 9:35-38.
18, 19. Mɛɛ amaniɛbɔɔi komɛi yɔɔ ni tsɔɔ akɛ je lɛ ŋmɔ lɛ “eyɛ futaa kɛha kpamɔ”?
18 Kɛ wɔɔŋɔ nɔkwɛmɔ nii pii ni kanyaa wɔ lɛ ateŋ ekome lɛ: Yɛ 1984 April mli lɛ, Ecuador bɔ gbɛgbalɔi awalɔi ni tee shiɛmɔ 1,048 he amaniɛ, eji oha fɛɛ mli 106 nɔyaa fe afi ni ho lɛ April lɛ. Beni shɛɔ June mli yɛ afi nɛɛ mli lɛ, no mli lɛ nɛkɛ shikpɔŋ nɛɛ miibɔ shia Biblia mli nikasemɔi 12,238 he amaniɛ, oha fɛɛ mli 24 nɔyaa kɛha afi lɛ, kɛ shiɛlɔi 8,044, oha fɛɛ mli 17 nɔyaa. Mɛi ni ba Kaimɔ lɛ ayi bafa diɛŋtsɛ kɛyashɛ 40,728, kɛ aja mli lɛ, nɔ ni fe shiɛlɔ kome yɛ mɛi 5 ni ba lɛ ateŋ. Amaniɛbɔɔi ni tamɔ nakai nɔŋŋ jɛɔ je lɛŋ he fɛɛ he baa, ni yibɔ ni ba April 15, 1984 Kaimɔ lɛ shishi yɛ jeŋ fɛɛ ni ji 7,416,974 lɛ tsɔɔ akɛ ŋmɔji “egba futaa momo” ni mɛi ni esa akɛ abua amɛnaa kɛha “naanɔ wala” lɛ “sa kpamɔ.”—Yohane 4:35, 36.
19 Yɛ bei komɛi amli lɛ Yehowa ‘haa efeɔ oya’ yɛ naakpɛɛ gbɛi anɔ. Nɔkwɛlɔ gbɛfalɔ ko ŋma enɛ kɛjɛ Papua New Guinea kooyigbɛ kooi lɛ amli: “Mɔ ko ni gbɛgbalɔ krɛdɛɛ ko kɛ lɛ na sanegbaa be ko lɛ tee ekrowa ni yɔɔ he ko banee yɛ gɔji lɛ ayiteaŋ lɛ ekoŋŋ. Afii pii komɛi asɛɛ lɛ epue ekoŋŋ yɛ kpokpaa nɔ kpee ko shishi—kɛ nibimɔ. Nɛkɛ nuu ni abaptisiko lɛ nɛɛ eye odase yɛ ekrowa lɛ kɛ ‘kooi’ ni ebɔle ekrowa lɛ he lɛ amli jogbaŋŋ ákɛ onukpai ni yɔɔ akrowa lɛ miisumɔ ni Yehowa Odasefoi aba ni amɛbatsu mumɔŋ nibii ahe miishɛɛ ni mɛi ni yɔɔ jɛmɛ lɛ fɛɛ ena lɛ he nii agbɛnɛ.” Kɛ ana atɛo dumɔwu lɛ pɛ lɛ, Nyɔŋmɔ ji mɔ ni ‘haa eshwereɔ.’—1 Korintobii 3:6.
20. Yɛ mɛɛ gbɛ nɔ álɛɛ Buu Mɔɔ nitsumɔ he niji lɛ amli koni enyɛ etsu yifalɛ lɛ he nii?
20 Yehowa etee nɔ esaa ewebii lɛ yɛ gbɛi sɔrɔtoi anɔ kɛha yifalɛ pii ni baa bianɛ lɛ. Wɔmli filiɔ wɔ akɛ yɛ nyɛsɛɛ afii nɛɛ amli lɛ, Yehowa etsɔ naakpɛɛ gbɛ nɔ ekwɛ Buu Mɔɔ nitsumɔ hé niji nɛɛ jogbaŋŋ koni amɛye amɛbua “okpoi” babaoo diɛŋtsɛ.
21. Te wɔɔfee tɛŋŋ ni wɔɔya nɔ wɔna ehe nitsumɔ yɛ ‘oyaiyeli’ mli lɛ mli gbɛfaŋnɔ?
21 No hewɔ lɛ, nyɛbaa wɔ fɛɛ wɔnaa Maŋtsɛyeli sanekpakpa lɛ la ni akpeɔ ashweɔ mɛi anɔ lɛ mli gbɛfaŋnɔ, koni wɔkpɛ wɔshwie gbɔmɛi akpekpei abɔ lolo nɔ! Nyɛhaa wɔtsɔɔa “okpoi” ni feɔ hoo lɛ fɛɛ gbɛ kɛbaa “yiwalaheremɔ” ni yɔɔ Yehowa gbɛjianɔtoo lɛ gbogboi ni buɔ amɛhe lɛ amli, ni amɛwó ‘eyijiemɔ’ nɔ yɛ egboi lɛ amli. Nyɛhaa efea wɔsɔlemɔ akɛ Nuŋtsɔ Maŋtsɛ Yehowa lɛ kɛ Kristofoi asafo lɛ yitso, wɔ Maŋtsɛ Yesu Kristo ni wɔsumɔɔ lɛ lɛ baaya nɔ ni amɛha Maŋtsɛyeli lɛ jajemɔ lɛ ‘afee oya’ yɛ be mli ni etsiɔ kɛyaa enaagbee kwraa Iɛ!a
Nikasemɔ Nɛɛ Mlitii:
◻ Mɛɛ Yesaia 60:17 lɛ mlibaa ni sa kadimɔ jogbaŋŋ ba yɛ 1938?
◻ Taakɛ Yesaia 60:18 tsɔɔ lɛ, mɛni nibii ahe miishɛɛ wɔyɔɔ?
◻ Amaniɛbɔɔi ni jɛɔ shiɛmɔ mli baa Iɛ ‘woɔ Yehowa hiɛ nyam’ yɛ mɛɛ gbɛ nɔ?
◻ Shiwoo ni bɔ he etɛ ni yɔɔ Yesaia 60:22 lɛ miiya naagbee yɛ mɛɛ gbɛ nɔ?
[Shishigbɛ niŋmaa]
a Ajie kɛjɛ March 1, 1985 Watchtower lɛ mli.
[Mfoniri ni yɔɔ baafa 15]
1930 afii Iɛ amli Buu-Mɔɔ Iɛ sɛɛ mfonirii lɛ tsɔɔ Ezekiel ninaa ni kɔɔ Yehowa gbɛjianɔtoo kpele lɛ he
[Mfoniri ni yɔɔ baafa 18]
Gbɛgbamɔ mumɔ kpakpa eye ebua ni ŋmaakpamɔ nitsumɔ lɛ miiya nɔ yɛ ‘oyaiyeli’ mli