Yesu Shihilɛ Kɛ Esɔɔmɔ Nitsumɔ

Awo Ehiɛ Nyam Dani Afɔ Lɛ

ETSƐKO kwraa nɛ ni bɔfo Gabriel kɛɛ obalayoo Maria akɛ ebaafɔ binuu ni ebaatsɔ naanɔ maŋtsɛ. Shi Maria bi akɛ, ‘Te aaafee tɛŋŋ ni enɛ aaaba mli hu, akɛni mikɛ nuu ko nako bɔlɛ lɛ?’

Gabriel tsɔɔ mli akɛ, ‘Nyɔŋmɔ mumɔ krɔŋkrɔŋ lɛ aaaba onɔ, ni yɛ enɛ hewɔ lɛ, gbekɛ ni ooofɔ lɛ lɛ hu aaatsɛ lɛ Nyɔŋmɔ Bi.’ Bɔni afee ni eye ebua Maria lɛ, Gabriel tee nɔ akɛ: ‘Owekunyo ni egbɔ, Elizabet, ni gbɔmɛi kɛɛ akɛ enyɛŋ efɔ bi lɛ ena musu ni eye nyɔji ekpaa momo po.’ Maria he Gabriel eye ni ekɛɛ akɛ: ‘Aba mli nakai taakɛ bɔ ni owie lɛ.’

Etsɛɛɛ ni Gabriel shi lɛ, kɛkɛ ni Maria te shi koni eyasara Elizabet ni kɛ ewu yɔɔ Yudea gɔji lɛ anɔ lɛ. Kɛjɛ Maria shia ni yɔɔ Nazaret lɛ kɛyaa jɛmɛ lɛ jɛkɛ, ekolɛ eheɔ aaafee gbii etɛ loo ejwɛ gbɛnyiɛmɔ.

Beni Maria yashɛ Zakaria shia lɛ, ebote mli ni eŋa amɛ, kɛkɛ ni mumɔ krɔŋkrɔŋ yi Elizabet obɔ ni ekɛɛ Maria akɛ: ‘Ajɔɔo yɛ yei ateŋ, ni ajɔɔ obi ni ooofɔ Iɛ lɛ hu. Mɛɛ hegbɛ mina nɛkɛ, akɛ mi-Nuŋtsɔ lɛ nyɛ aaaba miŋɔɔ lɛ. Ejaakɛ naa! Beni minu oŋamɔ lɛ pɛ kɛkɛ ni gbekɛ lɛ tu yɛ mimusuŋ kɛ miishɛɛ.’

Miishɛɛ babaoo ha Maria to he akɛ: ‘Kɛjɛ nɛkɛ be nɛɛ nɔ kɛyaa nɛɛ gbɔmɛi fɛɛ aaatsɛ mi miishɛɛ, ejaakɛ Nyɔŋmɔ efee niwuji eha mi.’ Maria kɛ Elizabet hi shi aaafee nyɔji etɛ, ni ŋwanejee ko bɛ he akɛ ebafee yelikɛbualɔ kpele yɛ naagbee otsii ni Elizabet baafɔ lɛ mli. Eyɛ fɛo diɛŋtsɛ akɛ nɛkɛ yei anɔkwafoi nɛɛ ni hiɛ musu yɛ Nyɔŋmɔ yelikɛbuamɔ naa lɛ aaanyɛ ahi shi yɛ he kome yɛ amɛwala be mli jɔɔmɔ be nɛɛ mli!

Ani oyoo bɔ ni awo Yesu hiɛ nyam po dani afɔ lɛ lɛ? Elizabet tsɛ lɛ “mi-Nuŋtsɔ,” ni ebi ni efɔko lɛ lɛ tu kɛ miishɛɛ beni Maria pue yɛ jɛmɛ klɛŋklɛŋ lɛ. Yɛ gbɛ kroko nɔ lɛ, mɛi krokomɛi kɛ bulɛ ha Maria kɛ ebi ni efɔko lɛ lɛ, taakɛ wɔbaana yɛ sɛɛ mli lɛ. Shi yɛ no mli lɛ, wɔbaakase babaoo yɛ Elizabet binuu Yohane he. Luka 1:​26-56.

◆ Mɛni Gabriel kɛɛ ni ye bua Maria koni enu gbɛ ni ebaatsɔ nɔ eŋɔ hɔ lɛ shishi?

◆ Mɛɛ gbɛ nɔ atsɔ awo Yesu hiɛ nyɛna po dani afɔ lɛ?

◆ Be enyiɛ Maria kɛhi Elizabet masɛi, ni mɛni hewɔ esa jogbaŋŋ akɛ Maria kɛ Elizabet aahi shi yɛ nɛkɛ be nɛɛ mli lɛ?