“Nyɛkahaa Ahosoa Nyɛ Oya Kɛjɛa Nyɛjwɛŋmɔ Lɛ He”

“Wɔmiikpa nyɛ fai, . . . akɛ nyɛkahaa ahosoa nyɛ oya kɛjɛa nyɛjwɛŋmɔ lɛ he, ni asaŋ nyɛkahaa akɛ mumɔ ko aloo wiemɔ ko aloo wolo ko . . . miihao nyɛ.”​—2 TESALONIKABII 2:​1, 2.

 1. Mɛɛ saji ni ŋɔɔ jogbaŋŋ baa wɔjwɛŋmɔ mli yɛ be mli ni wɔkaiɔ ni wɔsusuɔ klɛŋklɛŋ be mli ni wɔkase anɔkwale lɛ he lɛ?

KAIMƆI ni ŋɔɔ jogbaŋŋ ni tsakeee baa wɔjwɛŋmɔ mli yɛ be mli ni ákɛ Kristofoi lɛ, wɔsusuɔ be ni eho ni wɔkase Nyɔŋmɔ Wiemɔ lɛ mli anɔkwale lɛ klɛŋklɛŋ kwraa lɛ he lɛ. Oh, eyɛ fɛo, shishiumɔ yɛ he, ni ehaa mɔ tsui nyɔɔ emli. Kwɛ bɔ ni wɔtsuii fɛɛ yimɔ obɔbɔ kɛ hiɛsɔɔ yɛ be mli ni wɔkase Yehowa kɛ esui ni nɔkwɔlɔ, ni esuɔmɔ kpeteŋkpele kɛ emɔbɔnalɛ lɛ fata he lɛ he nii lɛ! Wɔmii shɛ wɔhe babaoo yɛ be mli ni wɔkɛ nanemɛi heyelilɔi ni jieɔ Kristofoi asuɔmɔ krɔŋŋ kpo ni hiɔ shi yɛ Biblia mli shishitoo taomɔ nii anaa lɛ bɔi bɔɔ lɛ.

 2. Mɛɛ gbɛkpamɔi wɔyɔɔ akɛ Yehowa tsuji, ni mɛɛ mumɔŋ shihilɛ mli wɔnaa wɔhe yɛ?

² Kwɛ bɔ ni wɔda shi babaoo beni wɔkase akɛ etsɛŋ kwraa ni Yehowa baajie piŋmɔ, awerɛho kɛ gbele po kɛya lɛ. (Kpojiemɔ 21:3, 4) Susumɔ shihilɛ kɛmiiya naanɔ yɛ shikpɔŋ nɔ paradeiso, kɛ gbɔmɔtsoŋ hewalɛ ni yeɔ emuu kɛ miishɛɛ kwraa lɛ he okwɛ! Ehi tsɔ̃ ni etamɔ nɔ ko ni anyɛŋ ahe aye po. Shi eji anɔkwale. Nyɔŋmɔ Wiemɔ lɛ fiɔ sɛɛ. Eyɛ miishɛɛ naakpa! Ŋwanejee ko bɛ he akɛ wɔnu he tamɔ Yesu kaselɔi lɛ yɛ be mli ni ejie ehe kpo yɛ eshitee lɛ sɛɛ lɛ. Amɛkɛɛkɛɛ amɛhe akɛ: “Ani wɔtsui he edɔɔɔ la yɛ wɔmli beni ekɛ wɔ wieɔ yɛ gbɛ lɛ nɔ ni etsɔɔ wɔ ŋmalɛi lɛ anaa lɛ?” (Luka 24:32) Hɛɛ, beni wɔkase anɔkwale lɛ ni wɔjɔɔ wɔwala nɔ wɔha Yehowa lɛ, kɛkɛ ni wɔbana wɔhe yɛ mumɔŋ paradeiso. Mɛɛ jɔɔmɔ nɛ!

 3. Mɛɛ gbɛ nɔ Abonsam kɛ shitee kɛ wolɔi krokomɛi tsɔɔ koni amɛha Yehowa mumɔŋ paradeiso lɛ mli sɛɛnamɔi lɛ aje wɔdɛŋ?

³ Shi Yehowa mumɔŋ paradeiso lɛ mli ni wɔɔhi lɛ jeee nɔ ko ni wɔɔku wɔhiɛ wɔshwie nɔ ni wɔhi mli kɛkɛ. Wɔjɛ wɔsuɔmɔ mli wɔba paradeiso nɛɛ mli; wɔbaanyɛ wɔje mli (aloo ashwie wɔ kɛjɛ mli) kɛji akɛ wɔtsɔmɔ mɛi ni heee yeee aloo mɛi ni jɛɔ amɛsuɔmɔ mli amɛkuɔ Yehowa jalɛ mlai lɛ amli. Shi, ebaŋ lɛ nakai kɛji akɛ wɔha ‘wɔ tsutsu suɔmɔ’ lɛ mli wa kpɛŋŋ, kɛ wɔtee nɔ wɔha wɔhiɛ sɔ gbɛjianɔ ni Yehowa eto koni eha wɔhe awa yɛ mumɔŋ lɛ fɛɛ lɛ. (Kpojiemɔ 2:⁠4) Shi Abonsam kɛ mɛi krokomɛi ni teɔ shi woɔ anɔkwale jamɔ lɛ ahe esa yɛ shishiumɔ mli. Wɔhiɛ akpakpa nɔ akɛ amɛfee klalo yɛ be fɛɛ mli akɛ amɛaafite emuuyeli mli ni wɔhiɛ lɛ kɛ amɛaanyɛ. Amɛto amɛlakamɔ wiemɔi lɛ koni amɛkɛgbɔjɔ wɔhemɔkɛyeli, amɛha wɔsuɔmɔ kɛha Nyɔŋmɔ lɛ he ajɔ, amɛha wɔyiŋ afee wɔ kɔshikɔshi​—hɛɛ, amɛha mumɔŋ paradeiso lɛ afee tamɔ ejeee paradeiso kwraa.

 4. Mɛni baanyɛ aba kɛji wɔŋmɛ gbɛ ni wɔhemɔkɛyeli he jɔ ni wɔŋmɛ gbɛ ni yiŋkɔshikɔshifeemɔ ni hiɛdɔɔ yɔɔ mli te shi yɛ wɔmli?

⁴ Kɛ wɔkɛ abɛbua ko mli wiemɔi aaatsu nii lɛ, wɔbaanyɛ wɔbashɛ he ko ni eeewa kɛha wɔ, ekolɛ wɔnyɛŋ wɔna mumɔŋ paradeiso lɛ mli koo kusuu lɛ po, akɛni adesai ni yeee emuu lɛ atsei ni yɔɔ mli bianɛ lɛ ji nɔ ni wɔkwɛɔ diɛŋtsɛ lɛ hewɔ. Miishɛɛ ni wɔna yɛ be mli ni wɔkase Nyɔŋmɔ Wiemɔ lɛ mli anɔkwale lɛ, hiɛnɔkamɔ kpeteŋkpele ni wɔna, suɔmɔ ni wɔna wɔha Nyɔŋmɔ kɛ wɔmumɔŋ nyɛmimɛi lɛ, kɛ ekãa ni wɔyɔɔ kɛha Yehowa sɔɔmɔ lɛ baanyɛ alaaje. Kɛji akɛ atsɔɔɔ gbɛ ni mli wa nɔ atsuuu mumɔŋ fitemɔ nɛɛ he nii ni aaatsake lɛ lɛ, etsɛŋ ni Nyɔŋmɔ taomɔ nii ni suɔmɔ yɔɔ mli lɛ baatsɔmɔ tamɔ nibii ni akɛwaa mɔ yi moŋ yɛ mɔ ko hiɛ. Mumɔŋ niyenii kpakpa ni jɛɔ “tsulɔ anɔkwafo kɛ nilelɔ” lɛ ŋɔɔ lɛ baatsɔmɔ tamɔ niyenii ni anyaŋeɔ, ni Yehowa tsuji anyɛmifeemɔ suɔmɔ lɛ baatsɔ tamɔ shia ni henyɛlɔi sɔŋŋ eyimɔ mli obɔbɔ. Kɛkɛ lɛ nɔ pɛ ni haa mɔ tsui nyɔɔ emli, ni ehiii hu lɛ baaba mli ni ebaaje shishi ekɛ heguɔgbee kɛ anɔkwalei ni ji fãfãafãi ayi enanemɛi tsuji lɛ.​—Mateo 24:​45-51.

 5. Yɛ mɛɛ gbɛ nɔ abaanyɛ akɛ nɔ ni mɔ ko baalaaje nɛɛ ato nɔ ni Adam kɛ Hawa laaje yɛ be mli ni ashwie amɛ kɛjɛ Eden Paradeiso lɛ mli lɛ he?

⁵ Hɛɛ, jeee mumɔŋ paradeiso lɛ mli jɔɔmɔi lɛ ji nɔ ni baaje wɔdɛŋ bianɛ kɛkɛ, shi moŋ, nɔ ni hiɛdɔɔ yɔɔ mli waa lɛ, wɔbaalaaje naanɔ shihilɛ yɛ shikpɔŋ nɔ Paradeiso lɛ mli hiɛnɔkamɔ lɛ kwraa. Ni wɔbaanyɛ wɔlaaje enɛ yɛ yiŋtoo kome too lɛ nɔŋŋ ni ha Adam kɛ Hawa laaje Eden Paradeiso lɛ. Amɛyɛ nɔ fɛɛ nɔ ni he hiaa amɛ ni baaha amɛna miishɛɛ yɛ emuuyeli mli, ni ekolɛ amɛbaanyɛ amɛhi shi kɛya naanɔ. Shi heyeli​—ni ji tsɔɔmɔ sɔrɔto ko kwraa lɛ​—he miihia amɛ waa fe toiboo ni amɛaafee amɛha Yehowa kɛ Eden trom lɛ mli jɔɔmɔi lɛ. Alaka Hawa. Ni yɛ be mli ni alakaaa Adam lɛ, lɛ lɛ eha shihilɛ lɛ nyɛ enɔ, kɛ yisɛɛtsirɛmɔ waa ni jɛ eŋa lɛ ŋɔɔ, ni enɛ ha lɛ hu efee esha. No hewɔ lɛ, ashwie amɛ kɛjɛ Paradeiso, koni amɛyahi shi yɛ tɔlɛ kɛ shihilɛ gbonyo mli kɛyashi be mli ni amɛgbele be aaashɛ. Amɛlaaje naanɔ wala hegbɛ kɛha amɛ diɛŋtsɛ amɛhe ni amɛkɛ esha kɛ gbele ba amɛ diɛŋtsɛ amɛshwiei anɔ akɛ gboshinii. (1 Mose 3:​1-7, 14-19, 24; 1 Timoteo 2:​14; Romabii 5:12) Mɛɛ nyɔmɔ ni yɔɔ gbeyei kɛ mɔbɔ fɛɛ amɛwo kɛha nɔ ni amɛyatsɛ akɛ heyeli lɛ nɛkɛ!

 6. (a) Mɛni Paulo ŋma ni tsɔɔ nɔ ni esusuɔ he waa yɛ Korinto asafo lɛ mli bii lɛ ateŋ mɛi komɛi ahe? (b) Yɛ mɛɛ gbɛ nɔ ejie nɛkɛ sane he susumɔ nɛɛ nɔŋŋ kpo yɛ nɔ ni eŋma eyaha Tesalonika asafo lɛ mli?

⁶ Bɔfo Paulo ŋma wiemɔ ko ni tsɔɔ nɔ ni ehaoɔ yɛ he, akɛ: “Shi miishe gbeyei akɛ aleenɔ, taakɛ bɔ ni onufu lɛ kɛ ekutumpɔo lɛ laka Hawa lɛ, nakai nɔŋŋ aaafite nyɛ hu nyɛjwɛŋmɔi kɛjɛ krɔŋŋfeemɔ ni nyɛjie nyɛtsɔɔ Kristo lɛ mli.” (2 Korintobii 11:⁠3) Paulo na akɛ ehe miihia ni eŋma yɛ tsɔɔmɔi komɛi ni ejaaa ni kpaa shi yɛ egbii lɛ amli lɛ he. Eŋma yɛ ewolo ni ji enyɔ ni eŋma eyaha Tesalonika asafo lɛ mli akɛ: “Shi wɔmiikpanyɛ fai, . . . akɛ nyɛkahaa ahosoa nyɛ oya kɛjɛa ‘nyɛjwɛŋmɔ lɛ he, ni asaŋ nyɛkahaa akɛ mumɔ ko aloo wiemɔ ko aloo wolo ko ni aaakɛɛ akɛ ejɛ wɔŋɔɔ lɛ miihaoa nyɛ, akɛ Nuŋtsɔ lɛ gbi lɛ eshɛ eta. Nyɛkahaa mɔ ko miishishiua nyɛ yɛ gbɛ ko gbɛ ko nɔ.”​—2 Tesalonikabii 2:​1-3.

Okɛ Hemɔkɛyeli Kwalɔi Akana Nɔ Ko Feemɔ

 7. (a) Mɛɛ sanebimɔi teɔ shi kɛ nine shɛ hemɔkɛyeli kwalɔi awoji ni amɛŋmala lɛ ekomɛi anɔ kɛtsɔ post ofis adeka mli lɛ? (b) Yɛ wɔhe ni wɔɔbu kɛaajɛ hewalɛ ni hemɔkɛyeli kwalɔi aaana yɛ wɔnɔ lɛ he lɛ, mɛni hewɔ hekɛnɔfɔɔ ni wɔɔna yɛ wɔ diɛŋtsɛ wɔmli tsɔ̃ lɛ baanyɛ ekɛ oshara aba lɛ?

⁷ Agbɛnɛ, mɛni obaafee kɛji ákɛ akɛ hemɔkɛyeli kwamɔ tsɔɔmɔ ko miifɔ ohiɛ​—susumɔi komɛi ni yɔɔ nigii​—ni miitsɔɔ akɛ nɔ ni oheɔ oyeɔ akɛ Yehowa Odasefoi lɛ ateŋ mɔ kome lɛ jeee anɔkwale lɛ? Akɛ nɔkwɛmɔ nɔ lɛ, mɛni obaafee kɛji akɛ onine shɛ wolo aloo woji komɛi ni aŋmala nɔ kɛkɛ ni ogbele naa ni ona amrɔ nɔŋŋ akɛ ejɛ hemɔkɛyeli kwalɔ ko ŋɔɔ? Ani nibii amli ni otaoɔ ole lɛ baaha okane, koni ona nɔ kwraa ni eyɔɔ kɛɛmɔ? Obaanyɛ osusu po akɛ: ‘Eyeŋ mi awui ko; mihe wa waa yɛ anɔkwale lɛ mli. Ni kɛfata he lɛ, kɛ́ wɔhiɛ anɔkwale lɛ nɔ ko bɛ ni wɔbaashe no gbeyei. Anɔkwale lɛ baanyɛ adamɔ kaa lɛ naa.’ Yɛ gbɛ ni mɛi tsɔ nɔ amɛsusu saji ahe nɛkɛ hewɔ lɛ, amɛteŋ mɛi komɛi kɛ hemɔkɛyeli kwamɔ susumɔi kɛ jwɛŋmɔi nɛɛ elɛ amɛjwɛŋmɔ ni nɔ ni eba amɛnɔ ji sanebimɔi kɛ yiŋkɔshikɔshi feemɔ ni hiɛdɔɔ yɔɔ mli. (Okɛto Yakobo 1:​5-8 he.) No hewɔ lɛ kaimɔ kɔkɔbɔɔ ni yɔɔ 1 Korintobii 10:12 lɛ: “Mɔ ni susuɔ akɛ edamɔ shi lɛ akwɛ ehe ni ahi koni ekagbee shi.”

 8. Mɛɛ yelikɛbuamɔ he hiaa mɛi komɛi ni yiŋkɔshikɔshi feemɔ ena amɛnɔ hewalɛ lɛ?

⁸ Yɛ yelikɛbuamɔ ni suɔmɔ yɔɔ mli ni jɛ nyɛmimɛi ni susuɔ mɛi ahe lɛ ŋɔɔ hewɔ lɛ, áye abua mɛi komɛi ni hemɔkɛyeli kwalɔi tɛo yiŋkɔshikɔshi feemɔ amɛwo amɛmli ni no ha amɛna amanehulu babaoo yɛ mumɔŋ naagbai kɛ piŋmɔi yɛ henumɔŋ lɛ. Shi kulɛ abaanyɛ akwa piŋmɔi nɛɛ. Akɛɔ yɛ Abɛi 11:9 akɛ: “Osatofo kɛ enaabu fiteɔ enaanyo; shi nilee nɔ aaatsɔ ajie jalɔi.” Yuda kɛɛ enanemɛi Kristofoi lɛ akɛ “nyɛyaa nɔ nyɛnaa mɛi ni yiŋ feɔ amɛ kɔshikɔshi lɛ mɔbɔ; nyɛherea amɛyiwala kɛtsɔ sha ni nyɛaasha amɛ kɛjɛ la lɛ mli lɛ nɔ.” (Yuda 22, 23, NW) Paulo wo nɔkwɛlɔ Timoteo ŋaa ni ekɛ “mlijɔlɛ awie atsɔɔ mɛi ni kuɔ enaa, akɛ aleenɔ Nyɔŋmɔ aaaha amɛ tsuitsakemɔ ni amɛle anɔkwale lɛ, ni amɛhiɛ atserɛ amɛ kɛjɛ Abonsam tsɔne lɛŋ; ejaakɛ ekɛdu amɛ ni amɛfee esuɔmɔnaa nii.”​—2 Timoteo 2:​25, 26.

 9. Mɛni ni yɔɔ mɔbɔ ji nɔ eba mɛi ni amɛkwa anɔkwale jamɔ lɛ anɔ?

⁹ Nɔ ni yɔɔ mɔbɔ lɛ, mɛi krokomɛi eku amɛsɛɛ kɛtee duŋ kpii lɛ mli kwraa, ni mɛi komɛi hu eku amɛsɛɛ amɛtee Kristendom tsɔɔmɔi ni ejaaa lɛ ahe. Bɔfo Petro ŋma yɛ nɔ ni ejɛ mi eba ni yɔɔ mɔbɔ yɛ mɛi ni klɛŋklɛŋ lɛ amɛnyiɛ yɛ anɔkwale lɛ mli shi amɛtsɔ afã lɛ ahe. Ekɛɛ akɛ: “Ejaakɛ kɛ amɛtsɔ Nuŋtsɔ kɛ Yiwalaherelɔ Yesu Kristo he nilee lɛ nɔ amɛjo je nɛŋ muji nii lɛ anaa foi, ni nomɛi amli nɔŋŋ asaa adu amɛ yɛ ni aye amɛnɔ ekoŋŋ lɛ, amɛnaagbee shihilɛ etsɔ efɔŋ fe tsutsu nii lɛ.” Petro kɛɛ akɛ amɛtamɔ gbee ni eku esɛɛ kɛtee lɛ diɛŋtsɛ eshwee he kɛ kpolotoo ni aju ehe ni yakokloɔ ŋmɔtɔ mli.​—2 Petro 2:​20-22.

10. (a) Mɛni Yehowa kɛɔ yɛ hemɔkɛyeli kwalɔi ni wɔɔbo amɛtoi lɛ he? (b) Hemɔkɛyeli kwalɔi awoji ni amɛŋmala lɛ kanemɔ baatsɔɔ akɛ wɔmiifee mɛni?

¹⁰ Kɛji akɛ wɔnaanyo adesa ko kɛɛ wɔ akɛ, ‘Kaakane enɛ’ aloo, ‘Kaabo enɛ toi’ lɛ, ekolɛ wɔbaaku wɔhiɛ wɔshwie eŋaawoo lɛ nɔ. Shi kaimɔ akɛ, Yehowa ji Mɔ ni kɛɔ wɔ nɔ ni esa akɛ wɔfee yɛ nɛkɛ sane nɛɛ mli. Ni mɛni ji nɔ ni ekɛɔ yɛ hemɔkɛyeli kwalɔi ahe? “Nyɛtsi nyɛhe kɛjɛ amɛhe” (Romabii 16:​17, 18) ; “nyɛkɛ amɛ akabɔ” (1 Korintobii 5:11) ; kɛ “nyɛkaherea [amɛ] kɛbaa nyɛwe, ni nyɛkafalaa [amɛ] tete” (2 Yohane 9, 10) . Wiemɔi ni ama nɔ mi nɛ, gbɛtsɔɔmɔ ni ka shi faŋŋ. Kɛji akɛ akɛni wɔmiitao nɔ ko mli wɔle hewɔ lɛ, wɔyakane wolo ko ni hemɔkɛyeli kwalɔ ko ni ale lɛ jogbaŋŋ eŋma lɛ, ani enɛ tamɔŋ anɔkwale jamɔ henyɛlɔ ni wɔmiifɔ lɛ nine kɛba wɔ diɛŋtsɛ wɔshia koni ekɛ wɔ abata shi ni egba ehemɔkɛyeli kwamɔ susumɔi loo tsɔɔmɔi lɛ etsɔɔ wɔ nɔŋŋ?

11, 12. (a) Mɛɛ mfoniri loo nɔkwɛmɔ nɔ afee kɛha wɔ ni yeɔ ebuaa wɔ koni wɔyoo akɛ wɔnyɛŋ wɔkane hemɔkɛyeli kwalɔi awoji akɛ nɔ ko ni wɔleee? (b) Abaanyɛ akɛ bɔ ni Yehowa susuɔ ewebii ahe lɛ ato enɛ he yɛ mɛɛ gbɛ nɔ?

¹¹ Nyɛhaa wɔfea enɛ he nɔkwɛmɔ nɔ yɛ nɛkɛ gbɛ nɔ: Ŋɔɔ lɛ akɛ obinuu ko ni ji obalanyo fioo ko nine eshɛ ajwamaŋbɔɔ he woji kɛ mfonirii anɔ kɛtsɔ post ofis adeka mli. Mɛni obaafee? Kɛji akɛ eesumɔ ni ekane akɛni eesumɔ ni ele nɔ ni yɔɔ mli hewɔ lɛ, ani obaakɛɛ akɛ: ‘Hɛɛ, mibinuu, yaa nɔ ni okane. Eyeŋ bo awui ko. Ogbekɛbiiashi wɔjɛ wɔtsɔɔ bo akɛ jeŋba shara ehiii. Kɛfata he lɛ ehe miihia ni ole nɔ ni yaa nɔ yɛ je lɛ mli koni ona ole akɛ ehiii kwraa nakai’? Ani obaasusu saji ahe yɛ nɛkɛ gbɛ nɔ? Dabida, ofeŋ nakai! Shi moŋ obaatsɔɔ lɛ osharai ni yɔɔ ajwamaŋbɔɔ he woji kɛ mfonirii nɛɛ akanemɔ mli lɛ, ni obaabi ni ekpata nakai woji lɛ ahiɛ. Mɛni hewɔ? Ejaakɛ bɔ fɛɛ bɔ ni mɔ ko he wa yɛ anɔkwale lɛ mli ha lɛ, kɛji akɛ eha ejwɛŋmɔ hi susumɔi gbohii ni ejaaa ni anaa yɛ woji ni tamɔ nɛkɛ mli lɛ anɔ lɛ, ebaasa ejwɛŋmɔ kɛ etsui he. Akɔnɔ fɔŋ ko ni atɛo awo tsui lɛ mli nigii lɛ baanyɛ atee bɔlɛnamɔ he akɔnɔi ni esaaa lɛ ashi. Mɛni baajɛ mli aba? Yakobo kɛɔ akɛ kɛji akɛ akɔnɔ fɔŋ ŋɔ hɔ lɛ, efɔɔ esha, ni nɔ ni esha kɛ mɔ boteɔ mli ji gbele. (Yakobo 1:15) No hewɔ lɛ mɛni hewɔ esa akɛ oje nifeemɔ ni tamɔ kɔsɔŋkɔsɔ nɛɛ shishi kwraa po?

¹² Ojogbaŋŋ, kɛji akɛ wɔkɛ hiɛdɔɔ baatsu nii kɛ nɔmimaa ni wɔkɛbu wɔbii ahe kɛjɛ ajwamaŋbɔɔ he woji ahe lɛ, ani esaaa akɛ wɔkpaa gbɛ akɛ wɔ ŋwɛi Tsɛ ni yɔɔ suɔmɔ lɛ hu baabɔ wɔ kɔkɔ ni ebu wɔhe kɛjɛ mumɔŋ ajwamaŋbɔɔ, ni hemɔkɛyeli kwamɔ fata he lɛ he lo? Nɔ ni okɛɔ ji akɛ, Tsi ohe kɛjɛ he!

13. Mɛni abaanyɛ afee kɛ atee sanebimɔi ni damɔ saji ni hemɔkɛyeli kwalɔi eŋmala lɛ anɔ lɛ shi yɛ be mli ni wɔkɛ wɔhe ewo shiɛmɔ nitsumɔ lɛ mli lɛ?

¹³ Shi ŋɔɔ lɛ akɛ wɔmiishiɛ sanekpakpa lɛ, ni gbɔmɛi bibii saji aloo amɛtee shitee kɛ woo wiemɔi lɛ eko nɔŋŋ ni mɛi ni teɔ shi woɔ anɔkwale lɛ biɔ lɛ eko shi? Sane lɛ ji akɛ, kɛ gbɔmɔ lɛ sumɔɔɔ anɔkwale lɛ ni nɔ ni esumɔɔ nɔŋŋ ji ni eje ŋwane lɛ, nɔ ni sa jogbaŋŋ feemɔ ji ni wɔshi jɛmɛ ni wɔya shia kroko. Shi kɛji akɛ mɔ ko kɛ anɔkwayeli bi saji komɛi ni hemɔkɛyeli kwalɔi kɛɔ lɛ ashi lɛ, mɛni abaanyɛ afee? Klɛŋklɛŋ lɛ, wɔbaanyɛ wɔbi lɛ nɔ pɔtɛɛ hewɔ ni ebiɔ sane lɛ. Ekolɛ ekɔɔ sane kome ko loo saji enyɔ ko he. Kɛ eba lɛ nakai lɛ, wɔbaanyɛ ni wɔkɛ wɔhe akpɛtɛ enɛɛmɛi pɛ he ni wɔha hetoo lɛ kɛjɛ Ŋmalɛi lɛ amli, kɛjɛ Asafo lɛ woji amli, kɛ agbɛnɛ kɛjɛ nɔ ni wɔle yɛ anɔkwale mli ni kɔɔ esane lɛ he lɛ he. Ehe ehiaaa ni wɔmu sane naa akɛ esa akɛ wɔkane wolo loo wolo bibioo ko ni nɔ ni yɔɔ mli ji heguɔgbee kɛ anɔkwalei fãfãafãi dani wɔte shi wɔwo loo wɔha nakai apasa wiemɔi lɛ kɛ mɛi ni teɔ shi woɔ wɔ lɛ atsɔɔmɔi lɛ ahetoo.

Hekɛnɔfɔɔ Yɛ Yehowa Mli

14. Mɛɛ mɔ he susumɔ ni suɔmɔ yɔɔ mli wɔ ŋwɛi Tsɛ lɛ yɔɔ kɛha wɔ, ni mɛni hewɔ wɔbaanyɛ wɔkɛ wɔhe afɔ enɔ kwraa lɛ?

¹⁴ Yɛ be mli ni wɔyaa wɔhiɛ, wɔtswaa hemɔkɛyeli wɔmaa shi ni wɔkɛ wɔhe woɔ Maŋtsɛyeli sɔɔmɔ lɛ mli vii lɛ, wɔbaanyɛ ni wɔkɛ wɔhe kɛ wɔhiɛ afɔ Yehowa nɔ kwraa, akɛni wɔle akɛ, ákɛ wɔ ŋwɛi Tsɛ ni yɔɔ suɔmɔ lɛ eesumɔ ni wɔna nɔ ni hi fe fɛɛ lɛ hewɔ. Nyɔŋmɔ tsɔɔ wɔ nii; ebɔɔ wɔ kɔkɔ. Efeɔ enɛ kɛtsɔɔ e-Wiemɔ lɛ kɛ agbɛnɛ kɛtsɔɔ gbɛtsɔɔmɔ ni mli ka shi faŋŋ ni etsɔɔ egbɛjianɔtoo ni anaa lɛ nɔ ekɛhaa lɛ nɔ. Kɛji akɛ wɔbi fɔlɔ ko ni yɔɔ suɔmɔ aboloo kɛ loo lɛ, ehaŋ wɔ tɛ loo onufu. Nyɔŋmɔ hu eshishiŋ wɔ ni elakaŋ wɔ. (Mateo 7:​7-11) Ni kɛlɛ, Nyɔŋmɔ ebuŋ wɔhe kɛjɛŋ kaai loo lakamɔi kɛ Abonsam shishiumɔi ahe kwraa. Ekɛɔ yɛ lɛ diɛŋtsɛ ehe akɛ: “Miji Yehowa, o-Nyɔŋmɔ lɛ, mɔ ni tsɔɔo nii ni hi hao, mɔ ni tsɔɔo gbɛ ni onyiɛ nɔ lɛ.” (Yesaia 48:17) Hɛɛ, Yehowa ‘tsɔɔ wɔ nii ni hi ha wɔ ni he baaba sɛɛnamɔ aha wɔ.’ Ekɛɔ wɔ ni wɔtsi wɔhe kɛjɛ hemɔkɛyeli kwalɔi kɛ amɛtsɔɔmɔi ahe, ni enɛ baabu wɔ diɛŋtsɛ wɔhe. Etsɔɔ wɔwala.

15. Mɛɛ kɔkɔbɔi bɔfo Paulo kɛha yɛ mɛi ni baabɔ mɔdɛŋ ni amɛgbala kaselɔi lɛ kɛya lɛ ahe?

¹⁵ Bɔfo Paulo bɔ enanemɛi onukpai Kristofoi lɛ kɔkɔ akɛ: “Ni nyɛ diɛŋtsɛ nyɛteŋ hu lɛ, hii ni wieɔ nii ni ejaaa aaate shi, ni amɛaakpala kaselɔi lɛ amɛshwie amɛsɛɛ.” (Bɔfoi lɛ Asaji 20:30) Kɛji akɛ wɔtee nɔ wɔbo naataomɔi ni yaa nɔ nigii kɛ susumɔi ni tamɔ nɔ ni eji anɔkwale shi kɛlɛ ejeee anɔkwale, “nibii ni ejaaa” loo nibii ni atsɔmɔ amɛ lɛ atoi lɛ, amɛbaatsɔ tamɔ nibii ni ja yɛ wɔtoiiaŋ. Babaoo ni Hawa kwɛɔ tsoyibii ni agu eyeli lɛ ni eboɔ Abonsam susumɔi ni ejaaa lɛ toi lɛ, ehe eye babaoo akɛ Abonsam sane lɛ ja. Paulo bɔ kɔkɔ akɛ: “Nyɛkwɛa nyɛhe ni ahia, koni mɔ ko kɛ jeŋ nilee kɛ yakashishiumɔ akaŋɔ nyɛ nom, gbɔmɛi ablemasaji kɛ je nɛŋ shishijee nibii ni jɛɛɛ Kristo lɛ anaa.” (Kolosebii 2:⁠8) Bɔfo lɛ hu tsɔɔ akɛ hemɔkɛyeli kwalɔi nɛɛ “kɛ naaŋɔɔmɔ kɛ naadɔkɔmɔ wiemɔi lakaa mɛi ni leee efɔŋ lɛ atsuii.” (Romabii 16:​17, 18; Okɛto 2 Korintobii 11:​13-15 he.) Shi, yɛ anɔkwale ni eji akɛ nakai shishiumɔ wiemɔi lɛ gbalaa mɛi komɛi kɛyaa lɛ etsɔɔɔ akɛ esa akɛ wɔnyiɛ amɛsɛɛ. Yɛ fɛɛ sɛɛ lɛ, ehe miihia ni wɔhiɛ ahi wɔhe nɔ yɛ be fɛɛ mli.

16. Mɛɛ Ŋmalɛ mli kɔkɔbɔi kɛ nitsumɔ baaye abua wɔ ni wɔdamɔ mɔdɛŋ ni Satan aaabɔ ni ekɛlaka wɔ ni ekɛgbala gbɔmɛi kɛjɛ anɔkwale jamɔ he lɛ naa?

¹⁶ Abonsam ŋaatsɔɔ lɛ tsakeko kɛjɛ Eden. Ekɛ sanebimɔi ni yɔɔ nigii kɛ hesuɔmɔ tsuɔ nii. Petro ŋma akɛ: “Amale tsɔɔlɔi baaba nyɛ hu nyɛteŋ. Mɛi ni kɛ hiɛkpatamɔ tsɔɔmɔi aaabahɔ mli nigii ni amɛkɛ kutumpɔo wiemɔi aaaye nyɛhe jara yɛ hiɛjoomɔ mli.” (2 Petro 2:​1-3) Afeɔ nɔ ko ni akɛɛ eji kantafiti koni aha etamɔ ekpakpa lɛ pɛpɛɛpɛ. Ni yɛ 2 Timoteo 2:​14-19 lɛ, Paulo ma bɔ ni ehe hiaa ni wɔkɛ Yehowa Wiemɔ lɛ atsu nii ni wɔkɛjaje saji anɔ mi, shi ebɔ kɔkɔ yɛ bɔ ni ehe hiaa ni wɔkwa hemɔkɛyeli kwalɔi ni ‘amɛ yakayaka sanegbaa buleɔ mɔ lɛ,’ ejaakɛ ekɛɛ akɛ, “amɛwiemɔ lɛ aaatsɛŋe tamɔ fala ni bɛ tsabaa kɛaakpe.”

17, 18. (a) Hemɔkɛyeli kwalɔi atsɔɔmɔ tamɔ fala ni bɛ tsabaa ni tsɛŋeɔ mɔ yɛ mɛɛ gbɛ nɔ? (b) Mɛɛ kɔkɔbɔɔ bɔfo Petro kɛha yɛ mɛi ni bɔɔ mɔdɛŋ ni amɛgbala wɔ kɛjɛ anɔkwale jamɔ he lɛ he? (d) Mɛɛ sanebimɔi abaaha hetoo yɛ nikasemɔ ni nyiɛ sɛɛ lɛ mli?

¹⁷ Nii ni akɛtoɔ sane he ni ja diɛŋtsɛ nɛ! Taakɛ fala ni bɛ tsabaa ni tsɛŋeɔ mɔ lɛ ji lɛ, hemɔkɛyeli kwamɔ susumɔi jeee nɔ ko fe mumɔŋ gbele ni gbɛɔ shwãa aloo etsɛŋeɔ mɔ. Ni akɛni asafo lɛ mli bii tamɔ gbɔmɔtso kome hewɔ lɛ, oshara yɛ akɛ eeenyɛ esa henii krokomɛi lɛ ahe. Kɛji akɛ mɔ ni gbɛɔ hemɔkɛyelii kwamɔ tsɔɔmɔi eshwãa nɛɛ ebafee mɔ ni anyɛŋ asaa lɛ kɛba mumɔŋ hewalɛnamɔ mli kɛtsɔ Nyɔŋmɔ Wiemɔ lɛ mli tsofa mu ni tsaa mɔ ni akɛtsuɔ nii yɛ gbɛ ni yɔɔ shiŋŋ shi suɔmɔ yɔɔ mli lɛ nɔ lɛ, belɛ henii nɛɛ ni aaafɔ ashɛ afɔ (kɛtsɔ shwiemɔ nɔ) lɛ pɛ ji gbɛ ni aaanyɛ atsɔ nɔ abu gbɔmɔtso lɛ henii krokomɛi lɛ ahe. (Okɛto Tito 1:​10, 11 he.) Nyɛkahaa nɛkɛ mumɔŋ fala ni bɛ tsabaa ni tsɛŋeɔ mɔ kɛboteɔ gbele mli nɛɛ miisa nyɛhe! Nyɛhia mumɔŋ hewalɛ mli kɛtsɔ kwa ni nyɛaakwa hemɔkɛyeli kwalɔi asusumɔi ni nyɛkɛaakpe lɛ nɔ. Nyɛboa ŋaawoo kpakpa ni yɔɔ 2 Petro 3:​17, 18 lɛ toi: “Agbɛnɛ, nyɛ lɛ, suɔmɔmɛi, akɛni nyɛle momo sa hewɔ lɛ, nyɛsaraa, koni akɛ gbɔmɛi fɔji alakamɔ sane lɛ akashata nyɛ hu, ni nyɛjɛ nyɛ diɛŋtsɛ nyɛshifimɔ lɛ mli nyɛgbee shi; shi nyɛshwerea yɛ wɔ Nuŋtsɔ kɛ Yiwalaherelɔ Yesu Kristo duromɔ kɛ nilee lɛ mli.”

¹⁸ Shi te wɔɔfee tɛŋŋ wɔbu wɔhe kɛjɛ hemɔkɛyeli kwamɔ he hu? Te wɔfee tɛŋŋ wɔkwɛ koni wɔtsuii akakpɛlɛ hemɔkɛyeli kwamɔ susumɔi anɔ? Nikasemɔ ni nyiɛ sɛɛ nɛɛ baaha nɛkɛ sanebimɔi nɛɛ ahetoo.a

[Shishigbɛ niŋmai]

Ani Okaiɔ?

◻ Mɛɛ nifeemɔ baaha wɔlaaje Yehowa mumɔŋ paradeiso lɛ mli sɛɛnamɔi lɛ?

◻ Mɛni hewɔ hemɔkɛyeli kwamɔ woji akanemɔ tamɔ ni wɔmiikane bɔlɛnamɔ he mfonirii kɛ amɛhe woji nɔŋŋ lɛ?

◻ Mɛni abaanyɛ afee kɛ abi wɔ saji ni hemɔkɛyeli kwalɔi komɛi kɛɔ lɛ ahe sane?

◻ Mɛni hewɔ hemɔkɛyeli kwalɔi atsɔɔmɔi tamɔ fala ni bɛ tsabaa ni tsɛŋeɔ mɔ lɛ?

[Akrabatsa ni yɔɔ baafa 7]

“Kwashia kɛɔ yɛ etsuiŋ akɛ: Nyɔŋmɔ ko bɛ! Amɛfite, amɛnifeemɔ nii lɛ yɛ nyaŋemɔ; mɔ ko bɛ ni feɔ ekpakpa po. Yehowa jɛɔ ŋwɛi ekwɛɔ gbɔmɛi abii akɛ eeena akɛ mɔ ko yɛ ni le nii ni taoɔ Nyɔŋmɔ sɛɛgbɛ lo. Amɛ fɛɛ amɛgba afa, amɛfite; mɔ ko mɔ ko bɛ ni feɔ ekpakpa, dabi mɔ kome folo po bɛ!”​—Lala 14:​1-3.

[Mfoniri ni yɔɔ baafa 10]

Ani okɛ nilee kpataa hemɔkɛyeli kwamɔ woji ahiɛ?