Tswaa Ofai Shi Akɛ Obaasɔmɔ Yehowa Kɛ Otsui Muu Lɛ Fɛɛ
“Ni Osɔmɔ lɛ kɛ otsui muu lɛ fɛɛ kɛ osusuma suɔmɔ naa! Ejaakɛ Yehowa taoɔ tsuii fɛɛ omli, ni ele yitseiaŋ jwɛŋmɔi fɛɛ.”—1 KRONIKA 28:9.
1. Kronika 28:9 teeɔ mɛɛ sanebimɔi ashi?
1 ŊMALƐ ni atsɛ yɛ yiteŋgbɛ nɛɛ teeɔ sanebimɔi komɛi ni kɔɔ tsui lɛ he lɛ ashi. Kɛ eewie heloo tsui nɛɛ he lɛ, belɛ te aaafee tɛŋŋ ni mɔ ko aaahi shi kɛ tsui ni yeko emuu loo eshɛɛɛ hu? Akɛ nɔkwɛmɔ nɔ lɛ, ani mɔ ko aaanyɛ ahi shi kɛ tsui fa? Ani Yehowa tamɔ ŋmɛnɛŋmɛnɛ beaŋ tsui hela he nilelɔi ni taoɔ heloo tsui lɛ mli koni ena emli helai? Yɛ yitseiaŋ jwɛŋmɔi agbɛfaŋ lɛ, ani jwɛŋmɔi hiɔ wɔtsui mli? Etamɔ nɔ ni Biblia komɛi kɛɔ nakai, yɛ be mli ni amɛwieɔ ‘tsuiaŋ susumɔi ajwɛŋmɔi’ he lɛ. (1 Mose 6:5; 1 Kronika 29:18) Ani Yehowa kwɛɔ wɔheloo tsuii amli koni eyoo wɔsusumɔi? Mɛni kwraa ji ‘ni wɔɔsɔmɔ lɛ kɛ tsui muu fɛɛ’ lɛ shishi?
2. Mɛɛ jwɛŋmɔ ji nɔ ni blema Mizraimbii, Babiloniabii, kɛ Hela jeŋ nilelɔ Aristotle hiɛ yɛ tsui lɛ he?
2 Blema Mizraimbii lɛ heɔ yeɔ akɛ heloo tsui lɛ ji nilee kɛ henumɔi ajɛɛhe. Amɛsusu hu akɛ eyɛ lɛ diɛŋtsɛ esuɔmɔnaa nii. Babiloniabii lɛ kɛɛ akɛ tsui lɛ ji nɔ ni kɛ nilee kɛ suɔmɔ toɔ. Hela jeŋ nilelɔ Aristotle tsɔɔ akɛ no ji henumɔi lɛ ajɛɛhe kɛ susumɔ lɛ shihilɛ he. Shi yɛ be mli ni be hoɔ ni nilee yaa hiɛ lɛ, aŋmɛɛ nɛkɛ susumɔi nɛɛ ahe. Yɛ naagbee lɛ, abale tsui lɛ diɛŋtsɛ taakɛ eji, tsɔne ni shiɔ la kɛbɔleɔ gbɔmɔtso muu lɛ fɛɛ mli.
3. Mɛɛ anɔkwa saji haa tsui lɛ feɔ nɔ ko ni yɔɔ naakpɛɛ lɛ?
3 Hɛɛ, titri lɛ, enitsumɔ diɛŋtsɛ ji pɔmp, aloo tsɔne ni shiɔ Ia kɛbɔleɔ shi, shi kwɛ naakpɛɛ nii ni eji, ekɛ anɔkwayeli shiɔ enɛ kɛbɔleɔ shi yɛ wɔshihilɛ be mli hiŋmɛitswaa fɛɛ hiŋmɛitswaa mli! Eda fioo fe atswɛrɛ, ni etsiimɔ shɛɛɛ nsɛni tɛ kome, shi adesa tsui lɛ tswaa shii 100,000 gbi kome, ni eshiɔ lá ni haa wala lɛ kɛtsɔɔ gbɔmɔtso lɛ faji agbɛjianɔtoo sɔrɔtoi ni amɛkɛlɛmɔ shɛɔ shitoi 60,000 lɛ amli—aaafee galɔn 2,000 gbi kome, galɔn akpekpei nyɔŋma-nyɔŋmai abɔ yɛ gbɔmɔ wala shihilɛ be mli.a Nɔ ni jeɔ tsui lɛ tswaa shishi ji wala yibii ni abua naa ni feɔ nɔ ni haa tsui lɛ tswaa pɛpɛɛpɛ lɛ, ni ehaa nɔ ko tamɔ sarawa hewalɛ tsuɔ nii yɛ mli ni enɛ kudɔɔ bɔ ni tsui lɛ tswaa haa lɛ. Gbɔmɔtso lɛ mli fãi ko bɛ ni tsuɔ nii waa, yɛ be kakadaŋŋ mli, yɛ shiŋŋfeemɔ mli afii nyɔŋmai abɔ fe tsui lɛ. Kɛ aanyɛ enɔ yɛ henumɔŋ aloo aagbɔlé gbɔmɔtso lɛ waa lɛ ebaanyɛ eha eshimɔ lɛ abɔ lɛ toi enumɔ. Kɛ́ ajie tsui lɛ kɛjɛ tsitsi mli hu lɛ, ebaanyɛ eshi yɛ be kpalaŋŋ mli. Wala yibii ni afolɔ kɛjɛ tsui lɛ mli lɛ po baanyɛ afee nakai yɛ shihilɛ kpakpai ashishi. Ansɔ lɛ pɛ biɔ la babaoo kɛ kɔɔyɔɔ kpakpa fe tsui lɛ.
4, 5. (a) Mɛɛ sui Ŋmalɛi lɛ kɛtoɔ tsui lɛ he? (b) Taakɛ Ŋmalɛi lɛ tsɔɔ lɛ, mɛɛ henumɔi kɛ kanyamɔi yɔɔ tsui lɛ mli?
4 Nyɔŋmɔ Wiemɔ lɛ wieɔ tsui lɛ he aaafee shii akpe. Enɛɛmɛi ateŋ fioo ko pɛ kɔɔ heloo tsui lɛ he. Fioo ko hu kɔɔ nɔ ko teŋ tuuŋtu he, tamɔ “ŋshɔ lɛ tsui mli” kɛ “shikpɔŋ lɛ tsui mli.” (Ezekiel 27:25-27; Mateo 12:40, NW) Shi, akɛ tsui lɛ tsuɔ nii aaafee shii akpe yɛ gbɛi sɔrɔtoi anɔ yɛ okadi gbɛ nɔ. Kittel Theological Dictionary of the New Testament lɛ toɔ ŋmalɛi pii anaa yɛ “tsui” lɛ shishi kɛhaa yitsei bibii nɛɛ eko fɛɛ eko: “Tsui lɛ mli ji he ni henumɔi, akɔnɔi kɛ hedɔi yɔɔ.” “Tsui lɛ ji shishinumɔ jɛɛhe, jwɛŋmɔ kɛ nii ahesusumɔ shihilɛ he.” “Tsui lɛ ji suɔmɔnaa nifeemɔ shihilɛ he, efaishitswaa jɛɛhe.” “No hewɔ lɛ tsui lɛ ji he kome pɛ ni yɔɔ gbɔmɔ mli ni Nyɔŋmɔ tsɔɔ ehe kɛyaa, heni ejamɔ shihilɛ lɛ shishilɛi jɛ, ni enɛ ji nɔ ni tsɔɔ ejeŋba sui.”
5 Henumɔi kɛ kanyamɔi hiɔ nɛkɛ okadi tsui nɛɛ mli. Taakɛ ŋmalɛi pii tsɔɔ lɛ, tsui Iɛ baanyɛ anya, eye awerɛho, efee kusuu, emii ashɛ ehe, efee yeyeeye, ekɛ ehe afɔ nɔ ko nɔ, etɔ lɛ, ewa. Ehiɛ baanyɛ adɔ kɛ mlifu aloo esere kɛ gbeyeishemɔ, ewoɔ ehe nɔ ni epupuɔ ehe aloo ehe jɔ ni ebaa ehe shi, esumɔɔ mɔ babaoo loo ekɛ mlila woɔ emli obɔ, eyɛ krɔŋŋ ni ehe tse aloo eyeɔ gbalafitemɔ mli efɔŋ he fɔ. Esumɔɔ efɔŋ, shi ebaanyɛ etsirɛ wɔ ni wɔfee ekpakpa.
Mli Jwɛŋmɔ Enyɔnyɔɔnyɔ Loo Tsui Ŋta Tsɛ
6, 7. (a) Mɛɛ gbɔmɛi nɛkɛ lalatsɛ lɛ nyɛɔ lɛ, ni mɛɛ nifeemɔi anɔ atsɔ afee shihilɛi nɛɛ ahe mfoniri yɛ Israel kɛ Yuda? (b) Yesu tsɔɔ akɛ jwɛŋmɔi enyɔnyɔ loo tsui ŋta sɔɔmɔ ni akɛhaa Yehowa lɛ ji nɔ ko ni ekpɛlɛɛɛ nɔ yɛ mɛɛ gbɛ nɔ?
6 Esa akɛ heloo tsui lɛ aye emuu dani enyɛ etsu nii, shi abaanyɛ aja okadi tsui lɛ mli. Lalatsɛ lɛ, ni eka shi faŋŋ akɛ eji Nyɔŋmɔ tsui naa gbɔmɔ lɛ ŋma yɛ mumɔ lɛ tsirɛmɔ naa akɛ: “[Tsui loo] jwɛŋmɔ enyɔnyɔ tsɛmɛi lɛ, minyɛɔ amɛ.” (Lala 119:118) Mɛi ni fata mɛnɛɛmɛi ahe ji Israelbii ni Elia tswa amɛ mpoa kɛ nɛkɛ wiemɔi nɛɛ lɛ: “Mɛɛ beyinɔ nɔŋŋ nyɛaadida yɛ saji enyɔ teŋ kɛyashi? Kɛji Yehowa ji Nyɔŋmɔ lɛ, nyɛnyiɛa esɛɛ; shi kɛji Baal ni lɛ, no lɛ nyɛnyiɛa esɛɛ!” (1 Maŋtsɛmɛi 18:21) Amɛkɛ jwɛŋmɔ enyɔnyɔ loo tsui ŋta aadida yɛ saji enyɔ teŋ.
7 Nakai nɔŋŋ hu, yɛ be mli ni Yuda eku esɛɛ eba Yehowa ŋɔɔ fã kɛ fã lɛ, aŋma akɛ: “Kɛlɛ maŋ lɛ shaa afɔlei yɛ hei grɔŋŋi lɛ lolo, shi Yehowa, amɛ Nyɔŋmɔ lɛ kɛkɛ amɛshãa amɛhaa.” (2 Kronika 33:17) Amɛkɛ tsui ŋta kɛɛ akɛ amɛmiisɔmɔ Yehowa, shi yɛ gbɛ ni aŋmɛɛɛ lɛ nɔ ni agbɛnɛ yɛ hei ni tsutsu lɛ amɛjaa Baal yɛ lɛ. Yesu kɛɛ: “Mɔ ko nyɛŋ nuŋtsɔmɛi enyɔ asɔmɔ.” (Mateo 6:24) Nyɔji tamɔ gboshinii ko yɛ nakai bei lɛ amli. Amɛsɔmɔɔ amɛnuŋtsɔ lɛ ŋmlɛtswai 24 gbi kome. Amɛnyɛŋ amɛja amɛbe Iɛ mli enyɔ amɛha nuŋtsɔmɛi enyɔ—fã kɛha mɔ kome kɛ fã kɛha mɔ kroko. Yesu miima nɛkɛ sane nɛɛ nɔ mi: Anyɛŋ akɛ tsui ŋta asɔmɔ Yehowa!
8. Te aaafee tɛŋŋ ni gbɔmɔ kome aaana tsuii enyɔ yɛ okadi gbɛ nɔ, ni mɛɛ ŋmalɛi tsɔɔ enɛ mli?
8 Shi heloo tsui kome yɔɔ mɔ fɛɛ mɔ mli, shi kɛ́ aawie yɛ okadi gbɛ nɔ lɛ, gbɔmɔ kome baanyɛ ana tsui enyɔ. David wie gbɔmɛi ni tamɔ nɛkɛ he akɛ: “Amɛnaa dɔkɔbii, ni tsui ŋta amɛkɛwieɔ [“kɛ tsui kɛ tsui” Ref. Bi., shi. shigbɛ niŋmaa].” (Lala 12:3) Tsui kome jieɔ ehe kpo yɛ mɛi ahiɛ, ni ekroko lɛ taoɔ pɛsɛmkunya sɛɛnamɔ yɛ teemɔŋ. Átsɔɔ nɛkɛ hiɛi enyɔ, tsui ŋta nifeemɔ nɛɛ mli yɛ ŋmalɛ mli: “Ejaakɛ etamɔ mɔ ko ni buɔ akɔntaa yɛ etsui mli; ekɛɔ bo akɛ: Ye ni onu! shi otsui bɛ ohe.” “Kɛ́ eewie dɔkɔbii lɛ, kaahe lɛ oye; ejaakɛ nihii nii kpawo sɔŋŋ yɛ etsui mli.”—Abɛi 28:7; 26: 25; Lala 28:3.
9. Mɛni tsɔɔ akɛ jwɛŋmɔi enyɔnyɔ loo tsui ŋta jamɔ yɛ Yeremia gbii Iɛ kɛ Yesu bei lɛ amli?
9 Nɛkɛ osatofeemɔ yɛ adesai ateŋ wekukpaa mli nɛɛ ji nɔ ko ni anyaŋeɔ, ni kɛ́ abadu enɛ yɛ Yehowa jamɔ mli lɛ, ekɛ oshara baa. “Nyɛkɛ nyɛhiɛ akafɔa apasa wiemɔi lɛ anɔ akɛ: Yehowa sɔlemɔwe, Yehowa sɔlemɔwe, Yehowa sɔlemɔwe lɛ nɛ! Naa, nyɛ lɛ nyɛŋɔɔ nyɛhiɛ nyɛfɔɔ apasa wiemɔi ni he bɛ sɛɛnamɔ anɔ! Aso nyɛaaju, nyɛaaye awui, nyɛaafite gbala, nyɛaakamɔ apasa kitai ni nyɛaatee nyɛyasha tsofa kɛ ŋma nyɛha Baal, ni nyɛaayanyiɛ nyɔŋmɔi krokomɛi ni nyɛleee lɛ asɛɛ, dani nyɛba nyɛbadamɔ mihiɛ yɛ shia nɛɛ ni aŋɔ migbɛi awo lɛ lɛ, ni nyɛkɛɛ akɛ: Wɔhe eje mli! Koni nyɛyafee nihii nii nɛɛ fɛɛ ekoŋŋ lo?” (Yeremia 7:4, 8-10) Yesu wie eshi nɛkɛ tsuji ŋta osatofeemɔ ni yaa nɔ yɛ woloŋmalɔi lɛ kɛ Farisifoi lɛ ateŋ lɛ akɛ: “Osatofoi! Gbɛnaa pɛ Yesaia gba yɛ nyɛhewɔ akɛ: ‘Maŋ nɛɛ kɛ amɛnaabu woɔ mi; shi amɛtsui etsi ehe kɛjɛ mihe kɛtee shɔŋŋ.’”—Mateo 15:7, 8.
10, 11. Nɛgbɛ Yehowa kɛ Kristo Yesu kwɛɔ yɛ be mli ni amɛkojoɔ mɔ ko lɛ, ni mɛni hewɔ?
10 Anaa nɔ ni Yehowa kɛɛ Samuel nɛɛ yɛ faŋŋ mli yɛ nɛkɛ wiemɔi nɛɛ ahewɔ: “Yehowa kwɛɛɛ nii tamɔ gbɔmɔ; ejaakɛ gbɔmɔ lɛ ekwɛɔ kponɔgbɛ nii, shi Yehowa lɛ tsuii ekwɛɔ!” (1 Samuel 16:7) No hewɔ lɛ, kɛ́ Yehowa ŋmɛ gbɔmɔ ko hegbɛ lɛ, efeee enɛ yɛ hiɛaŋhiɛaŋ odaseyeli ko hewɔ; epɛiɔ mli aahu kɛboteɔ sane lɛ tsuiŋ tɔɔ. Kristo Yesu yɔse tsui lɛ akɛ hewalɛ ni kanyaa wɔjeŋba, kɛ ehi jio, ehiii jio: “Gbɔmɔ kpakpa jieɔ nɔ kpakpa kɛjɛɔ etsui mli jwetri kpakpa lɛŋ, ni gbɔmɔ fɔŋ hu jieɔ nɔ fɔŋ kɛjɛɔ etsui mli jwetri fɔŋ lɛ mli, ejaakɛ nɔ ni eyi tsui eteke nɔ lɛ, no naabu wieɔ.” Agbɛnɛ hu, “tsui mli susumɔi fɔji, gbɔmɔgbee, gbalafitemɔi, ajwamaŋbɔi, jui, amale odaseyeli kɛ musubɔi jɛɔ.”—Luka 6:45; Mateo 15:19.
11 Kristo Yesu, ni akɛ kojomɔ ewo edɛŋ lɛ hu kwɛɔ he ni Yehowa kwɛɔ lɛ: “Miji mɔ ni taoɔ sabai [“henumɔi ni kwɔ fe fɛɛ,” Ref. Bi., shishigbɛ niŋmaa] kɛ tsuii amli, ni maha nyɛteŋ mɔ fɛɛ mɔ bɔ ni nyɛnitsumɔi lɛ yɔɔ lɛ.” (Kpojiemɔ 2:23) Yɛ enɛ hewɔ lɛ, “ohiɛ aka otsui he fe nii fɛɛ; ejaakɛ no mli wala jɛɔ.”—Abɛi 4:23.
12. Mɛni hewɔ tsui ni eye emuu ni wɔkɛaawo Yehowa sɔɔmɔ mli lɛ biɔ mɔdɛŋbɔɔ diɛŋtsɛ yɛ wɔgbɛfaŋ?
12 Esaaa akɛ jamɔ ni wɔkɛhaa Yehowa lɛ feɔ jwɛŋmɔ enyɔnyɔ loo tsui ŋta shi moŋ esa akɛ efee tsui ni eye emuu. Enɛ biɔ hiɛmiamɔ kɛ mɔdɛŋbɔɔ yɛ wɔgbɛfaŋ. Mɛni hewɔ? Ejaakɛ tsui lɛ kutumpɔfo ni, ni ebaanyɛ eshishiu mɔ. Gbɛ ni etsɔɔ nɔ ekɛ hesaa fiɔ efɔŋ ni gbalaa wɔheloo ni efee esha lɛ sɛɛ lɛ yɛ gbeyei. Yɛ be mli ni ebaanyɛ eshishi wɔ ni ekɛ wɔyiŋtoo diɛŋtsɛ atee wɔ Iɛ, Yehowa naa nɔ ni eji. Ehɛleɔ wɔ shi yɛ enɛ he akɛ: “Tsui yɔɔ nɛɛ, eyi tɔ kɛ kutumpɔo fe ni fɛɛ, ni esane ehiii kwraa; namɔ aaanyɛ ale? Mi, Yehowa, mitaoɔ tsuiŋ, mikaa sabai mikwɛɔ, koni maha mɔ fɛɛ mɔ egbɛi kɛ nifeemɔ nii ayibii lɛ anaa!”—Yeremia 17:9, 10.
Tsui Ni Eye Emuu Ni Wɔɔna
13. Mɛni Yesu wie yɛ Nyɔŋmɔi ajalɔi komɛi ahe yɛ egbii lɛ amli, ni yɛ nɛkɛ subaŋ nɛɛ hewɔ Iɛ, mɛni ba amɛnɔ?
13 Yesu wie Nyɔŋmɔ jalɔi ni yɔɔ egbii Iɛ amli lɛ ahe akɛ: “Nɛkɛ maŋ nɛɛ tsui ekpilim, ni amɛtoii ewa, ni amɛmiamia amɛhiŋmɛi: koni amɛkana kɛ amɛhiŋmɛii, ni amɛkanu kɛ amɛtoii, ni amɛtsui hu akane shishi, ni amɛkpalE ni mitsa amɛ.” (Mateo 13:15) Yɛ jamɔ mli jwɛŋmɔ fɔŋ ni amɛhiɛ hewɔ Iɛ, amɛtsimɔ amɛhiŋmɛii kɛ amɛtoii ni amɛwaje amɛtsuii yɛ Yesu tsɔɔmɔi lɛ ahe. Akɛni amɛkpoo odaseyeli lɛ hewɔ lɛ, amɛnaaa tsui kpakpa ni kanyaa mɔ: “Mɔ ni boɔ kamɔ toi lɛ, enaa jwɛŋmɔ [“enaa yiŋtoo kpakpa,” Ref. Bi., shishigbɛ niŋmaa].” (Abɛi 15:32) Amɛkɛɔ akɛ amɛmiija Nyɔŋmɔ, shi amɛfeɔ ‘amɛjalɛ’ yɛ gbɔmɛi ahiɛ koni gbɔmɛi ana amɛ.—Mat. 6:1, 2, 5, 16.
14. Mɛɛ nɔkwɛmɔ nii tsɔɔ nɔ ni anɔkwale tsɔɔ eboteɔ wɔmli ni ebahiɔ wɔmli tɔŋŋ diɛŋtsɛ?
14 Kwɛ bɔ ni ehi jogbaŋŋ moŋ akɛ mɔ aaafee tamɔ Maŋtsɛ Yehoshafat ni jɛ Yuda lɛ, mɔ ni ‘saa etsui koni etao anɔkwale Nyɔŋmɔ lɛ sɛɛgbɛ’ lɛ. (2 Kronika 19:3) Hesaamɔ ni hi fe fɛɛ yɛ be mli ni otaoɔ Nyɔŋmɔ lɛ ji sɔlemɔ ni jɛ tsuiŋ tɔɔ. Be mli ni ehao lɛ, Hana jɛ etsuiŋ tɔɔ esɔle eha Yehowa, ‘ewieɔ yɛ etsui mli,’ ni abo esɔlemɔ toi. Agbɛnɛ hu nɔ ni he hiaa ji suɔmɔ ni ayɔɔ akɛ aaabo sane toi. Yesu nyɛ lɛ bo toi: “Ni enyɛ lɛ ŋɔ nɛkɛ wiemɔi nɛɛ fɛɛ eto etsui mli.” Ni “esusuɔ he yɛ etsui mli,” ni ebatsɔ Yesu sɛɛnyiɛlɔ anɔkwafo. Yehowa yeɔ buaa mɔ ni taoɔ nii yɛ anɔkwayeli mli lɛ. Nyɔŋmɔ gbeyeishelɔ Lidia bo Paulo toi, “ni Nuŋtsɔ [Yehowa] gbele etsui naa, akɛ ebo nii ni Paulo wieɔ lɛ toi.” Abaptisi lɛ. (1 Samuel 1:12, 13; Luka 2:19, 51, Bɔfoi lɛ Asaji 16:14, 15) Eji okadi tsui lɛ, yɛ be fɛɛ mli lɛ—henumɔi lɛ, kanyamɔi lɛ, yiŋtoo kpakpa lɛ—ji nɔ ni haa anɔkwale lɛ boteɔ mli ni ebabiɔ mɔ lɛ mli.
15. Bɔni afee ni wɔna tsui ni eye emuu Iɛ, mɛni esa akɛ wɔsaa wɔhe akɛ wɔɔfee?
15 Bɔni afee ni wɔna tsui ni eye emuu lɛ, esa akɛ wɔfee klalo yɛ henumɔŋ akɛ wɔkɛ tsutsu jwɛŋmɔi ni wɔhiɛ lɛ fɛɛ baama afa, ni wɔsumɔ akɛ wɔɔha ana Nyɔŋmɔ akɛ anɔkwafo kɛji eeefite wɔsusumɔi loo tsɔɔmɔi ni wɔsumɔɔ lɛ ekomɛi po. (Romabii 3:4) Esa akɛ wɔjie pɛsɛmkunya yiŋtoi lɛ kɛya ni wɔba wɔtsui akpɛlɛ Yehowa suɔmɔnaa nii kɛ egbɛi anɔ. Be ko lɛ Yehowa ŋma emlai yɛ tɛtao nɔ, shi yɛ sɛɛ mli lɛ, eŋma yɛ adesa heloo tsuii anɔ. Ni bo hu obaanyɛ “oŋma [duromɔ kɛ anɔkwayeli] yɛ otsui tao lɛ nɔ.”—Abɛi 3:3; Hebribii 10:16; 2 Korintobii 3:3, NW.
16. Mɛɛ sanebimɔi maa nɔ ni esa akɛ mɔ ko afee ni ena tsui ni eye emuu yɛ Yehowa hiɛ lɛ nɔ mi?
16 Ani otsui ji nɔ ko ni sa ni abaanyɛ aŋmala Yehowa shishitoo mlai kɛ ekpɔi yɛ nɔ? Ani obaanyɛ otsumɔ tsutsu yiŋtoi lɛ kɛjɛ mli ni oha gbɛ aka kɛha anɔkwale ni jɛ ŋwɛi lɛ? Ani obaaya nɔ okase nii, koni otsake ojwɛŋmɔ, ojie gbɔmɔ momo lɛ oshɛ ofɔ, ni owo gbɔmɔ hee lɛ ni abɔ yɛ Nyɔŋmɔ subaŋ nɔ lɛ? Ani obaabɔ mɔdɛŋ ni ofee nɔ fɛɛ nɔ ni ooonyɛ ni otsɔ nitsulɔ ni hiɛ gbooo nɔ ko nɔ ko, ni kɛ anɔkwale wiemɔ lɛ tsuɔ nii yɛ gbɛ ni ja nɔ?—Romabii 12:2; Kolosebii 3:9, 10; 2 Timoteo 2:15.
Tsui Ni Eye Emuu Lɛ Mli Ni Wɔɔhiɛ
17. David wo ebi Salomo ŋaa yɛ mɛɛ gbɛ nɔ, ni mɛni hewɔ Salomo enyiɛɛɛ nɛkɛ ŋaawoo nɛɛ sɛɛ lɛ?
17 David kɛɛ Salomo akɛ: “Ni bo, mibi Salomo, le otsɛ Nyɔŋmɔ lɛ, ni osɔmɔ lɛ kɛ otsui muu lɛ fɛɛ kɛ osusuma suɔmɔnaa! Ejaakɛ Yehowa taoɔ tsuii fɛɛ amli, ni ele yitseiaŋ jwɛŋmɔi fɛɛ.” Salomo je shishi ekɛ tsui ni eye emuu sɔmɔ Yehowa, shi yɛ be mli ni afii lɛ hoɔ lɛ, ehiɛɛɛ enɛ mli: “Ni eba mli akɛ, be ni Salomo gbɔ lɛ, eŋamɛi lɛ dɔ etsui kɛyanyiɛ nyɔŋmɔi krokomɛi asɛɛ; ni etsui yeee emuu yɛ Yehowa, e-Nyɔŋmɔ lɛ hiɛ, tamɔ etsɛ David tsui.”—1 Kronika 28:9; 1 Maŋtsɛmɛi 11:4.
18, 19. (a) Mɛɛ gbɛi sɔrɔtoi anɔ Satan baatsɔ koni ekaha ohiɛ tsui ni yeɔ emuu mli? (b) Kɛ nɛkɛ mɔdɛŋbɔi ni Satan kɛbaa nigii nɛɛ yeee omanye lɛ, ebaatsake enifeemɔi lɛ amli yɛ mɛɛ gbɛ nɔ?
18 Ani obaanyɛ oye omanye yɛ he ni Salomo nyɛɛɛ afee nakai yɛ lɛ? Yɛ be mli ni ojɔɔ ohe nɔ akɛ Yehowa odasefonyo, ni okɛ jwɛŋmɔi enyɔnyɔ kɛ tsui ŋta yɛ ejamɔ mli lɛ fɛɛ efɔ shi ni oyeɔ Yesu wiemɔi akɛ: “Suɔmɔ Yehowa o-Nyɔŋmɔ lɛ kɛ otsui muu lɛ fɛɛ” nɔ lɛ, ani agbɛnɛ obaatswa ofai shi akɛ obaaha otsui aye emuu ni otuu ohe oha Yehowa sɔɔmɔ? (Mateo 22:37) Satan basumɔŋ, ni eji henyɛlɔ ni feɔ enii yɛ ŋaa mli. Otsui baafee nɔ ni ebaatutua. Ele bɔ ni edɔɔ kɛyaa esha he lɛ ni ebaanyɛ egbu gbɛ kɛbote mli kɛ ehaaa ohiɛ ahi ohe nɔ. Ani ‘ekɛwooo Yuda Iskariot tsui mli akɛ etsɔɔ Yesu sɛɛgbɛ?’ (Yohane 13:2) Shika, heloo gbɛfaŋ nibii, hiɛtserɛjiemɔ, henɔwomɔ, je lɛŋ nitsumɔ kɛ nikasemɔ, mɔ ko nibii ni ena lɛ kpojiemɔ kɛ tsɔɔmɔ, helooŋ akɔnɔi—ele hei ni wɔtɔɔ fa yɛ lɛ ni ekɛ egaimlibii ni tsoɔ lɛ tsurɔɔ enɛ mli. Ani okɛ hemɔkɛyeli tsɛŋ lɛ baagbe enɛɛmɛi fɛɛ lo?—Efesobii 6:16; 1 Yohane 2:15-17.
19 Ni kɛji akɛ nɛkɛ Satan ŋaatsɔi nɛɛ fɛɛ yee omanye lɛ eŋmɛɛɛ he lolo. Etsɔɔ tamɔ jata ni huɔ ni eetao ni emi Yehowa Odasefoi anɔkwafoi kɛtsɔ gbɔmɛi asafoi ni feɔ basabasa, yii, tsuŋwoi kɛ gbele po nɔ. Shi Yehowa baawaje mɛi fɛɛ ni amɛtsui eye emuu yɛ ehe lɛ kɛtsɔ enɛɛmɛi fɛɛ mli.—Yakobo 4:7; 1 Petro 5:8-10; Kpojiemɔ 2:10.
20, 21. (a) Mɛɛ saji abaanyɛ abi yɛ be mli ni apɛiɔ wɔheloo tsui lɛ mli lɛ? (b) Abaanyɛ akɛ sanebimɔi ni tamɔ nakai nɔŋŋ apɛi okadi tsui lɛ mli yɛ mɛɛ gbɛ nɔ?
20 Esa ekɛ aka heloo tsui lɛ akwɛ yɛ be kɛ bei amli. Ani enine shɛɔ lá kpakpa nɔ bɔ ni fa yɛ be ni sa mli? Ani bɔ ni etswaa lɛ yaa nɔ pɛpɛɛpɛ ni emli wa aloo eba shi ni egbɔjɔ? Ani lá falɛ ni yɔɔ mli lɛ sai? Ani enaa gbɔmɔtsoŋ gbɔlemɔ ni he hiaa lɛ? (Bɔni afee ni ohi gbɔmɔtsoŋ hewalɛ kpakpa mli lɛ, ehe miihia ni tsui lɛ ashi lá lɛ waa yɛ be kakadaŋŋ mli.) Ani nɔ ni haa eshiɔ pɛpɛɛpɛ lɛ tsakeɔ eshimɔ lɛ mli bɔni afee ni ekpee tsakemɔi ni he hiaa lɛ anaa? Ani ebajeɔ henumɔŋ shihilɛi komɛi ni haa nɔnyɛɛ ni tsii baa enɔ lɛ shishi?
21 Kɛji akɛ eebi ni akwɛ heloo tsui lɛ yɛ be fɛɛ mli lɛ, enyiɛ nɔŋŋ ni okadi tsui lɛ faaa babaoo moŋ nakai! Yehowa ji mɔ ni kwɛɔ mli; nakai esa akɛ wɔ hu wɔfee. Ani enaa mumɔŋ niyenii bɔ ni sa daa kɛtsɔɔ teemɔŋ nikasemɔ kɛ asafoŋ kpeei anɔ? (Lala 1:1, 2; Abɛi 15:28; Hebribii 10:24, 25) Ani ehenumɔi kɛ kanyamɔi ni mli kwɔlɔ lɛ tsirɛɔ wɔ kɛyaa sɔɔmɔ nitsumɔ ni akɛ ekãa tsuɔ lɛ he—ni yɛ bei komɛi amli lɛ, ehaa wɔkanyaa wɔhe waa po ni wɔkɛ wɔhe woɔ gbɛgbalɔi awamɔ sɔɔmɔ mli? (Yeremia 20:9; Luka 13:24; 1 Korintobii 9:16) Ni nibii ni ebɔle ehe kɛkpe lɛ hu? Ani nɔ ni ebɔle ehe ji tsui ni efee ekome ni eye emuu kɛ henumɔi kɛ kanyamɔi ni tamɔ nakai?—2 Maŋtsɛmɛi 10:15, 16; Lala 86:11; Abɛi 13:20; 1 Korintobii 15:33.
22. Mɛni baaha wɔye omanye yɛ wɔfaishitswaa akɛ wɔkɛ tsui ni eye emuu aasɔmɔ Yehowa Iɛ mli?
22 Kɛji akɛ otsui mlitaomɔ lɛ ha onyɛ oha sanebimɔi nɛɛ ahetoo akɛ hɛɛ lɛ belɛ oobaa okadi tsui ni ohiɛ lɛ yi. Bo kɛ Odasefoi anɔkwafoi akpekpei krokomɛi lɛ baaye omanye yɛ nyɛfaishitswaa akɛ nyɛaasɔmɔ Yehowa kɛ tsui ni eye emuu lɛ mli. Mɛnɛɛmɛi fɛɛ hiɛ nɛkɛ nɔmimaa nɛɛ nɔŋŋ: “Ni Nyɔŋmɔ hejɔlɛ ni fe jwɛŋmɔi fɛɛ lɛ aaato nyɛtsuii kɛ nyɛjwɛŋmɔi lɛ yɛ Kristo Yesu mli!”b—Filipibii 4:7.
[Shishigbɛ niŋmai]
a Shitoo kome = 1.6 kilometers.
Galɔn kome = 3.8 liters.
b Ajie kɛjɛ June 1, 1986 Watchtower lɛ mli.
Ani Okaiɔ?
Mɛni ji sui sɔrɔtoi babaoo ni anaa yɛ okadi tsui Iɛ he lɛ?
◻ Te wɔɔfee tɛŋŋ wɔkwa jwɛŋmɔ enyɔnyɔ loo tsui ŋtatsɛmɛi ni ◻ wɔɔtsɔmɔ?
◻ Mɛni hewɔ Yehowa kɛ Kristo Yesu kwɛɔ tsui lɛ yɛ be mli ni amɛkojoɔ lɛ?
Te wɔɔfee tɛŋŋ wɔna ni wɔhiɛ tsui ni eye emuu mli?
[Mfoniri ni yɔɔ baafa 17]
Ani oyɛ hiɛi enyɔ?
[Mfonirii ni yɔɔ baafa 18]
Lidia
Yehoshafat
Hana
Maria