Toiŋjɔlɛ Ni Jɛ Nyɔŋmɔ Ŋɔɔ Mɛɛ Be?
“Etsɛŋ ni toiŋjɔlɛ Nyɔŋmɔ lɛ aaanaanaa Satan nɔ kwraa yɛ nyɛnaji ashishi.”—ROMABII 16:20.
1, 2. (a) Mɛni ji nɔ ni Hindu nilelɔ ko wie yɛ ta kɛ toiŋjɔlɛ he? (b) Namɛi yɔɔ miishɛɛ ni amɛnaa toiŋjɔlɛ ni jɛ Nyɔŋmɔ nɔɔ lɛ mli ŋɔɔmɔ lɛ?
“KƐJI AKƐ tawuu nii afeemɔ he foidamɔ yɛ sɛkɛyeli mli lɛ aaaya nɔ lɛ, nɔ ni baajɛ mli aba ji gbɔmɛi ahiɛkpatamɔ ni eko bako nakai da yɛ yinɔsane mli. Kɛ mɔ ko shwã ni lɛ ji kunimyelɔ lɛ, ekunimyeli lɛ baatsɔ gbele wala aha maŋ ni yeɔ kunim lɛ.” Mohandas Gandhi ji mɔ ni gba gbalɛ nɛɛ efɔ shi yɛ 1988, ni enɛ tekeɔ ebe lɛ kwraa.
2 Dani eeewie enɛ lɛ, no mli lɛ Gandhi ekɛɛ Ŋleshi amralo ko yɛ 1981 akɛ: “Beni omaŋ kɛ mimaŋ aaafee ekome yɛ tsɔɔmɔi ni Kristo kɛfɔ shi yɛ e-Gɔŋ nɔ Shiɛmɔ lɛ mli lɛ naa lɛ, no mli wɔbaana tsabaa, ni jeee kɛha wɔmaji lɛ pɛ, shi kɛha je muu lɛ fɛɛ.” Taakɛ Hindu nilelɔ nɛɛ tsɔɔ lɛ, Yesu shiɛmɔ lɛ tsɔɔ gbɛ ni kɛ mɔ yaa naanɔ toiŋjɔlɛ mli, Kristo kɛɛ yɛ nakai shiɛmɔ lɛ mli akɛ: “Miishɛɛ ji mɛi ni sumɔɔ toiŋjɔlɛ, ejaakɛ aaatsɛ amɛ “Nyɔŋmɔ bii.” (Mateo 5:9, NW) “Bii” pii miiná Nyɔŋmɔ toiŋjɔlɛ mli ŋɔɔmɔ bianɛ. Yɛ be ni sa mli lɛ, shikpɔŋ lɛ nɔ heshibalɔi fɛɛ “amii aaashɛ amɛhe yɛ toiŋjɔlɛ babaoo mli.” (Lala 37:11) Shi ani wɔbaanyɛ wɔna hekɛnɔfɔɔ yɛ nɔ ni baajɛ mli aba nɛɛ mli?
3. Mɛni hewɔ toiŋjɔlɛ diɛŋtsɛ bɛ shikpɔŋ nɔ ŋmɛnɛ lɛ?
3 Ŋmɛnɛ, je lɛ hiɛkpatamɔ he gbeyeishemɔ tsotsoro adesai ayiteŋ. Nikasemɔ ko ni afee nyɛsɛɛ nɛɛ jaje akɛ: “buulufeemɔ ko ni fe fɛɛ ji Amerika shika dɔlai 3-4,000,000,000,000 (akpekpei toi akpekpei 3-4) ni afite kɛjɛ Jeŋ Ta II koni akɛbua nuklea tawuu nii anaa ashwie shi, nii ni kɛ akɛtsu nii lɛ, eeegbe mɔ fɛɛ mɔ yɛ je lɛ mli lɛ. . . . Nuklea tawuu nii ni abua naa nɛɛ fa ni etsii aahuu akɛ eeenyɛ egbe gbɔmɛi akpekpei toi akpekpei 58 loo eeenyɛ egbe gbɔmɔ fɛɛ gbɔmɔ ni yɔɔ wala mli lɛ shii 12.”a Ni kɛlɛ, sɛkɛyeli foidamɔ nɛɛ etee nɔ ni emli ewa. Atsɛɔ lɛ MAD (sɛkɛyeli) lɛlɛŋ, ejaakɛ eshishi yɛ blɔfo mli ji Mutually Assured Destruction (hiɛkpatamɔ nɔkpɛlɛmɔ) ni enɛ ji nɔ ni jeŋ hewalɔi lɛ kɛ nɔ ni amɛkɛɛ atsɛɔ lɛ toiŋjɔlɛ lɛ etsotsoro nɔ. Eka shi faŋŋ akɛ enɛ jeee toiŋjɔlɛ ni jɛ Nyɔŋmɔ ŋɔɔ.
4. (a) Mɛni ji nɔ ni anaa yɛ je lɛŋ bianɛ? (b) Ní kɛlɛ mɛɛ hiɛnɔkamɔ ni ma shi Shiŋŋ Yehowa Jálɔi yɔɔ?
4 Nɔ ni anaa yɛ je lɛŋ ŋmɛnɛ lɛ yɛ mɔbɔ ni ehiii kwraa yɛ gbɛ fɛɛ gbɛ nɔ. Be ko bako ni adesa weku lɛ ena nɔ babaoo yɛ maŋkwramɔŋ fitemɔ mli, awuyeli mli babaoo, shika helɛtemɔ he naagbai amli babaoo, aloo gbeyeishemɔ ni abɛ kɛha Nyɔŋmɔ kɛ ejamɔ mli yiŋfutumɔ babaoo tamɔ bɔ ni eyɔɔ yɛ ŋmɛnɛŋmɛnɛ be nɛɛ amli lɛ. Efeko anɔkwale kɛhako adesai akɛ “bɔɔ nii lɛ fɛɛ . . . . dɔmɔɔ ŋtsɔi ni . . . amɛkɔmɔɔ” taakɛ eji yɛ ŋmɛnɛ lɛ. Ni kɛlɛ Nyɔŋmɔ woɔ shi akɛ ebɔɔ nii ni ji adesai lɛ “baaye amɛhe kɛjɛ fitemɔ nyɔŋyeli lɛ mli kɛya Nyɔŋmɔ bii anunyam heyeli mli.” (Romabii 8:21, 22) Amaa nɔ mi ahaa mɛi ni sumɔɔ toiŋjɔlɛ ni amɛjaa anɔkwale Nyɔŋmɔ lɛ, ni ji Nuŋtsɔ Maŋtsɛ Yehowa lɛ akɛ amɛbaabote nakai heyeli lɛ mli. Ebaafee heyeli ni akɛma shi shiŋŋ yɛ anɔkwale toiŋjɔlɛ mli, naanɔ toiŋjɔlɛ mli. (Ezekiel 37:26-28) Shi mɛɛ be ni mɛɛ gbɛ nɔ nakai toiŋjɔlɛ lɛ baatsɔ aba?
Nyɔŋmɔ Jwɛŋmɔ yɛ Bei kɛ Yinɔi Lɛ Ahe
5. Mɛɛ sanebimɔ teɔ shi yɛ 1 Tesalonikabii 5:1 he?
5 Bɔfo Paulo eshɛje Kristofoi ni yɔɔ Tesalonika lɛ amii kɛtsɔ tsɔɔmɔ ni etsɔɔ bɔ ni gbohiiashitee lɛ kɔɔ “Nuŋtsɔ lɛ baa” [ebaa be] lɛ he lɛ mli lɛ nɔ. Kɛkɛ ni ekɛɛ kɛnyiɛ sɛɛ akɛ: “Shi yɛ be lɛ kɛ yinɔi Iɛ ahewɔ lɛ, anyɛmimɛi ehiaaa nyɛ akɛ aŋma nyɛ.”—1 Tesalonikabii 4:15; 5:1.
6. Te Wɔfeɔ tɛŋŋ wɔleɔ akɛ ‘bei kɛ yinɔi’ he hiaa Nyɔŋmɔ?
6 Ani bɔfo lɛ wiemɔi miitsɔɔ akɛ ‘be kɛ yinɔi’ ahe ehiaaa Nyɔŋmɔ? Jeee nakai kwraa etsɔɔ! (Jajelɔ 3:1) Ejaakɛ “beni be falɛ lɛ shɛ lɛ,” yɛ otsii 69 ni ji afii lɛ naagbee lɛ, “Nyɔŋmɔ tsu lɛ diɛŋtsɛ e-Bi lɛ kɛba.” Ní Yesu sɔɔmɔ nitsumɔ lɛ ye afii etɛ kɛ fa—kɛjɛ afi 29 Ŋ.B. kɛyashi 33 Ŋ.B.—taakɛ agba afɔ shi lɛ pɛpɛɛpɛ. (Galatabii 4:4; Daniel 9:24, 27) Yɛ “jeŋmaji abe ni ato” lɛ naagbee pɛpɛɛpɛ yɛ 1914 awo Yesu Maŋtsɛ yɛ “ŋwɛi Yerusalem.” (Luka 21:24; Hebribii 12:22; Ezekiel 21:27; Daniel 4:31, 32) “Amanehulu kpeteŋkpele” lɛ baaba yɛ “gbi kɛ ŋmɛlɛtswaa” ni Yehowa efa lɛ mli. “Ekpeŋ sɛɛ.”—Mateo 24:21, 36; Habakuk 2:3.
7. Mɛni hewɔ ehe ehiaaa ni Paulo eŋma Tesalonikabii lɛ yɛ ‘bei kɛ yinɔi’ ahe lɛ?
7 Shi ehe ehiaaa ni Paulo aŋma “bei kɛ yinɔi” lɛ ahe sane lɛ biɛ. Nakai Tesalonika Kristofoi lɛ le akɛ no ji ‘yinɔ’ ni Yudafoi anibii agbɛjianɔtoo lɛ naagbee baaba, ebaaba naagbee kwraa yɛ afii 20 sɛɛ, yɛ afi 70 Ŋ.B. lɛ mli. Amɛ ekaa kɛ “mumɔ krɔŋkrɔŋ mli miishɛɛ” lɛ kpɛ́ akɛ nɔkwɛmɔ nɔ ko ni ekaaa. (1 Tesalonikabii 1:4-7) Nakai nɔŋŋ hu Yehowa Odasefoi ni yɔɔ ŋmɛnɛ lɛ le jogbaŋŋ akɛ jeŋ tai kɛ haomɔi krokomɛi ni eba kɛjɛ 1914 lɛ ji ba ni Yesu eba yɛ Maŋtsɛyeli hewalɛ kɛ anunyam mli ni anaaa lɛ lɛ he “okadi lɛ.”—Mateo 24:3-8; 25:31.
8. Mɛni hewɔ esa akɛ wɔha wɔhiɛ atsɛ̃ ni wɔfee ekãa yɛ nitsumɔ mli lɛ?
8 Nɔ ni nyiɛ sɛɛ lɛ, bɔfo lɛ ma nɔ mi eha enanemɛi Kristofoi lɛ akɛ: “Ejaakɛ nyɛ diɛŋtsɛ nyɛle krɛdɛɛ akɛ Nuŋtsɔ lɛ gbi lɛ baaba tamɔ julɔ baa nyɔɔŋ mli.” (1 Tesalonikabii 5:2) Eyɛ mli akɛ wɔleee be lɛ pɔtɛɛ moŋ, shi nakai gbi kɛha fɔbuu kojomɔ lɛ miibɛŋkɛ yɛ be fɛɛ mli. Ebaafɛ trukaa, yɛ ŋmɛlɛtswaa ni Nyɔŋmɔ to lɛ mli. No hewɔ lɛ, esa akɛ wɔhiɛ atsɛ ni wɔfee ekaa kɛ nitsumɔ.—Luka 21:34-36.
Naagbee Bolɔmɔ Kɛha Toiŋjɔlɛ
9. (a) Mɛɛ bolɔmɔ teɔ shi, ni mɛni hewɔ anɔkwale Kristofoi kɛ amɛhe wooo mli lɛ? (b) Ŋamɛi jajeɔ sane ni tamɔ nɛkɛ, ni amɛtamɔ Yeremia gbii lɛ amli nɔyelɔi lɛ yɛ mɛɛ gbɛ nɔ?
9 “Toiŋjɔlɛ yɛ ni wɔyɛ shweshweeshwe!” Paulo miihɛle wɔ shi yɛ sane ko ni ebaajaje ni abaanu yɛ “ba ni” Kristo “eba” yɛ naagbee be mli lɛ he. (1 Tesalonikabii 5.3) Ani etsɛŋ ni wɔbaanu nakai bolɔmɔ lɛ? Nɛgbɛ bolɔmɔ kɛha jeŋ toiŋjɔlɛ kɛ shweshweeshwe shihilɛ nɛɛ baajɛ aba? Eka shi faŋŋ akɛ jeee kɛmiijɛ Kristo sɛɛnyiɛlɔi ateŋ, ejaakɛ ejaje akɛ amɛ loo e-Maŋtsɛyeli lɛ “jɛɛɛ je lɛŋ.” (Yohane 15: 19; 17:14, 16; 18:36) No hewɔ lɛ, mɛi ni jajeɔ sane ni tamɔ nɛkɛ lɛ baafee je lɛŋ bii nii teɔ shi woɔ Nyɔŋmɔ Maŋtsɛyeli ni baa lɛ. Amɛ ji je ‘ni ka mɔ fɔŋ’ Satan Abonsam ‘hewalɛ mli’ lɛ fa. (1 Yohane 5:19) Taakɛ maŋkwramɔŋ kɛ jamɔŋ hiɛnyiɛlɔi ni hi shi yɛ Yeremia gbii amli lɛ ji lɛ, amɛbaawie “amɛtsuiaŋ ninaa” he akɛ: “Nyɛaana toiŋjɔlɛ,” ni amɛwieɔ yɛ gbɛ ni ejaaa nɔ akɛ toiŋjɔlɛ ni tamɔ nɛkɛ jɛ Nyɔŋmɔ ŋɔɔ. Kwɛ bɔ ni nɔ ni amɛkɛɔ nɛɛ baatsɔ apasa nɔ kwraa!—Yeremia 23:16, 17, 19, 20.
10. Mɛni nibii ji nɔ ni etee nɔ etsara nɔ eba kɛbashi shihilɛ ni je lɛ yɔɔ mli ŋmɛnɛ lɛ nɔ lɛ?
10 Saji komɛi tsaraa nɔ kɛbaa dani naagbee lɛ anuɔ bolɔmɔ akɛ Toiŋjɔlɛ yɛ ni wɔyɛ shweshweeshwe” lɛ he. Afi 1920 mli ni ato Jeŋmaji Akpaŋmɔ lɛ ama shi yɛ Ta kpeteŋkpele, ni amrɔ nɛɛ ale akɛ Jeŋ Ta I lɛ sɛɛ. Kpaŋmɔ nɛɛ yiŋtoo ji ni egu ta kwraa yɛ shikpɔŋ nɔ kɛya naanɔ. Shi Jeŋ Ta II tsi Kpaŋmɔ lɛ yisɛɛ ewo bu kwɔŋkwɔŋ ko mli. October 24, 1945 lɛ, awó gbɛjianɔtoo nɛɛ ama shi ekoŋŋ, kɛjɛ elamlu lɛ mli ni aha lɛ gbɛi hee, Jeŋmaji Ekomefeemɔ. (Okɛto Kpojiemɔ 17:8 he.) Eyiŋtoo titri kwraa ji ni “ebaa jeŋ toiŋjɔlɛ kɛ shweshweeshwe shihilɛ yi.” Mɛi ni to shishi lɛ tswa amɛfai shi akɛ “amɛbaahere yinɔi ni baaba lɛ kɛjɛ tawuu mli naagbai amli.” Ani Jeŋmaji Ekomefeemɔ lɛ eye omanye ni eha toiŋjɔlɛ kɛ shweshweeshwe shihilɛ he shiwoo nɛɛ eba mli?
11. Haomɔ ni ka je lɛ nɔ lɛ ji hiɛdɔɔ sane diɛŋtsɛ yɛ mɛɛ gbɛ nɔ?
11 Yɛ yiŋtoo kpakpa ni mɛi ni to Jeŋmaji Ekomefeemɔ lɛ shishi lɛ hiɛ lɛ fɛɛ sɛɛ lɛ, nakai gbɛjianɔtoo lɛ nyɛɛɛ aha eyiŋtoo ni ákɛwo mla shishi lɛ aba mli taakɛ Kpaŋmɔ lɛ hu nyɛɛɛ afee lɛ. Amrɔ nɛɛ je lɛ ta nuklea tawuu nii anɔ tamɔ tutsofa. Oshara ni ba yɛ Chernobyl, yɛ Russia, yɛ April 1986 mli lɛ kɛ atɔmik lamlu ni gbɛ shwa Europa fɛɛ lɛ tsɔɔ akɛ kɛ́ akɛ atɔmik hewalɛ miitsu toiŋjɔlɛ he nibii po lɛ, ehewalɛ ni baanyɛ afite nii lɛ yɛ gbeyei naakpa. Maji komɛi ni yɔɔ South Pacific lɛ miibɔ mɔdɛŋ ni amɛha he ni amɛyɔɔ lɛ afee he ni nuklea hewalɛ ko bɛ jɛmɛ kwraa. Shi kɛji akɛ nuklea ta diɛŋtsɛ aaafɛ lɛ, mɔ ko mɔ ko yi naŋ wala yɛ he ko he ko.
Ani “Toiŋjɔlɛ Kɛ Shweshweeshwe Shihilɛ” Baanyɛ Aba?
12. Mɛni ji nɔ ni Jeŋmaji Ekomefeemɔ lɛ jaje kɛha 1986, ni fe jeŋmaji lɛ here nɔ amɛha tɛŋŋ?
12 Akɛni Jeŋmaji Ekomefeemɔ lɛ le naagba ni mli wa waa lɛ hewɔ lɛ, ejaje 1986 akɛ Majimaji Ateŋ Toiŋjɔlɛ Afi. Jeŋmaji lɛ ekomɛi jie miishɛɛ kpo yɛ he, ni mɛi komɛi hu ejieee miishɛɛ kpo yɛ he. Amɛteŋ mɛi pii efi Jeŋmaji Ekomefeemɔ lɛ Toiŋjɔlɛ lɛ sɛɛ yɛ gbɛ kome loo gbɛ kroko nɔ, shi amɛkɛ amɛnine tsɔɔ nuklea tawuu akɛ nɔ ni woɔ toiŋjɔlɛ he gbeyei fe fɛɛ. Dani enɛ aaaba lɛ, tai bibii miiya nɔ lolo ni aawuu enɛ yɛ shikpɔŋ Iɛ nɔ he fɛɛ he, ni kɛ akane lɛ awu tai bibii nɛɛ 150 kɛjɛ be mli ni Jeŋ Ta II ba naagbee ni kɛ abua naa lɛ, mɛi ni egboi yɛ enɛ mli lɛ fe 30,000,000. Ani abaanyɛ akɛɛ akɛ maŋ ko etsɔ hiɛ eto gbɛjianɔ diɛŋtsɛ ni etsu nii bɔni afee ni ekɛ nakai wiemɔi ni ŋɔɔ ni jɛ Yesaia 2:4 ni akala yɛ Jeŋmaji Ekomefeemɔ lɛ gbogbo lɛ hiɛ lɛ akpa gbeei
13. Jamɔ mli hiɛnyiɛlɔi fi enɛ sɛɛ yɛ mɛɛ gbɛ nɔ?
13 Ashiii je lɛŋ jamɔi lɛ yɛ sɛɛ, ni amɛkɛ sɛɛfimɔ ha Jeŋmaji Ekomefeemɔ lɛ Toiŋjɔlɛ Afi lɛ. Paapa John Paul jaje January 1 akɛ Je lɛ Toiŋjɔlɛ Gbi ni ewo maŋhiɛnyiɛlɔi ahewalɛ ni amɛkɛ hiɛnyiɛmɔ ni he baahia ni no baaha ato jeŋ muu fɛɛ toiŋjɔlɛ ama shi lɛ aha. Ebi hu ni je lɛŋ jamɔi lɛ akpe kɛha sɔlemɔ yɛ Asisi, Italia, yɛ Majimaji Ateŋ Toiŋjɔlɛ Afi be lɛ mli. Archbishop of Canterbury, Church of England osɔfonukpa lɛ kɛ Buddha jamɔ mli kui sɔrɔtoi kɛ miishɛɛ kpɛlɛ nɛkɛ ninefɔɔ nɛɛ nɔ. Jeŋ Sɔlemɔ Agwabɔi lɛ kɛ sanejajemɔ ko ha yɛ Majimaji Ateŋ Toiŋjɔlɛ Afi lɛ nɔ, ní eewo hewalɛ akɛ nuklea tawuu nii afeemɔ he kpaŋmɔ aje shishi amrɔ nɔŋŋ.
14. Mɛɛ gbɛ pɛ nɔ toiŋjɔlɛ he gbɛjianɔtoo baatsɔ aye omanye?
14 Shi, mɛni ji “Nyɔŋmɔ ni haa toiŋjɔlɛ” lɛ suɔmɔnaa nii yɛ “toiŋjɔlɛ kɛ shweshweeshwe shihilɛ” ni aaato ama shi nɛɛ mli? Ani Nyɔŋmɔ gbalɛ Wiemɔ tsɔɔ akɛ gbɔmɛi kɛ jeŋmaji ni yeee emuu baanyɛ ni amɛkɛ toiŋjɔlɛ kɛ shweshweeshwe shihilɛ aba je nɛɛ mli? Dabila! Toiŋjɔlɛ ni baaya nɔ’ lɛ damɔ bɔ ni Yehowa baatsu saji ahe nii aha ni ekɛ ejalɛ nifeemɔ akpa gbee kɛha eyijiemɔ lɛ nɔ. Yesaia 55:11; 61:11.
Trukaa Hiɛkpatamɔ Ni Baa Lɛ
15. Mɛɛ adafitswaa ni hɛleɔ mɔ shi Paulo Jaje yɛ no sɛɛ?
15 Bɔfo Paulo kɛɔ wɔ nɔ ni miihe aba lɛ. Ekɛɔ akɛ: “Ejaakɛ be mli ni amɛaakɛɛ akɛ: Toiŋjɔlɛ yɛ ni wɔyɛ shweshweeshwe lɛ, no mli nɔŋŋ hiɛkpatamɔ aaabatua amɛ trukaa, tamɔ kɔɔmɔ tuaa yoo ni musu eda lɛ, ni amɛjeŋ mli kɔkɔɔkɔ.”—1 Tesalonikabii 5:3.
16. Mɛni hewɔ jeŋmaji lɛ agbɛi lɛ jeee Nyɔŋmɔ gbɛ̀i lɛ?
16 Kɛ́ otsɔ hiɛ okane enɛ klɛŋklɛŋ kwraa lɛ, nakai wiemɔ lɛ baaha ŋmiŋmi amɔ bo. Shi Biblia lɛ tsɔɔ saji amli. Jeŋmaji lɛ agbɛ̀i ŋmɛnɛ lɛ jeee Nyɔŋmɔ gbɛi. (Yesaia 55:8, 9) Yiŋtoo hewɔ ni eŋmɛ gbɛ ni adesa nɔyelii sɔrɔtoi aya nɔ lɛji ni ekɛha sane ko ni Onufu ŋaalɔ lɛ, Satan Abonsam, tee lɛ shi afii 6,000 ni eho lɛ hetoo. Beni Satan laka wɔklɛŋklɛŋ fɔlɔi lɛ ni amɛhala heyeli kɛmiijɛ Nyɔŋmɔ he lɛ, ebi akɛ ani Nyɔŋmɔ nɔyeli he miihia adesai po lo?—1 Mose 3:4, 5.
17. Mɛni ji nɔ ni adesa nɔyeli etsu ni aŋmala ashwie shi, ni enɛ yeɔ mɛni he odase?
17 Nyɔŋmɔ eŋmɛ gbɔmɛi agbɛ ni amɛka adesa nɔyeli fɛɛ nɔyeli ni amɛbaasusu he lɛ amɛkwɛ yɛ afii akpei abɔ ni nyiɛ sɛɛ lɛ amli. Kɛji akɛ nɛkɛ nɔyelii nɛɛ hi shi afii fioo loo afii ohai babaoo lɛ, adesa nɔyeli fɛɛ nɔyeli nine enyɛ shi ejaakɛ amɛnyɛɛɛ amɛkɛ anɔkwale toiŋjɔlɛ kɛ shweshweeshwe aba. Tawuu, efɔŋfeemɔ he gbeyeiwoo kɛ gbele etee nɔ efee adesai agboshinii yɛ adesa nɔyeli fɛɛ nɔyeli shishi. “Adesa eye enyɛmi gbɔmɔ nɔ ni ekɛye lɛ awui” yɛ yinɔsane be fɛɛ mli. (Jajelɔ 8:9) Sɔrɔto ko bɛ mli ŋmɛnɛ. Mɔ fɛɛ mɔ ni le sane ni ka shi lɛ baanyɛ akɛɛ agbɛnɛ, taakɛ Nyɔŋmɔ gbalɔ lɛ kɛɛ lɛ: “Yehowa, mile akɛ gbɔmɔ gbɛ bɛ lɛ diɛŋtsɛ edɛ, ni adesa ni nyiɛ nɛɛ, bɔ ni eeetsɔ ejaje enajifamɔi eha lɛ ebɛ edɛŋ.”—Yeremia 10:23.
18. Mɛni hewɔ je maji lɛ abolɔmɔ ni ji “Toiŋjɔlɛ kɛ shweshweeshwe shihilɛ!” lɛ ji yaka bolɔmɔ lɛ?
18 Agbɛnɛ be eshɛ ni abaaha nakai sane lɛ aba naagbee shikome nyɔŋlo. Nyɔŋmɔ nɔyeli pɛ baanyɛ ekɛ anɔkwale toiŋjɔlɛ kɛ shweshweeshwe shihilɛ abaha adesai Shi, jeee Nyɔŋmɔ nɔyeli ni amɛsumɔɔ lɛ hewɔ ni jeŋmaji lɛ bolɔɔ akɛ “Toiŋjɔlɛ yɛ ni wɔyɛ shweshweeshwe!” lɛ. Amɛmiisumɔ ni amɛya nɔ amɛye nɔ yɛ amɛ diɛŋtsɛ amɛhenɔwomɔ nɔyeli he jwɛŋmɔi ni amɛhiɛ lɛ naa. Shi be lɛ fɛɛ eta! Jeŋmaji lɛ nuɔ he akɛ esa akɛ afee nɔ ko ni naa wa. Kɛjeee nakai lɛ, nɔ fɛɛ nɔ baalaaje yɛ nuklea tawuu mli. No hewɔ lɛ, amɛbaafee nɔ ni Yeremia gba kɛfɔ shi lɛ: “Amɛtsaa mimaŋ lɛ biyoo lɛ pilamɔ lɛ hiɛaŋhiɛaŋ, ni amɛkɛɔ akɛ: Omanye, omanye! Shi omanye ko bɛ.” Shi fɛɛ baafee efolo!—Yeremia 6:14; 8:11, 15.
Naagbee Ni Agba Afɔ Shi Lɛ
19. “Yehowa gbi” lɛ baafɛ ashwie shi yɛ mɛɛ gbɛ nɔ?
19 Bɔfo Paulo kɛɛ: “Hiɛkpatamɔ aaabatua amɛ trukaa.” Nyɔŋmɔ gbalɔ Yesaia kɛfataa he akɛ: “Naa, amɛkakalɔi lɛ miibolɔ yɛ blohuiaŋ, toiŋjɔlɛ bɔfoi lɛ miifo naakpa.” (Yesaia 33:7) Biblia lɛ tsɔɔ yɛ hei babaoo akɛ Yehowa fɔbuu kojomɔ yɛ jeŋmaji yiwalɔi lɛ anɔ Iɛ baaba trukaa, ni akpaaa gbɛ—yɛ anɔkwale mli lɛ: “tamɔ julɔ baa nyɔɔŋ.” (1 Tesalonikabii 5:2, 3; Yeremia 25:32, 33; Zefania 1:14-18; 2 Petro 3:10) Kɛ be shɛ ni je lɛ bɔi jajemɔ waa akɛ eshɛ toiŋjɔlɛ kɛ shweshweeshwe he yɛ gbɛ ko nɔ lɛ, “Yehowa gbi” lɛ baafɛ ashwie shi trukaa kɛ gbeyeishemɔ. No mli lɛ, Nyɔŋmɔ webii eyoo nɔ ni nakai bolɔmɔ kɛha “toiŋjɔlɛ kɛ shweshweeshwe shihilɛ!” lɛ ji lɛ momo ni amɛfee mɛi ni yɛ shweeshweeshwe yɛ abobaa he ni Yehowa kɛha lɛ.—Lala 37:39, 40; 46:2, 3; Yoel 4:16.
20. (a) Mɛɛ “kooloo” nɛkɛ Jeŋmaji Ekomefeemɔ lɛ ji? (b) Te Yehowa naa apasa jamɔ ehaa tɛŋŋ, ni mɛni hewɔ?
20 Akɛ Jeŋmaji Akpaŋmɔ lɛ kɛ esɛɛyelɔ lɛ, Jeŋmaji Ekomefeemɔ lɛ nifeemɔ toɔ “kooloo ni tsuɔ tamɔ muneele ko” ni hiɛ yitsei kpawo (ni damɔ shi kɛha jeŋ hewalɛi ni ejɛ emli lɛ) kɛ akolontoi nyɔŋma (ni damɔ shi kɛha nɔyeli hewalɛi ni fiɔ esɛɛ bianɛ) lɛ he yɛ Nyɔŋmɔ Wiemɔ lɛ mli. Biblia lɛ tsɔɔ akɛ eji maŋkwramɔŋ “kooloo,” taakɛ Ŋleshi “jata” lɛ kɛ Russia “oshishibrishi” lɛ yɔɔ lɛ. Yoo ko, “Babilon kpeteŋkpele lɛ, shikpɔŋ lɛ nɔ ajwamaŋi lɛ kɛ nihii nii lɛ anyɛ lɛ,” ta enɔ. (Kpojiemɔ 17:3-8) Nɛkɛ ji bɔ ni Yehowa naa apasa jamɔ ni damɔɔɔ shi kɛhaaa lɛ kɛ ejalɛ Maŋtsɛyeli lɛ. Yoo nɛɛ bɔɔ mumɔŋ ajwamaŋ yɛ maŋkwramɔ ni ekɛ ehe woɔ mli lɛ hewɔ. Nyɔŋmɔjamɔ ni kɛ Jeŋmaji Ekomefeemɔ lɛ efee ekome yɛ toiŋjɔlɛ kɛ shweshweeshwe shihilɛ he tafaa mli lɛ ji enɛ he nɔkwɛmɔ nɔ. Yeɔ nɛɛ baasumɔ hu ni ehe ajɔ lɛ ni eye ehe shweshweeshwe kɛjɛ kojomɔ saji ni Yehowa Odasefoi jajeɔ lɛ he. Yɛ enɛ hewɔ lɛ, etsɔ nɔyelii komɛi ayiŋ koni amɛgu Odasefoi Kristofoi lɛ anitsumɔ lɛ.—Lala 2:1-3.
21. (a) Mɛɛ nifeemɔ kadiɔ “Yehowa gbi” lɛ shishijee? (b) Mɛɛ naagbee nakai “gbi” lɛ boteɔ mli agbɛnɛ?
21 Mɛɛ gbɛ nɔ “Yehowa gbi” lɛ baatsɔ afɛ ashwie shi? Ebaaba lɛlɛŋ “tamɔ julɔ” yɛ adesa yinɔsane be ni mli ewo duŋ tamɔ nyɔɔŋ nɛɛ mli! Ebaafee be mli ni Nyɔŋmɔ baakudɔ jeŋmaji ni yɔɔ Jeŋmaji Ekomefeemɔ kooloo lɛ mli lɛ ni amɛte shi trukaa amɛwɔ apasa jamɔ. Akɛni amɛbaajie nyɛ̃ɛ ni hɔ shi ni amɛyɔɔ kɛha Babilon kpeteŋkpele lɛ kpo hewɔ lɛ, amɛbaakpa ehe mama ni ana lɛ taakɛ eji pɛpɛɛpɛ lɛ, koni amɛkpata ehiɛ. Bɔ ni ehiɛkpatamɔ nɛɛ baafee oya aha lɛ baaha etsutsu maŋkwramɔŋ hemɛi lɛ abolɔ akɛ: “Kpoo, kpoo, maŋ kpeteŋkpele lɛ, Babilon, maŋ ni he wa lɛ! Ejaakɛ ŋmlɛtswaa kome mli ni okojomɔ eba nɛɛ.” Shi jeŋmaji lɛ kɛ amɛ asraafoi lɛ baatutua Nyɔŋmɔ webii lɛ hu. Kɛkɛ lɛ maŋtsɛmɛi amaŋtsɛ Yesu Kristo, baakpata nakai henyɛlɔi lɛ fɛɛ ahiɛ, ni ekɛ ehenyɛlɔ kpeteŋkpele, Satan Abonsam, awo bu kwɔŋkwɔŋ lɛ mli—Kpojiemɔ 17:6, 17; 18:10; 19:11-21; 20:1-3; Okɛto Ezekiel 38:11, 16, 18-23 he.
22. (a) Mɛɛ gbɛkpamɔ ni yɔɔ miishɛɛ adesai ni heɔ yeɔ lɛ yɔɔ ŋmɛnɛ? (b) Te ooofee tɛŋŋ ona toiŋjɔlɛ ni jɛ Nyɔŋmɔ ŋɔɔ lɛ mli ŋɔɔmɔ?
22 Yɛ naagbee lɛ, anɔkwale toiŋjɔlɛ kɛ shweshweeshwe shihilɛ baafrɔke yɛ Nyɔŋmɔ Maŋtsɛyeli lɛ shishi! (Lala 72:1, 7; Yesaia 9:6, 7) Yɛ miishɛɛ mli lɛ, mɛi pii ni ŋmɛnɛ amɛshiɔ kpe ni amɛhiɛ kaa shi lɛ baahi wala mli ni amɛna enɛ. (1 Tesalonikabii 5:4-6) Abaahere “asafo babaoo . . . ni jɛ jeŋ maŋ fɛɛ jeŋ maŋ” ni tsɔɔ hemɔkɛyeli yɛ Yehowa kpɔmɔ he gbɛjianɔtoo kɛtsɔ Kristo nɔ lɛ mli lɛ yiwala kɛjɛ “amanehulu kpeteŋkpele” lɛ mli ni amɛyana naanɔ toiŋjɔlɛ ni jɛ Nyɔŋmɔ ŋɔɔ lɛ mli ŋɔɔmɔ kɛya naanɔ. (Kpojiemɔ 7:9-17; 21:3, 4) Eba akɛ ooofee amɛteŋ mɔ kome!b
[Shishigbɛ niŋmai]
a Wolo ni aŋma ni ji World Military and Social Expenditures 1985.
b Ajie kɛjɛ October 1, 1986 Watchtower lɛ mli.
Te Obaaha Hetoo Oha Tɛŋŋ?
◻ Mɛni hewɔ ‘bei kɛ yinɔi’ he hiaa Nyɔŋmɔ kɛ Wɔ hu lɛ?
◻ Te esa akɛ wɔfee wɔnii yɛ “Yehowa gbi” ni baa lɛ he wɔha tɛŋŋ?
◻ Namɛi naa bolɔmɔ ni yɔɔ 1 Tesalonikabii 5:3 lɛ mli gbɛfaŋnɔ, ni yɛ mɛɛ be?
◻ Mɛɛ saji ni hiɛdɔɔ yɔɔ mli nakai bolɔmɔ lɛ kɛbaa?