Wɔhiɛ Ni Aaahi Wɔhe Nɔ Yɛ ‘Toiŋjɔlɛ Kɛ Shweshweeshwe Shihilɛ’ Ni Jeŋmaji Lɛ Kɛbaa Lɛ He
“Be mli ni amɛaakɛɛ akɛ: Hejɔlɛ yɛ ní wɔyɛ shweshweeshwe! lɛ.”—1 TESALONIKABII 5:3.
1, 2. (a) Mɛni hewɔ toiŋjɔlɛ ebatsɔ nilee gbɛ ni hi lɛ? (b) No hewɔ lɛ, mɛni ji nɔ ni maŋkwramɔŋ gbɛjianɔtoi ni teɔ shi shiɔ amɛhe lɛ baakpɛlɛ nɔ?
BE KO bako ni adesai ajeŋ muu lɛ fɛɛ bɛ shweshweeshwe taakɛ eji ŋmɛnɛ lɛ dã. Jeŋ ta ni ji etɛ ni baaya nɔ yɛ jeŋmaji ni kɛ tawuu nii ewula amɛhe waa, ni yɔɔ naagbee tawuu nii—nuklea okplɛm-lɛ ateŋ lɛ he gbeyeishemɔ henumɔ yɛ. Nyɛmɔ ni jeŋmaji lɛ yɔɔ ni amɛkɛ atɔm nɛɛ aaatsu nii yɛ tawuu mli kɛ amɛ etee shɔŋŋ kɛyashɛ he ni amɛbaashɛ yɛ adesa weku lɛ hiɛkpatamɔ mli. No hewɔ lɛ, toiŋjɔlɛ ebatsɔ nilee gbɛ ni hi.
2 Hɛɛ, yɛ wɔbe nɛɛ mli lɛ, jeŋ ta ni ji etɛ ni akɛ okpɛlɛmii ni tamɔ nɛkɛ aaawu lɛ baatsɔɔ je lɛ fɛɛ hegbee, gbɔmɛi baalaaje kwraa ni amɛbɛ dɔŋŋ aloo nibii ni baajɛ nuklea tawuu nɛɛ mli aba lɛ baakpata amɛhiɛ kwraa. Maŋkwralɔi kɛ tatsɛmɛi ni kwɛɔ nii kɛyaa shɔŋŋ lɛ kɛ dɔlɛ nuɔ enɔkwa sane nɛɛ he nakai. Amɛsumɔɔɔ ni amɛtsɔmɔ mɛi ni jeŋ muu fɛɛ hiɛkpatamɔ nɛɛ jɛ amɛ. No hewɔ lɛ, maŋkwramɔŋ gbɛjianɔtoi enyɔ ni kɛ amɛhe wuɔ lɛ baasumɔ ni amɛkpa gbee, hɛɛ, ni amɛnyiɛ jeŋnilee mli wiemɔ nɛɛ sɛɛ akɛ “hii shi ni wɔ hu wɔhi shi.”
3. Mɛɛ yiŋtoo hewɔ ni jeŋmaji lɛ baajaje Toiŋjɔlɛ kɛ shweshweeshwe shihilɛ?
3 Ni kɛlɛ, jeŋmaji lɛ heee amɛhe amɛyeee tsɔ. No hewɔ lɛ, amɛhiɛ amɛtawuu mli gbɛjianɔtoi lɛ amli lolo kɛ hewalɛ tɛɛ koni amɛkɛ bu amɛhe. No hewɔ lɛ, ani anɔkwale suɔmɔ diɛŋtsɛ ni amɛyɔɔ kɛha amɛhe ákɛ adesa weku kome mlibii hewɔ ni nɔyelɔi lɛ baafee ekome ni amɛjaje ‘Toiŋjɔlɛ kɛ shweshweeshwe shihilɛ’ kɛha adesai aje le tɛɛ lɛ? Dabi, shi bɔni afee ni amɛkɛba gbeyei ni gbɔmɛi lɛ sheɔ yɛ gbɛ ni ja nɔ lɛ shi.—1 Tesalonikabii 5:3.
Osɔfoi Kɛ Maŋsɛɛ Anifeemɔ Yɛ Sanejajemɔ Ni Baa Lɛ He
4, 5. (a) Mɛni ji nɔ ni maŋbii lɛ baafee yɛ sanejajemɔ ni baa lɛ he ni esa akɛ wɔkpa gbɛ? (b) Yɛ bɔ ni osɔfoi lɛ fiɔ sanejajemɔ ni baa lɛ sɛɛ lɛ fɛɛ sɛɛ lɛ, mɛɔ sanebimɔi teɔ shi yɛ Nyɔŋmɔ ni aaafi enɛ sɛɛ lɛ he?
4 Kɛ ana ajaje sane nɛɛ yɛ naagbee pɛ lɛ, gbɔmɛi ni yɔɔ he fɛɛ he yɛ shikpɔŋ muu lɛ fɛɛ nɔ lɛ kɛ miishɛɛ baakpɛlɛ nɔ. Ŋwanejee ko bɛ he akɛ je lɛŋ jamɔ mli hiɛnyiɛlɔi, ni Kristendom osɔfoi ni ji Katolekbii ni Protestantbii hu fata he lɛ baajie majimaji ateŋ nifeemɔi nɛɛ yi. He fɛɛ he ni kɔɔyɔɔ lɛ aaatswa kɛaaya lɛ, osɔfoi lɛ hu nyiɛɔ sɛɛ nakai nɔŋŋ bɔni afee ni amɛhiɛ gbɛi ni amɛhe lɛ kɛ amɛhe ni asusuɔ lɛ mli.
5 Shi maŋkwramɔŋ gbɛjianɔtoo lɛ ni ajajeɔ ehe sane babaoo lɛ ni osɔfoi lɛ fiɔ sɛɛ lɛ etsɔɔɔ akɛ jeŋ muu fɛɛ ni wɔshikpɔŋ lɛ fata he lɛ Nyɔŋmɔ lɛ baafi enɛ sɛɛ. Osɔfoi lɛ baanyɛ ni amɛfi enɛ sɛɛ kɛjɛ amɛsɔlemɔtsui amli ni amɛsɔle sɔlemɔi kakadaji babaoo ni mɛi ni fiɔ amɛsɛɛ yɛ amɛjamɔ mli lɛ anu ni amɛbi ŋwɛi jɔɔmɔi amɛshwie gbɛjianɔ ni maŋkwramɔŋ nɔyelɔi lɛ toɔ kɛhaa majimaji ateŋ toiŋjɔlɛ kɛ shweshweeshwe shihilɛ lɛ nɔ. Shi ani nɛkɛ sɔlemɔi kɛ hiɛdɔɔ nɛɛ fɛɛ ni asafoi ni boɔ toi lɛ kɛ hewalɛ haa hetoo akɛ “Amen” lɛ ji nɔ ko ni jeŋ muu fɛɛ Nyɔŋmɔ lɛ kpɛlɛɔ nɔ? Ani toiŋjɔlɛ aaanyɛ eba yɛ jeŋ ni jamɔ egbala emli ni esɔlemɔ kɛha toiŋjɔlɛ kɛ shweshweeshwe shihilɛ lɛ damɔ ejamɔ mli kui ni mli egbala ni kɛ amɛhe kpaaa gbee lɛ awiemɔi anɔ?
6, 7. (a.) Taakɛ blema bei amli Yudafoi lɛ fee lɛ mɛɛ nifeemɔ gbɛ hu Kristendom etsɔ nɔ? (b) mɛni baajɛ osɔfoi lɛ ni fiɔ sanejajemɔ ni ji “Toiŋjɔlɛ kɛ shweshweeshwe shihilɛ’ lɛ sɛɛ lɛ mli aba?
6 He ko he ko bɛ ni Nyɔŋmɔ sɛɛfimɔ ni ajajeɔ nɛɛ naa wa yɛ fe jeŋmaji ni yɔɔ Kristendom lɛ. Shi jeŋ muu fɛɛ Nyɔŋmɔ lɛ jeee Mɔ ni yeɔ Kristendom nɔ. Gbɛ ni ekɔ Iɛ tamɔ blema Israel gbɛ Iɛ pɛpɛɛpɛ. Beni Yehowa gbɛjianɔtoo kɛha amɛnɔyeli lɛ esaaa amɛhiɛ dɔŋŋ ni amɛtee nɔ amɛsusu akɛ maŋkwramɔŋ gbɛjianɔtoo ni jeŋmaji wɔŋjalɔi ni ebɔle amɛhe lɛ hiɛ mli lɛ moŋ hi ha amɛ lɛ, amɛtee Yehowa gbalɔ ni ji Samuel ŋɔɔ ni amɛbi lɛ koni eto maŋtsɛ yɛ amɛnɔ. Samuel sumɔɔɔ nɛkɛ sane nɛɛ kwraa ni enɛ fee lɛ awerɛho. Ni nakai nɔŋŋ enɛ ji yɛ Nyɔŋmɔ ni eji egbalɔ lɛ hiɛ.
7 Edɔ Yehowa yɛ nɛkɛ nibimɔ nɛɛ hewɔ ejaakɛ amɛtsi amɛhe kɛjɛ eteokrase gbɛjianɔtoo ni yeɔ Israel nɔ lɛ he. Ni taakɛ ekɛɛ egbalɔ Samuel lɛ: “Jeee bo amɛkwa, shi mi moŋ amɛkwa, akɛ mikaye amɛnɔ maŋtsɛ.” (1 Samuel 8:4-9) Enɛ feɔ gbɛ ni Kristendom etsɔ nɔ yɛ afii ohai 20 nɛɛ mli lɛ he mfoniri. No hewɔ lɛ, osɔfoi lɛ ni aaajaje yɛ wɔsɛɛ be mli akɛ ‘Toiŋjɔlɛ kɛ shweshweeshwe shihilɛ’ yɛ lɛ kɛ nɔkpakpa ko baŋ, ŋwɛi jɔɔmɔ ko baŋ mɔ.
Adesai Fɛɛ Ashishinumɔ
8. Mɛɛ nitsumɔ eka shi faŋŋ akɛ Jeŋmaji Ekomefeemɔ lɛ kɛ ehe baawo mli yɛ sanejajemɔ ni baa nɛɛ mli, ni mɛni hewɔ nɛkɛ gbɛjianɔtoo nɛɛ Shishiuɔ adesai lɛ?
8 Jeŋmaji Ekomefeemɔ lɛ baanyɛ apupuu ehe akɛ emlibii eyashɛ maji komekomei 159 ŋmɛnɛ, ni etɔmɔ nɔ ni jeŋmaji fɛɛ fata he. Ŋwanejee ko bɛ he akɛ yɛ be ni sa mli lɛ, Jeŋmaji Ekomefeemɔ lɛ baanyiɛ hiɛ yɛ sanejajemɔ ni baa akɛ “Toiŋjɔlɛ kɛ shweshweeshwe!’ lɛ mli. Eyɛ mɔbɔ akɛ aaakɛɛ akɛ, nakai jeŋ gbɛjianɔtoo lɛ miilaka adesai akpekpei toi akpekpei abɔ. Mɛni hewɔ eyɔɔ nakai? Ejaakɛ kɛji akɛ je nɛŋ jamɔ gbɛjianɔtoi lɛ fɛɛ fiɔ nɛkɛ toiŋjɔlɛ nɛɛ sɛɛ, ni Kristendom po fata he lɛ, no etsɔɔɔ akɛ toiŋjɔlɛ yɛ amɛkɛ jeŋ muu fɛɛ Bɔlɔ lɛ ni yɔɔ hewalɛ ni ekɛ wala aaaha, ni ehe wala lɛ hu taakɛ ekpɛ eyiŋ yɛ saji ni he hiaa lɛ yɛ ŋwɛi kɛ shikpɔŋ nɔ lɛ he lɛ teŋ.
9, 10. Mɛni ji Yehowa Odasefoi ashidaamɔ yɛ ‘Toiŋjɔlɛ kɛ shwehsweeshwe shihilɛ’ ni jeŋmaji lɛ tsɔ̃ɔ he ŋaa lɛ he, ni mɛni hewɔ?
9 Bɔlɔ lɛ kɛɛ yɛ faŋŋ mli yɛ Yesaia gbalɛ lɛ mli akɛ: “Ŋwɛi lɛ, misɛi ni, ni shikpɔŋ lɛ, minane shi maaŋoo ni.” (Yesaia 66:1) Jeŋmaji ni yɔɔ biɛ yɛ enane shi maaŋoo nɛɛ nɔ lɛ kɛ Jeŋmaji Ekomefeemɔ gbɛjianɔtoo lɛ wooo ehiɛ nyam. Amɛmiibɔ mɔdɛŋ yɛ maŋkwramɔŋ ni amɛkɛ jeŋ muu fɛɛ toiŋjɔlɛ kɛ shweshweeshwe shihilɛ aba ni amɛtsɔ no nɔ amɛha Jeŋmaji Ekomefeemɔ lɛ ahi shi. Yehowa Odasefoi ni amɛjɔɔ amɛhe nɔ ni yɔɔ shikpɔŋ nɛɛ nɔ lɛ nyɛŋ ni amɛkɛ amɛhe abɔ je lɛ he ni amɛkɛ amɛhiɛ afɔ adesa gbɛjianɔtoo ni jeŋmaji lɛ tsuɔ he nii koni amɛkɛ toiŋjɔlɛ kɛ shweshweeshwe shihilɛ aba lɛ nɔ. Amɛkɛ wiemɔi ni yɔɔ Yakobo 4:4 lɛ toɔ amɛtsui mli: “Gbalafitelɔi! Nyɛleee akɛ je nɛɛ hedɔɔ lɛ Nyɔŋmɔ nyɛɛ ni lo? No hewɔ lɛ mɔ fɛɛ mɔ ni sumɔɔ akɛ etsɔ je nɛɛ hedɔlɔ lɛ, etsɔ Nyɔŋmɔ henyɛlɔ.”
10 Eyɛ mli akɛ Yehowa Odasefoi eteee shi amɛwooo toiŋjɔlɛ kɛ shweshweeshwe shihilɛ ni jeŋmaji lɛ etsɔ he ŋaa lɛ moŋ, shi amɛnyɛŋ amɛjie yi amɛha gbɔmɛi akpekpei abɔ ni taoɔ shweshweeshwe shihilɛ yɛ be mli ni je lɛ haomɔ be ni da fe fɛɛ lɛ aaafɛ ni ekpata nibii agbɛjianɔtoo nɛɛ hiɛ lɛ. (Mateo 24:21) Ejaakɛ Nyɔŋmɔ nibii agbɛjianɔtoo hee Iɛ pɛ ji nɔ ni kɛ jeŋ muu fɛɛ shweshweeshwe shihilɛ baaba yɛ “Hejɔlɛ Lumɔ” ni ji Yesu Kristo shishi.—Yesaia 9:6, 7.
11. Te osɔfoi lɛ susu yiŋkpɛɛ akɛ abaato Jeŋmaji Akpaŋmɔ lɛ ama shi yɛ Jeŋ Ta I sɛɛ lɛ he amɛha tɛŋŋ?
11 Yinɔsane yeɔ yaka ni gbɔmɔ gbɛjianɔtoo kɛha toiŋjɔlɛ efee lɛ he odase. Wɔkaiɔ akɛ yɛ Jeŋ Ta I naagbee yɛ 1918 lɛ, ato yiŋ akɛ Jeŋmaji Akpaŋmɔ lɛ ji nɔ ni baatsĩ jeŋ ta naa. Amerika Kristofoi Asɔlemɔi Agwabɔɔ lɛ jie nɛkɛ yiŋtoo nɛɛ yi ni ekɛɛ akɛ: “Nɛkɛ Kpaŋmɔ nɛɛ jeee maŋkwramɔŋ nɔ ko ni sa kɛkɛ: shi moŋ, eji Nyɔŋmɔ Maŋtsɛyeli Iɛ kpojiemɔ yɛ maŋkwramɔŋ yɛ shikpɔŋ nɔ.” Shi ani nakai nɔ ni akɛɛ eji Nyɔŋmɔ shikpɔŋ nɔ maŋtsɛyeli lɛ kpojiemɔ yɛ maŋkwramɔŋ lɛ kɛ naanɔ toiŋjɔlɛ kɛ shweshweeshwe shihilɛ ba shikpɔŋ nɔ?
12. (a) Kpojiemɔ 17:8 eba mli yɛ mɛɛ gbɛ nɔ? (b) Namɔ etee nɔ eta “Kooloo ni tsuɔ tamɔ muneele” lɛ nɔ, ni be enyiɛ nɛ?
12 Etamɔ Okadi “kooloo ni tsuɔ tamɔ muneele” ni yɔɔ Kpojiemɔ yitso 17, ni blema ajwamaŋ “Babilon kpeteŋkpele” Iɛ etu eta enɔ lɛ, Jeŋmaji Akpaŋmɔ lɛ laaje kɛtee “bu kwɔŋkwɔŋ lɛ mli” yɛ be mli ni Jeŋ Ta II fɛ yɛ 1939 lɛ. Enɛ, nyɛ ajwamaŋ lɛ ni ta enɔ le nɔ koni ehuru eyi shi kɛjɛ esɛɛ. Beni Jeŋ Ta II ba naagbee yɛ 1945 lɛ, ato Jeŋmaji Ekomefeemɔ lɛ ama shi akɛ Jeŋmaji Akpaŋmɔ lɛ ni nyɛɛɛ adamɔ shi lɛ sɛɛyelɔ. Emlibii lɛ fa babaoo fe Kpaŋmɔ lɛ, no hewɔ lɛ esa akɛ efee gbɛjianɔtoo ni he wa ni esa akɛ adesai aje lɛ kɛ amɛhiɛ afɔ enɔ babaoo. No hewɔ lɛ, afi 1946 mli ni okadi “kooloo ni tsuɔ tamɔ muneele” lɛ fa kpo kɛjɛ “bu kwɔŋkwɔŋ lɛ mli” ni okadi ajwamaŋ lɛ ni ji “Babilon kpeteŋkpele” lɛ tu eta enɔ ekoŋŋ ni jɛmɛ ji he ni eta kɛ hiɛgbele kɛbashi ŋmɛnɛ lɛ. (Kpojiemɔ 17:3, 5, 8) Shi amrɔ nɛɛ lɛ etsɛŋ yɛ esɛɛ, taakɛ Kpojiemɔ 17:16–18:24 egba efɔ shi lɛ. Mɛni hewɔ?
13. (a) Mɛni ji Jeŋmaji Ekomefeemɔ lɛ? (b) Aje jeeŋmɔ beebe afee he mfoniri yɛ mɛɛ gbɛ nɔ?
13 Yɛ anɔkwale mli lɛ Jeŋmaji Ekomefeemɔ lɛ ji jeŋ fɛɛ ekome ni afee ni akɛte shi awo Yehowa Nyɔŋmɔ kɛ e-Dasefoi ni amɛjɔɔ amɛhe nɔ yɛ shikpɔŋ nɔ lɛ. Eji yinɔ apam diɛŋtsɛ ni atee, ni jeŋmaji lɛ fɛɛ efee yitso kome ni amɛmiitsɔ ŋaa yɛ nɔ ni amɛbafee amɛshi Yehowa Nyɔŋmɔ gbɛjianɔtoo ni anaa yɛ shikpɔŋ nɔ lɛ. Nɔ ni feɔ he mfoniri yɛ “nibii agbɛjianɔtoo nɛɛ naagbee” lɛ ji yinɔ apam ko ni awie he yɛ Yesaia 8:12.—Mateo 24:3.
Nyɛkwɛa Yehowa Gbɛ Kɛha Toiŋjɔlɛ Kɛ Shweshweeshwe Shihilɛ
14. Mɛni hewɔ Israel akutsei nyɔŋma maŋtsɛyeli lɛ kɛ Siria fee ekome lɛ, ni mɛɛ sanebimɔ baka Yuda maŋtsɛyeli lɛ hiɛ?
14 Dani Yesaia be lɛ aaashɛ lɛ, no mli lɛ Israel akutsei 12 lɛ mli egbala yɛ maŋtsɛyeli he sane hewɔ. Enɛ ba mli yɛ Maŋtsɛ Salomo anunyam nɔyeli lɛ sɛɛ. Akutsei nyɔŋma ni tse amɛhe kɛtee kooyigbɛ lɛ to nɔ ni abale akɛ Israel maŋtsɛyeli lɛ, ni emaŋtiase yɛ Samaria. Akutsei enyɔ ni shwɛ lɛ, Yuda kɛ Benyamin akutsei lɛ hi shi akɛ mɛi ni yeɔ Maŋtsɛ David odehei anɔyeli lɛ anɔkwale yɛ Yerusalem ni ji maŋtiase lɛ. Israel akutsei nyɔŋma maŋtsɛyeli lɛ kɛ gbeyei te shi wo Yuda akutsei enyɔ maŋtsɛyeli lɛ. Yɛ be ni sa mli lɛ, Israel maŋtsɛyeli lɛ kɛ Siria maŋtsɛyeli ni emaŋtiase ji Damasko lɛ fee kpaŋmɔ. Jwɛŋmɔ lɛ ji ni abutu Yuda maŋtsɛyeli lɛ ni aba lɛ shi. Ani esa akɛ Yuda maŋtsɛyeli lɛ hu kɛ maŋ kroko ni he wa afee ekome ni amɛnyɛ amɛdamɔ tutuamɔ ni Israel maŋ Iɛ ni kɛ wɔŋjalɔi amaŋ ni ji Siria efee ekome lɛ kɛaaba amɛ nɔ lɛ naa? —Yesaia 7:3-6.
15. (a) Mɛni ji nɔ ni mɛi komɛi ni yɔɔ Yuda maŋtsɛyeli lɛ mli lɛ sumɔɔ, ni nɛkɛ su nɛɛ jieɔ mɛni kpo? (b) Gbalɔ Yesaia wie eshi nɛkɛ su nɛɛ yɛ mɛɛ gbɛ nɔ?
15 Mɛi yɛ Yuda maŋtsɛyeli bibioo lɛ mli ni bɛ hemɔkɛyeli yɛ amɛmaŋ Nyɔŋmɔ ni ji Yehowa lɛ mli. Mɛnɛɛmɛi miisumɔ ni amɛkɛ maji krokomɛi afee ekome, aloo amɛkɛ je nɛɛ wɔŋjamɔ maŋtsɛyeli ko ni he wa akpaŋ. Yɛ be mli ni amɛbiɔ kɔŋtso kome ni tsɔɔ anɔkwale ni ayeee ni Yehowa maŋtsɛyeli ni ji Yuda kɛ maŋtsɛyeli kroko ni jɛ je ni leee Nyɔŋmɔ nɛɛ mli lɛ aaafee lɛ, amɛteŋ mɛi komɛi miibolo akɛ, “Apam!” kɛmiiwo mɛi ni nyɛɛɛ amɛto amɛyiŋ ni yɔɔ Yuda lɛ mli lɛ. Enɛ tsɔɔ akɛ amɛjie hemɔkɛyeli kɛ hekɛnɔfɔɔ ni amɛbɛ yɛ Nyɔŋmɔ ni esɔlemɔwe yɔɔ Yerusalem lɛ mli. Akɛ mumɔ tsirɛ gbalɔ Yesaia koni ewie eshi nɛkɛ apam nɛɛ, ni ewie yɛ yitso 8 kuku 12 akɛ: “Nɔ fɛɛ nɔ ni maŋ nɛɛ tsɛɔ apam lɛ, nyɛkatsɛa no apam, ni asaŋ amɛgbeyei ni amɛsheɔ lɛ, nyɛkashea, ni nyɛtsui akafaa!”
16, 17. Mɛni tsɔɔ anɔkwale toiŋjɔlɛ kɛ shweshweeshwe shihilɛ kɛha Yehowa webii ni hi shi yɛ blema, ni yɛ mɛɛ gbɛ nɔ afee enɛ he mfoniri yɛ be mli ni Ashur Mantsɛ Sanherib wo Yerusalem he gbeyei lɛ?
16 Akɛni Yehowa kɛ gbɔmɛi lɛ ebote kpaŋmɔ wekukpaa ko mli hewɔ lɛ, enɛ tsɔɔ toiŋjɔlɛ kɛ shweshweeshwe shihilɛ kɛha amɛ. Ajie enɛ kpo yɛ be mli ni Ashur maŋtsɛ Sanherib tsu ajinafoi etɛ ko ni ji emaŋ lɛ mli onukpai ni amɛbakɛɛ Maŋtsɛ Hezekia kɛ ewebii ni yɔɔ Yerusalem lɛ ni amɛba amɛhe shi amɛha Sanherib lɛ, Ashur onukpa kɛ naawielɔ, Rabshake damɔ Yerusalem gbogboi lɛ hiɛ ni esopa Yehowa Nyɔŋmɔ bɔni afee ni ekɛgbɔjɔ aloo ekɛfite hekɛnɔfɔɔ ni Yudafoi lɛ yɔɔ yɛ E-mli lɛ. Akɛni sane nɛɛ dɔ Maŋtsɛ Hezekia waa ni eye awerɛho yɛ bɔ ni aba enɔkwa Nyɔŋmɔ hiɛkalɔ kome pɛ ni ji Yehowa lɛ shi ni agbɛnɛ eeshe Yerusalem hiɛkpatamɔ gbeyei yɛ nɛkɛ Ashur ta babaoo nɛɛ hiɛ hewɔ lɛ, etee sɔlemɔwe lɛ ni ekɛ sane lɛ yafɔ Yehowa Nyɔŋmɔ hiɛ. Akɛni Yehowa hiɛ sɔ hemɔkɛyeli ni mli wa ni eyɔɔ yɛ emli nɛɛ ni ebi koni ejie ejeŋ muu fɛɛ maŋtsɛ ni eji lɛ kpo hewɔ lɛ, Yehowa ha lɛ hetoo ni sa. Egbalɔ Yesaia yafata ehe kɛ wiemɔi ni maa enɛ nɔ mi. Afooo Ashurnyo Rabshake hegbeyeiwolɔ lɛ daaŋ kwraa, taakɛ bɔ ni Maŋtsɛ Hezekia efa lɛ.—2 Maŋtsɛmɛi 18:17-36; 19:14-34.
17 Ŋwanejee ko bɛ he akɛ akɛni enaa kpɛ ehe yɛ edaaŋ ni afooo nɛɛ hewɔ lɛ, Rabshake ku esɛɛ kɛtee Sanherib ŋɔɔ, no mli lɛ eewu ta eshi Libna. (2 Maŋtsɛmɛi 19:8) Beni enu Rabshake amaniɛbɔɔ lɛ sɛɛ lɛ, Sanherib tsu ni akɛ woji ni aŋmala ni woɔ Hezekia he gbeyei ayabɔ lɛ kɔkɔ akɛ: “Kaaha o-Nyɔŋmɔ lɛ ni ohiɛ ka enɔ lɛ miilaka bo akɛ: Akɛ Yerusalem woŋ Ashur maŋtsɛ lɛ dɛŋ!” (2 Maŋtsɛmɛi 19: 9, 10) Beni je na lɛ, Yehowa Nyɔŋmɔ diɛŋtsɛ wie etsɔɔ Ashur otsame, Rabshake, ni Lɛ diɛŋtsɛ eha Sanherib hegbeyeiwoo ni eŋma lɛ hetoo koni ekɛtsɔɔ akɛ Lɛ ji mɔ ni he wa fe Ashur maŋtsɛmɛi anyɔŋmɔ lɛ. Sane ni ba nɛɛ naagbee taakɛ atsɔɔ mli yɛ 2 Maŋtsɛmɛi 19: 35 lɛ kɛɔ akɛ: “Ni eba mli akɛ nakai nyɔɔŋ lɛŋ nɔŋŋ lɛ Yehowa bɔfo lɛ je kpo tee ni eyagbe Ashur ŋsara lɛŋ mɛi akpei oha kɛ nyɔŋmai kpaanyɔ kɛ enumɔ; ni beni amɛte shi leebi maaŋkpa lɛ, naa, amɛ fɛɛ tswɛm amɛtsɔmɔ gbohii sɔŋŋ.” Beni Ashurbii ni amɛje mli lɛ ni eka shi faŋŋ akɛ Maŋtsɛ Sanherib ni ekolɛ Rabshake fata ehe lɛ te shi leebi maŋkpa lɛ, amɛna nii ni woɔ mɔ he gbeyei ni ebɔle amɛhe ni ji mɛi ni kɛ Yehowa Nyɔŋmɔ wuɔ ta lɛ agbohii lɛ.
18. (a) Mɛni jɛ mli ba ha Sanherib ni taoɔ anunyam lɛ? (b) Mɛɛ nɔkwɛmɔ nɔ esa akɛ nɛkɛ yinɔsane mli sane ni ba nɛɛ afee aha Yehowa Odasefoi ni yɔɔ ŋmɛnɛ lɛ?
18 Akɛni aye enɔ kunim yɛ nɛkɛ ehiɛnyam taomɔ ŋaa gbɛ ni etsɔ nɔ ekɛte shi ewo Yehowa gbɛjianɔtoo lɛ kɛ bɔ ni aba lɛ shi kwraa aha hewɔ lɛ, Sanherib kɛ oyaiyeli ku esɛɛ “kɛ hiɛgbele” kɛtee emaŋtiase ni ji Ninive mli ni lɛ diɛŋtsɛ emusuŋbii enyɔ gbe lɛ. (2 Kronika 32:21; 2 Maŋtsɛmɛi 19:36, 37) Ashur maŋtsɛyeli lɛ gbaaa Yehowa gbɛjianɔtoo ni anaa lɛ naa dɔŋŋ. Biɛ ji he ni abu jeŋ muu fɛɛ maŋtsɛ ni Ŋwɛi Flooflo Nyɔŋmɔ lɛ ji lɛ bem yɛ ni je kpo waa diɛŋtsɛ. Agbɛnɛ, Yerusalem yi ni abaa lɛ ji nɔkwɛmɔ nɔ ni nɔ bɛ ni tsɔɔ mɔ ni esa akɛ Yehowa Odasefoi ni yɔɔ ŋmɛnɛ lɛ kɛ amɛhiɛ afɔ enɔ kwraa kɛha daa toiŋjɔlɛ kɛ shweshweeshwe shihilɛ ni yɔɔ kpoo ni naagba bɛ mli—jeee maŋkwramɔŋ apam shi moŋ Yehowa Nyɔŋmɔ.
Wɔhiɛ Ni Aaahi Wɔhe Nɔ
19. Mɛni ji nɔ ni Buu Mɔɔ Asafo lɛ baaya nɔ afee?
19 Bɔni afee ni aye abua bo ni ohiɛ ahi ohe nɔ lɛ, Buu Mɔɔ Asafo lɛ baaya nɔ ni ekɛ kɔkɔbɔɔ ni sa yɛ ebe naa pɛpɛɛpɛ aha mɛi ni kaneɔ wolo nɛɛ bɔni afee ni “Toiŋjɔlɛ kɛ shweshweeshwe shihilɛ” ni akwaa ajajeɔ, ni nibii agbɛjianɔtoo momo nɛɛ mli jeŋmaji lɛ etsɔ̃ he ŋaa lɛ akabanina bo trukaa ni akɛmiishishiuo.
20. Mɛni hewɔ Yehowa Odasefoi biŋ ni akɛ he afɔ ‘Toiŋjɔlɛ kɛ shweshweeshwe’ ni baa lɛ nɔ lɛ, no hewɔ lɛ, enɛ ji be kɛha mɛni?
20 Yehowa Odasefoi ni amɛjɔɔ amɛhe nɔ lɛ biŋ ni akɛ he afɔ Toiŋjɔlɛ kɛ shweshweeshwe shihilɛ’ ni jeŋmaji lɛ kɛ hekɛnɔfɔɔ baajaje atsɔɔ lɛ nɔ; ni asɛŋ amɛjieŋ mɛi ni tsɔ̃ nɛkɛ jeŋmaji ateŋ ‘Toiŋjɔlɛ kɛ shweshweeshwe shihilɛ’ he ŋaa nɛɛ hu yi, ni yɛ nakai beaŋ nɔŋŋ lɛ Yehowa Nyɔŋmɔ kɛ amɛ ahi shi. Amɛkwɛɔ amɛhe nɔ jogbaŋŋ yɛ kpaŋmɔ ni akɛ nibii agbɛjianɔtoo momo nɛɛ mli jeŋmaji aaakpaŋ lɛ he. Amɛkaiɔ amɛhe yɛ be fɛɛ mli akɛ afɔ “maŋ” ko ni etse ehe ni esoro lɛ kwraa yɛ Jeŋmaji Akpaŋmɔ lɛ he yɛ ta lɛ sɛɛ afi ni ji 1919 mli. Nɛkɛ “maŋ” hee nɛɛ miida kɛmiiya nɔ ni eelɛɛ yɛ shikpɔŋ muu lɛ fɛɛ ‘nɔ taakɛ Yesaia 60:22 gba fɔ shi lɛ: “Mɔ bibioo ko aaatsɔ mɛi akpe, ni mɔ fioo hu aaatsɔ maŋ ni wa; kɛ shɛ ebe lɛ, mi Yehowa maha afee oya!” Hɛɛ, enɛ ji be ni esa akɛ mɔ fɛɛ mɔ aha ehiɛ ahi ehe nɔ yɛ “Toiŋjɔlɛ kɛ shweshweeshwe shihilɛ’ ni jeŋmaji lɛ etsɔ̃ he ŋaa ni baa lɛ he.
[Shishigbɛ niŋmai]
Ajie kɛjɛ September 1,1987 Watchtower
Te Obaaha Hetoo Oha Tɛŋŋ?
◻ Te gbɔmɛi baafee amɛnii amɛha tɛŋŋ yɛ Sanejajemɔ ni ji ‘Toiŋjɔlɛ kɛ shweshweeshwe shihilɛ’ lɛ he?
◻ Mɛni akɛfee ‘apam’ ni yɔɔ Yesaia 8:12 lɛ he mfoniri?
◻ Jeŋmaji Ekomefeemɔ lɛ miishishiu adesai yɛ mɛɛ gbɛ nɔ?
◻ Mɛni hewɔ Yehowa Odasefoi efeŋ mɛi ni aaanyɛ ashishiu amɛ lɛ?
[Mfoniri ni yɔɔ baafa 7]
Ŋwanejee ko bɛ he akɛ Jeŋmaji ekomefeemɔ baanyiɛ hiɛ yɛ ‘Toiŋjɔlɛ kɛ shweshweeshwe shihilɛ!’ jajemɔ ni baa lɛ mli
[Mfoniri ni yɔɔ baafa 10]
Ashur nɔyeli lɛ mli onukpa ko Rabshake sopa Israel Nyɔŋmɔ lɛ, shi nɔ ni jɛ mli ba lɛ tsɔɔ akɛ anɔkwale toiŋjɔlɛ kɛ shweshweeshwe shihilɛ baa kɛjɛɔ Yehowa Nyɔŋmɔ pɛ ŋɔɔ.